الكبيره ٢ بقلم / لولو_محمد

الحلقه ١٣٦

(((((((( الكبيره ٢)))))))
#لولو_محمد
الحلقه ١٣٦
عباده / ما هو لو مش انتى مين ... ما حدش دخل و لا خرج من الفيلا بعدك
البنت / اقسم بالله ما انا اقسم بالله ما انا و بعدين انا ما اقدرش اعمل كدا اقسم بالله ما اجرؤ
دياب / يعني عفريت دخل كب الدم على السرير و مشي يعني و لا ايه
البنت / ما اعرفش اقسم بالله ما اعرف و بعدين انا ما كنتش لوحدى كان معايا بنات تانين يمكن حد منهم دخل بعد ما قفلت الاوضه و كب الدم ده اقسم بالله ما انا
دياب / براحتك ... كدا كدا لا انتى و لا البنات التانين هتروحوا النهرده لحد ما اوصل للى عملها و بكيفكوا بقي ... اتفضلى بره
البنت / يا كبير اقسم بالله ما عملت حاجه اقسم بالله ما ليا ذنب انا بخدمكوا من سنين عمرى لا مديت ايدي و لا عملت اى موقف واحد وحش قول حاجه يا كبير بالله عليك
عباده/ كدا كدا الحقيقه هتبان سواء عملتى او ما عملتيش هنعرف اللى عمل كدا
البنت/ اقسم بالله ما انا
عباده / و انا مصدقك بس احنا لينا بالأدلة و للاسف كلها ضدك
البنت / يارب بقي يا رب
دياب / مش هكرر كلامى اتفضلى بره
البنت تبص لهم و هى منهاره و تطلع بره تلاقي اتنين غفر مستنينها
الغفير / اتفضلى قدامى
البنت / انا ما عملتش حاجه
الغفير / ما يخصنيش قالولى اتحفظ عليكي فى المكتب يبقي هتفضلى فى المكتب
البنت / بس دا ظلم و الله اقسم بالله ظلم
........................
فى اوضه سماح
سماح / دى حركات عيال هبله انا لو عاوزه ائذيهم مش هرش شويه دم على فرشتهم انا هبيتهم فى تربهم يا مغاورى
مغاورى / انا لسه ما فوقتش من صدمتى مش حمل صدمه تانيه يا سماح الناس بتبص فى وشي بالعافيه
سماح / يولعوا انا ما حدش فيهم فارق معايا انا لو عملت هقول انا قولت هعمل و هعمل بس مش هعمل الخيابه دى
مغاورى / و هم مالهم ؟ ذنبهم ايه مش كفايا اللى  ابنك عمله
سماح / ابنى جزمته بيهم كلهم ابنى اشرف منهم كلهم انت بتقول ايه يا مغاورى انت صدقتهم و لا ايه انا ابنى عمره ما يعمل كدا ابنى دخل عليهم و شافهم قرروا يلبسوهاله و خلصوا منه قبل ما يفضحهم
مغاورى / على قد ما كلامك هيريحنى بس انا مش قادر اصدقه مش قادر ياريته يرجع و يبرء نفسه بس ان برء نفسه من تهمه ياسمينا هيبرئها ازاى من تهمه الخيانه يا سماح
سماح / كدابين بيكسروك بابنك قطع لسان اللى اتكلم عن ابنى بالشكل ده ابنى كان بيرمى روحه فى النار عشانكوا ابنى عمل البدع عشان يملا عنيكوا انت بنفسك قولت انه اتغير و بقي زى الفل ابنى ما اتعملش فيه كدا الا اما بقي منافس قوى ليهم اتفقوا عليه.. اقسم بالله ما قادره افهمك ... واحد غيرك كان حارب الدنيا و دافع عن ابنه انت ازاى كدا دا انت لو عندك منه عشره مش هتعمل معاه كدا مش هتخذله كدا ... زمانه يا كبدى خايف يرجع لانه عارف انك هتخذله ... الدنيا كلها ضده بس انك تبقي معاهم دى لوحدها حكايه يا مغاورى ... دا ابنك يا مغاورى ما تديلوش ضهرك يا مغاورى صدقه يا مغاورى عشان خاطرى صدقه
مغاورى يسيب الاوضه و يمشي سماح تزعق
سماح/ عمرى ما هسامحك يا مغاورى عمرى ما هسامحكوا كلكوا عمرى ما هنسي و لا هسيبك حق ابنى حسبي الله و نعم الوكيل حسبي الله و نعم الوكيل فيكوا كلكوا
سماح تنهار من العياط
..........................
فى الشركه
عباده/ البنات كلهم كلامهم واحد و ما فيش اى اتصال بينهم و بين سماح لا بطريق مباشر او غير مباشر
دياب / رجعنا لنقطه الصفر و لازم يكون معانا دليل
عباده / ما دا الطبيعي و المنطقى خصوصا فى ظرف فيه مليون واحد من مصلحتهم اننا ناكل فى بعض
دياب / حضرتك معاك حق طبعا بس لازم يبقي فى رد
عباده / انا كدا كدا كلمت مغاورى و هو هيكلمها و انا كمان هكلمها بس صدقنى انا عارف اختى دا حتى يونس قال نفس الكلام سماح لو حاولت تاذى هتوجع
دياب / ما احنا مش عاوزين نوصل للمرحله دى ان كنت انا لسه قادر امسك اعصابى منصور منهار اصلا و مش هيقدر بقول لحضرتك بتهددنى فى الطالعه و النازله
عباده / و انك تدفن ابنها عايش دى شويه ؟!
دياب / لو حضرتك مكانى و دخلت لقيت واحد بيتهجم على اختك هتعمل ايه
عباده / هطلع مسدسى و اضربه طلقه واحد ناهيه تجيب أجله
دياب يضحك
عباده / اكدب يعني بس ساعتها الجثه كانت هتبقي موجوده و الموضوع منتهى انما دلوقت الدنيا والعه على أمل انه عايش و هيرجع يبرء نفسه
دياب/ و ان رجع و قال انه برئ هيحصل ايه
عباده / قال لصابر و صابر ما صدقوش قاله نفس كلام سماح انه دخل شافك و انت بتتهجم على ياسمينا فصورك و انك بتحاول تخلص منه عشان تدارى على عملتك
دياب / يا سلام !!
عباده / و عشان معاهوش دليل اترمى كلامه فى الزباله و اللى حسن موقفك ان ياسمينا برئتك
دياب / ما الجديد فى كلام ام شاهين انى لا ما كنتش بتهجم على ياسمينا دا كان بكيفها فشهدت فى صفى عشان تبرء نفسها هى كمان يعني مش بتحاول تبرء ابنها دى بترمى محصنه
عباده/ اقسم بالله عارف الكلام ده كله
دياب / بس مش قادر تعمل حاجه عشان هى اختك
عباده / عشان مش فى وعيها عشان ده ابنها الوحيد و هى ام و مش سهل ابدا الموقف لا عليها و لا على مغاورى و لا على اى حد فينا
دياب / كويس عشان تحسوا بينا
عباده / حاسين يا دياب بس لازم نصبر شويه و نكبر دماغنا حبه
دياب / عيني انا اصلا بطبعى صبور و حضرتك عارف براحتنا خالص
عباده / تسلم ما اتحرمش منك
دياب / المهم البنات دول هنعمل فيهم ايه
عباده/ هنمشيهم طبعا مفيش دليل على اى واحده منهم يبقي كلهم يروحوا
دياب / تمام بس انا مش هدخل ولا واحده فيهم بيتي تانى
عباده/ حقك و براحتك بس كلو الا قطع الأرزاق
دياب / مش هقدر يا كبير
عباده/ حقك ما حدش يقدر يلومك
دياب يهز راسه و يرفع سماعه التليفون
........................
فى الملعب
جابر / انتى مش مركزه
نجاه تروح تقعد فى جنب جابر يروح يقعد جنبها
جابر / مالك تعبتى بسرعه اوى
نجاه / انا ما نمتش من امبارح
جابر/ خير
نجاه / خير بإذن الله
جابر / لا بجد خير ؟
نجاه / مش عارفه يا جابر فكر و كدا ما عرفتش انام و عملت كل حاجه و برده ما عرفتش انام هعمل ايه يعني
جابر / و لا حاجه طلعى طاقتك هنا يمكن تنامى
نجاه / ما انا بحاول اهو بجد دماغى هتشت منى
جابر/ طب ما تجربى تحكيلي
نجاه تبص لجابر
جابر / هو مش غرور بس انتى عارفه انك مش هتلاقي حد يحفظ سرك و يفهمك قدى
نجاه / هو مجرد حلم مش حوار يعني
جابر / اوعى ... اللى مبرجلك كدا مجرد حلم
نجاه / ما هو مش اى حلم ... بص هو فى موقف حصل من فتره كدا ابويا كان بيتكلم معايا و قولت له كلمه و بعدين بابا اتنرفز و طلع اتنرفز عشان هو كان قايلها ليونس فى نفس اليوم
جابر/ و انتى ايه علاقتك بالموضوع
نجاه / ما انا جيالك فى الكلام اهو
جابر / سامعك
نجاه / الفكره هنا أن انا و بابا قولنا نفس الجمله .. عادى بتحصل كدا كدا هو ابويا و بنتكلم طول الوقت فعادى ممكن تكون مصطلحاتنا واحده لكن اللى مش عادى بقي انى احلم بحد بيقول جمله و اقابله فى الحقيقه بعدها بفتره و يقول نفس الجمله
جابر / بتحصل
نجاه / تفتكر
جابر/ اه وارد جدا تحصل ممكن صدفه ممكن انتى عارفه الشخص ده برده و عارفه بيرد ازاى فى مواقف معينه او طريقه كلامه عموما ممكن تكون شفافيه مثلا ممكن تكون اشاره من ربنا و برده بكرر ممكن تكون مجرد صدفه... مين بقي الشخص ده
جوزيف يدخل و يقعد
جوزيف / متجمعين عند النبى حلوه حكاوى القهاوي دى انتوا ضاقت بيكوا بقي الدنيا و جايين ترغوا هنا
نجاه / كنا بنلعب من شويه قاعدين بنريح شويه
جوزيف / انا مش قصدى حاجه انا بس بتكلم عشان الناس ... ما حدش يقول حاجه ما حدش يبص بطريقه كدا و لا كدا ... احنا صعايده برده و لا ايه يا جابر
جابر / انت ادرى
جوزيف / ما تقوم الاعبك
نجاه / مره تانيه عشان مروحين
جوزيف / ليه القفله الوحشه دى
جابر / لو ليك كيف مفيش مشكله اروحها و ارجع لك
جوزيف / ليا
نجاه / اقسم بالله لو اتغابيتوا على بعض زى المره اللى فاتت لاضربكوا انتوا الاتنين انتوا شايفين ان ده وقته
جوزيف يبص لها و يبتسم
جوزيف / علم و ينفذ
نجاه تقوم تلم حاجتها جابر قاعد مكانه متابعها و جوزيف متابعه
جوزيف / هقوم اساعدها بما انك قاعد
جابر يمنعه يقوم
جابر / مش محتاجه مساعدتك
جوزيف يفك ايد جابر
جوزيف / معلش عرق الجنتل مان بينقح عليا
جوزيف يقوم يلم معاها العلب و نجاه بتفضى السندوتشات اللى فيها فى علبه واحده و تحط العلب الفاضيه جوه بعض
جوزيف /  ايه كل ده انتوا بتيجوا تتمرنوا و لا تاكلوا ... ايه ده مسقعه... سندوتش مسقعه فى التمرين ... انتوا ازاى كدا بجد
جوزيف يشم الساندوتش
جوزيف / ريحته حلوه اوى و جواه قرن شطه من كتر ما هو حراق ريحته بس حرقت مناخيرى
نجاه تضحك و تبص له
نجاه / ما لكش فى الشطه و لا ايه
جوزيف / دا انا بموت فى المولع
نجاه / طب ما تورينا كدا  ... سمى و خد قطمه
جوزيف / بسم الله ... تسلم الأيادي بس هتمرن ازاى بقي دلوقت من غير ما ارجع
نجاه / و انا مالى هو انت صغير حد قالك تسمع كلامى
جوزيف / يا ريتها بكيفى بس انتى الوحيده اللى لو قولتيلى ارمى نفسك فى النار هرمى و انا مغمض
نجاه / كل عيش يا بابا كل عيش
جوزيف / لا هاكل مسقعه
جوزيف ياخد قطمه تانيه نجاه تقفل الشنطه و تمشي جابر يروح يشيلها منها و يسبقها و جوزيف متابعها تلف و تبص له يبتسم  تلف وشها و تسرع خطوتها و تمشي
شاب / هتلعب يا يونس
جوزيف / هخلص الساندوتش و اجيلك
.......................
فى سرايا الجوارحه
سماح / انت كمان يا عباده
عباده / ما انتى اللى مصره تهدديهم و تجيبي لينا كلنا الكلام
سماح / انا ما بهددش انا لو ابنى ما رجعش هقلبها سواد على الكل
عباده / من مصلحه ابنك انه ما يرجعش انتى ليه مش قادره تفهمى
سماح / عشان يلبسها صح ... هيرجع يا عباده هيرجع عشان يثبت برائته و يحط صباعه فى عين الطخين
عباده / يعني الكل كدابين يعني الكل اتفق على ابنك يا سماح ؟
سماح / ايوه انا ابنى سيد الرجاله كلها انتوا اللى حطينه فى دماغكوا
عباده / لا حول و لا قوه الا بالله اقول لك ايه بس عشان تفهمى
سماح / ما تقولش انا مش عاوزه اسمع ... انا عاوزه اشوف ... يا اشوف ابنى يا اشوف جثته انما انا مش عاوزه اسمع كلام تمام يا عباده
عباده / تمام ... و لحد اليوم ده ما يحصل ارجوكى ما لكيش دعوه لا بدياب و لا بمنصور و لا مراتاتهم و لا عيالهم
سماح / انسي
عباده/ ما تصغريناش يا سماح
سماح / ابنى يجيلى يا عباده ابنى قصادهم
عباده / ابنك مش عندهم و لا يعرفوا مكانه و بيدوروا عليه قبلينا
سماح / اللى عندى قلته
عباده / طب استهدى بالله و استعيذي من الشيطان الرجيم و فكرى بالراحه و راجعى نفسك
سماح / ان شاء الله
عباده / سماح
سماح / قولت ان شاء الله يا عباده... الله !!
عباده/ ربنا يصبرك و يهديكى انا ماشي
سماح / فى حفظ الله
عباده يمشي سماح تطلع الجنينه و تتمشي و تروح تقعد تحت شمسيه واحد من الغفر يدخل
الغفير / ست سماح سلام عليكم
سماح / و عليكم خير ؟
الغفير / ام على الدلاله جايبه لجنابك شويه عبايات و مصره انك تشوفيها
سماح / ما ليش مزاج راضيها و مشيها
الغفير / مش راضيه مصره انها تكلمك
سماح تبص تلاقي ست واقفه بلهفه و عماله تشاورلها و الغفر مانعينها
سماح / طب دخلها
الغفير يشاور للرجاله يدخلوها الست تدخل تجرى تحضن و تبوس سماح
ام على / ما تبينيش حاجه انا جايه من طرف سى شاهين
سماح عنيها توسع
..........................
فى فندق فى القاهره
ابو حاتم قاعد مع رجاله صعايده
راجل ١ / يا ابويا كلامك جميل بس التنفيذ مش بالبساطه دى و احنا لا هنقدر على عيله الزيني و لا عيله الجارحى و الاتنين فى ضهر القط يعنى كانك يا ابو زيد ما غزيت و ما هينوبنا غير اننا نفتح العداوه القديمه مع عيله الزيني و اللى تعب اهالينا سنين لحد ما دفنوها
ابو حاتم/ خلاص براحتكوا انا كدا كدا هنفذ بيكوا او من غيركوا العيلتين واقعين و مش هلاقي وقت انسب من كدا الجبل فيه مكشوف و صابر القط ما لوش ضهر يحميه و انا اولى بدهب الجبل لوحدى
راجل ٢ / و انت هتعرف توصل للدهب اللى فى الجبل لوحدك ؟!
ابو حاتم / يا عم ساعتها هتصرف مش انتوا خايفين خلاص بقي اتكلوا على الله
راجل ١ / مش حوار خوف يا عمى لكن اللى بتقوله ده مش بالساهل كدا
ابو حاتم / المعدات اللى هجيبهالكوا هتخلى الموضوع أسهل من السهوله ... كل المطلوب منكوا انكوا تقوموا بدوركوا بس و تعملوا دربكه و تسحبوهم للصحرا و هناك انا هكمل … الفلوس اللى هتاخدوها من العمليه دى هترحمكوا من الشغل عند الناس تانى للأبد دا غير حقكوا اللى اخده منكوا وهدان القط زمان لما جه و حط ايده على الجبل و طردكوا
راجل ٢ / طب المعدات دى بجد و لا شغل سيما
ابو حاتم / اسحبوهم فى الصحرا و ما لكوش دعوه
راجل ١ / ايوه بس سحبهم برده محتاج فلوس ياما عربيات و سلاح و رجاله
ابو حاتم يقوم يجيب شنطه و يرميها تحت رجليهم
ابو حاتم / الفلوس ... و بالنسبه للعربيات و السلاح و الرجاله فجاهزين محتاجين بس حد يكون حافظ الجبل زى عنيه يقود الليله دى
راجل ٢ يفتح الشنطه مليانه رزم يبص لراجل ١
راجل ١ / على بركه الله
………………….….
فى جنينه الجوارحه
ام على بتعمل انها بتفرج سماح على العبايات و سماح بتعمل انها بتتفرج
ام على / اهم حاجه مفيش مخلوق يعرف اى حاجه عن الكلام ده و لا مكالمه التليفون دى ... و لا حتى سي مغاورى
سماح / ما تخافيش بس انا لازم اشوفه
ام على / لما الدنيا تهدى اديكي شايفه العيون كلها عليكي و اكيد بيراقبوكى و يراقبوا تليفونك
سماح / ايوه بس البت دى مش تمام و انا مش قادره اثق فيها
ام على / الحق عليها يعني انها نجت ابنك من الجبل دا لولاها كان صابر كمل اللى دياب ما قدرش يعمله
سماح / صابر !!
ام على / ايوه ضربه بالنار فى رجله و لولا امايا و اللى معاها ضربوا عليه نار كان زمانه قاتله بنفسه
سماح/ و ربنا لسقيك المر كاسات كاسات يا صابر يا قط
ام على / اهم حاجه انك تهدى خالص و لا كانك عرفتى حاجه اى معلومه زياده عن اللى قالوهالك لو اتعرف انك عرفاها هتحطى نفسك فى موقف زى الزفت سين و جيم و عرفتى منين و مين اللى قالك و هيلاقوا سي شاهين و يقتلوه
سماح / لا شاهين لا و لا كانى اعرف حاجه
ام على / حلو اوى انا كدا وصلت الرساله استنى بقي امايا تكلمك تقولك على باقي الخطه
سماح / ماشي
سماح تفتح البك بتاعها و تطلع فلوس كتير و تديها لام على
سماح / سيبي عبايتين تلاته كانى اشتريتهم
ام على / صاحيه … ايوه كدا
…………………..
فى شقه فيراس
الباب يخبط يروح يفتح ما يلاقيش حد يبص فى الارض يلاقي ظرف يفتحه يلاقي تيكت سيرك و ورقه مكتوب فيها "تعال بدل ما اجيلك"  فيراس يبص يمين و شمال و يدخل يلبس
………………………
فى اوضه فى سرايا الزنايته
عمران قاعد على كرسي و مهره بتتكلم بالاشاره و هو بيترجم
عمران / عاوزين حاجه كدا الاستايل التركى اللوان فاتحه و مبهجه و أهم حاجه النور و الاضاءه و مش عاوزه بيت نور و لا ورق حائط
راجل / سهله طب العفش تحبوا حاجه معينه
مهره تشاور و عمران يترجم
عمران / سمبل و مش زحمه سرير واحد و سوفا بتفتح سرير و عاوزه الحمام كبينه مش بانيو ... انسى الكلام ده انا عاوز بانيو و بانيو كبير ... كبينه ايه معلش فى دى بقي لا الباقي براحتك
مهره تبص الناحيه التانيه و تضحك
عمران / ايه رايك نعمل دريسينج روم صغير و كوفى كورنر احنا مش هنحتاج مطبخ هنا الكوفى كورنر حط فيه ميكرويف صغير و سخان عين واحده و كاتل حاجه سمبل و ما تاخدش مساحه خالص
الراجل / عنيا حاضر ... النهرده باذن الله اسهر على التصميم و ابعته لحضرتك تديني الاوك عشان نبدأ ننفذ
عمران / فى اى حاجه تانى يا مهره انا ناسيها ؟
مهره تهز راسها لا
الراجل / على العموم لو افتكرتوا اى تعديل رنه بس او حتى رساله واتس و انا هظبط الدنيا على طول
عمران / هو ده العشم برده تسلم
……………………
فى السيرك
امايا / هو ان ما كناش احنا نسأل ما تسالش انت خالص كدا ؟
فيراس / انا لو اعرف ان المفروض اسأل اقسم بالله ما كنت اتاخرت
امايا / اخبار الاوفه ايه
فيراس / افندم ؟!
امايا / الواوا يا فيرو مالك انت مش اتعضيت فى المولد و لا ايه ... ما علينا اخبار نسمه ايه مش هنخلص بقي و لا ايه؟
فيراس / شغال و الله على الموضوع و ابوها كدا كدا فى جيبي المشكله فيها هى
امايا / يعني مش هتعرف
فيراس / لا انا ما قولتش كدا انا كدا كدا هتجوزها هى مسأله وقت مش اكتر
امايا / و ان ما كانش عندى الوقت ده هنعمل ايه
فيراس / ما انا ما اقدرش اتجوزها قبل العده
امايا / ما هو لما العده تخلص صابر مش هيصبر عليكوا لازم تضمن نفسك
فيراس / ازاى
امايا / اه ... قولتلى ازاى ... ساعات كتير بسأل نفسي انا عملت ايه غلط فى حياتى عشان اتحوج للى زيك كدا يا فيراس ... على العموم مش مشكله اساعدك ... انا عوزاك تركز معايا عشان هقول الكلام ده مره واحده و الكلام ده اى غلطه فيه غالبا هتوديك ورا الشمس
فيراس / معاكى
............................
فى اوضه عمران
مختار/ انا لا شوفت و لا هشوف فى غبائك
عمران / ليه بس
مختار/ ابقي انا بحفر بأيدي و سنانى عشان أنجز فى جوازك و انت رايح تطلب تعديلات فى الاوضه و اشي بانيو و اشي جبسونبورد و دهانات ... دى فيها شهر بقليله... انت رجعت فى كلامك و لا ايه
عمران/ ابدا و الله بس انا لقيت الظروف مش احسن حاجه فقولت نستغل الوقت ده فى حاجه مفيده
مختار / حاجه مفيده اه ... و بعدين ظروف ايه و زفت ايه انت مالك انت بالظروف احنا الظرف الوحيد اللى ماجلين عشانه الجوازه هو انك تخف و تقف على رجلك بالسلامه مع ان مش شايفه برده سبب بس اهو انما كمان تخرشملى الاوضه اللى هتتجوز فيها ... طب تصدق و تؤمن بايه
عمران / لا اله الا الله
مختار/ انا هجوزكوا حتى لو هنا فى الاوضه دى
عمران / وربنا ما هقول لا
مختار / دا انت عيل تنح
عمران / و الله بس لو حضرتك هديت الدنيا هتظبط ان شاء الله انا المهندس ماكدلى ان الموضوع هيخلص على طول و بعدين هو يعني مهره مش من حقها تقعد فى مكان على زوقها
مختار/ حقها
عمران / طيب ... هو بس عشان حضرتك ما شوفتش قد ايه كانت مبسوطه و هى بتختار الدهانات و الديكورات دى مضايق
مختار/ و انا هعوز ايه اكتر من انكوا تبقوا مبسوطين
عمران / اخبار خالتى ايه ما لحقتش اسلم عليها قبل ما تمشي
مختار / بخير ... بس الدنيا هى اللى مش بخير ... شكلنا داخلين على ايام ما يعلم بيها الا ربنا
عمران / هتعدى طول ما احنا مع بعض هتعدى باذن الله
مختار / انا عاوزك تكلم شاكر و تخليه يقف جنبك فى الفتره دى و تسحبه عليك و تقربه منك
عمران / حاضر بس اشمعن
مختار / عشان هم حاطينه فى دماغهم و انا قلقان عليه اوى
عمران/ قلقان على مين ؟! على شاكر !! لا يا أبا اعذرني اوت منك دى ... دا شاكر يا حج
مختار / و الله اللى شوفته منهم يخليني اخاف حتى على نفسي
عمران / هو الدنيا بره بايظه اوى كدا
مختار يتنهد
مختار / مش عارف ... و الله العظيم ما انا عارف
........................
فى الجبل
صابر / دى تنحه اوى يا جدع
شاكر / مش عارف هى بتفكر في ايه او ازاى بس ما نقدرش ننكر انها ذكيه جدا
صابر / مش هقدر اقول لا فى النقطه دى بس هى اكيد برده مش لوحدها مستحيل توصل للمكان ده لوحدها
شاكر / يونس تقصد ؟
صابر/ مش عاوز اظلمه
شاكر/ بس هو قال انه مش هيسمح لحد ياذيها
صابر / ما ينفعش تكون فى مكانين فى نفس الوقت يا معانا يا معاها
شاكر / بيقول عنها اخته
صابر / انا لو اختى كدا كنت دفنتها مطرحها
شاكر / مش هتقدر ... ما عندكش القلب ده يا صابر مهما الواحد كان قاسي مش على لحمه يعني
صابر / يا سلام يعني تسيبها تتعرى كدا و تحط شرفك فى الارض يعني
شاكر / اكيد لا ... بس برده مش هقتلها هنصحها همنعها هعمل كل اللى اقدر عليه
صابر / و ان ما ارتجعتش
شاكر / مش عارف ... يمكن ساعتها هضطر اقتلها
صابر / يعني ضيعت وقتك و حرقت جاز على الفاضي
شاكر / اكيد لا طبعا ما يمكن كان ربنا هداها فى الاول ازاى احكم على انسان بالفشل من غير ما اديله فرصه يحاول حتى
صابر / ربنا يقوى إيمانك و يطول فى حلمك كدا على طول
شاكر / ما تتمالسش
صابر / و انا اقدر ... المهم الخطوه الجايه ايه ؟
شاكر / فى ايه ؟
صابر / عموما ... هنفضل قاعدين كدا زى الولايا و هى طايحه كدا ما لهاش كبير
شاكر / قالت هتعيش بادبها
صابر / وانت صدقت ؟
شاكر / و انا فى ايدي ايه الكبار وافقوا
صابر / دا كلامك ؟!
شاكر / لا دا كلامهم هم و انا بقول حاضر و امين
صابر / مؤدب
شاكر/ اوى
صابر يضحك شاكر يبص له و يبتسم
........................
فى اوضه مغاورى
سماح / لا ما حصلش حاجه بس سمعت كلامك و راجعت نفسي و لقيت ان معاك حق
مغاورى / طب الحمد لله
سماح / الا صحيح يا مغاورى لو شاهين رجع هتقتلوه
مغاورى / اكيد مش هتبقي بالبساطه دى
سماح / يعني مش هتبقي بالبساطه دى اه و لا لا ابنى هيموت و لا لا
مغاورى / ابنك لازم يتعاقب على اللى عمله
سماح / و انت خلاص اجزمت انه عمل يعني ما فيش احتمال خالص انه يكون مظلوم
مغاورى / اقولك ايه بس ما فيش اى حاجه تبرئه شهاده ياسمينا و شهاده دياب و الكاميرات اللى مسجله لحظه دخوله السرايا و السيستم اللى ضرب انزار عشان شاهين و ياسمينا المسافه بينهم كانت قريبه جدا كل ده ايه ؟
سماح / كل ده شغل دياب هو اللى مصممه و هو اللى
مغاورى / و كلام يونس و امايا انه كان خاين
سماح / كان بيلعب على الحبلين زى ما انت طلبت منه بنفسك
مغاورى/ طلبت منه بنفسي !! انتى عرفتى منين الموضوع ده
سماح / عرفت من مكان ما عرفت رميتوا الواد فى جحر الحيات و فى الاخر قولتوا عليه خاين ... حتى فخ دياب ساعدتهم عليه و ما صدقتوش و سايب اللى حاولوا يقتلوه عايشين و متهنيين
مغاورى / اوعى تفتكرى ان كل ده سهل عليا اوعى تفتكرى انى من ساعه اللى حصل قادر انام و لا حتى ارتاح انا لأول مره فى حياتى مش قادر ارفع عيني فى عين الناس اى حد بيبص لى ببقي هموت يا ترى عرف اللى عمله ابنى يا ترى بيقولوا عنى ايه يا ترى هقدر احافظ على هيبتى لحد امتى قبل ما حد يجي يقولى شوف ربايتك شوف خلفتك ... انا كل ده مش فارق معايا ... انا اللى واجعنى بجد هو ابنى... انا قصرت فى ايه غلطت فى ايه ازاى ما اخدتش بالى بدرى ازاى سبته لحد ما وصل للمرحله دى ... لما غطيت عليه قبل كدا كنت صح و لا غلط انا اللى عملت فى ابنى كدا انا اللى دلعته انا اللى فسدته
سماح / و عندك فرصه انك تصلح اللى عملته
مغاورى / ازاى
سماح/ انك تهربه بره البلد
مغاورى / انتى بتقولى ايه ؟! هو انا لاقيه عشان اهربه
سماح / انا لقيته و لازم يهرب بره البلد و يحاول يبدأ حياه جديده
مغاورى / الهروب مش فى مصلحته
سماح / و انه يرجع مش فى مصلحته برده هو كدا كدا ما حدش هيصدقه خليه يبعد و يبدأ حياه جديده بعيد عن كل ده
مغاورى / انتى بتطلبى منى المستحيل
سماح / خلاص انسي انى قولتلك اى حاجه
مغاورى / طب لقيتيه ازاى
سماح/ مش هقولك اى حاجه دا ابنى و ما اقدرش اجازف بيه
مغاورى / سماح ابوس ايدك مش ناقص وجع قلب
سماح/ وجع القلب ده انت السبب فيه و انت اللى تقدر تنهيه بس انت اللى رافض تبقي اى حاجه غير تابع اعمل يا مغاورى حاضر سوى يا مغاورى حاضر اقتل ابنك يا مغاورى حاضر
مغاورى / انتى شيفانى كدا يا سماح
سماح / انت لو ما ساعدتش ابنك يا مغاورى مش هقدر اشوفك و لا ابص لك تانى
مغاورى / تمام يا سماح
مغاورى يسيب سماح و يمشي و يرزع الباب وراه
....................
فى شقه نسمه
نسمه / امتى حصل الكلام ده
ام نسمه / النهرده
نسمه/ فجاه كدا ... كل ده فجاه كدا
ام نسمه / لا مش فجاه بس ما كنتش عاوزه اقولك و لا ازود همومك كفايا اللى انتى فيه
نسمه / و هتسافرى امتى
ام نسمه / بكره الصبح
نسمه/ بكره على طول كدا
ام نسمه / فى تحاليل و اشاعات و فيلم اكيد مش هيعملوا العمليه خبط لزق كدا
نسمه / طب مين هيجي معاكى
ام نسمه / ما حدش اخواتك كل واحد فى همه و ما اقدرش اتقل على مراتاتهم و ابوكى وراه هم ما يتلم فى الارض
نسمه / يعني ايه ... دى عمليه كبيره مش سهله دا غير المشوره بتاعه التحاليل و الفحوصات دى مش هتقدرى لوحدك ابدا
ام نسمه / اعمل ايه بس ما انتى اكيد مش هترضى تيجي و تسيبي العيال هنا مع مراتات اخواتك و برده مش هينفع تاخديهم معاكى
نسمه / العيال صح ... خلاص هسيبهم فى سرايا الكبير
ام نسمه / يبقي تخليكي جنبهم احسن عاوزه الناس تاكل وشنا مش كفايا اللى بيتقال عننا فى الرايحه و الجايه ابوكى روحه طلعت منهم لله اللى قتلوك يا عبد الهادى كنت حايش عننا بلاوى
نسمه / منهم لله
ام نسمه / انا كدا كدا جايه اقولك انى هسافر عشان عوزاكى تاخدى بالك من ابوكى ما تقعدوش بقي تتخانقوا كل شويه و ينزل زعلان و انتى تزعلى و الكلام ده مش عاوزه بالى هناك يبقي مشغول عليكوا هنا
نسمه / بس انا مش هقدر اسيبك لوحدك
ام نسمه / طب اعمل لك ايه يا نسمه بس و بعدين يا بنتى هو اخواتك ممكن ياذوا عيالك يعني ما تفوقى بقي يا بنتى بطلى الوسواس القهرى اللى عايشه و معيشانا فيه ده
نسمه / تمام هقوم اجهز شنطتي و شنطه العيال
ام نسمه / نسمه لو مش عاوزه انا كدا كدا ما كنتش عامله حسابى عليكي
نسمه / اكيد مش هسيبك لوحدك يعني يا أمى
ام نسمه / ربنا يباركلى فيكي يا ضنايا و يهديكي و يريح بالك زى ما ريحتى بالى
نسمه تبتسم و تقوم تدخل الاوضه
..........................
فى اوضه نجاه قرب الفجر
نجاه نايمه تسمع حاجه بتخبط فى باب البلكونه تصحى مخضوضه تقوم تلبس الاسدال و تفتح الباب تلاقي موبايل صغير جدا قد صابعين بالظبط بزراير مرمى فى ارض البلكونه تبص يمين و شمال و تروح تبص من البلكونه مفيش حد الموبايل يرن تتخض و ترد
نجاه / السلام عليكم
جوزيف / صحيتك ؟
نجاه تقعد على الارض فى البلكونه
نجاه / يونس !! ليه كدا يا يونس
جوزيف / واحشنى الكلام معاكى
نجاه / انت عارف المشكله اللى ممكن تحطني و تحط نفسك فيها لو حد عرف باللى انت عملته ده
جوزيف / للاسف عارف بس مش ما قدرتش امنع نفسي ... لحظه شيطان ممكن ... انا مش عاوز اسبب لك اى مشاكل بس هم خانقينى جدا دا انا كنت بكلمك اكتر من كدا و انا جوزيف دلوقت بخطف النظره و الكلمه
نجاه / لا تدرى لعل الله يحدث بعد ذلك أمرا
جوزيف / انا سمعت الجمله دى قبل كدا ... استنى دا قرآن... ايوه ايوه فى سوره الطلاق صح فى سوره الطلاق
نجاه / فخوره بيك جدا
جوزيف / و لسه دا انا أعجبك أوى
نجاه / عاجبنى... قصدى عاجبنى التغير و المجهود اللى بتبذله يعني ... انا اصلا طول عمرى مؤمنه ان اللى بيدخل الاسلام جديد بيكون ايمانه احسن و اقوى و أصح من ناس كتير اوى خدت الاسلام بالوراثه و ما تعرفش عنه ربع المعلومات اللى بيعرفها اللى زيك
نجاه تطلع خصله من شعرها و تلعب بيها على صابعها
جوزيف / انا شايفك
نجاه تعدل شعرها بسرعه و تبص حواليها يمين و شمال تشوف ميكرو روبوت تجز على سنانه الروبوت يطير
نجاه / انت مش هتتهد الا اما اجيبك تحت رجلى صح ما تبطل حركاتك القرعه دى
جوزيف / كنت محتاج اطمن ان الموبايل وصلك انتى و ما حدش خد باله و الله و بعدين انا مؤدب انا كان ممكن اقعد اتفرج و ما اقولش بس انا مؤدب
نجاه / ما تعملش الحركات دى تانى انت بتحطنى تحت ضغط انا بحس بتأنيب الضمير انى مخبيه على ابويا حاجه ... ابويا هو اغلى حد عندى فى الدنيا و ما اقدرش اعمل اى حاجه من وراه ... ما اقدرش خصوصا لو الحاجه دى ممكن تضايقه و هو ما شاء الله يطيق العما و لا يطيقكش
جوزيف / شعور متبادل اقسم بالله و يمين بالله لولاكي لكنت
نجاه / دا ابويا يا يونس اتلم
جوزيف / ما تيجي نغير الموضوع احسن ... تعالى نتكلم فى اى حاجه تانيه ... اى حاجه زى ... زى مثلا ... زى .. زى مثلا انتى ليه بعد ما كنتى زعلانه و عاوزه تفردى شعرك رجعتى تانى لاستايل موج البحر
.........................