الكبيره ٢ بقلم / لولو_محمد

الحلقه ١٣٩

((((((( الكبيره ٢)))))))
#لولو_محمد
الحلقه ١٣٩
فى البلد
الشاب بيجرى و هو بيصرخ
الشاب / يا أهل البلد اللحقوا يا أهل البلد صابر القط قتل دياب الجارحى يا أهل البلد ... يا اهل البلد صابر القط ضرب دياب الجارحى بالنار عند المسقى يا أهل البلد
أهل البلد كلهم يجروا ناحيه المسقي و الشاب لسه بيجرى و يصرخ
الشاب / يا أهل البلد دياب الجارحى اتقتل يا أهل البلد و صابر القط هو اللى طخه يا أهل البلد
........................
عند المسقى
صابر يرمى مسدسه و يجرى على دياب بيتالم و يشق قميصه
صابر / قولى انك ذكى قولى انك لابس
صابر يشوف القميص الواقى
دياب / انت ضربتني بالنار
صابر يقعد و يهدى
دياب / ليه ؟
صابر يقوم يجيب تليفونه و يحاول يتصل بشاكر الناس تدخل و تحدف صابر بالطوب و غفير يرفع سلاحه
الغفير / سلم نفسك يا سي صابر ما تجبرناش ناذيك
دياب يقوم و يحوش الناس
دياب / بس بس بس
دياب / فى ايه يا صابر
عربيات امايا تعدى كلها ناحيه الجبل و صوت انفجارات فى الجبل الكل عينه على الجبل الناس تجرى ناحيه الجبل
دياب / صابر ايه اللى بيحصل
صابر / خطفوا نسمه فى مصر
دياب يطلع موبايله
دياب / حد يطمنى على الوضع فى مصر ... ما فيش اى حد خرج من المستشفي و كل المداخل و المخارج متراقبه و عليها حراسه مشدده ... ابعت فريق جوه يطلع نسمه و اول ما تبقي معاكوا حد يكلمنى يطمنى
دياب يلعب فى موبايله
صابر / شاكر ما بيردش شاكر ما بيردش كان اقرب واحد ليها
دياب / شاكر فى المستشفي هو و ناصر و فى رجاله كتير تبعنا هناك ما تقلقش
صابر / انا كدا كدا راجع الجبل و لو ما نزلتش منه امانه عليك ما تسيب دكر من ولاد سليم المغازى على رجله سامعني
دياب / اصبر ثوانى
صابر / لقيت حاجه و لا ايه ؟
دياب / ثوانى
تليفون دياب يرن منصور
دياب / ايوه يا منصور
منصور / انت كويس
دياب / انا كويس ابعت درونز استطلاع الجبل
منصور / حصل و فى معجنه هناك انا مش فاهم حاجه مين الناس دى و فين رجاله صابر
دياب / معايا و راجعين الجبل اهو
منصور / لا طبعا بقولك معجنه ... ثوانى ابعت لك فيديو صغير
دياب / صابر ... تعال
صابر يروح يبص فى موبايل دياب كلاب بتقطع رجاله ولاد سليم و هم فاتحين النار و درونز طايره تضرب عليهم و تنفجر فيهم
دياب / اصبر اما واحد فيهم يخلص على التانى و نبقي نشوف هنخلص منه ازاى
صابر / شاكر ما بيردش انا لو مش هطلع الجبل هنزل مصر
دياب / دى فكره مش وحشه و انا هطلع على عويس أبلغه باللى حصل و اخد منه العيال
صابر / تمام
كل واحد يروح يركب عربيته و يمشي فى اتجاه
…………………………
فى الشركه
جوزيف يدخل الأمن يوقفه
جوزيف / ابعد عن طريقي
الأمن/ انا عارف حضرتك مين و كل حاجه بس ما فيش دخول الا بتصريح او تصبر ثوانى أبلغ الباشمهندس منصور يسمح لى ادخلك غير كدا مش هقدر
جوزيف / صبرت
الأمن يبص لزميله بيتكلم فى التليفون
زميله / الدور السابع اطلع معاه يا حمدى وصله
جوزيف و حمدى يروحوا يركبوا الاسانسير اللى يقف فى الدور التالت و منصور يركب
منصور / ايه اللى بيحصل
جوزيف / امايا كانت بتعمل حاجه  و فى حد تانى دخل فى الخط و الدنيا خرجت عن السيطره
منصور / و كانت خطتها ايه بقي ان شاء الله
جوزيف / تجوز نسمه لفيراس
منصور / افندم ؟! انتوا فاكرين انكوا بكدا ممكن توصلوا لايه مثلا ايه اسوء حاجه ممكن تحصل لما نسمه تتجوز
جوزيف / ما تتكلمش بالجمع ان بره القصه دى انا جاى اساعد
الاسانسير يقف و ينزلوا منه هم الاتنين ويروحوا ناحيه مكتب
منصور / تساعد مين بالظبط ؟! دا انت لسه جاى من عندها
جوزيف / و حددت مكان اللى دخل على الخطه الطرف التالت اللى حط ايده على الجبل
منصور / ولاد سليم الغازى عداوه قديمه و هنسيطر عليها
جوزيف / احلف كدا ؟! ناس مش عارفين يرفعوا عينهم فيكوا من اكتر من خمسه و عشرين سنه فجاه بقي معاهم كل الامكانيات دى ... انت هتفضل ساذج لحد امتى ... دول مجرد وجهه مش اكتر اللى عمل كدا حد من المجلس
منصور / يعني الفيديو ده المجلس بيتخانق مع المجلس على الجبل
منصور يورى جوزيف الفيديو
جوزيف / انا ما عنديش وقت اشرح لك بديهيات انا محتاج اتواصل مع الرجاله اللى فى المستشفي عشان اقولهم يعملوا ايه بالظبط
منصور / اتفضل
منصور يفتح الباب لجوزيف يدخل اوضه فيها مكتب عليه جهاز كومبيوتر و ستاره
منصور / استناني ثوانى و هجيلك
جوزيف يدخل الاوضه منصور يشغل النور و جوزيف يحط شنطته على المكتب و يطلع اللاب منصور يقفل الباب بالمفتاح جوزيف يحاول يفتح الباب مقفول
جوزيف / انت بتهرج يا منصور ؟!
منصور يركب الاسانسير و جوزيف بيخبط على الباب
...........................
فى شقه عويس
عويس / انت اتجننت بتقول ايه
دياب / ما بقولش ما بقولش يا راجل يا عره يا رامى لحمك يا نجس ... بنتك فين يا واطى مراتك فين يا دون يا عديم النخوه يا زباله 
عويس / ما فيهاش حكومه و لا ايه اقسم بالله ما هعدى قله ادبك عليا دى بالساهل يا دياب يا ابن
دياب/ لو دكر كمل و خلينا نشوف ابن عباس الجارحى هيعمل فيك ايه
عويس/ اطلع بره بيتي حالا
دياب/ هطلع بس هطلع على بيت ابنك اللى فيه العيال و هناك هيبقي انا قصاد ابنك البغل اللى سايب امه و اخته ما هواش عارف ايه اللى جرالهم و لا فارق معاه حاجه و يا يسلمنى العيال بكيفه يا ههينه قدام اهل بيته اختار تتصل بيه تخليه يجيبهم هنا و لا اروح اجيبهم منه بنفسي
عباده يدخل
عباده / ما لوش داعى يا دياب احنا كدا كدا جبنا العيال من بيت خالهم و قاعدين فى العربيه بره مع عمك مختار
عويس / يمين بالله لعمل فيكوا بدل المحضر الف و مش بس كدا
عباده يضربه بوكس عويس يقع فى الارض فاقد الوعى
عباده / خلى حد ينقله فى المخزن القديم و حط عليه حراسه تقيله
دياب / بالنسبه للجبل
عباده/ الاهم فالمهم ارجع الشركه و ساعد يونس يرجع شاكر و نسمه الاتنين مش قادرين نوصل ليهم
...........................
فى المستشفي
شاكر نايم على حماله و مربوط ايديه و رجليه وفى راجل بيشد الاربطه و يجيب جهاز كشف معادن و يعديه على جسم شاكر ما يزمرش
الراجل / تمام انقلوه مع البت فى العربيه خلونا نتحرك
الرجاله تشيل شاكر يدخلوه عربيه نص نقل و يفتحوا صندوق يحطوه جواه و يقفلوا الصندوق و يحطوا عليه صناديق تانيه و يقفلوا العربيه و يخبط على باب العربيه العربيه تتحرك ناحيه المخرج الأمن يفتح له الطريق يعدى و يمشي وسط العربيات بنت تعدى الطريق و رجلها تخونها و تقع قدام العربيه السواق يفرمل البنت تسند على العربيه و تقوم و الناس تتلم عليها
راجل ١ / مش تفتح
السواق / هى اللى ظهرت فجاه اعمل لها ايه يعني
البنت / حصل خير انا تمام حقك عليا انا فعلا الغلطانه ... عن اذنكوا
البنت تمشي
السواق / اذا كانت البنت نفسها مشيت ممكن كل واحد يشوف حاله بقي كفايانا عطله
الناس تتفرق و الراجل يكمل سواقه
...............
فى الشركه
جوزيف يروح يفتح الستاره يلاقي مفيش شباك يكتم فى نفسه و يسحب كوينه متفجره من توكه الحزام و يقلب الترابيزه يوقع الكومبيوتر اللى عليها و يروح وراها و يحدف الكوينه على الباب تنفجر يروح يعدى و ينزل على السلم
جوزيف / بتحبس مين بروح امك دا انتوا اللى يفكر يساعدكوا يستاهل ضرب الجزمه
مهندس يقابل جوزيف على السلم يبصوا لبعض
المهندس / هو انت ؟!!
جوزيف / انا ... ممكن انزل
المهندس / اتفضل
جوزيف يعدى المهندس و هو بيضرب كف على كف يروح ناحيه باب الشركه و يقف يبص لراجل الأمن جوزيف عمال يطرقع فى صوابع ايديه و يخبط برجله على الارض و هو بيحاول يحتوى غضبه يلف و يروح يدوس على زرار الاسانسير كتير جدا الاسانسير يتفتح و جواه منصور
جوزيف / اقسم بالله لولا زعل مختار لو ابنه جراله حاجه لكان بقالى معاك تصرف تانى اوعى
جوزيف يركب الباب يجي يقفل منصور يحط رجله الباب يفتح تانى جوزيف يبص له باصص قدامه و ساكت
جوزيف / بجد ؟! و بترجعوا تقولوا انا اللى وحش فى الاخر
دياب يدخل الاسانسير منصور يدوس على الزرار
دياب / اسف على التأخير ... عندك اخبار ؟
جوزيف / اسأل اخوك
دياب يبص لمنصور باصص قدامه و مش بيدي اى رياكشن الاسانسير يتفتح و يدخلوا التلاته لحد ما يوصلوا لمكتب دياب وفاء قاعده فيه
وفاء / الرجاله قلبوا المستشفي و لقوا ناصر متخدر بس مفيش اثر لا لشاكر و لا نسمه
جوزيف / حاولى تجيبي كاميرات المراقبه عند المداخل و المخارج و اعملى جرد بنمر العربيات و وزعيهم على الناس اللى هنا و حددى خط سير كل عربيه فيهم
وفاء / دا ابره فى كوم قش
جوزيف / حرفيا
جوزيف يفتح اللاب بتاعه و يوصله بالسيستم و يبص لدياب منصور و وفاء يبصوا لدياب دياب يسمح له بالدخول جوزيف يبدأ يشتغل وفاء و منصور يبصوا لبعض و كل واحد يروح يقعد على جهاز يشتغل
...............................
فى مخزن كبير
العربيه البوكس تدخل و ينزل منها السواق رجاله تفتح العربيه
راجل ١ / فى اى مشاكل قابلتك فى الطريق ؟
السواق / ابدا الاشارات كلها كانت سالكه و الطرق تقريبا فاضيه
راجل ١ / نزلوا الصناديق و انقلوا الحتتين فى العربيه التانيه
الرجاله تنزل الصناديق لحد ما توصل لصندوق شاكر و نسمه تحطهم فى جنب لوحدهم الرجاله تفتح الصندوقين راجل منهم يروح يجس النبض و يتصل بالتليفون
الراجل/ ايوه يا باشا معاك النونو حبيت بس اطمنك ان كلو تمام و تقدر تتحرك ... تمام يا باشا ... لا ما تقلقش الرجاله صاحيه و جاهزين لاى وضع ما يكونش عندك فكر ... تمام يا باشا
الراجل يروح يصور صوره لشاكر و صوره لنسمه و يبعتهم
الراجل / دخلوا الصندوقين دول العربيه تانى بس ما تغطوهمش
الرجاله تشيل الصندوقين و تطلعهم العربيه تانى
.......................
فى السيرك
بنت / احنا سيطرنا على الجبل و قدرنا نحافظ على اتنين رجاله من اللى كانوا هناك
امايا / اتمنى ان الاتنين دول يكون عندهم معلومات تنفعنا
البنت / حتى اللى ماتوا جمعنا بطايقهم و جارى التعامل
امايا / بطايقهم ؟! هو فى حد بيعمل حاجه زى دى بيروح بالبطاقة؟!! انتى متاكده ؟!
البنت / ايوه طبعا اللى هاجموا الجبل من كفر عطوان عيله سليم الغازى كان فى الأصل عايش فى الجبل من سنين مع وهدان القط و بعدين حصل بينهم خلاف و حرب كبيره ادخل فيها عيله  الزيني و وقفوا مع وهدان القط و سليم احتكم لشاهين الجارحى كبير الجوارحه وقتها اللى كان شايف ان وهدان مكبر الموضوع و الدنيا كان ممكن تتلم بس وهدان بقي نشف دماغه فشاهين منع التجار يوردوا ليه اى سلاح لحد ما ناصر الزيني كبير الزنايته وقتها ادخل و صالحهم على بعض و بكدا خرج سليم الغازى من الجبل و البلد بحالها و كل ما كان يحاول يرجع كان وهدان يقف له لحد ما مات و عياله عملوا قاعده و خدوا مبلغ من صابر بعد ما ابوه مات و مسك مكانه اشتروا بيه اراضي فى البلد اللى عاشوا فيها و نسيوا موضوع الجبل خالص
امايا / عشان كدا بحب اشتغل مع البنات تجيب لك قرار قرار الحكايه فى ثوانى و بادق التفاصيل
البنت/ تلميذتك
امايا / انا دلوقت عاوزه اعرف ايه اللى فتح الموضوع تانى و ازاى قدروا يخلوا صابر يسحب رجالته من الجبل و هل ليهم علاقه باللى حصل فى مصر و لا لا
البنت / شغاله على الموضوع
امايا / ما عنديش وقت و شوفى لو فى جديد فى مصر مش بحب اتوتر كتير
البنت/ شغالين على
امايا / لحظه لحظه مين ده ؟!
امايا تبص على شاشه تشوف مختار
امايا / مش وقته خالص
البنت / تحبى نمشيه ؟!
امايا / بتهزرى اكيد ... دا بابا مختار فى بنت محترمه بترفض تقابل باباها ؟!
البنت تضحك
امايا / ادعيلي عشان اكيد هيهزقنى
امايا تطلع بره
امايا / اهلا اهلا بابا مختار
مختار / اعتقد كدا آنتى اخليني بالاتفاق
امايا / انا ؟! ابدا
مختار/ قولتى هتعيشي بالأدب لو نسمه جرا لها حاجه
امايا / مش انا اللى خطفت نسمه بالعكس انا بحاول ارجعها
مختار / ما تصيعيش عليا يا اميره انتى قولتى ليونس كل حاجه
امايا / طب ممكن تسمع منى انا اللى حصل طب و الله العظيم و الله العظيم لا انا اللى هاجمت الجبل و لا انا اللى خطفت نسمه و شاكر بالعكس انا شغاله بكل طاقتى أصلح اللى حصل و انا طلبت من جو بس انه يساعدني الاقى اللى عمل كدا و فعلا شغاله على الموضوع و هجيبه انا عمرى ما اقدر ازعلك ابدا
مختار / و حياه امك
امايا / الله يرحمها بقي انا هكدب ليه هخاف منك مثلا؟! انا اه بخاف على زعلك و بحبك لكن انت مهما عملت مش هتقدر تأذيني بالعكس انا اللى اقدر اعورك و  اعورك جامد اوى فى ناس بتحبهم
مختار / انتى بتهدديني؟!
امايا / ابدا و الله انا بس بثبت لك قد ايه حضرتك غالى عندى
مختار / مين اللى هاجم الجبل مش انتى و رجالتك ... و لا كلابك و بناتك و لا انا مش عارف لك حال
امايا / توضيح بس مش انا اللى هاجمت الجبل انا بس حافظت عليه من الناس اللي صابر سابه ليهم بمزاجه و من غير نقطه دم او حتى عرق واحده
مختار / اميره انا بحاول اساعدك بحاول اديكي نفس الفرصه اللى اديتها ليونس
امايا / المفروض انى اتأثر بالكلام ده صح ؟ ... انا ما عملتش حاجه بالعكس انا بحاول أصلح الوضع و احافظ على التوازن فى البلد انا عارفه اهميه الجبل انا واحد من أسباب وجودى هنا انى اضمن ان نجاه بخير
مختار / و المفروض ان انا اتأثر بالكلام ده صح ؟!
امايا / اكيد لا ... بس انا بقول الحقيقه انت مش متخيل انا اقدر اعمل ايه و لا ائذيكوا اذاى بس انا يهمنى اننا نتفق صدقنى
البنت تطلع من الاوضه تشاور لامايا
امايا / كان نفسي نكمل حوارنا الشيق بس بحاول ارجع لك ابنك
مختار / و نسمه ؟!
امايا / لو فى جديد هبلغك... نصيحه ... خلى عينك على سماح ...عن اذنك
امايا تسيب مختار و تدخل مع البنت الاوضه و تقفل الباب الراجل يرجع يقف جنب مختار و يشاور له على الباب
.....................
فى المخزن
بنت تدخل من الشباك لابسه نفس بدله نجاه السوده و فى ثوانى تكون موقعه كل الرجاله و مخلياهم فاقدين الوعى تركب العربيه تشوف شاكر و نسمه متخدرين تنزل و تقفل العربيه و تروح ناحيه الكبوت و تشيل لزقه صغيره جدا مكان ما البنت اللى وقعت قصاد الجراج سندت تحطها فى علبه بمنتهى الحذر و تركب مكان السواق و تسوق باقصى سرعه تكسر الباب الرجاله يضربوا على العربيه نار تطير بيها ما يلحقوهاش
………………………
فى الشركه
مختار يدخل بيجرى
مختار / يعني ايه الكلام ده
جوزيف /  مجرد واجهه مش اكتر زيه زى ولاد اسمه ايه المغازى ده
منصور / سليم الغازى
جوزيف / هو ده
مختار / بس انت قولت ان حاتم مات باين اجيبهوله منين انا دلوقت
جوزيف / حاتم مين يا مختار انت بجد فاكر انك هتبادل و الهبل ده هات العبيط ده من قفاه و اعرف مين اللى وراه دا ان سابوه عايش اساسا ... كل ده مجرد تضيع وقت مش اكتر انا متاكد انهم بيلخمونا لحد ما ينفذوا حاجه اكبر بس مش لاقيها 
منصور / حاجه اكبر من انك عندنا على السيستم ؟!
جوزيف يبص لمنصور و الصمت سيد الموقف جوزيف يبص فى جهازه و يتنهد و يشتغل فى صمت يرفع عينه على منصور متابعه يرجع يبص للشاشه تانى
مختار / لو امايا وصلت لنسمه و شاكر هتاذيهم ؟
جوزيف / ما اعرفش هى ناويه على ايه
منصور / بس بتساعدها
جوزيف / على الاقل هى بتقدر مساعدتى مش زى ناس بتاخد على قفاها من الكل و جايه تسترجل عليا
منصور يقوم ناحيه جوزيف دياب و مختار يحوشوه و جوزيف لسه شغال
وفاء / فى فيديو لازم تشوفوه اعتقد لقيناهم
الكل يجرى على جهاز وفاء الا جوزيف و يشوفوا العربيه و هى طايره و الرجاله بيضربوا عليها نار
دياب / خليكي وراها
وفاء / حصل 
……………………..
فى سرايا الزنايته
نجاه واقفه على السطح عينها على الجبل هند تدخل
هند / انتى هنا ؟
نجاه / للاسف
هند / بحاول اوصل لشاكر او ناصر ما حدش فيهم بيرد و مختار بيقول انهم بخير بس انا مراته و بعرف لما بيكدب
نجاه تبص لها
هند / اقول لك حاجه … انا اكتر حاجه مصبرانى على اللى عشته السنين دى كلها جمله قالتهالى امك ... قالت لى لو ما كانتش بلدنا تستاهل نموت عشانها مموتين هم روحهم عليها ليه بالشكل ده
نجاه / اول مره اشوف البلد منهاره بالشكل ده ... و اللى واجعنى اكتر انى هنا فى البيت ... بتفرج من بعيد و مفيش فى ايدي اى حاجه اعملها
هند / صدقيني انك تكونى فى البيت فى وقت زى ده احسن بكتير من انك تكونى فى مكان تانى
نجاه / بس انا اقدر اساعد
هند / انا مش اول مره اشوف لحظه زى دى ... عشناها كتير و عشت الأسوء منها كمان و فى كل مره كنا بنقوم تانى و بنرجع اقوى من الاول
نجاه/ يعني مش خايفه ؟
هند / مرعوبه
نجاه و هند يضحكوا
هند / بس عندى ايمان و ثقه بربنا ... مهما حصل ... خير
نجاه تبص على الجبل فجاه هند تشد راسها لتحت و ترفع المسدس على درون طاير ناحيتهم بسرعه و قبل ما تضرب الدرون ينفجر هند تروح تبص تلاقي جابر فى الجنينه و العيال طالعه تجرى من الجنينه الورانيه يدخلوا السرايا
هند / كنت هجيبها على فكره
جابر / المره الجايه
هند / تعالى ندخل جوه احسن
نجاه / انا ممكن...
هند تزعق / اسمعى الكلام
نجاه تتكتم و تنزل معاها و يقفلوا باب السطوح يسمعوا انفجار تانى
هند / خدى العيال و انزلى الجيم تحت
نجاه / بس انا ممكن اساعد
هند / عارفه تساعدي بانك تحمى الحريم و العيال الصغيره انزلى الجيم تحت
نجاه / حاضر
صوت انفجار جديد الاتنين ينزلوا يجروا و الحريم بيطلعوا من الاوض مخضوضين
هند / على الجيم تحت الكل على الجيم تحت
.........................
فى الشركه
مهندس يدخل مكتب دياب
المهندس / فى كميه درونز رهيبه بتهاجم السرايا
مختار يقوم يقف و يجرى على الاسانسير
دياب/ هشغل المجناتيك فيلد و هوقعهم كلهم
جوزيف / فكره كويسه بس ساعتها هتقطعهم عننا و عن العالم
وفاء / فى رجاله فى الطريق محتاجين بس نماطل شويه
منصور / شغل يا دياب و الرجاله كدا كدا فى الطريق ... شغل
جوزيف متابع الشاشه يرفع سماعه التليفون
جوزيف / الو... امايا و البنات رايحين ناحيه السرايا و ممكن يكون معاهم كلاب من اياها بلغ جابر يلم الرجاله و يدخلوا المضيفه و يقفلوا عليهم ... بلاش يحتكوا بيهم ... اسمع اللى بقولك عليه صدقنى ده الحل الصح
دياب يبص على الشاشه يشوف عربيات و موتوسيكلات عليها بنات طايره ناحيه السرايا
جوزيف /  امايا مستحيل تسمح لحد ياذى نجاه سيب لها الدنيا هتظبطها
منصور/ تحتل السرايا زى ما احتلت الجبل
جوزيف/ هتحمى السرايا زى ما حمت الجبل
منصور يقوم و يروح ناحيه جوزيف
منصور / ما تخليك راجل و تقول انك معاها بقي و ما تقرفناش
جوزيف / معاها لو على واحد غبى زيك هختارها من غير ما افكر
جوزيف يقوم و يشيل اللاب بتاعه و يحطه فى الشنطه و يمشي
منصور / راجعى السيستم تانى يا وفاء انا متاكد انه عمل فيه حاجه ... البركه فى اللى سمح له
منصور يشيك على مسدسه و يمشي
وفاء / نوعا ما كلامه منطقي
دياب / انا واثق فيه ... بس دا ما يمنعش اننا هنشيك وراه
وفاء / يعني هتسمع كلامه
دياب / اه و هبعت درونز تساعدها
وفاء / على الله ما يخيبش ثقتك دى
......................
فى سرايا الزنايته
درونز طايره و فى ستات واقفين فى الشبابيك بيصطادوها قبل ما تقرب من الشبابيك واحد منهم يفلت و يخبط فى شباك مقفول يكسره و ينفجر فى الاوضه الرجاله واقفه بتصطاد و الدرونز بتهاجمهم و الدرونز كلها حوالين السرايا اول موتوسيكل يوصل ركباه بنت تنط من فوق السور معاها مسدس بيحدف كوينز زى بتاعه جو تلمس الدرون تنفجر عربيه توصل و امايا تنزل منها معاها مسدسين من اللى مع البنت تصطاد بيهم درونز دياب توصل تخبط فى الدرونز الطايره تنفجر و البقايا بتقع على الارض مولعه درون يلف و يروح ناحيه شبابيك الجيم القريبه من الارض و ينفجر يكسر الشبابيك و الدرونز كلها تتحرك ناحيه شباك الجيم فجاه كل الدرونز تقع فى الارض
جابر / اخيرا
امايا تجرى ناحيه شباك الجيم مكسور و تبص تشوف العيال الصغيره ترجع ناحيه الباب تلاقي جابر فى طريقها
امايا / ازيك
جابر / هنضف فمن نفسك كدا لمى زبالتك و امشي 
امايا / ما فيش فى دول حاجه تخصنى
امايا تشاور على البقايا اللى فى الارض
امايا / بس على العموم انا كدا كدا مش فاضيه و ماشيه
الباب يتفتح و نجاه تطلع
نجاه / دا انتى بجحه اوى و لو فاكره انى هسكت لك تبقي غلطانه
نجاه تزق امايا جامد امايا ترجع ورا
نجاه / كلام الكبار معاكى كان عن انك تعيشي بادبك لكن انتى النهرده
امايا / انقذتكوا كلكوا انا النهرده أنقذت حياتك انتى و كل اللى معاكى و لو فاكره حبى ليكي ضعف تبقي غلطانه
نجاه / حبك برص يا سلعوه انتى انتى فكراني هاكل من كلامك ده
امايا/ ما تاكليش و اللى تقدرى عليه اعمليه
نجاه تيجي تضرب امايا امايا تصد و نجاه تهاجم و امايا بتدافع و جابر واخد جنب و ما حدش بيدخل بينهم هند تطلع من السرايا
هند / بس ... بس
امايا / انا بدافع عن نفسي
هند / فين فى بيتنا... روحى ارجعى من مطرح ما جيتي
امايا / ماشيه
امايا تشاور للبنات يتجمعوا و يركبوا و يمشوا
نجاه / يخربيت بجاحتها بجد
جابر / نضفوا الدنيا دى بسرعه قبل ما الباشا يشر...
صوت سرينه البوليس شغاله من بعيد
جابر / سريع اوى ابن الكلب
نجاه / هتقول لهم ايه ؟
جابر / مش هقول ما لناش دعوه هم اللى يقولوا بقي
نجاه / يعني هتسكت
جابر / دا معاهم يعني اى كان اللى هقوله مش هيفرق... سبيه ينضف عننا و أعلى ما فى خيله يركبه
نجاه / و الجبل ؟
جابر / ما نعرفش حاجه و ما لناش دعوه بحاجه و انتى كدا كدا خليكي مع الحريم جوه احسن
هند / انا بقول كدا برده
عربيه البوكس توصل و احمد ينزل منها
احمد / انتوا كويسين؟ ايه اللى حصل هنا ؟
جابر / علمى علمك يا باشا على العموم الحاجه عندك اهى لو تعرف تطلع منها بحاجه يبقي كتر خيرك
احمد / حاجه ايه اللى عندى
جابر / يا باشا احنا كنا قاعدين فى امان الله لا بينا و لا علينا لقينا الدرونز دى طايره و بتفرقع فوق روسنا
احمد / تفتكر ليها علاقه باللى حصل فى الجبل النهرده
جابر / و هو ايه اللى حصل فى الجبل و لا مؤاخذه اصلى ما روحتش هناك
احمد / يعني مش عارف
جابر  / و الله الجبل كدا كدا مكان للمطاريد فأكيد مش هيفرق معانا اوى لو شوفنا لنا فرقعتين تلاته هناك ياكلوا بعض بعيد عننا اصل انا امى دايما تدعى و تقولك  ايه ؟ اللهم اهلك الظالمين بالظالمين و أخرجنا من بينهم سالمين ... يولعوا فى بعض
احمد / وجهه نظر تحترم بس واضح ان طلع ليكوا دخل بيهم اهو
جابر / و هو اللى فرقع هناك هو اللى فرقع هنا ؟! علمى علمك يا باشا انا اصلى مدنى بتاع طوب و رمل و زلط التكنولوجيا دى بتاعه الجماعه بتوع الجارحى روح اسألهم هم اللى هيفيدوك
عربيه مختار توصل
احمد / اهلا اهو الباشمهندس الكبير وصل اهو
مختار/ انتوا كويسين ... هو فى ايه يا باشا احنا اول مره يحصل معانا حاجه زى دى ما تشوفوا لكوا حل البيت ده فيه حريم و عيال صغيره و ما ينفعش اللى حصل ده ... انت لو ما عرفتش مين اللى ورا العبط ده اقسم بالله ما هيحصل كويس دى مش لعبه عيال هى دى ارواح ناس
احمد / أعصابك يا باشمهندس ما احنا مش ساكتين برده
مختار / المهم النتيجه يا باشا
احمد يبتسم
..........................
فى شقه
البنت بتناول نسمه لبس
البنت/ اعتقد ان دول مقاسك
نسمه / انا مش مصدقه حرف من كلامك
البنت / فين مامتك من كل اللى حصل بالعقل كدا امك بتموت و محتاجه عمليه و اخواتك نايمين فى بيوتهم عادى ؟! باباكى ؟! بلاش ... تعالى معايا دلوقت اعيد لك التحاليل بتاعتك و بتاعه مامتك فى اكتر من عشرين معمل
نسمه / اللى خلاكوا تضربوا التحاليل مره تقدروا تضربوها مليون مره
البنت / انا مقدره اللى انتى فيه الصدمه مش سهله ابدا ... انسانه كنتى مستعده تعرضي حياتك عشانها للخطر انتى اصلا مش فارقه معاها... على العموم انا مش خطفاكى انا خلصت مهمتى بالنسبالك خلاص لو تحبى اقدر اروحك و لو تحبى اقدر اجيب لك أولادك و اوديكي اى مكان تشاورى عليه
نسمه / و انتى ايه مصلحتك فى ده
البنت / احنا بنات زى بعض
نسمه / ما تصيعيش عليا انا عرفاكوا كويس
البنت/ لا تعرفيني و لا تعرفى اللى شغاله معاها تعرفى انتى لو راجل كانت معاملتى ليكي اختلفت خالص
نسمه / برده ايه مصلحتك فى كل ده
البنت / صدقيني مش هكسب حاجه و القرار ليكي عاوزه ترجعى تواجهى اهلك و ترجعى عيالك بنفسك و تاخديهم و تسافري اى مكان براحتك عوزانى اساعدك فى اى مرحله انا معاكى عوزانى ابيع لك الارض و اجيب لك ارض تانيه بعيد عن كل الدوشه دى
نسمه / دى مش ارضي عشان ابيعها
البنت / اجرهالك يا ستى و بأعلى سعر
نسمه / هو ده هدفك بقي ... الارض
البنت تضحك
البنت / انهى ارض... هو انتى طايله منها متر واحد ... سنتيمتر واحد ... انتى ما عندكيش ارض لا انتى و لا عيالك غير على الورق ... انتى بالنسبالهم و لا حاجه ما حدش شايفك اصلا ... بس على العموم براحتك غيرى هدومك و فى عربيه هتاخدك توصلك مكان ما تحبى
نسمه / كتر خيرك
البنت / اه صحيح نسيت اقول لك ... امايا سيطرت على الجبل خلاص
نسمه تقوم تقف
البنت / صابر ما عادلوش اى صفه فى البلد دلوقت لا هو و لا رجالته اه من أهلها و ليه فيها املاك بس اللى كان بيميزه و بيتسند عليه بخ خلاص ... و اصلا ما اعتقدش ان لسه ليه رجاله بعد اللى عمله ... يعنى باختصار مسأله وقت مش اكتر و سكاكينه هتكتر و مش هيلاقي لا اللى يقف فى ضهره و لا يحميه
نسمه / مستحيل
البنت / بعد اللى عمله ما اعتقدش هيقدر يرفع عينه تانى
نسمه / عمل ايه ؟
البنت / لما ترجعى البلد هتعرفى
نسمه / صابر ما يعملش اى حاجه وحشه أكيد ده فخ
البنت / اديكي رجعاله اقفى جنبه و سانديه و انا متاكده ان اهلك هيتفهموا الوضع
نسمه / انتى عاوزه منى ايه بالظبط
البنت / مش عاوزه ... بس لو انتى عوزتي اعتقد انتى عارفه هتروحى فين
البنت تسيب الاوضه و تطلع بره
.......................
فى شقه جوزيف
تليفون جوزيف يرن يروح يمسك الموبايل يلاقي نجاه يستغرب و يرد
جوزيف / نجاه ؟!!! خير
نجاه/ سؤال اجابته اه أو لا انت روحت ساعدت امايا على اللى حصل النهرده ؟!
جوزيف / روحت
نجاه تقفل السكه يتصل بيها معمول ليه بلوك
جوزيف / ليه ليه ليه بتخرجوا اسوء ما فيا ليه
....................