الكبيره ٢ بقلم / لولو_محمد

الحلقه ١٢٤

(((((( الكبيره ٢)))))))
#لولو_محمد
الحلقه ١٢٤
الراجل / انت ناوى على ايه
حاتم يشاور له يسكت و يباصي له ورقه و قلم
حاتم / هصفى شغلى هنا و اسافر مش سلق بيض هو
حاتم يكتب " مش هعمل حاجه و مش هتحرك من مكانى ما تخافش"
الراجل/ يا ابنى الناس دول احنا مش قدهم
حاتم / عارف انك وعدتهم انى هسافر و انا ما قولتش لا هسافر ... بس ما ينفعش ارمى تعبى طول الفتره اللى فاتت كله فى الارض يومين تلاته بس و هخلص كل حاجه و اسافر و الله
الراجل / و تضمن انهم يسكتوا على اليومين دول ؟
حاتم / هو انا بعمل حاجه دا انا بدير الشغل كله من اوضتى
الراجل / حاتم
حاتم / بابا هو انا عمرى كسرت لك كلمه قبل كدا
الراجل / و انت من امتى ريحتنى
حاتم / امال مضايق من ايه بقي المرادى
الراجل ينفخ و يسيب المكان و يمشي و حاتم بيضحك
.........................
فى اوضه عباده
عباده / انا مخنوق منها يا خديجه مش هتبقي دى اخرتها
خديجه / لم ما تفرطش يا عباده
عباده / اعمل ليها اكتر من كدا ايه دى ما عملتش لزعلى حتى خاطر
خديجه / عارفه بس انا متاكده انها مضايقه جدا من الموضوع ده و انك لو اتكلمت معاها هتحلوه سوا
عباده / هتراضيني ... و بعدين ... انا ما عادش ليا كلمه عليها ... نجاه بقت حد تانى انا ما اعرفوش ... المصيبه انها ما عادتش مقتنعه بكلامنا اصلا ... ماشيه ورا الزفت ده و غاسل ليها دماغها
خديجه / و هى بتشوفه امتى
عباده / انتى ما بتشوفيش حاجه ... نفس الكلام نفس الأفكار ... عنيهم يا خديجه ... عنيهم
خديجه/ مش نجاه يا عباده
عباده / ليه مش بنت
خديجه/ بنت بس مش اى بنت 
عباده / و الله انتى غلبانه الواد حلنجى و مش مديها فرصه و عاوز قطم رقبته
خديجه / طب هو ابن ستين فى سبعين ... هتسيبها لدماغها و لا هتقرب منها و تصاحبها و تاخدها تحت باطك
عباده يبص لها
خديجه / ما لهاش غيرك على فكره دا دورك كاب و بعدين هى سنها كدا
عباده / هتقولى مراهقه و كدا !! كبرت على الكلام ده
خديجه / و لا كبرت و لا حاجه
عباده/ لا كبيره الكلام ده للعيال اللى فى اعدادى و ثانوى اللى قدها متجوزين و فاتحين بيوت
خديجه / الله !! من امتى الكلام ده
عباده/ يووووه بقي
خديجه تطبطب على كتف عباده يبص لها
خديجه/ روح لها خدها فى حضنك
عباده / الصباح رباح
خديجه / بكيفك ... انا هنام بصراحه جسمى مكسر لسه من ساعه الفرح
عباده/ تصبحى على خير
خديجه / و انت من اهله يا قلبي
.......................
فى شقه احلام
قاسم واخد احلام فى حضنه
احلام / و ما دام سمعتنا ما ردتش عليا ليه من ساعتها ؟
قاسم / عشان مش عاوزه تتكلمي معايا فى الموضوع
احلام / يا سلام
قاسم / مش انتى بالصدفه برده بتسمعي كلام فى السرايا بتعملى نفسك ما سمعتيهوش انا كدا برده
احلام / مش معايا لو سمحت ... انا بحتاج اتكلم و خصوصا اننا لسه بنبدا ما ينفعش نسكت و نسيب الشيطان يدخل بينا و نقعد نفكر و كدا
قاسم / دا كلام جميل اوى ما تطبقيه يا لولو
احلام / طبقته بدليل انى سألتك و بعدين انت برده ما جاوبتش ... انت هتبقي كدا معايا العمر كله
قاسم / انا مقدر انك اتربيتي فى بيئه مقفوله و دا بقي نادر جدا فى الزمن ده بس مش لدرجه انك تسالى سؤال زى ده او حتى تفكرى فيه
احلام/ ليه لا
قاسم / عشان ده الطبيعي انه يحصل
احلام/ بس مش بعد ما توعدني انه مش هيحصل
قاسم/ لا قولت هاجله لحد ما تهدى
احلام / و ما صبرتش
قاسم / هو كان وحش اوى كدا ؟!
احلام / ما تغيرش الموضوع انت فاهم قصدى
قاسم/ لا مش فاهم
احلام / تمام ... هفهمك ... انا ما ينفعش اعيش بالأمر الواقع ما ينفعش تنيمنى و فجاه الاقى وضع مش عاجبنى
قاسم / يعني هو ما عجبكيش
احلام / بقولك ما تغيرش الموضوع انا بتكلم فى مبدأ
قاسم/ اكيد مش كل الامور ينفع نعمل فيها كدا بس فى حاجات .. زى دى مثلا كان لازم حد يكسر حاجز الخجل و الخوف اللى كان موجود كان لازم حته كدا و بعدين انتى لو كنتى صممتى على موقفك كنت هوقف
احلام / و الملائكه تلعنى لحد الصبح انت فاكرنى مش عارفه ديني
قاسم / استغفر الله
احلام / انا مش نكديه على فكره
قاسم / عارف انك خايفه ... طبيعي ... انا فاهم و مقدر
احلام / لحد امتى ؟
قاسم/ طول ما ربنا مقدرنى هستحمل
احلام/ انا مش عاوزه اسافر و ابعد عن البلد و اهلى
قاسم يتنهد
قاسم / بس المرادى ما ينفعش... دول اهلى و من حقهم يفرحوا بيا و انا كمان من حقى اعيش شهر عسا زى الناس
احلام / هعيشك هنا عيشه ما شوفتهاش و لا هتشوفها
قاسم / متاكد من ده بس برده انا مش هقدر انسي هناك لازم نروح  .. بصي ... خلينا نروح المرادى و نعمل الفرح و ننبسط يومين الاجازه و اطمن برده على الشغل و تعيشي عيشتى و تشوفيها و لما نيجي للسفريات الجايه نتكلم و نشوف اللى انتى عوزاه ... مش يمكن تحبيهم
احلام / المهم هم يحبونى
قاسم / كفايا انا و مازن بنحبك و لا انتى شكلك طماعه و لا ايه
احلام تبص له 
قاسم / جربى ... و اوعدك مش هجبرك على حاجه ... جربى
احلام تهز راسها موافقه
.....................
فى الاسطبل
مهره راكبه فرس و قدامها مازن بتلف بيه و نجاه و جابر واقفين فى جنب
نجاه / المهله هتخلص و مفيش اى حاجه اتعملت
جابر/ الكبير ما ردش علينا فى الموضوع بحاجه
نجاه / كويس
جابر/ بمعنى ؟!
نجاه / و لا حاجه بالس
جابر / انتى لو القرار بايدك تعملى ايه ؟
نجاه/ انيمها فى العسل و اضربها على حين غفله
جابر يضحك
نجاه / اصل اللى يجيلك بالغصب هاته بجميله و اللعبه دى لعبه نسوان مش رجاله
جابر / اااااه فانتى بقي و الكام بنت اللى بيتمرنوا هتقفوا لها و احنا نقعد نستناكوا فى البيت مش كدا
نجاه / اكيد لا طبعا ... اقصد ان الحكايه دى محتاجه شغل من بتاع ان كيدهن عظيم و كدا
جابر / ما المصيبه ان دى مش منطقتك اساسا انتى اخر واحده تلعب فى الحته دى
نجاه / ايه الكلام ده
جابر / ما شوفناش منك حاجه يعني
نجاه / و انت تشوف ليه انت حبيبي
جابر / احلفى
نجاه/ وله هتغابى عليك انت فاهم قصدى
جابر / مش عاوز افهم
نجاه / خلاص اسكت مش عاوزه اتكلم خلاص
جابر / احسن حكم لما بتفتحي بقك بتكبى زباله
الاتنين كل واحد يبص فى ناحيه و بعدين جابر يبص لها
جابر / طب يا ست كيداهم حضرتك تقترحى علينا ايه نعمله
نجاه تبص له بطرف عينها و بعدين تتحمس
....................
فى اوضه فاطمه
عباده / ازاى يا امى
فاطمه / مش هتيجي الا كدا
عباده / طب ما نسيب لها البلد و نمشي بقي هو فى حد يقبل بوضع زى ده
فاطمه / هى كدا كدا فى البلد يا عباده دخلت و ربعت و عملت لنفسها بلد تحت البلد
عباده / هرفع راسي وسط الناس ازاى و انا سايب واحده زى دى تروح و تيجي فى البلد كدا لا ظابط و لا رابط
فاطمه / ايه الكلام ده لا طبعا ... الحرب البارده شغاله هى مش مستقويه بشويه كلاب و شويه نسوان خلاص ... ضرب البهائم بالعصا و ضرب النساء بالنساء
عباده / و هو فين النساء دول
فاطمه / يا خلفتى النيله... بقولك ايه ... هى فين البت نجاه هى اللى هتفهمنى
عباده / نجاه اللى هتفهمك ؟!
فاطمه / انت مش جيت تاخد رايي و انا اللى عندى قولته فكر فيها و شوف هتعمل ايه
عباده / تمام يا ست الكل تسلمى
عباده يقوم
فاطمه / اخد الحق حرفه المسأله مسأله مخ ... مش عضلات
عباده يبتسم و يهز راسه و يمشي
...................
فى الاسطبل
جابر / انا هسالك سؤال واحد ... انتى هتقدرى تقترحى الكلام ده على ابوكى ؟
نجاه تلف عنيها
نجاه / مستحيل و احنا زعلانين من بعض ... بس انت تقدر
جابر / الله !!! مش لما اقتنع انا الاول ابقي أقنعه
جوزيف يدخل من ورا نجاه من بعيد جابر يشوفه
جابر / هو جاى يعمل ايه ده ؟
نجاه تبص وراها تشوفه
نجاه / ما اعرفش هروح اللعب مع مهره شويه
نجاه تسيب المكان و تمشي جوزيف يدخل يسلم على جابر
جوزيف / السلام عليكم
جابر / و عليكم السلام ازيك عامل ايه ؟ خير ؟
جوزيف / انا الحمد لله و انت ؟
جابر / جاى ليه يا يونس ؟
جوزيف / زهقان قولت اجى اغير جو
جابر / تمام
جابر يبص على مهره
جوزيف / الموضوع اياه خلص على ايه ؟
جابر / و لا حاجه ما فيش جديد
جوزيف / انت عارف مين يقدر يساعد فى الموضوع ده
جابر يبص لجوزيف
جوزيف / شاكر
جابر / اشمعن
جوزيف/ كلمه و انت تعرف
جوزيف يسيب المكان و يمشي
جابر / دا انهى جنان ده بالظبط اللى انا عايش فيه
.........................
فى المضيفه
ست قاعده مع مختار
الست / ما انا ما يتعضليش اتنين من عيالى و الاقى ابنك قاعد ياكل و يدلع فى الكلاب
مختار / هو الكلاب البلدى اللى حوالين الشلتر هى اللى عضت أولادك و بعدين عيالك مش اطفال عيالك اتصابوا و هم بيشتغلوا و مش هم الوحيدين اللى اتعضوا
الست / حصل بس ما تاخذنيش يا باشمهندس الزمن ده خلاص انتهى
مختار / زمن ايه معلش مش فاهم
الست / زمن انك تبقي فرحان و مزقطط و لامم عيالك حواليك فى الأمان و احنا الكلاب بتنهش فى جتت عيالنا
مختار / ولادك بيشتغلوا ايه ؟
الست / انا ما ليش دعوه بالكلام ده
مختار / و لا انا ليا دعوه ... واحد جالى طلب وظيفه معينه بمواصفات معينه ابنك لو ما كانش اتعض من كلب كان ممكن يجيلك متصاب بطلقه او يمكن ميت عادى جدا دا شغله و ما اعتقدش اصلا ان ابنك عارف انك جيالى تعاتبيني على ان ابنك اتعض و ابنى لا .. انتى عارفه انا اخدت كام طلقه عنك و عن عيالك انتى فاكره انى بفضل عيالك عن عيالى ... طب ما تسالي ابنك ان كان فى يوم حس بس مش شاف الفرق ده بعنيه
الست / قولت لك ما ليش دعوه بالكلام ده انا عاوزه عيالى بخير زى ما انت عيالك بخير
مختار / اه فهمت ... و دا ايه علاقته بالكلاب اللى شاكر ابنى بياكلها
الست / اقفلوا المخروب ده من يوم ما اتفتح و دى بقت زريبه مش بلد
مختار / مش هيحصل
الست / يعني ايه مش هيحصل
مختار/ يعني مش هيحصل... و يعنى مش معنى انى مقدر اى حاجه و كل حاجه انى هقبل انك تكلميني بالطريقه دى اى كان السبب خصوصا لو بتطلبى حاجه مش من حقك اصلا بغض النظر عن الاسلوب اساسا
الست / ليك كبير يترد عليه
مختار / حقك طبعا
الست تسيب المكان و تمشي مختار يتنهد
..........................
فى سرايا الجوارحه
شاهين / بس الناس عندها حق تخاف و شاكر مزودها الصراحه
دياب / الكلاب دى وسطينا من سنين ما شوفناش منها حاجه اخرها تسرق لقمه دا لو حصل اصلا انما لا بتعض و لا بتاذى و احنا مسيطرين عليهم
شاهين / بس الشلتر لاممهم عشان عارفين ان فى هنا اكل
منصور / الخليفه عمر ابن عبد العزيز قال انثروا القمح على رؤوس الجبال لكى لا يقال جاع طير فى بلاد المسلمين
سماح / دا الطير مش كلاب بتعض و ترقد
راجل / احنا ما نقدرش نستغنى عن الكلاب دا هى اللى بتحرس الارض و المواشي و الشون
دياب / احنا اصلا عمرنا ما هنقدر نلغى الكلاب من البلد دى ارض ربنا و هم عايشين عليها أخرنا نتصدق عليهم بشويه اكل يشفع لنا ... دا اللى سقى الكلب دخل الجنه و انتوا بتتكلموا فى شويه دراى فود
مغاورى / بس الناس ليها حق تخاف يا دياب مش وقته
دياب / اللقم تزيح النقم
شاهين / دا للبنادمين
دياب / للكل لعلها المنجيه انا مش موافق و هقف مع شاكر اى كانت نهايه الموضوع ده
ماجده / طب ما ننقل الشيلتر بره البلد
الكل ينتبه
ماجده / الكلاب هتروح ورا الاكل و هتفضلوا تعملوا خير و برده تراضوا اهل البلد
شاهين / ايه رايك يا دياب ... سكت يعني
دياب / و هو انا بعترض و خلاص ما لما بيتقال كلام كويس بسكت و اسمع
شاهين / و هو فى كلام بعد كلام عمتى و الله جبتى المفيد يا ست الكل انتى يا قمر
مغاورى / نقترح عليهم الموضوع و باذن الله نحله
سماح / المهم لازم تقنع مختار يراضي الست دى
مغاورى / هى اللى غلطت
سماح / الست جت لك و كبرتك
مغاورى / انا ما احكمش على مختار هو لو غلطان هيراجع نفسه و يراضيها من غير ما اكلمه
ماجده / بس لو كلمته هيعمل لك خاطر
مغاورى يهز راسه موافق
..........................
فى مكتب الزنايته
ناصر / انا مش فاهم انت منشف دماغك ليه الكل غلط و انت الصح يعني ... انا كنت ناوى اهد المزبله دى بنفسي اصلا
شاكر / انا تعبت فى المكان ده سنين مش هيتقفل عشان خوف مش مبرر الحيوانات دى ملهاش ذنب و بعدين بتتكلموا عن الكلاب بس ليه ما المكان ده بياكل قطط بالهبل عملت ايه القطط دى كمان و عصافير بأنواعها دا ملجا حيوانات مفتوح صدقه جاريه نقفله ليه
عباده/ هننقله بس
شاكر / تمام جهز لى مكان تانى انقل فيه انما مش هقفل ده و ارمى كل التعب ده فى الشارع ... عارفين اقفلوه و اقسم بالله ألف بعربيتي كل يوم اكل الحيوانات دى بايدى فى شبر شبر فى البلد دى
ناصر / انت مكبر الموضوع ليه
شاكر/ لا المرادى الموضوع كبير ... و كبير اوى
شاكر يبص لمختار
جابر / طب ليه يونس بيقول ان حل الموضوع ده عندك
شاكر / ما عنديش فكره يقصد ايه
ناصر / ما يمكن قصده عشان انت دكتور بيطرى و كدا
شاكر / مش فاهم العلاقه
ناصر/ اكيد تعرف دوا او حاجه تهمد الكلاب دى او تنيمهم او تموتهم حتى
شاكر / يا اخى انت كل ما تفتح بقك تقول كلام اسوء من اللى قبليه ما تطلع تلم حاجتك انت مش مسافر و لا ايه
مختار/ شاكر
شاكر / يعني ما حدش علق على كلامه و واقفين لى انا على الوحده ... حقك عليا يا ناصر انا مش قادر استحمل كلمه من حد مخنوق من الموضوع من أوله لاخره
جابر / انت قابلت امايا يا شاكر
ناصر يمسك ايد شاكر
شاكر / اقسم بالله ابدا و انا لو قابلتها ما اكيد هقول هخبى ليه ... انت بجد متخيل انى ممكن اخون او اغدر
عباده / انت فوق مستوى الشبهات بس عاوزين نطمن كل اللى بيقابلها بيرجع متغير فخفنا عليك
شاكر / الأولى تخافوا على اللى قابلتها فعلا و اتغيرت انما انا على موقفى من زمان انا ما اتغيرتش
مختار / اهدى يا شاكر مش هيحصل غير اللى يرضيك
ناصر / و الكلاب
مختار/ مش هنسيب الحمار و نتشطر على البردعه... الكلاب مش هى مشكلتنا دى مجرد حيوانات... مشكلتنا فى اللى وراهم
شاكر / بس دا ما يمنعش ان لازم اتكلم مع يونس و افهم كان يقصد ايه بكلامه
...................................
فى شقه احلام
احلام و قاسم بيرتبوا شنطه
احلام / يعني مش هتاخد اى حاجه معاك خالص
قاسم / هو انا معايا حاجه هنا اصلا دا حياله هم الغيارين اللى جيت بيهم و الطقمين الجداد اللى جبتهم لزوم الفرح هسيبهم هنا و خلاص بدل ما افضل رايح جاى بيهم
احلام/ فكره حلوه دى ... انا برده ممكن ابقي اسيب ليا لبس هناك عشان ما نفضلش نشيل و نحط رايحين جايين نسافر كدا بالطقم اللى علينا و خلاص
قاسم / شوفتى الموضوع بسيط و بعدين انا عارف الحريم بتحب الشوبينج يعني عادى ممكن نرمى الشنطه دى فى الارض و نروح نجيب لك كسوه كامله من هناك نسيبها هناك
احلام / لا طبعا ما ينفعش ... انا ما ينفعش اروح كدا و احتاس و انا بدور او أنقى اى حاجه عشان مجبره انا اخد اللى هحتاجه و لو فى حاجه ناقصه اجيبها مفيش مشكله حبيت ازود تمام شوفت حاجه عجبتني ما يضرش انما اسيبها بظروفها كدا و اسافر سلبوته دا لا يمكن ابدا
قاسم يضحك
قاسم / طب شوفى انتى محتاجه تاخدى معاكى ايه عشان ننجز احنا بقالنا ساعه فاتحين الشنطه ما حطتيش غير تلت اربع قطع
احلام / ما انا اول مره اسافر و عاوزه ارتب الدنيا
قاسم / و انا عريس جديد و العمر الضايع ده خطر على نفسيتي
احلام / عمر ضايع !! ربنا يهديك يا ابنى و الله ربنا يهديك
احلام تروح ناحيه الدولاب و تنقى عبايتين
احلام / دى و لا دى و لا أقول لك ما دام مش هتاخد هدوم هاخد الاتنين ... و لا ينفع اروح بشنطتين؟
قاسم / خدى الدولاب كله يا احلام خديه كله ... هنادي اى حد من اللى تحت يجيب لينا عربيه نقل و شويه رجاله كدا يشيلوا الدولاب ده كدا هيلا بيلا ننقله فى العربيه على هناك كدا زى ما هو و نبقي نرجعه و احنا راجعين
احلام/ و ايه كمان يا ابو دم خفيف انت
قاسم / ما تافوريش يا احلام الناس شويه و هتلاقيهم بيهلوا علينا
احلام / ما توترنيش لو سمحت
قاسم/ احنا رايحين اسكندريه يعني لو احتاجتى اى حاجه ... اى حاجه ممكن تتخيليها فى مينت بتليفون كدا تلاقيها قدامك ... يا بنتى كدا كدا هننزل و نخرج و نتفسح و نروح نشترى حاجات بالهبل و هدايا للجماعة اللى هنا و احنا راجعين يعني
احلام / صحيح انا نسيت الموضوع ده خالص
قاسم/ موضوع ايه
احلام / الناس اللى هنا انا لازم اعمل لسته بالناس اللى هنا لحسن انسي حد و لا حاجه
احلام تجرى تجيب موبايلها و تقعد على السرير تكتب لسته قاسم يشيل الشنطه و يرميها فى الارض احلام تبص له ياخد منها الموبايل و يرميه فى الشنطه و يقرب عليها
احلام / قاسم !!
قاسم/ قلب قاسم
احلام تضحك و تبص الناحيه التانيه بخجل
……………………..
فى شقه جوزيف
شاكر / انت شايف كدا يعني ؟
جوزيف / انت عمرك ما سالت نفسك هى ليه ما حاولتش تقتل و لا واحد فيكوا
شاكر / كنت فاكر ان عندكوا تعليمات نفضل عايشين
جوزيف/ طول ما انتوا مفيدين للخطه … و انت اكتر واحد مفيش لحد دلوقت ... الشلتر ده مش كان فكرتها من الاول
شاكر / لا ما اعتقدش ابويا اللى اقترحه او ناصر عشان حوار الكلاب الكتير اللى كانت حطاها فى البيت عندها
جوزيف / ما دا اسلوب ممتاز للإقناع اخليك تعمل اللى انا عاوزه كانك انت اللى عاوزه و انت اللى تتحايل عليا انك تعملهولى كمان
شاكر / ايوه ايه المطلوب برده ما انا مش هقفل الشيلتر
جوزيف / الكلاب هى نقطه قوتها يا شاكر
شاكر / و ضعفها
جوزيف / حصل بس انت عمرك ما هتستغلها
شاكر/ انت زيهم عاوزنى اسم الكلاب ؟!!
جوزيف / دى تولع ما تلاقوا مايه تطفوها دى بتقطع على الكلاب اللى بتنصاب دى الكلب عندها اغلى من مليون راجل
شاكر / و مع كدا بعتت الكلاب مش الرجاله
جوزيف / اكيد فى سبب
شاكر / ايه ؟
جوزيف / ما اعرفش
شاكر / طب انا اقدر احل الموضوع ده ازاى ... غير انى اقفل الشيلتر
جوزيف / ما لهاش حل
شاكر / لا اكيد ليها انت بس اللى مش عارفه
جوزيف / جايز المهم لما انت تعرفه ما تبخلش عليا بيه
شاكر يبتسم و يهز راسه و يقوم
جوزيف / انا بحبك على فكره انت راجل كويس ... هزعل اوى لو جرالك حاجه ... ما تقفش للريح بصدرك اتعلم حاجه من ابوك
شاكر يهز راسه و يمشي و يقفل الباب وراه
......................
فى الجبل
صابر يدخل يلاقي شاكر قاعد فى جنب
صابر / ما كنتش اعرف انك واخد نوبه حراسه
شاكر / مش واخد انا بس زهقان شويه فقولت اقعد لوحدى حبه
صابر / بسبب موضوع الكلاب؟
شاكر/ انت شايف انه عادى ؟
صابر / لا بس انت مش هتغير الناس و لا العالم اخرتها ايه هيقولوا جنازه حاره و الميت كلب
شاكر / يا سيدي لا ضرر و لا ضرار
صابر / ما الكلاب ضراهم فعلا يا شاكر
شاكر / مش دول
صابر/ ما السيئه بتعم و بعدين حوار نقل الشيلتر مش وحش ابدا
شاكر/ ماشي ما اعترضتش بس لحد ما ابنى واحد تانى مش هقفل ده ... انت عارف كميه الاجهزه الطبيه اللى جواه عامله كام و لا أهميتها ايه ... احنا عاملين المكان ده على أعلى مستوى الموضوع مش مجرد اكل يا صابر
صابر / خلاص... انقل بس موضوع الاكل ده حط الاكل بعيد عن الشلتر خلى الكلاب تروح تدور على رزقها فى مكان تانى و تجيلك بس وقت العلاج
شاكر يفكر
صابر / الموضوع بسيط اقسم بالله
شاكر/ ناصر عاوزنى اسمهم او اديهم مهدئ ... اخويا عاوزنى اخالف قسمي
صابر / اكيد ما يقصدهاش بالطريقه دى
شاكر / الحيوان ده مش هيقدر يقول انا اخدت علاج غلط او انا اتغدر بيا الحيوان ده مش هيتوقع اصلا منك الغدر دا كل همه ياكل و بس غير كدا بيساعدك انت مش انت اللى بتساعده اساسا
صابر / فاهمك بس لنفرض انك جبت شغاله جديده من مكتب تخديم مثلا و فجاه سمعت فى المنطقه ان المكتب ده بيجيب شغالات بتسرق هتثق فى اللى عندك و لا الشيطان هيدخل قلبك و بعدين انهى احسن انك تقطع عيشها و لا تشوف لها شغلانه تانيه بعيد عنك و لا تسيب الشيطان و الشك بينكوا
شاكر / يا أيها الذين آمنوا
صابر / ان جائكم فاسق بنبئ فتبينوا ... عارف انا بتكلم عموما
شاكر يتنهد
صابر / خدها واحده واحده هتتحل ما تكربسش الدنيا فوق راسك
..........................
فى سرايا بحرى
قاسم ينزل من العربيه و ياخد احلام من ايدها وسط زغاريط  و دفوف و عيال بتسقف و ستات بتحضن و تبوس احلام قاسم يسحب احلام يدخلها السرايا و امين و امه وراها وسط الناس يقابلو الحجه
قاسم / الحجه كبيره زنايته بحرى ام همام
احلام / اهلا ازى حضرتك
الحجه / همام ببقول بيكي و فى اهلك شعر ... الله امال مازن فين
قاسم / شبط فى الجماعه هناك عجبه الجو قال يتفسح يومين
بنت ١ / الله يعني ما طلعتش البركه فى العروسه يعني الفكره فى المكان ... خلاص بقي نروح كلنا نعيش هناك يمكن نلاقي اللى ناقصنا
ام احلام / تانسوا و تنوروا بلدنا تساع من الحبايب الف و الحمد لله ما دخلهاش حد الا اما حبها
الحجه / على قولك دا همام واخد الطريق قياسه ... و الله لولا السن و المرض كنت جيت زورتكوا و شوفت الجنه اللى بيقولوا عليها دى
ام قاسم / الجنه هنا يا حجه ... البحر و الهوا و اليود و الجمال كله هو فى زى سكندريه و شط سكندريه
الحجه / برده
قاسم / طب ايه احنا هنفضل كدا و لا ايه مفيش لقمه كدا قبل ما نطلع نرتاح ... جايين من سفر طويل يا جماعه
ام قاسم/ مستعجل على ايه خلى الناس تتعرف على العروسه دول من ساعه ما سمعوا عنها و هم متحمسين يشوفوها
قاسم / هنتعرف يا جماعه بس الناس ترتاح عشان ما تبقاش القاعده تقيله عليهم
احلام / انا مش تعبانه عادى
قاسم / تمام ...براحتك
ام قاسم / لو تعبان انت اطلع ارتاح شويه و بالمره توصل ضيوفك لاوضهم
ام احلام / و هو فى عريس بيرتاح من غير عروسته برضه يا ست ام قاسم
ام قاسم / انتى شايفه كدا ؟!
ام احلام / هو انا هشوف بعد شوفك
ام قاسم / هو انا ما اقدرش اعترض و لا حاجه بس يعني زى ما تقولى كدا ما ينفعش بعد العيد يتفت الكحك
قاسم / ينفع عادى
ام قاسم / عندنا فرح يا جدعان ايه مش نقعد كدا و نغنى و نطبل و نرقص و نفرح و لا هو انتوا عشان فرحتوا هناك مستكترين علينا فرحتنا و لا فرحتوا فين الحمد لله قدر و لطف
بنت ٢ / ليه هو ايه اللى حصل هناك
ام قاسم / اهو بقي اصل هى مسأله قرف
احلام / او عين برده ... هو مش العين حق و لا ايه ... و بعدين عادى لو حصل موقف كدا و لا كدا بتحصل فى اى فرح
ست ١ / حق طبعا و انتى الشهاده لله تتحسدى اللهم بارك يعني
قاسم / و الله و انا كمان اتحسد عادى دا كفايا ان ربنا كرمني بنسب يشرف زى ده
ام احلام / النسب بس
ام قاسم / ما تحرجيهوش بقي سيبي الكلام الحلو يطلع بطبيعته مش مجامله
قاسم/ و مين قال مجامله
ام قاسم / ما اقصدش
احلام / و لو مجامله يحصل ايه يعني لما نجامل بعض و نجبر بخاطر بعض على الاقل نيتنا هتبقي صافيه و قلوبنا بيضه و أهم من كل ده بركه ربنا و رضاه علينا
ست ٢ / الله على الكلام الحلو
بنت ١ / اهو كلام
ام احلام / ما شاء الله اللمه حلوه فعلا بس عندنا فى الصعيد الضيف اول ما رجله بتخش البيت على الاقل بنعزم عليه بكبايه مايه امال لو مش جايين على سفر بقي
قاسم / لا مايه ايه دول مجهزين ليكوا وليمه معتبره ... فين الاكل يا اما
ام قاسم / و انا اش عرفنى انا لسه داخله معاكوا
الحجه / جرا ايه يا بت منك ليها هتقفوا تتفرجوا كدا انجروا شوفوا وراكوا ايه اعملوا ما تحرجوناش مع الجماعه ... ما تاخذوناش يا اخونا و الله هو بس حماسهم يشوفوا العروسه كلهم اتلموا حواليها كدا
احلام / و لا يهمك احنا ما ورناش حاجه براحتهم
قاسم / هروح اجيب لك المايه يا امى ثوانى
قاسم يمشي و احلام و امين يبصوا لبعض يهز لها راسه بالراحه خالص تبتسم و تهز راسها
............................
فى منطقه على طرف البلد
رجاله بتبنى بالطوب نافوره عباره عن أحواض دايرن داير
جابر / انا عاوزها شغاله النهرده ... عارف و دى استعارة مكنيه قبل ما حد يقولى اى كلمه
الرجاله تضحك جابر يروح يركب العربيه و يسوق يلاقي تجمع كلاب يتنهد و يقرب بالراحه يلاقي شاكر واقف بيفضي شكاره دراى فود يبتسم و يركن العربيه و يروح له
جابر / الله عليك يا ابن خالى يا عاقل يا رزين يالي مفيش منك
شاكر يبص لجابر و ياخد الشكاره الفاضيه يرميها فى عربيه نص نقل راكنه فى جنب و يسحب على كتفه واحده تانيه يروح يفضيها
جابر / اساعدك
شاكر/ لا انا خلصت هنا هروح افضي فى مكان تانى
جابر / مكان ايه انت مش بتسحبهم هنا عشان تعرفهم الطريق الجديد للسبيل اللى بيتعمل ليهم
شاكر / ما شوفتش سبيل عشان اوصلهم ليه انا بس بحط الاكل بعيد عن قلب البلد عشان اسحبهم بره حتى لو هفضل كل يوم الف اربع ساعات بالعربيه بوزع الاكل ده ... المهم الناس تبقي مبسوطه
جابر / تقدر تستعين بصديق على فكره
شاكر / كنت محتاج فعلا بس ما حدش وقف معايا للاسف
جابر / انت شايف كدا ؟!
شاكر / انا مش قادر اشوف لان للاسف الشمس قورت دماغى .. عن اذنك
شاكر يروح يرمى الشكاره فى البوكس و يركب و يدور العربيه يفتح الازاز
شاكر / حقك عليا انا بس مضايق شويه
جابر / و الاخ ليه عند اخوه ايه غير انه يستحمله و يقدر زعله
شاكر يبتسم و يمشي جابر يبص على الكلاب بتاكل و تهز ديولها
جابر / منها لله اللى كانت السبب
كلب مستورد يدخل وسط الكلاب و ياكل معاهم و الكلاب توسع له جابر يتفاجئ و يبدأ يبص حواليه يجى يقرب الكلب يسيب الاكل و يبدأ يزجر جابر يقف الكلب واخد وضعيه الهجوم جابر يرجع خطوه لورا الكلب فى مكانه جابر يرجع خطوه تانيه التالته الكلب يسيب جابر و يلف يكمل اكل جابر عنيه توسع و يركب عربيته بسرعه و يطير
...........................
فى اوضه قاسم
احلام / عشان تصدقني لما اقول لك انى مش مرتاحه
قاسم / يا شيخه ما تكبريش المواضيع بقي
احلام / معاك حق انا هكبر دماغى خالص احنا جايين يومين ننبسط و خلاص
قاسم / و اوعدك انى اعيشك يومين تحلفي بيهم عمرك كله
احلام / لا انا مش عاوزه احلف بيهم انا عاوزه اكررهم ما بعيشي على الذكريات انا
قاسم يضحك و يحضنها الباب يخبط قاسم ينفخ و احلام بتضحك قاسم يروح يفتح الباب يلاقي امه
ام قاسم / عوزاك
قاسم يكتم جواه و يبتسم و يهز راسه و يطلع بره و يقفل الباب
ام قاسم / طمنى ايه الاخبار
قاسم / اخبار ايه ياما اللى اطمنك عليها السعادى و هنا فى ايه كلك نظر بقي
ام قاسم / انت وعدتني يمين بالله لو حملت لا انت ابنى و لا اعرفك
............................