الكبيره ٢ بقلم / لولو_محمد

الحلقه ٢

(((((( الكبيره ٢))))))))
#لولو_محمد
الحلقه ٢
نجاه / طب هعمل معاك اتفاق وعد والله هنفذ وعدى
جوزيف / سامعك
نجاه / افتح و ادخل و خليهم يقفلوا الباب وراهم خلينا انا و انت لوحدنا كدا و نشوف الدنيا هتودينا لفين
جوزيف / انا و انتى و الشيطان تالتنا
نجاه / و فستانى الاحمر القصير اللى انت نقيته على زوقك
جوزيف / اووووف طب ارفض العرض ده ازاى دلوقت
نجاه / انا بعيد عن الباب افتح و ادخل
جوزيف / موافق
جوزيف يقوم يقف و يمسك اوكره الباب بايده و نجاه عينها على الاوكره من جوه تقوم تقف و ملامحها كلها جد و تحدى
.......................
فى سرايا الجوارحه
الحجه منهاره و بتصرخ فى الرجاله
الحجه / يعني ايه مش هيرجع يعني ايه ؟ هيسيب ابوه ... ما تولع نجاه و اللى خلفوا نجاه ... قولوه يرجع يدفن ابوه و ياخد تاره قولوه ان ما رجعش حالا و برد نارى ما يرجعش قولوله كفايانا شحطته ورا اللى يسوى و اللى ما يسواش قولوله امك غضبانه عليك يا همام يا ابن الحجه قولوله يرجع
ولاء / اهدى ياما ابوس ايدك ليجرالك حاجه
الحجه / يجرالى ياريت كان جرالى انا ياريتنى كنت موت ولا شوفت اليوم ده يا شافعى
راجل ١ / يا حجه اهدى احنا مش ساكتين و ما حدش من اللى هجموا علينا رجع عايش
الحجه / انا عايزه اللى وراهم انا عايزه حق جوزى عايزه راجلى يا ناس... قولوا لهمام يرجع يجيب حق ابوه
راجل ٢ / ما تهدي يا ام همام ما يصحش كدا
الحجه / خليك فى حالك خليك فى حالك انت ما انت اللى مشجعه انت اللى مقوى قلبه على امه انت اللى واكل اهلك و ناسك و بايع دماغك لعباده و بنته
راجل ٢ / ربنا يسامحك يا ام همام انا هعديها عشان اللى انتى فيه
الحجه / ما تعديهاش انا عوزاك ما تعديهاش رجاله طول بعرض بشنبات و الراجل يموت وسطيكوا ما تقدروش تعملوله حاجه حسبي الله و نعم الوكيل فيكوا حسبى الله و نعم الوكيل فيكوا كلكوا
ست ١ / و هى الرجاله قصرت فى ايه
ولاء / اهدى ياما ما يصحش كدا
الحجه / هاتولى همام اضربوا الارض طلعولى همام هاتولى ابنى يا ناس عاوزه ابنى يا عالم
الكل يبص لبعضه و الحجه تفضل تصرخ وسطهم
............................
فى اوضه نجاه
اكره الباب تتنى و نجاه عينها عليها و بعدين ترجع مكانها
جوزيف / هجيبلك اكل و ميه استنى
نجاه / و اسدال عشان اصلى
جوزيف / بس دا ما كانش اتفاقنا اتفقنا على الفستان
نجاه / الفستان يستنى الصلاه ما تستناش هات ميه كتير اتوضي و هات اسدال اصلى فيه
جوزيف / و لو مش متاح اسدال اعمل ايه
نجاه / يعني عملت كل ده و هتيجي فى دى و تعطل ما تتصرف يا جو
جوزيف / ماشي
نجاه / استنى
جوزيف / ايه افتكرتى حاجه تانى
نجاه / عاوزه اميره
جوزيف / امايا
نجاه / لو جنبك خليها تيجي تكلمنى لحد ما ترجع
جوزيف / غاليه و الطلب رخيص حاضر
جوزيف يروح يفتح اوضه تانيه امايا قاعده ساكته
جوزيف / عوزاكى ... هخرج اجيب حاجه و ارجع مهما حصل ما تفتحيلهاش الباب
امايا / هقولها ايه
جوزيف / مش هتفرق المهم ما تفتحيش الباب مش هتقدرى عليها عايشه واحده فيكوا هتقتل التانيه مهما حصل ما تفتحيش الباب
امايا تهز راسها و تروح ناحيه باب نجاه
امايا / نجاه
نجاه / مين
امايا / انا امايا ... اميره
نجاه / اثبتى اثبتى انك اميره ... كان فى بيني و بين اميره وعد كان ايه
امايا / انا نفذت وعدى ما حدش قرب منك ما حدش لمسك
نجاه / امال ايه الصور دى
امايا / انا اللى غيرتلك ما حدش فيهم شافك
نجاه / ايه الصور دى و ايه الفستان ده و انا فين انا كنت هموت عليكي انا لسه قلبي موجوع عليكي ليه تعملى كدا انا قدمتلك كل اللى عندى انا وثقت فيكي و حبيتك كل ده كان كدب
امايا / جوزيف احسن منهم كلهم انتى ما تعرفيش يقدر يعمل ايه و لا سوا تقدروا تعملوا ايه
نجاه / و انتى فاكره بقي ان فى حاجه فى الدنيا تخليني ابيع اخرتى
امايا / نجاه انا حبيتك بجد و مش عوزاهم ياذوكى بس انا مش هقدر احميكي كتير لازم تساعديني
نجاه تقوم تروح ناحيه الباب
نجاه / افتحى الباب ده و خليني انا اساعدك انتى مكانك وسطينا محفوظ ما تخافيش اى كان اللى حصل هيفضل بينا انتى ما تعرفيش لما عرفنا انك ممكن تكونى عايشه كلنا حالنا اتقلب ازاى اميره الطريق لسه قدامك تقدرى تقدرى تلحقى نفسك
امايا / الحرب خلصت يا نجاه
نجاه / حرب ايه حرب ايه يا اميره اللى بتتكلمى عليها
امايا / قولتلك انا مش اميره اميره دى انا ما اعرفهاش انتوا اللى عملتوها و صدقتوها و استغلوها اهلك كلهم استغلونى الا انتى
نجاه / و اللى بعتيني عشانهم بيستغلوكى برده فوقى
امايا / نجاه انا مش هقدر احميكي منهم و لا احوشهم عنك جوزيف نفسه مش هيقدر يحميكي و لا يحميني لو ما اتعاونتيش
نجاه / ازاى بقي ايوه هو ده اللى انا عاوزه اعرفه انا هنا ليه و المفروض اتعاون ازاى
امايا / اول حاجه لازم تعرفى ان الحرب خلصت جوزيف كسب و اهلك ما عادش ليهم وجود و الباقي منهم مش هيكونوا فى صفك دول هيقتلوكى اول ما يشوفوكى
نجاه / قصدك ايه باللى باقي منهم
امايا / حصلت عمليه اباده فى البلد و اسكندريه دا غير الصور اللى اتبعتتلهم
نجاه / اموت و ادفن فى بلدى وسط ناسي و لا اعيش بعارى وسط خونه و كفره
امايا / طب ما تعيشي وسط اهلك و ناسك و تبقي الكبيره زى ما كنتى طول عمرك بتحلمى ارجعى و معاكى جيش كامل تحت امرك يحميكي من اى حد عاوز ياذيكي يخرس اى حد يتطاول عليكي او يحاول ينافسك على الحلم اللى ما حدش غيرك يستحقه 
نجاه / و المقابل
امايا / انك تكونى مع جوزيف
نجاه / قصدك انى اساعد جوزيف يدخل البلد
امايا / جوزيف فى البلد يا نجاه انا دخلت بيتكوا و مش لوحدى فى ناس كتير من البلد تبعنا و ناس جندناهم البلد بتاعتنا ما لاحظتيش الحاجات الغريبه اللى كانت بتحصل الفتره اللى فاتت الاختفاءات الفيروس اللى انتشر لياسمينا موت تيم و هيا عشان تتاكدى انى فى صفك عشان تعرفى اننا مش جايين ندمر و لا نخرب
نجاه / كل الناس اللى اختفت دى و بتقولى
امايا / كل الناس دى فتحت اللينك كل الناس دى كانت بتحاول تعرى ياسمينا عاوزين يشوفوها عريانه حتى لو عارفين انها متركبه حتى لو بنتهم و متربيه معاهم حتى لو متجوزه و مخلفه حتى لو جوزها بيحميهم و مستعد يموت عشانهم كانوا بيحاولوا يعروا مراته و يتفرجوا عليها و يرضوا شهواتهم كل الناس اللى اختفت كان ليكوا تار عندهم اصلا ما يستاهلوش تزعلوا عليهم اصلا
نجاه / مهما عملوا ما يستاهلوش الموت
امايا / امال زعلانه من جو ليه انه رجع لبسك لاهلك و جابلك فستان احمر
نجاه / خطفنى مثلا حابسني مثلا بيعادى اهلى و يقتلهم مثلا
امايا / بيحميكي وجودك هنا حمايه ليكي صدقيني على الاقل بيحميكي من نفسك لانك اكيد هتعملى حاجه غبيه تاذى بيها نفسك اقولك حاجه جوزيف هو اللى رجعك تمشي تانى
نجاه / اه طبعا صح
امايا / هيلين
صمت
امايا / هيلين مننا بعتهالك مخصوص عشان تعالجك و عشان تتاكدى ان جوزيف بيتحكم فى العالم كله هو اللى خلى اهلك يجروا ورا هيلين و يتحايلوا عليها هو اللى لعب فى عقلهم الباطن و خلاهم يشوفوا الاعلانات بتاعتها بشكل مكثف و بصوره عشوائيه فى كل مكان على مواقع التواصل لحد ما اقنعهم انهم لازم يروحولها و يعملوا اى حاجه عشان تيجي حتى لو يفتحولها مركز و يزرعوها وسطكوا قدر يغسل ادمغه الناس تبيعله ارضها و بيوتها احنا لينا املاك كتير جدا فى البلد يا نجاه يعني نقدر ندخلها و نقعد بالقانون
نجاه / سياسه اليهود
امايا / احنا مش اعدائك
نجاه / اشمعن بلدنا
امايا / عشانك
نجاه / كدب قولى الحقيقه
امايا / عشانك صدقيني عشان انتى اللى تستاهلى تقوم عشانها حروب و انتى اللى تقدرى تنهيها
نجاه / افتحى الباب ده عاوزه اروح الحمام
امايا تدوس زرار باب يتفتح فى حيطه الناحيه التانيه
امايا / الحمام هناك ما فيهوش كاميرات خدى راحتك
نجاه تروح تبص على الحمام تلاقيه من غير شباك مجرد شفاط فى الحيطه فوق خالص قرب السقف تدور على باب للحمام مفيش ترجع لامابا
نجاه / الباب بيتقفل ازاى
امايا / من عندى خدى راحتك ما حدش هيدخل انا اوعدك
نجاه/ مش هيحصل
امايا / مش هيسيبك يعني كل ده و فى الاخر هيدخل عليكي و انتى بتعملى حمام يعني لو كان عاوز يشوف حاجه او يعمل حاجه ما كنتى متخدره يعني
نجاه / مش هبقي مرتاحه
امايا / تمام دقيقه و هقفل الباب من عندى و خمس دقايق و هفتح مرتاحه كدا
نجاه / لا افرضى طولت وديني حمام تانى
امايا / للاسف ما قدرش
نجاه تخبط على الباب
نجاه / انتى فاكره انكوا هتكسرونى بالسهوله دى
امايا / اكيد لا و عشان كدا ما اقدرش افتح الباب عشان مش هتستسلمى الا اما واحده فينا تقتل التانيه و انا مش عاوزه اقتلك انا بحبك
نجاه / لو بتحبيني افتحى الباب
امايا / الحمام عندك و جوزيف لما يجيب لك الاسدال هتقدرى تصلى بالمناسبه الحمام فيه ميه نضيفه لو تحبى تتوضي
نجاه / انتى انسانه مستفزه اكتر منه
امايا / ما تتحديهوش و هو هيبقي كويس معاكى انتى غاليه عنده صدقيني
نجاه / عليكي و عليه افتحى الباب
نجاه تخبط على الباب
امايا / هسيبك تهدى و نرجع نتكلم تانى
امايا تمشي و تقفل عليها الباب و تعيط و نجاه تفقد اعصابها و تفضل تصرخ
نجاه / افتحى الباب افتحى الباب
...........................
فى الشركه
دياب قاعد فى جنب و ساند بكيعانه على ركبه و ساند راسه تحت ايديه وفاء تدخل معاها طبق فيه ساندوتش و فنجان قهوه تحط ايدها على كتفه
وفاء/ جبتلك لقمه
دياب يفرد ضهره و يبصلها بتعب و حسره
وفاء / صدرك لسه بيوجعك
دياب / صدرى كويس قلبي اللى واجعنى
وفاء تبص فى الارض و ترجع تبصله
وفاء / نجاه مش ضعيفه و هتفاجاك
دياب / نجاه كانت ... واحنا صغيرين بتطحنا ... كانت اصغر بس جينا فى فتره كدا حصلتنا و مفيش كتير و احنا عديناها فى الحجم
دياب ينفخ و يقوم يتمشي
دياب / جابر فى الوقت ده ما كانش قادر يدارى مشاعره فكان بيتهاون معاها و ده كان بيعصبها جدا و يخليها تبذل مجهود اكتر او تتغابى او او او ... هى كانت عنيده لدرجه ان ما عندهاش مانع تاذى نفسها و تجاذف بكل حاجه ما كانتش بتستلم ما كانتش بتنسحب ما تعرفش امتى تقف
دياب يروح يسند على المكتب وفاء تروح تحضنه
دياب / هى مش قويه زى ما هى فاكره احنا كنا بنتغلبلها بشياكه عشان تهدى و تسكت و تبطل ... و لو جامده و ما حصلتش يعني ... ما هى لوحدها برده و يا عالم عملوا فيها ايه ... حاسس ان دماغى بتفور هتجنن هطق
وفاء / حاول تهدى حاول بس تهدى هى مش ضعيفه و لا غبيه هى عارفه كل ده و عارفه انكوا مش هتاذوها نجاه ذكيه جدا
دياب / نجاه خارجه من دور ابن كلب رقدها سنين تفتكرى ضهرها هيستحمل اى خبطه تفتكرى هتقدر تقاوم قد ايه و كام واحد دول مش فرافير يا وفاء دول متدربين احسن مننا مليون مره و اللى عنده امكانيه انه يحفر نفق زى ده و يبعت الدرونز دى كلها و الرجاله دى كلها ... هتعمل ايه هى لوحدها وسطهم ... انا تعبان جدا انا مش قادر افكر فى اى حاجه مش قادر اركز
تليفون دياب يرن يجرى عليه و يرد
دياب / همام ... انت فين انتوا كويسين
همام / انا فى تركيا ... فى كل حته ... اديني اى طرف خيط ابدا منه
صمت
همام / ايه معاكش اى حاجه ايه الارض انشقت و بلعتها بجد و لا ايه ما تشوف شغلك يا بتاع الهندسه
دياب / انت عرفت ان
همام/ ان كنت انت هتسيب حريمك تبات بره بيتها انا ما بسبهمش مش راجع غير بيها اديني اى طرف خيط امشى وراه
دياب / كل اللى معايا طريق مسدود
همام / نسلكه ابعتلى اللى عندك و باذن الله فرجه قريب
دياب / تمام حاضر تمام
دياب يروح يفتح اللاب و يشتغل
دياب / بيحمل ثوانى ... وصلت
همام / اى جديد بلغنى
همام يقفل السكه
وفاء / ان شاء الله خير اهدى بقي هيلاقوها ان شاء الله
دياب يخلى وفاء تحضنه تطبطب على ضهره
.......................
فى مكان مليان اسلحه و رجاله
جوزيف / انا مش عاوز اى اخطاء انتوا معاكوا كل المعلومات و الاسلحه اللى هتحتاجوها و طريق الدخول و الخروج متامن مش عاوز اى شوشره العمليه تتم بمنتهى الهدوء و السرعه و النضافه مش فارق معايا النتايج مين يموت مين يعيش مين يولع حتى المهم انهم يعرفوا انهم مش فى امان هنا و يرجعوا مصر فى اسرع وقت
بابلو / انا هنفذ الاوامر بس مش هيرجعوا الا لما تكون نجاه فى ايدهم حتى لو جثه
جوزيف / اهو على الاقل نخف العدد شويه مش كفايا سي همام اللى نطلى و انا مش فايقله
ماريا / اديني اللوكايشن بتاعه و انا اروح اتعامل معاه
جوزيف / مش ثابت بيتحرك زى الفرقع لوز بشكل عشوائى صعب التنبؤ بيه هتحتاجى تتبعيه عشان تقدرى تصطاديه و دى فيها خطوره كبيره انه يحس بيكي و يصطادك هو
ماريا / ما تقلقش مش اول مره اعملها
جوزيف يطلع موبايله و يبعت حاجات موبايل ماريا يرن
ماريا / تمام
ماريا تاخد شنطه و تمشي جوزيف يبص لفيليب و بابلو بابلو ياخد شنطه و يمشي و فيليب يحصله
..................................
فى الفندق
صابر / طب هتروح تدور فين و هاجى معاك اصبر اما حد يوصل لاى حاجه نتحرك كلنا مره واحده
جابر / هروح فى اى داهيه بس مش هقعد كدا زى الحريم مستنى الفرج
عمران / جابر احنا لازم نهدى عشان نقدر نفكر
صابر / طب كلم همام تانى يمكن يكون وصل لحاجه
جابر / يعني انا هقعد فى الفندق و همام هو اللى بيدور على نجاه انتوا مجانين
عمران / هو احنا هنا بمزاجنا ما قالولك خليك فى الفندق دا غير ان تليفوناتنا بقت متراقبه من الحكومه التركيه عشان لو حد اتصل يطلب فيديه و اكيد انت مش ضامن ان كان فى حد من الحكومه تبع الزفت اللى خطف نجاه و لا لا يعني اقل حركه تهور هتحرق همام
صابر / انت بتتكلم صح حتى لو نزلت اكيد هتبقي متراقب لكن همام خفيف عنك و ما حدش يعرف عنه حاجه بس هو لازم من تليفوناتنا ما ممكن نشوف اى حد من اللى تبعنا فى السر يتواصل مع همام
الباب يخبط الكل يبص جابر يجيب مسدسه و يروح يدارى فى الحمام و صابر يروح يفتح الباب بالراحه مهره شايله كيس و لابسه شنطه صغيره جلد بايد طويله على الكتف التانى عماله تعدلها كل شويه من توترها
مهره / انا عارفه ان الوقت مش مناسب بس جيبتلكوا حاجه تكلوها انا عارفه انكوا ما اكلتوش حاجه خالص
صابر / تسلمى
مهره / مفيش اخبار ما حدش كلمكوا
عمران واقف من بعيد يتابع يبص وراه يشوف السقاله بتاعه تنضيف الوجهات بتقف قدام شباكهم يروح يبتسم لهم و يقفل الستاره و يروح ناحيه مهره
صابر/ تعبتى نفسك ما كانلوش لزوم لو كنا جعانين كنا طلبنا
عمران / هو اكرم بيه فين
مهره / فى اوضته دخلنى اوضتى انام و راح يرتاح بس انا ما عرفتش انام من التفكير نزلت جبت ليكم اكل
صابر / نزلتى لوحدك !! انتى بتهرجى صح افرضي كان جرالك حاجه و لا توهتى و لا اى حاجه
عمران / تسمحيلى ارجعك اوضتك
مهره / انا حاسه انى هتجنن لوحدى من التفكير و مش عاوزه ازعج بابا اكرم اكيد التوتر و التعب مش حلو عشانه
صابر / طب ما تنزلوا تقعدوا فى اللوبى شويه
صابر يبص لعمران
عمران / تمام مفيش مشكله تعالى
مهره / انا حاسه انى براشوت مش كدا انا بجد اسفه اوى انا
عمران / بالعكس بالعكس كفايا وقفتك معانا من ساعه اللى حصل تحبى ننزل اللوبى
مهره تبتسم بحرج اوى عمران يشاورلها و يمشوا ناحيه الاسانسير صابر يقفل الباب و جابر يطلع من الحمام
صابر / البت دى جدعه و شكلها بنت ناس
صابر يبص فى الكيس
صابر / لا الصرف باين
جابر / ربع روقانك
جابر يحط المسدس على الترابيزه و يروح يقعد صابر يروح يحط الكيس على ترابيزه فوق المسدس قدام جابر و لسه هيقعد يحس ان الستاره بتتحرك يفضل واقف باصص مفيش حركه جابر يستغرب يقوم يبص مطرح ما صابر باصص
جابر / فى حاجه و لا ايه
قنبله دخان تدحرج على الارض
صابر / اجرى
صابر يجرى يفتح الباب بابلو لابس ماسك غاز و واقف ماسك مسدس بكاتم صوت صابر يتخشب بابلو يضرب طلقه فى جزء من الثانيه جابر يزق صابر و يقفل الباب الطلقه تعدى تخدش دماغ صابر جابر يسحب صابر على الحمام و صابر ماسك دماغه والدم بينزل الباب يتفرتك من الطلقات جابر يقفل باب الحمام و يبل فوطه جامد و يكتمها تحت الباب
جابر / انت كويس فين سلاحك صابر انت كويس
جابر يفضل يتك على الخاتم
صابر / انا كويس انا كويس بس سلاحى جوه فى الدرج ..  انت سلاحك فين
جابر يبص على جرح صابر و الدم اللى مغرق وشه و الاتنين يبصوا على الباب و مستنين القدر بس مش ظاهر عليهم خوف
........................
فى الاسانسير
عمران و مهره راكبين فى صمت الباب يتفتح و فيليب يركب مهره تاخد جنب و فيليب يقف ضهره لعمران باب الاسانسير يتقفل و الاسانسير يتحرك مهره كل شويه تبص على عمران و فيليب واقف بينهم فيليب يطلع سكينه بالراحه و يداريها بايده التانيه يضرب بعينه على عمران مركز مع رقم الدور فيليب فى لحظه يضغط زرار ستوب و يحاول يضرب عمران بالسكينه عمران يحوش فيليب و يمسك ايده و فيليب موجه الكسينه على عين عمران الشنطه تقع من مهره و هى مصدومه و خايفه و رافعه ايديها الاتنين لفوق
..........................
فى اوضه نجاه
نجاه رايحه جايه رايحه جايه الباب يتفتح و جوزيف يدخل لابس كمامه سوده و فى ايد كيس و الايد التانى ازازه اسبراى صغيره نجاه تشوفه تهجم عليه و قبل ما تلمسه يرشها بالاسبراى تفقد توازنها و ترجع خطوه لورا و الرؤيه تبدا تروح جوزيف يرمى الكيس فى الارض و يلحقها قبل ما تقع و يشيلها و عينها بتقفل
جوزيف / ما تخافيش ارتاحى و هتصحى تلاقى كل حاجه تمام ارتاحى
نجاه مش قادره تقاوم تنام جوزيف يروح يحطها على المرتبه امايا تدخل تبص عليها بحزن
امايا / انت هتعمل ايه
جوزيف يبصلها و ما يردش
....................
فى الاسانسير
عمران و فيليب مشتبكين فيليب بيحاول يرشق السكينه و عمران ماسك ايديه بس مش بنفس قوته السكينه تقرب من عين عمران مهره تتشجع و تدخل فى فيليب بكل قوتها بكتفها عمران يشوط فيليب بالرجل بوش فيليب يتنطر يخبط فى جدار الاسانسير و السكينه تفضل فى ايده عمران يشد مهره ورا ضهره فيليب يحاول يضرب عمران بالسكينه عمران يفاديها و يمسك ايده و يتنيها السكينه تقع فيليب يطلع سكينه اصغر فى ايده التانيه يغرزها فى جنب عمران يتالم و يخبط فيليب بالكوع فى دقنه مهره تشد شنطتها من الارض و تلف ايدها على رقبه فيليب و تخنقه و عمران ينزل فيه بوكسات لحد ما يبطل يتحرك مهره تقع فى جنب و تاخد رجليها فى حضنها و تبص على فيليب و تعيط و جسمها يتنفض عمران يجرى عليها
عمران / انتى كويسه لمسك عملك حاجه انتى تمام صح
مهره / هو ... هو انا قتلته ؟؟
عمران يروح ناحيه فيليب يجس نبضه
عمران / عايش ... دا ممكن نوصل منه لمعلومات عن اللى خطفوا نجاه... اااه
عمران يقع فى الارض و ماسك جنبه و يبص لمهره اللى جريت عليه
عمران / انا تعبان اوى
مهره تمسك الشنطه و تطلع الموبايل ايدها مش ثابته الموبايل ينط منها يقع تجيبه
مهره / ما تخافش ما تخافش هطلب بابا اكرم هيتصرف ما تخافش
عمران يتك على الخاتم كذا مره و يسند على جدار الاسانسير
مهره / امسك نفسك ماشي امسك نفسك ... ما بيردش ما بيردش
مهره بتعيط و عماله تبص على فيليب فى الارض تجرى تدوس زرار ستوب و توطى على عمران
مهره / انت هتبقي كويس ما تخافش ... انت كنت شجاع
عمران يتالم و يبص على الدم مغرق ايده ثوانى و الباب يتفتح فى رجاله كتير واقفين يشوفوا المنظر يشيلوا فيليب و عمران و مهره بتجرى وراهم ما تحصلهمش تقف عند باب الفندق تشاور لتاكسي معدى يقف تركب
مهره / وراهم وراهم
السواق / seni anlamıyorum abla
( مش فاهمك يا ابله )
مهره مش فهماه هى كمان تشاورله على العربيه
مهره / follow them
( وراهم )
السواق / seni anlamıyorum abla anlamıyorum
( مش فاهمك يا ابله مش فاهم)
مهره تنفخ و تنزل على الفندق و تدخل تجرى على الاستقبال
مهره / call the police call the police now
( اتصل بالبوليس اتصل بالبوليس حالا )
الموظف يرتبك و يرفع سماعه التليفون و مهره عماله تتلفت و تخبط على الكاونتر
............................
فى الحمام عند صابر و جابر
اكره الباب تتحرك بالراحه و صابر و جابر واقفين فجاه الباب يتفتح و يدخل راجل
الراجل / انتوا كويسين
الاتنين يتنفسوا اخيرا
الراجل / مفيش اى حد بره شكله هرب
جابر يطلع يجرى يجيب الموبايل و يتصل بحد
جابر / ايوه يا دياب عرفت اللى حصل
جابر يطلع يجرى واحد يجرى وراه و جابر ما بيقفش
الراجل / هجموا على عمران و مهره فى الاسانسير
جابر /  انت بتقول ايه انت بتقول ايه انت
دياب / الخبر الوحش ان عمران اتصاب بس اطمن هو كويس لحقوه و نقلوه المستشفي الخبر الحلو ان اللى لحقوا عمران حطوا ايديهم على اللى ضربه و اكيد هيحققوا معاه
جابر / انا لازم اوصل لابن الكلب ده اقرره ده اللى هيوصلنا لنجاه 
دياب/ اهدى و صدقنى باذن الله نجاه هتبات فى بيتها النهرده
جابر / ما حدش هيقدر يطلع منه المعلومه غيرى
دياب / مهره اتصلت بالبوليس و زمانهم فى الطريق ما تتحركش من عندك و انا هحاول اراجع الكاميرات و اوصل لاى حاجه تانيه تساعدكوا
جابر / يعني ايه ما اتحركش انت جايب البرود ده منين قولى
دياب / سلام يا جابر
صابر يطلع من الاوضه و رابط دماغه بفوطه
صابر / جابر ... انا هروح المستشفي اعتقد انت لازم تيجي معايا
صابر يغمز جابر جابر يجرى يسنده و يركبوا الاسانسير
صابر / اكيد هيحاولوا يخلصوا منه لازم نسبقهم بخطوه المرادى
جابر يهز راسه
......................
فى اوضه نجاه
نجاه تفوق دماغها وجعاها تمسكها و تقوم تقعد نايمه على مرتبه على الارض و مستغطيه و جنبها صينيه عليها اكل و ميه و شريط دوا و هدوم مطبقه فوقيها مصحف تفردها تلاقيها عبايه و طرحه تجرى تلبسها فوق الفستان بسرعه و هى بتلبس تلمح سجاده صلاه و فى سهم مرسوم على الارض
صوت جوزيف / اتجاه القبله عشان ما يكونش ليكي حجه
نجاه تبص حواليها تلاقي الكاميرات متصلحه
جوزيف / انا شيلت السرير و الخشب و رجعت كل حاجه زى ما كانت .. جنبك اكل و دوا للصداع تقدرى تتوضي و تصلى و اتمنى ان الابجرايد يكون عجبك مع انى زعلان منك انتى حلفتى اننا هنتكلم كنتى هتتكلمى برجلك بقي و لا بايدك مش عيب تبقي قمر كدا و كدابه
نجاه باصه للكاميره و ساكته
جوزيف / العشا فاضلها عشر دقايق و تاذن فانا لو منك الاحق المغرب او ابقي صليها قضا بقي مع باقي الصلوات اللى فاتتك الموضوع يرجعلك
نجاه / انا عاوزه اكلم ابويا اطمن عليه
جوزيف / الوقت بيعدى و العشا هتاذن
نجاه/ طب اخرتها ايه طيب فاكر انك هتوصل لايه بالهبل ده هتحبسنى هنا لامتى
جوزيف / انا ما بصليش على فكره فمش هيفرق معايا تصلى و لا ما تصليش فبراحتك بقي
نجاه تنفخ و تروح الحمام و تقف قصاد الباب و ترجع تشيل المرتبه و تسد بيها باب الحمام صوت جوزيف بيضحك
جوزيف / هشوف ايه يعني اتوكسي دا انا ملك يا بت
..........................
فى البلد
عباده قاعد قدام المستشفي الظابط يدخل
الظابط / مساء الخير يا عباده بيه انا عارف ان الظرف مش مناسب بس احنا محتاجين اقوالك عشان نقفل المحضر
عباده ما بيردش
الظابط / عباده بيه
تليفون عباده يرن يطلعه يبص فيه يلاقيها خديجه يتنهد و يفضل باصص للموبايل
الظابط / عباده بيه
عباده / عاوزنى اقول ايه ... اكتب اللى انت عاوزه و هاتلى امضى
الظابط / ازاى بس حضرتك
عباده يبص فى الارض تانى مختار يدخل
مختار / عادل بيه بعد اذنك
عادل / انا مقدر و الله بس دى اجراءات و اكيد حادثه زى دى فيها ضغط جامد عليا
مختار / عباده كان فاقد الوعى و تقرير المستشفي يثبت ده و لما فاق كانت كل حاجه خلصت و تقدر تثبت ده من كاميرات المستشفي لو حضرتك مش مصدقنى يعنى كدا كدا ما عندوش اى معلومات يديهالك
عادل / هو اللى حصل ده ليه علاقه بخطف الانسه نجاه فى تركيا ؟
عباده يقوم يسيب المكان و يمشي
مختار / احنا عاوزين حضرتك تعمل اللى تقدر عليه و تجاوبنا احنا على السؤال ده
مختار يبص على عباده واقف باصص فى الارض و فى ست بتصرخ فيه يستاذن
مختار / عن اذن حضرتك
مختار يروح ناحيه عباده
الست / ما ترد عليا يا كبيرنا ما ترد يا سيد البلد ساكت ليه انا ذنبى ايه
مختار / فى ايه يا حجه اهدى فهميني
الست / فى ايه !! انت لسه بتسال فى ايه واحد مات و التانى بين الحيا و الموت و التالت بره مصر ما اعرفش عنه حاجه عيالى مالها بحربكم دى عيالنا مالهم
مختار / طب تعالى معايا ثانيه
الست / اجى فين هترجعلى ابنى اللى راح و لا هتعالجلى ابنى اللى مرمى جوه فى العنايه هتعملى ايه يا سي مختار انا عاوزه عيالى انا مربتهمش عشان يموتوا بدالكم انا ما خلفتهمش عشان يفدوكوا
مختار / انا مقدر اللى حضرتك فيه بس 
الست / لاااا مقدر دى تقولها لما عيالك يبقوا مكان عيالى انما انت عيالك زى الفل و بعدين و بعدين و بعدين عيالك انت مسؤل عنهم يدفعوا تمن بلاويكوا عادى انما انا عيالى مالهم انا عيالى غلابه انا عيالى على باب الله
راجل يدخل يحاول يشد الست
الراجل / انتى بتعملى ايه يا وليه تعالى
الست / اوعى سبنى انا مش مسمحاهم انا حقى هاخده منهم عند ربنا هقوله يا رب يارب هاتلى حقى منهم يا رب
الراجل  / حقك عليا يا سي مختار حقك عليا يا سي عباده ... انتى اتجنيتي و لا ايه ايه اللى بتهببيه ده
الست / ايوه اتجننت انت تخاف منهم ماشي انما انا ما عادش عندى اللى اخسره يغوروا بفلوسهم و ارضهم يغوروا من البلد مش عاوزين من وشهم حاجه بيرمولنا قرشين و ياخدوا روح عيالنا اوعى يا راجل سبنى اوعى
الراجل / اهدى بقي فضحتينا الله يخرب بيتك
الست / حسبي الله و نعم الوكيل فيك يا عباده تتقهر قهرتى و تدوق مرارى حسبي الله و نعم الوكيل فيكوا كلكوا اوعى يا راجل سبنى بقي سبنى ما انت معاهم انت اللى مشجعهم بمطاطيتك ليهم
الراجل / بطلى قله ادب بدل ما اطلع اللى فيا فيكي
الست / ما تتشطرش عليا اتشطر على اللى قتلوا عيالك دا انت لو لقيهم فى الشارع هتتوجع عليهم عن كدا
مختار يبص لعباده واقف ساكت و باصص فى الارض و الناس ملمومه بتتفرج و هو واقف فى النص الست يغم عليها من كتر الصريخ و الراجل يشيلها مختار يجرى يساعده يدخل بيها المستشفي عباده يروح يتسند على شجره و يقعد على الارض و التعب و السواد مالى ملامحه 
…………………….