الكبيره ٢ بقلم / لولو_محمد

الحلقه ٥٩

((((((( الكبيره ٢)))))))
#لولو_محمد
الحلقه ٥٩
مختار / انا عارف بس الحريم بيبقي ليهم حاجات فى خيالهم كدا زى الخطوبه و تجهيزاتها تحب تعملها هنا و لا فى البلد عندنا... على فكره البلد عندنا جو تانى خالص
عبد العزيز / ايوه بس اكيد أهلنا مش هيقدروا كلهم يجوا البلد عندكوا
مختار / خلاص يبقي نعمله الاتنين ليله عندكوا و ليله عندنا ... ناصر معاكوا تنزلوا تجيبوا كل اللى هتحتاجوه من الألف للياء و الشبكه و القاعه و الفساتين و كل حاجه و تبلغونا بالتاريخ نيجي نهيص شويه و ناخدكوا و نروح نكمل عندنا فى البلد
عبد العزيز / انا مرتبط بشغل الموضوع مش بالبساطه دى
مختار / شوف دنيتك وانا متأكد انك هتقدر تظبطها انت مش عاوز تشوف صيدليه بنتك و لا ايه ... انا وصيت واحد حبيبى يستلقطلى صيدليه محترمه تبقي باسم عروستنا ست البنات
عبد العزيز / كتير و الله يا باشمهندس
ناصر / حضرتك ما قولتليش حاجه عن الموضوع ده
مختار/ جل من لا يسهوا عجزنا خلاص و بقينا ننسي
عبد العزيز / يا راجل ما تقولش على نفسك كدا دا أنت ما شاء الله عليك ما تجبش سنك خالص انا قولت ما شاء الله لتفتكرنى بحسد و لا حاجه ... هقوم استعجل نور
مختار يبتسم عبد العزيز يطلع بره ناصر يروح يقعد جنب مختار
ناصر / حقيقي حكايه الصيدليه دى ؟
مختار / فارقه معاك فى حاجه
ناصر / لا بس فرحت
مختار / و انا هعوز ايه اكتر من كدا ... ربنا يسعدك و يتمم لك بخير
.........................
فى مطبخ الزنايته
ياسمينا واقفه مع هند فى المطبخ
ياسمينا / ايه الاهل دول هو فى كدا
هند / انا عملت سيرش على امها على اليوتيوب ... مش هتصدقي الوليه و كلامها و محاضراتها صحيح ينصحون الناس و ينسون أنفسهم
ياسمينا / بس انتوا غلطانين برده يا دودو انتوا قافلين عليها المضيفه و رايحين جايين عليها كدا ما يصحش
هند / السرايا فيها رجاله داخلين طالعين و احنا عاوزينها تاخد راحتها
ياسمينا / و هو رجاله الزنايته بصباصين لا سمح الله يا ستي خليها وسط الحريم هيشغلوها و يساعدوها تنسي الوقت اللى هى بتعانى فيه ده و كمان هتعوضوها عن أهلها
هند تتنهد
ياسمينا/ سيبك انتى تعالى هنا قوليلى انتى ايه رايك فى الموضوع من وجهه نظر الحماه كدا يعني
هند / حماه مين يا ياسو مفيش بينهم حاجه خالص
ياسمينا/ يا اختى بكره يبقي فى ما هى بتبدأ كدا
ياسمينا تضحك
هند / ربع روقانك
ياسمينا / هروح اتعرف على عروستنا الجديده ابعتيلى الاكل على هناك
هند / شوف البت و تناحتها دا بدل ما تساعدني
ياسمينا/ انتوا جايبينا تشغلونا و لا ايه
هند تبص باستغراب لياسمينا تلاقيها بتضحك هند تضرب كف على كف
....................
فى شقه ناصر
مختار قاعد حاطت ايده على خده جوزيف يدخل و يديله كبايه شاي مختار ياخدها و يسمي الله و يشرب جوزيف يقعد يبصله و ساكت
مختار / فى حاجه و لا ايه ؟
جوزيف / الحاجات كلها عندك انت
مختار يبتسم بسخريه و يشرب
جوزيف / مش خايف احطلك حاجه فيها
مختار / مش هتكسب حاجه من ورايا انا اللى فى صفك لو خسرتنى هتخسر
جوزيف يشرب من كبايته و هو مبتسم
مختار / عمك عباده يوم ما اتحطله البى كاى فى كبايه الشاى بتاعته اتحطتله من ايد اكتر واحد كنا بنثق فيه
جوزيف / ما هى الضربه دايما ما بتجيش غير من هنا
مختار يهز راسه
جوزيف / طب انتوا ناويين تقضوها كدا لحد ما الضربه الجايه تيجي و لا ناويين تعملوا حاجه
مختار / قربت ؟
جوزيف يبتسم بسخريه مختار يهز راسه
مختار/ من حقهم يعيشوا و يفرحوا من حقهم ينسوا انهم هيموتوا اصل ما تاخذنيش كلنا كدا كدا هنموت نشيل هم الموت ليه مصلى فرضي و حافظ ديني تمام قل لن يصيبنا إلا ما كتب الله لنا اهلا و سهلا
جوزيف / دا انت استويت
مختار / انا شايل الهم ده من و انا اصغر منك كنت فى الكليه لسه و فى وسط كل ضرب النار ده حبيت و اتجوزت ... و خلفت و ربيت و كبرت... الحمد لله
جوزيف / هسمحلك تسألني سؤال واحد ... فكر كويس قبل ما تسأل عشان فرصه زى دى بتيجي فى العمر مره واحده سؤال واحد بس اى كان هجاوبه
مختار يفكر و يبتسم
مختار / اميره فين
جوزيف / فى مصر أو على الأقل فى الطريق ... كان نفسي تسأل سؤال اهم من ده بس تمام
مختار / عاوز اقابلها و اتكلم معاها
جوزيف / انت فاكر انك هتقدر تغيرها ما كانت معاكوا عملتوا ايه
مختار / الوضع مختلف ... انت دلوقت معانا
جوزيف / آآآآآآه انت عاوزنى اكتفهالك
مختار / عاوزك تعقلها
جوزيف / دا على اساس ان وجودى معاكوا عقل ... انت عارف انتوا ايه يا مختار
مختار / ايه ؟!
جوزيف / عارف الطفيل ... عارف بيعيش ازاى و بيتغذى منين انتوا كدا بتستغلونى لكن مش بتقدمولى حاجه و يوم ما هحتاج او اطلب مش هتقدمولى اى حاجه
مختار / انت بتدينا اللى انت عاوز تديهولنا بالقدر اللى انت عاوزه و فى التوقيت اللى انت عاوزه و وقت ما تطلب او تحتاج هنديك بالقدر اللى نقدر عليه مش اللى احنا عاوزينه فى فرق كبير
جوزيف / انا بديكوا اكتر بكتير من اللى المفروض اعمله المشكله انكوا ما بتسمعوليش يا استهتار يا كسل يا غباء ... يا عند ... انا قولتلكوا كل حاجه بس ما حدش واخد باله من اللى قولته او ما حدش عاوز يصدق ... بس لما الضربه هتيجي ما حدش هيقول ما قولتش
مختار / قولتلى ؟!
جوزيف / انت طلبت اميره .. لما تقابلها هتقولك
جوزيف يقوم مختار يطلع الموبايل و يتصل بمنصور
مختار / السلام عليكم عارف ان الوقت اتأخر مش هطول عليك ... حاول تجبلي اسماء كل اللى يونس اتكلم معاهم الفتره اللى فاتت ... كل دول !! امتى ؟! ... صابر كمان ... ما راحش لعم عبده بتاع العسليه بالمره ... احلف و ليه الساده المكسرات عنده حلوه ... اه بهزر يا منصور ما اللى بتقوله ده تهريج و الله ... اقفل اقفل انا اللى غلطان ... لا يا ابنى ما عملتش حاجه الغلط من عندى انا ... ما تشغلش بالك انا هتصرف تسلم ... فى حفظ الله فى حفظ الله
مختار يقفل الخط و يتنهد
.....................
فى اوضه نجاه
مهره واقفه فى التراس نجاه تدخل تحضنها
نجاه / ايه اللى مصحيكي بدرى كدا
مهره / ما عرفتش انام اصلا
نجاه/ ليه جسمك لسه بيوجعك ؟
مهره تتنهد
مهره / انا عقلى تاعبني اكتر ما حدش رجع منهم و لا حد قالى عملوا ايه مع بابا و دماغى عماله تجيب و تودى و خايفه اوى ما يصدقهمش و لا يعاملهم وحش ... تصدقيني لو قولتلك انى خايفه يصدقهم ... علاقه بابا و مروان زى الزفت و هيصدق عليه اى حاجه
نجاه / انت متاكده ان ما لوش دخل باللى حصل
مهره / مفيش اخ بيعمل فى اخته كدا ... انا لحمه
نجاه / و كان فين من لحمه طول السنين اللى فاتت
مهره / كان تايه فى الدنيا و انا عايشه فى دنيتي و طرقنا ما كانتش بتتقابل
نجاه / انتى بتحاولى تقنعى نفسك و خلاص... انتى بنفسك قولتى ان فى بينه و بين اكرم كلام و خايفه تواجهيه او تطلبى منه يمشي الناس دول يتهجموا عليكي تانى ... طب لعلمك بقي البلطجيه اللى اتهجموا عليكي دول اصلا كانوا تبع اكرم هو اللى باعتهم عشان تخافى و ترجعى البيت عند امك
مهره / حلو الكلام ده و ما رجعتش و اللى شجعنى ما ارجعش مروان يبقي ازاى بقي ... اكيد اكرم اتفق مع رامى يلبسوها لمروان عشان ما يبقاليش حد و ساعتها اضطر ارجع له
نجاه / كل شئ ممكن
مهره / الأخ ما بيعملش فى اخته كدا يا نجاه الدنيا مش وحشه اوى كدا انتى لازم تصدقيني ... عشان انا لو صدقتك مش هقدر اعيش طبيعي تانى ابدا
نجاه / الدنيا فعلا فيها خير بس ما حدش عارف الخير ده فين
مهره / انا هدخل اخد دوش يمكن اهدى شويه
نجاه / ادخلى
مهره تروح الحمام نجاه تتنهد تحس بحد تبص تلاقي جابر واقف فى بلكونته بيشرب شاى و متابعها و مبتسم تبتسم و تدخل جوه يتنهد و يكمل شرب الشاى
..........................
فى شارع جانبى فى منطقه مقطوعه
عمران يدخل بالموتوسيكل بتاعه و يمشي بالراحه و بعدين يركنه و ينزل و يمشي المنطقه اضائتها ضعيفه و ريحتها وحشه فجاه راجل يطلع بيطوح من بيت يخبط فى عمران عمران يزقه بعيد الراجل يمشي و هو بيطوح عمران متابعه بقرف و يرجع يلتفت للطريق يتفاجئ بتلت رجاله
الاول / شكلك جديد فى المنطقه اؤمر اخدمك ازاى
عمران / كنت بدور على واحد
عمران يحط ايده على جيبه ما يلاقيش المحفظه يستغرب يبص وراه و يكتم جواه و يرجع يبص قدامه عمران يقلع ساعته و يديها للراجل
عمران / جلال ابو الليل
الرجاله تبص لبعض و يضحكوا
الاول / طب ما تكمل جميلك كدا و تقب بالموبايل و الخاتم الجميل ده بالمره و انت عشان اول مره تشرفنا هنسيبلك الجزمه تروح بيها
عمران/ انا مش عاوز مشاكل تمام و لو ديتك فلوس هبسطك انا بس كنت عاوز جلال فى كلمتين و ما تقلقش مش حكومه و لا اى خطر هساله عن حد من زباينه مش اكتر
الاول يفتح المطوه
الاول / خلصت ؟! و لا لسه عندك لت نسوان عاوز تلت و تعجن فيه على المسا ما تنضف نفسك ياض يا ابن ال
طلقه تيجي فى ايد الاول المطوه تقع من ايده و يفضل يصرخ و الرجاله اللى معاه يرتبكوا جوزيف يدخل ماسك مسدس فيه كاتم صوت يرمى لعمران محفظته
جوزيف / معاه حق على فكره انت بتلت لت مش طبيعي ما تنجز نفسك انت صغير !! جلال فين ياله بدل ما اغربلك 
الاول / تانى حاره على ايدك اليمين 
جوزيف / طب انجر غور من هنا اتحرك
الرجاله يطلعوا يجروا
الاول / اجرى ياله دا باينه حكومه اجرى يلا
عمران / انت بتعمل ايه هنا
جوزيف / عاوز جلال قولى اجيبهولك انما تروحله لمنطقته لوحدك و من غير علم حد دا اسمه انتحار
عمران / شكرا بس انا كنت مسيطر
جوزيف يعوج رقبته
عمران / كنت هعرف اجيبها
جوزيف يهز راسه و يمشي و عمران يمشي وراه
عمران / عرفت مكانى منين
جوزيف / دا اغبى سؤال فى التاريخ ... المفروض تسأل جيت وراك ليه
عمران/ ليه
جوزيف / عشان بموت فى المشاكل و انتوا عيشتكوا ممله اوى يا عمران بصراحه ... مفيهاش ساسبنس فين جلال ده
جوزيف يدخل الحاره يلاقي رجاله كتير يقف عمران يتفاجئ جوزيف يحط المسدس فى جيبه
جوزيف / بلغ جلال ان الزياره وصلت
عمران يستغرب الراجل يهز راسه و يشاور للرجاله يعدوه
عمران / هو ايه اللى بيحصل
جوزيف / افرد ضهرك لياكلونا احنا فى منطقتهم
عمران يهز راسه الرجاله توسع لهم لحد ما يدخلوا بيت قديم و ينزلوا سلم يوديهم فى ممر ضيق يعدى فرد فرد لحد باب حديد يتفتح و يدخلوا و يتقفل تانى و فى رجاله كتير قاعدين اللى بيركب سلاح و اللى بيعبى بودره راجل يقوم من على مكتب يروحلهم
الراجل/ جبت الامانه
جوزيف يدوس كعب جزمته يفتح درج مليان جنيهات دهب يقلبها يفضيها فوق المكتب
جلال / باشا ... رقبتى كل اللى تحتاجه
جوزيف يبص لعمران
عمران / انت بتتعامل مع واحد اسمه مروان على الدسوقي
جلال / خير يا باشا زعلك فى حاجه
عمران / انا سؤالى بسيط بياخد منك مخدرات
جلال / ايوه يا باشا
عمران / تشهد بالكلام ده
جلال / انت حكومه يلا و لا ايه
جوزيف يضحك و يمسك ايد جلال و يشده ناحيته
جوزيف / اهدى بس و تعال كدا هى الحكومه لو عاوزه تتكلم معاك هتديك الدهب دا كله ... هو بس مزعلنا شويه
جلال / يا باشا دا عيل هفا عنده قرشين تاعبينه انما اكتر من كدا ما يعرفش يهش دبانه بس لو مزعلك نربيه
جوزيف / لا هو الموضوع زى ما فهمتك كدا
عمران / الموضوع انه بينكر انه بيتعامل معاك و احنا عاوزين دليل
جلال / دليل ايه يا عم ... معاك ده يا باشا
جوزيف / دا يبقي نسيب العيل الهفا جوز اخته
جلال يبص لعمران من فوق لتحت
جوزيف / مسائل عائليه و هو لما قالى الحوار عند جلال قولتله دا حبيبي سكته معروفه و لعلمك ان كنت بتكسب من مروان جنيه ده يقدر يديك ميه و ان كنت كسبت منى الف فاللى قدامك ده يقدر يكسبك مليون
جلال يتعدل فى وقفته
جلال / يا باشا احنا ما نقولش للرزق لا بس ... اللى بتقوله غريب علينا ... رسيني اخدمك ازاى ... و ما تاخذناش يا باشا اللى ما يعرفك يجهلك و انت شكلك برده ... ابن ناس
جوزيف/ شوف تقدر تثبت ازاى ان مروان بيذكر من عندك و انا هظبطك
جلال / مروان اخر مره سحب منى كميه كبيره لو هيضربها لوحده هتقضيه شهرين تلاته على الاقل
عمران/ هو مروان بيجي هنا
جلال / هنا فين يا باشا دا ابو قلب ميت بس اللى يعتبها... بيدينا رنه نطلع له احنا بره
عمران / ايوه يعني هنثبت انه مدمن ازاى
جلال / ياباشا مانا قولتلك هيخلص المخزون و يجيلى
جوزيف / شهرين تلاته كتير
جلال / هو أبو نسب غالى عندك يا باشا ... اصل لو يلزمك نجيبه
جوزيف / تؤ ... انت عاوز ايه صحيح يا عمران
عمران / عاوزه يشهد ان مروان مدمن و بيشتري منه
جلال / اشهد فين يا باشا ما تخلينيش اعملها معاك انا عامل احترام للراجل اللى معاك
جوزيف / هو ما بيتكلمش عن الحكومه هو ... عمران انت فاكر ان شهاده جلال هتحل المشكله
جلال / بقولك ايه يا عم انتوا صدعتونى وقتكوا خلص يلا من هنا بدل ما اتغابى و نزعل كلنا
جوزيف / لا معاك حق طبعا احنا بنعتزر جدا .. يلا يا عمران يلا خدنا اللى احنا عاوزينه نمشي و ما نعملش صداع للرجاله ... يلا
عمران يبص لجوزيف بغضب جوزيف يشاورله على الباب راجل يفتح الباب عمران يمشي و جوزيف وراه
جلال / نورت يا باشا
جوزيف يحي الراجل و يمشي
عمران / استفدنا ايه بقي من الهبل دا كله
جوزيف / و انت كنت جاى بطولك فاكر انك هتعمل احسن من كدا
عمران / انا بجد مش طايق نفسي
جوزيف/ انتوا اصلا بتضيعوا وقت الموضوع اتفه من كدا انتوا اللى بتلفوا حوالين نفسكوا
عمران يبص لجوزيف
جوزيف / خلينا نطلع من هنا و نتكلم فى البيت
عمران يهز راسه و يمشي و جوزيف وراه عمران ما يلاقيش الموتوسيكل يبص لجوزيف
جوزيف / العربيه هناك ما تقلقش هنجيبه بعدين … تعال
عمران ينفخ جوزيف يروح ناحيه عربيه و يركب عمران يلف يركب الناحيه التانيه جوزيف يبتسم و يطلع جهاز تفجير صغير من التابلوه يدوس عليه صوت انفجار شديد جوزيف يسوق
جوزيف / يلا المجرمين قلوا حبه ... ما حليناش مشكله الديلرز فى مصر بس ... خلصنا من واحد قولى بقي انت عاوز ايه بالظبط
عمران / هو الدهب كان
جوزيف / أنت بجد صدقت أنى أديت كل الدهب ده للحيوان ده و مشيت قفايا يأمر عيش عادى كدا !! ازعل منك يا عمران بجد
عمران / انا مضايق اوى و مخنوق و مش طايق نفسي
جوزيف يتنهد و يطلع موبايله و يشغله على فيديو من كاميره مروان و هو بيشد بودره
عمران / انت معاك الفيديو ده من امتى
جوزيف / عشان تعرف انى بحبك واحد تانى ما كانش شمه
عمران / انت بتهزر صح بتستظرف معاك الفيديو ده طول المده دى و ساكت
جوزيف يبص لعمران
عمران / طب ليه ... ساكت ليه
جوزيف / و اتكلم ليه ... هتسمعنى ... الدنيا ما بتديش كل حاجه الدنيا ما بتديش اى حاجه انت اللى لازم تحارب عشان توصل للى انت عاوزه ... الفيديو ده منصور او دياب او اعفن مهندس عندهم كان يقدر يجيبهولك لو انتوا بس سمعتوا كلامى لما قولت ان مروان عيل وسخ ... حد فيكوا صدقنى او اهتم
عمران يبص الناحيه التانيه
جوزيف/ انا عرضت انى اطلع اتكلم مع على ده كنت هوريهوله ... انتوا رفضتوا
عمران / اكيد ابويا خاف تتغابى عليه و لا حاجه
جوزيف / لا يا حبيبي انا مش غبى ... اللى يجي مكان زى ده لوحده هو اللى غبى ... انت غبى
عمران / تعرف ايه كمان عن الموضوع ده
جوزيف / ما اعرفش حاجه
عمران / يونس بلاش استفزاز فى بنت بتضيع هنا
جوزيف / عاوز رايي
عمران / يا ريت
جوزيف / لا ابوها و لا امها و لا عيلتها كلها فيها خير ليها ... خليها وسطيكم ... و لا حتى وسطيكوا فى خير
عمران / لا يا شيخ !!
جوزيف / وسطكوا حياتها هتبقي فى خطر ... و انت بعقلك ده مش هتقدر تحميها متهور و اهبل ... انا ما كنتش اعرف عنك كدا كنت فاكرك عاقل و راسي و بتحسبها... دى اول غلطه ليك ... دور على الدافع اللى خلاك تتهور و تفقد أعصابك بالشكل ده و يا تخلص منه يا تتحكم فيه قبل ما يتحكم هو فيك
عمران / تقصد ايه
جوزيف / ما جوعتش ناكل اى حاجه ... مفيش فايده فى العيله دى
....................
فى اوضه نجاه
نجاه تدخل مخنوقه تقفل الباب مهره تشوفها
مهره / فى ايه حاجه حصلت و لا ايه
نجاه / منعونى ادخل الجيم ... دول بيهزروا بجد هو فى ايه فى العيله دى
مهره / خايفين عليكي
نجاه / انا كويسه ... شيفانى ... كويسه جدا الحمد لله ليه يعاملونى على انى عاجزه ... أنا كويسه
مهره / يا بنتى خايفين عليكي انتى ليه مش قادره تفهمى
نجاه تقعد جنب مهره
نجاه/ انتى عامله ايه
مهره / الحمد لله احسن كتير
نجاه / لسه تعبانه
مهره/ مش هكدب عليكي ... بس كنا فين ... الحمد لله
نجاه تحضن مهره
نجاه / انتى قويه و بطله و انا متاكده انك هتخفى و تبقي زى الفل
مهره / مش عارفه من غيرك كنت عملت ايه ... ربنا ما يوريني فيكي حاجه وحشه
نجاه / حقك انتى عليا يا ريتنى أدخلت من بدرى
مهره / و انتى كنتى هتعرفى منين
نجاه / فاكره يونس
مهره تهز راسها
نجاه / قالنا مره ان رامى و مروان مش كويسين و اننا لازم نبعدهم عنك بس احنا ما صدقناهوش و من بعدها بدات المشاكل
مهره / انا لحد دلوقت مش مقتنعه ان اخويا ممكن ياذيني فلو سمحتى يا نجاه ... هو اننى معاكيش اى نمر لاهلى ان شالله حتى اكرم
نجاه / هتكلمى اكرم يا مهره !!
مهره/ اخد منه رقم ماما عاوزه اكلمها عاوزه اقولها الحقيقه ... انتى عمرك ما هتفهمى انا حاسه بحجر على صدرى حجر تقيل اوى صورتى فى عين اهلى كام مره هقولك ... يا نجاه لو الدنيا كلها شافتك وحشه مش مهم ما دام اهلك و حبايبك بيدافعوا عنك و ساندينك انا هنا مطلوب منى أواجه الدنيا بحالها و اهلى هم اللى فاكرينى وحشه انتى مستوعبه
نجاه / مستوعبه و مريت بيها على فكره ...قريب جدا كمان ... بس هقولك حاجه لو ما بتعمليش حاجه غلط و لا حرام ما حدش هيقدر يجي عليكي
مهره / انتى بتقولى كدا عشان هنا وسط اهلك انما انا هفضل هنا قد ايه بمجرد ما اخف هطلق من عمران و ارجع مصر ... هرجع و انا صفر على الشمال
نجاه / تبقي عبيطه لو رجعتى انتى هنا وسطينا عندك كل حاجه محتاجاها و بتحبيها ترجعى ليه و لمين
مهره / لدراستى انتى ناسيه انى فى اخر سنه حتى لو انتساب بروح برده ساعات
نجاه / روحى على الامتحانات او روحى اقعدى مع عمران الفتره اللى باقيه ما فيهاش حاجه ... لا استنى مش هنكدب الكدبه و نصدقها انتوا مش متجوزين ... بس ممكن تقعدى عند عم فاروق هتحبيهم اوى صدقيني ناس فى منتهى الكرم قضي الفتره دى و ارجعى عيشي معانا خيل و صحرا و ميه و خضرا و طبيعه جنه على الارض و احنا كلنا بنحبك على فكره مش هتحسي وسطينا بغربه خالص و ممكن كمان تشتغلى اى حاجه و تصرفى على نفسك على فكره صدقينى هنا ليكي فرص كتير اوى عن مصر
مهره / انا و الله بحبكوا يا نجاه بس مهما كان الانسان برده تقيل
نجاه / ما ينكرش الفضل الا ابن الحرام و انتى ياما عملتى
مهره / انا !!
نجاه / انقذتى حياه عمران و سالتي عنى و جيتي زورتيني لما رجعت و بقيتي صحبتى و اختى انتى بتقولى ايه يا مهره
مهره / انتى بتقولى ايه يا نجاه كل ده ولا حاجه
نجاه / عندك يمكن لكن احنا اللى يقدم لينا السبت نديله الاسبوع كله
مهره تبتسم و تبص الناحيه التانيه
نجاه/ جعانه ناكل لقمه
مهره تهز راسها لا
نجاه / عيله قفيله زى كل اللى فى البيت ده
مهره تضحك نجاه تشوفها تضحك هى كمان
......................
فى شقه ناصر
مختار بيزعق لعمران و جوزيف
مختار/ و اخرتها يعني ايه ما تدفنونا اكرم من قله القيمه دى
عمران / انا كنت
مختار / انت ما تفتحش بقك و إياك تعمل كدا تانى ... و انت
جوزيف / انا ايه ... انا رجعتهولك سليم
مختار / انت عارف انا بتكلم عن ايه ما تستهبلش
جوزيف / قولتلك انا بديك
مختار / كان ممكن نلحقها
جوزيف / يبقي لومهم هم اعمل ايه اكتر من اللى عملته ما قولتلهم ابعدوها عنهم ما حدش سمعنى ما قولت مليون حاجه برده ما حدش سمعنى ولسه ما حدش راضي يسمعنى انا لو جبت الفيديو و حطيته فى عينهم كدا هيقولوا قديم هيقولوا ما لناش دعوه المعلومه لما بتيجي منى ما حدش بيهتم
مختار / انا بهتم كلامك بعد كدا معايا انا تمام عندك معلومه قولهالى انا هسمعك
جوزيف / تمام المجلس باعت فريق تانى يكمل اللى انا ما كملتوش عملت ايه
مختار/ نجاه فى البلد فى السرايا تحت عنينا اربعه و عشرين ساعه
جوزيف / و انت شايف ان ده كفايا ... تمام
مختار / تنصحني اعمل ايه
جوزيف يبتسم و يبص لعمران و يرجع يبص لمختار و يتنهد
جوزيف / صابر
عمران / ماله صابر نفهم من كدا ايه يعني ايه شغل التنقيط ده ما تقول الكلام دوغرى
مختار / خلاص يا عمران ... ادخل ارتاح شويه انا عاوز اتكلم مع يونس عن حاجه كدا بيني و بينه
عمران يهز راسه و يدخل و عينه على جوزيف و جوزيف متابعه و مبتسم مختار يشاور لجوزيف يقعد جوزيف يقعد
مختار / انا عاوزك فى موضوعين اهم من بعض
جوزيف / اؤمر
مختار / الاول و الاهم اجيب منين جزمه زى بتاعتك دى
جوزيف يبتسم و يبص الناحيه التانيه
جوزيف / بكره يكون عندك اختها
مختار / حبيبي ... الموضوع التاني بقي انت مش محتاج منى اى حاجه... انا عارف انك بتعرف تصرف نفسك و ما بتستناش حاجه من حد بس انا ... انا بجد بحبك زى ولادى و غالي عندى صدقني لو اقدر اعملك اى حاجه هتفرق معايا جدا
جوزيف / انا بصراحه بستغربك جدا يعني انا قولتلك اى حاجه هتطلبها هقولهالك تطلب جزمه و تسأل عن امايا و تسأل ان كان فى حاجه نقصانى ... انت بتضيع على نفسك فرص رهيبه مش هتتكرر تانى خالص
مختار يضحك جدا
جوزيف / انا بتكلم جد
مختار/ احنا مش هنصيع على بعض ... انت عمرك ما هتديني المعلومه كامله زى دلوقت كدا اخرك تقول صابر و قبل كدا تقول شاهين بتحدفنا و تقعد تتفرج علينا و احنا بنلف حوالين نفسنا
جوزيف يضحك
جوزيف / اولا كدا بخصوص انى بقولك الحقيقه ناقصه فلا مش حقيقي انا بقولك روح لفلان الحقيقه عنده تقرره تدور وراه تحطه تحت عنيك تمسكه تعجنه لحد ما يقر بالحقيقه دى ترجعلك انما انا مهما قولتلك مش هتصدقني ... بس انا بحاول اساعدك انت اللى مش عاوز تساعد نفسك أو مش عارف تساعد نفسك ازاى ... ما علينا بكره تفهم
مختار/ و بخصوص اميره... انا مش عارف هتصدقني و لا لا ... بس انا مستعد اموت و البنت دى ترجع لحضننا تانى ... اميره بنتى زيها زى رحمه بالظبط... اميره كان ممكن حياتها تتغير خالص لو كانت بس
جوزيف / لو كان ابنك غطاها
مختار / ابنى حبها
جوزيف / ابنك سلمهالهم على طبق من دهب اثبت ان كل اللى زرعوه فى دماغها حقيقي هى مجرد جسم مش اكتر هينبسط شويه و يرميها ... ابنك مش ملاك
مختار / و خد عقابه
جوزيف / الكام جلده اللى حسستوا بيهم على ضهره !! امايا الجروح اللى فى ضهرها دى عشان تبيعني و ما باعتنيش استحملت عذاب ما يستحملوش رجاله بشنبات عشان بس واحد طبطب عليها يوم ... امايا كانت كل اللى محتاجاه حد يحتويها و يقولها الدنيا لسه بخير ..  عشان هى ما شافتش فى الدنيا دى خير
مختار/ مش ممكن تمسح كل اللى عملناهولها لمجرد موقف او غلطه من واحد بس
جوزيف / ما كانش اى واحد
مختار / انا و نجاه و هند و العيله كلها قصاد ناصر بس !! طب ازاى و انهى عقل ده
جوزيف / عقل عيله ... هى امايا ايه غير كدا اصلا
مختار/ طب و العمل ... ماشي غلطنا ... نصلح الغلط ده ازاى ... اقسم بالله بتقطع عليها زى ما كنت بتقطع عليك سنين اعمل ايه
جوزيف / ما اعرفش ... صدقني حقيقي ما اعرفش ممكن نصلح اللى حصل ازاى ... بس زى ما قولت هى يا وصلت مصر خلاص يا جايه فى الطريق
مختار/ جايه منين
جوزيف يبتسم و يلف بعنيه فى المكان و يرجع يبص لمختار متابعه
جوزيف / من روسيا يا ميخا و ما تسالش اكتر من كدا عشان ما يهونش عليا ازعلك او اكسفك
مختار / عشت يا ابن الاصول
مختار يطبطب على كتف جوزيف و يسيبه و يقوم
...........................
فى بيت نسمه
نسمه بتنشر الغسيل و تاخد الطبق فاضي و تدخل تلاقي ام عبده واقفه مربعه ايديها
ام عبده / طلعتى البلكونه برده يا ست البنات
نسمه / امال بننشر فين يا أمى
ام عبده / انتى ناسيه انك فى العده يا مراه ابنى
نسمه/ و ايه علاقه العده بالغسيل يا أمى و بعدين مش حضرتك طول عمرك بتتخانقى معايا لما بستخدم المنشر الداخلى
ام عبده / و عمرك ما سمعتى كلامى و لا هو دلوقت كلامى حلى و بعدين يا ستي ما دام بتسمعي كلامى كدا ما تسمعيه للاخر و تتجوزى محمود
نسمه / و لا محمود و لا غيره ... الموضوع خلصان
ام عبده / يا بت هو انا قولتلك تتجوزيه بجد
نسمه / ما دا اسخم ... اللى بتطلبيه ده حرام
ام عبده / حرمت عليكي عشتك دى حياله حته قسيمه تسترك قدام الناس
نسمه / تسترنى!!! لا ما تخافيش عليا انا مستوره اوى بس الدنيا تسيبني فى حالى
ام عبده/ بت انتى صداع غورى انجرى يلا خلصي الاكل العيال جاعوا
نسمه / على النار ياما ما تقلقيش ربعايه بالكتير و هغرف و انادى لحضرتك تاكلى
ام عبده تبصلها من فوق لتحت و تروح اوضتها و ترزع الباب
نسمه / انا حكايه بنت الأصول دى جايه عليا بخسارة و الله بس يلا كلو لله
..........................
فى اوضه عمران
ناصر/ انت صدقت انها مراتك بجد و رايح ترمى نفسك فى النار عشان خاطرها و لا ايه
عمران / ابوس ايدك مش عاوز صداع
ناصر / صداع !! انت لسه شوفت صداع ... ما انت ساذج و ما بتبصش غير تحت رجليك انت عارف انت ورقه الجواز دى ... و لا يا سيدي ورقه الطلاق اللى هتبقي معاها دى اخرتها ايه
عمران/ اهدى يا ناصر عشان مش قادر لك
ناصر / الناس لو عرفت ان مرات عمران الزيني مدمنه هيبتك هتبقي عامله ازاى
عمران / روح قول لهم
ناصر / و انا مالى يا عم اقول و لا ما اقولش انت فاكر ان المشكله فيا انا امها ست بتقضي حياتها على التليفزيون اكيد لما مش هتلاقى جديد تتكلم فيه مش هتلاقى احلى منك انت و بنتها ترند ... انت ناسي ايام خطف نجاه لما لفت بيها على القنوات تعيط و بنتى و نفسيه بنتى و خضه بنتى و رعبه بنتى هى فين من بنتها دلوقت ... عيله واطيه يا راجل
عمران / اخره اللت ده ايه يا ناصر بجد
ناصر / بفكر معاك بصوت عالى
عمران / هى خطيبتك نايمه دلوقت صح
ناصر/ اشمعن
عمران / اقصد تنام كدا و ترتاح انت كمان عشان تفوق لها و لا انت شايف ايه
ناصر / معاك حق ... تصبح على خير
عمران/ و انت الخير كله يا خويا و انت من اهله يا حبيبي
ناصر ينام و عمران يفرد ضهره جنبه يبص للسقف ثوانى و بعدين يقوم يطلع بره ناصر يتخض عمران يقفل الباب وراه ناصر يتنهد و ينام
ناصر / مسكين
...........................
فى مكتب عباده
نجاه/ ما انا مش هتحبس فى اوضتى يعنى يا بابا
عباده/ يا بت دا انا لسه موديكى الجبل بنفسي
نجاه / انا ما بحبش قاعده البيت بتخنق
عباده/ لا حول و لا قوه الا بالله يعني عاوزه ايه دلوقت
نجاه/ ما دام مش هنزل الجيم اروح السوق
عباده/ اشمعن السوق يعني
نجاه / اى حته يابا اهو اضيع وقت
عباده / طب ما تشوفى حاجه مفيده احسن
نجاه / ما انتوا قافلين الجيم ... خلاص خلاص اروح المران اهو مفيد اهو
عباده / اى فرهده و خلاص
نجاه تتقمص عباده يضحك
عباده/ خلاص خلاص كلو الا البوز ده ما اقدرش عليه عنيا يا ستى هاخدك المران ... بس مش هنطول
نجاه / ليه بقى
عباده / لا حول و لا قوه الا بالله ... نجاه انتى مش صغيره على الزن ده انتى ادرى بظروفى و شغلى و مسؤلياتى مش كدا
نجاه / خلاص عندى فكره
عباده / اتفضلى
نجاه / قولهم يمشوا ورايا مش معايا كدا هبقي فى امان و برده مش خلوه و مش محتاجه محرم ايه رايك فى الفكره دى
عباده / طب ما انا عندى فكره احلى
نجاه / انجدنى
عباده / اكتب كتابك على جابر و تروحوا و تيجوا براحتكوا ايه رايك
...........................