الكبيره ٢ بقلم / لولو_محمد

الحلقه ٥١

(((((( الكبيره ٢ )))))))))
#لولو_محمد
الحلقه ٥١
شاهين / انتى طلعتى منين انا ما شوفتكيش و الله ما شوفتك حقك عليا حقك عليا
البنت / آآآآآآه مش قادره رجلى هاتولى اسعاف اللحقونى بالاسعاف
شاهين يشيلها يحطها على الكنبه ورا و يسوق و الناس بتضرب كف على كف
شاهين / خير بإذن الله خير ما تقلقيش هنروح المستشفي على طول و علاجك كله انا متكفل بيه حتى لو هسفرك بره هسفرك
البنت / هتيجي معايا و لا هتسبني اسافر لوحدى
شاهين يستغرب و يبص فى المرايه البنت تغمزله يتنهد
البنت / نعملك ايه ما احنا مش لاقين طريقه حلوه نتواصل معاك بيها ايه مش قدمنا السبت دورك بقي
شاهين / ما طلبتش منكوا حاجه
البنت / لا اللى فات كان بس اماره انما الخير اللى جاى تقيل اوى و اديك جربت وضعك فى العيله اتغير ازاى لما احنا كنا فى ضهرك
شاهين / انتى عارفه هيعملوا فيكي ايه لو سلمتك ليهم
البنت / جرب و احنا نعرف ... بس انت مش هتعمل كدا عشان انت من جواك جربت كل حاجه و ما وصلتش لربع اللى وصلتله يومين معانا
شاهين / الله الغنى
البنت / براحتك ... تقدر تنزلنى فى اى حته او سلمنى ... كلو براحتك
شاهين / بخصوص الحشرات اياها عاوز منها
......................
البنت / الميكروروبوتس
شاهين / بتشتغل ازاى انا سمعت عنها كتير
البنت / زى الدرون بس على نونو خالص لوحه تحكم بدل الريموت كنترول و الروبوت بدل الدرون
شاهين / و ليه نفس إمكانيات الدرون
البنت / زى ما خيالك يجيب كاميره ميكروفون سم قنبله فلاشه
شاهين / كلهم مع بعض
البنت / للاسف الحجم الصغير اوى ده بيجي معاه عدد قليل من الامكانيات
شاهين/اشرحى اكتر
البنت/ مش هينفع عشان الطريق كدا هيطول منك و الناس هتشك و اولاد عمتك كدا كدا حطينك فى دماغهم ما تنساش انك التهديد الوحيد لمكانهم بعد باباك ربنا يديله الصحه و طوله العمر بس لو عاوز تعرف هستناك فى مركب اسمها حوريه الساعه اتناشر بالليل بالظبط ما تتأخرش ... صدقنى مش هتندم
شاهين يركن قدام المستشفي البنت تتألم و تصرخ الناس تجرى بترولى و يفتحوا الباب و ينقلوها للمستشفي و شاهين قاعد فى العربيه بيفكر يفتح الباب و ينزل يروح الاستقبال
شاهين / لو سمحتى كان فى بنت جت دلوقت فى حادثه
الاستقبال / ما فيش اى حالات جديده اتسجلت عندى ثوانى اسأل يمكن دخلت على الطوارئ على طول
الموظفه تتكلم فى التليفون ثوانى و شاهين بيخبط بصوابعه على الكونتر البنت تقفل و تكلمه
الاستقبال / مفيش بنات وصلوا المستشفي دلوقت خالص يا سي شاهين
شاهين / اصلا !!
شاهين يمشي و هو بيضرب كف على كف
..........................
فى بيت جابر
احلام بتروق المكان لوحدها تسمع صوت باب بيتقفل تستغرب
احلام / نجاه !! نجاه
جابر / انا يا احلام ازيك
احلام / الحمد لله خير فى حاجه و لا ايه
جابر / تعبان يا بنتى و عاوز انام خدى راحتك انا هنام فى الاوضه الصغيره و اقفل عليا الباب
احلام / جديد ده انت اه اوقات كتير كنت بتقعد هنا ترتب حاجات تفكر مع نفسك تتمرن مع نفسك بس تنام هنا كمان جديده دى
جابر يبوس راس احلام و يسيبها و يمشي احلام تروح وراه
احلام / طب انت اكلت طيب
جابر يرمى نفسه على السرير بهدومه و يشد الغطا احلام تروح تقعد جنبه
احلام / انت كويس ؟!
جابر / مرهق يا احلام عاوز انام سبيني بس شويه و انا هبقي زى الفل باذن الله
احلام / حاضر
احلام تقوم تروح ناحيه الباب
جابر / و لو مش هتعبك تنقليلى حاجتى اللى فى اوضتى القديمه كلها هنا
احلام تبصله
احلام / ازاى يعني
جابر / هعيش هنا يا احلام هنقل بيتي ما فيهاش حاجه يعني
احلام / لا فيها
جابر يقوم يقعد و هو مش قادر يفتح عينه
احلام / فيها انك مش مظبوط
جابر / يا بنتى بيت طويل عريض فاضي انا اجى اقعد هنا و اسيب اوضتي لاى حد يستفاد منها و بعدين هو انا هقاطعكوا ما انا معاكوا طول الوقت انا هاجى بس على الغيار و النوم و بعدين هو احنا هنا فى بلد تانيه دا خطوتين و معاكى المفتاح
احلام / هاجى ابات معاك
جابر / اوضه الاطفال عندك برطعى فيها
احلام / لكن الاوضه الكبيره لا
جابر يعوج راسه
احلام / مش هتتجوزك على فكره ما بتحبكش فكك منها و شوف حياتك بقي هو انت شويه دا انت مليون من تتمناك و انت واقف حالك و مضيع عمرك عليها و هى ما تستاهلش
جابر / احلام
احلام / اخويا الكبير على راسي بس اللى بتعمله ده غلط فوق لروحك و انسي اللى مش سائل فيك طول ما هى ضامنه وجودك كدا عمرها ما هتعبرك
جابر / عاوزه الاوضه الكبيره خديها بس سبيني انام
احلام / ايه البرود ده
جابر / اروح انام فى الشركه يعني
احلام / هغور و اسيبهالك
احلام تمشي و ترزع الباب وراها جابر يفرد جسمه و يبص للسقف و يتنهد بحزن و تعب
.........................
قدام القسم
عباده/ حمد الله على السلامه
صابر / عرفت مين اللى خطف الواد يا كبير
عباده / هنروح عندى السرايا و نتكلم
صابر / ما فيهاش كلام عن اذنك
عباده يمسك ايد صابر صابر يبصله
صابر / انا لحد اللحظه دى ما شوفتوش منى و لا من اهلى غير كل خير و انا ما شوفتش منكوا غير كل ... خير برده بس لحد كدا و كفايه انا اكتفيت
عباده / حقك على فكره مش هقول لا بس احنا ما بنحاربش ولاد امبارح و مش صعب عليهم يعرفوا ان ده مدخلك دا مش وقت فرقه يا ابنى
صابر / مش دورى انى اجمع ... دا دور جنابك يا كبير ... عن اذنك
صابر يركب عربيه و يخبط على الباب من الشباك العربيه تمشي
...................
فى المطبخ عند نجاه
نجاه بتدوق حله ملوخية و تقلب و تطفى
نجاه / اخر عظمه
احلام تدخل المطبخ و هى شايطه
احلام / ايه اللى حصل فى مصر
نجاه تبصلها باستغراب
احلام / اخويا راجع عامل كدا ليه من مصر يا نجاه ايه اللى حصل
نجاه / عامل ازاى يعني مش فاهمه و بعدين اهدى و انتى بتتكلمى انتى جايه تتخانقى
احلام / و انتى شوفتى خناق انا جبت جاز من دلعك ده احنا مش مجبرين نستحملك على فكره وقت ما كيفك يجيبك تسحبينا كلنا و تسحلينا وراكى و وقت ما تزهقى ترمى الكل على اخر دراعك
نجاه / اقسم بالله انتى ما طبيعيه انا عملت ايه لكل ده
احلام / ما انا جايه اسأل اعرف انتى عملتى ايه وصلتيه للحاله دى
نجاه / حاله ايه أقسم بالله انا ما فاهمه حاجه ... هو فين جابر
احلام / جابر ده تنسيه خالص انتى فاهمه
هند تدخل و هى مخضوضه
هند/ فى ايه يا احلام صوتك عالى ليه
احلام / اسالى الهانم
نجاه / للصبر حدود يا احلام
هند / بس انتى و هى عاوزه افهم فى ايه واحده واحده تتكلم
احلام / جابر قالى ألم حاجته من البيت و هيعيش فى بيته من النهرده
هند / و فين المشكله
احلام / المشكله واقفه اهى
نجاه / و انا اللى طلبت منه كدا
احلام / ايه اللى حصل فى مصر اخويا رايح معاكى واحد راجع واحد تانى ليه
هند / اهدى يا احلام اخوكى مش صغير جابر راجل كبير و اكيد له أسبابه انه ياخد قرار زى ده
احلام / انا مش مسامحاكى على فكره ... عن اذنك يا خالتى
احلام تمشي
نجاه / انا عملت ايه لكل ده
هند / هتكلم معاه او هكلم مختار يكلمه يفهم ... ما تزعليش منها انا اول مره اشوفها كدا
نجاه / و الله و انا كمان بس انا فعلا مش فاهمه حاجه ... هو انا المفروض اتكلم معاه
هند / ما اعرفش بس حتى لو قرر يروح يقعد فى بيته ايه المشكله دا حتى ما خرجش من سور السرايا يعني ايه الاوفر ده ... انا هروح اكلم مختار عن اذنك
هند تمشي و نجاه مضايقه
....................
فى الصالون فى شقه نسمه
مختار / لا انا مش موافق انك تسيبي البلد خالص بصراحه
نسمه / انا تعبت
مختار / انتى بجد مصدقه ان صابر هو اللى عمل كدا طب ليه
نسمه / مش فارق معايا اعرف انا كل اللى اعرفه انى عاوزه اهرب بعيالى من هنا
مختار / لنفرض انك هجيتي عشان تهربى منه مش هيقدر يوصلك
نسمه / لو ما دليتوهوش على مكانى مش هيعرف صابر عمره ما كان بيفهم فى التكنولوجيا صابر دكتور
مختار / بس حبايبه كتير و فى منهم اللى بيفهم
نسمه / الواد خرج مره يتيمه اتخطف و رجع لى بالصدفه هستنى ايه بس اما يرجعلى جثه زى ابوه
مختار / لا حول و لا قوه الا بالله
نسمه / مش هو تمام يا باشمهندس مش هو بس فى حد دلوقت بره عايش عادى بعد ما قتل جوزى و ممكن يكون هو هواه نفس الشخص اللى خطف ابنى عرفتوهم طيب
مختار / هنعرفهم
نسمه / و لحد ما دا يحصل هفضل عايشه فى كابوس
مختار / لا حول و لا قوه الا بالله العلى العظيم
جرس الباب يضرب
نسمه / عن اذن حضرتك ثوانى اشوف مين
نسمه تطلع بره تلاقى ام عبده بتزك تفتح الباب
نسمه / عنك ياما هفتح انا
نسمه تسبق و تفتح تلاقى امها و ابوها على الباب
نسمه / اهلا و سهلا اتفضلوا اتفضلوا
ام عبده / اهلا ... انا رجلى شاده عليا هدخل افرد ضهرى
نسمه / ارتاحى انتى ياما و انا شويه و هاجى اديكي الحقنه
ام عبده تبصلهم من فوق لتحت و تدخل ترزع الباب
نسمه / الباشمهندس مختار الزيني جوه
عويس يحمحم و يروح يسلم مختار يقوم يقف يسلم عليه
عويس / اهلا اهلا بكبيرنا اللى منورنا ... ايه يا نسمه بقي ده كلام ما فيش فاكهه مفيش ضيافه تليق بالجماعه كدا
مختار / لا ضيافه ايه انا مش غريب
عويس / بيتك و مطرحك يا سيد الناس بيتك و مطرحك اتفضل اتفضل
مختار و عويس يقعدوا و نسمه و الست يروحوا يقعدوا الناحيه التانيه
عويس / انا ابن حلال انى لقيتك ... دلوقت زى ما سيادتك شوفت كدا الجماعه عاملين ازاى يرضيك يعني اللى حصل يرضيك بالأمر كدا انتى تترزعى هنا لحد ما نرجع و يروحوا يضيعوا الواد و يروحوا يناموا فى فرشتهم عادى طب لنفرض لا قدر الله ما كانش رجع الوضع كان هيبقي ايه ساعتها
مختار/ بعد الشر الحمد لله قدر و لطف و رجع و بعدين ما تنساش انها لسه فى العده يعني ما كانش المفروض تروح معاهم اصلا
عويس / و اهى خرجت تدور على ضناها فى الشوارع انا بس بورى معاليك انهم مش أمناء على البت دى و لا عيالها و لا أرضهم و لا اى حاجه تخصهم انا بس بوريك اهو عشان تبقي شاهد بس
مختار / مفيش حاجه كامله يا حج
عويس / عبد الهادى الله يرحمه كان طيب و ابن حلال و بيتقى ربنا كان فى كلب يستجرى يهوب ناحيتهم و هو عايش ؟! كلو مكتوم كتمه المدمس بس نقول ايه قدره و قدرنا ربنا رحمه من العيله دى و بلانا بس انا مش هسكت انا كلمت المحامى و قولتله يثبت كل اللى حصل ده فى المحضر
مختار / محضر ايه
عويس / الجماعه حاطين ايديهم على أرض العيال و مبهدلين البت خالص يا باشمهندس و دا ما يرضيش ربنا و بصراحه الحوار بتاع صابر ده قلقنى دا ما كانش اتفاقنا
مختار/ مش هو يا حج و لو سمحت خلينا بس فى موضوع المحضر
عويس / البت بقت مطمع يا سيد الناس صغيره و حلوه و وارثه مطمع و لا مش مطمع
مختار / يا سيدي مطمع و كل حاجه بس صابر
عويس / عشان كدا انا استخرت ربنا و قررت اجوزها لابن عمها تانى يوم ما العده تخلص
نسمه / ايه !!
مختار/ ايه الكلام ده يا حج عويس ما ينفعش الكلام ده طبعا
نسمه/ انا مش موافقه
عويس / اخرسي يا بت و خشي جوه الرجاله بتتكلم
نسمه / الرجاله بتتكلم فى بيتي
عويس / اما انتى بت قليله الر
عويس يحاول يطولها مختار يمنعه عنها
نسمه / انا مش هسمح لحد يتحكم فيا تانى و مش هتجوز حد انا هعيش لعيالى و بس فاهمين
عويس / لعيالك و لا ل
مختار يكتم نفس عويس
مختار / لحد كدا و كفايه اوى انت ايه يا راجل انت مش عامل احترام لحد خالص كدا ليه
ام عبده تطلع من الاوضه
ام نسمه / اهدى يا خويا اهدى انت برده فتحت الموضوع بدرى ما كانش يصح
عويس / انا ما كنتش ناوى افتحه اصلا كنت ملتزم بالاصول بس طلع مش كل الناس تعرفها اصلا اعمل ايه يعنى
ام عبده / ايه صوتكوا العالى ده ... فاكرين نفسكوا فين هنا
عويس/ فى بيتنا و ان كان على نصيبك فيه نتمنه و نرميهولك على الجزمه
مختار / جرا ايه يا جدع انت انا ساكتلك من الصبح
ام نسمه / اعذرنا يا سي مختار انت ما تعرفهاش دى وليه حربوءه عملت كل ده عشان تحرق قلب نسمه
ام عبده / اتحرق قلبك عليها يا بعيده دا انتى وليه باكسه
عويس / انتى اللى
مختار/ باااااس بااااس هو انا جاى اتهزء هنا و لا ايه ... بقولك ايه يا ام بدر لمى حاجتك انتى و العيال ما لكيش عيش وسط العالم دى لحد ما عقولهم ترجع فى رأسهم و يعرفوا بيقولوا ايه و امتى
عويس / لا ما تاخذنيش يا سي مختار بقي ... احنا مش صغيرين و بيت ابوها اولى بيها من بيت الغريب حتى لو كان بيتك انت عاوز الناس تاكل وشي و لا ايه
نسمه / انا مش هسيب بيتي مهما حصل ريحوا روحكوا
ام نسمه / الوليه دى مش هتسيبك فى حالك يا بنتى مش بعيد تحاول تخلص منك
ام عبده / اما انك وليه ناقصه
نسمه / باااس بقي باااس حرام عليكوا فضحتونا عيب كدا عيب
نسمه تعيط تجرى على اوضتها و تقفل عليها الباب
مختار / كل الكلام اللى اتقال النهرده ده تنساه نهائى عشان انا اللى هقفلك فيه مفهوم
عويس/ ما حدش يقدر يقف قصاد ستره البنات يا كبير و لا أنت عاوزها مطمع للى يسوى و اللى ما يسواش
ام عبده / ستره و مطمع !! انت بتقول ايه يا راجل انت ... بتقول ايه يا راجل يا ناقص بتقول ايه انت
ام عبده تقلع الشبشب و تحاول تضرب عويس و ام نسمه تحوش هى و مختار و تبقي معجنه فجاه صوت بدر بيصرخ الكل يجرى على الاوضه يلاقوا نسمه واقعه فى الارض
.......................
فى ديسكوا
مهره نايمه على ترابيزه مفتحه عنيها و بتتكلم مع كبايه العصير الفاضيه و فى حد بعيد جدا كل شويه يصورها
مهره / ليه بس دا الخيل جميل جدا ... لا لا لا لا مفيش الكلام ده مفيش احلى من الفرس العربى الأصيل بشموخه كدا و عزته ... بجد !! و آلله و انا كمان نفسي اوى فى الموضوع ده بس ما عنديش مايوه ... حاضر هقولهم كلهم بس انتى ما تقوليش لاكرم اه وحش ... لا نروح لوحدنا احسن فى هدوء كدا خفيف خفيف كدا
الوايتر يدخل يشيل الكبايه مهره تمسك فيه
مهره/ ليه ليه هتاخدها ليه انا عملتلك ايه
الوايتر / خلصت حضرتك
مهره / لا كانت بتتكلم معايا انت مش شايفني لوحدى حتى دى كتير عليا دى كانت هتاخدنى البحر
الوايتر / تحبى انزل لحضرتك واحده تانيه
مهره / مش عاوزه منك حاجه انا هقوم ادور على مروان
مهره تقوم و الوايتر يمشي مهره تتمشي بين الناس تايهه تخبط فى واحد
مهره / سورى سورى انا اسفه
الشاب / لا عادى و لا يهمك
مهره تبتسم و تفضل تدور بين الناس مجموعه شباب على ترابيزه ياخدوا بالهم منها كل شويه تخبط فى حد و مش قادره تصلب طولها يغمزوا لبعض و يقومولها واحد فيهم يخبط فيها
مهره/ اسفه جدا انا مش عارفه ايه ده انا
شاب ١ / انتى تمام خالص انتى اول مره تيجي هنا شكلك كدا
شاب ٢ / تحبى تشربى حاجه
مهره / لا لا انا شربت هناك خلاص بس هو اخد منى الكبايه هناك
مهره تشاور و تحاول تدور على مكان الترابيزه مش لقياه ... هو راح فين
شاب ٣ / هو مين
مهره تفضل تتلفت
شاب ١ / انتى بتدورى على حد
مهره/ مروان قالى هروح الحمام و ما رجعش
شاب ٢ / يا خبر ازاى يعمل كدا طب ما تكلميه فى التليفون
مهره تهز راسها بفرح و تدور على الموبايل و الشنطه
مهره /هناك على ترابيزتى ... انا مش لاقيه الترابيزه بتاعتى
مهره عماله تدور على الترابيزه مش شيفاها
شاب ٢ / طب انتى اوضتك نمره كام تستنيه هناك طيب
مهره / على البحر اوضتى على البحر
الشباب يضحكوا  
شاب ٣ / لا دا احنا لازم نساعدك تلاقيها بقي ما ينفعش نسيبك كدا
شاب ١ / تعرفى ان احنا كمان اوضتنا على البحر ما تيجي معانا نفرجهالك
مهره / لا لا انا عاوزه مروان هو اكيد بيدور عليا
شاب ١ / مروان ده مش هو الشاب اياه ده اللى كان لابس بنطلون كدا اسمه ايه
مهره / انت تعرفه
شاب ٢ / دا صاحبنا دا حتى مستنينا هناك تعالى بس نروح له دا قلقان عليكي اوى
مهره / يا خبر
شاب ١ / الاوضه من هناك تعالى يا شيخه تعالى
الشباب يحركوا مهره و ياخدوها بره المكان و هى ماشيه معاهم و تايهه و فى حد بيصورها
...................
فى اوضه جابر
جابر نايم رساله توصل موبايل جابر الموبايل يتهز و ينور نجاه ... جابر يتقلب ثوانى و يقوم يتمطع الدنيا ضلمه يقوم يطلع بره مفيش اى حد يطلع فوق و يشغل الدوش مايه سخنه و يروح يفتح دولاب فيه كيسه يطلعها فيها غيار ياخدها و يرجع الحمام يقفل الباب وراه
...................
على الشط فى البلد
شاهين يركن العربيه و ينزل يتمشي ناحيه المراكب يشوف مراكب كتير منهم حوريه يركب
المركبى / مستنى حد و لا اطلع يا باشا
شاهين يبصله باستغراب و يتلفت
المركبى / تحب اوديك البر التانى و لا الف بيك شويه فى البحر
شاهين يبص فى الساعه
شاهين / اطلع اطلع
المراكبى / امرك يا باشا
المراكبى يفك الحبل و يشغل و يطلع
شاهين / هو انت شغال على المركب دى من زمان
المراكبى ما بيردش
شاهين / بقولك شغال على المركب دى من زمان ؟
المراكبى يبصله و يبتسم و يكمل سواقه شاهين يعوج بقه
المراكبى / عطشان يا باشا فى فى المخزن تحت حاجه ساقعه اجيب لك
شاهين / لا كتر خيرك
المراكبى / فى فى المخزن تحت حاجه ساقعه اجيب لك
شاهين يبص للراجل بيشاور على باب فى ارض المركب شاهين يقوم يشد الحلقه و يفتح الباب يلاقي سلم و الدنيا ضلمه ينزل و يشغل النور يلاقي ابيك نايمه على فرشه فى الارض تشاورله يجي جنبها 
شاهين / انتى هنا و سيباني فوق مع الغبى ده كل ده
ابيك / تعال ارتاح تعال
شاهين يقعد على السلم
ابيك/ للدرجادى!! اخص عليك
شاهين / ما تاخذينيش انتى مش استايلى
ابيك / امال مين استايلك ياسو
شاهين / خليكي فى حالك يا بنت الناس و انجزيني
إبيك / الميكروروبوت مش كدا
شاهين / عاوز كميه و عاوز حاجه توقفه
ابيك / و ايه كمان
شاهين / و عاوز شرايح من اياها
ابيك/ غالى و الطلب رخيص
شاهين / و عاوز كلام من ابو ناهيه ... انتوا عاوزين منى ايه بالظبط
ابيك / عاوزينك تبقي الكبير
شاهين / اللى هيمس من ابويا شعره
ابيك / لا لا لا مش كدا خالص انت فهمتني غلط ... احنا محتاجين مغاورى يفضل عايش لاطول وقت ممكن ... كلنا عارفين ان لو جراله حاجه انت عمرك ما هتشمها ... الكل هيختار دياب
شاهين / و ايه اللى سعادتك ممكن تعمليه يقلب الايه
ابيك / نوقع دياب و نرفعك نحط قدامه مشاكل كتير ما يعرفش يحلها و يبان فاشل فى نفس الوقت اللى انت بتدخل كل مره تحلها و تبان بطل
شاهين / منصور مش هيسكت
ابيك تبتسم
شاهين / لو عاوزه توقعى دياب لازم توقعى منصور الاول
ابيك / يقع ما نفسكش فى اى حاجه تانى
شاهين/ هيحصل ايه لو ساعدتونى و ما طلعتش اللى فى خيالكوا
ابيك / انت بالظبط اللى فى خيالنا احنا اصلا خيالنا متفصل عليك بالظبط
شاهين / الإنسان بيكبر و بيتغير و ان كنت غلطت زمان فانا دلوقت توبت و اتغيرت و بقيت واحد تانى
ابيك/ انت مش وحش يا شاهين انت بس مظلوم اتولدت ابن الكبير الوحيد و عليك حمل انك تكمل مسيرته و تنافس حتى مع ناس اكبر منك و اتقدملهم دعم عنك انت مش اقل منهم انت اكتر واحد فيهم يستاهل اكتر واحد بتحاول بجد
شاهين/ و اكتر واحد غبى عشان اكل من الهبل ده مش كدا ؟ يا بت اتعدلى و خشي فى الدوغرى
ابيك / بتحبك و معجبه بيك من زمان ارتحت حتى لما قتلت كل اللى اتفرجوا على الفيديو ما قدرتش تاذيك حتى
شاهين / كتر خيرها تطلع مين بقي ست الكل ام زوق عالى دى
ابيك / امايا .. اختى الصغنونه ايه لحقت تنساها
شاهين / اااااه طب كنتى قولى البوقين دول لناصر كان بلعهم
ابيك / لو كانت عاوزه ترجع لناصر ما كانتش مشيت بس هى ... تقدر تقول كدا ... جربته و طلع... او نزل ما بحبش ادخل فى الخصوصيات دى
شاهين / هتجيبي الحاجه امتى و ازاى
ابيك تديله موبايل نوكيا قديم
ابيك / انا متاكده انك هتقدر تخبيه هنتواصل عليه
شاهين / تمام خلينا نروح بقي
ابيك / محتاجه منك خدمه
شاهين يبتسم
ابيك / امايا راجعه و محتاجاك تأمن دخولها
شاهين / نانوسه عين امها دى لو خطت البلد برجلها بس مش هتخرج منها غير على تربتها
ابيك / ما هى مش عاوزه تخرج منها عاوزه تعيش و تستقر فيها
...................
فى شقه صابر
الباب يخبط صابر يروح يفتح يلاقي شاكر شايل اكياس اكل اول ما صابر يفتح شاكر يرفع ايده بواحد من الأكياس
شاكر / شويه محاشي بيتي انما ايه يستاهلوا بقك من ايدين امى حاجه عظمه العظمه
صابر يوسع شاكر يدخل و يبدا يرص الاكل على الترابيزه
شاكر / انا قولت لأمى تحطلى منابى معاك ... الحمد لله الملوخيه ما اتقلبتش ... صدق أو لا تصدق الملوخيه دى عمايل نجاه
صابر / تسلم ايديهم كلهم
شاكر / بفكر اسافر اسكندريه تيجي معايا
صابر يضحك
شاكر / انا متاكد ان الموضوع ده كله من ورا اللى ما يتسموش
صابر / و اللى ما يتسموش هم اللى كروا رعد من الاول
شاكر / مش شرط بس ممكن هم اللى كملوا استغلوا الخلاف اللى بينك و بين عبده و قتلوه و لما انت خرجت و الدنيا هديت هوب ضربوا حوار بدر
صابر / و ادينى خرجت
شاكر / عشان كدا بفكر اروح ليونس يعني اخد رأيه و كدا و اهو بالمره يعرف اننا قريناهم و جاهزين ليهم
صابر / دا على اساس ان يونس معانا و لا معاهم
شاكر / مع اللى معاه ما عادتش تفرق
صابر / انت غريب اوى
شاكر / مش اغرب منك يا صاحبى ... خليك واقف براحتك انا جعان و طبيخ أمى ما بيتقاومش
شاكر يقعد ياكل
شاكر / هترجع الجبل امتى
صابر / مش راجع
شاكر / خالص !!
صابر / اكيد هرجع بس مش دلوقت خالص اقصد
شاكر / بصراحه الجبل من غيرك وحش تحسه كئيب و الرجاله كمان مفتقدينك
صابر / المطاريد قالولك صابر واحشنا !!
صابر يقعد و يبص لشاكر و هو بيضحك
شاكر/ لا طبعا بس هرجله كدا
صابر / و انت ما كنتش عارف تسيطر فى غيابى و لا ضهرك وجعك و حنيت لنومه السرايا
شاكر / ما عدتش بلاقي فى السرايا راحه خالص يا صابر بدخلها و انا بعد الثواني انى اخرج منها
صابر يبان عليه الضيق
صابر / ليه كدا
شاكر / مفيش سبب محدد بس زحمه و دوشه و حريم و انا ... بحب الهدوء كدا
صابر يضحك و يبص الناحيه التانيه
شاكر/ يااااه للدرجادى
صابر  / كل كل ... على فكره نفس تمرينات لغه الجسد و الحبشتكانات اللى انت عديت منها انا عديت منها ... و قبلك ... بس عشان انا الكبير هعديها
شاكر / عادى يعني عملتها قبلك و عديتلك فخليك حلو احنا صحاب
صابر / اخوات ياله
شاكر / أيدي وسخه هغسلها و اجى احضنك
صابر يضحك
شاكر / عندك سرير فاضي هنا إبات فيه
صابر  / الشقه كلها تحت امرك
شاكر / كنت عارف انك مش هتكسفنى عشان كدا جبت معايا غيارين تحت فى العربيه هاكل و انزل اجيبهم
صابر يتابعه و هو بيضحك يمد ايده و ياكل
..........................
فى بيت جابر
جابر بيلبس و يتشيك و يرش برفيوم و ينزل يروح ناحيه الاوضه اللى كان نايم فيها ياخد المفاتيح و الموبايل يبص فيه يلاقيه فاصل ينفخ و يروح يدور على الشاحن فى الإدراج لحد ما يلاقيه يوصل الموبايل بالشاحن يظهر زيرو
جابر / لا مش هقعد جنبك انا بناقصك اصلا مش واقف عليك يعني
جابر يسيبه و يطفى النور و يروح يركب العربيه الغفير يفتح البوابه جابر يمشي و نجاه واقفه فوق السطح شيفاه تضايق و تهز راسها و تنزل على السلم تقابل كارم طالع
كارم/ على فين كدا
نجاه / رايحه الجيم
كارم / مالك فى حاجه و لا ايه ؟
نجاه / مفيش عن اذنك
نجاه تعديه و تنزل و هو مستغرب
.........................
فى الفندق عند مهره
مهره ماشيه معاهم و هى بتنام و تطوح و هم بيوجهوها تمشي
مهره / انا مش فاكره الطريق ده
شاب ١ / انا لسه قافل مع مروان و مستنيكى هناك
الشباب يضحكوا و يكتموها لحد ما يوصلوا لاوضه التانى يفتح الباب
شاب ٢ / خشي برجلك اليمين يا قمر
مهره / لا ناديلى مروان عشان انا عاوزه انام مش قادره افتح عيني
شاب ١ يزقها لجوه و هى مش قادره تقاوم تقع فى الارض الشباب يدخلوا التانى يحط الكارت الاوضه تنور
مهره / مروان فين ؟!
شاب ٣ / كلنا عشان خاطرك نبقي مروان
........................