الكبيره ٢ بقلم / لولو_محمد

الحلقه ٧١

(((((( الكبيره ٢ )))))))))
#لولو_محمد
الحلقه ٧١
نجاه بتجرى فى الضلمه باقصي سرعه و هم بيجروا وراها واحد يضرب صاروخ ينفجر تحت رجليها ينطرها تتشقلب و تنزل واقفه و تكمل جرى كشافات عربيه دفع رباعي تضرب فى عنيها نجاه تقف و هى بتنهج تبص وراها تلاقي الاليين جايين نجاه تلف حوالين نفسها مش عارفه تروح فين
صاروخ ينضرب تحت رجلين الاليين نجاه تبص تلاقى مغاورى على الهليكوبتر ماسك الار بى جاى نجاه تبتسم و تجرى ناحيه الجبل تانى و مغاورى يلقم صاروخ تانى و يجى يضرب واحد من العربيه ينزل بار بى جاى يضربه فى الهليكوبتر الطياره تقع مغاورى ينط منها تنفجر بالسواق مغاورى يصرخ
مغاورى / مرزوووووق
الراجل يلقم صاروخ تانى و الاليين يقوموا يقفوا مغاورى يشوفهم بيجروا ناحيته يطلع المسدس و يضرب النار لحد ما المسدس يخلص يبصلهم و هو مصدوم نجاه تفك الطرحه و تفضل بالتلبيسه تنادي من بعيد و هى بتشوح بالطرحه
نجاه / انا هنا انا هنا
مغاورى / يا مجنونه اجرى اجرى
نجاه / انا هنا انا هنا
الاليين يتحركوا ناحيه نجاه تجرى تجروا وراها مغاورى يجرى ورا نجاه الراجل يضربه بالار بى جاى ينفجر وراه بالظبط ينطره على وشه الراجل يركب العربيه و يتحرك ورا نجاه و يحاول يدوس مغاورى مغاورى يلف بسرعه يفاديه و يقوم و الرعب مالى ملامحه ناحيه نجاه يجرى وراهم ما يحصلهمش يقع فى الارض على ركبه يبص مش شايف غير نور العربيه من بعيد يصرخ
مغاورى / نجاااااااااااه
.....................
فى بلكونه عبد العزيز
عبد العزيز بيعانى هو و مراته مع الدرونز و نص جسمه بره البلكونه و ماسك فى الترابزين بأيد و بيحمى وشه بالأيدي التانيه فجاه كل الدرونز تقع فى الارض ام نور تشد عبد العزيز تعدله و تقعد فى الارض يسمعوا صوت ناصر فى الشارع
ناصر / انتوا كويسين
عبد العزيز يتسند و رجليه بتخبط فى بعض يبص يلاقي ناصر واقف و فى ايده جهاز تشويش كبير
ناصر / حد اتعور... معلش العيال كانت بتلعب و الإشارات دخلت فى بعض و الدنيا خربت منهم بس احنا هنلمهم و باذن الله نعيد ربايه العيال دى تانى حقك عليا انا المهم انك بخير
عبد العزيز يهز راسه مش قادر يتكلم
ناصر / ادخلوا ارتاحوا الوقت اتأخر و لو احتاجتوا اى حاجه كلمونى انا قاعد هنا مع الرجاله صاحيين يعني ما تقلقوش
عبد العزيز يهز راسه و يزحف برجله لحد جوه مش قادر يرفعها من الارض و مراته متسنده عليه و على العيال نور تقفل البلكونه
نور / هو ايه اللى حصل
عبد العزيز يهز راسه لا
نور / انا هعمل عصير ليمون و لا اى حاجه تهديكوا
عبد العزيز يهز راسه ايوه نور تروح المطبخ
...................
فى المستشفي
مختار بيتعارك مع البنات و الضرب متبادل و هم متكاترين عليه بس هو ضرباته أقوى راجل يدخل يساعد مختار ثوانى و البنات فى الارض ما بيتحركوش مختار يقعد فى الارض و هو بينهج
مختار / اقسم بالله لو حد عرف انى ما قدرتش عليهم لوحدى لطلع غلى فيك
الراجل / انا ما شوفتكش اساسا
مختار / العيال دى ضاربين ايه
الراجل / الكيميا ما خلتش ... هنعمل فيهم ايه صحيح
مختار / التلاته عايشين هناخدهم نشوف هنعرف نطلع منهم بايه
الراجل / الحريم !!!
مختار / هم كانوا بعتوا رجاله و قولنا لا و بعدين حريم دى تقولها على اللى عندنا انما دول نسوان قادره قاريني و لا أعيد
الراجل / لا تمام يا سيد الناس تمام
الراجل يطلع الموبايل و يتصل بحد
............................
فى الصحرا
نجاه بتجرى و السايبورج و العربيه وراها يضربوا عليها صاروخ ينطرها على وشها هدومها تتحرق تغطى وشها بايديها و تدحرج فى الارض الهدوم تتحرق و الحريق ينطفى و تفضل نجاه بالبدلة نجاه تحاول تقف واحد من السايبورج يشوطها بالرجل تتنطر و تقع فى الارض مش قادره تتحرك يروح ناحيتها و يرفع رجله عشان يدوس عليها عمران يدخل و هو متعلق برجليه على حصان اسود غطيس سريع و جسمه كله طاير ناحيه الارض لابس اسود فى اسود يسحب نجاه من تحت رجلين الآلى قبل ما تنزل بقوتها فى الارض و يجرى راجل ينزل من العربيه و يضرب صاروخ على عمران ما يجيبوش يركبوا العربيه و يجروا وراه
عمران / طير يا ليل طير
عمران يبص على نجاه بين ايديه فاقده الوعد يطير بالحصان و العربيه طايره وراه صاروخ يضرب فى العربيه يقلبها و عباده يدخل سايق عربيه مصفحه و فارس طالع من فتحه فى السقف شايل ار بى جاى ينزل و يقفل فتحه السقف عباده يسحب الهاند و يخلى العربيه تلف و يخبط واحد من السايبورج يطيره بجنب العربيه التاني ينط فوق العربيه و يضرب بايديه على السقف يطبقه عباده يلف العربيه السايبورج التانى يقع عباده يسوق عكس اتجاه نجاه
فارس / احنا كدا بنرجع
عباده / بنسحبهم
فارس/ ناحيه البلد ؟!!!
عباده / بعيد عن اختك
فارس/ ما اختى لوحدها هى يعني معاها جيش دا عمران بطوله على فرس
صاروخ ينضرب على العربيه عباده يتجنبه يفرقع فى الارض عباده يلف العربيه و يرجع ناحيه السايبورج باقصى سرعه يضربوا عليه صاروخ
فارس /  اشهد ان لا اله الا الله ... اباااااااااا
الصاروخ ينفجر فى العربيه و العربيه تعدى منه تخبط السايبورج تطيره عباده يخبط على الكبوت و هو بيضحك
عباده / فلوسها حلال ... ما تخافش ياض هو انا هجازف بيك برده
فارس يبص من المرايه و هو بينهج يلاقي السايبورج بيجرى ورا العربيه
فارس / ابا ... اللحق
عباده يبص فى المرايه
عباده / لقم صاروخ
فارس / حالا
فارس يحط الصاروخ فى المدفع عباده يلف العربيه و فارس يطلع من فتحه السقف يضرب الصاروخ عباده يشده و يقفل الفتحه الصاروخ ينفجر فى السايبورج و عباده يخبط فيه و يفضل ماشي بيه و هو ماسك فى كابوت العربيه و النار ماسكه فيه فجاه عباده يفرمل السايبورج يتنطر عباده يلف العربيه و يجرى ورا نجاه تانى
فارس/ مات ان شاء الله ... ان شاء الله مات ... بس جامده سواقتك يابا ما شوفناش الشقاوه دى منك قبل كدا
عباده / هبقي اعلمك كل الحاجات دى لما ربنا يكرمنا و يعدى اليوم ده على خير  ... انت فين يا عمران
.......................
فى عربيه جابر على الطريق
جابر طاير بسرعه جنونيه
دياب / الرؤيه اتعدمت
جابر / يعني ايه ؟!!
دياب/ كل الدرونز ادمرت و مش قادر اشوف اى حاجه من اللى بتحصل هناك
جابر / هانت بإذن الله نلحقهم
جوزيف / مش هتلحق حاجه خلصت خلاص
جابر/ نقطنا بسكاتك افيد
دياب / البدله دى هتستحمل لحد امتى
جوزيف / البدله هتستحمل المهم نجاه نفسها تستحمل
جابر / البدله ... البدله اللى سبحان الله وصلت فى نفس اليوم اللى كل ده يحصل فيه ... طب كنت اصبر شويه و اسبكها
جوزيف ياخد نفس و يطلعه بلا مبالاه
دياب / انت بتقول ان امايا عمرها ما تاذى نجاه نجاه انضرب عليها صواريخ و رصاص و بلا ازرق
جوزيف / ما عشان اللى هجموا مش امايا
جابر / ما توقعتش رد تانى قلبت البلد كلها و ملبس نجاه بدله عشان تحميها
جوزيف / ما لو انت واثق اوى كدا انى انا اللى عملت كل ده ما تكلف نفسك و تمد ايدك تطلع مسدسك و تقتلنى و تخلص
دياب / امال مين يا يونس
جوزيف / ما اعرفش بس هعرف
دياب / قالولك ان المجلس بعت امايا تكمل اللى انت عملته و لا قالولك انهم بعتوا فريق تانى عموما و انت اللى استشفيت انها امايا ؟
جوزيف / مش عارف
جابر يضرب على الدريكسيون و يزعق
جابر / امال انت عارف ايه
جوزيف / عارف انك تركز فى الطريق و تركن مشاعرك على جنب عشان لو احنا التلاته ما وصلناش  ...
الكل يبص حواليه على الطريق بقي فاضي خالص و مفيش اى نور غير نور العربيه اللى هم راكبينها
جوزيف / البلد هتقع
دياب / هدى السرعه يا جابر و ثبتها
جوزيف / دى مش امايا ... اللى بيحصل ده مش امايا
جوزيف يفتح التابلت و يدخل على القمر الصناعى
جوزيف / فى حادثه على الطريق النحيادى ورا و زيها قدام الناحيه التانيه يعنى الطريق فاضي مسافه ... خمستاشر كيلو
دياب / وريني
دياب ياخد منه التاب
دياب / وقف يا جابر وقف
جوزيف / لا كمل كمل بنفس السرعه
دياب / احنا مش عارفين احنا داخلين على ايه
جوزيف / العربيه لو وقفت هتبقي هدف ثابت سهل
صاروخ ينضرب على العربيه من وسط الضلمه  دياب يزعق
دياب / حاسب يا جابر
جابر يفاديه
جوزيف / ما لحقتش اكمل الجمله
جابر / الطريق مسدود ورا و نجاه الناحيه التانيه ... اشهد ان لا اله الا الله
جابر يزود السرعه على أقصي حاجه يعدى على الحادثه الناحيه التانيه و يوصل للطريق منور عادى
دياب / ايه ده ؟!  بس كدا !!!
جابر / بيحاولوا يعطلونا مش اكتر ... او راكب معانا حد غالى
جابر يبص على جوزيف فى المرايه صاروخ ينضرب على العربيه
دياب / حاسب يا جابر
جابر ما يلحقش و العربيه تتقلب
.....................
فى الصحرا
عمران بيجرى بالحصان وسط الضلمه و نجاه بين ايديه فاقده الوعى كشاف هليكوبتر يتسلط عليه و مهما يحاول يخرج من دايره النور الطياره وراه راجل يطلع من الطياره برشاش يفتح النار و عمران بيحاول يهرب بس طلقه تيجي فى كتف عمران يتكفى على وشه نجاه تفلت من بين ايديه يلحقها بايده التانيه و يشدها و الحصان بيجرى على أقصى سرعه و النار مفتوحه تيجي فى الحصان يقع فى الارض على جنبه و رجل عمران محشوره تحتيه يحاول يسحبها الطياره تقف و الراجل ينشن على عمران عمران يغطى نجاه بجسمه صاروخ ينضرب فى الطياره يوقعها و عباده يدخل بالعربيه و فارس طالع من فتحه السقف الاتنين ينزلوا بسرعه يساعدوا عمران و فارس يشيل نجاه و يجرى بيها على العربيه عمران يحط ايده على الحصان بحزن شديد 
عباده / هنكرمه بس مش دلوقت لازم نخرج من هنا بسرعه
عمران يهز راسه و يقوم مع عباده
عباده / انت اتصبت !!!
عمران / انا كويس ... نجاه شوف نجاه بس الاول
فارس/ يلا يا جدعان مش وقت كلام ده
عمران و عباده يروحوا يركبوا و عباده يلف و يرجع
.........................
عند عربيه جابر
التلاته يساعدوا بعض يطلعوا من العربيه جوزيف يسيبهم و يروح يستطلع المكان جوزيف يبص على جابر و دياب بيحاولوا يعدلوا العربيه يروح يساعدهم
جابر / كتر خيرك
تليفون جابر يرن يطلعه الشاشه مكسوره مش عارف يرد
جابر / كملت
دياب يطلع موبايله يلاقى نور عربيات جايه من بعيد التلاته يطلعوا مسدساتهم و يحتموا بالعربيه العربيات تعدى و من الناحيه التانيه كمان العربيات تعدى عربيه تقف و التلاته يداروا المسدسات ورا ضهرهم
سواق العربيه  / اى خدمه يا رجاله
دياب / عطلت و هنزقها فى جنب ما تشغلش بالك انت اتفضل
السواق يهز راسه و يمشي التلاته يزقوا العربيه فى جنب و الطريق ماشي رايح جاى جابر يحاول يشغل العربيه ما بتدورش يركب و يحاول يشغلها ما بتدورش
دياب / سيبها يا جابر وقفتنا هنا مش امان
جوزيف / خلصت خلاص ما اعتقدش فى اى حاجه تانيه هتحصل ... اليوم خلص
جابر ينزل و يقفل العربيه جوزيف يشاور لعربيه ربع نقل تقف ينط فى الصندوق دياب و جابر ينطوا جنبه
جابر / شوف كدا فى اى اخبار
دياب يطلع التليفون و يتصل
.................
فى المستشفي فى البلد
عباده / طمنيني يا بنتى هى عامله ايه
الدكتوره/ هى لابسه ايه لا عرفنا نقطعه و لا نقصه و طلعت عينا عشان نقلعهولها نركب ليها المحلول
عباده/ ما علينا هى عامله ايه
الدكتوره / هى ما فيهاش مشاكل كلها كدمات بس ضغطها واطى جدا باذن الله اول ما المحلول يخلص هتبقي كويسه و زى الفل
عباده / طب ممكن ادخل اطمن عليها
الدكتوره/ اكيد اتفضل
عباده يدخل بيجرى يلاقي نجاه نايمه فى السرير لابسه لبس المستشفي و متعلق فى ايدها محلول يمسك ايدها السليمه و يبوسها
عباده / حمد الله على سلامتك يا ست البنات للحظه حسيت انى مش هشوفك تانى
عباده يروح يبص على شباك الاوضه و يتبت عليه انه مقفول و يروح ناحيه الحمام و يفتح الشباك و يتأكد ان فى حديد عليه يرجع لنجاه عباده يطلع الموبايل
عباده/ انت فين
فارس / مع كارم فاق اهو الحمد لله بس حاطينه تحت الملاحظه عشان رجع غالبا ارتجاج
عباده / بقك ده و لا بكابورت
فارس / الله الدكتور هو اللى قال
عباده / تعال اوضه اختك على ما الف اطمن على باقي الناس مش عاوزها لوحدها ابدا و اسمع يا كلب البحر انت حريم عيال صغيره عواجيز اللى يهوب من اختك شقه فاهم و لا اشقك انا
فارس/ هو انت لاقيني قدام مسجد ايه المعامله دى
عباده / اخلص مش فايق لك
عباده يقفل و يروح يقف قدام سرير نجاه
عباده / فوقى يا قلبي بردى قلبي قبل ما اسيبك ... القدره من عندك يا رب
.................
فى المستشفي عند مختار
الدكتور / صدقنى لو كانوا بره هيعملوا اكتر من اللى عملناه كنت هسعالك بنفسي فى الموضوع بس ... احنا ما فيش قدامنا غير اننا نستنى
مختار / يعني لو ما فاقش فى التمانيه و أربعين ساعه دول استعوض ربنا فيه يعني و لا اعمل ايه و بعدين هى مش طول عمرها اربعه و عشرين ضاعفتوها امتى
الدكتور/ لو سمحت اهدى بس عشان
مختار/ انا كدا هادى جدا ... من فضلك انتدب تلت اربع دكاتره من بره يبصوا عليه و اللى هيطلبوه هياخدوا ضعفه
الدكتور / تمام هعمل اللى هقدر عليه
مختار / عن اذنك
مختار يطلع بره و يطلع التليفون
مختار / ايوه يا عبد الله طمنى
عبد الله / خرجوله الرصاصه و وضعه مستقر
مختار / بسأل عن نجاه
عبد الله / ما فيهاش حاجه إرهاق مش اكتر ركبو لها محلول و هتبقي كويسه باذن الله طمنى انت على اللى عندك
مختار/ ابعتلى احسن دكاتره عندك و لو تعرف اى دكاتره شاطرين فى اى حته ابعتهم مش مرتاح للمكان هنا
عبد الله / طب ما تيجوا هنا
مختار/ الطريق مش امان و انا معييش رجاله كفايا
عبد الله / و لا هنا فى رجاله كفايا البلد انضربت من كل حته حرفيا
مختار / سمعت
عبد الله / تمام هشوفلك الدكاتره و اكلمك تانى
مختار  / بسرعه ربنا يبارك لك
مختار يقفل و يتنهد و يروح اوضه الولد يلاقي الرجاله واقفين
مختار / فتحوا عنيكوا
الرجاله تهز راسها مختار يسيبهم و يمشي
..........................
ناحيه الباب الخدمى لمستشفي البلد
جوزيف ماشي بيتابع اشاره و دياب وراه
دياب / انت بتدور على ايه
جوزيف / ثوانى
جوزيف يروح ناحيه باسكت زباله كبير و يشد كيس اسود و يطلعه يفضيه فى الارض
دياب / انت اتجننت انت بتعمل ايه
جوزيف / دا انا هنفجر فيكوا كلكوا دلوقت اسكت خالص
جوزيف يفتح كيس تاني يفضيه البدله تقع
جوزيف / ايه ده !!! هى فلوس حرام ؟! ... هو انا اه سارقها بس لما ما ترموها هتجبرونى اسرق غيرها
دياب / انت بتقول ايه !!!
جوزيف / بقول قرفتونى اوعى
جوزيف يدخل المستشفي و البدله فى ايده و دياب وراه
دياب / هو انت ليه بتسرق فلوس
جوزيف / امال اجيب فلوس منين ما دى الطريقه الوحيده اللى اعرفها و بستخدمها من سنين
دياب / طب ما تعملهاش تانى لما تعوز حاجه قولى
جوزيف يضحك باستهزاء
دياب / الحرام حرام حتى لو كانت النيه خير و حلال
جوزيف يسيب دياب و يمشي دياب يشده 
دياب / انت جبت ده لنجاه يعني حاجه تخصنى ادفع انا تمنها
جوزيف / انت عارف دى بكام ؟!
دياب / انت عارف انا احتكم على كام؟
جوزيف / عارف
دياب / تؤ ما تعرفش و مفيش مخلوق برانا يعرف
جوزيف / و هتقولى ؟!
دياب/ تؤ
جوزيف يضحك
جوزيف / جدع تعجبني ... واحده من أهم نقط قوتكوا ان المجلس ما يعرفش انتوا ازاى بعد كل الحرب دى فلوسكوا ما بتخلصش و لا رجالتكوا
دياب / يا جدع قول ما شاء الله ... سيبك من المجلس خلينا فيك انت ... لو عرفت هتقول ؟
جوزيف / اى حرب لازم يبقي فيها خساير و كل حاجه و ليها تمن
دياب / مفيش استثناءات خالص
جوزيف يرفع صابعين و يمشي
دياب / ايه هم
جوزيف / يا عم فكك منى بقي روح اطمن على اخوك احسن
دياب / اخويا !! ماله اخويا
دياب يطلع الموبايل و يتصل يبص على جوزيف ما يلاقيهوش دياب يتنهد و يكمل المكالمه
دياب / منصور طمنى
.........................
فى اوضه فى المستشفي
عمران قاعد على السرير بيقلب فى صوره مع الحصان الأسود و الحزن مالى وشه الباب يتفتح و محمد يدخل
محمد / الله ما انت زى الحصان اهو امال حاجزينك فى اوضه و عاملنا عيان و ما حدش يقول لأمك و فيلم هندى فى ايه مالك
عمران / الحمد لله
محمد / الحمد لله على كل حال فى ايه قاعد كدا ليه ؟
عمران / ليل مات و سبته فى الصحرا
محمد يتحرج و يبان عليه الحزن
محمد/ بس انت عارف انهم مش هيسيبوا اى حاجه اصلا كل الحاجه هتتلم و بعدين انت ايه اللى خلاك تاخده معاك اصلا ما خدتش عربيه و لا موتوسيكل ليه واخد حصان يا عمران ؟! انت فاكر نفسك بتحارب كفار قريش
عمران يبص لمحمد
محمد / قضاه قضاه هو عمره كدا هنقول ايه اهو مات ... هو الخيل ينفع يتقال عنها شهيد
عمران / انت بتتكلم جد !! محمد اطلع بره و لا روح و لا شوف هتروح فين ما توجعش قلبي ... اقولك انا كويس انا هروح اطمن على نجاه هى فاقت و لا لسه
محمد / لسه
عمران / طب وسع
عمران ينزل من على السرير عباده يفتح الباب و يدخل
عباده/ الله رايح على فين كدا ارتاح
عمران / انا كويس الحمد لله كنت عاوز اطمن على نجاه
عباده / الحمد لله بخير هى بس فرهدت جامد ركبولها محلول و باذن الله تبقي زى الفل طمنى انت عليك يا بطل عامل ايه
عمران / كويس الحمد لله
عباده / انا مقدر زعلك و خسارتك بس الحى ابقي من الميت على الاقل مات بسرعه ما اتعذبش 
عمران / تسلم يا عمى انا فاهم كل الكلام اللى هتقولوه الحمد لله على سلامه نجاه قدر و لطف اى حاجه تانيه ما تجيش حاجه جنب سلامتها
عباده يبتسم بحرج و يطبطب على عمران و يطلع بره
محمد / سلامتك انت بالدنيا
عمران / خلاص يا جدعان ما تافوروش و يا ريت لو تشوفوا لكم حاجه اهم تشغلوا نفسكوا بيها انا كويس
محمد / تمام ... لو عوزت حاجه
عمران / معايا رقمك هبقي اكلمك
محمد يبص لعمران و يطلع بره يقفل الباب و عمران يروح الحمام يغسل وشه بالمايه و يبص لنفسه فى المرايه و ياخد نفس و يكتم مشاعره جواه
......................
على باب اوضه نجاه
فارس / يا ابنى دا احنا و لا كأننا فى فيلم أجنبى من بتاع الخيال العلمي ده ما كانش فاضل غير شويه اطباق فضائيه و قرش الميجالدون يطلعونا من وسط الرمله
جابر يبص لفارس
فارس / بس بيني و بينك البت دى ليها عمر انا مش عارف نجت ازاى دا خالى اللى هو خالى بجلاله قدره راجع بيعرج و بيوصف اللى حصل كانه فيلم رعب
جابر / قدر و لطف
فارس / و اللى حصل معاكوا و اللى حصل مع جماعه ناصر دا كتير على عيله زى اميره و لا امايا دى
جابر / اديك قولتها دول كلهم بما فيهم الشبح بتاعنا عرايس مريونيت فى ايد اللى بيحركهم
فارس / تقصد ايه ؟! انه  ..
جابر / اقسملك بالله الموضوع كله مش نازل لى من زور ... اعقلها كدا بسم الله الرحمن الرحيم البدله تلبسها فى نفس اليوم اللى كل الحاجات دى تحصل و قبل الهجوم يسيب الجبل بما حمل و يجرى علينا قال ايه بيطمن و يحصل علينا هجوم و احنا راجعين و ما حدش فينا يتخربش حتى
شاهين يدخل
شاهين / يا اخى قول الحمد لله ... حمد الله على السلامه عاملين ايه
جابر / الحمد لله انت بتعمل ايه هنا مش المفروض كنت على مدخل البلد
شاهين / جيت اطمن على ابويا كان بتكشف على رجله و طلع فى مزق و محتاج راحه و علاج و كدا فقولت اجى اوصله و بالمره اعدى اطمن على نجاه
فارس / بخير تسلم
شاهين / مفيش اخبار عن صابر
فارس / لا مفيش
شاهين / تمام طمنتونى ... هى نجاه
فارس / نايمه لما تفوق هنقول لها انك جيت و سألت ما تقلقش
شاهين / تسلم
دياب يدخل بيجرى
دياب / ما شوفتوش يونس
جابر/ هو مش كان معاك ؟
دياب/ زاغ منى
شاهين / ما تكلمهم فى السويتش تحت يراجعوا الكاميرات و اعرف مكانه
دياب / مش عارف اقولهالك ازاى بس الكاميرات فيها لاج
فارس / هو مفيش غيره 
شاهين / و احنا هنسكت له و لا ايه دا احنا هنطلع عين اهله يلا بينا يا رجاله
جابر / عاوزين تدوروا عليه اتفضلوا انما انا قتيل الباب ده و فارس هيدخل يقعد جوه
فارس / دا يبقي ناوى على موته النهرده لو فكر يهوب من الباب ده
جوزيف يدخل مسند مغاورى شاهين يجرى يسند معاه و دياب يسند مكان جوزيف
جوزيف / فى ايه فى حاجه حصلت لنجاه و لا ايه
جابر / كنت فين
مغاورى/ كان معايا ... انت روحت فين يا شاهين و سبتني
شاهين / جيت اطمن على نجاه قبل ما نمشي حضرتك ايه اللى قومك كانوا جابولك كرسي و لا اى حاجه
مغاورى/ بسيطه فاقت و لا لسه
فارس / لسه
مغاورى / طب وسع اما ادخل اقعد جنبها لحد ما تفوق
شاهين / يابا انت محتاج
مغاورى / انا مش عاوز اسمع نفس سندنى يا فارس لجوه
فارس يسند مغاورى و يدخلوا و يقفلوا الباب
دياب / انت عرفت مكان اوضه خالى منين و ليه سبتني و مشيت
جوزيف/ انت لو سألت اى عيل صغير عن اوضه مغاورى الجارحى الف من يدلك مالك فيك ايه
جابر / اصل فى مشكله فى السويتش و الكاميرات مش شغاله كويس
جوزيف يبص على شاهين و يرجع يبص على دياب
جوزيف / نجاه عامله ايه
جابر / ما تغيرش الموضوع يا ملك النت و التكنولوجيا
جوزيف / انت مش هتهدى و لا تبطل صح
جابر / و هو انا لسه عملت حاجه
جوزيف / و لا تعمل كدا كدا زى قلتها
دياب / رجاله نركز فى المهم لو سمحتوا لا وقته و لا مكانه و لا فى اى حد فينا قادر اليوم كان صعب و لحد دلوقت مش عارفين هنلمه ازاى
جوزيف / تلم ايه هو انت فاكره خلص اللى حصل النهرده ده مش شغل امايا انا صحيح ما اعرفش مين الضيف الجديد بس واضح ان عنده إمكانيات
دياب / و العمل
جوزيف / الهدف واضح
جوزيف يشاور على الاوضه براسه
جابر / لا ما تقلقش على الهدف ده احنا واقفين له
جوزيف / كويس... هنزل اشوف الكاميرات و أحاول اعرف مصدر اشاره التشويش
دياب / منصور شغال عليها
جوزيف / مش هيوصل لحاجه من عنده ... استاذنك يا جابر بيه حوار الكسوف الزياده اللى عندك تشوف لك صرفه فيه النهرده و ما تسمحش لاى ممرضه تدخل الاوضه دى لوحدها و لا تدى لنجاه اى حقنه من غير ما تتأكد من الدوا اللى فيها ... يلا يا دياب
جوزيف و دياب يمشوا
دياب / كنت فاكر امايا عمرها ما هتاذى نجاه
جوزيف / مفيش مخلوق يعرف انى جايب البدله دى لنجاه اللى حصل لنجاه النهرده كانت محاوله قتل مش خطف نجاه مستحيل كانت هتنجى من كل ده من غير البدله
دياب/ و دا اللى مخليك واثق انها مش امايا
جوزيف / كل اللى محتاجينه اننا ندعى ان اللى عمل كدا راجل ... صدقنى امايا هتشيل عنك هم كبير اوى
دياب / انا مش فاهم حاجه
جوزيف / و انا مش فايق اشرح بكره تفهم كل حاجه ... بس استنى هنا ... انت كنت شاكك فيا انت كمان ؟!
دياب يهرب بعنيه و يبص حواليه جوزيف يخبطه على كتفه
جوزيف / جدع ... اوعى تثق فيا خليك مصحصح
جوزيف يمشي و هو بيضحك دياب يستغرب و يمشي وراه
………………………….
فى مضيفه الزنايته
نسمه بتصلى هند تدخل شايله الموبايل
هند / نسمه نسمه تعالى كلمى فايز فيديو كول تعالى الدنيا هديت اهى الحمد لله تعالى
نسمه تسلم و تقوم تجرى تاخد الموبايل تشوف مختار قاعد جنب فايز تعيط و ما تقدرش تمسك نفسها
نسمه / قلب امك يا ابنى قلب امك يا ضنايا عامل ايه يا حبيبي عملوا فيك ايه يا قلبي طمنى عليك
هند / يا ستي اديله فرصه يتكلم اهدى شويه وترتى الواد
نسمه / مش قادره مش قادره انت فين يا كبدى و انا اجيلك
مختار / ابنك بخير و أمانه معايا لحد ما ارجعه لحضنك عاوزك تهدى خالص و ما تضايقيش نفسك
نسمه / انا اجيلك قولى انتوا فين بس و انا اجى
مختار / مش امان يا نسمه دلوقت لا انك تيجي و لا اننا نرجع اصبري بكره باذن الله الدنيا تروق و ربنا يجمع شملك بابنك انا بس قولت ما تقلقيش
نسمه/ ربنا يرزقك من وسع و يبعد عنكوا ولاد الحرام ربنا يباركلك
مختار / هستاذن اقفل لو مش محتاجه مننا حاجه تانى
نسمه / اصبر بالله عليك ما شبعتش منه ... ثوانى بس
هند / هانت يا نسمه فات الكتير ما باقى الا القليل هانت
نسمه تهز راسها و هى بتعيط
مختار/ فى حفظ الله
هند تقفل و نسمه تنهار من العياط هند تاخدها فى حضنها
هند / ايه بقي ما ربنا كرمه واسع و طمنك عليه اهو
نسمه / قلبي موجوع اوى يا ام شاكر قلبي موجوع
هند تاخد نسمه فى حضنها
هند / ربك كبير و قادر على كل شئ اهدى يا ضنايا اهدى و ما تعمليش فى نفسك كدا اهدى و قومى اغسلى وشك قومى يا بنتى قومى
هند تقوم نسمه و تدخلها الحمام تغسل ليها وشها بايدها
. .....................
فى المستشفي عند جوزيف
جوزيف يبص فى اوضه السويتش
دياب / بتدور على حاجه ادور معاك
جوزيف/ بتاكد ان كل حاجه فى مكانها
دياب / كل حاجه فى مكانها مش شايف اى حاجه مش طبيعيه هنا و بعدين فى كاميره على باب السويتش متوصله بالسيستم عندنا يعني اى حد بيدخل هنا بيتبعت لينا صورته و الداتا بتاعته
جوزيف / و الميكروروبت وضعها ايه معاكوا الكاميرات بتاعتكوا بتبعت بيها نوتيفيكايشن و لا بيتم تجاهلها على اساس انها حشره و كدا
دياب يبص حواليه
جوزيف / مفيش حاجه هنا كلم منصور شوف كدا لسه فى لاج فى الكاميرات و لا اتصلحت ... غالبا اتصلحت
دياب يطلع الموبايل و يتصل و جوزيف بيتحرك فى المكان و بيدور
دياب / ايوه يا منصور اخبار الكاميرات ايه ؟ ... اتعدلت ... تمام سلام
جوزيف / استنى اسأله امتى اخر مره السويتش اتفتح و مين اللى دخل
دياب / منصور ... بقولك ... شوف فى الكاميره اللى قدام السويتش مين آخر حد فتح باب السويتش و امتى ... تمام مستنيك ... النهرده ؟! امتى ؟؟... انت متأكد ؟! ازاى يعني الكلام ده ... راجع الشريط كويس ... طب تمام اقفل دلوقت هكلمك بعدين
............................