الكبيره ٢ بقلم / لولو_محمد

الحلقه ٩

(((((( الكبيره ٢)))))))
#لولو_محمد
الحلقه ٩
احلام حاضنه نجاه و مش بتسيبها
نجاه / حقك عليا حقك عليا سامحيني
احلام / سلامتك بالدنيا و ما فيها الف مليون حمد الله على سلامتك
نجاه/ انتى مش متخيله انتى مرزقه قد ايه انتى مش متخيله مين اللى كان خاطفنى انتى مش هتصدقى الحقيقه
احلام / قالولى ان بلال طلع واحد من ولاد الكلب
نجاه / دا مش اى واحد ... اه لو شوفته اه لو ليمونى عليه يمين بالله لقطع من لحمه نساير ابن الحرام ده ... دا شيطان دا واحد تانى غير اللى كان راسمه هنا فاكره كان بيتمسكن ازاى فاكره الواطى ابن الواطى كان بيتعامل معانا ازاى طلع ابن كلب جزمه ما يتقلعش من رجلك
احلام / طب اهدى الحمد لله قدر و لطف
نجاه / كلمتى اهل بدر
احلام / ما حدش فيهم عاوز يرد عليا و امين كلمهم ابوه رد عليه و فى وسط الكلام سمع مراته نازله عليا دعا و حسبنه و كانى انا اللى قتلته
احلام تعيط نجاه تحضنها
نجاه / و انتى ذنبك ايه بس
احلام/ اول ما عرف انك اتخطفتى جالى طيران ساب اللى فى ايده و اللى وراه و اللى قدامه و جرى علينا اتاريه بيجرى على قضاه قتلوه على اول البلد
............................
نجاه / الله يرحمه ... نحسبه عند ربنا شهيد باذن الله
احلام / امين ... شكلك مرهق اوى
نجاه / انا اصلا عيانه و واخده مضاد حيوى قوى و اتحسنت كتير عن امبارح دا غير انى واخده علقه موت... انا جسمي كله ازرق ..  بس ما تقوليش لحد
احلام / منهم لله تتقطع ايدهم اللى اتمدت عليكي دى
الباب يتفتح و ياسمينا تدخل 
ياسمينا / جرا ايه يا ست نجاه هو احنا ما لناش حق عليكي احنا كمان و لا ايه
نجاه تقوم تحضن ياسمينا
ياسمينا / وحشاني يا جزمه وحشانى اوى
نجاه / ربنا ما يوريني فيكى حاجه وحشه ابدا
………………………
فى مكتب الزنايته
ناصر يخبط على الباب و يدخل يلاقي مختار قاعد مع مغاورى بيبصوله
ناصر / حضرتك طلبتنى
مختار / تعال يا ناصر ادخل و اقفل الباب
مغاورى / اخبار الدنيا ايه بره
ناصر / قلق الكل عينه فى وسط راسه و ما حدش بيتنفس و تقريبا كدا فى حظر تجوال اتفرض ودى بعد ما الناس استقبلت نجاه ما كناش قادرين عليهم قبلها
مختار / ما تخنوقوش الناس
ناصر / مش بكيفنا يابا ... المهم خير اؤمرنى طلبتنى
مختار / تعال اقعد و طمنى عليك عامل ايه
ناصر يبتسم و يقعد و هو مستغرب و مش فاهم
ناصر / انا تمام الحمد لله خير يابا قلقتنى فى ايه
مختار يبص لمغاورى و يرجع يبص لناصر بيتابعه باهتمام و توتر بيداريه بابتسامه مختار ياخد نفس يملا صدره و يستجمع نفسه و يتكلم بهدوء
مختار / انا بصراحه مش عارف ابدا منين بس فى حاجه لازم تعرفها و كل ما عرفتها اسرع كل ما كانت احسن
ناصر / خير
مختار / اميره ... عايشه
ناصر يرتبك و مش قادر يصدق يقوم يقف و يبص لمغاورى و يرجع يبص لمختار
مختار / ما اسمهاش اميره اسمها امايا و هى و اختها كانوا... جواسيس فى البلد تبع جوزيف و اللى وراه
ناصر يضحك و يقعد و مش مصدق
ناصر/ يابا كنت صدقتك
مغاورى / و بلال بتاع الكلاب اللى جابته كان تبعهم
ناصر / بلال بتاع احلام
مغاورى/ و هيلين اللى كانت بتعالجها
ناصر / انا مش فاهم حاجه انا تهت
مختار / كل ده كان فخ عشان يدخلوا وسطينا و يقربوا مننا
ناصر / طب و الجثه و اللى عشناه سوا ... لو كان ده فخ تهرب ليه تعمل كل ده ليه
مختار / ما نعرفش ... بس نجاه اللى قالت لقتها هناك و هى اللى قالتلها الحقيقه و هى اللى ساعدتهم يخطفوها
ناصر / يعني كل ده كان كدب
مختار / بص انا عارف ان
ناصر/ كان كدب صح ... كل الهبل ده كان مجرد تمثيليه .... و انا كنت ايه كنت كوبرى
مغاورى / اهدى يا ناصر انت ربنا نجدك زى ما نجد احلام حقك تفرح
ناصر/ لا يا عمى مش ههدى مستحيل ههدى ايه لعبه انا ؟! كوبرى !! و الله ما اهدى و لا ارتاحلى بال الا زى ما دفنتها بايدي و انا بتقطع مره لادفنها تانى و انا بتشفى
مختار / ناصر
ناصر يبص لابوه و الغضب ماليه
مختار/ حقك هيرجع بس اختيار الطريقه و الوقت فن و زى ما لعبوا عليك لعبوا علينا ... نجاه رجعت عشان الجدع اللى اسموا جوزيف اللى بقاله سنين منغص علينا عيشتنا بيقولوا طلع يونس ابن رشيد اللى بقالنا سنين بندور عليه ... و بيقولوا برده ان اميره او امايا زى ما تتسمى بقي تبعه
ناصر / يعنى ايه مش فاهم
مغاورى / يعني ما تضربش البردعه و تسيب الحمار طايح فينا لازم تهدى عشان الحمار بذات نفسه جاى يعيش وسطينا
مختار / يا عم انت كمان ... يا ناصر احنا داخلين على مرحله جديده هتغير كل حاجه انا جبتك هنا عشان تعرف الحقيقه منى عشان تتحكم فى اعصابك و تقدر تحافظ على ثباتك الانفعالى الفتره الجايه اكتر مرحله خطر و اكتر مرحله حرجه مرت و هتمر علينا يا نحط ايدينا فى ايد بعض و نهدى و نتصرف صح يا مش هتقوم لينا قومه تانى
ناصر / قطمه احسن من نحته احنا دلوقت عرفنا مين عدونا الحقيقي يبقي خلاص نخلص منه و نخلص
مختار / غلط احنا مش عارفين اى حاجه احنا ابعد ما نكون اننا نعرف مين عدونا الحقيقي يونس ما اتولدش وسطيهم دا اتولد وسطينا و اتخطف و اتدرب و اتجند و اتوجه سلاح ضدنا احنا بقي عاوزين نستغل يونس انه يوصلنا للى كان حاطت ايده على الزنات عاوزين نلف السلاح من وشنا لوشه عاوزين نضمن انه زى ما درب يونس مش هيعيش يدرب غيره
مغاورى / و كمان نعرف درب مين تانى مش كل يوم نكتشف واحد مننا طلع فى الاصل منهم لحسن دا اللسته طلعت طويله اوى
مختار / شكرا ... اخيرا قولت حاجه
مغاورى / انت اللى ودانك مسدوده ابقي سلكها
مختار / وربنا ما هو وقتك
مغاورى / انت اللى باديت هو فى ايه 
مختار /حقك عليا ... ها يا ناصر فهمت احنا جبناك لوحدك نتكلم معاك ليه
ناصر / فهمت
مختار/ هقدر اعتمد عليك
ناصر / ما اوعدكش
مختار يتنهد و يخبط على المكتب
ناصر / انا محتاج اقعد لوحدى شويه ... عن اذنكوا
ناصر يسيب المكان و يمشي و يسيب الباب مفتوح شاكر يدخل راسه
مختار / اللزق لاخوك و ما تفرقوش لحظه
شاكر يهز راسه و يطلع يجرى
مغاورى / تفتكر هيعمل ايه
مختار / حاجه مجنونه زيه
....................
فى اوضه عباده
عباده بيصلى الباب يخبط و يتفتح نجاه تدخل راسها تلاقى ابوها واقف تدخل و تقفل الباب و تفضل واقفه تتابعه لحد ما يخلص و يسلم تروح تقعد قصاده
نجاه / عامل ايه دلوقت
عباده يملس على خدها نجاه تبتسم
عباده / كفايا شوفتك
نجاه / لو قادر انزل و اتمشى فى البلد و خلى الدنيا تشوفك ما تفضلش فى اوضتك كتير
عباده يتنهد
نجاه / تحب اجى معاك ؟
عباده / هتسنديني يعني ؟
نجاه / عباده الزيني مسنود على اللى خلقه يعني مش محتاج مخلوق يسنده
عباده يضحك نجاه تبتسم اوى
عباده / احكيلى اللى حصل بالحرف ما تخبيش عنى حاجه
..................
قصاد الشيلتر
ناصر يدخل راكب جنب سواق الحفار و بيشاورله على السور شاكر يدخل بسرعه يفرمل بعربيته بالعرض قصاد الحفار السواق يفرمل ناصر ينط يتخانق مع شاكر اللى نزل يجرى من العربيه و اهل البلد كلهم يتلموا
شاكر / بتاعك ده مكتوب باسمك باى حق و باى صفه
ناصر/ يمين بالله ما هيبات ليله واحده
شاكر / مش من حقك ... الحيوانات دى ما لهاش ذنب
ناصر / ابعد عن وشي يا شاكر بقولك
شاكر / دوسنى دوس اخوك و خلى شيطانك يركبك يمكن تهدى دوسنى يا ناصر
ناصر / ما تخلينيش اجيب شكاره سم و اموتلك كل الكلاب اللى فى البلد بحالها
شاكر / هم كانوا من باقي اهلى ما تقتلهم بس هتقول لربنا ايه قتلت ارواح بتسبح ربها ما كانتش بتاذيك و لا تقدر تدافع عن نفسها هى دى الإنسانيه هى دى الرجوله يا ابن ابويا
ناصر / يوووووه بقي ابعد من وشي السعادى يا شاكر انا مش طايق روحى ... خلص يا عم
ناصر يجي يشاور لسواق الحفار راجل عجوز يحضنه جامد و هو بيطبطب عليه و ناصر بيحاول يفك نفسه
الراجل / اهدى يا ابنى الدنيا مش مستاهله كل ده
ناصر / خلاص يا حج تمام
الراجل مش بيفك الحضن و عمال يكرر نفس الكلمه
الراجل  / يا ابنى اهدى انت لسه صغير
ناصر يفك الراجل بالقوه الراجل يقع فى الارض شاكر يجرى يسنده و الراجل بيعيط
شاكر / انت اتجنيت و لا ايه حقك عليا يا والدى حقك عليا
الراجل / انا مسامحه انا مسامحه ربنا يهديك يا ابنى ربنا يهديك
راجل ٢ / انت ايه اللى جرالك يا سي ناصر دا انت ما كانتش بتطلع منك العيبه ابدا
شاكر يسند الراجل العجوز يركبه عربيته و ناصر واقف بيعانى انه يتحكم فى غضبه و ندمه و عمال يبص للناس سواق الحفار ينزل
السواق / سي مختار قالى ما اهدش حاجه و بيقولكوا عاوزكوا فى السرايا حالا بالراجل اللى اتزق عشان يجيبله حقه
الراجل / انا مسامح يا ابنى دا قد اولادى انا عارفه طيب ربنا يهديه و يصلحله حاله
شاكر / لا يا والدى حقك علينا حضرتك هتيجي معانا ... الا انت تبقي مين يا والدى صحيح انا اول مره اتخايل بيك فى البلد
الراجل يضحك
الراجل / انت مش عارفنى ... لحقت تنسانى يا شاكر اما صحيح جيل دماغه مطيوره انا حما عبد الفتاح السنوسي من كفر ابو عبيطه كنت جاى اطل على بنتى ما انت عارف ان جوزها منصاب يا كبدى ادعيله قولت اشقر عليها و اجيب ليها لقمه تتقوت بيها هى و العيال انت عارف ان الناس فى الحالات دى ما بيفتكروش حاجه و لا بيركزوا فى حاجه انت مش فاكرنى ازاى دا انت حاضر الفرح و منقطنى بايدك السنه اللى فاتت
شاكر / اعزرنى يا حج و الله ما عارف اقولك ايه
الراجل / ما تقولش الله يكون فى العون استاذن انا بقي و ما تزعلش نفسك يا ناصر يا ابنى مفيش حاجه تستاهل
ناصر / حقك انت عليا يا حج انا ما قصدتش و الله
الراجل/ هو انا هتوه عنك يا ابنى دا انتوا ولاد اصول استاذنكوا اللحق العربيات لحسن الوليه تستعوقنى و تقلبها مناحه و انتوا مش هيخفى عليكوا شغل الحريم
الناس تضحك
شاكر / ما تقلقش يا حج انا هوصلك بنفسي لحد باب البيت بس دلوقت تنورنا تشرب مع ابويا فنجان القهوه و تاخد واجبك
الراجل/ ما تكبروش الموضوع يا ابنى
ناصر / لا يا حج ازاى بس اتفضل ... امشي يا ابنى امشي
ناصر يشاور للسواق يروح يركب و يمشي و الغفر يبدا يفرق الناس و ناصر و شاكر يركبوا و الراجل راكب قدام جنب شاكر شاكر يسوق و الراجل ساند على الشباك بايده بره يبص على وشه فى مرايه الجنب و هو مبتسم
......................
فى اوضه نجاه
نجاه/ و الله يابا ما هتصدق ... كان ربنا نزل سكينه منه على قلبي هم اللى كانوا مرعوبين منى ... ادونى مصحف و سجاده و فضلت اصلى و ادعى و اقرا قران لحد ما اغفل مكانى و كان بيتحطلى اكل لحد ما خلونى اسمع حسك و انا كنت بكلمك و انت مش سامعنى ساعتها كنت هتجن
عباده / مين اللى دخلك وقتها
نجاه تتعدل فى قعدتها
نجاه / بلال
عباده يبص فى الارض
نجاه / بس اقسملك يابا انى ما سبته يخرج من الاوضه غير و هو سايح فى دمه يمين بالله يابا علمت عليه علامه لو عاش عمره كله هتفضل سايبه اثر عشان كل اللى يشوفه يقوله من ايه دى يفتكرنى و مش بس كدا دا انا خرجت من الاوضه غصب عنهم و حاولوا يرجعونى ابدا كنت خلاص يا قاتل يا مقتول وسطهم لحد ما ربنا كتب انى اشوف وش يونس و اعرفه انا اصلا مش فاكره اخر مره شوفت صوره عم رشيد امتى و لا فاكره ازاى افتكرت ان ابنه كان اسمه يونس كان ربنا اللهمنى عشان ارجع سبحان الله كان الملايكه كانت محوطانى انا لو قعدت اعيد اللى حصل من يوم ما كنت فى الاستاد لحد دلوقت و الله يابا ما مصدقه
عباده / حمد الله على سلامتك
نجاه / تعرف يابا كان فى حاجه واحده بس رعبانى كنت خايفه تسمع كلامه و تضعف انت و جابر قالى انه قالكوا انى هرجع لو موتوا نفسكوا قولتله و عيني قويه ابويا مش هيموت الا اما يرجعنى حتى لو عضم فى قفه ابويا مش هيسبنى قولتهاله و انا واثقه و مؤمنه
عباده يبتسم
نجاه / هتقوم معايا ؟؟
عباده / هقوم و هتمشي معاكى فى البلد كمان
نجاه تبتسم و تجرى تفتح الدولاب و تقعد تقلب فى الجلاليب و تطلع واحده سوده
نجاه / بتبقي عريس فى الجلبيه دى ايه رايك
عباده / و هو فى راى بعد راى الكبيره ماشي كلامك
نجاه تضحك و تروح تسند ايد عباده يقوم يبوس راسها و يروح الحمام الباب يخبط تروح تفتح تلاقى محمد يشوف نجاه يرجع خطوه لورا
محمد / ازيك يا نوجه عامله ايه
نجاه / تسلم اخبارك ايه عاوز ابويا فى حاجه
محمد / اه عاوزينه فى المضيفه تحت هو حوار مش مهم يعني بس قالولى اقوله لو يحب ينزل
نجاه / لا نازل باذن الله بيتشطف بس و هيغير و ننزل على طول
محمد / و انتى كمان ؟!
نجاه / بلاش !!
محمد / لا عادى براحتك انا ما قصدتش حاجه هو اصلا حوار اهبل و خلصان مش فاهم مطولين ليه يعني و يجوا لحد هنا و بتاع انا مالى الفراغ يعمل اكتر من كدا
نجاه / و الفراغ عرف طريق بيتنا ازاى يا سي محمد
عباده يطلع من الحمام
عباده / فى ايه يا محمد
محمد / مفيش يا كبير ناصر عرف ان اميره عايشه حلف ليهد الشيلتر اهل البلد و شاكر منعوه و فى وسط الكلام زق راجل كبير وقعه و قوموه و صالحه و اعتزر و الحكايه خلصت بس مش عارف ليه جابوه على هنا و عمالين لسه يراضوا و يضايفوا فيه تحت فى المضيفه و ابويا هاتك يا اعتذارات انا مش فاهم يعني
نجاه / مين الجدع ده
محمد / ما اعرفوش ما اتخايلتش بيه قبل كدا بس هو فى البلد من صباحيه ربنا دياب اتبع سيره و جاب قراره
نجاه / يبقي عشان كدا جابوه على هنا بقي يا محمد بيه بيكسبوا وقت لحد ما التقرير يوصل
محمد / قولى و الله و ان طلع نبوت الغفير هنكسب ايه بعد ما دخلناه جوه بيتنا يا ست الستات
عباده / هنكسب صلاه النبى ... انا نازلهم
نجاه / اجى معاك ؟
عباده يبصلها و يهز راسه تبتسم و تجرى وراه محمد يستغرب و يروح وراهم
.......................
فى المطبخ
البنات كلهم شغالين بيرصوا صينيه اكل
احلام / و الله انا ما عدتش بستغرب اى حاجه فى ام البلد المجنونه دى دا احنا لو عدينا بيوم هادى نادى نتحرق
فاتن ص / تفى من بقك الحمد لله احنا فى فيض من النعم
احلام/ الحمد لله انا خلصت نادوا حد بقي يطلعها عشان انتوا هارينى من الصبح انزلى يا احلام اخرجى من اوضتك يا احلام فكى عن نفسك يا احلام و ادى اخره احلام مدعوكه فى المطبخ
رحمه تضحك احلام تتنهد هند تدخل
هند / اخبار واجب الضيافه ايه يا بنات ... الله اكبر ما شاء الله لا حقيقي ما شاء الله انجزتوا
فاتن ص / اى خدعه يا عمتى انتوا تؤمروا بس
احلام / انتى هتظيطي دا اكل حلاوه رجوع نجاه بالسلامه احنا بس وضبناه و قدمناه مش اكتر
هند / تسلم ايدكوا اطلعى يا رحمه نادى محمد ياخده هو واقف بره مستنيه
رحمه / عيني
البنات يعدلوا حجابهم و رحمه تطلع بره و هند بتبص لو فى حاجه ناقصه
..........................
فى المضيفه
محمد يحط صينيه الاكل و الرجاله قاعدين مع الراجل و نجاه واقفه بره بعيد مع جابر بيتكلموا
الراجل / يدوم العز يا محمد يا ابنى ربنا يباركلك و يبارك فيك
محمد / تسلم يا حج الف هنا
مختار / على العموم يا حج
الراجل / على العموم احنا ما عادش فى بينا تكليف و لا ايه يا عباده
نبره الراجل تتغير و الكل يتفاجئ بكلمه عباده حاف و يبصوا لبعض الراجل بيفك لزقه من على رقبته من تحت ياقه القميص و صوته يرجع جوزيف اللى بدا يقلع العدسات و الماسك التنكرى و الكل واقف مصدوم
جوزيف / يااااه البتاع ده بيعرق اوى ... ايه بتبصولى كدا ليه المفروض انكوا مستنيني يعني .... دا انا محدد معاد حتى هى نوجه ما بلغتكوش و لا ايه
ناصر / اسمها ستك نجاه يا ابن الحرام
ناصر يحاول يتهجم شاكر و مختار يمنعوه و مختار مركز مع جوزيف و مش مصدق عينه الدربكه تخلى نجاه و جابر يروحوا ناحيه المضيفه
جوزيف / ايوه كدا عقلوه عشان ما تبكوش عليه ... على فكره انا المفروض ما اقولكش بس بما ان اللعبه دلوقت كلها اتغيرت لازم احذرك انت من سنين و انت الحلقه الاضعف فى العيله دى دا حتى عيله زى امايا ما احتاجتش وقت طويل عشان تلقطك و تبدا تلعب عليك
ناصر / ما تطلعلى بره و نشوف الحلقه الاضعف دى هتعمل فيك ايه
جوزيف / اكيد ما جيتش وسطيكوا بطولى ... جرا ايه يا نوجه ما قولتيش ليهم و لا ايه
نجاه / مش هتفرق ما انا لو مت هتموت معايا بس ساعتها مش هتلحق تعرف الحقيقه
جوزيف / وجهه نظر ... بس .... ما تيجوا نشوف
جوزيف يتك على زرار فى كمه نجاه تقع فى الارض متكهربه و بتصرخ و الكل يتفزع و عباده يجرى عليها جوزيف يتك تانى نجاه تتعدل يساعدوها تقوم و تقعد
جوزيف / هنتعامل باحترام هقلعهالها هتفتكروا بقي انى لوحدى وسطكوا فانتوا قاريني غلط خالص انا اقدر انسف البيت ده كله بحريمه بعياله مره واحده انا كدا كدا ميت
مختار يبتسم جوزيف يبصله و يبتسم
جوزيف / عجبتك صح  ... انا ليا التاثير ده على الناس ... على فكره هى نفسها ما حاولتش تقلعها خالص عشان عارفه ان اى محاوله لفكها هتاكتفها و تكهربها ... المبهر فيها بقي غير انى عاملها بايدي ... مش عمران لوحده اللى بيعرف يخترع يا مخ ... انها معموله من ماده ما بتظهرش فى كشف المعادن و لا بتتاثر بالميه... شوفتوا جو بيعمل عظمه ازاى
مختار / روح يا محمد المكتب هات اللبوم عمك رشيد من الخزنه
محمد يبص لمختار و يبص لجوزيف و يمشي  جوزيف يقعد و يشد حمامه و ياكلها
جوزيف / تسلم ايديهم بصراحه مبهر و تحفه و سواه مظبوط جدا كمان ... الاكل الحلو ده ما تلاقوهوش الا فى البيوت اللى زى دى بتاع السوق يقرف ما يتاكلش
عباده / الف هنا بس انت عارف يعني ايه تاكل فى بيتنا
جوزيف / عيش و ملح قصدك ؟ هو لسه فى حد بيصونه دلوقت !! يا راجل هى جت عليا
عباده / انا ليا حق عندك ابن رشيد مش ابنه لازم نتكلم و تفهمنى بتعمل كل ده لمصلحه مين و مين اللى وراك
جوزيف يبص وراه
جوزيف / ورايا الحيطه و بعدين هو رجوع بنتك صاغ سليم زى ما استلمتها ما يساويش الحق ده عندك ... انا ممكن احرمك منها تانى عادى
جابر / رجوع نجاه كلفك كتير و اكيد الجماعه بتوعك مش هيسكتوا و لازم تفهمنا احنا داخلين على ايه
جوزيف / حرب لا انا و لا انتوا قدها بس مع بعض ممكن ... بقول ممكن نطلع منها باقل الخساير
الكل يقعدوا
جوزيف / شايفين لما بتشغلوا مخكم بتجيبوا نتيجه حلوه ازاى... بس ايه رايك فى الداخله بتاعتى شبح اصلى صح
نجاه / كنا مستنينك كدا كدا ما كانلوش لزمه كل ده
جوزيف / ما هم كانوا مستنينى فعلا ... كاميرات زياده فى كل حته و مضاعفه عدد رجاله الحراسه و صورتى اللى فى ايديهم ... يلا ادينا اتسلينا ... اصلى ما بحبش الملل ... بس هو ايه الدنيا لو ما طلعتش ابن رشيد
مختار / و الله لولا انك اصغر كتير فى السن كنت قولت انك هو و لا ايه يا كبير
عباده / مش هتفرق ... خلينا فى الجد فك الهبابه اللى فى ايد البت و خلينا نتكلم راجل لراجل
جوزيف / انتوا ما بتاكلوش ليه صحيح ما تاكلوا الاكل حلو اوى ... اخبار ابنك ايه يا مغاورى
مغاورى / بخير الحمد لله اؤمر
جوزيف / ما يؤمرش عليك ظالم بس ابقي خد بالك منه ... عشان بيني و بينك انا ما كنتش عاوز اسيح قدامهم بس ... نصيحه يعني ... ابنك هو الحلقه الاضعف فى البلد كلها ... مش فى الجوارحه بس ... تخيل !! طلع اضعف من ناصر كمان
مغاورى / شكرا على النصيحه
جوزيف / لا ما تقولش احنا اهل ... ممكن اخد واحده كمان  ... اصل انا ضعيف اوى قدام اللقمه الحلوه
عباده / الف هنا
محمد يدخل و يفتح على صور رشيد و يوريها لجوزيف ياخد الالبوم و يتفرج
مختار / سيبك من الشكل ... كانك هو ... طريقه الكلام و الصوت و التصرفات حتى المخ الشيطانى سبحان الله
جوزيف / تمام ... دا بقي طلع فى مصلحتكوا انا بقي ... هاستفيد ايه
جابر / كان المفروض تفكر فى ده قبل ما تخلى نجاه تمشي
جوزيف / ارجعها عادى و اخد معايا اتنين تلاته كمان هو انا صغير دا انا اكبر من الكبير بتاعكوا
نجاه / ليك ورث كبير احنا بس اللى نعرف طريقه
جوزيف / فلوس !!! لا يا حب دا انتى قريانى غلط خالص
جابر / اتعدل و انت بتكلمها عشان ما يبقاش عليا انا و على اعدائى
جوزيف / وريني
عباده / جابر !! اهدى شويه ... خلينا وراه للاخر ... بص انت ممكن تكون شبهه ممكن تكون هو ... بس احنا لازم نطمن اكتر و هنعمل دى ان ايه
جوزيف / حقك ... بس انت تعرف انى اقدر ادخل سيستم اى معمل تحاليل و اغيرلك النتيجه
نجاه / انت عاوز تعرف الحقيقه اكتر مننا ما تصيعش ... و الفلوس اللى بتكلم عليها كتير فعلا
جوزيف / انا معايا حسابات كل البشر على الكوكب اقدر اسحب اى مبلغ فى اى وقت تفتكرى الفكه اللى ابويا سبهالى هتفرق معايا
مختار / امال ايه اللى يفرق معاك
جوزيف / مش عارف ... مبعرفش افكر و معدتي مليانه مفيش حاجه ساقعه نهضم
ناصر / انت جايب الصداغه دى منين يا جدع
جوزيف / من رشيد هو كان اسمه رشيد ايه صحيح
مختار / السبع رشيد السبع
جوزيف / يعني انا يونس رشيد السبع ... تؤ اسم اى كلام يوسف المصرى احلى
نجاه / القرار فى ايدك عاوز تبقي جوزيف الباب يفوت جمل اتوكل على الله و خد فلوسك و امشي
ناصر / ما لوش فلوس لو مش ابن رشيد
نجاه / دا ورثه الشرعي امانه و بنسدها ما لناش دعوه بالباقي
ناصر / انتى مغسولك دماغك و لا انتى ايه حكايتك بالظبط
مختار / نجاه معاها حق ... و لو اخترت تبقي يونس هتبقي مننا نحميك و تحمينا
جوزيف / هتسمعوا كلامى ... و شغل نفخه الصدر بتاعه العيال دى هتتلم عشان انا خلقى ضيق ... و اه المفتاح من سنين نجاه فلو عاوزين تضمنوا الحرب دى نجاه بتاعتى
جابر / بتاعتك ايه بروح امك انت هتنسي نفسك و لا ايه
جوزيف / لا فاكرها كويس و عشان فاكرها عارف كويس انكوا مش هتقدروا تحموها و لا حتى جوه البيت ده فلو عاوزين البت دى تفضل عايشه كويسه فى حضنكوا اى حاجه تخصها تتاخد باذنى انا مفهوم
جابر / ادينى سبب واحد انى ما اقتلكش دلوقت
عباده / جابر
جوزيف / محتاج سبب تانى ؟
عباده / اشمعن نجاه ليه مش انا
جوزيف / عشان انت راجل عجوز كدا كدا ميت احنا بنبص لقدام هى المستقبل
جابر / بس انا اللى هبقي الكبير مش هى
جوزيف يضحك و يشرب شويه مايه
نجاه / وضح لو سمحت
جوزيف / كلمه مين اللى بتمشي فى البلد
نجاه / كلمه ابويا
جوزيف يشاور على عباده و بعدين يشاور على جابر
جوزيف / تؤ ... كلمتك انتى ... لا ده يقدر يرفضلك طلب و لا ده يقدر يردلك امر و لا واحد من اللى قاعدين دول هيقدر يكسر كلمه ابوكى دلوقت و لا كلمه جابر باشا بعدين ... انتى الوحيده اللى فى القاعده دى اللى ما لكيش مالكه بالعكس كل حاجه جربتها اكسرك بيها جابت نتيجه عكسيه لدرجه انك حرفيا للحظه موتى نفسك بسبب عندك ... هى قالتلك انها ماتت و صحيت تانى و لا ما حكتش اللى حصل ... معلش من باب الفضول لما موتى شوفتى ايه شوفتى الملايكه و الحاجات اللى بيقولوا عليها دى وقت الحساب دى
نجاه / انا ما موتش انا قلبي وقف ثوانى لكن لو كنت مت ما كنتش هبقي واقفه قدامهم دلوقت ما حدش بيرجع من الموت
جوزيف / تمام ... حد تانى عنده اى استفسار
شاكر / انت ما جاوبتش على حاجه اصلا
جوزيف / دا انا بقول عليك اذكى اخواتك انت سالت فى حاجه و انا توهت
شاكر / انت مين اللى وراك مين ليه مصلحه فى كل ده
جوزيف / ما اعرفش ... بس صدقونى حد طايل اوى كل اللى نعرفه عنه انه القائد الاعظم و دا حاجه كدا زى اسطوره ما حدش من اللى اعرفهم شاف شكله و لا يعرف هو مين غير عدد بسيط جدا مقربين و دول المجلس الاعلى رجاله المجلس دول ان كانوا رجاله او ستات مش ثابتين ممكن مع اقل غلطه يتصفوا عادى و يتبدلوا باى حد تانى احسن منهم يعني باختصار المجلس ده عباره عن صفوه الصفوه من اللى زيي و الاحسن منى كمان
مختار / و الناس دول هدفهم ايه
جوزيف / بيحكموا العالم ... يخلوا دول تفلس و دول تتقسم و يغتالوا ناس واقفه قصاد مصالح ناس تانيه و يقوموا حروب و ينشروا فيروسات و امراض ... بيحكموا العالم حرفيا سيبكوا بقي من حوار كل دوله و ليها رئيس و حكومه دى كل دول زى عرايس مريونيت فى ايد المجلس بس شهاده حق معظمهم ما بيبقوش عارفين الحقيقه و مصدقين نفسهم انهم فعلا بيتصرفوا من دماغهم
امين / انت بتتكلم عن المنظمات الماسونيه تقصد
جوزيف / ما اعرفش انا اللى اعرفه قولته و اللى اعرفه انك يا معاهم يا ضدهم
مختار و مغاورى و عباده يبصوا لبعض
نجاه / فيرا
الكل يبصلها
جوزيف / فيرا ... مزاكره تاريخ ... بما انكوا رفضتوا الخضوع زمان كان لازم تنتهوا بس بطريقه مهينه و عبره لكل اللى هيفكر يقلدكم
ناصر / بس ربنا فوق الكل لسه لا انتهينا و لا طاطينا
جوزيف / قواعد الحرب اتغيرت ما عادتش راجل لراجل
مختار / ليه يخسروا ولادهم لما ممكن يخطفوا ولادنا و يجندوهم و يدربوهم و يبعتوهم هم يحاربونا
جوزيف / ما تقولش بتتكلم عنى صح ؟؟ لا يا ميخا مش بس كدا انا حتى عيالك هطلعهم ضعاف و مخوخين لا فيهم صحه يحاربوا و لا ايمان بقضيه اصلا ... هنشر الامراض سواء بقي جسديه او اخلاقيه هخليكوا تقطعوا بعض من جوه لحد ما يبقي مصدر قوتك بين قوسين شباب الجيل الجديد هم نفسهم القنبله الموقوته اللى هتدمرك و تخليك عبره
عباده / زى نشر البى كاى و الكباريهات و الدعاره فى وقت فيرا ... بس اخرتها كانت ايه
جوزيف / راحت مزه جه مكانها عشره و كل واحد من العشره بيروح بيجي مكانها عشره انت بقي كلكوا على بعضك كام واحد
نجاه / لو كنا قليلين كانت اقل قنبله تقتلنا كلنا و كان فى قصادكوا مليون فرصه ليه سايبينا عايشين لو المجلس بالقوه اللى بتقول عليها انه يكسر دول كامله و يقوم حروب مش قادر على بلد صغيره زى بتاعتنا كلامك فيه مبالغه شديده اوى
جوزيف / ما كنتش فاهم زيك و بشك فى خطتهم لحد ما شوفتك ... عرفت انه خططهم مش بتيجي صدفه الناس دى بتدرس كل واحد فينا بادق التفاصيل
نجاه / مش فاهمه
جوزيف / ازاى بعد كل اللى عشتيه بنفسك مش فاهمه ايه اللى بيميزك عن كل اللى حواليكي …  دا انتى معجزه ... تمام انا كدا قدمت السبت انتوا بقي هتقدمولى ايه
جابر / لا مؤاخذه يعني و انت السبت بتاعك فرق معانا فى ايه انت حتى ما اديتناش طرف خيط نمشي وراه
نجاه / هم اللى هيجولنا مش احنا اللى هنروحلهم
جوزيف / عرفت ليه بقولك ان هى الكبيره مش انت
نجاه / بس احنا ازاى هنحارب ناس ما نعرفهمش انت لوحدك الحرب ما كانتش سهله امال اللى مدربينك هنعمل معاهم ايه
جوزيف يتنهد
جوزيف / الخبر الحلو انهم عمرهم ما هيجازفوا يجوا بنفسهم لعده اسباب اهمها الحفاظ على سريه شخصياتهم و السبب التانى احتمال الهزيمه مهما كنت قوى و حتى لو احتمال هزيمتك واحد فى المليون فحرفيا لسه فى نسبه النسبه دى كفيله انها تنهى ايامهم فى المجلس فعمرهم ما هيجوا بنفسهم
مختار / و الخبر الوحش
جوزيف / انهم هيبعتوا كل اللى تحتيهم ... هم مش ببراعتي طبعا بس هم كتير اوى
محمد / و احنا كتير
جوزيف / كلكوا على بعض صفر على الشمال فيكوا عيب خطير جدا هيخليكوا تخسروا فى اول مواجهه
مختار / بنتقى ربنا
جوزيف / ما انت معلم زى ما بيقولوا اهو امال مالك كنت خايب ليه معايا
نجاه / بس دا مش عيب دى ميزه اللى معاه ربه ما يخسرش
مغاورى / الحرب خدعه
جوزيف / بدات تتكلم اخيرا
عباده / تمام انا موافق على شرطك
جابر / يعني ايه !!
عباده / بس لازم تفهم انك تحت عنينا طول الوقت
جوزيف / صورنى من الجنب اليمين البروفيل ده احلى من التانى
جابر / ما كفايا استفزاز يا جدع انت
جوزيف / انا مش فارق معايا فلوس رشيد اللى بتقولوا عليها انا كل اللى طالبه منكوا انكوا تدونى فرصه اعمل منكوا جيش حقيقي و الا كلنا كلنا بلا استثناء هنندفن فى خلال يومين بس دى برده مش اسوء حاجه ... كل بنت جوه هتتبعت على بلد شكل و هناك مش محتاج اوضح هيتعمل معاها ايه و كل الاولاد تحت سن حداشر سنه هيروحوا المعسكر و دا زى ما تقولوا غابه البقاء فيها للاقوى و الاذكى و الاسرع الباقي الكلاب بتاكلهم ... القرار ليكوا
ناصر / طب و احنا ايه هيخلينا نثق فيك برده ما يمكن داخل تدحلب و تتسحلب
جوزيف / ما تثقش اصل عيب تبقي طول بعرض و ما تعرفش ان الضربه بتيجي من القريب قبل الغريب يعني
جابر / و ما دام انت عارف كدا عاوزنا نامنك على نجاه ليه ان شاء الله
جوزيف / ما هى كانت فى حضنى و رجعتها
جابر يجى يهجم على جوزيف و الكل يحوش و جوزيف قاعد هادى يخرجوا جابر بره و الغفر ملموملين و جابر جاب اخره و بيصرخ
جابر / و الله لاقتله اوعى
امين / اهدى مش كدا
جابر / يعني انت مش سامعه
امين / ما هو قاريك و جايب اخرك ما تمسكوش ايدك بقي ما ابوها جوه
نجاه تسيب المكان و تطلع بره تاخد جابر و يروحوا الجنينه الورانيه و الرجاله واقفه تتفرج و جوزيف قاعد جوه هادى مختار يرجعله يقعد قصاده
مختار / اميره فين
............................