الكبيره ٢ بقلم / لولو_محمد

الحلقه ٦

(((((( الكبيره ٢))))))
#لولو_محمد
الحلقه ٦
جوزيف / اللبس جه مقاسك
نجاه / خليك فى حالك
جوزيف / يا بت ما قولتلك انتى حالى يعني بعد كل الصبر و الصرف و المجهود ده لسه مش مصدقانى
نجاه / اشمعن انا صحيح
جوزيف / شبهى
نجاه/ موهوم انا مفييش ذره منك
جوزيف / لا فيكي كتير و لما تعاشريني هتتاكدى ... ها ايه رايك فى الهدوم
نجاه / ما تخرس بقي ايه الصداع ده على الصبح
جوزيف / اخرس !!! لا دا احنا نشوف الصداع الحقيقي بقي و وريني هتركزى فى قران او صلاه ازاى
جوزيف يشغل اغانى و يرفع الصوت
........................
فى مضيفه الزنايته
عباده نايم فى وضع الجنين و مدى للباب ضهره و طافى النور خديجه تفتح الباب و تدخل تشوفه تقف ثوانى هو ما بيتحركش تقفل الباب و تروح تنام جنبه و تاخده فى حضنها يشوفها يعيط
عباده / انا اسف
خديجه / اجمد احنا لسه محتاجينك
عباده / ما سمعتش كلامك و ضيعتها
خديجه / ما ضاعتش ... عمرها ما هتضيع انا استودعتها ربنا و هى مسافره و اللى عند ربنا ما بيروحش ربنا ما بيضيعش ودايعه هترجع باذن الله هترجع بس اجمد و خلى ايمانك بربنا كبير
عباده / قالى اموت نفسي عشان ترجع بس انا ما صدقتوش
خديجه / عشان كداب عشان لو قتلت روحك عمره ما هيرجعها بالعكس هيطمن اكتر انكوا هتنسوها اوعى تنوله اللى فى باله اوعى احنا محتاجينك نجاه محتاجاك نجاه لو عضم فى قفه محتاجاك تدفنها وسط اهلها و تجيب حقها اجمد بقي دا احنا كلنا مسنودين عليك ما توجعش قلبي اكتر ما هو موجوع.. تعال ارتاح فى اوضتك فوق تعال كل و ارتاح شويه و باذن الله تفرج
عباده / مش قادر اتحرك يا خديجه ..  جسمي مش مساعدنى ... مفيش عضمه راكبه على اختها حاسس ان روحى مسحوبه منى و شيطانى راكبنى و مدلدل رجليه
خديجه / استعيذ بالله و قوم اتوضي و صلى صلى حتى لو قاعد اطلب من ربنا القوه و الصبر و السند اطلب منه الفرج و اهدى ... مش هتكون احن عليها اكتر من اللى خلقها
عباده يبص لخديجه وشها اصفر و غرقان دموع و عنيها حمره و شفايفها بيضا يمسح وشها
خديجه / انا ممكن استحمل اى حاجه فى الدنيا الا انى اشوفك كدا ممكن استحمل اى حاجه غير انك تروح منى او تقع ... بص خليك مرتاح ... انا هجيبلك لقمه و ناكل سوا ..  و الله العظيم ما دوقت الذات من امبارح و لا ليا نفس لبق ميه حتى بس ... لازم نيجي على روحنا لازم تقف على رجلك ... انت اللى ساندنا كلنا يا عباده من غيرك نضيع لو وقعت نضيع يا قلبي
عباده ينام على ضهره و يبص فى السقف
خديجه / هرجعلك تانى ما تروحش فى حته
خديجه تقوم و تمشي و عباده لسه باصص للسقف
عباده / اجمدى يا نجاه اجمدى
......................
فى سرايا الجوارحه
مغاورى يدخل و التعب و الارهاق باين عليه ماجده تجرى عليه
ماجده/ طمنى مفيش جديد لقوها لقوا نجاه
مغاورى يبصلها و يطلع فوق سماح تقابله على السلم تطلع معاه
سماح / شاهين فين شاهين بخير صح شاهين كويس ؟
مغاورى يهز راسه و يرمى نفسه على السرير
سماح / اجيب لك تاكل
مغاورى / اطفى النور و اطلعى بره و اقفلى الباب وراكى
سماح / حاضر
سماح تطلع و تقفل الباب و تنزل تحت
سماح / اما نشوف اخره الهم ده ايه
ماجده / فى ايه يا سماح قالك حاجه ؟
سماح / و لا قال و لا عاد نام و قالى اطفى النور سبته يرتاح
ماجده / افرجها من عندك يا رب كان مستخبيلنا فين بس كل ده يا ربى
ماجده تسيب سماح و تروح اوضه ياسمينا تخبط و تدخل تلاقيها بتلبس
ماجده / على فين كدا ان شاء الله
ياسمينا / هروح لمنصور
ماجده / بلاش جنان مفيش خروج من باب السرايا الجنينه نفسها مش هتعتبيها
ياسمينا / مش قادره اقعد هتجنن
ماجده / و انتى لو روحتى عطلتيه هتبقي عقلتى و لا يجرالك حاجه فى الشارع يا بنتى اهدى احنا فينا اللى مكفينا استهدى بالله يا ياسمينا و غيرى هدومك دى و اقعدى احنا مش ناقصين
ياسمينا / طب هخلى حد من الغفر يوصلني
ماجده / ما تتعبيش قلبي بقي يا بنتى و اهدى مش كدا لما يجرالى حاجه هترتاحى يعني
ياسمينا / بعد الشر عنك ليه بتقولى كدا
ماجده / اهدى يا حبيبتي و ادخلى اتوضي و صليلك ركعتين و باذن الله باذن الله كل حاجه هتبقي زى الفل اهدى يا ضنايا مش كدا
ياسمينا / حاضر حاضر
ماجده / انا هروح اطمن على العيال و ابص على الاكل
ياسمينا / طب هروح اوصله الاكل
ماجده / ياسمينا انا قولت كلمه و خلاص مش عاوزه مناهده مفهوم و لا لا
ياسمينا / حاضر
ماجده / حضرلك الخير
ماجده تقفل الباب ياسمينا تقعد و هى مخنوقه
.........................
فى اوضه نجاه
نجاه قاعده فى ركن لابسه ترينج اسود و قافله الكابتشو على راسها و ماسكه ايدها بتوجعها الباب يتفتح و امايا تدخل الباب يفضل مفتوح امايا تروحلها تديلها كريم
امايا / بتوجعك ... ادهنى ده هيخفف الالم و يعالج
نجاه / مفيش حاجه تخفف وجعى فيكي
امايا تقعد جنبها
امايا / اول ما جيت البلد عندكوا كنت كارهه كل حاجه فيها
نجاه / دا انتى ما شوفتيش مننا غير كل خير
امايا / لا شوفت ... ما شوفتش منك انتى غير كل خير لكن من بلدك شوفت و شوفت كتير ... انا بحب الكلاب عشان اتربيت وسطهم و انا صغيره اوى مامتى كانت ... زيي كدا ... بس ما كانتش بتحبنى اشوفها ... كانت بتسبنى وسط الكلاب اللى هى بتروضهم و تدربهم بره و بعدين فجاه لقيت ناس تانيه بتاخدنى ودونى لراجل اسمه عبوده شيخ من بتوع قال الله و قال الرسول راجل طول بعرض دقنه واصله للارض و عايش فى قصر كبير و حواليه حرس ... انتى عارفه عبوده عمل فيا ايه
نجاه تفتح المرهم و تدهن ايدها بلا مبالاه
امايا / جالى نزيف من القرف اللى كان بيعمله فيا نزيف ما بيقفش و اتسبت فى اوضه فى البدروم فى دمى عادى انا ما كنتش فاهمه اى حاجه وقتها ... لا فاهمه ده بيحصل ليه و لا ليه انا موجوعه كدا و لا فين امى و لا قادره اتكلم حتى الدنيا كانت بتضلم بس بشويش ... لسه فاكره اليوم ده لحد النهرده ... سقعانه و جعانه و خايفه ... لحد ما جوزيف خرجنى من هناك ... برده مش فاهمه اى حاجه صحيت لقيت نفسي بدات اتحسن بس للاسف جوزيف كان عنده مهمه... سابنى عند واحد ... قواد ... المفروض انى طفله و تعبانه و كدا ... بس ام الدنيا زيها زى اى حته فى الدنيا مليانه مرضي معاهم فلوس ... لما جوزيف رجع و اكتشف اللى كان بيجرالى قالى ان الطريق الوحيد فى الدنيا دى يا صياد يا فريسه و انا عشت فريسه بيتنهش فى لحمى كتير اوى فلو عاوزه ده ما يتكررش لازم ابقي الصياد بس للاسف كنت ضعيفه و صغيره و خايفه ... انا ما كنتش عاوزه اقتل حد ما كنتش عاوزه ابقي كدا
نجاه / و ايه اللى جبرك ما انتى كان قدامك فرصه ليه رفصتيها
امايا / عشان كدب عشان ما كانش فى فرصه و لا حاجه ... جوزيف عشان يثبتلى ان كلكوا زى بعض سابنى فى الشارع طفله محتاجه مساعده عارفه جرالى ايه عارفه ساعدونى ازاى ... خدونى بيت و قبضوا التمن قبل حتى ما يناولونى بق ميه ... عارفه يوميها عملت ايه ... عارفه حسيت بايه ... انا قتلتهم كلهم ... انا وقفت اتفرج عليهم و هم بيطلعوا فى الروح واحد ورا التانى
نجاه تبصلها باستحقار
امايا / و لسبب ما سافرت بلد تانى و هناك بابلو اللى كان بيدربنى البلد كانت معظمها مسلمين بدقون بيقولوا قال الله و قال الرسول برضه بس مش عاوزه اوصفلك القرف اللى كانوا بيعملوه
نجاه / احنا مالنا بكل ده احنا احنا ... احنا فتحنالك بيتنا و سترناكى
امايا / ما حصلش انا من يوم ما رجلى خطت البلد و انا الكل بيتحرش بيا ... ما منعهمش عنى غير خطوبتى لناصر اللى برضه ما حاولش يغطيني بالعكس عمل زيهم كلهم و تعرفى لما انبسط عمل ايه ... شتمنى و سابنى و مشي ... انا لفيت الدنيا ما روحتش بلد الا ما حصلى فيها نفس الكلام ما فيش تغير ... الفرق الوحيد انه بقي بمزاجى بدل غصب عنى
نجاه تبص الناحيه التانيه
امايا / بقيت بقبض أرواحهم فى المقابل... تمن قليل بس ... شغال
نجاه تبص لامايا و تقوم تقف و تتمشي امايا متبعاها بس لسه قاعده نجاه تبص للباب و تبص فى الارض و تبص لامايا
نجاه / انتى فكرانى هتعاطف معاكى و لا حتى هيفرق معايا حرف من اللى قولتيه انا اخدتك فى حضنى و نيمتك فى سريرى ابويا فتحلك بيته و حماكى ... انتى ما شوفتيش كنا عاملين ازاى عليكي و قلبنا الدنيا ازاى ما شوفتينيش و انا بموت كل يوم بقهرتى عليكي عشان كنت فكراكى موتى ... ناصر اللى مش عاجبك ده كان بيموت حرفيا لمجرد انه فاكرك موتى ... انا مش هبله عشان تقدرى تغسلي دماغى بكلامك الاهبل ده ... قومى يلا اطلعى بره انا مش ناقصه صداع كفايا اللى انا فيه ... يلا قومى بره
امايا / انا ما كدبتش عليكي فى حرف
نجاه تشاورلها على الباب امايا تقوم و تمشي نجاه تروح تقعد مكانها الباب يتقفل
جوزيف / لتانى مره اسيبلك الباب مفتوح و تسيبي الفرصه تضيع من ايدك
نجاه تزعق بعصبيه / ما هى الحدايه ما بتحدفش كتاكيت و فكك منى بقي انا مش طايقه نفسي يعني انا لما ارجع لاهلى اقولهم كانوا بيعذبونى بالرغى دا ايه الهم ده بس يا ربى اوووووف
نجاه تدخل الحمام و تفك الكابتشو و تحط راسها تحت المايه
........................
فى اوضه عمران
صابر / انا شايف انك لازم ترجع مصر وجودك هنا زى قلته و الافضل تنزل مصر
عمران / هننزل كلنا باذن الله سوا قريب
صابر / انا بتكلم جد انت محتاج رعايه و راحه
عمران/ ما حدش فاضيلى فى مصر كفايا عليهم اللى هم فيه و انا بقيت احسن الحمد لله و بدات اتحسن و اقف على رجلى
صابر / انت بتيجي على نفسك مش بتتحسن
عمران / و مين فيكوا ما بيجيش لما تخرج و تعمل نفسك كبش فدا انت كدا مش بتيجي على نفسك
صابر / لا
عمران / يا راجل
صابر / اقولك سر
عمران / فى بير
صابر / لما كنت بدرس فى الكليه كنت بحب واحده زميلتى بس ما حصلش نصيب و اهلها خطبوها لواحد تانى روحت للكبير و قولتله انها بتحبنى انا و ان ما ينفعش يجبروها الكبير جابها و سالها قالتله ما حصلش فطلبت شهاده منصور و جابر و دياب كانوا معايا فى السكن وقتها و دياب كان هو اللى فى اوضتى عشان كنا صحاب جدا و تقريبا كان سامع كل مكالماتنا فى التليفون فكنت متوقع انه يشهد معايا بس حصل العكس شهدوا ان ما فيش حاجه بيني و بينها
عمران / عشان كدا علاقتك بيهم وحشه و سبت الكليه
صابر / يوميها دعيت بكل حرقه قلبي انهم يدوقوا وجع قلبي فخساره اغلى حبيب عندهم دعيتها على الكبير اكتر واحد لان هو اللى حكم و على دياب و منصور و جابر و يوم ما نجاه راحت
عمران / خفت تكون دى دعوتك
صابر/ نجاه ما لهاش ذنب و قلبي واجعنى عليها اوى كانت بت جدعه بمليون راجل
عمران / ما تقولش كانت
صابر / لو جرالها حاجه عمرى ما هسامح نفسي ابدا
عمران / بس هم ما ظلموكش يا صابر هيعملوا ايه يعني
صابر / مش قادر اتكلم فى الموضوع ده ... سنين و انا بحاول انساها بس للاسف ما افتكرش انى كنت بفكر فيها كدا و هى معايا زى ما بقيت بفكر فيها و هى بعيد عنى ... و الذنب الحقيقي انها متجوزه ربنا يسعدهم و يهدى سرهم ... انا مش ببصلها بالطريقه دى انا و الله ما عاوز حياتها تخرب ... انا بس حزين على نفسي ... الخزلان وحش و كسر الخاطر وحش ... و انا نمت متحاوط بناس كتير بحبها صحيت ما لقيتش ولا واحد فيهم ... كل حاجه جوايا اتغيرت ... بص ربنا ما يكتب عليك تدوق اللى انا دوقته و يرد نجاه بخير ... انا هقوم اصلى
صابر يقوم
عمران / ما اعتقدش ان اللى حصل ده بسببك ... ربنا ما بيعاقبش حد بذنب حد ... هو لكل واحد نصيبه اصلا و كدا كدا هيشوفه ... المهم الصبر و الرضا
صابر يبتسم و يمشي و يقفل الباب وراه
.....................
فى اوضه جوزيف
جوزيف بيراقب نجاه بتجرى فى دايره حوالين جدران الحيطه مع عقارب الساعه امايا تدخل
امايا / انت هتفضل قاعد كدا كتير الناس هنا خدوا راحتهم و عمالين يجروا شكل و انت سايبهم على الاخر
جوزيف / نجاه سابت الصلاه و بدات تتمرن
امايا / نجاه بتوازن بين التمرين و العباده ما تضحكش على نفسك مفيش حاجه فى نجاه اتغيرت
جوزيف / ليه ما حاولتش تهرب
امايا / ما اعرفش ... بس نجاه كدا غبيه ما بتهربش بتقف فى وش المدفع عادى ما بيهمهاش
جوزيف / قالت لبابلو انت مش هتاذيني ... هى عارفه انى مش هاذيها و حاسه بالامان
امايا / لا
جوزيف / تفتكرى رد فعلها هيبقي ايه لو الاحساس ده طلع غلط و طلع الامان معايا انا مش فى الاوضه و خلاص
امايا / دا انت قديم اوى
جوزيف يضحك
امايا / مش هتجيب معاها و بعدين بابلو ضربها مرتين
جوزيف / السبب فى المرتين تلاشيناه المرادى و بعدين ما انا مش عاوزه ياذيها برده انا بس عاوزه يكسر غرورها شويه
امايا / لا قولت
جوزيف يبص على الشاشه نجاه بتعمل استرتشات
جوزيف / بطلت تصلى و بطلت تمسك المصحف دى فى حد ذاتها نقطه حلوه عرفت ان الحل مش عنده و انه مش هيحميها
امايا / خليك كدا احلم لما هتفوق على كابوس
جوزيف / هتكلم معاها و اسالها
امايا / اعمل اللى تعمله انا
جوزيف / اخليها تكلم ابوها ؟
امايا / انت عاوز ايه بالظبط
جوزيف / ما انا مش هخليها تكلم ابوها فعلا
امايا / جو حبيبي قوم نام و ارتاح و كفايا تفكير اهدى شويه احنا لسه فى الاول خالص اهدى
جوزيف / معاكى حق ... انا هقوم انام ... مهما حصل ما حدش يفتح الباب
امايا / نام يا قلبي و ارحمنى بقي نام
جوزيف/ بقيتي عنيفه اوى معايا ايه المعامله دى تصبحى على خير
امايا / و انت من اهله
امايا تنفخ و تقعد مكان جوزيف و هو يقوم يمشي امايا تبص على الشاشه نجاه بتتمرن على الحركات
امايا / اجمدى عندك احسن اجمدى
....................
فى مضيفه الزنايته الرجاله متجمعين
مغاورى / لا طبعا مش هقدر اصبر انا نمت ساعتين زمن اجاركم الله على الكوابيس اللى حلمت بيها دا انا صحيت على رجلى واقفه و شاده عليا من كتر ما انا عصبى و مش طايق نفسي
مختار / مرحله العصبيه عدت خلاص دلوقت لازم الهدوء
مغاورى / البت بايته بره البيت بقالها يومين يا ناس و تقولى اهدى
مختار / اه لازم تهدى و تفكر و تصبر هتعمل ايه يعني
مغاورى / ههد البلد على اللى فيها
مختار / انهى بلد بقي ... تركيا بحالها ... طب ما يمكن خرجوا من تركيا اصلا اهدى احنا مش ساكتين
مغاورى / و انت يا عباده رايك ايه
عباده / ما ليش راى اللى تشوفوه اعملوه
مغاورى / ازاى يعني ايه الاستفزاز بتاعك ده
مختار / ما قولت اهدى انت غبى انت مش شايف عامل ازاى
مغاورى / لا حول ولا قوة الا بالله لا حول ولا قوة الا بالله
شاهين / اهدى يابا ليجرالك حاجه
مغاورى / ما يجرى ياريته يجرى يا ريته كان جرا و لا عيشتش اللى انا فيه ده
عباده يسيب المكان و يطلع يتمشي بره امين يطلع وراه
امين / سبها على الله هتفرج
عباده / قولى انها لسه عايشه يا امين ... دى اكتر كلمه عاوز أسمعها دلوقت ... اى كان وضعها قولى انها لسه عايشه و هترجع
امين / هترجع و هترجع زى ما راحت كمان و هتشوف هتقول امين قال انا مستبشر خير و واثق فى رحمه ربنا و عدله هتشوف
عباده / و نعم بالله ... سبنى لوحدى دقيقه يا امين بالله عليك ... دقيقه بس
امين / حاضر
امين يدخل تانى و عباده واقف بيحاول ينظم نفسه يبص للسما و يرجع يبص للارض و يدخل المضيفه
عباده / انا عاوز اسافر تركيا ادور على البت لوحدى
مختار / و انت بقي فاكر انك هتقدر تعمل ايه اكتر من الرجاله اللى هناك بيعملوه
عباده / هو عاوزنى انا هروحله
مختار / ماشي روح ... خليه يقتلك بس برده البت مش هترجع بالطريقه دى
عباده يبص لمختار
مختار / لو موتنا هيرجع نجاه انا مش هعيش فى الدنيا دى لحظه بس كل المطلوب مننا مهما كان صعب تنفيذه حاجه واحده بس ... نهدى ... و نفكر
مغاورى / نهدى و نفكر نهدى و نفكر نهدى ازاى و نفكر فى ايه انت بتقول اى كلام و خلاص
مختار / نفكر ازاى نرجعها ازاى نوصلها نكلم كل اللى نعرفهم نضيق عليهم الدنيا نحط جايزه للى يقدر يوصلها مبلغ كبير
مغاورى / و انا جاهز ... ان شالله ابيع جلبيتي جاهز و من بكره اجهزلك الفلوس و من بكره ليه من دلوقت حالا
مختار / مش بالطريقه دى برده ... اهدى بقي
مغاورى / يووووووووه
عباده / امين
امين / ايوه يا كبير
عباده/ رتبلى كونفرانس مع كل اللى نعرفهم فى تركيا و البلاد اللى حواليها
امين / تمام يا كبير ثوانى بس
شاكر / انا اسف على كلامى بس هو احنا كل ده ما كناش كلمناهم
عباده / كلمناهم بس الكلام المرادى هيتغير
مختار يطبطب على كتف عباده
عباده / خلى عمران يرجع يتعالج وسط اهله المكان هناك خطر عليه
مختار / مش هيرجع من غير لحمه يا عباده حتى لو امرته مش هيرجع دا ربايتك
عباده يطلع بره المضيفه و ياخد نفس عميق و يخرجه بوجع
.........................
فى اوضه فاطمه
فاطمه نايمه فى السرير و تعبانه و رحمه جنبها
رحمه / اجمدى بالله عليكي هترجع باذن الله بس لازم تكونى موجوده تستقبليها
فاطمه / مش قادره يا رحمه حاسه ان روحى بتتسحب منى
مريم تدخل تجرى
مريم / فى ايه مالك يا عمتى خير
رحمه / قستلها الضغط لقيته عالى اوى ميه و تمانين تسعين ادتها نص حبايه تحت اللسان بس لسه عالى
مريم / لا حول و لا قوه الا بالله ... انا هقيسه تانى باذن الله يكون نزل و هديكي برده حقنه فيتامين تظبطلك الاعصاب و باذن الله تتحسنى و عبد الله فى الطريق ما تقلقيش و لا تفكرى تمام
مريم تركب لبطه جهاز الضغط و تقعد جنبها تقيسه
رحمه / ما اكلتش اى حاجه خالص و كل ما بسيبها لوحدها برجع الاقيها بتعيط
مريم / دا كلام برده يا عمتى
فاطمه / مفيش اخبار عن نجاه
مريم / باذن الله كل خير المهم تاخدى بالك انتى من صحتك
هند تدخل تجرى
هند / مالك يا بطه فى ايه ... الرجاله تحت اخليهم ينقلوكى المستشفي
مريم تفك جهاز الضغط
مريم / نزل الحمد لله شكل الحبايه اشتغلت من فضلك لو بتحبى نجاه لازم تاكلى ما حدش فينا له نفس ياكل بس تعالى على نفسك هى مش هتفرح لو رجعت لقتك بالحاله دى هاتيلها الاكل يا رحمه انا هاكلها بنفسي ... مش انتى بتحبى مريومتك من فضلك بقي تاكلى الاكل ده كله
رحمه تجيب الصينيه
هند / فاطمه ... تحبى نروح المستشفي
مريم / مش بمزاجها لو ما اكلتش هنروح
هند / ما دا قصدى لو مش ناويه تاكلى اختصرى و قولى نجرى بيكي على هناك الرجاله خلصانه اصلا و مش حمل خضه
فاطمه / ناديلى عباده
هند / مش وقته يا بطه ابوس ايدك اصبرى شويه و هو هيخلص مع الرجاله و هيطلعلك بنفسه
فاطمه تعيط و تمسح دموعها و هى بتهز راسها الكل يتنهد
.........................
فى اوضه جوزيف
بابلو / انت بتتمايع على فكره البلد كلها مش عارفه تقف على رجل انسفهم و اخلص و انسف البيت اللى هنا باللى فيه و اخلص منهم كلهم نوبه واحده لا هى هتلاقى ضهر يسندها و لا البلد هتلاقى اللى يحميها
جوزيف / و لا احنا هنعرف نفرض سيطرتنا هناك
بابلو/ مش فاهم
جوزيف / المنطقه دى منطقه استراتيجيه و الناس اللى فى البلد دول غفر بقي رجاله معظمهم ان ما كانش كلهم مدربين يشيلوا السلاح يعني جيش ببلاش كل اللى محتاجه عشان تحركهم قائد يكون تحت طوعك بس عشان تضمن انهم ما يقلبوش على القائد ده لازم القائد ده يكون منهم فهمت حاجه
بابلو / و نجاه بقي هتبقي تحت طوعك لا و مش بس كدا نجاه هى اللى هتخلى الرجاله دول كلهم يسمعوا كلامها مش كدا
جوزيف / الرجاله دول كلهم نطوا فى البحر لمجرد ان نجاه شافت شبح و عمالين زى النحل بيسالوا يمين و شمال و مش هيرجعوا من غيرها
بابلو / و هى
جوزيف / بنت زيها زى اى ام تموت عشان خاطر عيالها
بابلو / طب و بتضيع وقتك ليه ما تدخل و تخلص ديتها ايه ربعايه
جوزيف / ربعايه !!
بابلو / ساعه يا سيدي ساعتين خد وقتك بس اخلص
جوزيف يضحك
بابلو / ايه !!
جوزيف / الميتين ما بيخلفوش يا بابلو
بابلو/ هساعدك هكتفهالك بس انجز
جوزيف / مفيش فايده
جوزيف يبص الناحيه التانيه و يرجع يبصله و هو بيضحك 
جوزيف / امايا مش هتسمحلنا نقرب منها بالطريقه دى
بابلو / وزعها ... يا عم خدرها اعمل اى حاجه
جوزيف / و لما تفوق و تعرف هتقتلها و لا هتستناها هى تقتلك و تقتلنى
بابلو / مش هتعمل حاجه هتزعل شويه زى ايام الواد اياه و فى الاخر هتتقبل الوضع عادى يعني
جوزيف / تمام ... الاوضه عندك روح نفذ
بابلو / انا !! نجاه !!
جوزيف / اه يلا ...  ايه ؟ لتكون فاكرنى بحبها و هغير عليها... روح خشلها ... خد ربعايتك
جوزيف يضحك و يبص الناحيه التانيه بابلو يبدا يضايق
جوزيف / اوعدك انى مش هدخل يلا خد راحتك ... تحب افصلك الكاميرات عشان تاخد راحتك بجد
بابلو / خلصت و لا لسه
جوزيف / انا كل اللى طالبه منك انك ما تموتش و لا تموتها هتعرف و لا لا ؟؟
بابلو يبص الناحيه التانيه و يقوم
جوزيف / استنى ... هكسرهالك و اسهلك الموضوع او هصعبه مش هقدر احدد بس اهو بروفه صغيره تعرف البنت دى لو اتعاملت باى طريقه تانيه غير الهدوء و طول النفس هترد ازاى
بابلو / هتعمل ايه
جوزيف / اصبر
جوزيف يفتح المايك
جوزيف / نوجتى الحلوه خلصت تمرين و لا لسه
نجاه مفيش رد فعل و تكمل تمرين
جوزيف / انا النهرده رايق و عشان كدا هنفذلك طلبك و اخليكي تكلمى ابوكى
نجاه تقف و تبص للكاميره جوزيف يبتسم بابلو يستغرب
جوزيف / هتصل بيه استنى
جوزيف يقفل المايك
بابلو / انت بتهرج صح
جوزيف يبصله و يبتسم و يتصل بعباده يرن
عباده / السلام عليكم
جوزيف يفتح المايك
عباده / الو ... السلام عليكم
نجاه / بابا انا نجاه يا بابا
جوزيف يقفل السماعه و يسيب المايك عباده مش سامع نجاه و نجاه سامعه عباده و الاتنين بيصرخوا
عباده / نجاه حبيبتى انتى عامله ايه انتى فين يا نجاه ما تخافيش يا قلب ابوكى الو
نجاه / انا بخير يا بابا و الله بخير انا كويسه ما تخافش عليا ما تقلقش يابا انا بخير و الله ما حدش لمسنى ما تخافش الصور دى مفبركينها يابا ما تخافش
عباده / نجاه نجاه يا قلبي انتى فين يا نجاه ردى عليا ابوس رجلك ما تخافيش يا ضنايا ردى عليا
نجاه / سمعاك يابا انت مش سامعنى ... انت بتعمل كدا ليه حرام عليك خليه يسمعنى بتعمل كدا ليه
عباده / ردى يا قلبي طمنيني عليكي ما تخافيش اى كان اللى حصل ما تخافيش
نجاه / و الله بخير يابا و الله بخير ما تخافش عليا انا بخير و الله ... افتح الصوت يا ابن الكلب افتح الصوت حرام عليك كدا
عباده / نجاه نجاه
جوزيف يقفل المايك نجاه ما تسمعش صوت عباده
عباده / ردى عليا يا نجاه ردى يا بنتى
جوزيف / بنتك فى الحفظ و الصون حبيت اطمنك انها لسه عايشه و معايا
عباده / عاوز ايه عاوز فلوس عاوز كام هديك قول عاوز ايه هديك بس سيبها ما تدخلش الحريم فى اللى بينا خليك راجل و انا هجيلك بطولى
جوزيف / هتجيلى اقتلك
عباده / اقتلنى و سيبها سيبها هى ما لهاش دعوه بكل ده
نجاه تنهار و تعيط فى الارض جوزيف يفتح الصوت و يسمع عباده صوت عياطها
عباده / انت عاوز ايه قولى عاوز ايه بتعمل كل ده ليه سيبها ما لهاش ذنب ما عملتلكش حاجه
جوزيف / انا مش هاذيها ما تخافش ما حدش بياذى ام عياله
عباده / خليك راجل و واجهنى انا وريني طولك انا تعال و لا قولى فين اراضيك و انا اجيلك بس خرجها براها هديك اللى انت عاوزه لو عاوز عمرى خده بس سيبها ترجع
جوزيف / ما قولتلك اقتل نفسك و انت استخسرت فيها روحك
عباده / انا ما اقدرش اموت نفسي تعال انت اقتلنى
جوزيف / ما بحبش الفصال تحب اسمعك صوتها تانى لاخر مره فى حياتك
جوزيف يشاور لبابلو يروحلها
عباده / خرجها بره اللى بينا انا اصلا مش فاهم انا عملتلك ايه بتعمل كدا ليه مين مشغلك و ايه مصلحتك من كل ده
جوزيف / خلاص انت حر
جوزيف يعلى صوت نجاه بابلو دخلها
نجاه / جاى ليه هاه انا مش فايقه لحد انا زهقت من اللعبه دى انت فاهم اطلع بره بقولك
بابلو يقلع قميصه
بابلو / لا المرادى اللعبه مختلفه ما تقلقيش ... هنلعب عريس و عروسه
عباده ساكت
جوزيف / اوعى تفصل الخط اللعب لسه هيحلو كان نفسي يبقي صوت و صوره بس انا مش هخليك تشوفها و لا حتى جثه انسها انساها خالص 
نجاه واقفه بعيد بتمسح دموعها و الغضب ماليها بابلو يروح يشتبك معاها و هى داخله يا قاتل يا مقتول بس ما تقدرش عليه يثبتها فى الارض و هى بتصرخ
جوزيف / حتى صوتها فى لحظه زى دى مش ههنيك عليه
جوزيف يقفل الخط
.................
فى اوضه نجاه
نجاه نايمه فى الارض و بابلو فوقيها و هى بتقاوم و مش راضيه تثبت و بابلو مكتف ايديها الاتنين بايديه يحاول يبوسها لحد ما نجاه تستغل الفرصه و تعضه من ودنه ما تسيبش الا بالدم بابلو يقوم و هو ماسك ودنه و بيتالم جامد نجاه تقوم تجرى تقف بعيد و تتف غضروفه ودنه و الدم ملحوس بقها و الغضب مالى ملامحها تجرى عليه و تضربه بابلو يشيط و يضربها جامد يوقعها فى الارض و ينزل فيها ضرب تضم جسمها و تدافع و بابلو نازل فيها ضرب امايا تدخل و تبعده
امايا / ابعد كفايا ..  كفايا
بابلو يقوم و يتف على نجاه و ينزل يشدها من هدومها و هى مش قادره من الوجع
بابلو / انا هدفعك تمن اللى عملتيه غالى انا خارج و مش هرجع غير بجثه تلاته اربعه من حبايبك
بابلو يزق نجاه فى الارض مش قادره تتحرك و بتنهج بابلو يطلع بره امايا توطى على نجاه
امايا / انتى كويسه
نجاه / اخرسي اخرسي بقي انتى ما بتتعبيش انا بكرهك بكرهكوا كلكوا سمعانى بكرهك بكرهك غورى من وشي غورى
نجاه بالعافيه تحاول تقعد و تسند نفسها على الحيطه
امايا / ما كانش هيعمل حاجه على فكره ما كانش هيكمل معاكى
نجاه / انتى فكرانى زيك رخيصه و اى حد يحط ايده عليا انتى فاكره انى ممكن ابيع لحمى عشان اعيش الموت عندى اهون الشرف عندى اغلى من عمرى كله عارفه يعني ايه شرف .... ما اعتقدش اللى زيك ما تعرفش يعنى ايه اصلا شرف اللى زيك هتعيش و تموت رخيصه الكل يتف عليها و يمشي ... اطلعى بره
امايا تبص لنجاه و تمشي و تقفل الباب وراها نجاه تبص للكاميره
نجاه / بتضيع وقتك معايا بتضيع وقتك... انا عمرى ما هكون معاكوا عمرى ما هستسلم ليكوا و اللى عملته النهرده ده هيفتح عليكوا ابواب جهنم انت سامعنى ... جهنم
جوزيف يفتح رشاشات الميه تغرق نجاه و هى مش قادره تتحرك بالعافيه تقوم و هى بتتسند على الحيطه و ماسكه جنبها تتحرك ناحيه الحمام تنام فى الارض و رجليها فى الاوضه من بره و تبص للسقف بتعب ثوانى و عنيها تقفل
........................
فى المستشفي
منصور يدخل بيجرى يلاقي الكل متجمع قدام اوضه
منصور / ايه الاخبار هو عامل ايه دلوقت
مغاورى / ايه اللى حصل يا منصور كلم نجاه حقيقي
منصور / كلمها بس ... مش عارفه اقولها ازاى  .. هو كلم اللى اسمه جوزيف اكتر و ... التانى ابن حرام مستفز ... هو عامل ايه
مختار / ضغطه على جدا و معلقينله محاليل و ربنا يستر و يعدى النهرده على خير
مغاورى / مش عارفين برده توصلوا للواد ده ايه خيبتوا جايين دلوقت و تخيبوا و تبقوا زى قلتكوا ... اعملوا حاجه اعملوا اى حاجه تحلل الملايين المصروفه على ام المخروبه اللى فاتحينهالكوا دى
منصور يبص فى الارض
مختار / اهدى يا مغاورى
مغاورى/ انت لو قولتلى اهدى تانى هولع فيك و فروحى و فى البلد باللى فيها انت فاهم و لا لا انا طهقت
مختار يسيب المكان و يمشي
مغاورى / لااااااا لا لا لا لا انا مش هقعد هنا مستني اما ربنا ينفخ فى صورتكوا و تعرفوا تعملوا حاجه انا هروحلها تركيا بنفسي و مش راجع غير و هى فى ايدى
امين / هتروح تعلم ايه بس يا مغاورى
مغاورى / هعمل اللى ربنا يقدرنى عليه انا طهقت
ممرضه تدخل
ممرضه / بعد اذنك يا سي مغاورى الصوت ... الناس اللى فى الاوض كلهم عيانين و محتاجين راحه
مغاورى يعتزر براسه و يسيب المكان و يمشي
امين / ما تضايقش نفسك يا منصور دا كلام فى لحظه زعل مش اكتر
منصور يهز راسه و يمشي
.......................