الكبيره ٢ بقلم / لولو_محمد

الحلقة ٥٤

((((((( الكبيره ٢ ))))))))
#لولو_محمد
الحلقه ٥٤
جوزيف يشاورله بايده ثانيه واحده و يروح يجيب تابليت و يفتحه على فيديو نجاه واقفه فى البلكونه حزينه دمعه تنزل من عنيها تمسحها و تدخل جوه
همام / انت جبت الفيديو ده منين
جوزيف / ميكروروبوت صغير فى ركن البلكونه عندها ما ياخدوش بالهم منه و لو حصل و خدوا بالهم دبانه عاديه على الحيطه هيجوا يهشوها هطيرها بعيد عادى جدا
همام / تصدق ما فيش رعب بعد كدا ... الواحد يدخل الحمام يرش مبيد حشري اى حاجه لسه واقفه مكانها تبقي كاميره داخله تصوره و هو بي ... استغفر الله العظيم... التكنولوجيا دى لعنه ... دى رفعت الستر عن الدنيا ... ما ينفعش الكلام ده
جوزيف / لعلمك فى كاميرات ممكن تكون أصغر من كدا بكتير دا انت موبايلك نفسه اختراق لخصوصيتك
همام / ما انا منزل برامج
جوزيف يبتسم
جوزيف/ كل كل
همام/ طب واحد و مراته فجاه يلاقوا نفسهم متصورين و كلو متزاع كدا عادى
جوزيف / عادى
همام / عندك انت ... عادى ايه و نيله ايه على دماغك ايه !!! ... دا انت باكس ... يا اخى دا انا ... اقولك ايه بس اقولك ايه ما انت خواجه
جوزيف / كل يا همام او اشرب الشاى و اهدى... دى اقل حاجه ممكن تحصل
همام يبص لجوزيف و يتنهد و يبص الناحيه التانيه
جوزيف يغرف لنفسه و ياكل فى هدوء
همام / بخصوص نجاه ... البتاع ده بيروح لحد فين
جوزيف يبصله بطرف عينه بابتسامه خبث همام يتعصب 
.......................
همام / يمين بالله
جوزيف / على فكره انا بخاف من نجاه اكتر منك فاهدى انا بس بطمن عليهم
همام يبص الناحيه التانيه و ينفخ و جوزيف بيضحك
جوزيف / على فكره انا بقدرك
همام / انا مش هينفع افضل لازقلك العمر كله
جوزيف / ليه بس دا انا لسه كنت ناوى ادوقك الاستيك ستروجانوف بتاعتى ..  لحمه بتنطبخ بطريقه روسيه
همام / بعيد عن روح فتكات اللى لبستك من ساعه ما رجعش من بحرى ... انت ناوى على ايه
جوزيف / افضل قريب من الأحداث لحد ما افهم الدنيا او أتدخل لو باظت
همام يبص الناحيه التانيه و يشد الطبق ياكل منه و يرجع يبص لجوزيف
همام / ايوه يعني الحكايه دى ممكن تاخد وقت قد ايه
جوزيف / انا فضلت مستني نجاه خمس سنين
همام / لاااااا يدينى و يديك طوله العمر انا مش فاضيلك انا مروح
جوزيف / و انت كان ايه اللى جابك من الاول
همام / اهو عقلى سحلنى كنت فاكر وراك ليله طلعت ليلى
جوزيف / ما تكلمهم تقولهم على نجاه
همام / لا
جوزيف / بناقص و هات طبق البسبوسه بتاعى
همام يديهوله و هو بيضحك
جوزيف/ كل انا بهزر معاك ... انا داخل انام تصبح على خير
همام / و انت من اهله
..................
فى شارع نجاه
جابر بيركن العربيه و يطلع السلم جرى مختار يفتح الباب و يقابله على السلم جابر يقف
مختار / حمد الله على السلامه تعال ارتاح و كلك لقمه
جابر / انا
مختار/ عارف عارف تعال بس ادخل تعال
جابر يدخل و باين عليه الضيق و التوتر مختار يقفل الباب
مختار / فى فراخ مشويه و رز معمر اسخنلك
جابر / مش جعان يا خالى تسلم انا بس كنت عاوز اقولك
مختار / انا اللى عاوز اقولك ... عاوز اقولك انك رفضت تيجي
جابر / ما كنتش
مختار / شوفت الرساله عارف بس الرساله دى مش هتفرق فى حاجه هى خدت قرار صح و كلنا لازم ندعمها فيه
جابر / و دا معناه انى ما اتكلمش معاها تانى يعنى ؟!
مختار / ما هو فارس و كارم نايمين جوه و هى نايمه مع الحريم فوق فلما ربنا يحيينا الصبح بإذن الله كدا تقدر تقعد و تتكلم معاها زى ما انا شخصيا بقيت بعمل
جابر يتنهد
مختار / لو فتحت مدخل للشيطان من تحت باطك ما ترجعش تندم لما ينفد غيرك ... انت اللى فتحت ليهم المدخل
جابر يبص فى الارض
جابر / طب على الاقل اقولها انى ما شوفتش الرساله
مختار / طب ما بعتلهاش رساله زيها من ساعتها ليه ... على فكره انا فاهمك انت بتحبها و دا حقك بس اذا اردت شيئا بشده
جابر / حارب عشانه الدنيا عشان انا مهما حاولت ما بقدرش اسيبها تبعد مش عارف
مختار  / ما هى ممكن تطلع فى الاخر مش من نصيبك على فكره فى ايه
جابر / طب بالعقل كدا
مختار / مفيهاش عقل الحاجات دى عمرها ما مشيت بالعقل
جابر / ما انا بعدت على يدك و هى اللى نادتني
مختار/ ما حصلش قالتلك بس ما تزعلش منى قولها مش زعلان و خلاص ما قالتلكش تعال يا روح قلبي ما قالتلكش بحبك و مش قادره على بعدك ما قالتلكش طير ورايا زى المجنون زى ما عملت انت هى ما قالتش ليك اى حاجه غير ما تزعلش منى
جابر يبص لمختار بحزن
مختار  / اقسم بالله انك بالنسبالى زيك زى عيالي و اكتر و عمرى ما هتمنالها احسن منك لانى ما بشوفش حد احسن منك بس من واجبى ناحيتك افرملك هى اختارت سكه صح حتى لو كانت صعبه عليا انا شخصيا حتى لو انا نفسي مضايق منها بس طبيعي طبيعي انى اكون مضايق لانى واخد على انى اخد و ادى معاها فى الكلام و واخد على انى اللاعبها و اهزر معاها و انها بنتى حتى لو مش بكل مميزات الابوه بس انا اللى مربيها فجاه كل الحاجات دى اتاخدت منى و بقيت زيي زى الغريب بس هى صح هى اكتر مره فى حياتها صح ... زمان مرات خالك قالتى كنتوا بتاجروا فى السلاح بهدف نبيل بس الباب اللى فتحتوه دخل ليكوا فيرا و اللى شبهها الباب اللى انت هتفتحه يا جابر هيدخل غيرك
جابر يهز راسه
مختار / طلع موبايلك و رد على رسالتها قولها انك جيت عشان تصلح سوء التفاهم و انك مش زعلان
جابر يهز راسه بحزن
مختار / فى سرير فاضي فى الاوضه دى ادخل ريح ضهرك و خدلك اى غيار من بتوعى نام فيهم و انزل الصبح هاتلك كام هدمه انا عارف انك جيت فاضي
جابر / اتفضل حضرتك ارتاح انا مش جايلى نوم دلوقت
مختار / ما تنامش افرد ضهرك كفايه ... ادخل بقي ما تتعبش قلبي انا فيا اللى مكفيني
جابر يهز راسه و يدخل جوه
مختار/ ربنا يهديكوا كلكوا جيل متعب
.......................
فى الشغل عند عبد العزيز
ناصر يخبط على الباب عبد العزيز يبتسم و يشاورله يدخل
ناصر / السلام عليكم اسف لو كنت جيت كدا من غير ميعاد
عبد العزيز / ابدا ابدا انا اللى حقيقي اسف انى اتاخرت عليك فى الرد بس و الله هى مش مرسيانى على حوار ابدا مره تقول مرتاحه مره تقول محتاجه وقت مره تقول خايفه و انا مش عاوز اضغط عليها الحقيقه دا جواز يا ابنى
ناصر / طب هو انا ممكن استأذن فى زياره تانيه اتكلم معاها لآخر مره و اى كان قرارها فى المقابله دى مش هضغط عليها تانى نهائى
عبد العزيز / هو طبعا حقك بس هو نفس الرد برده
ناصر / تمام مفيش مشكله حضرتك اتكلم معاها و انا منتظر مكالمه حضرتك
عبد العزيز/ طب انا كان عندى استفسار  صغير يخص الجماعه
ناصر  / اتفضل
عبد العزيز / هو لو انطلب منك تجهز شقه جنبنا هنا يعني اى كانت مساحتها و تفرشها
ناصر  / حضرتك تؤمر نقي الشقه اى كانت المساحه و افرشها زى ما تحب و اكتبها باسمها كمان باللى فيها بس للاسف احنا برده هنعيش او هنقضى معظم الوقت فى بيت اهلى
عبد العزيز / ما هو يا ابنى ما تاخذنيش حكايه بيت العيله دى
ناصر / ايه راى حضرتك تيجوا تنورونا اسبوع او الوقت اللى تحبوه تتفرجوا على البلد و تشوفوا اهلى و تتعرفوا عليهم على فكره بيت العيله عندنا مختلف خالص عن اللى فى خيالكوا دول بيشيلوا بعض بجد يعني يوم ما لا قدر الله تدوخ بس الف ايد هتخدمها دا غير ان حريمنا اميرات يعني لا هتنزل غيط و لا زرايب و لا اى حاجه من الحاجات دى الا لو حبت تشتغل بقي بنرتب ليها التكليف بتاعها و المواعيد و مننا فينا برده
عبد العزيز / و الله هو كلام يحترم ما اقدرش ارد عليه
ناصر  / تمام ... حضرتك بلغ الجماعه بكل الكلام الجديد ده و هنتظر اتصال حضرتك ... مش هعطلك اكتر من كدا ... عن اذنك
ناصر يقوم يسلم على عبد العزيز و يمشي عبد العزيز يتصل بالموبايل
عبد العزيز / ايوه يا ستى مش هتصدقي مين كان عندى هنا
……………………….
فى اداره المصحه
نجاه / هو ايه اللى ما ينفعش انا عاوزه ادخل اطمن عليها
الموظف / و انا بلغت حضرتك أن الوحيد اللى يقدر يدخل هو على بيه غير كدا لا
نجاه / يعني ايه لا
الموظف / حضرتك احنا اتكلمنا كتير امبارح فى الكلام ده
نجاه / يا سيدي فتشنى الله
الموظف/ و افتشك ليه حضرتك روحى مشكوره لعلى بيه و خليه يشرفنا مع حضرتك و ادخلى معاه
نجاه/ كلمه فى التليفون اقولك انا هكلمهولك
الموظف / حضرتك لازم يجى بنفسه يوقع على دفتر الزياره دى مسؤليه
نجاه / ايه شغل التعجيز ده على فكره انا مش هسكت انا هوصل الموضوع لأعلى الجهات و هقلب عليكوا الدنيا انت فاهم و لا لا
الموظف / حضرتك تقدرى تعملى كل اللى تحبيه بس انا هنا موظف و بنفذ التعليمات و بس و اكيد حضرتك فاهمه الكلام ده كويس
نجاه / طب انا عاوزه اطمن عليها
الموظف / الدكتور بيمر على الحالات لما يخلص هيجي لحضرتك
نجاه / تمام هستناه
نجاه تروح تقعد فى جنب و تطلع الموبايل
الموظف / تحبى تشربى حاجه
نجاه/ شكرا 
....................
فى شقه جوزيف
تليفون جوزيف يوصله ايميل جنب همام يبص على الحمام فى صوت دوش شغال همام يبص تانى على الموبايل و يفكر
همام / يا خبر بفلوس
همام تليفونه يرن يرد
همام / السلام عليكم
ولاء / و عليكم السلام
همام/ وحشتونى عاملين ايه و امى عامله ايه
ولاء / طول ما حسك فى الدنيا كلنا بخير
همام / باذن الله لو ما جدش جديد هسافر الفجر كدا و ارجع
ولاء / تنور بيتك العيال طول اليوم النهرده بيسالوا عليك بس انا خفت تكون مشغول و اعشمهم على الفاضي قولت اكلمك الاول اشوف دنيتك لو كدا اروح اديهم الموبايل
همام / وديهولهم انا فاضي
صوت مايه الدش يقف همام يبص على الباب و الموبايل فى ايده
على / السلام عليكم
همام / سيد الناس و كبير بحرى ايه الدنيا طمنى واخد بالك من السرايا فى غيابى و لا فى حد خرج عن طوعك
على / ستى مش عوزانى اللعب بالموبايل
همام / كلو الا ستك يا علوه تسمع الكلام و تقول حاضر و امين دى بركتنا دى و بعدين احنا قولنا الحاجات دى خطر على عنيك عندك حاجات كتير امك جيباهالك افيد من المخروب ده
على / بس احنا كنا متفقين على ساعه فى اليوم انا مش بلحق اقعد ربع ساعه حتى و انت لازم تشوفلك حل
همام / طب ما تنزل تلعب كوره مع العيال فى الجنينه و لا اطلع مع عمك اطمن على الفرسه بتاعتك سمعت انها كبرت ما شاء الله و بقت حاجه تانيه
على / لا الحاجات دى بحب اعملها معاك هو حضرتك هتيجي امتى انا ستى بتقول انك عجبك هوا مصر و مش هترجع تانى مع ان الكل بيقول ان مصر كلها دخان و تلوث و اسكندريه هواها يرد الروح
همام يضحك و يسكت و جوزيف يطلع من الحمام
على / امى بتقول هتيجي بكره باذن الله الكلام ده جد و لا بتسكتنى
همام / باذن الله خد بالك من اخوك و امك لحد ما ارجع
على / حاضر
همام / هجيبلك لعب جديده و انا راجع
على / امى عاوزه حضرتك
ولاء / ايوه يا همام ما تضايقش نفسك انت عارف الحجه ساعات كتير كدا
همام / انا مضطر اقفل هكلمك بعدين ... فى حفظ الله
همام يقفل و جوزيف متابعه
همام / انا راجع بحرى
جوزيف/ خير ؟؟
همام / قاعد اعمل ايه ... ارجع لاهلى احسن و لو لا قدر الله حصل اى حاجه ابقي اجيلك دى كلها فركه كعب
جوزيف / تمام
جوزيف يمسك الموبايل و يفتحه و ملامحه تتغير
همام / جاتلك رساله .. شكلها ايميل يعنى ... بس شكل وشك بيقول انها مش خير ابدا
جوزيف / المكان اللى مهره فيه مش تمام
همام / ازاى يعني
جوزيف / هبعتلك التقرير اقراه و ابعته لمختار انا متاكد ان معلومات زى دى هتفرق معاه
همام / ما تبعتهوله انت دايركت
جوزيف / ما طلبوش منى ابعتهوله ليه
همام / دا ايه شغل قمص الحريم ده ما تنشف كدا ياض مالك خبت كدا ليه من ساعه ما دخلت المطبخ
جوزيف / سيبك انت انا هغديك النهرده حته
همام / يا عم ما تشتغلنيش انا عارف انك بتغير الموضوع فى ايه ما تبعتله البتاع ده ما هو عارف انك هنا
جوزيف / و ما جاش ليه ... بعتك انت دون عن كل رجاله الصعيد مع انك مش منهم اصلا
همام / لما تكلمه ابقي اساله
جوزيف / لا هكلم و لا هسال و لا ليا دعوه انا ان كنت عملت الحركى دى فكانت عشان خاطر دموع نجاه مش اكتر هى اللى تخصنى
همام / و لا تخصك و لا ليك دخل بيها لا من بعيد و لا من قريب و خلينا حبايب احسن و قولنالك مليون مره خلى الحريم بره الكلام احنا رجاله فى بعض ما تخسرنيش
جوزيف / بص يا همام من الاخر كدا انا لا بستفزك و لا بحاول اخسرك بس انا بيني و بينها اتفاق و انا ملزم بيه انما هم ما لهمش عندى حاجه و الكلام ده مختار فاهمه كويس انا لا بعاكسها و لا رامى جتتى عليها بالعكس انا مضايق من الموقف اللى اتحطت فيه بسببي ... بص انا مش زيك و لا هعرف اتكلم زيك و لا أفكر زيك و مش مطلوب منك انك تبقي زيي ... مش هتعرف ... انا كل اللى فارق معايا انك يا تقبلنى يا تنسانى عشان العيش و الملح اللى بينا مش اكتر … الاكل فى الفرن لما تجوع اغرف و كل انا داخل انام و يا ريت لحد ما تمشي ما تخبطش عليا ... عن اذنك
جوزيف يدخل اوضه و يرزع الباب وراه رساله توصل همام يفتح الموبايل و يبص فيها
……………………………
فى المصحه
نجاه / حضرتك انا بقالى تلت ساعات قاعده
الموظف / حضرتك دى مصحه و اللى فيها حالات مرضي يعنى الدكتور مش فاضي و دا مش وقت زياره اصلا فأكيد حضرتك متفهمه الموقف
نجاه / يعني هو بقاله تلت ساعات شغال متواصل ؟
الموظف / نقول ايه ربنا يعينه
نجاه / هو دكتور واحد يعنى اللى فى المكان مفيش دكاتره تانين غيره
الموظف / موجود طبعا فريق طبى كبير
نجاه / امال هم فين مش شايفه حد
الموظف / شغالين جوه يا فندم
نجاه / طب لو انا عاوزه اقابل حد ... اى حد غيرك اعمل ايه
الموظف/ حضرتك ممكن تيجي بكره مش هتلاقيني انا بكره اجازه
نجاه / بجد و الله
الموظف/ اجيب لحضرتك حاجه تشربيها
نجاه تتعصب / دا انا اللى هكسر المكان ده لو ما شوفتليش حد عدل غيرك اكلمه الله ايه الاستفزاز ده
الموظف / صوتك يا انسه انا لحد دلوقت محترمك ما تجبرينيش اندهلك الأمن
نجاه تدوس على الخاتم
نجاه / إندهم و اطلب الاسعاف و البوليس بالمره
الموظف / دا تهديد بقي
مختار يدخل
مختار / السلام عليكم ... و لا تهديد و لا حاجه يا باشا هى بس نجاه زهقت من القاعده اللى طولت دى و على بيه فى الطريق ما دام انتوا مش عاوزين تدخلونا و لا مستعنين تخلونا نقابل اى حد هنا و لاطعين البت طول الوقت ده هنجيب احنا على بيه ننقلها مكان تانى خالص و كتر الف خيركوا لحد كدا
الموظف / دا شئ ما يخصنيش يا ريت بقي تستنوا بره خالص عشان انتوا معطليني عن شغلى من الصبح و دا مش اسلوب اصلا
مختار / لا ما تقلقش ما انت هتشوف شغلك حلو اوى الفتره الجايه هتشوف كل اللى نفسك فيه ما تقلقش ..  يلا يا نجاه
نجاه/ و مهره ؟؟
مختار / هنستنى بره زمانهم جايين تعالى بس
نجاه تبص لمختار و تطلع بره و يطلع وراها يفتح لها باب العربيه تركب يقفل الباب نجاه تعيط كارم سايق يناولها علبه المناديل مختار يركب جنبه و يقفل الباب
مختار / احنا هنقفل ليهم المخروبه دى خالص النهرده ما تضايقيش نفسك
كارم / دخلوله على فكره لسه قافل مع جابر دلوقت
مختار/ على الله يطلع من تحت كوعه حاجه
مختار يبص الناحيه التانيه و هو مضايق
…………………
فى شركه على
على / انا و الله مش قادر استوعب كميه الصداع اللى انتوا عاملينها دى انا مش فاضي للكلام ده
عمران/ يعني كل الورق اللى قدامك و انت برده رامى بنتك هناك يا اخى دا انت لو لقيها فى الشارع هتبقي عندك مروءه و نخوه عن كدا
على / اتكلم بادب يا عمران ياما تطلع بره
جابر / طب على الاقل اتعب نفسك و بص شوف المحاضر المعموله فيهم بنتك مش فى امان هناك
على / انا سالت على المكان كويس جدا و انتوا يا ريت تخرجوا نفسكوا من حياتى بالزوق بدل اقسم بالله انا اللى هعمل فيكوا الف محضر فاهمين و لا لا
عمران / وريني نفسك
على / اطلع بره
جابر / يا اخى اتقى الله دى حرمه انت ايه
على يرفع التليفون و يتصل
على / ابعتيلى الأمن على مكتبى حالا
عمران ينط على المكتب و يشد على يديله بوكس فى وشه و جابر يحوش و يشد عمران و على بيصرخ
على/ هحبسك و الله ما هعمل اعتبار لحد الا اما ارميك فى الحجز و اطلع عينك
عمران / وريني نفسك هات اخرك يا ابن الكلب يا نجس يا عديم النخوه يا واطى انت
جابر / بس يا عمران بقي بس
عمران / دا انا لو هطلعها من هناك بالقوه يمين بالله ما هبيتها فيه يا واطى
على / كل الهبل ده اتسجل بالكاميرات و هحبسك انت فاكرها سايبه للبلطجيه اللى زيك تلاقيك انت اللى جريتها للقرف ده من الاول يا عديم الربايه
الأمن يدخل
على / طلعوا الكلاب دول بره
جابر / احنا كدا كدا ماشيين بس صدقنى هتندم يلا يا عمران
عمران / كنت سبتنى طلعت عينه
جابر / قولتلك امشي دلوقت
جابر يشد عمران بره و على يمسك الموبايل و يتصل بحد و هو بيزعق 
على / ناديلى كل محامين الشركه هنا حالا اتحركى ... و الله ما هسيبكوا يا ولاد الكلب ... ايوه يا اكرم ايوه يا باشا ايوه يا بيه
.....................
فى عربيه مختار
مختار بيتكلم فى التليفون
مختار / يعني حتى امها ما تقدرش ... تمام اوى طب مين يعني اللى يقدر ... بتهزر صح قولى بتهزر... ينفع ؟؟ .. قول و الله ... سهله اروح لمين ... ما تهرجش اكيد مش انا يعني ... ابوس رجلك مش وقت غباوه اديني عنوان اروحه ... تمام ... تمام قدامك عشر دقايق بالكتير ..  سلام
نجاه / على خلع ايده صح
مختار/ يولع ما تشغليش بالك بيه
كارم / مش ده اكرم
مختار يبص يلاقي اكرم بيركن العربيه و نازل مختار ينزل و يقابله اكرم يتخض
اكرم/ اهلا مختار باشا حضرتك بتعمل ايه هنا
مختار / حضرتك اللى بتعمل ايه هنا
اكرم / جاى احط فلوس فى الحسابات
مختار / حضرتك !! امال على بيه فين
اكرم / ابوس ايدك ما تحطش كحول على الجرح عشان انا على أخرى
مختار/ تمام تعال معايا نخلص الموضوع ده و نطلع نقعد فى اى حته عشان فى كلام كتير عاوزين نتكلم فيه سوا
اكرم / طب هستاذنك نخليها مره تانيه عشان انا مرتبط بمواعيد تانيه
مختار / بجد !! طب ما دام مشغول اوى كدا ما دفعتش اونلاين ليه من الفيزا
اكرم / قولت اجى اطمن و كدا
مختار / و هم هيخلوك تطمن بصفتك ايه اللى اعرفه ان ابوها بس اللى من حقه يدخل او يمضى بنفسه انه سامح بدخولك
اكرم / ما هو ماضي من امبارح ان من حقى اجى فى اى وقت و اشيك على الدنيا
مختار / انا مش قادر استوعب
اكرم / و انا مش قادر برده استوعب اهتمامكوا المريب بمهره بالشكل ده ... و اعتقد اكتر ان كل المشاكل اللى حصلت لمهره فى الفتره اللى فاتت حصلت بسببكوا و لا حضرتك نسيت تركيا و اللى حصل فيها
تليفون مختار توصله رساله مختار يبص لوكايشن
اكرم / هستاذنك عشان مستعجل
مختار ما يهتمش اكرم يدخل مختار يروح ناحيه العربيه نجاه تنزل
نجاه / انت سبته يدخل
مختار / تعالى معايا ... كارم خليك هنا و اعرفلى الحيوان اللى جوه هيطلع امتى
كارم / هو انتوا رايحين فى حته
مختار / تعالى يا نجاه
نجاه / و مهره
مختار / يا بنتى اتحركى
مختار يشاور لتاكس يقف يركب هو و نجاه التاكسي يتحرك و كارم مش فاهم اى حاجه
....................
فى الشركه عند على
على بيتكلم فى التليفون و حاطت كيس تلج على عينه
على / لا معاليك انا الكلام ده مش مناسب بالنسبالى انا انضربت و اتهانت من عيل حضرتك اللى اتوسطت ليه عندى و انا مش هسكت للاهانه دى ... يعني ايه ؟؟ ... تمام ... زى ما حضرتك شايف ... لا طبعا همشيها رسمي ما حدش فوق القانون... تمام معاليك... شكرا جدا ..  فى حفظ الله سعادتك
على يقفل و يتصل بحد
على / طمنى عملت ايه ..  قولت يبات فى الحجز يعني يبات فى الحجز اتصرف ... تمام مستني تليفون
السكرتيرة تدخل
السكرتيرة/ بفكر حضرتك بمعاد
على يصرخ فيها
على / معاد ايه و زفت ايه انتى مش شايفه وشي اللغى كل مواعيدى
السكرتيرة/ بس ده
على / انتى غبيه ما بتفهميش قولت الكلمه مره واحده مش هتعرفى تشوفى شغلك اشوف غيرك ايه القرف ده
السكرتيرة تطلع بره على يتصل بحد فى التليفون
.......................
فى مكتب مأذون
مختار قاعد مع الماذون و عمران و نجاه و جابر واقفين وراه
مختار / يعني ايه كلو بقي مميكن و الكلام ده بطل و انا اعمل ايه دلوقت ... انا اصلا جايلك ليه من الأساس ما دام مش هتعرف تساعدنى
الماذون / انا و الله فاهم و الباشا كلمنى و قولتله نفس الكلام قبل ما حضرتك توصل انا مش متأخر عنك و فاهم ان الموضوع مستعجل و كل الكلام ده بس انا اقدر اعمل ايه دا موقع حكومى ما فيهوش لعب ... كل اللى اقدر اعمله انى اعملك القسايم عادى زى ما قولت بس عشان اكون صريح معاك مش هيعترف بيها فى اى جهه حكوميه الا بعد التسجيل و ساعتها التسجيل هياخد وقت برده
مختار يسيب المكان و يطلع بره جابر يوطى على نجاه
جابر / انا كنت عاوز
نجاه تسيبه و تطلع بره ورا مختار تلاقيه بيتكلم فى التليفون
مختار / انا عارف انك زعلان مننا و انك انت و الشباب ما اتفقتوش ... بس انا محتاجك ... انا مختار الزيني بتصل بيك و بقولك محتاج مساعدتك فى موضوع حياه او موت بالنسبالى و مستعد لاى حاجه هتطلبها بس الموضوع ده يخلص 
جوزيف / امتى
مختار / امبارح لو ينفع مش هقول لا
جوزيف / مسافه السكه و اكون عندك
مختار  / انت عارف انا فين
جوزيف / ما تقلقش و تقريبا عارف انت عاوزنى ليه كمان
مختار / و هتقدر ؟!
جوزيف / من مكانى لو تحب
مختار/ اعمل كل اللى تقدر عليه
جوزيف / استنى منى تليفون
مختار يقفل
نجاه / دا يونس صح ؟
مختار / ايوه
جابر يطلع من جوه
مختار / خلينا نرجع المصحه اما نشوف الحيوان اللى بقاله ساعه بيدفع الفلوس ده ناوى يطلع من هناك امتى عشان انا على أخرى
نجاه / تمام يلا
مختار / نادى عمران و يلا يا جابر
جابر يهز راسه و يدخل ينادى عمران و يحصلوهم
...................
فى شقه جوزيف
جوزيف بيقفل اللاب و يحطه فى الشنطه
همام / ازاى طيب ما انا لازم افهم يعنى
جوزيف / هو اكل و لا بحلقه يلا عشان نلحق نروح السجل المدني نستلم القسيمه
همام / يعني هم كدا اتجوزوا ؟
جوزيف / انت رغاى و انا مش فاضي سلام
جوزيف يمشي همام يجرى وراه ينزلوا يركبوا عربيه
همام / طب لو الحكومه مش هتعرف انها مزوره ؟
جوزيف / يا عم هنروح نطلعها من قلب أم السجل المدني مزوره ازاى دول متجوزين من سنه ... كنت هنسي ابعت لعمران يقابلنا هناك و يجيب بطاقته 
همام / بس الجواز ده مش شرعى
جوزيف / انا مالى يا عم و بعدين مش مختار اللى طلب منى اعمل كدا انا مالى بقي بشرعى من غيره انا مالى
همام يطلع التليفون و يتكلم و جوزيف سايق و همام كل شويه يبص عليه و باين انه مضايق
..........................
فى المصحه
عمران واقف جنب مختار قدام الموظف بيبص للقسيمه و مستغرب
مختار / يا سيدي صورها و خليلك منها بدل النسخه ميه و خلصنا
الموظف / انا ما اعرفش حضرتك انا اللى متسجل عندى انها
مختار / الورقه اللى فى ايدك دى قسيمه و لا ورقه كوتشينه
الموظف / تمام اديني بس حضرتك شويه وقت
مختار / عربيه الاسعاف واقفه بره و فيها دكتور ما تقلقش عليها احنا هنستلمها على مسؤوليتنا خلصنى شوف ايه المطلوب و اعمله
الموظف / طب على الاقل اتصل باكرم بيه دا لسه ماشي
مختار يقوم و يضرب على المكتب بعصبيه
مختار / قدامك عشر دقايق لو ما كانتش عربيه الاسعاف متحركه من قدام المخروبه دى لكون جايبلك وزير الصحه شخصيا يقفلوا الهبابه دى و لو مش مصدقني جرب تستفزني ... اتصل بالبوليس يا عمران قولهم ان مراتك مخطوفه و محتجزه هنا دون عن ارادتك و رافضين يسلموهالك
الموظف/ يا فندم احنا مش رافضين و لا حاجه
مختار / عدى دقيقه و نص من الخمسه
الموظف/ طب اخلص الإجراءات
مختار / مهره تركب العربيه و انت قفل ورقك براحتك انا كدا كدا معاك مش سايبكوا النهرده
الموظف / تمام حضرتك ثوانى
الموظف يطلع بره يعدى من قدام نجاه واقفه قدام الباب لوحدها  و همام و كارم بيتوشوشوا فى جنب و جوزيف و جابر واقفين بعيد قدام بعض جابر عينه على جوزيف و جوزيف عينه على نجاه
كارم / يعني ايه تكتك على الكيبورد طلع قسيمه الجواز
همام / ششش انت هتفضحنا
كارم / طب ما دام عرف يعملها مره يقدر يعملها تانى
همام / طب و اللى خلاه يعرف يعملها من الأساس ولاد خالتك ما يعرفوهوش ؟
كارم / و لا عمرها خطرت فى بالى اسأل... بس انا برده مش فاهم كان هيجرا ايه لو مشوها عادى عند الماذون و كدا يعني عادى
همام / بيقولوا التسجيل و الاستخلاص دول بياخدوا وقت و هم عاوزين الحاجه فورى احنا روحنا السجل لقينا البتاعه مطبوعه يا عم عمران استلم و مشي ما دفعش حاجه حتى
كارم / الواد ده جامد
همام / و سهن ما بيقولش كل حاجه
مختار يطلع من المكتب يتكلم مع نجاه
نجاه / هو الوضع ايه دلوقت ؟
مختار / هناخدها معانا البيت و هناك ربنا يكرم
نجاه / طب و هم هيسكتوا
مختار / هم مين
نجاه / تمام
مختار / بخصوص جابر
نجاه / انا كل اللى فارق معايا دلوقت مهره و بس
مختار / طب بخصوص يونس
نجاه / ابوس رجليك مش قادره لاى نقاش دلوقت اعصابى هتشط منى
مختار / تمام
همام يروح لمختار
همام / لا مؤاخذه يا عمى عاوزك
مختار / خشي اقعدى ارتاحى جوه يا نجاه
نجاه تهز راسها و تدخل
همام / اللى حصل
مختار / انت وراك سفر روح و ارتاح عشان تركب طريقك و انت فايق و مرتاح يا همام
همام/ انا عارف انه ما يخصنيش بس الجواز ده
مختار/ يا ابنى عارف هتقول ايه و عمران عارف هو احنا لسه داخلين الاسلام اول امبارح ما اكيد فاهمين انه مش شرعى و انه نصبه ايوه عارف الدنيا بس تهدى و البت تخف و تقف على رجلها و هو هيروح يطلقها على الورق زى ما اتجوزها على الورق
همام / طب يونس موقفه ايه
مختار / انا طلبت منه يستنى عشان عاوز اتكلم معاه تقدر انت تروح
همام / طب ما انا عاوز اعرف برده الدنيا هترسي علي ايه
مختار / استنى يا همام ... هو الجدع ده اتأخر كدا ليه و الله شكلى هتغابى النهرده
عمران يطلع من جوه فى ايده موبايل
عمران / محامين على الكلب عملوا المحضر برده و مطلوب القبض عليا و البوليس سال عنى عند عم فاروق
مختار / و هم عرفوا انك عند فاروق منين
.........................