الكبيره ٢ بقلم / لولو_محمد

الحلقه ١٤٣

((((((( الكبيره ٢))))))))
#لولو_محمد
الحلقه ١٤٣
شاكر / و انتوا تضمنوا منين ان اللى حصل لصابر ما يحصلش لاى واحد فيكوا على قد علمى نصكوا متجوز و مخلفين و النص التانى ليه أهل و اخوات و ام و اب يعني لو هندور على واحد ما لوش نقطه ضعف هنشوف مين فينا مقطوع من شجره و نوليه علينا و نكبر دماغنا بقي من الأصلح و الاقوى و الاذكى و الاحق .... اخر كلام مين فيكوا هيقدر يملا مكان صابر ... اصل دى ما فيهاش رجوع مش كل يومين هنشوف كبير جديد
راجل ٢ / مرزوق كان قال انه هيمسكها و احنا وافقنا
شاكر / قدها يا مرزوق ؟
مرزوق / اللى تشوفه يا سي شاكر
شاكر / و انا مش شايف غير صابر بصراحه ما تزعلش منى بس انا واحد منكوا و اعرفكوا نفر نفر زعلان منه حقك اقعد و اتكلم معاه و عاتبه الأخوات ليهم عند بعض ايه دا انت لسه قايلها كنت مستعد تموت عشانه ما بالك بقي هو
راجل ٢ / هو ما جاش معاك ليه يا سي شاكر
شاكر / لسه البينج اللى ادوهولنا مأثر عليه شويه ... انا لولا صابر كتر خيره و الله ما كنت قدرت اجى ... قيمه الأخوات بقي
مرزوق / بقولك ايه يا سي شاكر... احنا نرجع الجبل و ساعتها نبقي نشوف مين يحكمه
شاكر / ماشي بس صابر هيجي و هيقف و هيحارب معانا و اللى هيجي عليه جه عليا يا مرزوق
مرزوق يبص فى الارض و يهز راسه
شاكر / كل واحد يجهز نفسه هنصلى الفجر و نطلع على بركه الله
..............................
فى السيرك
امايا / جاى سخن اوى يا شاكر
بنت ١ / تحبى نعمل معاه ايه ؟
امايا / و لا اى حاجه ... شوفى البنات فى الجبل عندهم اكل قد ايه و حملى درونز زياده فى الضلمه و جهزى البنات عشان لو حصل اى حاجه و اضطرينا ندخل
بنت ٢ / ما احنا لو ادخلنا الزنايته و الجوارحه هيدخلوا
امايا / كدا كدا كان هيحصل احنا بس هندافع على قد ما نقدر ... باختصار لو هنسيبها هنسيبها بمزاجنا احنا ... اخبار نسمه ايه ؟
بنت ١ / فى بيت باباها و مفيش اى شبكه بس فى قلق واضح حوالين البيت
امايا / اريج وصلت ؟
بنت ٢ / وصلت
امايا / لا لا اريج وشها محروق بلاش احسن... هروح انا
بنت ١ / بلاش يا إيمي
امايا / ما تقلقيش عليا و انجزى فى حوار الجبل مش باقي كتير على الفجر
............................
فى الشركه
دياب / عرفت منين الخطه دا احنا ما اتحركناش من مكانا يا جدعان
وفاء / يمكن مجرد صدفه ما طبيعي تبعت ليهم اكل
دياب / بالكميات دى
منصور / فرقت ايه ؟ كدا كدا الاكل ما بيتخزنش اخره ايه يعنى شهر كل ده يا هيخلص يا هيبوظ ما خسرناش غير شويه وقت
دياب / الوقت مش ببلاش الشهر ده ممكن تحصل فيه بلاوى على فكره
منصور / طب انت متأكد ان حبيبك لما دخل الشركه هنا ما زرعش اى حاجه هنا و لا هنا
وفاء / انا شيكت على كل حاجه بنفسي يا منصور ما عملش اى حاجه ... تفتكروا قدرت تجند اى حد من رجاله الجبل
دياب / اللى زى دى تتوقع منها اى حاجه
منصور / احنا اللى طاطينا من الاول نشرب بقي
دياب يبص لمنصور و بعدين يبص لوفاء تبتسم له معلش يتنهد و يسكت
..........................
فى اسكندريه
احلام بتسرح شعرها الباب يخبط تروح ناحيه الباب
احلام / مين ؟
ام قاسم / افتحى يا عروسه
احلام تفتح
احلام / اتفضلى يا ست الكل تعالى
ام قاسم / هو انتوا عندكوا ما بتصلوش الفجر و لا ايه يا عروسه ؟
احلام / صليته و الله ليه بتقولى كدا
ام قاسم / اصلى ما شوفتكيش يعني فى صلاه الجماعه و لا شوفتك يعني نزلتى تعملى لجوزك فطار قبل ما يروح الصلاه
احلام / هنفطر بره هو بس يرجع اكون لبست و لبست مازن و هنمشي
ام قاسم / انتى فاكره انك كدا هتستفزيني يعني
احلام / و استفز حضرتك ليه لما يجي قاسم اسأليه انا كنت نازله احضر له فطار هو اللى قالى ... لو قال غير كدا يبقي ليكي الكلام
ام قاسم / و طبعا هتتغدوا فى المطعم و تتعشوا فى المطعم و تروحوا على النوم
احلام / ما اعرفش بقي دى حاجه تسالي فيها قاسم
ام قاسم / اسمه ايه ده يا اختى
احلام / اسمه اللى يقوله جوزى يمشي على رقبتى مش ده الصح و لا ايه ؟
مازن يدخل
احلام / صح النوم يا وحش الوحوش ايه نمت كويس ؟
مازن يهز راسه و هو بيدعك فى عنيه
احلام / طب روح طلع لك غيار و ادخل استحمى و اللبس عشان ننزل
مازن / حاضر
مازن يمشي
ام قاسم / هو اللى سمعته ده حقيقي؟ انتى هتسيبي الواد الصغير يحمى نفسه و يطلع غياره و يلبس نفسه امال احنا جايبينك ليه اسم الله
احلام / جايبينك ؟ هو مين اللى جنبى انا اعرف ان قاسم بس اللى جابنى و جابنى زوجه و بالنسبه لمازن فانا بطلعه راجل يعتمد على نفسه و ليه شخصيه مازن دولابه مترتب الغيارات لوحدها و الأطقم كل طقم على بعضه و القمصان كلها مكويه و متعلقه على شماعات و البناطيل مكويه و متعلقه و التيشيرتات مطبقه يعنى هيمد ايده و يختار و انا عملته يطلع الهدوم من غير ما يبهدل الدولاب و هو شاطر اللهم بارك و ذكى جدا و عاوز يعتمد على نفسه دا مش بس كدا دا ما بيقبلش حد يحميه او يشوف جسمه عريان لأنه راجل ابن راجل و كدا كدا انا موجوده لو حصل حاجه او احتاجنى فى حاجه انا موجوده
ام قاسم / افرضى اتزحلق افرضي جرا له حاجه
احلام / ان شاء الله مش هيحصل حاجه ما تفوليش انتى بس على الواد
قاسم يدخل
قاسم / صباح الخير يا ست الكل خير فى حاجه و لا ايه ؟
ام قاسم / انت عاجبك اللى بيحصل ده الواد يروح لوحده يطلع غياره و يستحمى و يلبس و هى قاعده هنا تدلع و تتسبسب
قاسم / بصراحه مبهور و مبسوط جدا
احلام تبتسم
ام قاسم / صحيح ما الخايبه تدلع صبح و مسا و الخايبه فى الهم مدبسه
احلام / ليه يا حجه هو جوازى من قاسم تدبيس فى هم برده دا سيد الرجاله دا كفايا انه ربايه ايدك
ام قاسم تبص لقاسم يغمز لها
ام قاسم / انا مالى اشبع بيها
ام قاسم تمشي قاسم يقفل الباب و يتنهد
احلام / خاطرك ده مكلفنى كتير على فكره
قاسم / ما انا مواضيكى الصبح
احلام / ما بياكلش معايا الكلام ده يا حبيبي انا عاوزه اتفسح النهرده
قاسم / بس كدا دا انا هراضيكي لما تقولى اكتفيت
احلام / ايوه بقي ... هروح ابص على مازن
قاسم / عاوزين ننزل
احلام / حالا
.............................
فى الجبل
العربيات بتتحرك و كل عربيه تركن فى مكان و ينزل شاكر يرص شكاير دراى فود فوق بعض على الارض ورا العربيات و الرجاله تنزل تنصب خيام و شوادر و تعمل قعدات عربيه نص نقل راكب فيها صابر جنب سواق و ورا فى ايسبوكس كبير و اتنين رجاله تدخل و الرجاله ينزلوا منها
صابر / صباح الخير يا رجاله
شاكر / صباح العسل جبت الغدى
صابر / وصيت على تيسين يستاهلوا بقك
شاكر / الله عليك يا سيد المعلمين
الرجاله ينزلوا الايسبوكس و ينصبوا شوايتين
صابر / ازيك يا مرزوق
مرزوق / الحمد لله ازيك انت
صابر / بقيت كويس لما شوفتك ... فكره حلوه يا رجاله ربنا يتمها على خير
راجل ١ / احنا زعلانين منك على فكره
صابر / حقك ما اقدرش اتكلم بس اديكوا عرفتوا كل حاجه لو كنتوا مكانى
مرزوق/ كنا قلنالك مش اتصرفنا من دماغنا
شاكر / ما كانش فى وقت الوضع كان صعب جدا اللى على البر عوام ما حدش ينظر على حد
مرزوق / بقولك ايه يا سي شاكر انا كلامى مع الكبير كان واضح و صبرنا عشانك انما مش اخره الصبر انه يرجع و لا كانه عمل حاجه
صابر / مين اللى قال الكلام ده
مرزوق / ما انت لو فاكر اننا هننسي اللى انت عملته بحتتين لحمه تبقي غلطان
شاكر / تلاته كويس ؟!
مرزوق/ انا بتكلم بجد يا سي شاكر
شاكر / يا عم هزر ما حدش واخد من الدنيا حاجه و بعدين احنا بيتخانق على مين هيبقي كبير الجبل و الجبل اصلا مش فى ايدينا
مرزوق / انا قولت اللى عندى
صابر / لو قدها شيلها
مرزوق / قدها مليون مره انت فاكر نفسك يعني احسن مننا فى ايه
صابر / و لا اى حاجه
مرزوق/ بالظبط اللى انت كنت بتعمله انا هعمله و احسن كمان
صابر  / يبقي حلال عليك ... بس اشمعن انت ليه مش فرج ليه مش حمدان ليه مش انس ليه مش وفيق عبده جمال حسن فتحى تفرق ايه انت عنهم
راجل / و انا ابن البطه السوده يعني و لا ايه انا أسمى ما اتقالش ليه فى كل دول
شاكر / يا عم اقعد يا عم هى ناقصه ... هراضيك انا بحتتين لحمه زياده اقعد انت بس
شاكر يغمز له الراجل يضحك و مرزوق هيطق
صابر / نرجع الجبل و بعدين نشوف مين يحكمه
مرزوق / هيرجع
صابر / باذن الله يا صاحبى باذن الله
مرزوق / صاحبى قال
............................
فى سرايا الزنايته
عباده داخل بعربيته يركن و ينزل نجاه تطلع تجرى من السرايا
نجاه / صباح الخير
عباده / صباح النور ..  لا
نجاه/ هو ايه اللى لا
عباده / هتطلبى ايه ؟
نجاه / اروح الملعب
عباده/ لا
نجاه/ ما بستحملش حبسه البيت دى و حضرتك عارف اتخنقت و بعدين البيت مليان عمال و الجيم زحمه اروح فين بس
عباده / هو جابر فين ؟
نجاه/ خرج مع الرجاله من بدرى
عباده/ تمام
عباده يجي يمشي
نجاه / طب و انا
عباده / احنا داخلين على فتره صعبه و تقيله لوسمحتى سيبي الرجاله تعرف تشتغل بتركيز
نجاه / انا اقدر اساعد
عباده / عارف بانك تقعدى فى البيت و تفضلى فى امان
نجاه/ هتحبسونى يعني
عباده / لو حكمت اه هحبسك و زيدى فى الكلام بقي عشان اوريكى منى وش انا شخصيا ما تخيلتش انك تشوفيها فى يوم
عباده يسيب نجاه و يمشي و هى بتابعه بحزن يقف و يبص لها يشاور لها تعالى تروح له
عباده / انا مقدر كل اللى انتى بتحسي بيه بس ... انا خايف عليكي بره مش أمان و الفتره دى فتره صعبه ... تعرفى قعدنا اتكلمنا رجاله فى بعض و خططنا ما فاتش دقايق و لقيناها بتتحرك عارفه ده معناه ايه ؟
نجاه / انها قدرت تعوض شاهين
عباده/ انتى اغلى عندى من الدنيا باللى فيها صابر باع الجبل عشان نسمه تخيلى انا ممكن ابيع ايه عشانك ما تجبرنيش يا نجاه... بالله عليكي
نجاه تهز راسها عباده يطبطب على كتفها
عباده / هدخل المكتب اخلص شويه ورق كدا كبايه قهوه من ايديكي الحلوه و اول ما اخلص هاجى نلعب شويه زى زمان
نجاه تضحك
عباده / بس المرادى مش هفوت لك
نجاه / فين بس دا الجيم زحمه
عباده / الجنينه واسعه
نجاه تبتسم عباده يبوس راسها و يدخل و هى واقفه تتابعه عباده يتكلم و هو ماشي
عباده / القهوه
نجاه تجرى على جوه
..........................
فى الجبل
الرجاله قاعده بتشوى و فى كلاب حوالين المكان على ريحه اللحمه و الرجاله بيرموا العضم على اخر دراعهم الكلاب يجروا ياكلوه شاكر يقوم و يفتح شكاره دراى فود و يفضيها فى مكان الكلاب تجرى تتجمع و تقعد تاكل و هى بتهز فى ديلها و مبسوطه
صابر / و انت مش هتاكل يا ابو قلب رقيق و حنين انت
شاكر / ايه حنيتو عليا اخيرا و طبقي جهز
راجل / لا ما تعملهمش علينا انت اللى كل ما طبق يجهز تباصيه و عامل فيها شمعه تحترق من اجل الاخرين
شاكر / تصدقوا انا الغلطان هات يا جدع انت الطبق ده دا انتوا
شاكر يقعد جنب صابر و يضحكوا و يهزروا عربيه امايا تدخل و تنزل منها تتمشي ناحيتهم و هم بيتفرجوا عليها
امايا / ريحه الشوى تهبل تهبل بجد
امايا تربع و تقعد وسطهم
امايا / ناويين على ايه ؟
شاكر / بنتشمس زى ما انتى شايفه
امايا / انتوا مش هتعزموا عليا و لا الاكل ده للرجاله بس
واحد من الرجاله يناولها طبق بقرف
الراجل / اتفضلى
امايا / ميرسي كلك زوق
صابر / جايه ليه ؟ و من الاخر
امايا / تخيل كدا قعدتنا الحلوه دى و فجاه لقيت جيش من هنا و جيش من هنا و انتوا فى النص زى قطعه اللحمه فى الساندوتش الجميل ده
صابر / اغلى حاجه فى الساندوتش و اكتر حاجه مفيده كمان
امايا / ان كان على الفايده فانا ما استفدتش من حد و لا هستفيد قد ما استفدت منك يا صابر
شاكر / و لسه لما تعرفيه بجد هتنبسطى منه اوى
امايا / مش نصحتك تمشي يا شاكر ... مش قولتلك هزعل اوى لو جرالك حاجه
شاكر / مش قولتلك مش فارق معايا زعلك
امايا / بصوا بقي يا رجاله عشان اللقمه الحلوه اللى بينا انا هدي لكل واحد فيكوا فرصه ... فرصه يفكر و يشوف هو فين دلوقت و معايا ممكن يبقي فين
شاكر / بتخيريهم بين الدنيا و جهنم ؟!
امايا / ما هى دنيتكم ما تفرقش كتير عن جهنم يا شاكر
شاكر / تبقي ما تعرفيش جهنم ... احنا اه مش عايشين فى الجنه بس اللى بنعيشه ده هو اللى هيودينا الجنه انما انتى سكتك دنيا و آخره نار يا بنت الناس
امايا / سمك فى مايه بتوعد الناس و تبيع لهم سمك فى مايه ... و بعدين انا مش بقول ليكوا اعملوا حاجه حرام لا سمح الله ... انا بس بقول نتفق
صابر / بدرى اوى على القاعده دى يعني اتوقع انك تيجي تتفاوضي لما الاكل يبدأ يخلص انما تتفاوضي من قبل كدا ما نبدأ... جديده دى
امايا / بحب أسبق بالخير عشان لما اعمل اى حاجه ضميرى ما يوجعنيش خصوصا انى لما بعمل ... يا جماعه ما تخلوش شكلى الكيوت ده يخدعكوا 
صابر / احنا مش شايفينك اصلا
امايا / اخص عليك بقي ده جزاتى انى ما قتلتكوش و سبتكوا تروحوا
امايا تبص لشاكر
امايا / انتوا فاكرين انى ما كنتش اقدر اقلبها سواد و اقتلكوا انتوا و كل اللى دخلوا المبنى ؟ هو انا لازم اوريكوا اسوء ما فيا عشان تصدقوا انى مش هفيه ... لايقه تصدقوا
صابر / القاعده دى كانت قاعده رجاله عارفه ايه اللى بيميز قاعده الرجاله
امايا / احب اعرف منك
صابر / انها ما فيهاش رغى كتير ... عاوزه ايه من الاخر
امايا / انا قولت اللى عوزاه فاضل بقي اعرف اللى انتوا عاوزينه
شاكر / احنا هنا لحد ما الجبل ينضف و كل واحد يرجع مكانه
امايا / سهله ترجعوا بس مش كلكوا او اللى هيرجع منكوا يكون ولاءه ليا
مرزوق / عشم ابليس فى الجنه احنا ما تحكمناش حرمه
امايا تضحك
امايا / مستهون اوى انت بالحرمه مع ان اعظم حروب الدنيا قامت بسبب حرمه الجبل نفسه ضاع منكوا بسبب حرمه البلد دى كلها على بعضها متشقلب حالها عشان خاطر حرمه ...ايه رايك يا مرزوق تنسي للحظه انى حرمه و تقوم توريني نفسك
مرزوق / اوريكي نفسي ازاى يعني
امايا / تراهنى انى هحط وشك فى الارض فى اقل من خمس دقايق
شاكر / ما بنراهنش ... وصلتى رسالتك خدى ضيافتك و سبينا نرجع لمزاجنا تانى على راى صابر احنا بنحب قاعده الرجاله عشان بنحب الهدوء اللى بيبقي فيها
امايا / تمام بس للتأكيد اللى عجباه عيشته و مستواه و مستعد يموت عشان ناس تانيه بتكنز الفلوس و الدهب هو حر اما بقي اللى عاوز يامن مستقبله و مستقبل عياله و يبقي صاحب اراضي و املاك هو عارف طريقي ... و عشان شكله ما يبقاش وحش مش لازم يجي بنفسه هو بس ينوى و انا هعرف اوصله ... اتفضل
امايا تدى الراجل الطبق و تقوم
امايا / انا رايحه لنسمه تحب توصل لها اى رساله ؟
شاكر يمسك ايد صابر و يتك عليها قبل ما ياخد اى رد فعل و يقوم يقف قدامها 
شاكر / جربى تقربى منها اقسم بالله
امايا / هقرب انا فى بينى و بينها اتفاق امال انتوا فاكرين انها روحت بالسرعه دى ازاى ... يعنى هو منطقى انى ارمى كرت زى ده من ايدي ببلاش ؟ اكيد لا
شاكر يبص لصابر متابعه
امايا / قبل ما امشي بقولك لآخر مره ... لو مش فارق معاك زعلى فكر فى زعل امك و ابوك عليك سيب البلد و امشي
شاكر/ مش هيزعلوا لو ابنهم مات راجل قد ما هيزعلوا لو باع بلده لواحده زيك
امايا تبتسم و تسحب شاله من على كتفه و تشمه و تروح ناحيه العربيه و هى بتبص لشاكر و مبتسمه و تركب و تقفل الباب و تمشي
صابر / سبتها تاخده يا اهبل اهى دلوقت تعملك عمل على رجل نمله حوله تدوخك السبع دوخات
شاكر يبص له و يضحك و يروح يقعد مكانه
شاكر / الطبق ده ناقص منه حته لحمه انا عاددهم مش حركات دى على فكره
......................
فى سرايا الزنايته
هند تدخل اوضه ناصر بيلبس بجامه
هند / استغربت لما عرفت انك هنا انت كويس ؟
ناصر / بقيت كويس لما دخلتى عليا
هند/ اوعى ... دا ابوك ما عملهاش
ناصر يبتسم
هند / كنت فكراك فى الجبل مع اخوك
ناصر / هروح بالليل ما احنا متقسمين
هند / كويس ابقي خد معاك بقي كام بطانيه على كام قارورة مايه و عملين بقي شويه فطير انما ايه
ناصر / انا رايح امسك دوريه حراسه يعني لازم اكون فايق تقومى تديني فطير غرقان سمنه دا امايا هتدعيلك
هند / ليه السيره اللى تقفل الواحد دى الا قولى اخبار نور ايه فرح اخوك اتأجل اهو ما تنجزوا بقي خلونا نفرح
ناصر / الجبل يرجع بس
هند / هيرجع هيروح فين يعني
ناصر يبتسم
هند / طمنى عليك مش ناقصك اى حاجه
ناصر / رضاكى عنى
هند / راضيه يا قلب امك و دى فيها كلام بس انا برده مش فاهمه انتوا ليه ما رجعتوش مع نسمه و اتاخرتوا فى مصر
ناصر/ ايه ؟!! ااااه اصل احنا كنا بنحاول نمسك الناس اللى خطفوا نسمه من الاول
هند / اه صح ... و مسكتوهم؟!
ناصر / لا مش عارف اصل انا دخلت المبنى مع الرجاله
هند / اه
ناصر / بس هم هربوا و منصور كان بيطاردهم بالدرون طلعنا احنا بقي على الطريق و على ما وصلنا و كدا ما سالتش بصراحه
هند / بس كدا ؟!
ناصر / شوفتى
هند / لو ما كنتش قد الباب كنت سكعت لك بتصيع على امك يلا دا انا اللى كنت بمسحلك ال
ناصر / اييييه ايه ما وصلتش لل  ما وصلتش و بعدين قد الباب و لا قد الكرسي هكبر على ست الحبايب برده
ناصر ينزل على نص ركبه
ناصر / سكعى يا ست الكل و لا يهزك
هند / انا شكلى هتثبت كدا ... لا لا لا انا مش هضعف قدام الكلام الحلو انا ... قولى ياض انت بتعامل نور كدا
ناصر/ ازاى يعني مش لما تبقي مراتى كدا
هند / متربي قلب أمه المؤدب
ناصر / لان الحلال أجمل سانتظر
هند / قلب أمه يا ناس
........................
فى الجبل
شاكر واقف فى جنب لوحده صابر يروح له
صابر / اللى واخد عقلك
شاكر / مفيش بتفرج على الجمال مش اكتر
صابر / اول واحد يشوف فى الصحرا جمال دا لا زرع و لا مايه و لا وجه حسن
شاكر / ربنا ما بيخلقش حاجه وحشه
صابر / و نعم بالله ... عاوز اتكلم معاك فى حاجه
شاكر / حبيبي خير
صابر / انا عاوزك تبقي كبير الجبل
شاكر / مفيش حد ينفع ياخد مكانك
صابر / انت تنفع ... و الأحسن كمان انك ما لكش نقطه ضعف و الأحسن و احسن ان ما فيش اتنين فى الجبل يختلفوا عليك و الكل هيقول امين و يبايع من غير كلام و لا مشاكل انت اللى هتقدر تجمع الرجاله دول تانى قبل ما هى تلاقى سكه تدخل بيها بينهم
شاكر / انتى عارفني كويس انا ما ينفعش ابقي قائد
صابر / لا تنفع انت اللى مش عاوز انت قوى و شجاع و ذكى جدا و حنين و كل حاجه حلوه خلقها ربنا اتجمعت كدا و بقت فى شخص واحد اسمه شاكر الزيني
شاكر / بس بقي بتكسف
صابر / ياختى بطه حلوه
الاتنين يضحكوا
صابر / جد بقي ... انا موافق و راضي و انت الوحيد اللى بجد مستعد ابقي تحت قيادتك بنفس صافيه و ما احسش ثانيه بالغيرة او انى كنت استحقها
شاكر / يا عم انت مديني اكبر من حجمى بكتير
صابر / انتوا ما عندكوش مرايات فى بيتكوا يلا
شاكر / انا عايش معاك فى الجبل يا صابر ما بشوفش الا خلاقكوا
صابر / اتاريك نفسك مصدوده عن الدنيا يا ولدى
شاكر / بقولك ايه انت عاوز تخلع مش كدا
صابر / بصراحه مش هنكر ... نفسي... نفسي ارجع اكمل السنه اللى ضاعت عليا و افتح عياده و الدكتور راح الدكتور جه
شاكر / مش قادر اتخيلك دكتور نهائى ... انا اخاف اكشف عندك اصلا أنت مش شايف دراعك
صابر / على فكره انت دكتور صحيح بتاع بهايم بس دكتور
شاكر / ما علينا على فكره عادى انك تكمل السنه و تتجوز و يبقي لك بيت فى البلد تروح و تيجي عليه و برده ملك الجبل ايه يعني و يا سيدي ما تقلقش هبقي أسد مكانك لحد ما ترجع
صابر / انا عاوز عيشه هاديه للعيال و امهم بعيد عن كل ده
شاكر / تفتكر ؟!
صابر / نفسي ... يرجع الجبل بس و ... نشوف
شاكر/ رجع الجبل و عملت اللى نفسك فيه و بقيت الدكتور راح الدكتور جه و فجاه حصل اللى حصل عاوز تقنعنى انك مش هتكون اول واحد يرفع السلاح و يقف فى بوز المدفع ... صابر دا فى دمنا ... احنا كدا ما نعرفش نعيش الا كدا
صابر يبص الناحيه التانيه
صابر / هو كدا كدا مش هيوافق عليا اصلا ... بس قولت يمكن لو ... يعني
شاكر / هيوافق ... ما تقلقش نرجع الجبل و انا بنفسي هروح اتكلم معاه
صابر / ما عملش حساب للكبير و وصل لى كلامه هيجبروها ترفض و تبقي جت منها
شاكر / عندى فكره ... احيانا يعني احيانا ... الواحد بيحتاج يبقي وحش و يعمل حاجات وحشه بس ما بياذيش حد يعني بس هى تبان وحشه فاهمنى عشان يوصل لحاجه حلوه
صابر / اخطفها؟ 
شاكر / امشي يا صابر ... امشي
صابر / ما انا ما كنتش هعمل كدا اصلا انا بس استغربت انك تقترح حاجه زى دى اساسا
شاكر / على بابا يلا دا انت عنيك نورت كانك هتموت و تعملها
صابر / الصراحه اه
الاتنين يضحكوا
صابر / بس هى ما تستاهلش كدا ... تستاهل تخرج من بيتها معززه مكرمه عروسه بفستان ابيض و زفه و نرقص بالخيل ... و افرش البلد كلها نور كلها على فكره كلها و دبايح بقي و ولايم و الناس كلها ترقص و تاكل و تفرح و هى تفرح... هى تستاهل تفرح على فكره ... تستاهل الخير بس ... عارف انت اول يوم مسافرين فيه فى القطر..  راكبين كلنا بقي و واخدين العربيه من بابها و البنات قاعدين مع بعض و الرجاله مع بعض عارف ايه اكتر حاجه فاكرها فى اليوم ده ... ضحكتها و هى سرحانه فى الشباك كأنها بتتفرج على فيلم سيما ... الدنيا كلها فى كوم و هى فى دنيا تانيه خالص لوحدها ... فرحت اوى بقي لما لقيتها معايا فى المدرج طبعا مش نفس السيكشن بس كنت بستناها تخلص و أفضل قريب لحد ما اطمن انها ركبت العربيه اللى هتوصلها السكن ... اسكت بقي و اروح ... افضل ابرم كدا لحد ما خليتهم يروحونا فى عربيه واحده
شاكر / عملتها ازاى
صابر / ما جاتش كدا دايركت يعنى المفروض ليا جدول و ليها جدول فانا العربيه اللى بتيجي تاخدنى بكلمهم و اقول و بعدين قولت مش عاوز عربيه اصلا انا هروح و اجى لوحدى انا مش محتاج حراسه و لا انا قليل ... هو انا قليل
شاكر يضحك
صابر / طبعا مره فى مره بقيت اطلع بدرى شويه و طبعا عارف السواق اروح اسلم عليه و اتصاحب و أفضل ارغى و اللت معاه لحد ما هى تطلع و استنى اللى يعزم يوصلني يا جدع ابدا
شاكر يضحك بصوت
صابر / قولت ما بدهاش بقي انا هعمل دايخ
شاكر / ما تهزرش
صابر/ صغير بقي
شاكر / وصلك؟!
صابر / طبعا و استاذنى يوصلها الاول و بعدين نطلع على المستشفي جيت انا بقي فى نص الطريق كدا قولتله معلش اقف هنا ثانيه عند محل عصير كدا و نزلت جبت تلاته عصير
شاكر / عارفها انا الحركات دى
صابر / ما رضيتش تاخده
شاكر / جدعه
صابر / طلبت كشكول المحاضره
شاكر / يوه بقي
صابر / صورتهولى
شاكر / ما ادتلكش الكشكول؟
صابر / تؤ قالت لى فى حاجات محتاجه اعدلها و ابيضها و باذن الله بكره اجيبلك المحاضره لقيتها تانى يوم جيبالى المحاضره متصوره بدل ما انقل طب كام طيب ابتسمت و سابتني و مشيت
شاكر / ما سكتش طبعا
صابر / بصراحه سكت اصلى استصغرت نفسي اوى ايه اللى بهببه ده و آخرته ايه
شاكر / امال
صابر / قعدت شهر كدا و لا حاجه يعني كل واحد فى حاله لحد ما فى يوم لقيتها بتشد فى الكلام مع عيل ملزق محفلط ما يسواش فى سوق الحمير تلاته ابيض
شاكر / الله يرحمه طبعا
صابر / و انا من امتى بمد ايدي على نسوان يا شاكر
شاكر / عميقه
صابر / انا بس دخلت كدا و نشفت الحنجره سيكا و قولتلها فى حاجه يا دكتوره نسمه ... خلصت
شاكر / شبح
صابر / اتارى البيه كان المفروض مرتب مواعيد كورس كدا و اختار المعاد متأخر يرضيك
شاكر / و اخويا موس الدفعه موجود
صابر / بس ندخل المكتب اقعد اشرح لها ساعه و تروح تذاكر و تانى يوم و طبعا كنت باكل الكتب اكل عشان لما تسألني اجاوب و اروح للمعيد ده و للدكتور ده و اسألهم عاوز اقولك ان تقديرى طول السنين دى كانت هى السبب فيه
شاكر / ما روحتش طلبتها ليه ؟
صابر / عشان حيوان
صابر الضحكه تروح من وشه
صابر / مش عارف كنت مستنى ايه مش عارف ازاى اتسحبت فى السكه دى عارف انت الساعه المذاكره دى مع الوقت كانت بتصفصف على خمس دقايق مذاكره و الباقي رغى و بما ان فى منهج طاير فالساعه بقت ساعتين و الساعتين بقوا تلاته لحد ما بقينا بنزاكر اونلاين و نمرتها جت على موبايلي و نمرتى معاها و هاتك يا رغى طول الليل و الاسم ... بتذاكر و احلى مسا عليك يا شوشو و هو بيلعب بيا احلى لعب ... دياب اتخانق معايا و انا بقي الجلاله تاخدنى و انت عارفني كويس انا ما بلعبش بيها انت عشان كليتك فرضه عليك دنيا معينه انما انا اصلا كليتي كلها بنات و بساعدها و بعدين انا كدا كدا ناوى اتجوزها لما نخلص اخش على ابوها اقوله انى لسه تلميذ و اى حجه اى كلام فاضي اى حشو و كل يوم نتخانق و كل يوم ينصحني و كل يوم ... لحد ما نزلنا الاجازه ... تعرف الاجازه دى كانت اسوء فتره فى السنه انا الطالب الوحيد اللى كان بيعد الساعات على الدراسه اصلى هكلمها و لا هشوفها فين فى البلد ما كانتش بتخرج اصلا الا للضروره القصوى و مع أهلها
صابر يسكت
صابر / تليفونى نور رساله منها قلبي كان هيخرج من ضلوعى لقيتها بعتالى انا اسفه بس انا اسفه بس كنت هتجنن و اتجننت فعلا و اتصلت بيها ... مقفول ... ما عداش يومين تلاته كهارب ... خطوبه نسمه بنت عويس
شاكر يبص فى الارض
صابر / جريت على ابوها... قالى مفيش نصيب و اللى سبق بالطلب ... كان عارف بس ... كان عارف ما اعرفش بقي هى قالت له و لا حد بلغه ... بس هو كان عارف ... بصته ليا محفوره فى دماغى ما بنساهاش ... عرف و بيجبرها روحت للكبير ... و يا ريتني ما روحت ... خاسه النص و دبلانه و عنيها حمره و ايديها بترتعش ... ما عنديش فكره شافت ايه او سمعت او جرالها ايه ... لوحدها بتتعاقب على غلطتى لوحدها
صابر يدعك عنيه و ياخد نفس
صابر / قالت كداب و دياب و منصور قالوا نفس الكلام كداب ما بتحبوش و ابويا جه و سحبنى من قفايا و حبسنى فى الجبل لحد ما الجوازه تمت ... سافرت الجامعه ادور عليها فى المدرجات
شاكر / كلمتها ؟
صابر / ما كنتش ناوى ... بس كنت عاوز اطمن عليها و اشوفها حتى لو من بعيد ... اقول لها انا اللى اسف ... انا اللى اسف يا نسمه انا السبب
صابر ياخد نفس
صابر / الكليه كانت حقيره اوى و مش طايقها من غيرها شهرين تلاته و ابويا الله يرحمه ... جت من عند ربنا ... رميت كل حاجه ورا ضهرى و رجعت خدت مكان ابويا ... استعيلونى فى الاول ... ما كانش عندى اللى اعيش عشانه ... صيتى سمع صابر القط قلبه ميت اكتر من ابوه صابر القط أعنف من ابوه اقوى من ابوه اقسي من ابوه ... انا بس كنت عاوز اموت مش اكتر
شاكر / بعد الشر عنك طوله العمر ليك فى صحه و سعاده يا رب
صابر / مش هيوافق برده يا شاكر و مش هقدر اعمل له حاجه
شاكر / عاوز اخلع سيكا و هرجع تانى على طول
صابر / على فين ؟
شاكر / مش هتاخر ما تقلقش
شاكر يروح يركب عربيه و يمشي
مرزوق / هو راح فين ؟
صابر / مش عارف قال شويه و راجع
صابر يسيب مرزوق و يروح يقعد و مرزوق بيبص له بغل 
....................................
فى السيرك
البنت / شاكر ساب الجبل و نزل البلد 
امايا تناولها الشال
امايا / صوت و صوره
البنت / بس اكيد باباه مش هيسكت 
امايا/ من امتى بنجادل
البنت / تمام
البنت تاخد الشال و تمشي
............................