الكبيره ٢ بقلم / لولو_محمد

الحلقه ٩٩

(((((( الكبيره ٢))))))))
#لولو_محمد
الحلقة ٩٩
ابو صالح / أمجد ابو العزايم أبن الاستاذ شريف ابو العزايم مدرس الجغرافيا فى مدرسه ام المؤمنين الاعداديه بنات اهو ده ضله ما بيفارقوش بعض ثانيه

ام صالح/ سره كله معاه فى الاول كان بيقول ما اعرفش حاجه بس لما الوقت اتأخر و الواد ما رجعش و عيطت لأمه فى التليفون قال حوار البت بتاعه النت ده بس قال ما يعرفش تفاصيل

عباده / تمام

عباده يطلع التليفون

عباده/ ايوه يا دياب ازيك ... انت عرفت ... تمام اتصرف و مستنى منك رد

عباده يقفل و هو بيتصل بحد تانى

عباده / بشمهندس دياب خد خبر و بيراجع خط سير صالح من موبايله و بيفرغ كاميرات المراقبه و باذن الله يبات فى بيته الليله ... ايوه يا فتحى عدى على بيت الاستاذ شريف ابو العزايم خليه يعدى عليا دلوقت ضرورى هو و ابنه أمجد... حالا يا فتحى ... تمام فى حفظ الله ... باذن الله خير ما تقلقوش

ام صالح/ جيب العواقب سليمه يا رب

مختار يدخل

مختار/ خير فى ايه ازيك يا ابو صالح ايه اللى حصل

............................

فى الجبل

جوزيف قاعد فى مكان فاضي يراقب السما شاكر و صابر يدخلوا

شاكر / السلام عليكم

جوزيف يقوم و ينفض بنطلونه

جوزيف / عليكم السلام

صابر / بقالك كتير قاعد قولنا نيجي نطمن عليك

جوزيف/ تسلم ... هو مفيش حاجه قاعد عادى

صابر / عادى ما تطلعش منك

جوزيف/ و انت عارفني يعني عشان تتكلم بالثقه دى

شاكر / يا سيدي نتعرف انت فعلا بقالك كتير جدا قاعد لوحدك ما اتحركتش قلقتنا قولنا نيجي نشوفك

جوزيف / تسلم بس هو فعلا مفيش حاجه

شاكر / متاكد مش محتاج حاجه او ناقصك اى حاجه يعني ... تحب نمشي و نسيبك لوحدك

جوزيف / لو عاوزين تمشوا امشوا لو عاوزين تقعدوا اقعدوا

صابر يقعد عينه على جوزيف و جوزيف عينه معاه شاكر يشوف صابر بيقعد يقعد جوزيف يتنهد و يقعد و يبص لهم

جوزيف / و بعدين

صابر / الجدع ده لما بيقعد هنا بطوله بيقعد يقرأ قرآن

شاكر يبص لصابر

صابر / بس لما بيقعد وسط الناس بيقعد ساكت بيسمع و بس يعني ماشي بمبدأ فلتقل خيرا او لتصمت

جوزيف / و انت

صابر/ انا الجبل ده عمرى كله حافظه حجر حجر مين بيطلع و مين بينزل و اللى بيطلع بيعمل ايه و ليه و ازاى و امتى عشان كدا بقولك طلوعك هنا مش عادى فهلتزم الصمت انا راخر لحد ما افهم حكايتك