الكبيره ٢ بقلم / لولو_محمد

الحلقة ٨٩

((((((( الكبيره ٢)))))))))
#لولو_محمد
الحلقه ٨٩
فى اوضه جابر
جابر يفتح عينه يبص على الموبايل يتفزع لما يشوف الساعه يبص على جوزيف نايم و يبص على كيس الادويه مش موجود يلف بعينه يدور عليه يشوف شال نجاه مرمي على الارض يقوم يمسكه و يبص على جوزيف تانى و يحاول يهدى و يروح يدور على كيس غامق يحط فيه الشال و يطلع يضرب الجرس نجاه تفتح
نجاه / صباح الخير جيت فى وقتك حماتك
جابر / لقيت ده عندى فى الاوضه اعتقد انه بتاعك
جابر يديها الكيس تبص فيه
نجاه/ ما كانش جايلى نوم و عماله افرك و خفت مهره تصحى قولت اطلع السطح شويه ما رضيوش و نزلونى لقيته قاعد على السلم تحت خفت حد من الحريم او البنات يشوفوه يتحرجوا اديته الشال و نزل و انا رجعت هنا ما عرفتش انام برده فقولت اما اقوم اعملى قرقوشتين نفطر بيهم
جابر / انتى شايفه كلامك ده مقنع
.......................
نجاه / هو ده اللى حصل انا هكدب ليه يعني اقسم بالله قابلته على السلم صدفه
جابر / تمام
جابر يجي ينزل نجاه تشد ايده يبص لها تسحب ايدها
نجاه / ما اعرفش ليه قعد على السلم يتوجع لوحده اقسم بالله نزلت على صوت الأنين كان نايم و ساند راسه على الحيطه
جابر / تمام يا نجاه
نجاه / طب مش هتفطر؟
جابر / تسلمى مش جعان ... عن اذنك
نجاه / طب دوقها قولى رايك طيب دا انا تعبت فيها اوى ما تنكدش علينا و تعمل حوار بحلف لك بالله ما فى حاجه و لا حصل حاجه
جابر / انا ما كلمتكيش يا نجاه
نجاه / بس مش مصدقني و هتنزل تشد معاه دلوقت و هو تعبان انت مش كدا
جابر / و الله !! هى بقت كدا ؟! لفت و بقت كدا
نجاه / هى ايه اللى لفت بس ... انا بحلف لك بالله هخاف من ربنا اكتر منك يعني
جابر / لا يا حبيبتي انا ما بخوفش اصلا
نجاه / بس زعلك غالى
جابر / الله !!!
نجاه/ تصدق انك جزمه و انزل يلا أعمل حوار و كبر الموضوع و خلى اللى ما يعرفش يعرف و اخلق قصه و فيلم يمكن الفراغ قاتلنا و مش لاقين حاجه نمسك فى بعض عليها
عباده يدخل
عباده / مين مسك فى مين
جابر و نجاه يلموا نفسهم
عباده / خير واقفين كدا ليه على السلم فى حاجه و لا ايه
جابر / مفيش حاجه يا كبير
عباده يبص لهم هم الاتنين باين عليهم
عباده / اخبار يونس ايه ؟
الاتنين يبصوا له
جابر / كويس الحمد لله احسن شويه
عباده / كويس عشان عاوز اتكلم معاه
نجاه / فى ايه ؟
عباده/ هيكون ايه يعني فى اللى احنا فيه ده ... على الله نطلع منه بحاجه مفيده
عباده يعديهم و ينزل نجاه تبص لجابر ينزل وراه نجاه تدخل و تقفل الباب
.......................
فى شقه محمود
محمود نايم يحس بحركه يتفزع يشغل النور يلاقى كيرا بتحط اكل على ترابيزه
كيرا / هو انت فى العادى نومك تقيل اوى كدا و لا دا المسكن و العلاج
محمود / اهلا ... على ما افتكرتوا ... دا انا كنت هموت
كيرا / لا ما كنتش بس انت دلوقت لو ما لحقتش نفسك هتموت بجد ... صابر راجع بكره الصبح
محمود / راجع فين ؟! راجع البلد ؟
كيرا / و طبعا اول واحد هيدور عليه هيكون انت ... عشان كدا لازم تبقي جاهز
محمود / جاهز لمين ؟! احنا ما اتفقناش على كدا
كيرا / احنا ما اتفقناش على حاجه اصلا  ... اه سورى اتفقنا انك تتجوز نسمه و على الأساس ده هتاخد كل ارض عيله الجزار و فوقيها وزنك دهب ... نفذت دورك ؟ لا ما حصلش و مش بس كدا انت كمان قومت الدنيا كلها عليك ... جايلى دلوقت تعيط لى
محمود / احنا نفذنا اللى طلبتوه و خطفنالكوا الواد
كيرا / بعد ما بوظت علاقتك بنسمه و وصلتوا لحيطه سد ... محمود يا حبيبي انت بالنسبالى كرت محروق انا بس قلبي ما قدرش يسيبك تموت جعان
محمود / انتى كدابه انتى لسه ليكي مصلحه معايا و الا كنتى قتلتيني و انا نايم و خلصتى عليا على الاقل ما اقولش على اللى انا عارفه
كيرا / و انت بقي عارف ايه الكبير مش عارفه ... و لا حاجه ... بس على العموم انا هطلع احسن منك و هديك اخر فرصه
محمود / ايوه كدا هاتى من الاخر و قوليلى ناويه على ايه
كيرا / ايه البخل ده هنتكلم كدا على معده فاضيه ... انا هروح اعمل لينا كبايتين شاى ... مش هتاخر
كيرا تروح المطبخ محمود يروح يجيب موبايله من الشاحن يلاقي رساله من ابوه " انت فين .. طمنى كلمتك كتير ما رديتش"
محمود يكتب رساله
محمود / انا بخير ما تقلقش ... كنت نايم و عامله صامت ... لما تصحى كلمنى انا صاحى
محمود يدوس إرسال
محمود / هتطولى و لا ايه
صوت كيرا / كل انت ما تستنانيش الميه لسه ما غليتش
محمود يهز راسه و يفتح فى الاكل يلاقي كباب و كفته يمد ايده و ياخد صابع و ياكل و بعدين يروح يقف قدام المرايه و يعدل شعره كيرا تدخل شايله الشاى تحطه على الترابيزه
كيرا / ما اكلتش ليه تعال
محمود يروح يقعد قدامها و يعمل ساندوتش كيرا تشرب شاى و تتابعه و هو بياكل يبص لها
محمود / انتى ما بتاكليش ليه ؟
كيرا / عشان الاكل مسموم
محمود اللقمه تقف فى زوره
كيرا / ما قولتك بقيت كرت محروق ... و بصراحه ما كناش عاوزين ليك موته سريعه او سهله
محمود يمسك بطنه و يقوم يجرى يحط صابعه فى بقه و يحاول يرجع كيرا تقف على باب الحمام تتفرج عليه و هى بتشرب الشاى محمود يقع فى الارض و يبدأ يطلع رغاوى من بقه و يموت كيرا تكب باقي الشاى فى الحوض و تمشي
...............................
فى اوضه جوزيف
عباده يخبط على الباب و يدخل يلاقي جوزيف نايم اول ما يشغل النور جوزيف يفتح و يقوم يقعد و يبص على الباب
عباده / مش هتعبك بس عاوز أسألك عن حاجه مستعجله
جوزيف يهز راسه عباده يقعد على الناحيه التانيه من السرير جابر يقف على الباب
عباده / شاهين قرر الحريم اللى وقعوا فى ايدينا و كلهم قالوا ان الوكر تحت البلد
جوزيف يهز راسه لا
عباده / بس احنا عرفنا ان فى أنفاق فعلا و ان الشركه الامريكانى عملاها و بتربط بين بيوتها
جوزيف / اللى هينزل منكوا مش هيطلع
عباده / يعني فعلا الوكر تحت
جوزيف / قولت لا امايا مش تحت مش هتلاقوا تحت غير فخاخ و موت ... او على أقل تقدير أصابه... و غالبا خطيره ... ما تقولش ما قولتش و المرادى صريحه لا بلمح و لا بخبى
عباده / وأخد بالى و ده اللى مقلقنى ... خير الحدايه من امتى بتحدف كتاكيت
جوزيف / انت مفيش حاجه بتعجبك صح
جوزيف يمسك الكيس و يطلع مرهم و يناوله لعباده عباده ياخده جوزيف يفك الشاش و عباده يدهن له
جوزيف / كدا انقذتوا روحى انقذت ارواحكوا ... خالصين صح ؟! و لا ابقي انا كدا بظلم جابر بما انه هو اللى انقذنى فاولى انى انقذه هو
جابر / هى اخرتها ايه يعني
جوزيف / هى مين ؟
جابر / امايا ... مش بتقولوا الوكر تحت البلد و مليان فخاخ هنسكت لحد امتى تفتكر
جوزيف / ما تسكتش انزل بس افتكر انى قولتلك بلاش
عباده / و الحل
جوزيف / لا الحل مش عندى انا مصمم المكان ان ما يكونش ليه حل
جابر / و لا لينا و لا ليكوا ؟!
جوزيف/ دا انت طماع اوى بقي
عباده / و الله كنت متأكد انك هتعمل كدا بس قولت اديك فرصه
جوزيف/ و عملت الصح ... ما تنزلوش تحت
عباده/ مش هسيب انا أنفاق و قرف تحت بلدى
جوزيف / يبقي تسدها
صمت و تبادل نظرات
جوزيف / عندكوا اكل ايه انا جعان
جابر / ثوانى
جابر يطلع بره
جوزيف / انت مش هتقدر تسد كل الإنفاق لأنها كتير جدا دا شغل خمس سنين ليل و نهار ... بس تقدر تسد المداخل و المخارج و تضيق عليهم الدنيا ... اهم حاجه تلاقيهم
عباده / لقيناهم
جوزيف / تؤ ... لقيت اللى ما عادلهمش لازمه ... لقيت اللى هى عوزاكوا تلاقوهم فتنزلوا ما تطلعوش
جابر يدخل شايل صينيه عليها اكل يحطها قدام جوزيف
عباده / برده اشمعن المرادى يعني متعاون كدا و بتقول الكلمه صريحه و حاجه تقلق الشهاده لله
جوزيف / ما حنيتكوا الزايده قلقانى برده محسسانى انى خروف بيتدلعله يومين قبل ما يتدبح فى العيد
عباده / لا ما تخافش احنا اخلاقنا كدا مع الكل
جوزيف / و انا هصدقك
عباده يبص لجابر و يتنهدوا
جابر / لو احتجت اى حاجه
جوزيف / انا مش معايا موبايل ... عاوز واحد و هديك المواصفات
جابر / حاضر ... حاجه تانيه
جوزيف / ورقه و قلم عشان اكتبلك المواصفات اللى هتجيبها
جابر / حاضر ... ثوانى
جابر يطلع بره و جوزيف يسمى و ياكل
.....................
فى المطبخ عند نجاه
نجاه واقفه سانده على الرخامه و سرحانه عمران يخبط على الباب نجاه تنتبه
عمران / بقولك انا حجزت عند الدكتور لمهره ... انا عارف ان الكبير هيشوف الموضوع بنفسه بس بصراحه انا مش مرتاح و اديكي شايفه السحله و هى هتروح فى الرجلين
نجاه / ابويا عمره ما هينساها يا عمران
عمران / ما قولتش ينساها بس يتلخم يتاخد الوقت بيجرى و انا خايف الحاله تتحول لحاجه مزمنه لا قدر الله
نجاه / هو ممكن ؟!
عمران / ايوه يا بنتى طبعا
نجاه/ لا يبقي ما تسكتش فعلا و نروح على طول بإذن الله
عمران / تمام ... ممكن تكلميها فى الموضوع ... بصراحه خايف ترفض او تاخد الموضوع بحساسية اديكي شوفتى الفتره اللى فاتت كل ما كنت بفتح بقي كانت بتنهار اكتر
نجاه / على فكره هى مش زى ما انت فاكر بالعكس هى قويه اللهم بارك و ردود فعلها احسن بكتير من المتوقع و الطبيعي و خصوصا لما البيبي نزل حاسه انها اخدت نفسها و ممكن تبدا بدايه جديده ... مش مهم امتى و ازاى تاخد وقتها عادى ما عادش فى حاجه تستعجلها بس هى هتعدى الازمه دى انا واثقه فيها
عمران يهز راسه
نجاه / ما تقلقش انا هتكلم معاها ... اجيب لك حاجه تاكلها
عمران / لما ارجع من الصلاه بقي .. هو الكبير فين صحيح هم سبقونى كلهم و لا ايه مش شايف حد
نجاه / تحت عند يونس
عمران / خير فيه حاجه و لا ايه ؟
نجاه / ما اعرفش
عمران / تمام هنزل و اشوف ... كلميها بالراحه ماشي
نجاه / بالراحه ازاى يعني ؟!! ما علينا روح شوف انت وراك ايه و انا هتعامل
عمران يبتسم و يمشي
نجاه / بالراحه طبعا امال مش بالراحه ... دا ايه عيله المخابيل دى بس يا ربى
نجاه تضحك و تروح اوضه مهره
....................
فى شقه ناصر
ناصر بيحط فطار و مختار بيساعده
ناصر / يعني هترجع مصر للجماعة و لا هترجع البلد لصابر و شاكر انا مش فاهم
مختار/ ما انا لسه قافل معاه الخط و قولت له هشوف و أكد عليه بس كدا و لا كدا هفطر و اتحرك
ناصر / يابا ما اختلفناش بس دى من يمه و دى من يمه هتمشي على فين
مختار / ممكن اروح عليهم فى مصر و من هناك اطلع طيران على البلد
ناصر/ فكره كويسه دى و هتختصر وقت جامد برده
مختار / هتيجي معايا و لا وراك حاجه مهمه هنا
ناصر/ مش عارف لو عاوزنى اجى معاك اجى
مختار / انت عاوز ايه ؟
ناصر / مش عارف
مختار/ طب لما تعرف ابقي قولى بس ما تطولش فى التفكير عشان انا هاكل و اتحرك
ناصر / هو حد عرف باللى حصل فى مصر
مختار / نهون ؟
ناصر / امايا
مختار / انا و انت و عباده و دياب ما اعرفش منصور عرف و لا لا
ناصر يهز راسه
مختار/ انت لسه بتفكر فى الموضوع ده ليه ؟
ناصر / ما بفكرش
مختار / امال بتسأل ليه
ناصر/ عشان اكيد لو رجعت مصر نجاه هتقولى انت لسه فاكر تيجي تعتزر و القصه بدل ما تتلم هتولع
مختار / نجاه اعقل من كدا بكتير روح انت بس و بين لها أن خاطرها غالى و ما تقلقش
ناصر يهز راسه
.....................
فى المسجد
الرجاله بتسلم من الصلاه و تسبح عمران يتنقل جنب عباده عباده يتنهد
عمران/ حرما
عباده يبتسم
عباده/ جمعا يا عمران يا حبيبي عن قريب بإذن الله
عمران / احنا هناخد رأيه بس
عباده / لا حول و لا قوه الا بالله ما قولت لك أعمل اللى يعجبك بس نجاه مش هتروح معاكم
عمران / و دا ينفع يعنى
عباده / مش انت اللى مش صابر ... يا حبيبي افهم نجاه هى اس البلاوى ... العين على نجاه مش على مهره يعني اى مكان فيه نجاه خطر ... عاوز تاخد مهره تروح للدكتور و تاخد الرجاله كلها معاك روح لكن مش هتاخد نجاه... ليه ؟! عشان هم عاوزين نجاه ... هيضربوا مكان ما نجاه تكون موجوده يعني الأمان لمهره الفتره دة تبعد عن نجاه يارب المرادى تكون وصلت... ما حدش هنا معانا ما فيش حد و بعدين انا لو منك ما دام مستعجل اوى كدا أقنعها ترجع البلد هى و نجاه و أفضل انت هنا يا سيدي كمل شهرك اياكش يعدي بس على خير و ارجع و هى فى الشهر ده اوعدك هتكون اتظبطت احسن تظبيط ان شالله اجيب لها احسن دكاتره من بره ... يا ابنى دا انا لو هبنى لها مستشفي كامله زى ما عملت مع نجاه بنتى مش هتاخر
عمران يهز راسه
عباده / انت منصاب جابر منصاب مفيش غير شويه الرجاله اللى حواليك دول يا ابنى خلينا نروح سلام بالله عليك ... خلينا نروح و خلاص
عمران يهز راسه و يقوم يسند عباده يقوم و يروحوا يلبسوا الجزم يعدوا على راغب و خالد بيتكلموا
خالد / يووووه دا عامل له دايه و ماشطه
راغب / سبحان مغير الاحوال يعني الجدع من يومين الكبير يقول اللى يشوفه يطخه و النهرده سي جابر قاعد تحت رجليه بيطيبه
خالد / هى دى اللى فارقه معاك ... امال لو قولتلك ان البيه بعد كل ده مش عاجبه و بيتعامل معاك كدا من فوق طراطيف مناخيره
راغب / انت هتقولى دا انا ما قابلتوش غير مره و كان هاين عليا اجيبه تحت جزمتى
خالد / ليه هو عمل معاك حاجه تانى و لا ايه
راغب / تانى ايه هو انا شوفته من يوم ما نط من فوق السور
خالد / يا عم مش طلع لك امبارح بالليل
راغب / لا ما طلعش ... هو طلع من عندك ؟
خالد / قال هيشم هوا و غاب له يجي ساعه كدا و لا حاجه و رجع دخل كمل نوم
راغب يسرح ثوانى
خالد / هو ما طلعش بجد ؟! امال كان فين ابن الجزمه اللى هيجيب لينا الكلام ده
راغب/ عن اذنك
راغب يسيب خالد و يجرى ورا عباده يحصله
راغب / يا كبير يا كبير لا مؤاخذه يا كبير كنت عاوزك فى كلمتين على جنب
عباده يبص للرجاله يسبقوهم
عباده/ خير يا راغب فى ايه قلقتنى
راغب / و الله يا كبير انا محرج منك و مش عارف حاجه زى دى اتكلم فيها ازاى بس ... هو موضوع ما يتسكتش عنه بصراحه
عباده / خير محتاج فلوس ؟! فى حاجه نقصاك ؟!
راغب / ابدا يا كبير ربنا يحفظك لينا و يديم علينا عزك مش ناقصني اى حاجه بس هو الموضوع حاجه تانيه خالص ... هو بصراحه كدا بخصوص يعني
عباده / بخصوص ايه يا ابنى ما تنطق انا مش قادر للمناهده قول على طول
راغب / هو بخصوص ست نجاه
عباده ينتبه
راغب / فى حاجه مش مظبوطه بتحصل و انا بصراحه ما حبيتش اتكلم مع حد فى الموضوع غير حضرتك
عباده / يبقي تقول على طول و ما تضيقش خلقي فى ايه
راغب / تمام ... انا هحكى لحضرتك كل حاجه من الاول
عباده يهز راسه و راغب يحكيله
........................
فى شقه نسمه
صوت مزمار و طبل و زغاريط و ضرب نار نسمه بتفرط بسله بس مبتسمه امها تدخل
الست / انتى قاعده هنا و لا على بالك المصيبه اللى احنا فيها
نسمه تبص لأمها
نسمه / خير ياما مصيبه ايه كفا الله الشر
الست / الشر !! الشر بيترقص قصاد البيت و كأنه فاتح عكه و ابوكى الغلبان مرمى فى الحجز من قبل الفجر
نسمه / هو مش اتصالح هو و محمود و خرجوا هم الاتنين
الست / لا ما هو سي زفت مش هيسكت طبعا بعت له رجالته استفزوه و استفردوا بيه و رموه فى الحجز
نسمه / حسبي الله و نعم الوكيل فيك يا محمود الكلب هو الحيوان ده ما لوش كبير يحكمه بقي
الست / محمود مين يا نن عيني ... انا بتكلم عن صابر
نسمه / صابر !! ازاى يعني !! اكيد فى حاجه غلط
الست / ايه !! بكدب عليكي و لا انتى مش مستحمله كلمه على حبيب القلب
نسمه تبص لأمها و تسيب المكان و تروح المطبخ الست تروح وراها
الست / ايه الكلمه ضايقتك و لا ايه
نسمه / جايه ورايا تتخانقى يعني و لا جايه ورايا ليه سبتلك المكان باللى فيه ما تجيش ورايا بقي
الست / قولت ايه غلط انا مش كل القرف ده من ورا راسك انتى
نسمه / هتسكتى لما اولع فى روحى يعني هترحميني امتى انا عمرى ما جيت عليكوا كارهيني كدا ليه ما ترحمويني
الست / انتى هتعمليهم علينا ما تندعقى ... انا اصلا سيباهالك انا رايحه لابوكى ... قسما عظما ان فتحتى الشباك و لا رجلك خطت باب الشقه ليكون حسابك معايا انا
نسمه / ما تخافيش هو اصلا مش هيجي هنا و ان كان على شويه الالاتيه اللى بيلفوا البلد فهم بيحللوا القرش مش اكتر انما هو مش هيجي عشان هو عارف ان مجيته هنا هتضرنى هو مش اهبل
الست / و ايه كمان ... دافعى عنه كمان و امدحى فيه قدامى ... زيدى فى بجاحتك و قله حياكى كمان زيدى
نسمه تسيب المطبخ و تروح الحمام و تقفل عليها الباب الست تتنهد و تمشي و تقفل الباب وراها
.........................
قدام اوضه جوزيف
جابر / نايم طول الوقت بسبب العلاج بيقوم ياكل حاجه بسيطه زى ما شوفت و يدخل الحمام و يصلى و ينام
عباده / متاكد ؟
جابر / انا معاه طول الوقت ... هو حضرتك بتسأل ليه ؟ هو فى حاجه حصلت ؟
عباده / لا بطمن بس ... هدخل ابص عليه ... الاول قولى هتقدر تستحمل الطريق و لا هتستنى شويه مع يونس
جابر / هستحمل بس ... هنسيبه لوحده هنا و نسافر كلنا يعني ؟
عباده / لو يقدر يتفضل و لو عاوز عربيه اسعاف مخصوص تنقله انا ما عنديش مانع
جابر / طب انا هتكلم معاه و اشوفه
عباده / لا اطلع انت قول للجماعة يجهزوا... اللى حابب يرجع معانا منهم طبعا
جابر / اللى حابب دى عايده على مين
عباده/ الكل الا نجاه ... كدا كدا هترجع معايا فى نفس العربيه
جابر يهز راسه و يمشي عباده ياخد نفس و يدخل الاوضه يشغل النور جوزيف نايم يفتح بصعوبه
جوزيف / غيرت رايك و جيت تصلح غلطتك و لا ايه
عباده/ و هى ايه غلطتى
جوزيف / انك سايبنى عايش
عباده يقعد على طرف السرير و جوزيف يتعدل فى نومته
عباده / انت شايف انها غلطه ؟ هو كدا كدا الموضوع مش بأيدي طول ما ليك عمر هتعيش و طول ما مبتاذيش حد و لا بتعمل حاجه وحشه يبقي انت فى حالك و انا فى حالى
جوزيف / امال جاى ليه ؟ قلقان عليا مثلا
عباده / انت طلعت السطح امبارح ؟
جوزيف / لا ... كنت ناوى بس ما قدرتش ... طلعت اول دور و دوخت قعدت على السلم و روحت فى النوم صحيت نزلت كملت نوم هنا
عباده / اول دور بس ؟
جوزيف/ انا كمان زيك استغربت... بس شكل الدوا تقيل اوى عليا ... او انتوا بتحطوا ليا حاجه فى الأكل
عباده / و هنعمل كدا ليه اصلا
جوزيف / انت بتسأل ليه ؟
عباده / مفيش بطمن عليك مش اكتر
جوزيف / كداب
عباده يبص الناحيه التانيه
جوزيف / بتسأل ليه ؟
عباده / خالد بيقول طلعت و راغب قال ما طلعتش قولت اطمن خفيت فين الحبه دول
جوزيف / ابقوا ركبوا كاميرات على السلم
عباده / الكاميرات راكبه فى المداخل و المخارج مش هنركبها فى كل قلبه يعني
جوزيف / اتقالك ايه كمان؟
عباده / انت بتسأل كتير ليه ؟! انت مش تعبان و مش قادر !!
جوزيف / و الله ما قادر افتح عيني بس ... امبارح و انا نايم على السلم لقيت نجاه بتغطيني بالشال بتاعها لولاها كان زمانى نايم على السلم لحد ما يبان لى صاحب... دا لو حد سأل عنى يعني عندك للفجر
عباده / كنت نايم كدا على السلم !!
جوزيف / مش فاهم ايه حكايتكوا كلكوا ما عورتى متغطيه هو انا ملط
عباده/ ما علينا ... انا هرجع انا و نجاه البلد... غالبا الكل هيرجع الا عمران ... تحب تفضل معاه و لا هتقدر تستحمل الطريق و ترجع معانا
جوزيف / رجلى على رجلها
عباده / لآخر مره بقولك ما لكش دعوه بيها ... يا اخى انت ليه مش عاوز تفهم انت بتاذيها بتصرفاتك دى ... الناس بتتكلم عليها و الحريم عندنا سمعه
جوزيف / انا ما عملتش اى حاجه غلط او حرام ... انا ما اتخطيتش حدودى معاها مره انا بعمل زى ما جابر بيعمل بالظبط
عباده / ما لكش دعوه بجابر و لآخر مره بكلمك بالادب
جوزيف / ايه بيتكلموا علينا احنا الاتنين كمان
عباده يضرب كف على كف جوزيف يضحك باستفزاز و تعب
عباده / انا طالع ألم حاجتى ارتاح و هطلب لك عربيه اسعاف توصلك
جوزيف / طلبت من جابر موبايل
عباده / هيجيب لك كل حاجه ما تقلقش
جوزيف يهز راسه عباده يقوم و يروح ناحيه الباب
جوزيف / اطفى النور
عباده يهز راسه و يطفى النور و يقفل الباب
.......................
فى القسم
احمد / و الله يا حج عويس انا مش عارف اقولك ايه بس حاول توحشنا شويه مش كدا
عويس / نقول ايه بس يا باشا منهم لله اللى كانوا السبب
محمد / دا اللى هم مين بقي يا حج
احمد / خلاص بقي يا استاذ محمد البلد النهرده اللهم بارك يعني ولا المولد
محمد / على قولك يا باشا ... على العموم تسلم و اسفين مره تانيه على الازعاج و ما تنساش تنورنا زى ما اتفقنا و الله ازعل
احمد / لا باذن الله مش هتاخر
عويس / مطلوب منى اى حاجه تانى يا باشا
احمد / تسلم يا حج عويس تقدر تتفضل
عويس / تشكر
عويس يمشي يطلع بره ثوانى و محمد يكون وراه
محمد / تحب اوصلك يا حج
عويس / اللى حصل ده مش هيعدى يا محمد و انا ليا كلام تانى مع ابوك لما يرجع البلد
محمد / طب ما تكلمه فى التليفون اسرع ... بس على العموم يا حج هو مش هيطول النهرده باذن الله هيبات فى البلد استناه مش هيعوق باذن الله
عربيه محمله بهايم تعدى تقف و تكلكس
السواق / ايه يا سي محمد مش هتدبح و لا ايه
محمد / عيب عليك يا حج عثمان دا انا ناويهالك
السواق يضحك و يمشي محمد يبص على عويس يلاقي وشه مقلوب و باصص له بقرف الضحكه تروح من على وش محمد
محمد / ابقي نورنا يا حج عويس.. عن اذنك
محمد يروح يركب عربيته و يمشي و عويس بيضرب كف على كف و هو عمال يبص للنور و الكهارب اللى مغرقه البلد
.....................
فى سرايا الزنايته
خديجه / يمين بالله و لا اعرف الواد ده طالع كياد اوى كدا لمين
هند / و ليه تقولى كدا مش يمكن بيحبه بجد و بعدين هو هيكيد مين يعني اهو خلينا نفرح
خديجه / نفرح !! صحيح و هو احنا ... ما علينا مش هتفرق ... دا احنا بقينا مقلسه الصعيد كله بسبب الهبل اللى بنعمله ده
هند / اللى يعيش عيشتنا يجي يحكم علينا احنا لو وقفنا الفرح على كل ميت عمرنا ما كنا شميناها من سنين
خديجه / برده مش للدرجادى يا هند دا احنا ما بنعملهاش فى الافراح
هند / هو حر يفرح بصاحبه و اخوه زى ما هو عاوز ما حدش قالهم ما يعملوش كدا فى الأفراح و بعدين شاكر بالذات يعمل اللى هو عاوزه
خديجه / الله و اشمعن شاكر بالذات بقي ان شاء الله
هند/ نفسه مكسوره بقاله مده و مش مظبوط خالص ... علاطول قافل على نفسه و سرحان و فى ملكوت لوحده ... و اخرتها هج من السرايا باللى فيها و راح الجبل ... لقى فى ابن القط اللى ما لقاهوش فى الزنايته كلهم
خديجه / و فيها ايه هو صابر وحش ... سيبك من انه من المطاريد و لا عايش فى الجبل... كلنا عارفين ربايته و أخلاقه... دا كان زمانه بقي دكتور ... لولاش بس النصيب
هند / ما اعترضتش يا خديجه ... بس افهم ... ايه اللى غير شاكر اوى كدا ... هو كان كدا ؟!
خديجه/ بيكبروا يا هند و بعدين اذا كانت البت بتتصرف كدا و مدوخانا وراها السبع دوخات هتستنى من الراجل ايه سبيه يعيش على كيفه المهم انه بخير
هند تهز راسها
هند / هنزل اشوف الناس فى المطبخ مش عاوزين نسمع لنا كلمتين
خديجه / قومى قومى لحسن دول عالم لو ما وقفناش على رأسهم يناموا
هند و خديجه يقوموا يروحوا المطبخ
........................
فى اوضه رحمه
رحمه بتكوى فاطمه تدخل رحمه توقف المكوه و تروح تسندها تقعدها
فاطمه / هتقصفى عمرى بدرى
رحمه / ليه بس يا ماما بطه عملت ايه
فاطمه / مش انا قيلالك تقفى على ايد الحريم تحت مكوه ايه و زفت ايه اللى وقفالى عليها ايه وقفت عليكي فى الكوى يعني ... يا رحمه انا بحب كل حاجه تمشي مظبوط و على كيفي
رحمه / ما هى ماما هند و عمتى خديجه واقفين على ايديهم و محمد كلمنى عاوز يلبس الجلبيه السوده وسط الرجاله
فاطمه / و هو ما عندوش غير الجلبيه دى يعني و لا ايه
رحمه / بيحبها و بعدين هو اتصل و قالى اقوله لا يعني
فاطمه / ما قولتش كدا
رحمه / و بعدين خمس دقايق بس و هخلصها اقعدى انتى بس ارتاحى و انا و الله هعمل لك كل اللى انتى عوزاه
فاطمه تقعد
فاطمه / انا مش عاوزه حاجه
رحمه / ما تزعليش بقي بالله عليكي انا ما اقدرش على زعلك
فاطمه / مش زعلانه ... انا بس مش عاجبنى اللى بيحصل ... كله مش عاجبنى اى حاجه من اللى بتحصل دى
رحمه / زى ايه
فاطمه / كلها حال السرايا مش عاجبنى حال البلد كله مش عاجبنى ... انتى اصلك ما توعيش على البلد دى زمان ... عمك شاكر الله يرحمه و هيبته وسط الخلق... الرجاله كانوا غير الرجاله و الناس كانوا غير الناس كل حاجه باظت
رحمه / و الله يا امى على عيني الجماعه مش ساكتين و بينحتوا فى الصخر دا محمد يا قلبي بيروح البيت بالليل مش شايف و يقوم من النجمه يجرى من هنا لهنا
فاطمه / و هو انا قولت ان محمد و لا غيره مقصر اهو ... الحمد لله اننا عشنا و اتهنينا و ربنا يرحم عيالكوا من اللى هيشوفوه اذا كانت دى عيشتكوا هم هيعملوا ايه
رحمه / لا حول و لا قوه الا بالله و ما لها بس عيشتنا ما هى حلوه اهى و الف حمد و شكر ليك يا رب دا احنا فى خير كبير اوى
فاطمه / الف حمد و شكر ليك يا رب اه لو الناس كلها زيك كدا يمين بالله تبقي جنه
رحمه / دقيقتين بس هخلص الجلبيه و انزل اكربجلك كل اللى فى السرايا و اخليهم يعملوا اللى على كيفك مظبوط المهم بس تروق انت يا جميل يا قمر
فاطمه / اما نشوف
رحمه تبتسم و تكمل كوى
…………………..
فى اوضه عباده
مختار / طب فين المشكله
عباده يبص لمختار و يتنهد
مختار / طب انت كلمتها ؟ سألتها؟
عباده / يا مختار ما تعملش عبيط الناس بدات تتكلم
مختار / ما حصلش و ما حدش اصلا يستجرى يقول كلمه
عباده / فى وشي اه لكن فى ضهرى هيعيدوا و يزيدوا
مختار / هم الغلطانين لو الموقف ده حصل مع جابر و لا عمران ابنى ما حدش كان فتح بقه لكن يونس لااااااا انصبوا المشانق و سنوا السكاكين
عباده / ماشي يبقي ايه العمل بقي
مختار / نخرسهم يا عباده الصح صح و الغلط غلط و دا موقف صدفه و الواد عيان و البت اتصرفت بانسانيه ايه مفيش تقدير خالص يعني
عباده يبص الناحيه التانيه
مختار / بص انا مش هكدب عليك انا كمان مش مرتاح لقربهم من بعض بس نجاه متربيه و هو
عباده / اللعبان و نمس
مختار / مش هقدر اكدب و اقول لا برده بس
عباده / بس نفضل سايبين البنزين جنب النار كدا لحد ما نولع كلنا
..........................