الكبيره ٢ بقلم / لولو_محمد

الحلقه ٢٧

(((((( الكبيره ٢)))))
#لولو_محمد
الحلقه ٢٧
فى شقه مهره
مهره تدخل و وراها مروان شايلين اكياس فيها بقاله
مهره / تعال اتفضل تحب تشرب حاجه ؟
مروان / انتى متاكده من حوار انك تعيشي هنا لوحدك برده بعد اللى حصل
مهره تبصله بابتسامه حزن
مهره / ما ليش مكان تانى اروحه ... الحمد لله انه موجود غيرى مش لاقيه
مروان / يعني يبقي عندك الفلوس دى كلها و تبقي دى عشتك يا مهره
مهره / مالها ما هى حلوه اهى عندى كل حاجه الحمد لله ... و انا متاكده ان الموقف بتاع امبارح ده مش هيتكرر تانى باذن الله
مروان / و حكايه الشغل ..  ما تقوليش انك عايزه تتسلى و الهبل ده انتى محتاجه فلوس
مهره تتنهد
مهره / عاوزه استقل بحياتى
……………………
مروان/ و مرتبك مهما على هيبقي كام بقى ان شاء الله هيكفيكي قد ايه اصلا يا بنتى انتى بنت عز سيبك بقي من الكام سنه اللى عشتيهم هنا انتى الكام سنه اللى فاتت كنتى عايشه فى فيلا و بتلبسي براندات و بتركبى افخم العربيات العيشه دى اللى يجربها ما يقدرش يرجع يتاقلم تانى مع الفقر و دوشه الشوارع و الزباله اللى عينه خدت على الجناين و ودانه خدت على الهدوء مستحيل يقدر يتاقلم مع القرف اللى فى الشوارع دى و مناظر العمرات و المبانى و الدوشه و كل الهبل ده
مهره / و المطلوب اعمل ايه ... وضع و اتفرض عليا و لازم اتاقلم و اقول الحمد لله
مروان / طب انتى ايه مشكلتك مع بابا ما تيجي تعيشي معانا
مهره / ما تبطل بقي ... ابوك مش عاوزنى و مامتك مش عوزانى
مروان / انا عاوزك انا هتكلم معاهم
مهره / كتر خيرك بس ما اعتقدش حد هناك هيسمعلك يا مروان ... على فكره الشقه هنا واسعه و فيها اوضه تانيه لو تحب تبقي تيجي تقعد معايا اهلا و سهلا فى اى وقت ... حتى لو عمرنا ما كنا اخوات بجد ... كفايا اللى عملته معايا النهرده ... ما جاش من غيرك
مروان / انا ما عملتش حاجه و يا ريت كان فى ايدي اعمل 
مهره / طب ايه هتفضل واقف ما تقعد و لا انت مستعجل تمشي
مروان/ الصراحه مش قادر اقف اصلا بس مش قادر برده اسيبك لوحدك و الباب الحديد ده مش مطمنى اساسا بصراحه
مهره / هقفل على نفسي باب الاوضه و الشقه قصادك اهى ... اساسا ما فيهاش حاجه تتسرق عادى يعني
مروان / طب على الاقل النهرده ارجعى عند مامتك يومين تلاته لحد ما يلاقوا العيال دول و لا اى حاجه
مهره / انت شاغل نفسك بيا اوى كدا ليه صدقنى ما فيش حاجه هتحصل
مروان / هو انتى كانت ايه مشكلتك فى بيت مامتك اصلا انتوا بقالكوا سنين حلوين جدا سوا و انتى و اكرم بيه علاقتكوا كانت حلوه جدا ايه اللى اتغير فجاه كدا
مهره/ مفيش حاجه اتغيرت بقولك بس انى حبيت استقل بحياتى
مروان / انتى بتكدبى يا مهره فى حاجه حصلت و مش فاهم ليه ساكته و مش راضيه تحكيها و سايبه الكل يضرب اخماس فى اسداد مش فاهمين حاجه طب علاقتك ببابا اصلا طول عمرها بايظه لكن علاقتك بمامتك و اخواتك البنات و باباكى اقصد جوز مامتك كانت حلوه جدا ايه اللى جد فجاه دا الراجل كان مدلعك اخر دلع ايه اللى حصل احكيلى طيب يمكن سوء تفاهم و اقدر اساعدك ... انا عارف اننا مش اخوات زى ما المفروض نكون بس برده انتى اختى الصغيره و عاوز مصلحتك و الله عاوز اطمن عليكي قوليلى حد ضايقك هناك حد
مهره / مفيش حاجه انا ما ارتاحتش
مروان / اكرم بيه ...
مهره / خلاص يا مروان من فضلك قولت ما فيش حاجه حصلت انا اللى ... مفيش حاجه حصلت
مروان / تمام ... انا هبات معاكى النهرده بس انا مش هقدر اكررها ... خدى فرصه و اهدى و فكرى مع نفسك و الصبح نتكلم تانى ... اقدر انام فين
مهره / البيت كله بيتك خد راحتك فى اى مكان
مروان يهز راسه و يدخل جوه مهره دمعه تنزل منها تمسحها و تروح تاخد الحاجه و تروح المطبخ
....................
فى شقه ناصر
مختار بيتكلم فى التليفون
مختار / ما تضغطوش عليه يا جابر و حاول تكسبه
جابر / هو مش سامح لحد يقرب منه اصلا دا غير اسلوبه المستفز و المهين فى الكلام طول الوقت
مختار / بيختبر ثباتك الانفعالى و يمرنك فى نفس الوقت هو قالك كدا
جابر / هو حضرتك هتفضل تدافع عنه لحد امتى دا نجاه نفسها فاض بيها
مختار / انت الكبير مش نجاه فى الاول و الاخر نجاه بنت بتحكمها عواطفها انت راجل ... و مش اى راجل ... و دا المفروض و دا اللى اعرفه
جابر / هو انتوا مش شايفين انكوا ضاغطيني انا كدا
مختار / انت قدها و بعدين انت اللى اخترت
جابر / تمام يا خالى  .. هحاول
مختار / هتقدر باذن الله ... ابقي طمنى ... سلام
مختار يقفل و يبص وراه يلاقي ناصر واقف مضايق
مختار / لا اله الا الله و دا من ايه انت راخر انت مش شحطتنى انا و امك و جبتنا معاك على ملا وشنا قالبلى بوزك ليه راخر
ناصر / انا مش موافق على اللى بيحصل الواد ده المفروض نخلص منه و النهرده قبل بكره
مختار / ما تخليش غضبك يعميك
ناصر/ هو مش عم رشيد صاحبك ... شبهه بس مش هو
مختار / و لا انت ناصر الزيني
ناصر / انا ابنك مش اخوك
مختار/ و قبلت اخطائك و هقبلها و هقبلك زى ما هقبله
ناصر / هى الروس اتساوت خلاص !!
مختار / يوم ما هقف قدام ربنا هبقي عملت اللى عليا ... ناحيتكوا كلكوا
ناصر / بس انا مش مسامحه ... و لا مسامحها
مختار / بنات الناس مش لعبه و دخول البيوت
ناصر / نور ما لهاش دعوه نور بنت ممتازه و بتحبنى
مختار / تمام بكره هروح اتكلم مع ابوها و نقعد و اللى فيه الخير يقدمه ربنا
ناصر / و جوزيف
مختار/ اسمه يونس
ناصر / اسمه جوزيف و لا مش هتفرق الاسم مش هيغير حقيقه انه مجرم و ابن حرام ... حتى لو ابن صاحبك ... ابن حرام برده
مختار / دى حاجه ما لوش ذنب فيها عشان يتعاير بيها و كل اللى عمله و هو مغمى عن الحقيقه ما يتلامش عليه برده انا هبدا احاسبه من اليوم اللى جه البلد و عرف حقيقته لو عندك عليه غلطه واحده قولى و انا هقتله بايدي
ناصر / سامحنى يا بويا بس الشرف ده انا اولى بيه
مختار / لما تبقي تمسك عليه حاجه ابقي اشبع بالشرف ده يا خويا بس على الله تنتبه لتمريناتك عشان ساعتها تقدر عليه انا داخل اقعد مع امك عن اذنك
مختار يعدى جنب ناصر و ناصر حزين و مختار مضايق
.....................
فى اوضه نجاه
فارس و كارم نايمين على الارض و نجاه بتتقلب فى السرير مش عارفه تنام تتنهد و تقوم تعدل اسدالها و تنزل تروح المطبخ تبص على اوضه جو الباب مقفول تدخل المطبخ تعمل مج نسكافيه و تطلع السطح تتفاجئ بجو بيصلى تلحق نفسها و تيجي تنزل تبص عليه تانى تلاقي القبله غلط تبص حواليها
نجاه / القبله غلط الناحيه التانيه
جوزيف يتجمد مكانه و يتنهد و يلفلها
جوزيف / طب انا كل اللى عملته طار بقي و لا ايه وضعه
نجاه / اقف عدل و عيد و باذن الله ربنا يتقبل ... انت بتصلى ايه
جوزيف / مش عارف ... بصلى كدا زى ما كنتى بتصلى فى تركيا قولت اجرب طريقتك يمكن اهدى
نجاه / طب المهم صليت فروضك الاول فجر ضهر عصر مغرب عشا صليتهم
جوزيف / صليتهم و بقالى يجي ساعه بصلى و مش حاسس باى حاجه و دا مضايقني و الباقيين صليت القبله صح يعني عشان ما تتحججيش
جوزيف يروح ياخد منها المج
جوزيف / شكرا كنت محتاجه
نجاه / انت بتدور على ايه بالظبط فى الصلاه
جوزيف / مش عارف ... شويه هدوء ... لما كنت بتابعك فى تركيا كنتى هاديه و لا كانك مخطوفه كنتى بتنامى زى الاطفال لكن انا ... انا تايه و فى مليون صوت فى دماغى ... لاول مره مش عارف انا صح و لا غلط... مش عارف انا عاوز ايه و لا هوصله ازاى ... بس اطمنى اللى حصل النهرده مش هيتكرر مهره فى امان و بلغت الكل انها تبعى و اللى هيقربلها انا اللى هروحله و هيبلغوا بعض
نجاه / طب بعد اذنك ممكن اعرف اللى انت عرفته انا متاكده انك ما قولتش كل حاجه
جوزيف / اللى اقدر اقوله قولته قدامكوا كلكوا لما يبقي فى جديد هقولك بس الحوار كان كرت ارهاب مش اكتر كان فى تعليمات ان البنت ما يتلمسش منها شعره و كان فى تشديد جامد على الحته دى
نجاه / لمصلحه مين طيب
جوزيف / هعرف و الموضوع مش هيطول ما تقلقيش
نجاه / اتمضمض و كمل صلاه
جوزيف / مش شغاله بعمل حاجه غلط انا مش حاسس باى حاجه طالع نازل ... و على فكره دا نفس احساسي من اول يوم ... انا فتحت فيديوهات لناس داخلين الاسلام جديد برده بس رد فعلهم كانت مختلفه هم مبسوطين و مرتاحين و بيبالغوا كدا فى وصف مشاعر انا مش لاقيها
نجاه / لا حول و لا قوه الا بالله
جوزيف / انا حاولت عشان خاطرك بس مش حاسس باى حاجه انتى بتوصفى دنيا نفسي ادخلها صدقينى نفسي اهدى و ارتاح و انام و اطمن بس مفيش الكلام ده مش لاقيه
نجاه / يمكن مش من اول مره
جوزيف / رد فعلى هيكون وحش اوى لو كل ده فى الاخر طلع مجرد اشتغاله ... خصوصا انتى 
نجاه / انا مش هغشك احنا اتفقنا و انا الغدر مش طبعى
جوزيف / امال فين الغلط
نجاه / انت مش مؤمن و لا مصدق 
جوزيف / ما طبيعي ما ابقاش مصدق و لا واثق ما طبيعى يكون عندى شك امال انا جايله ليه ما عشان يطمنى ما عشان ياكدلى انى صح
نجاه / لو انت فى متاهه و انا قولتلك ان الباب ده هو المخرج و روحت جربته و ما فتحش معاك هتقرر انك تتوه و لا هتحاول مره و اتنين و تلاته لحد ما يفتح ... انت تعبت فى كل حاجه فى حياتك اشمعن دى عاوزها تجيلك على الساهل دا بالعكس دى اهم خطوه فى حياتك يعني المفروض تحاول مره و اتنين و تلاته و عشره و مليون ... اقولك حاجه اوعى تفتكر ان حد فينا ما مرش و لو للحظه بمرحله زى اللى انت فيها توهان و حيره و شك و شيطان ابن ستين فى سابعين نازل زن و وسوسه و تشكيك ... يونس احنا فى عصر كل حاجه فيه مشكوك فيها انت بتبقي شايف البنت قدامك بعنيك شعر و رموش و جسم و كل حاجه و فى الاخر تطلع ولد و العكس
جوزيف يضحك
نجاه / يعني حتى عنيك ما بقيتش بتثق فيها ما بالك بحاجه ما بتتشافش بالعين اصلا ... حاول مره و اتنين و تلاته بس المرادى ما تحاولش عشان خاطر حد حاول عشان نفسك عشان اخرتك
جوزيف / طب انتى كنتى طالعه تصلى تعالى نصلى سوا
نجاه / لا انا كنت طالعه اشم هوا و اشرب النسكافيه بس هو كان مكتوبلك انت الف هنا اتمضمض و صلى انت و انا هنزل تحت اعملى مج تانى و اقعد اقرا الورد بتاعى قبل الفجر
جوزيف / تمام براحتك
نجاه تبتسم و تاخد منه المج
نجاه / على فكره ... سعيك لوحدك ليه اجر ... اوعى تفقد الامل
جوزيف / تفتكرى انا ممكن اكون اى حد تانى غير كدا
نجاه / و هو كدا وحش !! حلو استمر ... عن اذنك
نجاه تنزل جوزيف يروح يقف صح و يتنهد
.................
فى اوضه مهره
مهره نايمه فى اوضتها مروان يفتح الباب يبص عليها بالراحه و يقفل الباب تانى و يطلع بره يتكلم فى التليفون
مروان / اكيد ما وثقتش فيا بالسرعه دى عشان تحكيلى اى حاجه بس اكيد مع الوقت هتحكى يعني
شاب / يا عم تحكى و لا ما تحكيش الموضوع كله بره عنك انت هتوحل معاها نفسك ليه بس 
مروان / انت حلوف ياله دى اختى
شاب / بقولك ايه حوار اختك ده تعمله على غيرى الا عمرى ما سمعتك بتجيب سيرتها و لا تحكى عنها فجاه كدا ظهرتلك اخت من تحت الارض
مروان / اثبت ... انت بتقول ايه يا عم حد يسمعك يفتكرك حبيبتي و غيرانه و لا حاجه
شاب / ايوه ايوه مروان الدسوقى و قلشه الرخيص بقي و هتضيع فى الكلام وله انت ممكن تعمل الشويتين دول على اى حد غيرى لكن انا عارفك كويس قولى طالعك ايه من ورا الحوار
مروان / على اساس انك هتقسم معايا يعني
الشاب / يعني فيها مصلحه ... مش بقولك عارفك على العموم انا مش ناوى اقسم معاك و ربنا يباركلك ... بس على الاقل تسد اللى عليك 
مروان/ ما قولتلك فلوسك هتاخدها كامله لما الوديعه تتفك
الشاب / يادى ام الوديعه المحجره اللى هتسد بيها ديونك لامه محمد دى كلها يا عم قولتلك قول لامك
مروان / و هى ديونى دى جتلى منين مش من مشي وراك السهم ده هيضرب يا مارو الشركه دى المستقبل يا مارو البرصه هى المستقبل يا مارو هتتنطق و مش هتحتاج لابوك يا مارو هوب مارو لبس رامى اخلع
رامى / ما انا لبست معاك انت هتستهبل و بعدين انا كان اش عرفنى ان كل الحاجات دى هتحصل و الوزير هيتقفش و هو بياخد رشوه علشان يعدى مشاريع الشركات دى يعني اهم دخلوا السجن و الاسهم اتهبدت فى الارض و احنا اتهبدنا معاهم
مروان / خلاص ما تقعدش بقي كل شويه تقولى ديونك ديونك اصبر بقي
رامى / صابر ... و هساعدك كمان قولى بقي ناوى على ايه
مروان / الاول بفكرك ان البت دى اختى اه هنطلع بمصلحه بس اختى يعني اختى
رامى / قريتك
مراون / و انا هساعدك و هقولك كل اللى محتاج تعرفه اول باول بس يمين بالله
رامى / يعم اختك و على عينى و راسي ما تقلقش انا مش واطى اوى كدا و بعدين ما يمكن الخير يعم على الجميع حد يكره
مروان / تمام ركز بقي و اسمعنى كويس
رامى / معاك
............................
فى اوضه جابر
نخاه واقفه على الباب من بره متردده و بعدين تخبط بالراحه ما حدش بيرد تخبط تانى ما حدش بيرد تخبط تالت الباب يتفتح فجاه تتخض
جابر / خير !! فى حاجه انتى كويسه .. انتى ايه اللى مصحيكي دلوقت
نجاه / صحيتك صح ؟!
جابر / مفيش مشكله خير فى حاجه و لا ايه
نجاه / محتاجه اطلب منك حاجه دلوقت و بالله عليك ما تكسفنى
جابر / اؤمرى خير
نجاه / عوزاك تطلع السطح ... يونس بيصلى اقف جنبه و علمه
جابر ملامحه تقلب بس يهدى
جابر / و انتى عرفتى منين انه على السطح
نجاه / طلعت بالصدفه لقيته بيصلى و حسيته تايه انا عارفه انى صحيتك و عارفه انى قلقتك و انكوا مش بتتفقوا بس دا ثواب كبير و انا لو اتمنيت لحد الخير مش هتمناه لحد قدك
جابر / انتى بجد مصدقه التمثيليه دى
نجاه / اعمل اللى عليك و سيب القلوب و النوايا لربنا ... عشان خاطرى يا جابر
جابر / حاضر هتوضي و اطلعله
نجاه تبتسم
نجاه / ربنا ما يحرمنى منك ابدا
جابر / اتفضلى على اوضتك بقي
نجاه/ لا انا هنزل اعمل لقمه و كدا عشان لما تخلصوا و تنزلوا تفطروا قبل ما تروحوا تصلوا الفجر
جابر واقف باصص ليها و ساكت
نجاه / انت هتفضل باصصلي كتير روح يلا اتوضي
جابر يهز راسه و يدخل يفتح الدولاب و يطلع غيار
نجاه / انت قولت هتتوضي و لا تستحمى
جابر يبصلها و يرزع الضرفه و يعديها يروح الحمام
نجاه / دا ماله ده
نجاه تنزل تحت
…………………
فى شقه مهره
مهره تصحى تقوم و هى بتدعك عنيها تقوم تروح المطبخ تلاقي مروان واقف بيقطع خيار
مهره / صباح الخير بتعمل ايه
مروان / صباح النور نمتى كويس؟
مهره / ايوه الحمد لله اساعدك ؟
مروان / انا خلصت خلاص هقلى البيض و نفطر على طول اعملك حاجه تانيه
مهره / تسلم ايدك تعبت نفسك
مروان / انا بايت بهدومى من امبارح عاوزين نفطر عشان اللحق اروح اخد دوش و اغير و اه كلمتلك واحد صاحبى على شغل و ممكن تروحى تبدئى من النهرده لو تحبى ... طبعا هو فى العادى عمره ما كان هيعينك بس عشان خاطرى عمل استثناء لحد ما تتخرجى
مهره / شكرا ... هشتغل ايه
مروان / هتشتغلى فى مكتب السكرتاريه بتاعته مساعده ليها لحد ما تتعلمى الشغل النهرده هنروح تشوفى الدنيا و ما تقلقيش منه خالص رامى شاب محترم و ابن ناس و سمعته سبقاه دا غير انه ملتزم و بيعرف ربنا عشان كدا هبقي مطمن عليكي معاه
مهره / تمام حاضر
مروان / هو ايه اللى حاضر ... بت انت شكلك ما فوقتيش خشي كدا اغسلى وشك يلا و تعالى افطرى
مهره / و انا قولت ايه
مروان / يا ستي اخلصى مش طايق ريحه عرقي ... ابقي فكريني اجيبلى غيارين اسيبهم عندك هنا عشان لو لا قدر الله الموقف ده اتكرر ابقي عامل حسابى
مهره / تمام حاضر
مروان / حاضر برده
مهره / الله ... انا رايحه الحمام
مروان يضحك و مهره تروح الحمام و تقفل الباب
مروان / اما نشوف اخرتها معاكى يا ست مهره
تليفون مروان يرن يرد
مروان/ صباح الخير ازى حضرتك ... لا كلو تمام باذن الله ... لا و الله ما اتكلمناش فى حاجه لسه حضرتك عارف الظروف ما كانتش مناسبه خالص بس ما تقلقش انا وعدتك ... لا باذن الله افرحك قريب ... مقدر طبعا ... ما هى اختى برده ... تمام يا باشا تمام ... فى حفظ الله فى حفظ الله
.................
فى الفيلا
جابر / لا يعني لا
جوزيف / امال هى هنا ليه
جابر / قولت لا
جوزيف / ما طول ما انت قافل مخك عمرك ما هتتحرك من مكانك
جابر / يا اخى انت الصلاه اللى بتصليها دى
جوزيف / دى حرب ما لهاش علاقه بالصلاه او الدين او اى حاجه عاوز تطور من نفسك لازم تحتك
جابر / الله الغنى
جوزيف / خلاص ارجعوا البلد استخبوا اعملكوا ايه يعني احنا جينا هنا لهدف
نجاه / و الهدف ده ما يجيش غير بكدا يعني
جوزيف / اديني مره خرجتى و ما اتعلمش عليكي اديني حد بره اهلك اللى بيطبطبوا عليكي دول لاعبتيه و اديتي قدامه انا عاوزك تختبرى نفسك و ما تخافيش انا ... و جابر و اخواتك هنبقي معاكى مش هتبقي لوحدك ... مع انى بصراحه مش شايفها فكره كويسه انى اخد ولاد اختى دول كلهم معايا
فارس / عاوزنا نسيبهالك تستفرد بيها امال
جوزيف / شايفه اهو لسه ما خرجناش و الغباوه اشتغلت
جابر /  همام حكالى على المكان ده و اللى بيحصل فيه
جوزيف / طبيعي امال انا اخدته معايا ليه
جابر / نجاه ما ينفعش تكون فى مكان زى ده
جوزيف / خايف عليها تخسر ؟ قول انك عارف انها هتخسر قول انك
جابر / انت فاكر ان كلامك الاهبل ده هيسخنها عليا ... انسي اللى بينا اكبر من كدا بكتير و اه بخاف عليها و هى عارفه و متاكده انى بخاف عليها و لو سالت اى حد هيقولك انى بخاف عليها بس مش عشان مش واثق فيها عشان لا واثق فيك و لا من اى حد تبعك
جوزيف / انت فاكر انى لو عاوز ائذيها انت هتقدر تحميها منى
جابر / لحد اخر لحظه فى عمرى
جوزيف / انت عايش بس عشان هى هتزعل عليك فما تتفردش عليا انت اخرك قصادى ثوانى
جابر / تعال نشوف
نجاه / بس بقي بس انتوا ايه بس
كارم / ابويا مش هيوافق ان نجاه تروح مكان زى ده و على السمع انه ... و بعدين اللى قصادها مش هيحترم و لا يقدر انها بنت و محجبه و كدا اكيد ما حدش
جوزيف / اكيد ما حدش هيقدر و لا حد هيرحم اختك لمجرد انها بنت و اللى بتحاربوهم عارفين كويس انها بنت و انها محجبه و انها كانت قدامها فرصه تدافع عن نفسها قدام بابلو و تكسب كمان بس اختارت انها تغطى رجليها فخسرت ... حصل و لا لا
نجاه تبص الناحيه التانيه
جوزيف / دينكوا مكتفكوا عاداتكوا و دينكوا ما بيقويكوش بالعكس سلاسل حديد ربطاكوا و المجلس عارف ده و كل اللى هيبعتهم مش هيرحموكوا انتوا ليه ما بتفهموش
عمران / لينا رب حامينا و لو كانوا يقدروا يعملوا حاجه كانوا عملوا من زمان
جوزيف / يقدروا بس هم مش عاوزين يخلصوا منكوا و خلاص هم عاوزين يضمنوا انكوا تنتهوا و ما تقوملكوش قومه تانى عاوزين ينهوا الموضوع من المنبع
فارس / صاروخ قد كدا يقوم بالمهمه
جوزيف / كنت قدك و ما كنتش فاهم برده بس انا عشت و شوفت حاجات حتى لما هتكبر و تبقي قدى لا هتعيشها و لا هتشوفها فاهدى كدا و حاول تتعلم لانك اول واحد هتموت
فارس / بتهددنى و لا ايه
جوزيف / لا بقولك لانك غبى ما بتفهمش
نجاه / كفايا بقي كفايا اهدوا ... جابر
جابر / جابر ايه !! جابر ايه !! عاوزه تروحى روحى بس اقسم بالله ..
نجاه / ما تحلفش ما تحلفش اهدى احنا عاوزين الصالح
جابر / و الصالح مش هيجى من ورا الكائن ده مش هيجى من وراه خير
عمران / ما تجيب الناس الجامدين دول هنا او فى اى مكان محايد
جوزيف / و مين هيمسح الدم
كارم / ما هى دى فى حد ذاتها مجازفه افرض خسرت ... و انا هنا مش بقلل منك بس اى لعب فيه مكسب و خساره
جوزيف / ما دى مشكلتكوا يا كارم انكوا واخدينها لعبه … هى مش لعبه هى حرب ... يا قاتل ... يا مقتول
نجاه / انا ما اقدرش اعمل كدا ... ما ينفعش اروح اقتل واحد كدا من غير سبب
جوزيف / انا خارج
جابر / طريقك اخضر
جوزيف يجي يمشي نجاه تناديه
نجاه / استنى عندك يونس يونس استنى استنى 
نجاه تجرى ورا يونس فارس يجي يشدها تفلت منه و تلحق جوزيف قبل ما يركب العربيه
نجاه / ايه شغل العيال ده استنى هنا بكلمك
جوزيف / انا هنا ليه ؟ ردى .. انا هنا ليه ؟
نجاه / عشان ده مكانك دا بيتك و دول اهلك... احنا ما بنبطلش خناق طول الوقت و زعل عادى بس وقت الجد كلنا فى ضهر بعض صدقنى انا عرفاهم اكتر منك ... و بكره الايام تثبتلك ده
جوزيف / يعني انتى بتثقى فيا ؟ بتثقى و لا لا
نجاه / واثقه
جوزيف / ليه ؟ شوفتى منى ايه يخليكي تثقى فيا
نجاه / انا بمشي ورا قلبي و قلبي بيقولى انك بتحاول و انا طول ما انت بتحاول عمرى ما هفقد فيك الامل
جوزيف / تعالى معايا زى ما اخدتك هرجعك
نجاه / ما اقدرش ما اقدرش اعمل حاجه زى دى
جوزيف / ماتش زى اى ماتش
نجاه / ما ينفعش ... ما ينفعش اروح اتعارك مع واحد و انا عارفه اننا يا قاتل يا مقتول ... الاتنين فى النار القاتل و المقتول فى النار ... انا لو روحتله يا قاتل يا مقتول احنا الاتنين فى النار فهمت
جوزيف / تمام
جوزيف يركن على العربيه و هو مضايق
نجاه / بتثق فيا ؟
جوزيف يبصلها
نجاه / بتثق فيا ؟ اه و لا لا
جوزيف / بثق
نجاه / قرب من جابر
جوزيف / انا فاضلى تكه و اقتله فارحمى امى و ابعديه عنى
نجاه / يا اخى اتقى الله الراجل قام من نومه مخصوص و طلع يساعدك
جوزيف / كتر الف خيره ما طلبتش من امه حاجه
نجاه / انا طلبت و بطل قله ادب و ما تجيبش سيره امه على لسانك دى ست الكل دى انت فاهم
جوزيف / طب ما تتحمقيش اوى كدا دى اكسبريشن يعنى مش قصدى امه حرفيا اكيد
نجاه / احنا ما بنفهمهاش كدا ما فيش هزار فى الأمهات و لا اكسبريشن و لا ما اكسبريشانانشي
جوزيف / ايه !!!
نجاه / هى طلعت مره مش هتطلع تانى و ما تعصبنيش
جوزيف يضحك
نجاه / روح اتكلم معاهم بهدوء لو سمحت
جوزيف / و ان رفضت
نجاه / مش هجرى وراك و اراضيك تانى ... انا بقولك من فضلك ... ما تصغرنيش
جوزيف / انا عاوزك تقابلى الناس دول
نجاه / مش هينفع بالطريقه دى
جوزيف يتنهد و يرجع اول ما يدخل يتفرقوا و ما حدش يرضي يقف معاه و جابر يروح المطبخ نجاه تروح وراه
نجاه / جابر
جابر / مش عاوز اتكلم معاكى  ... و لعلمك انا حشت اخوكى عنك بالعافيه و دى اخر مره ادخلك
نجاه/ هو انتوا بتعملوا فيا كدا ليه انا تعبت منكوا
جابر / انتى اللى تاعبه نفسك بتجرى وراه ليه هاه من باقي اهلك هو يقربلك
نجاه / انا تعبت
جابر / و انا ايه ؟؟ انا ... ايه؟؟
نجاه / جابر عشان خاطرى
جابر / انا مش عيل صغير و لا لعبه فى ايديكى
نجاه / انت سيد الرجاله كلها بقولك عشان خاطرى ... استحمله فتره بس لحد ما الدنيا تظبط معاه ما حدش بيتغير بين يوم و ليله اسمعه و اهدى و حاول تقرب وجهات النظر 
جابر / نجاه هو انا لو قولتلك عشان خاطرى مره واحده فى حياتى هتكسفيني
نجاه / ما عنديش اغلى من خاطرك يا ابن عمى
جابر / ما تثقيش فى الجدع ده
نجاه تضايق و تحاول تدارى و تفرك فى نفسها
جابر / انا مش قادر اثق فيه و مش قادر اصدق توبته ... مش حاسه اتغير اصلا ... هو هو نفس الشخص يا نجاه هو جوزيف الاسم بس اتغير و دا عادى بالنسباله هو اصلا له اسامى كتير يوسف و دانيال فاكره ما فرقتش زاد عليهم يونس يعني عادى
نجاه / لو اختصمك قدام ربنا انك ظلمته هتقول لربنا ايه
جابر / مش هقوله حاجه ربنا شايف كل حاجه و مطلع و عارف حقيقته كويس
نجاه / صح ربنا عارف و ربنا هو الوحيد اللى عارف انت ما دخلتش فى قلبه و لا نيته ... بيحاول يا جابر و تايه و شيطانه قوى ... انا مش هقولك عشان خاطرى مش هاجى عليك ... بس عشان خاطرك انت عشان نفسك يا جابر ... طب و الله بتكلم عشان غلاوتك انت عندى ... يا جابر انت بتقف مع الناس كلها و تساعدها لوجه الله ... اعمل اللى عليك المرادى كمان
جابر / يا ستى انا همسكه من ايده كدا و اخده المسجد الخمس فروض و اعلمه كل صغيره و كبيره فى دينه و احطه فوق راسي و فى عنيا بس يبعد عنك ... عارفه انتى لو بعد عنك ... اقسم بالله احطه فى قلبى مش عيني بس افديه بعمرى كله و لا يهمنى
نجاه / يطول عمرك لا اله الا الله هو يعني عملى ايه
جابر / عملى انا يا نجاه عملى و مش اللى هنعيده نزيده انا بشر ..  لحم و دم و مشاعر ... دا الرسول صلى الله عليه وسلم ما قدرش يشوف قاتل عمه
نجاه / بس ما قفلش بابه فى وشه و لا رفضه و انت ادرى منى بدور وحشي فى حروب الرده و قتله لمسيلمه الكذاب ربنا يجعلنا نصيب من حسن خاتمتهم و لعلمك انا كنت قريت مره قصه تانيه لاسلام وحشي بس مش متاكده من صحتها فمش هتكلم عنها ابقي دور انت عليها بس هفكرك بكلام ربنا اللى انت حافظه صم يا جابر ... إِلَّا مَن تَابَ وَآمَنَ وَعَمِلَ عَمَلًا صَالِحًا فَأُولَٰئِكَ يُبَدِّلُ اللَّهُ سَيِّئَاتِهِمْ حَسَنَاتٍ ۗ وَكَانَ اللَّهُ غَفُورًا رَّحِيمًا
جابر / و من شروط التوبه
نجاه / مش من يوم و ليله دا ما يعرفش الف به اديله فرصه و ساعده
جابر / و لو
نجاه / ما تقدرش البلا قبل وقوعه اعمل اللى عليك لو كان عاوز حاجه كان عملها و انا كدا كدا بره كل ده
جابر / ازاى بقي ان شاء الله
نجاه / لانه عمره ما هيقدر يغسلى مخى و لا يجندنى مش هو قالك ان دى كانت المهمه من الاول
جابر / انتى فاكره انك هتحسي بالموضوع ده و هو بيحصل انتى فاكره انك
نجاه / انت هتبقي موجود ... كلكوا هتوجهونى لو توهت هتعدلونى لو ميلت ما تخافش عليا انا معايا ربنا
جابر / و نعم بالله
اذان الضهر جابر يتنهد
نجاه / خده فى ايدك بالله عليك عشان خاطرى
جابر / و الله ما فى حاجه شلانى و ممرمطانى غير خاطرك ده ... على الله يطمر
نجاه / طامر ما تخافش يلا بقي روح اللحق الصلاه
جابر يمشي و هو بيفرك و مضايق و نجاه مبتسمه تروح تفتح التلاجه و تطلع اكل تجهزه
.............................
قدام عماره فى منطقه حيويه
مروان يركن و يطلع الموبايل مهره تطلع من البوابه و تروح تركب يسوق 
مروان / اتاخرت عليكي
مهره / ابدا انا لسه نازله من فوق حالا
مروان/ ها اخبار الشغل ايه سحلوكى ؟
مهره / ابدا الشغل كويس و سهل كدا و مستر رامى
مروان/ مين !! هههههههه ماشي تمام كملى
مهره / امال اقوله ايه ما هم كلهم بينادوه كدا
مروان/ يا ستي ما علينا كملى انا بس ... اصله يا ستي صاحبى من زمان فسديهات تفاهته كلها معايا فمش بصدق انه كبر و بقي مستر مره واحده
مهره / ربنا يخليكوا لبعض
مروان/ طب ايه هسحب منك الكلام ماله مستر رامى بيه
مهره / هو كويس بس سكرتيرته جد اوى و عصبيه شويتين
مروان/ تحبى اوصله الكلام ده
مهره / اوعى و الله العظيم ما اكلمك تانى
............................