((((((( الكبيره ٢ )))))))
#لولو_محمد
الحلقه ٦٤
فاطمه / هى مش خربت خالص خلاص ما تحاوليش تصلحيها اركنيها كدا بعبلها على جنب و خدى نفسك و اهدى خااااااالص لحد ما ربك يفرجها
مهره/ ازاى
فاطمه / انا اصلا ما كانش عاجبنى الواد عمران ده ليكي ما ينفعش ... الست ما ينفعش تتجوز واحد هى غلبته و انتى علمتى عليه فى المسابقه اياها دا انا كنت مسكهاله طالع نازل و هو يبصلى و يضحك ... ما عندوش دم
مهره / دى روح رياضيه
فاطمه / سيبك منه و انا اجوزك سيد سيده
مهره تضحك / حضرتك بتقولى ايه بس
فاطمه / اسمعى منى تكسبي
مهره / انا ما بفكرش اصلا فى موضوع الجواز ده خالص ... اصلا ما ينفعش خالص دلوقت ... زى ما حضرتك قولتى خربت و لازم اركن كل حاجه و اخد نفسي و ابدء من الصفر
فاطمه / حلو اوى و انا هشاركك
مهره / فى ايه ؟!
فاطمه / ما اعرفش شوفى هتعملى ايه و انا معاكى ... بصي انتى شغفك فى الخيل خلاص اشتغليها احنا فى الصعيد العيل بينزل من بطن امه يرضع بقين و ينط على الفرسه يتعلم ازاى يركب و يرقص و ينط و يجرى ... علمى العيال الصغيره فى الاسطبل و طلعى خياله كبار زيك كدا
مهره/ انا ما ينفعش اعيش فى البلد هنا
.......................
فاطمه / صح معاكى حق ... نفتح مدرسه فى مصر ايه رايك
مهره / حضرتك بتقولى ايه بس
فاطمه / بقول انا معاكى اعملى دراسه جدوى للمشروع و انا معاكى و الميزانيه مفتوحه ... هنفتح اكبر مركز الفروسيه فى الوطن العربى ... هكلم الواد جابر يعملنا التصميم بتاعه و يشوف هنحتاج وقت قد ايه و تعرفى بقي مين احسن واحد يظبطلك موضوع الخيل ده ؟! ... الكبير ... عباده ابنى ... كبير البلد بحالها
مهره / ربنا يبارك لحضرتك فيه بس برده ما ينفعش
فاطمه / شكلك مش غاويه شغل و هتتعبيني ... ليكي فى التدريس ؟
مهره / انا عمرى ما اشتغلت اى حاجه ... غير مساعده سكرتيره و الموضوع طلع مقلب فى الاخر اصلا ... حسبي الله و نعم الوكيل فيه
فاطمه / لمسك ؟!
مهره / ابدا و الله هو كان يقدر دا كان صاحب اخويا يعني كان زمانه...
مهره تسكت و تبص الناحيه التانيه
مهره / ما لمسنيش
فاطمه / تعرفى زمان قبل ما اتجوز سي شاكر الله يرحمه... كنت عيله معفنه تحت طوع مرات ابويا الله يحرقها مطرح ما راحت ... كانت ماسحه بيا ارض البيت و بيوت البلد كلها لحد ما افتكرت انها ممكن تبيعني لسي شاكر و تكسب من ورايا ... يقوم عوض ربك ينقلنى كدا و ابقي ام الكبير ... شوفتى العوض
مهره / و نعم بالله
فاطمه / سبيها على الله ... ما تيجي اصبغ لك شعرك و ادلعك كدا و اعملك نيو لوك ما تحلميش بيه عارفه ياسمينا ... اللى كانت بتطلع فى التليفزيون انا اللى معلماها كل ده
مهره تبتسم
فاطمه / تعالى معايا ادلعك
مهره/ معلش مش هينفع انا هسافر دلوقت فتحت الويب سايت و حجزت تذكره و هسافر مصر كمان ساعه
فاطمه / كدا من نفسك !! ما فيش كبير تاخدى الاذن منه
مهره / انا عارفه انكوا عملتوا عشانى اللى ابويا و امى ما عملوهوش بس انا لازم ارجع ليهم لازم اشرح ليهم اللى حصل ... انا مكانى مش هنا
فاطمه تقوم تقف و تروح ناحيه الباب فى صمت و تمشي و مهره باين عليها الحزن
..........................
فى جنينه الموالح
مختار قاعد مع عباده على دكه خشب عمران يدخل
عمران / السلام عليكم
مختار / كنت فين
عمران / انا جيت على طول لما حضرتك كلمتنى
مختار / بعد ما نفذت اللى فى دماغك صح
عمران / هى طلبت منى ده اعمل ايه يعني
مختار / و البيه ما صدق ما فيش اب ترجعله يعني
عباده / اهدى يا مختار هو ما غلطش
مختار / و البنت مش مستقره انها تاخد قرار
عباده / و هو مش مسؤل عنها هى مش مراته فعلا دا كتر خيره انه وحل نفسه فى سكه زى دى ما تحملش عليه
مختار يتنهد
عمران / طب انا ما طلقتش و ماطلت ايه الوضع برده كان ايه اللى هيتغير ساعتها اصلا
مختار/ كانت على الاقل حست اننا متمسكين بيها
عمران / ما احنا متمسكين فعلا بس مش غصب عنها ... و مش بالطريقه دى
مختار / كدا كدا ما عادتش تفرق اللى حصل حصل
عباده/ مالك يا مختار فى ايه
مختار / مش عارف مخنوق شويه كل حاجه ملخبطه كل حاجه ماشيه غلط ... روح جهز حاجتك عشان لو نزلت مصر مع مهره
عباده/ و هو هينزل مع مهره بصفته ايه اصلا و بعدين انت ناسي ناصر و أهله دول جايين بكره هو فى ايه يا مختار ما تركز
مختار / يوووووووه هو انا مكنه ايه هفكر فى كل حاجه لوحدى ما كل واحد عارف الصح من الغلط من الحلال من الحرام انا مش مسؤل عن كل حاجه و كل واحد انا تعبت ... انا ماشي
مختار يجي يمشي عباده يمسكه
عباده / استنى هنا انت هتاخدنى فى دوكه.... امشي يا عمران شوف وراك ايه اعمله اما اتكلم مع ابوك شويه
عمران / تمام يا كبير ... لو طلاقى من مهره مضايق حضرتك انا ممكن اروح اردها ما ليها عده ... انا مش عارف ايه اللى بقوله ده بس
مختار/ غور من وشي
عمران يتنهد
عمران / حاضر
عمران يمشي و مختار مش طايق نفسه
عباده / فى ايه مالك
مختار / مخنوق
عباده/ طب استعيذ بالله من الشيطان الرجيم كدا و اهدى و اتكلم ايه اللى جد خنقك
مختار / فاكر كان فى كام واحد اختفى من البلد ايام حوار ياسمينا و الفيروس و الكلام ده ... كام راجل و كام شاب و كام عيل
عباده يهز راسه
مختار / كل دول ماتوا ... على كلام يونس ... فتحوا لينك عشان يتفرجوا على فيديو ياسمينا بترقص ماتوا ... غلطوا ماتوا غلطه واحده موتتهم كلهم ... يونس بيقولى ان امايا جايه و بتتغذى على الناس دول ... و ان اللى هيغلط هيموت ... تانى ... اللى هيعاكس هيموت اللى هيبص على بنت هيموت ... انت بقي شايف ان فى الانفتاح اللى خلى كل الناس بالأخلاق دى ... هناخد غلوه ؟! ... هنحتاج وقت قد ايه عشان يخلصوا علينا
عباده / و انت ايه بالضبط اللى مضايقك من الموضوع ده
مختار / ابنى جه عليه وقت و ضعف يا عباده .. ابنى بربايتي بمتابعتى باللالى اللى عملناه عشان نربيه صح على دين قبل اى حاجه تانيه غلط عادى جدا
عباده/ كلنا ممكن نغلط و نضعف و نستغفر و نتوب عادى يا مختار احنا مش ملايكه
مختار / طب و اللى بيموت على معصيه و ما يلحقش يتوب وضعه ايه
عباده يتنهد
عباده/ ما فيش فى ايدنا حاجه احنا بنعلم و نوجه و ندعى ربنا بحسن خواتيمنا هو انت عارف اخرتى و لا اخرتك على ايه ... اهو ... نسأل الله الثبات
مختار يهز راسه
عباده / انت خايف من البت و لا عليها
مختار يبتسم و يبص الناحيه التانيه
عباده / انت محتاج تروح لدكتور نفسي انت من كتر ما كنت بتتمنى بنت بقيت اى واحده تقابلك عاوز تجوزها لاى حد من عيالك عشان تبقي بنتك حتى لو زى ما بتعمل مع عمران ... لا البت بتحبه و لا بيحبها و لبستهم فى بعض ... لا و زعلان اوى انهم بيحاولوا يصلحوا الميغه اللى انت اتسببت فيها
مختار / اميره ما عادتش تنفع تكون بنتى ناصر خطب خلاص و بنات الناس مش لعبه
عباده/ نور و لا اميره ... و خد بالك انا قولت اميره مش امايا
مختار / عمرى ما شوفت ناصر سعيد قد ما كان مع اميره
عباده / البركه فى نور بقي تعوضه عن كل اللى فات ده و تسعده و تبقي ام صالحه لأولاده
مختار / ربنا يهديهولها و الله نفسي انجز حوار الجوازه دى بأسرع وقت قبل ما امايا دى تيجي و تخرب كل حاجه
عباده / مش هتيجي دلوقت اطمن
مختار/ يونس بيقول جايه
عباده/ مش هتيجي الا اما البلد تفلت من تحت ايدي ... مستنيالي هفوه
مختار/ طب اصحى ليغفلوك
مختار يضحك عباده يبتسم
مختار / ما برتاحش فى حياتى قد ما بتكلم معاك
عباده/ احلف
مختار / و الله
عباده / تمام اوى
عباده يطلع الموبايل و يتصل بهند مختار يشوف اسم ام شاكر على الموبايل يحاول ياخده منه و عباده يمد ايده و بيضحك
مختار / انت بتعمل ايه .. انت بتعمل ايه ... يا جزمه يا واطى .. و الله العظيم
عباده/ ايوه يا ام شاكر ازيك
مختار / اه يا جزمه
الدكه تتقلب و عباده تحت و مختار نايم فوقيه مثبته مختار يطول الموبايل و يقفل السكه و عباده مش قادر ياخد نفسه من كتر الضحك محمد يدخل
محمد / السلام عليكم ... ايه ده !!!
مختار و عباده يبصوا لمحمد واقف متنح
..................
فى اوضه نجاه
نجاه بتتكلم بعصبيه
نجاه / مش بمزاجك
مهره / انا مش هقدر اقعد هنا اكتر من كدا انتى ليه مش فاهمه ؟
نجاه / انتى اللى مش فاهمه .. مش فاهمه يعني ايه تبقي زينى
مهره / لانى مش زينى فهمتى انا مش منكوا
نجاه / بايدك تبقي مننا
مهره / بانى اتجوز من واحد ما بيحبنيش واحد ممكن يجي عليه يوم و يقولى اتجوزتك شفقه
مهره صوتها يتغير و عنيها تتملى دموع
مهره/ واحد ممكن يجي عليه يوم و يقولى انا رضيت بيكي فى الوقت اللى اهلك رفضوكى فيه
نجاه / مفيش حد ممكن يعمل كدا ..عمران ما يعملش كدا
مهره تعيط نجاه تاخدها فى حضنها
مهره/ انا ادبست فيكي بعد ما اخوكى اللى من دمك باعك
نجاه/ انسي عمران انسيه بلاه خالص ما حدش جاب سيره الجواز اصلا عشان تبقي مننا مجرد انك تعيشي هنا بقيتي مننا
مهره / بانهى صفه ؟! بانهى صفه اعيش هنا ؟ اعيش هنا بمناسبه ايه ؟! انا لازم أواجه مروان لازم اعرف الحقيقه لازم يعرفوا الحقيقه انا مش وحشه و لا شمال
نجاه / قطع لسان اللى يقول عليكي كدا
مهره / كل الناس هتقول هيقولوا مدمنه و متجوزه من ورا اهلها هيقولوا بت صايعه بايظه و عديمه الربايه هيقولوا كان لينا حق نرميها فى الشارع انا ما عملتش حاجه اترمى عليها فى الشارع انا عملت كل حاجه على أمل يقبلونى كل حاجه يمكن يجي يوم ... يوم واحد احس ان ليا اهل
نجاه / احنا مستعدين نشيلك فوق راسنا هنبقى اهلك و ضهرك و سندك
مهره / سامحيني ... انا ما شوفتش منكوا غير كل خير ... زى مروان بالظبط
مهره تخرج من حضن نجاه و تمسح دموعها و نجاه مصدومه
مهره / زى اكرم بالظبط ... انا تعبت ... و الله تعبت
نجاه / انتى شايفه كدا
مهره / انا ما بشوفش ... ما بشوفش حاجه ... عشت عمرى كله لوحدى ... لا أهل و لا اصحاب و لا اى حد ... اترفضت من كل الناس و اى حد كنت بتعلق بيه و اتحامى فيه يا بيسيبني و يمشي يا بيطلع ابن كلب فى الاخر ... عشت عمرى كله خايفه ... بمثل على فكره بمثل انى قويه انى جامده بس انا مش كدا ... انا خايفه ... خايفه من كل حاجه و من كل الناس ... مش قادره اثق فى حد مش قادره احب حد ... العيب مش فيكوا ... فيا انا ... انا من يوم ما جيت هنا و انا خايفه برده خايفه اتعاير... خايفه تزهقوا منى خايفه ترمونى ... خايفه حتى تطلعوا زيهم و انا ما عادليش اى حد يدافع عنى هعمل ايه ... عمره ما كان ليا اصلا حد يدافع عنى بس ... كانوا موجودين بالاسم... لو حصل حاجه هجرى عليهم ... حتى لو انا واثقه مليون فى الميه انهم مش هيفتحولى الباب كانوا موجودين... دلوقت مفيش
نجاه تروح تحاول تحضن مهره مهره تبعد و هى بتمسح دموعها
مهره / انا اسفه انا لازم امشي ... اول ما ربنا يكرمنى بفلوس هرجعلك تمن التذكره ... عن اذنك
نجاه / مش هتمشي ... استنى فرح ناصر و نسافر سوا
مهره / سلام يا نجاه
نجاه تسد الباب بجسمها
نجاه/ قولتلك مش هتمشي ... و هتسمعيني للاخر زى ما سمعتك للاخر ... لو سمحتى
مهره / القطر هيفوتنى
نجاه / يروح فى داهيه ... هبقي اوصلك بس دلوقت اسمعيني
مهره / لازم امشي
نجاه / مش هيحصل... مفيش اى حاجه من اللى فى خيالك دى هتحصل.. ليكي كل الحق تفكرى فى كدا و اكتر و انا نفسي بيجي عليا وقت من كتر الخوازيق بشك فى صوابع ايدي ... فاكره؟؟ فاكره لما جيت أسألك انتى خازوق و لا لا فاكره ؟ انا حاسه بوجعك ... اقسم بالله حاسه و مقدره بكل كلمه بتقوليها ... و ما فيش حاجه هتحصل غير اللى انتى عوزاه و اللى يريحك بس اصبري... هرجع معاكى و ابقي جنبك و اشهد فى صفك ... هبقي جنبك فى اى رد فعل ... مهره احسبيها صح ... انتى اصلا مش فارقه معاهم
مهره / هم فارقين معايا هم اهلى
صمت
مهره / انا ليا اهل ... ليا اب و ام و اخوات ... انا مش يتيمه
نجاه / و ليكي اهل هنا برده .. الف اب و الف ام و الف اخ و اخت ... ليكي هنا اهل ... يوم ما وقعتى جابوا مصر من جنوبها لشمالها عشان يلحقوكى اتحدوا الدنيا و القانون عشانك .. واحد زى عمران اللى بتقولى يعايرك و يبدعلك... ما اترددش ثانيه انه يربط اسمك باسمه العمر كله مقابل انك تبقي فى امان ... يا شيخه دا عمى مختار اتصل يترجى واحد لسه مطرود من بيته عشان يساعده يخرجك
مهره / و ايه المقابل انا ما عنديش حاجه اديهالكوا
نجاه / اديتي و جه دورنا نرد الجميل
مهره / ما تخلينيش اصدق ما تخلينيش اتعشم انا ما عدتش قادره استحمل اى صدمات تانى
نجاه / اللى انتى عوزاه هنعمله انتى الحمد لله احسن كتير و بقيتي زى الفل ... خليكي تحت عنينا لحسن اللى كان بيدسلك القرف ده يظهر تانى و ترجعى يا مولاي كما خلقتني و تعبك و عذابك يروحوا فى الارض اهدى و خليكي هنا لبعد الفرح و اللى انتى عوزاه هيحصل حتى لو هتستضيفيني معاكى فى شقتك ... مش انا لو جيتلك هتسمحيلى ابات معاكى و لا هتستندلى معايا ؟!
مهره / على راسي
الباب يخبط نجاه تروح تفتح هند
هند / العربيه تحت اللى هتوصلك و الرجاله جاهزين
نجاه / مهياش مسافره
مهره / رجاله ايه
نجاه / اللى هيسافروا معاكى يحموكى لحد ما توصلى لباب البيت امال فكرانا هنسيبك تسافري المشوار دا كله بطولك كدا ... افرضي حد ابن حرام عاكسك كدا و لا ضايقك كدا ما يبقاش معاكى ست سبع رجاله كدا يسدوا عين الشمس الله اكبر يمسحوا بكرامته الارض
مهره تبص لهند
مهره / حضرتك زعلانه منى صح ؟
هند/ عمران راح طلقك ... بناء على رغبتك ... بس بالنسبالى حتى لو كانوا يومين على الورق بس ... انتى عندى زيك زي رحمه مرات محمد ابنى زى العروسه الجديده نور زى نجاه ... ما دى بكريتى
هند تاخد نجاه فى حضنها
هند/ ما تزعليش انتى منى انا ما قصدتش اضايقك و لا اجرحك ... انا بس عوزاكى تبقي بنتى بجد
نجاه / ما هى بنتك و اختى و حبيبتنا و كل حاجه عادى هو فى زى مهره
هند / يعني مش هتمشي بجد ؟!
مهره / لحد الفرح و بعد كدا
نجاه / و بعد كدا ربنا يسهل و يقدم اللى فيه الخير
هند / ماشي هبلغهم تحت انك مش مسافره
مهره / حضرتك زعلانه منى ؟
هند / ابدا بالعكس فرحت انك غيرتى رايك و مش هتمشي .. عن اذنكوا
هند تمشي نجاه تقفل الباب
نجاه/ اقولك حاجه و ما تفهمينيش غلط ... انا اضايقت اول لما قالت إن عمران طلقك
مهره / كدا احسن للكل
نجاه / اقولك حاجه تانيه
مهره/ ما تقولى و خلاص يا نجاه
نجاه / ما بالراحه فى ايه ... بصراحه كنت بحسكوا لايقين على بعض اوى
مهره / بطلى عبط
نجاه / بطلت ... اصلا هو الخسران هو هيلاقي قمر كدا فين
مهره / فى كل حته و احلى و احسن مليون مره انتى بس اللى مش واخده بالك
نجاه / دا على اساس ايه بقي ان شاء الله
مهره / على اساس ان دى الحقيقه .. نجاه بصيلى كدا بجد ... مين ممكن يربط نفسه بواحده زيي
نجاه / ايه واحده زيك دى انتى الف من يتمناكى انتى ست الكل
مهره / تسلمى على زوقك بس انا مش هجامل و اضحك على نفسي انا واحده
نجاه / زى الفل ما فيكيش غلطه
مهره / تحبى اعدهملك ... لا أهل و لا فلوس و لا سمعه
نجاه / بطله رياضيه و بنت ناس و محترمه و متدينه و جدعه و جميله و زى القمر و اى حد بيفهم هيشوف ده
مهره تبتسم بسخريه
مهره / ماشي
نجاه / ما توقفيش حياتك عشان حاجات ما تستاهلش صدقيني انتى جوهره
مهره / فى الوحل
نجاه / تصدقي انك رخمه و ما فيش فايده فيكي
مهره / كبرى مخك هروح اغير الهدوم دى قبل ما اعرق فيها
نجاه / فى اختراع اسمه غساله يا معفنه
مهره تبص لنجاه و الاتنين يضحكوا نجاه تروح تحضن مهره
نجاه / بحبك يا بت ... و الله العظيم بحبك
........................
فى السيرك الروسي
الجمهور كامل العدد و الكل بيسقف و بيصور و فى عرض عربيات و استعراض لمهارات السواقه الشبابيك اللى ورا فى العربيات تتفتح و يطلع من كل شباك بنت و العربيات بتتحرك بسرعه البنات يطلعوا فوق العربيات و يعملوا اكروبات و يبدلوا العربيات و الناس بتصوت و تسقف العربيات تدخل و يطلع مكانها بنات كتير ماسكين سيوف و بيعملوا استعراض و فجاه السيوف تولع نار و يبدأو يبارزوا بعض و الناس بتسقف يسمعوا اصوت بنات يعملوا صوت طرزان يبصوا لفوق يلاقوا بنات بتطير و تنط تمسك حبال مدلدله من السقف و بيطيروا من مكان لمكان ما يبقوش عارفين يبصوا يمين و لا شمال و فجاه بنت منهم لابسه ماسك تنط وسط الناس تنزل و تتمشي بين الناس لحد ما توصل لبنت صغيره تطلع من جيبها شيكولاته و تديهالها و فجاه بنت تانيه من على الحبال تشدها تخطفها من وسط الجمهور و كل البنات يتحركوا ناحيه السيرك و ينطوا فى النص يحيوا الناس و الكل بيسقف و ما حدش مصدق اللى شايفه
........................
فى شقه جابر
احلام تدخل و تقفل الباب تروح الاوضه الصغيره تلاقي جابر نايم تتنهد و تيجي تغطيه يتفزغ
احلام / اسفه اسفه حقك عليا و الله صعبت عليا قولت اغطيك بس حقك عليا
جابر / هى الساعه كام ... يااااه دا الحمد لله انك صحتيني انا نومى باظ كدا ... و الله العظيم قولت بس افرد ضهرى خمس دقايق مش عارف ازاى نمت بالشكل ده
احلام / طبيعي ما انت ما بترتاحش
جابر / و مين فينا بس مرتاح ما الكل اللهم بارك عامل اللى عليه و زياده اهو
احلام/ اخبار الخواجه ايه
جابر يستغرب السؤال
جابر / مش فاهم ؟ بتسالي ليه ؟
احلام / بسأل عادى ... سامعه ان كارم لازقله و مبهور بيه و سامعه كمان انه عامل مشاكل فى البلد و سامعه انه طلب يرجع يدرب نجاه و الكبير وافق
جابر / و نجاه رفضت
احلام / و الكبير وافق
جابر / انتى عاوزه تقولى ايه يا احلام بالله عليكي ما فايق
احلام / طب ما تفوق يمكن تلحق عمرك اللى بيضيع ده
جابر يضحك و يبص الناحيه التانيه و يرجع يبص لها
جابر / انتى عارفه لو اتجوزت غيرى ... انا برده مش هتجوز ... و مش هبطل احبها برده ... هسكت و مش هتكلم و هقول بالكدب انى نسيتها و برده مش هنساها
احلام / ليه فيها ايه يعني فيها ايه انت ازاى كدا ما البنات على قفا من يشيل و احلى و أرق منها مليون مره و لو يا سيدي كيفك جاى على المسترجله دى هتلاقي زيها مليون واحده برده بس فكك منها بقي
جابر / هى نجاه واحده بس يا لولو
احلام / ما تقوليش لولو و ما تدلعنيش و ما تهزرش معايا و ما تستفزنيش انت ايه يا اخى ايه مفيش دم خالص كدا مفيش كرامه دا انا دمى اتحرقلك سلف انت ازاى كدا بجد ... انت عارف انت مين ابن مين ... انت عارف انت هتبقي ايه ... انت كبير الزنايته المستقبلى
جابر / ربنا يديله طوله العمر
احلام / هتدير العيله و البلد ازاى و انت نجاه بتوديك بكلمه و تجيبك بحرف فوق لنفسك بقي انا تعبت
جابر / خلصتى
احلام / خلصت
جابر / هاتى مفتاح البيت
احلام / عشانها !!
جابر / هاتى المفتاح يا احلام و روحى ارتاحى كتر الف خيرك انا يا ستى مستغنى عن اى كان اللى كنتى جايه تعمليهولى و اللى كنتى مشكوره بتعمليهولى انا شاكر جدا لافضالك تقدرى ترتاحى بعد كدا انا هعمله
احلام / دا آخر كلام عندك؟!
جابر / احلام !! المفتاح و اتفضلى روحى شوفى وراكى ايه و مش هكررها ... اقولك ... انا هغير الكالون خليلك المفتاح
احلام تحدف جابر بالمفتاح يفاديه و يبصلها بغضب مكتوم
احلام / بناقص
احلام تمشي و تهبد الباب تبص وراها تلاقي جوزيف قاعد على كبوت عربيه كارم و بيضحك اول ما يسمعوا هبده الباب الاتنين يبصولها
احلام / كارم ... دقيقه من فضلك
كارم يروح لها
احلام / هو بيعمل ايه هنا
كارم/ الكبير اتصل و قال نسبقه على هنا
احلام / يبقي يدخل المضيفه و يتقفل عليه انا مش مجبره اشوفه ... دا بيتي انا
كارم / تمام حاضر
احلام تدخل و مناخيرها مرفوعه كارم يروح ناحيه جوزيف
كارم / تعال ندخل المضيفه بلاش وقفه الجنينه دى تعال
كارم و جوزيف يدخلوا المضيفه و يقفلوا الباب
............................
فى سرايا الجوارحه
سماح / دا الفيديوهات مغرقه الفايس و اليوتيوب كل يوم بعرض شكل بفيديوهات شكل و الناس ايه و التعليقات ايه دا فى ناس ندمانين انهم حجزوا عرض يوم واحد بس مش كل العروض و بيقطعوا روحهم على تذاكر انتوا عرفتوا سعر التذكرة وصلت كام فى السوق السوده
ست ١ / ايوه سمعت امبارح الحلقه بتاعه الاستاذه منى فهمى بتتكلم فى موضوع سعر التذكره ده ... دا كانت مخصصه حلقه كامله عن السيرك و اللى بيحصل فيه
ست ٢ / نازل على صفحتهم ايفنت فى اخر يوم ليهم فى القاهره قبل ما يروحوا اسكندريه... بيقولوا هيمشوا فى الشوارع يقدموا عروض لايف
سماح / فى الشوارع ازاى دا الناس تاكلهم اكل دول كلهم مزز
الكل يضحك
بنت ١ / اكيد واخدين تصاريح و هيبقي فى جيش و شرطه و امن مركزى
بنت ٢ / زى ما حصل فى حوار الأهرامات ده
سماح / مش كان زمانا دلوقت بنتفرج عليهم و ننبسط احنا كمان و لا ايه رايك يا ماجده
ماجده/ سيرك ايه اللى ادفعله فلوس يا اختى منك ليها ما احنا عايشين فيه اهو ... ربنا يبارك فيهم قرود بتتنطت فى كل حته حوالينا اهو
سماح / انتى اللى تاعبه نفسك ما كل واحده تقعد بعيالها بدل الدلع المرء بتاع مراتات عيالك ده واحده قال ايه فى الشغل و التانيه قال ايه تعبانه ... حريم اخر زمن
ماجده / ما دام رجالتهم مبسوطين انا مبسوطه .. و الشهاده لله كل واحده قايده لجوزها صوابعها العشره شمع ربنا يهدى سرهم
سماح / بكيفك مش انتى مرتاحه كدا بكيفك
ماجده / الف حمد و شكر ليك يا رب ربنا يديمها نعمه و يحفظها من الزوال
......................
فى المضيفه
عباده / العيال مبسوطين منك اوى فى التمرينه اياها
جوزيف / هم كويسين و يجي منهم و عاوزين يتعلموا اكتر
كارم / يونس اصلا كان ليه اسلوبه معاهم بيلاعبهم و مخلى الموضوع ممتع ما شاء الله عليه
مختار / لو فاضي نكونلك فريق و نحددلك مواعيد
جوزيف/ حيلك حيلك انا مش جاى بلدكوا ادور على شغل ... بس لو هتدفعوا كويس ممكن اغير رأيي
الكل يضحك امين يدخل
امين / السلام عليكم ... بعد اذنك يا خالى ثوانى
مختار يهز راسه و يطلع مع امين جابر يدخل و باين انه مضايق جوزيف ياخد باله
جابر / السلام عليكم
جوزيف / عاش من شافك فينك كدا
جابر / موجود اؤمر ... ايه الاخبار فى جديد ؟
عباده يوطى على جابر
عباده / هو فى ايه مالك كدا انت و اخوك
جابر يوشوش عباده
جابر / احلام
عباده يبص على جوزيف متابعهم مختار يدخل
مختار / تعال يا يونس عاوزك فى مشوار بعد اذنك
جوزيف يهز راسه و يقوم
كارم / ينفع اجى معاكوا
مختار يهز راسه و ياخدهم الاتنين و يمشوا عباده يقوم يروح السرايا و جابر وراه
امين / ما قولت خالى هياخده و يمشي اكبرى بقي
عباده/ فى ايه يا احلام
احلام / الجدع ده ما يدخلش هنا تانى بدل اقسم بالله اولع لكم فيه
عباده/ ما تولعى فيه هو كان من باقي اهلى و بعدين هنا دى تقصدى بيها ايه السرايا ... هو يونس دخل
احلام/ اسمه جوزيف مش يونس
نجاه / اسمه يونس ... يونس رشيد السبع يا احلام
احلام / انتى تخرسي خالص
ام امين / انتى ايه مش عامله حساب لحد مالك جرالك ايه
عباده / تعالى يا احلام عاوزك ... تعال يا امين ... لوحدنا
عباده يروح مع امين و احلام المكتب و يقفلوا الباب
ام امين / حقك عليا يا نجاه انا و الله ما عارفه مالها ... بقالها فتره مش مظبوطه خالص و راكبها مليون عفريت
نجاه / انا ما بزعلش منها اصلا ... عن اذنكوا
جابر / نجاه ممكن ثانيه فى الجنينه الورانيه
نجاه تهز راسها و تروح مع جابر و الكل يبص لبعضه بحرج
....................
فى عربيه مختار
مختار سايق و هو ساكت
كارم / هو احنا هنروح فين
جوزيف/ يا هنقعد على النيل يا هنروح الشقه عندى
مختار يبص لجوزيف باصصله و مبتسم مختار يبتسم
جوزيف / احلام مضايقه من وجودى فى السرايا صح
مختار يبص قدامه و يكمل سواقه
جوزيف / انا مش عارف احدد السبب بالظبط بدر و لا جابر... الاتنين الاتنين
مختار / انت مستفز اكتر من ابوك
جوزيف / هى ليه احلام ما طلعتش زى نجاه ؟! اخواتها منعوها و لا هى اللى ما رضيتش اصلهم تقريبا نفس الشخصيه المتهوره اللى قلبها ممشيها و راكنه عقلها خالص
مختار / كل الحريم كدا اصلا هو بس عباده اللى شجع نجاه بزياده و بيندم دلوقت
جوزيف / غلطان لو ندمان على شخصيه نجاه دلوقت غلطان... بس لا برده مش كل الحريم كدا فى بنات كتير جدا بتموت فى جلدها
كارم / اكيد مش زيني و لا اتربت فى بيت الزيني
مختار / دا ياسمينا اللى لا بتعرف تشيل سلاح و لا بتعرف تدافع عن نفسها كدا ما شوفتش انت لما واحد ابن حرام نط فى اوضتها وقفتله سبع لحد ما نجاه ادخلت و خلصت الليله لا خافت و لا كشت و لا الهوى
جوزيف / حوار ياسمينا دى
مختار / غلبانه ... كلهم غلابه ... كلنا غلابه... حتى انت
جوزيف يمصمص شفايفه كارم يضحك
جوزيف/ هى نجاه زعلانه منى ؟
كارم يبطل ضحك
مختار / و هى هتزعل منك ليه ؟! انت عملت حاجه تزعل ؟!
جوزيف / امال بتتجنبنى ليه ؟ انتوا مانعينها ؟
كارم / و انت فارق معاك فى ايه ؟
جوزيف / فضول مش اكتر ... بحاول افهم
كارم / اعتقد كدا احسن للكل خليها ترتاح و تبطل تنطيط بقي تعبت و تعبنا و على قولك الكل حاطتها فى دماغه و الموضوع زاد اوى عن حده
جوزيف / تمام
مختار/ ما تفكرش فى حد ... كدا كدا نجاه دماغها فى حته تانيه و بعدين كمان مهره شاغله كل وقتها ربنا يهديهم ... وصلنا .. عدى على السوبرماركت بقي هات حاجه البسبوسه عشان تعملهالنا لحد ما الكبير يخلص اللى فى ايده و يجي نشوف كان عاوزك ليه
جوزيف / دا انا هبهرك
مختار/ حبيبي
.......................
فى المكتب
عباده / بيتك انتى و ما نجرؤش نختار بينك و بين اى حد يا ستى انتى لو قولتى يا انا يا الكبير فى السرايا هطلع انام فى الطل و انتى تباتى فى فرشتك ما حدش يقدر يتكلم بس فى اسلوب يا احلام
احلام / انا جربت كل الطرق و برده بتفرضوه على حياتى انا مش قادره اشوفه
عباده / و لا انا
احلام / اه صح
امين / احلام !!
عباده/ اقسم بالله و لا انا قادر ابص له
احلام / حضرتك وافقت انه يرجع يمرن نجاه
عباده / و نجاه رفضت
احلام / بس حضرتك وافقت
امين / ما تتكلمى عدل يا بت هو فى ايه مالك
احلام / انا مش موفقه على اللى بيحصل كل حاجه غلط كل حاجه ملخبطه كل حاجه غلط
عباده / و ايه الصح يا احلام
احلام / ما اعرفش
امين / لا حول و لا قوه الا بالله
عباده/ طب انتى مضايقه من انى وافقت ان يونس
احلام / جوزيف و هيفضل طول عمره جوزيف جوزيف و بس
صمت
عباده/ يعني مفيش امل من التوبه
امين / هو بكيفها دى حاجه ربنا وحده اللى يعلمها
عباده / ثوانى بس يا امين... قوليلى يا احلام... مفيش حد بيتوب ابدا
احلام / ديل الكلب عمره ما يتعدل ابدا
عباده / بس ربنا قادر يهدى اى حد قادر ينكسك انتى شخصيا و يخليكي تتفتنى باى حاجه
احلام / انا عمرى ما اذيت حد و هو اذانى
احلام تعيط
عباده / و اذانى و ازى اخواتك و اهلك كلهم
احلام / امال ليه سامحتوه ليه سايبينه رايح جاى عادى و لا كانه قاتل و مجرم و حقير
عباده / عشان بيقول تاب
احلام / بيكدب
عباده / اتصل بيهم خليهم يجيبوه
احلام / لو جه هنا هقتله
عباده يديها المسدس احلام ترتبك و تحاول تلم نفسها و تاخد منه المسدس
عباده / اقتليه
..............................
أنت تقرأ
الكبيره ٢ بقلم / لولو_محمد
Humorالحرب لسه مستمره و الحقيقه مسيرها فى يوم تظهر النور و كل واحد لازم يختار طريقه
