الكبيره ٢ بقلم / لولو_محمد

الحلقه ٢١

((((((( الكبيره ٢))))))
#لولو_محمد
الحلقه ٢١
عباده يدخل و هو مرهق جدا و مش قادر يصلب طوله يروح يعلق العبايه و يقلع الجزمه و يرمى نفسه على اقرب كرسي خديجه تقلق و تصحى
خديجه / انت جيت يا عباده
عباده / اه .. جيت
نجاه تقلق
نجاه / ايه ده هو احنا امتى
عباده / اتارى الاوضه منوره و ما احتجتش اقيد النور ... نايمين بدرى كدا ليه
خديجه / انا قولت هنغفل ساعه و لا حاجه ... مش عارفه هنعمل ايه دلوقت يومنا اتقلب حاله اهو
نجاه / مالك يابا شكلك تعبان ... تعال ارتاح
عباده / بقيت بخير لما شوفتكوا
نجاه / طب تعال ارتاح و انا خلاص نمت هروح اشوف اى حاجه اعملها
عباده / يونس و همام مسافرين مصر الفجر
نجاه / خير فى حاجه و لا ايه ... لوحدهم  ... هيسافروا لوحدهم
......................
خديجه / و هم صغيرين يعني و لا ايه ما يسافروا لوحدهم عادى مالك
نجاه / ما ليش بس مستغربه التوقيت بس مش اكتر
عباده / انا ما اعرفش رايحين فين و لا رايحين يعملوا ايه بس انا لا ليا حكم على ده و لا على ده عشان يرجعولى فى قرار اخدوه كتر خيرهم انهم بلغونى
نجاه / بس هم فى حمايتك هنا
عباده/ طول ما هم هنا لكن لو عاوزين يمشوا يتفضلوا هعملهم ايه
نجاه / تمام
عباده / انا هروح انام فى اوضتك خليكوا مرتاحين
نجاه / لا انا نمت خلاص هنزل المطبخ اشوفلى حاجه اكلها
عباده يهز راسه نجاه تقوم و تمشي عباده يروح يفرد ضهره فى سريره خديجه تاخده فى حضنها
خديجه / اعملك لقمه و لا اجيب لك اى حاجه
عباده / تسلمى خليني بس اللحق انام شويه قبل ما يحصل جديد فى البلد دى و يجوا يصحونى
خديجه تبوس راسه و هو يغمض عنيه
........................
فى مطار القاهره
جوزيف و همام خارجين من المطار
همام / انت معاك كام باسبور بالظبط
جوزيف / بتعرف تعد لحد كام
همام / و ما بتخافش تتقفش بيهم
جوزيف / اكيد ما بشيلهمش كلهم فى كل بلد ليا خن بحط فيه حاجتى اللى هحتاجها فى البلد دى فلوس و ورق و سلاح يعني دا غير العلاقات برده بتنفع
همام / الشهاده لله ابهرتنى انا قولت هناخد طياره خاصه انت حاجز التزاكر دى من زمان
جوزيف / مش محتاج احجز ... بتفهم فى الهاكينج
همام / النت يعني ... لا مش لعبتى
جوزيف / طب خلاص كبر مخك
همام / كبرته هنروح فين بقي السعادى
جوزيف / هنلعب ... وصل اهو ... اركب
عربيه توصل سايقها شاب تركن قدامهم جوزيف يركب قدام جنب السواق و همام يبص بعيد و يركب و الشاب يسوق
الشاب / الدنيا مقلوبه عليك ... مين ده
جوزيف / اطلع على فيكتور
الشاب / كدا كدا رايحينله عاوز يشوفك ... بس برده مين ده 
جوزيف / امان امان تبعى
الشاب / بيلموا رجاله كتير اوى و مش من جوه مصر بس الخوجات ما فيش اكتر منهم  ... بيقولوا فى طالعه كبيره و الجايزه اكبر
جوزيف / ما تتعبوش نفسكوا هتتلغى
الشاب / طب انت ايه نظامك الناس دى مالها قلبت عليك فجاه كدا ليه
جوزيف / لو كانوا قلبوا عليا كان زمانى عايش هنا و بكلمك يعني
الشاب / جرا ايه يا جو انت فى حد يقدر عليك برده اكيد مش بالسهوله دى يعني
جوزيف يبص لهمام
جوزيف / شايف الناس اللى بتقدر و تفهم ... شويه سنس مش اكتر
همام يبستم باستهزاء
جوزيف / فى لعب النهرده
الشاب / و كل يوم بس لو ناوى تلعب بلاش النهرده فيكتور وقع تحت ايده واد  روسي بس ايه ... جزار
جوزيف / معاك فلوس قد ايه
الشاب / برده !! ماشي
جوزيف / ما بتراهنش يا هيما صح
همام / لا
جوزيف / خساره كنت هتطلعلك بقرشين زى الفل ... اساله الواد ده شارى عماره من ورايا
الشاب / و العربيه دى و حياتك
همام ما بيبتسمش و الشاب سايق
......................
فى شقه ام عبد الهادى
رجاله كتير قاعده بتزعق و تتخانق شاب يخبط بايده على ترابيزه
الشاب / و انت ايه اللى يوديك المركز يا عبد الهادى ايه اتشلينا كلنا و لا الرجاله خلصت فى العيله و لا ايه ان كنت انت هتنسي تارك احنا مش هننساه
راجل ١ / اهدى يا محمود الدنيا ما بتمشيش كدا و بعدين هو ما راحش المركز و لا بلغ بكيفه هم اللى حققوا معاه لما رجاله صابر رموه هو و المرحوم قدام المستشفي
راجل ٢ / بس قالهم ان صابر اللى قتله كان المفروض يقول ما اعرفش
محمود / نسي ان ابن وهدان عنده اللى يشيل عنه بدل التهمه الف و فى الاخر هيهربهم و يتاويهم عنده فى الجبل دا مجرم ارارى ابا عن جد و ما لوش كبير يحكمه
راجل ١ / انت ما كانش المفروض تطلع الجبل بطولك من الاول ايه ما لكش اهل ما لكش عزوه
محمود / اقسم بالله يابا ما هيغفلى عين الا اما اكون واخد حق ابن عمى و مبيت سي زفت ده فى تربته
عبد الهادى يتنطر من مكانه
عبد الهادى / لا يا محمود اياك ... دم رعد انا اولى بيه و حقى عند صابر انا اللى هجيبه كتر خيرك يا ابن عمى بس انا مش هسيب حقى و مش محتاج حد يجيبهولى و لا مؤاخذه
نسمه سانده ضهرها على حيطه المطبخ جنب الباب و بتسمع زعيقهم و تعيط ابنها يدخل
الولد / انا جعان
نسمه تمسح دموعها بسرعه و تجرى تفتح التلاجه و تطلع اكل و تجهزه
........................
فى فندق فخم
عربيه جوزيف تدخل و تركن و ينزل التلاته منها واحد يركب العربيه و يروح يركنها التلاته يدخلوا جوزيف ماشي اول واحد و يروح ناحيه الحمامات عامل النظافه يحيه براسه جوزيف يدخل هو و الشباب وراه
همام / هو ليه دايما بيبقي فى الحمام
جوزيف يفتح كابينه مكتوب عليها مغلق للصيانه و يحرك القاعده الباب يتفتح
جوزيف / ابقي اسال المعماري
التلاته يدخلوا و يمشوا فى ممر ضيق طويل اخره سلم بيوسع بالتدريج لحد ما يوصلوا لباب واقف عليه جارد اول ما يشوف جوزيف
الجارد / باشا
جوزيف / اوعى اكون اتاخرت
الجارد / نعيد من الاول معاليك
جوزيف يضحك الجارد يفتح الباب و التلاته يدخلوا همام يشوف المنظر عنيه توسع و يفضل يبص ستات و شباب بيرقصوا و يسكروا   فى تجمع ناس على ترابيزين جوزيف يروح يبص اتنين فى الدور اللى تحت بيقتلوا بعض حرفيا و حواليهم ناس كتير بتشجع و تصرخ بشكل هستيرى
جوزيف / مفيش قوانين اتنين بيدخلوا واحد بس بيخرج
همام / و التانى
جوزيف / بيموت
همام يبص تحت يلاقي واحد من الاتنين ثبت التانى و قطم رقبته و الكل بيصرخ و يسقف و يهلل
جوزيف / من قريب احلى تعال
جوزيف يروح ناحيه سلم و ينزل و همام و الشاب وراه الدور اللى تحت فيها شبابيك حديد للمراهنات و بنات بتلف بصوانى عليها حبوب و كاسات واحده منهم تروح بصينيه ناحيه همام يهز راسه لا راجل يدخل يرحب بجوزيف
الراجل / لما بلغونى ما صدقتش سبت الفى اى بى روم بنفسي و جيت استقبلك بنفسي مع العلم ان معايا جوه شويه اوزى فرز اول ما بيطلعوش غير للحبايب
جوزيف / لا مش النهرده ... انا جاى اللعب
الراجل / تلعب ؟ بنفسك !! و ماله بس بقولك ايه طول مش خمس ثوانى و تنهى زى كل مره عاوزين نطلع بلقمه حلوه
جوزيف / محتاج وقت قد ايه
الراجل / طمعان فى كرم اخلاقك
جوزيف / حبيبي
الراجل / الباشا اول مره يشرفنا مش كدا ... بيبان ... الجديد دايما عنيه فضحاه بس مش عاوزك تقلق خالص انت جيت للمكان الصح و اوعدك اوعدك مش هتخرج من هنا غير و انت فاكك و ناسي نفسك خالص
همام / تشكر ... احنا هنطول هنا
جوزيف / اديك شايف الراجل بيتحايل عليا اطول اهو
الراجل / ما انت بس لو تطاوعنى و غلاوتك و غلاوه الملك اللى معاك انت ما هيهون عليك تخرج من الجنه إلى هتدخل فيها على ايدي
همام / كتر خيرك
جوزيف / انا مستعجل ورايا طياره فانا لو منك تنجزنى و تدخلنى نيكست و سمعت ان عندك حته روسي فرز اول
الراجل / ما بلاش
جوزيف / هتزعلنى باين عليك
الراجل / خلاص اللى تشوفه بس تعمل حسابك انى شخصيا هراهن عليك
الشاب / انا جاى عمران
الراجل / حبيبي مش خساره فيك ... عن اذنكوا ادورها
الراجل يمشى
همام / الشهاده لله كنت فاكر الحاجات دى شغل سيما
الشاب / و انت لسه شوفت حاجه دا فى دور تحت كمان بس ايه عنب
جوزيف / الراجل متجوز
الشاب / ما معظم اللى تحت متجوزين دا نص الرجاله ما بتعرفش العط غير بعد الجواز و الخلفه ما انت ابن بلد و عارف الخامه المصرى بتفرشح فى الغسيل
همام ما بيضحكش الشاب يبلع ريقه و يعدل هدومه جارد يدخل يوشوش جوزيف
جوزيف / اتفرج
جوزيف يروح يقف فى النص و الناس بتهلل و تصرخ و همام واقف و بنت بتعدى تسجل الرهونات و تلم الفلوس و تدى مقابلها كبونات يتفتح باب و يدخل راجل اقرع ضخم عروقه نافره و جسمه متغطى بالتاتوز يقعد يصرخ فى وش الناس بحركات مجنونه و الناس بتصرخ فى وشه و همام متابع كل ده و هو مستغرب بنت تعدى و فى ايدها لوحه عليها تايمر بيعد تنازلى الناس ترجع لورا و جوزيف و الراجل يقفوا فى النص جرس يضرب الراجل يضرب جوزيف بالرجل يطيره يقلبه فى الارض همام يجي يدخل الناس تمنعه يبص على جوزيف ما بيتحركش
.............................
فى الجنينه الورانيه فى سرايا الزنايته
نجاه بتتمرن على الحركات اللى اتعلمتها لحد ما تقع و تفضل تنهج فتنام فى الارض جابر يدخل يشوفها يتخض يجرى عليها
جابر / نجاه !!
نجاه تقوم تقعد يقعد جنبها
جابر / وقعتى قلبي يا شيخه حرام عليكى
نجاه / ناولنى المايه
جابر يقوم يناولها الازازه تشرب و يروح يقعد على المرجيحه و هى مربعه فى الارض
نجاه / تسلم
جابر /  ايه الاخبار
نجاه / مش عارفه ليه هافف عليا اخد ملك و اطلع الجبل و اجرى فى الصحرا و اقطع نفسها هى كمان ههههههههههه
جابر / للاسف مفيش جبل خالص الفتره دى
نجاه / ليه خير فى حاجه حصلت و لا ايه
جابر / ايوه و الدنيا مقلوبه
نجاه / انت هتنفطنى ما تحكى و تخلص يا ابنى وترتنى
نجاه تقوم تقعد جنب جابر على المرجيحه
جابر / صابر قتل رعد الجزار
نجاه / من الباب للطاق كدا اكيد لا طبعا اكيد فى حاجه
جابر / ما اعرفش ما حدش عاوز يقول حاجه بس صابر كدا كدا خارج منها الكبير فى ضهره
نجاه / شوفت قولتلك مش من الباب للطاق اكيد رعد عمل حاجه تستاهل ربنا يستر بقي و الحكايه ما تكبرش عن كدا
جابر / لا هتكبر طبعا و احنا ملطوطين فيها بالجامد لان منصور و شاكر هم اللى راحوا سحبوه من المستشفي عند اخوه و حققوا معاه و سلموه لصابر و بعدين عبد الهادى ساب المستشفي و طلع لصابر الجبل و رجاله صابر رموه هو و جثه اخوه قدام المستشفي
نجاه / و شاكر ما قالكش حاجه
جابر / و لا عمره هينطق انتى مش عارفاه
نجاه / طب و اخرتها هنعمل ايه ؟
جابر / هنعمل ايه فى ايه ما تتهدى يا بنتى شويه انا حكيتلك كل ده عشان تعرفى ان الجبل خطر جدا اليومين دول و تتكنى انما اكتر من كدا انتى براها خالص
نجاه / انت شايف كدا
جابر / انا ما بشوفش حاجه خالص انتى حره
جابر يبص الناحيه التانيه
نجاه / ما تقوم اما اتعلم فيك الحركه الجديده
جابر يبصلها و يعوج راسه
نجاه / ما تخافش هاخدك على الهادى
جابر / اكتر من كدا ايه دا انا استويت
نجاه تقوم و تتنطت مستعده و تشاورله تعال يقوم لها و يتمرنوا و هم بيضحكوا بصوت عالى
................................
عند جوزيف
جوزيف نايم فى الارض و الراجل الضخم عمال يصرخ و يحمس الناس و هم عمالين يشجعوه يروح يشيل جوزيف و يحدفه على اخر دراعه و الشاب ماسك همام مانعه يدخل
همام / اوعى يا عم الجدع هيموت اوعى سبنى
الشاب  / اهدى يا بلدينا الكينج ما بيقعش بسهوله دا انا حاطت عليه تحويشه عمرى
همام يبص للراجل و يبص لجوزيف الراجل الضخم يروح يشيل جوزيف تانى يرفعه لفوق و يصرخ و الناس تهلل و تتحمس فجاه جوزيف يفتح عنيه و يسحب توكه الحزام يطلع السلك يتشقلب ينط فى الارض و هو بيلف السلك على رقبه الراجل و يسحب راس الراجل تطير و الراجل يقع فى الارض وسط صمت تام و فجاه تشجيع و صريخ و حماس جنونى البنت اللى كانت بتلم الرهونات تروح تبوس جوزيف يبتسم تناوله فوطه يمسح الدم و يمشي ناحيه همام بيبص حواليه بقرف
جوزيف / ضيعنا وقت كتير ندخل فى الشغل بقي تعال
جوزيف ياخد همام و يروحوا مكتب يدخلوا يلاقوا الراجل صاحب المكان يقوم ياخد جوزيف بالحضن
جوزيف / نسبتى
الراجل/ اتحولت معاليك بس ما كانلوش لزمه تنهيها بسرعه اوى كدا كان عندك اكتر
جوزيف / مستعجل ... انا محتاج سلاح و رجاله من بتوع بلاد بره
الراجل و همام ينتبهوا
الراجل / تؤمرنى محتاج ايه بالظبط ؟
جوزيف /  عاوز سلاح يكون فيه اعاده توجيه تلقائى على الأهداف المتحركه
الراجل / و الرجاله ؟
جوزيف / محتاج ناس اثق فيهم و يثقوا فيا عشان وقت الجد ضهرنا ما ينكشفش مش زى الجماعه اياهم وقت الجد يرموا السلاح و يجروا المرادى بتتعامل مع ناس محترفه مش شغل سرسجيه
الراجل / تمام اعتبر اللى طلبته تم
جوزيف يطلع ورقه
جوزيف / دى اماكن ترب بره مصر فيها فلوس كتير جدا ابعت حبايبك يطلعوها و حلال عليك و لو المبلغ ما كفاش عندى هنا زيهم
الراجل / جديد النظام ده
جوزيف / دا حوار كبير هشرحولك بعدين
الراجل / تمام معاليك ... تؤمرنى بحاجه تانى
جوزيف / حبيبي ... يلا يا هيما
همام / يلا
الراجل / كدا من غير ما يشرب حاجه ؟ يقول علينا ايه دا حتى ضيف 
جوزيف / مره تانيه بس المرادى محتاجه و مستعجل
الراجل / عشان خاطرك انت المرادى بس مش محسوبه
جوزيف/ اكيد
جوزيف يمشي همام يمشي وراه و الراجل متابعهم و مبتسم
....................
على القسم
منصور / الكلام ده تطير فيها رقاب و اللى قاله او اتعرف مش هيطلع عليه نهار
الظابط / دى تحقيق يا باشمهندس و الحقيقه لازم تتقال كامله
منصور / و الحقيقه دى ايه اللى يجيب اسامى بنات الناس فيها و بعدين لو صابر عينه فى مرات عبد الهادى ما قتلش عبد الهادى نفسه ليه و خليله الجو يقتل اخوه ليه و يرمى عبد الهادى قدام المستشفي ليه ما كان دفنه فى الجبل و خلص و لو صابر اللى قتل عبد الهادى اصلا ما دفنوش فى الجبل ليه برده هو سعادتك تايه عن شغل المطاريد
الظابط / امال مين اللى قتله يا باشمهندس
منصور / ما اعرفش ما كنتش معاهم
الظابط / بس رجالتك اللى اخدوا رعد من المستشفي بشهاده كل الموظفين
منصور / حصل الكبير كان عاوزه اتكلم معاه كلمتين و سابه يمشى و عندنا على الكلام ده بدل الشاهد الف
الظابط / و كان عاوزه فى ايه بقي
منصور / ما اعرفش الكبير يقولك... هو مش سعادتك هتحقق معاه كدا زى ما بتحقق معايا برده و لا ايه
الظابط / دا مش تحقيق دى دردشه بحاول املا بيها المحضر المفتوح قدامى
منصور / طب خليني اوفر على جنابك التعب اسم نسمه ما يتقالش خالص فى المحضر لا من بعيد و لا من قريب دا لو جنابك عاوز الحكايه تتلم و ما تفتحش سلسال دم فى البلد يجيب اولها من اخرها
الظابط / للدرجادى
منصور / هو الباشا جديد على الصعيد و لا ايه ما انت ادرى بسيره الحريم ممكن تعمل ايه
الظباط / و اللى قتل رعد
منصور / ما افهمش فى شغل الحكومه و لا القانون انا حياله مهندس بس انا متاكد ان جنابك انت و رجاله الشرطه الشرفاء هتقدروا تمسكوا المجرم الحقيقي فى اسرع وقت و تقدموه للمحاكمه العادله
الظابط يبتسم منصور يبتسم
الظابط/ اكتب عندك يا ابنى
........................
قدام القسم
صابر يخرج عبد الهادى مستنيه وسط اهله يتعدل فى وقفته صابر يروح يحضنه
صابر / البقاء لله ما نجيلكش فى حاجه وحشه
عبد الهادى / ما تتعبش نفسك انا اللى هجيلك
صابر / تانس و تنور بس انا بدى الفرصه مره واحده و مش هعمل خاطر لعيالك كتير مش هبقي احن عليهم من ابوهم
محمود / انت بتهدده وسطينا و لا ايه
صابر/ معاش و لا كان اللى يهدد حد من ولاد الجزار دا انا جاى اعزى ... ما نجيلكش فى حاجه وحشه يا محمود
محمود / مش هناخد العزى دلوقت ... لما نبرد عضم التربه الاول و ناخد تاره
صابر / بالاذن
صابر يمشي و عنيهم عليه صابر يركب العربيه و يتحرك راجل يطلع من القسم يجرى عليهم
الراجل / واحد من المطاريد اعترف ان هو اللى طخ رعد عشان كان مديونله بفلوس و ما رضيش يسددها
محمود / مصلحه ... جت من عندهم صلحوا الغلطه اللى غلطتها يا ابن عمى ... شد حيلك بقي و قوم لنا بالسلامه و برد نارنا
عبد الهادى / قريب اوى قريب اوى باذن الله
.........................
فى شقه همام
همام قاعد بيفكر جوزيف يطلع من اوضته يشوفه يروح يقعد معاه
جوزيف / لسه بتفكر فى مصر و اللى حصل فيها؟
همام / هو احنا روحنا فى ايه و جينا فى ايه
جوزيف / انت شوفت ايه هناك
همام/ ما شوفتش غير قرف و بلا ازرق
جوزيف / ما شوفتش رجاله منفخه هرمونات مع اول شكه بتفرقع ... عاوز تملا البلد منهم عشان يخوفوا مين بالظبط ... احنا !! لا ما بياكلش معانا احنا بنبعتهملكوا عشان انتوا بياكلوا معاكوا لكن احنا عارفين اخرهم و حتى معاكوا ما بيسدوش
همام / هو ده بس اللى اخدتنى معاك المشوار ده كله توريهونى
جوزيف / لا انا طلبت من الراجل فى المكتب يبلغهم بره ان الخطه ماشيه بس كل اللى حصل انى غيرت المسار عشان تثقوا فيا و عربون المحبه الفلوس ورثي من ابويا ايه رايك فيا بقي
همام / و كرم الضيافه
جوزيف / حياتك ... شوفت بقي انت غالي عليا ازاى ما رضيتش اضحى بيك
همام / كان قلبي حاسس طب و البت اللى باستك
جوزيف / لا دى بوسه عاديه ايه هو انتوا ما بتبوسوش و لا ايه
همام / مش كدا
جوزيف / امال ازاى
همام / جرا ايه يا جدع ما تتلم هو انت شايفنا ايه
جوزيف / لا بجد هو فى ايه انا كدا بدات اقلق 
همام / تعرف تخليك فى حالك
جوزيف / يا عم و انا مالى ما عنك ما بوست هو انت هتبوسنى انا ما تولع
همام / دا انت باكس يا جدع ... يا عم الحج الحاجات دى ما بتتعملش كدا قصاد اللى ما يشترى يتفرج حرام
جوزيف / المهم موجوده ... طمنتنى دا انا كنت هتجنن
همام / ما تتجنن و لا تولع حتى انت حد مسلطك عليا يا جدع انت انا كان مالى انا بكل الهم ده
جوزيف / كدا !! حقك ... انا خارج تيجي
همام / رايح فين
جوزيف / رايح ارخم على نوجه سايبها من امبارح
همام / ما تحترم نفسك يا جدع انت نوجه ايه اسمها الست نجاه
جوزيف / الست نجاه !!
همام / اه و كفايه عليك الست ما تنطقش اسمها على لسانك انت فاهم و لا لا
جوزيف / لا مش فاهم ... انا رايح امرنها تيجي و لا لا
همام / هاجى ... و مش هشيل عيني من عليك بعد اللى حصل فى مصر انا ما اضمنكش
جوزيف يقوم و يضرب كف على كف و همام متابعه و الغضب باين عليه
...........................
فى شقه ام رعد
نسمه تدى حماتها حقنه الست تنام نسمه تطلع بره عبد الهادى قاعد بيفكر
نسمه / نامت
عبد الهادى يبصلها و يشاور ليها تروح تقعد جنبه
عبد الهادى / عامله ايه
نسمه / الحمد لله انت عامل ايه ؟ تحب اغيرلك على جرحك ؟
عبد الهادى يهز راسه لا
نسمه / تحب اعملك لقمه تاكلها و لا كبايه شاى ؟
عبد الهادى / انتى ايه رايك فى اللى بيحصل
نسمه / ربنا يزيح الغمه هقول ايه
عبد الهادى / ليه ما قولتليش
نسمه تبصله يبصلها
نسمه / انا ما كنتش اعرف ان رعد اللى باعته افتكرت ان صابر اتجنن و جريت على الكبير يلمه عنى
عبد الهادى / عملها قبل كدا ؟
نسمه / يمين بالله ابدا و لا شوفته من يوم المستشفي لما وصلنى انا حتى استغربت و طردت المرسال بس خفت
عبد الهادى / و لما خفتى ما جيتيش لجوزك ليه
نسمه / خفت ... عليك
عبد الهادى يبص الناحيه التانيه
نسمه / هتعمل ايه لما اجى اقولك صابر باعتلى مرسال قولى هتعمل ايه
عبد الهادى يبصلها
نسمه / هتقتله صح هتجرى تقتله و يا انت تقتله يا هو يقتلك و فى الحالتين انا خسرت جوزى و عيالى خسروا ابوهم ما انت يا هتموت يا هتتحبس و فى الحالتين ما كناش عرفنا ان رعد هو اللى وراها
عبد الهادى / كل الحاجات اللى كنتى بتحكيها كانت حقيقه ؟
نسمه/ و انت يعني ما كنتش عارف الحقيقه يا عبده ... انت تعرف انى هسيبك راقد و اروح الا اذا كان التعب غلبنى و سايبه معاك اللى يطمنى عليك تفتكر هعرف انك فوقت و مش هجيلك جرى
عبد الهادى / بتحبيني يا نسمه
نسمه / مش جوزى و ابو عيالى
عبد الهادى / و صابر
نسمه تقوم و تتعصب
نسمه/ انا مالى بيه و لا هو نفسه ماله بينا ايه اللى حشره فى حياتنا تانى مش اخوك ... عمل كدا ليه ؟ ايه مصلحته ؟
عبد الهادى يبص الناحيه التانيه نسمه تروح تقعد جنبه و تمسك ايده
نسمه / عبده ... رعد كان غالى عليك عارفه ... بس رعد ما كانش بيحبك زى ما بتحبه ... الله يرحمه ما كانش كويس
عبد الهادى / عوزانى اسيب دمى
نسمه / مش عاوزه اتبهدل انا و عيالك من بعدك
عبد الهادى / ما تقلقيش مش هروحله غير لما اخف و ابقي جاهز
نسمه / ما تروحلوش خالص هو مش عدوك
عبد الهادى / لا مش عدوى بس شوكه و غارزه فى ضهرى و كان المفروض اخلص منها من زمان
نسمه / يعني دا رايك خلاص ارتب نفسي اعد الايام لحد ما تخف و تقوم بالسلامه و تروح لصابر الجبل وسط رجالته يا تقتله و تخش السجن يا يقتلك تمام يا عبده اعمل اللى انت شايفه صح قال يعني رايي عمره فرق معاك
عبد الهادى يبص الناحيه التانيه
نسمه / انا داخله انام هتحتاج منى حاجه قبل ما انام ؟
عبد الهادى / تصبحى على خير
نسمه / و انت من اهله
نسمه تسيب عبده قاعد و تدخل الاوضه و تسيب الباب مفتوح و عبد الهادى قاعد بيفكر
…………………..
فى الطريق
همام سايق و جوزيف جنبه يشوف شاهين واقف وسط رجاله بيضحكوا
جوزيف / وقف وقف
همام/ السرايا لسه قدام
جوزيف / وقف بس
همام يقف جوزيف ينزل يروح يقف وسط الرجاله يسكتوا
جوزيف / ايه امشي ؟
راجل ١ / ازاى تانس و تنور بس الناس تدخل ترمى السلام حتى عشان الشياطين ما تدخلش فى رجليهم
جوزيف يبص على جزمته الفرده اليمين و بعدين الشمال
همام/ مجازا يعنى ... السلام عليكم يا رجاله
الرجاله / و عليكم السلام
جوزيف و شاهين بيبصوا لبعض جوزيف يبتسم شاهين يرتبك و يحس ان فى حاجه غلط
جوزيف / مالك ؟
شاهين / مالى !
جوزيف / حاسك مش مرتاح... تحب امشي
همام / يا ريت عشان يا نلحق الناس يا نروح
جوزيف / تمام ... يلا ... هشوفك تانى ... اكيد
شاهين / و ماله يعني ... وقت ما تحب
جوزيف يبتسم شاهين يستغرب جوزيف يرجع العربيه و وراه همام
شاهين / دا ماله ابن المجنونه ده ... هو فى ايه
راجل ٢ / فكك منه بيقولوا عليه لاسع اصلا
راجل ١ / انا اساسا مش فاهم ازاى الكبير طالقه وسطينا كدا عادى دا بيقولوا عليه خطر جدا
شاهين / لا ما تخافش دا كان زمان انما دلوقت زيه زى اقل واحد فينا
راجل ٢ / ايه الكلام ده دا بيقولوا نزل قصاد سي جابر الزيني و ما فكش الحكايه غير الست احلام شوت الخواجه بالميه السخنه
راجل ٣ / و الله يا رجاله احنا ما حد فينا فاهم الحكايه دى اولها ايه و اخرها ايه ناس تقول الخواجه ده اللى كان خاطف الست نجاه و لما رجعها ادوله الامان من الجماعه اللى كان شغال معاهم و ناس تقول دا ابن رشيد السبع اللى اكتشف علاج البى كاى و عشان يعاقبوه خطفوا ابنه و عذبوه و جندوه و الحمد لله الست نجاه لقته و هربوا سوا و جه يتحامى هنا و ناس تالته خالص بتقول انهم دافعينله فلوس كتير اوى عشان يجي يدربهم هنا و يامن الدنيا قصاد الجماعه الخوجات بس الشهاده لله هو مش مريح خالص و لما بيدخل المكان تحس ان قلبك انقبض خصوصا لما تبص فى عنيه الخوجاتى الزرق دول
راجل ١ / اهى دى الحاجه الوحيده الصح فى الحوار ده كله انه مش سالك و وجوده وسطينا خطر
راجل ٢ / بس بيقولوا انه انقذ حياه سي دياب و انه كمان ساعده يفجر الدرونز اللى هجمت على البلد
راجل ٤ / احنا اتهرينا اقسم بالله و مش عارفين الحكايه دى هتخلص على ايه انا الوليه كل يوم تزن ابيع القيراطين اللى حيلتى و اروح اشترى بدالهم اى حاجه فى اى حته تانيه بتقولى البلد دى ما عادتش زى زمان
راجل ١ / قولت كدا لابويا شتمنى قالى لما كنت قدك كانت الدنيا كلها بتصرخ من البى كاى الا البلد دى ربنا حماها و انها احسن من غيرها
راجل ٣ / زمنا غير زمنه دلوقت الحكايه وسعت اوى و ما تاخذنيش يا سي شاهين ... حتى الكبارات مش عارفين يلموها
شاهين / مؤاخذتك معاك بس انا عاوزك بقي تتخيل لو ما كانوش الكبار دول موجودين كانت حالكوا هتبقي ازاى
راجل ١ / زى البلاد اللى حوالينا بنموت موته ربنا
شاهين/ يبقي تروح بنفسك تجرب بنفسك عشان ترجع تحلف ان البلد دى احسن من غيرها... عن اذنكوا
شاهين يمشي
راجل ٢ / ما كانلوش لزوم ابدا نفتح السيره دى و هو واقف زمانه زعل
راجل ٤ / الحقيقه ما تزعلش و ان زعل هنعمل ايه يعني ما هى دى الحقيقه هنجامل و نكدب عشان نعجب يعني و لا ايه هى دى الحقيقه ..  انا ماشي سلام
.......................