الكبيره ٢ بقلم / لولو_محمد

الحلقه ١٣٠

(((((( الكبيره ٢ ))))))
#لولو_محمد
الحلقه ١٣٠
فى السيرك
امايا بتتكلم فى التليفون
امايا / really!!! Send me all the info … no no I will handle it myself
( بجد !! ابعتيلى كل المعلومات ... لا لا اما هتعامل بنفسي )))
امايا تقفل المكالمه توصلها رساله تبص لبنت جنبها و هى بتبعت حاجه من الموبايل
امايا / there is a man called hatem I want him  here asap … alive
( فى راجل اسمه حاتم عوزاه باقصي سرعه ... عايش )
البنت تبتسم توصلها رساله تبص فيها تهز راسها و تمشي امايا تكلم صوره حاتم
امايا / انا عرفاك ... هننبسط سوا يا تيمو ... هننبسط اوى
.......................
فى مضيفه الزنايته
عباده و مختار قاعدين يبصوا على جوزيف و جابر مبهدلين بعض و حواليهم باقي الشباب
مختار / انا يا دوب سبتهم و مشيت دا لو عيال صغيره مش هتعملوا فى بعض كدا
عباده / اكيد فى سبب و لا ايه ؟
جوزيف / هو اللى طلب احنا كنا بنتمرن و نلعب و مبسوطين هو اللى اتهبل فى عقله و قرر يلعب بطريقتى و من غير قوانين
عباده / بتحاول تثبت ايه يا جابر انت شايف ان ده وقته؟!
جابر / الواحد لازم يختبر قدراته و يشوف اخرها ايه ؟
مختار يزعق/ اخرها موت واحد فيكوا ... لو ما كانوش حاشوكوا ما حدش فيكوا كان بيقف كنتوا هتكملوا لامتى ... و انتوا كنتوا مستنين حد يموت عشان تدخلوا
دياب / ما كانوش بيسمعوا لحد و نازلين فى بعض طحن
مختار / و لما انت شايف كدا ما فصلتهمش من بدرى ليه
دياب / فصلناهم فعلا بس حتى و احنا بنفصل ما حدش فيهم كان بيقف الاتنين نازلين فى بعض ضرب و في اى حد بيحاول يحوش
عباده / عندنا بكره يوم مهم ... كل واحد عارف هيعمل ايه يتفضل ما يضعش وقته اكتر من كدا... أما بقي البهوات يا ريت يستنوا عاوزهم
عباده يبص للرجاله كلهم يطلعوا بره و جوزيف و جابر قاعدين رافعين مناخيرهم لفوق و عباده و مختار باصين ليهم
عباده / بقينا لوحدنا اتمنى اسمع اى كلام مختلف يبرر اللى حصل
جابر / انا قولت اللى حصل ما عنديش جديد اقوله
جوزيف / المفروض اعمل له ايه يعني اطبطب عليه و لا اقوله خلاص انت كسبت و لا المفروض اعمل ايه هو اللى بدا
جابر / و انا ما انكرتش
عباده / على قد ما هو صعب عليا اللى هعمله بس انا متاكد انكوا تستاهلوا... استنوني ثوانى
عباده يقوم مختار يقوم وراه
مختار / على فين ؟
جوزيف / لتانى مره حد من طرفك يدخل عشان ينجيك
جابر / مش متأكد ان وشك موافق على الكلام ده
جوزيف / عشان جسمك سخن بس اصبر ساعه و لا اتنين بالكتير... هتعيط من الوجع
جابر يبتسم بسخريه عباده يدخل فى ايده افيزين و كيسين قماش طلعوا الموبايلات حطوها هنا و اى وسيله تتبع خاتم اى حاجه حتى الاسلحه اى سلاح حطوه هنا
جوزيف / اقلع لك ملط يعني و لا ايه
عباده / انت فاهم قصدى
جوزيف يقلع الحزام و الجزمه و يفضي جيوبه و يرجع يقعد مكانه و جابر يقف و يفضي جيوبه هو كمان مختار يسحب حزام بنطلونه و يديه لجوزيف يلبسه و يروح يقلب فى الكوتشيات يجيب له واحده مقاسه يلبسها عباده يمسك ايدين جابر ورا ضهره جابر ما يقاومش و يربطه بالافيز و يغمى وشه و يكرر نفس الكلام مع جوزيف ما بيقاومش و كل واحد يزق واحد و يركبوهم جنب بعض فى عربيه و يركب عباده قدام و يسوق بره السرايا نجاه تدخل
نجاه / هو واخدهم على فين بالوضع ده
مختار / هيرميهم بعيد فى قلب الصحرا و هم هيرجعوا لوحدهم
نجاه / و مين هيمنعهم لو فكروا يقتلوا بعض
مختار / مفيش كلام بعد كلام الكبير و هو قرر يعاقبهم كدا
نجاه / و حضرتك وافقت
مختار / لأنهم صعبين
نجاه / و حضرتك فاكر بقي انهم مش هيقدروا يرجعوا هيقدروا الفكره ان
مختار / الفكره ان الموضوع مش بأيدي خلاص
مختار يمشي نجاه تجرى على دياب واقف مع الرجاله فى جنب
نجاه / انت مش هتعمل حاجه ؟
دياب / اقدر اعمل ايه
نجاه / ابعت درون او اى حاجه
دياب / اهدى يا نجاه الكبير مش هيجازف ان حاجه وحشه تحصل ليهم
نجاه / و انت بقي ضامن أعدائنا ما يستغلوش فرصه زى دى ... انت ازاى بارد كدا
نجاه تسيب دياب و تروح تقلب فى النمر تطلع رقم ابوها غير متاح تنفخ و تدخل السرايا و الكل متابعها
.........................
فى سرايا الجوارحه
شاهين / انا لا شوفت و لا سمعت انا ما ليش دعوه و غلطان انى جيت قولت كمان
مغاورى / هى كدا يعني يا شاهين
شاهين / يابا الراجل محلفنى و بعدين نعتبره راجل مش تمام ما تجيب دياب و تسأله هى نزلت من بيت يونس من هنا و دياب نزل وراها هاته و واجهه ان كان ده حصل و لا لا
مغاورى / و ان قال لا
شاهين / هو مش فى كاميرات هناك يعني ما اكيد متصور الا بقي لو لقيته وقفها ساعتها او مسحها و دى برده هتبان لان التوقيت بيبان فى التسجيل
مغاورى / بس دياب ما يعملش حاجه زى دى
شاهين / انا ما ليش لا صالح و لا طالح فى الحكايه دى انا بلغت حضرتك باللى سمعته و الباقي عندك تعمل اللى تشوفه صح انا اكتر من كدا ما ليش فيه و هستاذنك عشان ورايا شغلانه كدا فى السريع
مغاورى يتنهد و يهز راسه شاهين يمشي مغاورى يطلع الموبايل و يتصل بدياب
مغاورى / السلام عليكم ... فينك ... ايه !! امتى ده حصل و ليه ؟!
...............................
فى الصحرا
عباده يوقف العربيه و ينزل يفتح البابين و يشد الأكياس القماش و يشدهم الاتنين ينزلهم
عباده / انزلوا ... انزل ... انزل ... انا عارف ان لا انت و لا انت الحكايه دى صعبه عليكوا... و هتعرفوا تروحوا بس انا شايف ان دى فرصه كويسه تبقوا لوحدكوا بعيد عن الدنيا و اللى فيها يا تلاقوا طريقه بينكوا يا تموتوا بعض هنا بعيد عن عنينا و بكيفكوا بقى
جوزيف / يعني لو انا قتلته مش هيفرق معاك ؟!
عباده يروح يركب العربيه و يسيبهم مربطين و يمشي جوزيف بيبص على السما و جابر بدا يمشي و يسيب جوزيف جوزيف يحصله بعد ما ينشف ايده جامد و يشد ايديه بعيد عن بعض الافيز يتقطع
جوزيف / دا سابوك لوحدك بجد
جابر / مش اول مره عادى ياما جربناها
جوزيف / بس المشكله ان انا مش لوحدى
جابر / مش فارقه معايا
جوزيف / هتاخد الطريق كله مربوط كدا ؟! اقدر اساعدك على فكره
جابر ينشف ايده جامد و يشد لحد ما الافيز يتقطع
جوزيف / طب معلش من باب الفضول بس انت ليه عملت كدا من الاول... و كنت متوقع منى ايه او كنت متوقع عموما ايه
جابر / ممكن توفر طاقتك الطريق طويل و احنا مش معانا مايه زى ما انت شايف
جوزيف / ممكن بس حابب اطمن عليك بس
جابر يقف و يبص له باستغراب
جوزيف / انت هتفضل كدا لامتى ... انت ممكن تستفيد منى كتير اوى
جابر / و المقابل ؟ نجاه !!! الله الغنى يا سيدي
جوزيف يبتسم
جوزيف / هو ده بقي الموضوع ؟! نجاه !! مالها نجاه ... ايه اللى حصل بيني و بينها ضايقك منى اوى كدا
جابر / انت مش مضايقنى ... انا مش شايفك اصلا
جوزيف / براحتك
جابر يمشي و جوزيف يمشي وراه جابر يلف
جابر / انت هتفضل ماشي ورايا كتير ما تشوف لك سكه تانيه و لا
جوزيف / سكه تانيه ايه احنا فى صحرا و دا الاتجاه هو يعني من حبى فيك اوى مش قادر ابعد عنك دا انت بقيت غريب جدا ... للمره المليون انت محتاج تتحكم فى أعصابك اكتر من كدا ما هو مش هيبقي عباده و بعديه انت ايه البلد دى مش مكتوب لها حد عدل و لا ايه
جابر / افندم ؟!
جوزيف / انا و انت عارفين ان عباده ما كانش هيشمها لولا أن مختار سبهاله و انا و انت برده عارفين انك ما كنتش هتشمها لولا أن نجاه بنت
جابر / خلصت ؟!
جوزيف/ انا ما بدأتش اصلا ... انت محتاج تتعلم تدور على مصلحتك محتاج تحيد مشاعرك ... المشاعر دى هى نقطه ضعف اى حد ... لازم تعرف تفصل
جابر / شكرا على النصيحة... طريقك اخضر يلا اتكل على الله
جوزيف يبتسم بسخريه و يسبقه جابر يمشي وراه جوزيف يبص له و يتكلم بدلع
جوزيف / ماشي ورايا ليه يا بارد ايه ما عندكش اخوات صبيان
جابر / سم ياله سم
جوزيف يضحك و يمشي و جابر وراه مش طايق نفسه
جوزيف / كان زمانى ميت دلوقت انت اللى اخترت
جابر / دا هيبقي طريق ما يعلم بيه الا ربنا
جوزيف يضحك بصوت عالى و باستفزاز جابر يتنهد و يحاول يهدى و يفضل ماشي
...........................
فى اوضه نجاه
نجاه رايحه جايه و هى متوتره و كل شويه تبص فى الساعه مهره تدخل الاوضه نجاه تبص لها
نجاه / فى حد منهم جه ؟
مهره تهز راسها لا و تطلع الموبايل و تكتب و تورى نجاه
مهره / محل الفساتين بعت ناس كتير اوى تحت و عاوزينك تنزلى تنقى فستانك
نجاه / احنا فى ايه و لا فى ايه بس ... انزلى انتى يا مهره نقى انتى فستانك انتى اهم واحده فى الليله دى
مهره تكتب / لوحدى ؟!!
نجاه / معاكى حق ... انا جايه معاكى
مهره تمسك ايدها و ينزلوا سوا تشوف الستات متجمعين و كل واحده ماسكه فستان و بيضحكوا هند تشوفها
هند / قولت ما حدش هيقدر ينزلها الا مهره
تليفون هند يرن
هند/ دا ناصر... عن اذنكوا
هند تروح فى جنب
هند / السلام عليكم و رحمه الله و بركاته ازيك اكيد سمعت الخبر مش كدا
ناصر / و عليكم السلام ... سمعت بس انا مش فاهم حاجه ازاى يعني
هند / قدر يقنعها نقول للفرحه لا ... عقبالك انت كمان ما تنجز كدا و تخلى الفرحه فرحتين
ناصر / ما حضرتك عارفه انها مش هتوافق
هند / كلمها و لو تحب اكلمها انا اكلمها
ناصر / يا امى الحاجات دى ما بتجيش كدا
هند / بتيجي و بعدين العطله من عندها مش هنوقف دنيتنا و حياتنا لحد ما ترسي على رسمه مفرش السرير احنا حياتنا سريعه و انت عارف البطئ ده مش هيمشي هنا
ناصر / يا امى الموضوع مش موضوع مفرش و لا حاجه بس الناس كانوا لسه عندنا و اكيد وراهم مصالح
هند / بالله عليك دا كلام ... ايه يا ناصر انت مش عارف تخلص التفاهات دى و بعدين انت بتكلمنى انا ليه فى الحاجات دى ما تكلم ابوك
ناصر / ما انا مش عارف اوصل له ما بيردش
هند / اصبر شويه و هو هيتصل بيك ... اكيد فى ايده حاجه يعني ما انت عارف
ناصر / ربنا يعينه ... تمام يا امى بس برده فكرى تانى فى الموضوع ده
هند / انا !! يا حبيبي انا ما ليش اى صفه فى المواضيع دى غير انى ازغرط و اسقف اكتر من كدا كل واحد حر فى موضوعه يعمله وقت ما هو عاوز انا مالى
ناصر / ايه الكلام ده بس يا ست الكل هو فى كدا برده؟
هند/ فى ... فى حياتكوا فى ... انا ام ديمقراطية
ناصر يضحك
هند / انت عاوز منى حاجه تانى ؟
ناصر / ما اتحرمش منك يا ست الكل
هند / قلب ست الكل هروح اشوف بقي الجماعه و الفساتين انا ام العريس و العروسه ما ينفعش كدا اللبس اى حاجه
ناصر / اكيد لو ما كنتش انت هتولعها مين هيولعها بس
هند تضحك
هند / سلام يا قلب امك فى حفظ الله
هند تقفل و ترجع لهم بتجرى
هند / ايدك ايدك منك ليها الموف ده انا عيني عليه من الصبح
خديجه / ما يغلاش عليكى
هند / هقيسه و ارجع
هند تاخد الفستان و تروح الاوضه اللى فى الجنب
.............................
فى شركه على
على بيتكلم فى التليفون
على / ايوه بس انا
مختار / انت ايه انت ايه بجد هو احنا هنشحتك يا اخى دا انت اخرتك هتبقي هباب انا ما شوفتش كدا مش عاوز تاخدها فى بيتك عشان مراتك ما تزعلش و رميتها و دمرت حياتها يا اخى على الاقل أعمل منظر ... احضر نص ساعه مثل الفقره قدامها و قدام الناس ان ليها اب ... اعمل اى حاجه تشفع لك لما تكبر و ما تلاقيش حد يعبرك
صمت
مختار / احنا عملنا كل اللى نقدر عليه معاك و كلمناك اكتر من مره انت ابوها انت وليها هتقف قدام ربنا تقول له ايه
على / ربنا عارف كل حاجه عارف حتى اللى انت ما تعرفوش
مختار / اهو انا نفسي اعرفه نفسي اوى اعرفه ... انت ازاى كدا دى لحمك لحمك اذا كان قلبك كدا على بنتك امال ولاد الناس بتعمل فيهم ايه
على / اسمع ... إن كان على جوازها انا متكفل بيه بالكامل
مختار / عليك و على غبائك فلوس ايه يا شحات انت اللى بتكلمنى انا عليها ... اقول لك حاجه ... انا عارف ازاى اجيبك ... يمين بالله لتيجي لحد عندى تترجاني انك تحضر الفرح و هتشوف
مختار يقفل السكه على يتنهد و يدور فى النمر و يتصل
على / ايوه يا كارمن ازيك محتاجين نتقابل ... هيكون ليه يعني عشان بنتك ... مهره ... الو الو ...يا بنت الكلب ... يا بنت الكلب
...........................
فى الشركه عند اكرم
صوفيا شايله ملفات تقابل بياتريس
صوفيا/ مبسوطه انتى بالقرف ده ... و بعدين ايه ده اصلا هو فى حد لسه بيتعامل بالملفات و الورق احنا فى سنه كام احنا
بياتريس / ماما قالت نستحمل يبقي نستحمل
صوفيا/ امك كل اللى فارق معاها ان ابوكى يرجع لها احنا نولع
بياتريس/ اسمعى الكلام كفايا اوى اللى حصل لحد كدا ... انتى مش عارفه اللى حصل لحاتم و لا ايه
صوفيا / لا ما اعرفش خير
بياتريس/ بيقولوا معمول له أقامه اجبارى فى البيت مش قادر يخرج و لو حصل و خرج هيخرج على المطار على امريكا على طول و بيدير شغله كله من البيت
صوفيا / ازاى يعني
بياتريس / يس اللى قالى مامته عرفت لان البودى جارد بتاعها شغال فى نفس الشركه اللى عامله الحراسه على حاتم و باباه و انتى عارفه بقي الاخبار ... دا غير انهم عاملين حراسه مشدده على الفيلا و دا اللى خلى الموضوع ملفت جدا و الناس تسأل ليه كل ده
صوفيا / تفتكرى عمران ؟!
بياتريس / ما فيش غيره كل الناس بتقول انهم مافيا كبيره اوى فى الصعيد و تجار سلاح و من أخطر الناس اللى تتعاملي معاهم
صوفيا / ادى اخره مجايب ست زفته
بياتريس / ليه و مين اللى سافر يجيب ست زفته مش انتى مين اللى كانت روحها فى المجرم ده مش انتى
صوفيا / و انا كنت اعرف منين اصلا
بياتريس / طب الحمد لله انك اعترفتى انك ما تعرفيش كل حاجه سيبي بقي امك تخطط و تفكر و تصلح اللى نيلتيه
صوفيا/ قال يعني مامى ما كانتش عارفه و موافقه و مشتركه معانا فى كل اللى حصل
بياتريس / كانت بتلم وراكى
صوفيا/ انتى مفيش فيكي ذره مخ تفكرى بنفسك ابدا اى حاجه ماما تقولها حاضر حاضر حاضر
بياتريس / معاكى حق المفروض ما امشيش ورا مامى و امشي وراكى انتى فعلا
صوفيا/ مش فيقالك عن اذنك
صوفيا تمشي و بياتريس متابعتها
..........................
فى سرايا الزنايته
جابر يدخل بيجر رجليه يطلع المفتاح و يفتح الباب يسمع صوت نجاه
نجاه / جابر
جابر يقف و يبص لها
نجاه / ايه اللى حصل ؟!
جابر باصص لها و ساكت
نجاه / انا بكلمك على فكره
جابر / و انا مش قادر ارد
نجاه / تمام... اجيب لك تاكل
جابر يهز راسه لا
نجاه / ماشي ارتاح بس هنتكلم
جابر يهز راسه لا
نجاه / يعني ايه لا يعني ايه لا هنتكلم و هتفهمنى ليه عملت كدا
جابر / عملت ايه ؟!
نجاه / جابر !!
جابر / نجاه !!
نجاه تبص له من فوق لتحت و تمشي و ترجع له
نجاه / عمران اقنع مهره بالجواز و كانوا بينقوا الفساتين النهرده
جابر / مبروك
نجاه / حبيت اقول لك بس
جابر / شكرا
نجاه / على فكره انا زعلانه منك
جابر / حقك عليا
نجاه / ايه البرود ده انا قاعده هنا قلقانه و انت جاي بارد كدا و لا هامك
جابر / تمام اطلعى ارتاحى و انا هرتاح و بعدين نقعد و نتكلم
نجاه / ارتاح!!
جابر / تمام يا نجاه اولع انا مش مهم... اتفضلى ... امريني عاوزه تتكلمى فى ايه
نجاه / عملت كدا ليه ؟
جابر / عملت ايه تمرينه عاديه ايه اللى حصل يعني
نجاه / انت شايف منظرك ده تمرينه عاديه ؟ انت شايف اللى حصل بينك و بين يونس عادى ؟!
جابر / جدا
نجاه / يعني هيتكرر ؟!
جابر / لو ما كانش مضايقك ؟
نجاه / مضايقني مضايقنى جدا كمان انت مش شايف منظرك ... و بعدين صحيح ان انت اللى اخترت تلعب من غير قوانين؟! و مع مين مع يونس ... عاوز تموت يعني ؟! 
جابر / مش انا اللى كنت مبلبع على فكره دا هو
نجاه / و دا سبب تانى يخليه يتفوق عليك
جابر / عوزانى اعمل زيه يعنى ؟!
نجاه / اكيد لا و اكيد فى حد لازم يتكلم معاه فى الحاجات دى لأنها اكيد مضره على المدى البعيد و اللى اعرفه انه بيحافظ على صحته يبقي ازاى يعني
جابر يتنهد
نجاه / انت هتتعب و هو لا و ما دام مفيش قوانين انت هتتاذى
جابر / و جيت لك واقف على رجلى ما جيتش متشال و دا حالى بعد ما اترميت الوقت دا كله فى الصحرا من غير مايه ... اللى حصل النهرده بيثبت انى مش قليل خصوصا قدامه
نجاه / بتثبت لمين ؟ بتعرض روحك للخطر عشان تثبت ايه و لمين ؟
جابر / و لا حد ... نفسي
نجاه تبص له بحزن
جابر / ما تزعليش مش هكررها تانى... ارتاحتى كدا ؟!
نجاه تهز راسها لا
جابر / طب اعمل ايه عشان اريحك ؟
نجاه / اجيب لك تاكل ؟
جابر / هلقط اى حاجه من جوه و استحمل و انام ... و هقفل الموبايل اى حد يحتاج حاجه يفتح و يدخل يصحيني ... معاكى نسخه
نجاه / معايا
جابر / تمام هتعوزى منى اى حاجه تانى
نجاه / ما اتحرمش منك
جابر يهز راسه و يدخل و يقفل الباب نجاه تفضل واقفه قدام الباب حزينه تتنهد و تمشي
....................
فى اوضه عمران
عمران قاعد على السرير و فارد حواليه اطقم دهب و اللماظ و مهره قاعده على كرسي جنبه و مختار قاعد مضايق و هند بتقلب فى الأطقم و الجواهرجى بيفرجها
هند / انا محتاره بين ده و ده ايه رايك يا مهره
مختار / خدى الاتنين
هند / ايه رايك فى كلام ابوك يا عمران
عمران / مفيش حاجه تغلى على مهره
هند / وريني كدا الطقم اللى هناك ده كدا شكله رقيق اوى
مهره تشاور / كفايا
هند / ما انتى لو بتنقى هننجز انما انا اللى بنقى و انا ما بنقيش اى حاجه ان ما كانش الحاجه تستاهل ما اجيبش
مهره تبتسم بخجل الراجل يورى هند
هند / دا هديه منى انا للعروسه كفايا على العريس كدا ... بقولك ايه يا مختار ايه رايك فى الخاتم ده
مختار / ليكي صح ؟
هند / حبيبي اللماح
مختار / نقى حاجه حلوه زيك كدا هديتى للعروسه
هند / ايه رايك فى ده
مختار / شايف ياض زوق امك ... طبعا ما هى مختارانى
الكل يضحك
مختار / طب بما انى اطمنت انى سايبكوا فى ايدين امينه هستاذن ثوانى اطمن على حاجه تانيه كدا و راجع خدوا راحتكم
هند / مختار !!
مختار / معلش عن اذنكوا ... نقوا اللى يعجبكوا خدوا راحتكوا خالص
مختار يمشي و الكل مستغرب
هند / حبيبه قلبي مفيش اى حاجه من دول عجباكى خالص
مهره تشاور و عمران يترجم
عمران / اختارنا حاجات كتير اوى بيتهيالى كفايا ... لا لا لو فى حاجه عجباكى شاورى عليها عادى لسه الراجل هنا اهو ما نرجعوش زعلان
الراجل / و حد يدخل سرايا الزيني و يرجع زعلان برده
هند / عشت ... ما تيلا بقي يا مهره نقى
........................
قدام اوضه عمران
نجاه واقفه بتتكلم مع مختار
نجاه / و قال لو حد عاوزه ضرورى يدخل  يصحيه
مختار / تمام ... مهره جوه بتنقى شبكتها خشي لها
نجاه / عارفه ... بس انا جيت عشان حضرتك
مختار / خير
نجاه / هتكلم يونس فى اللى حصل ؟
مختار يتنهد
مختار / اكيد هو كمان رجع تعبان و عاوز يرتاح و بعدين انا ورايا هم ما يتلم للصبح انتى عارفه
نجاه / جابر اختار انسب وقت بصراحه
مختار / لعله خير اهم حاجه ما تتكررش
نجاه / لا هيتكرر هو قالى انه هيعملها تانى عادى لازم حد يتكلم مع جابر جابر كدا بياذى نفسه جامد و على الفاضي
مختار / تمام هبقي اقعد اتكلم معاه ..  دلوقت هستاذنك لازم امشي ... ما تعرفيش ابوكى فين
نجاه / لا خرج و ما رجعش
مختار/ تمام هكلمه اشوفه فين ... خشي لصاحبتك و اهو بالمره تشوفى كدا لو حاجه تعجبك
نجاه / تمام
...........................
فى اوضه قاسم
احلام / لا على فكره انا عندى اننا كل يوم نتفحت شغل فى المطعم و لا انناش نفضل محبوسين فى اوضتنا طول اليوم
قاسم/ الكلام ده يحمل معنين الاتنين اسوء من بعض
احلام / ما اعتقدش انى اقصد اى واحد منهم
قاسم / ايوه بس دول اهلى
احلام / و انا ما اعترضتش بس هم رافضينى و ما تحاولش تقنعنى باى كلام لان الإنسان بيحس ... يا اخى دا انت لو جايلك ضيف على الاقل تحاول تمثل انك طايقه انما انا لاقطه الطاقه السلبيه بتاعتهم من على الباب
قاسم / دا بس عشان انتى متاهبه و متحفزه و خايفه
احلام / دى انا !! طب و الله انت ظالمني
قاسم / ماشي ماشي اى كان ... انتى عاوزه ايه دلوقت
احلام/ نرجع لمازن
قاسم / قشطه ما عنديش مشكله بس شغلى اللى هنا بلاش شغلى خلينا نتكلم فى مدرسه مازن يا ستى هنعمل ايه
احلام / عندنا احسن مدارس
قاسم / يعني الحياه هتبقي اساسي هناك ؟!
احلام / قصدك ايه ؟! قاسم دا كان شرطى قبل الجواز ما ينفعش ترجع فى كلامك دلوقت
قاسم / انا ما رجعتش فى كلامى
احلام / لا بترجع اهو امال احنا بنبنى بيت هناك ليه و مأجرين واحد ليه و المطعم اللى كنت ناوى تعمله هناك كل ده كان بتضحك عليا لحد ما نتجوز مثلا و يبقي امر واقع ؟!
قاسم / يااااه انا عملت كل ده
احلام / انا ما بهزرش
قاسم / بس منفعله
احلام / بجد !! تمام ... اللى انت عاوزه ... اصل خلاص هقول ايه يعني ... طلقني مثلا
قاسم / مش شايفه انك افورتى الموضوع شويه
احلام/ انا عاوزه انام
قاسم/ اعتقد ان دى فكره ممتازه
احلام تنام و تدى لقاسم ضهرها و قاسم متابعها
قاسم/ احنا اتفقنا هنبقي بين هنا و هناك
احلام تلف له
احلام / انت هتبقي بين هنا و هناك مش انا انت شرطك انك ما تباتش فى بيت اهلى و جبنا بيت منفصل لو ناسي الاتفاق فأعتقد ان كان فى رجاله كتير كانوا حاضرين يفكروك بيه بس على العموم هى كدا كدا مش هتفرق مش هينفع اصغرك بالسرعه دى قدامهم خليها بينا احسن
قاسم/ افندم
احلام / زى ما سمعت ... انت لحد النهرده بتتفق معايا و تسكتني و فى الاخر بتعمل اللى على مزاجك اعمل اللى على مزاجك يا قاسم انا مش فارق معايا حاجه
قاسم / لا انا بتكلم عن جمله اصغرك
احلام / عندنا الراجل بيتربط من كلمته ما اعرفش عندك الراجل وضعه ايه بالظبط
قاسم / انتى ما بتسمعيش و بتغلطى
احلام / بتقلب الترابيزه يعني ؟! ... قاسم كفايا كدا النهرده عشان لو كملنا بجد ما اعتقدش النتيجه هتعجب حد فينا فمن فضلك ...
احلام تكتم الكلام جواها و تقوم تدخل الحمام و تقفل عليها الباب قاسم يقوم يلبس و يخرج و يرزع الباب وراه احلام تفتح باب الحمام تلاقيه مش موجود تروح تنام فى السرير و تستغطى و هى مضايقه ثوانى و تعيط قاسم يفتح الباب و يدخل يشوفها تشد الغطا على دماغها قاسم يتنهد و يقفل الباب
قاسم / انا ما رجعتش فى كلامى على فكره و لا كنت بضحك عليكي و لا ناسي الاتفاق
احلام / مش عاوزه اتكلم
قاسم / ما تتكلميش يا ريت ما تتكلميش يا ريت تسمعى اسمعى و بس ... انا حياتى كلها هنا
احلام تقوم تقعد و باين عليها العياط
احلام/ و انا حياتى هناك و انت عارف و رضيت
قاسم/ طلبت انك تدى فرصه لاهلى
احلام / هم مش مديني فرصه اعمل ايه عاوزنى اعمل ايه ... قاسم احنا حجزنا فندق عشان مش عارفين نقعد هنا انت مش مستوعب صح ... احنا لغينا الفرح
قاسم / انتى اللى طلبتى ...
احلام / عشان ارضي مامتك انا اتنازلت عشان ارضي مامتك اللى كانت بتموت او بتعمل بتموت انا اتنازلت بس مش معنى كدا انى هعيش عمرى كله اتنازل مش معنى انى بنت أصول و عديت مشكله انى هعيش عمرى كله بتجاهل ان فى مشكله اصلا مامتك رفضانى اهلك رافضينى
قاسم / مش حقيقي
احلام / اثبت لى ... اثبت لى العكس..  اثبت لى
قاسم / اديني فرصه اثبت
احلام / تمام عندك الفرصه اثبت
قاسم / بس من غير تحفز و تصيد اخطاء
احلام / ما تجبرنيش ادخل شهود بينا خلى بابنا مقفول علينا احسن ليك
قاسم / انتى بتهددينى باهلك يعني
احلام / لا بهددك باهلك انت ... همام اللى كان معاك و كلم اخويا و اتوسط لك وسطينا و شكر فيك و على اساس كلامه احنا وافقنا
قاسم / انت مستوعبه انتى بتقولى ايه
احلام / اه و للاسف انا بقول كلام اقل بكتير من اللى جوايا دلوقت... قاسم انت مستوعب انا حاسه بايه انت مستوعب شيفاك ازاى
قاسم / اقسم بالله لو حد غيرى كان
احلام / ما كناش هنبقي فى الوضع ده اصلا
قاسم/ انا كنت ناسي مفتاح العربيه
قاسم ياخد المفتاح و يرزع الباب و يمشي
......................
فى صلاه الفجر
الرجاله كلها خلصت صلاه فى المسجد و خارجين عباده واقف على الباب يشوف جابر خارج
عباده/ جابر
جابر يروح له
عباده / روح البيت امسك الحراسه
جابر / انا !!
عباده / انت مرهق و تعبان من امبارح البيت هيكون افضل ليك و كمان هبقي مطمن عليهم فى وجودك
جابر / حلوه منك يا كبير التزويقه دى عجبتنى حضرتك مطمن على الحريم فى حمايه واحد تعبان و مرهق لدرجه انه مش هيقدر يقوم بدوره بين الرجاله... حلوه ... امرك ... عن اذنك
جابر يمشي و عباده يتنهد و يروح ناحيه رجاله واقفين
عباده / كل واحد عارف مكانه مش عاوز اى أخطاء او مشاكل الحكومه و الصحافه ماليه البلد دورنا معروف احنا هنبقي وسط الناس بين الناس زى الناس لا فى سلاح هيترفع و لا فى طلقه هتنضرب اى حوار هيحصل الحكومه هى اللى تحله احنا دورنا نتأكد ان الناس مش ناقصها اى حاجه فى بيوتها مفيش حرمه و لا عيل صغير هيطلعوا من بيوتهم النهرده خالص
راجل ١ / ما تقلقش يا كبير الناس عامله حسابها من امبارح و جايبين خزينهم و قافلين عليهم الشوارع هتبقي فاضيه مفيش غيرنا احنا و الحكومه و شويه الصحفيين و السياح اللى جايين
عباده / و اللى احنا عارفين ان اكيد لا كلهم صحفيين و لا كلهم سياح بس برده هنامن من تحت لتحت و من غير اى مشاكل
راجل ٢ / يا كبير حط فى بطنك بطيخه صيفي وراك رجاله
عباده يطبطب على كتفه
عباده/ احسن رجاله و احسن وحوش ... يلا على بركه الله
مختار يطلع من المسجد عباده يروح له
عباده / ابو العريس
مختار / ايه الدنيا
عباده / اخبار حبيبك ايه
مختار/ ما جاش بس كلمته قال صلى فى الزاويه اللى جنب بيته تعبان و هيفضل فى البيت النهرده
عباده / و الله وفر عليا كتير المهم فعلا يفضل فى بيته عشان كدا عاوز اطلب منك خدمه العمر
مختار / خير اؤمر
عباده / تفضل جنبه فى بيته تفضل ضامن انه مش هيدخل فى اى حاجه هتحصل النهرده و بالمره تطمن عليه و تشوف طلباته و انا شخصيا بعت جابر على البيت برده خلى اليوم يعدى عشان نعرف ناخد نفسنا
مختار  / تمام ... عن اذنك
مختار يمشي و عباده باين انه مبسوط
.......................