(((((((( الكبيره ٢ )))))))))
#لولو_محمد
الحلقه ٥٦
شاكر ينزل مع صابر يروحوا ناحيه عربيه و يركبوا و صابر يسوق يعدى من قدام قهوه قاعد عليها محمود محمود يبص الناحيه التانيه صابر يركن و ينزل يروحله و يشد كرسي و يقعد قدامه الكل ينتبه شاكر يروح يقعد معاهم
محمود / ايه ناوى تخلص على العيله كلها نفر نفر و الدور جه عليا خلاص و لا ايه
صابر يطلع الموبايل و يورى محمود فيديو ليه بيسحب البلطجى بعيد
محمود/ هى دى الحكايه بقي ... بقي الباشا ملك المطاريد بعد ما خطت و دبر و نفذ قال يعمل ايه عشان يرمى التهمه بعيد عنه بعتلى ابن الحرام ده يرازيني على باب المستشفي عشان اتصور و اهو لبانه الناس تتلخم بيها عن عمايله السوده
صابر / برافو سرعه بديهه ممتازه
راجل كبير / بلاش كلام دلوقت يا صابر يا ابنى البلد قايده نار و مش حمل خناقه و لا موقف جديد
شاكر / بس صابر برئ يا حج انا كنت معاه طول الوقت
محمود / و بالقانون يا شاكر بيه امال ايه مش كدا يا عمهم
صابر / مسيرك هتشرفنى يا محمود
محمود / و انا ما بتهددش و قدام الناس دى كلها مش هتقدر تفلت من كل حاجه يا صابر يا ابن وهدان القط و عيله الجزار مش هتخلص و اللى فى خيالك المريض ده مش هتشمه
.........................
صابر يبتسم
شاكر / اللى هو ايه بقي
الراجل الكبير / خلاص بقي يا شاكر يا ابنى ما تفتحش و تسخن الدنيا و انت يا صابر يا ابنى اكبرلى انا قد ابوك اطلع الجبل يا ابنى و اخزى الشيطان ما يصحش كدا
محمود / اسمع كلام الحج يا صابر ... ارجع مكان ما بقالك سنين عايش ... انت ما لكش حاجه هنا
صابر / غريبه دا انا كنت فاكر انى من عين أعيان البلد
محمود / من خير الجبل اللى واكله فى كرشك ابا عن جد
صابر / كنت اطلع انت و اهلك أكحتوا الصخر بسنانكوا زيهم و انتوا يطلع ليكوا من الخير كتير و على العموم الجبل مفتوح للكل اللى له شوق فى حاجه يغرف و يعبى
محمود / و رجالتك هيسيبوه يعني ؟
صابر / اللى عاجبه الكحل يتكحل .. سلام يا حج
صابر يروح يركب شاكر يجرى يركب جنبه
شاكر / ليه بقي كل ده
صابر / هو اللى عملها يا شاكر
شاكر / انا برده حسيت انه مش سالك و جعجاع بس مفيش دليل ضده فلو سمحت ما تديلوش بونطه على قفاك
صابر / ربنا ما يكتب عليك نارى انا طالع الجبل الجماعه على وصول و لازم اتأكد أن الدنيا امان
شاكر / ايوه كدا دا صابر اللى اعرفه اتحرك يا ابنى ربنا يهديك
صابر يسوق و شاكر جنبه
..................
فى سرايا الزنايته
عربيه الاسعاف تدخل و عبد الله و اتنين دكاتره واقفين مع عباده يستقبلوهم مختار اول واحد ينزل من العربيات وراه الكل و جوزيف يفضل قاعد مكانه
عباده / الف مليون حمد الله على السلامه
مختار/ كلمت الجماعه على عمران ؟
عباده / دماغه ناشفه شويه بس محلوله
عبد الله / الحاله فين
مختار / ما تبطل اسلوب الدكاتره ده اسمها مهره ... السلام عليكم يا دكاتره اكيد الكبير فهمكوا خطوره الموقف و سريته
دكتور ١ / ما تقلقش يا باشمهندس احنا مجهزين كل حاجه بس اهم حاجه ارداتها هى
مختار / ما لهاش فيها اصلا منهم لله اللى غدروا بيها و دسولها السم ده من غير ما تحس
مختار يشاور للرجاله يفتحوا عربيه الاسعاف نجاه تنزل و مهره تنزل على ترولى نجاه تمسك ايدها عبد الله يشاورلهم على المضيفه يدخلوا نجاه تعدى من غير ما تسلم على حد و تدخل معاها الدكاتره يروحوا وراهم
عباده / هو فى جديد و لا ايه
مختار / زعلانه عشان مهره
عباده يبص على العربيه جوزيف قاعد جواها لوحده
عباده / متاكد ؟
مختار / هاخده اوديه الشقه اللى كنا مجهزينها بعيد خالص عن السرايا لا هيحتك بيها و لا فى اى حاجه هتتغير
عباده / افلح ان صدق
مختار/ لم نفسك انا على أخرى
عباده يبتسم باستهزاء و يروح ناحيه السرايا مختار يتنهد و يروح المضيفه يلاقيهم بيركبوا لمهره محلول
مختار / فى اى حاجه نقصاكوا يا رجاله
مريم تدخل
مريم / ازيك يا عمى نورت الف حمد الله على السلامه
مختار يبوس راسها مريم تعديه و تروح تتكلم مع الدكاتره عن الادويه عبد الله يروح مع مختار بره
مختار / هتبقي زى الفل صح
عبد الله / باذن الله ما تقلقش الدكاتره دول احسن ناس فى البلد و كل اللى طلبوه جبته و مريم اخدت اجازه من الشغل الأسبوعين دول
مختار / اسبوعين بحالهم
عبد الله / و الله انا ما اعرفش بقالها قد ايه بتتعاطى بس اكيد اى علاج فى الدنيا بياخد وقت فى ايه يا مختار اهدى كدا
مختار / البنت دى مهمه جدا بالنسبالى يا عبد الله
عبد الله / فاهم بس ما تنساش بقي تطلع لهند عشان هى مش مظبوطه و قافله على نفسها الاوضه ما بتطلعش منها
مختار يهز راسه و يروح ناحيه السرايا يعدى من قدام عربيه جوزيف يقف و يروحله يخبط على الازاز جو يفتح
مختار / ما جوعتش تنزل تاكل لقمه
جوزيف / هاكل لما اروح مش هنا شكرا
مختار يبتسم بحرج و يهز راسه جوزيف يقفل الازاز تليفون مختار يرن ناصر مختار يتنهد
مختار / السلام عليكم ازيك
ناصر / انا الحمد لله تمام الجماعه ردوا و وافقوا و عاوزين يعرفوا هنروح امتى نتكلم فى التفاصيل
مختار يبص للسما
مختار / انا لسه واصل البلد حالا
ناصر / ما قولتليش .. خير فى حاجه و لا ايه
مختار / حوار بسيط كدا و هيتحل باذن الله .. ما تقلقش ... شوف الجماعه يناسبهم امتى و أكد عليهم اننا مش جايين نتفق كل اللى هيامروا بيه احنا موافقين ... اقولك انا هكلمه و اكد عليه كل حاجه و اكلمك اقولك اتفقنا على ايه
ناصر / تمام
مختار يقفل و يدخل السرايا نجاه تطلع من المضيفه تعدى الرجاله و عربيه جوزيف و تدخل السرايا جابر يروح وراها
جابر / نجاه
نجاه تقف و تبصله
جابر / كنت عاوز اتكلم معاكى
نجاه / خير اؤمر
جابر / انا ما شوفتش رسالتك
نجاه / عرفت عمى مختار قالى
جابر / كويس
نجاه / حاجه تانى
جابر يهز راسه لا نجاه تهز راسها ماشي و تمشي و هو واقف مكانه عند الباب يبص ناحيه المطبخ يلاقى احلام واقفه و حاطه ايدها فى وسطها تروحله
احلام / و الله ليها حق تعمل فيك اكتر من كدا هو انت ما بتصعبش عليك نفسك
جابر يبتسم بحزن
احلام / يا خساره بجد
احلام تطلع فوق و جابر متابعها يتنهد و يروح يقعد و يبص فى الارض خديجه تطلع من المطبخ
خديجه / الاكل جاهز اخليهم يغرفوا و لا هتتشطفوا الاول
جابر يبصلها و يبتسم بحزن و يروح بيته
خديجه / نيلتى ايه تانى يا نجاه ... الصبر من عندك يا رب
مختار يطلع من المكتب بيتكلم فى التليفون
مختار / و الله دا العشم برده ... اكيد طبعا و بعدين احنا عندنا الراجل بيتربط من كلمته و ناصر سيد الرجاله
خديجه / مختار
مختار يشاور ليها ثانيه و يكمل كلام
مختار / انا بقولك احنا موافقين على كل طلباتكوا حضرتك بس مشكورا تبلغها لناصر عشان يبدأ ينفذ على طول و باذن الله فى اقرب وقت هتلاقينى بكلمك و اقولك انى جايلك فى الطريق ... كتر خيرك و الله.. احسن ناس احسن ناس ... فى حفظ الله مع السلامه
مختار / انا نفسي اعرف انا زعلت مين عشان اتمرمط كدا دا انا كنت عيل نسمه
خديجه تضحك
خديجه / هتاكلوا
مختار / لفى اكل كتير على ما اطلع ابص على هند و انزل اوصل يونس
خديجه / حاضر ... دقيقه و كل حاجه تكون جاهزه
مختار / عشتى مش عارف من غيرك كنا عملنا ايه عن اذنك .. هند فوق صح ؟
خديجه تهز راسها بابتسامه مختار يبتسم و يطلع يقابل نجاه نازله شايله هدوم كتير
مختار / دول لمهره
نجاه / ايوه جبت كام حاجه كدا من دولابى لحد ما نجيب لها جديد
مختار / كويس لو فى اى حاجه ناقصه
نجاه / ما تقلقش حضرتك انا هبقي معاها طول الوقت
مختار / ربنا يجعله فى ميزان حسناتك ... عن اذنك
نجاه تنزل تروح ناحيه خديجه و تقف قدامها خديجه تفتح حضنها نجاه تدخل جواه خديجه تبوس راس نجاه
خديجه / روحى شوفى الضيفه ناقصها ايه و تعالى نقعد نتكلم سوا
نجاه تبتسم و تمشي تعدى من قدام عربيه جوزيف واقف جنبها بيتكلم مع كارم
كارم / طب و تفتكر ممكن اتعلم فى قد ايه
جوزيف / انت و تركيزك و على حسب انت عندك قد ايه من الأساسيات
كارم / التركيز موجود الأساسيات ما تلاقيش
جوزيف / ليه انت جاى من العصر الحجري اكيد فى أساسيات مهما كانت بسيطه موجوده برده ما تقلقش هو عمران فين
كارم / مش عارف ما شوفتوش من ساعه ما جينا ... بقولك ايه ما تيجي نسبقهم على الشقه دى فيها سنه على ما يسلموا و يحضنوا و يعرفوا الجديد و القديم يلا بينا يا ابنى يلا انا تعبت من الوقفه دى
جوزيف يهز راسه و يركب كارم يروح يركب و يسوق
.........................
فى اوضه هند
مختار قاعد على السرير جنب هند بيتكلم فى التليفون
مختار/ تمام كويس انها جت منهم ابعتلهم الحاجات و اتاكد ان ما فيش حاجه نقصاهم و انا هرتاح شويه و لما اقوم هروحلهم ... فى حفظ الله سلام
مختار يتنهد و يرمى الموبايل على الكومدينو و ينام فى حضن هند تضحك و تلعب له فى شعره
هند / مشي ؟
مختار / كارم اخده و سبقوا شكله وعده يعلمه حاجه كدا تفاصيل مش وقتها انا مش قادر اتكلم اصلا
هند / و لا تأكل؟
مختار / و لا اى حاجه انا بس عاوز ابقي فى حضنك كدا اشحن طاقتى اللى خلصت خالص دى
هند / ارتاح
مختار يتنهد
هند / مهره و لا نجاه
مختار يبصلها و يفرد ضهره بعيد هند تستغرب تروح هى تنام فى حضنه
مختار / انا ما عدتش عارف حاجه خاااااالص و لا قادر لحاجه و عارفه ايه هى اصعب حاجه
هند تبصله
مختار/ ان الكل مستني منى انا الحل و القرار مستنيني اجاوب على أسئلتهم اللى بقالى سنين بدور عليها ... انا ما بنكسفش اقول مش عارف بس هم مش قابلينها اجابه يعنى ايه مش عارف لما انت مش عارف احنا اللى هنعرف
هند / بس دا طبيعي
مختار / طبيعي !!
هند / انت بتفكر بدماغ جيلك و اللى للاسف مش ماشيه مع حياه جيلهم فحتى لو جبت ليهم حلول و ايجابات مش هتمشي معاهم و لا هتريحهم لازم هم اللى يتعبوا و يلاقوا طريقهم بنفسهم
مختار / الكلام سهل
هند / غريبه مع ان ده كلامك انت
مختار يبصلها
هند / مش انت اللى قولت اننا لازم نربى عيالنا زى ما كان الصحابه بيربوا زمان مش زى ما شباب اليومين دول بيربوا عيالهم مش انت اللى قولت نربيهم على انهم محاربين و رجاله و قادرين مش على انهم أطفال و صغيرين مش دا كلامك انت و لا دا كلام مين بالضبط
مختار / كلامى
هند / تمام ... نرجع بقي لحكايه مهره ... ايه الدنيا
مختار/ مش عارف و ابوها الواطى اكيد مش هيسكت ما هو فى ناس كدا لا منها و لا كفايه شرها
هند / هى عجبانى على العموم .. و من زمان ... بس ... ربنا يصلح ليها الحال
مختار/ بس ايه
هند / مفيش ... هى بنت كويسه المهم هم الاتنين يتراضوا و يبقوا سعودا و خلاص
مختار / هم مش متجوزين اصلا يا هند
هند / و هى تقدر تقول لا
مختار يقوم يقعد هند تقعد
مختار / ما تقول لا فين المشكله هنجبرها يعني ؟
هند / و بعد ما تقولها ... تروح فين ؟ ترجع لابوها و لا لأمها و لا ترجع تعيش لوحدها ... طب هترجع بقسيمه طلاق و هى بكر ... هتقول للناس ايه
مختار / كان مكتوب كتابها و أطلقت عادى
هند / ممكن برده
مختار / فى ايه يا هند ما لو عاوزه تقولى حاجه قوليها دوغرى بقولك مش قادر ايه اللى فى دماغك... انا ما عملتش كدا غير لان كل الطرق التانيه يا مقفوله يا هتاخد وقت و هى ما عندهاش الوقت ده ... يا هند الكام ساعه اللى قضتهم هناك انا ما دوقتش فيهم طعم النوم من التعب و التفكير و الخوف و خصوصا لما وصلنى ان المكان عليه كلام كتير دى مش بنتى و قلبي وجعنى عليها و اهلها ... قال بيقولك بعد الاب و الام لا خال بينفع و لا عم دى لو يتيمه ما كانتش شافت كل ده ... العيب عليا اصلا... انا الغلطان انا اللى غميت عيني و عملت مش شايف و اهو بيقتلنى اهو
هند / هو مين ده بعد الشر عنك
مختار/ ضميرى يا هند جوز امها قال لجابر ان اخوها شمام و سالنا عرفنا انه دخل مصحه مرتين ... يونس قال و ما سمعنالوش قال ان لو البت دى تهمنا نبعدها عن الاتنين دول ... انا متاكد ان ... بس ما يمكن كلامها هى صح ... كان بيرتب ليها من بدرى ما هو مش سالك و كان له شغل مع المجلس
هند / انت بتكلم روحك يا مختار انا مش فاهمه بتقول ايه
مختار / و لا انا بس لازم افهم... لازم ادور على الحقيقه و الا هموت او هتجن لازم اعرف دا حصل ازاى
مختار يقوم يطلع غيار من الدولاب و هند مش فاهمه اى حاجه
......................
فى اوضه احلام
احلام قاعده على السرير بتلعب فى الموبايل الباب يخبط
احلام / مين
الباب يتفتح و جابر يدخل
احلام / ما قولتش ادخل على فكره
جابر يقفل الباب و يروح يمدد جنبها على السرير
احلام / و دا من ايه ان شاء الله
جابر / تناحه
احلام / ماشي
احلام تكمل لعب فى الموبايل
جابر / تفتكرى ما حاولتش ... يوووووه كل يوم و الله
احلام تبصله بعدم فهم
جابر/ انساها كل يوم اقول اخلص بس الحوار ده عشان ما اسيبهاش فى نص السكه اخرهم لما رجعنا قولت بح خلاص مفيش تانى اذا اردت شيئا فاطلق سراحه
احلام / و ما فاتش اربعه و عشرين ساعه و جريت وراها
جابر / و طول ما هى على وش الدنيا هفضل أجرى وراها
احلام/ بالله عليك انت راضي عن نفسك اقسم بالله لولا انك اخويا الكبير كنت قولتلك كلام يوجع
جابر / اكتر من كدا ؟
احلام / اه اكتر اه ... هقولك انك بقيت مألسه البلد و الصعيد كله و نجاه حتى لو بنت مين ما تستاهلش ترخص نفسك عشانها كدا ... يا جابر يا حبيبي انت مش عارف قيمه نفسك انت لو شاورت بس هتتجوز ست ستها
جابر / مش هبقي مبسوط
احلام / و انت دلوقت مبسوط ؟
جابر / لا هههههههههه
احلام / دا انت تفقع
جابر يمسك ايد احلام و يبوسها تشدها
احلام / اوعى كدا مش طيقاك
جابر / بحبها يا بت عقبال ما ربنا يكرمك بواحد ابن حلال يحبك كدا
احلام / هى ما بتحبكش هتفضل تضيع فى عمرك كدا لحد ما تشوفها فى حضن غيرك ابقي تعال بوس ايدي ساعتها
جابر / من نصيبي ... كل يوم اصلى و ادعى و اقول يا رب لو مش نصيبي شيلها من قلبي ... و كل يوم حبها يتبت فيا اكتر ... انا عمرى ما دعيت ربنا بحاجه و خيب املى هى من نصيبي يا احلام
احلام / فى الجنه ان شاء الله
جابر / يجمعنا فيها جميعا حد يكره
احلام / انت جاى تنقطنى بقولك ايه اطلع بره شوف حياتك بوظها و ضيعها زى ما انت عاوز انا مش فيقالك
جابر / ليه يعنى بتعملى ايه
احلام/ ما بنيلش اديني قاعده
جابر / طب ما تقومى تلبسي اخرجك اجيب لك حاجه حلوه
احلام/ بترشيني عشان اصالح نجاه صح
جابر يبتسم
احلام / اخويا و انا عرفاه عيب
جابر / بيقولوا فى سيرك هيجي البلد صحيح ؟
احلام / اهو كلام بس ما فيش جديد بيقولوا سرك روسي مشهور اوى نازل مصر و هيلف المحافظات كلها و الناس كلها بتتكلم انه يجي بلدنا بس من امتى هيبقي جنب بلدنا بالظبط و برده مش هنخشه
جابر / هبقي اجى معاكى ادخلك
احلام / و الله هتسيب نوجه القلب و تبص لاختك
جابر / لا مش هسيب نوجه قلبي هاخدها معانا
احلام تقوم تشد المخده و تنزل ضرب فى جابر و هو بيضحك
احلام/ شلتنى نقطتنى جبتلى جلطات الدنيا و انا لسه ما دخلتهاش يا بعيد انت محدوف عليا من انهى مصيبه
جابر يشد منها المخده و يحطها تحت ضهره و يتعدل
احلام / اطلع بره هلبس و لعلمك هكععك جامد
جابر / كلى ليك يا قمر
جابر يقوم يطلع بره و يقفل الباب احلام تتنهد
احلام / ربنا يصلح لك الحال
.....................
فى شقه نسمه
ام عبده قاعده نسمه تروح تناولها كبايه مايه
نسمه / معاد الدوا
ام عبده/ اقعدى عوزاكى
نسمه تقعد
ام عبده / طبعا انتى شايفه انى متجنباكى خالص من ساعه حوار ابوكى و امك
نسمه تتنهد و تقعد الناحيه التانيه
ام عبده / انا عارفه ان انا و انتى ... بس فى الاول و الاخر انتى ام احفادى و ما حدش هيربيهم و لا يحبهم قدك و اكيد اللى بينا مش عشره يوم و لا اتنين دول سنين طويله بحلوها بمرها ... بس اديكي شايفه ... الجواب بيبان من عنوانه و هم مش هيسكتوا
نسمه / انا الموضوع ده خلصان بالنسبالى و قبل ما تغلطى فيا و تهينيني مش هكون لصابر و لا لاى حد انا عاوزه اعيش فى هدوء اربى عيالى و بس
ام عبده / و هو كمان شايف كدا ؟
نسمه / لا حول و لا قوه الا بالله ... خدى دواكى و ارتاحى ... عن اذنك
ام عبده / تفتكرى هو اللى قتل عبده فعلا و لا مش هو زى ما بيقولوا
نسمه/ ما فيش حاجه بتستخبى بكره يبان و لو ما بانش ... اللى عند ربنا ما بيروحش ... لا الحلو بيروح و لا الوحش بيروح يعني حق جوزى و عيالى كدا كدا راجع
ام عبده / ماشي يا نسمه
نسمه تقوم تروح ناحيه باب اوضتها
ام عبده / فى جماعه ولاد حلال كدا
نسمه تبصلها
ام عبده / شاروا عليا شوره كدا الصراحه مش جايه على هوايا ... بس انا حاسه ان ما فيش غيرها قصادنا
نسمه / خير شوره ايه دى
ام عبده / شويه حبر على ورق ... جواز سورى يعني
نسمه / صبرنى يا رب
ام عبده / نشوف حد مننا نرتاحله و نثق فيه
نسمه / لا ... حرام ... الكلام ده حرام و ما يرضيش ربنا
ام عبده / امال ايه اللى يرضي ربنا يا بنت عويس
نسمه / انى اعيش احاجى على عيالى يا ست الكل ... خدى دواكى
نسمه تدخل الاوضه و تقفل الباب
ام عبده / ما يبقاش شعرى على مره ان ما كنتيش شيفالك شوفه يا بنت عويس
...................
فى شقه جوزيف
كارم قاعد مع جوزيف على لاب توب فى اوضه
كارم / الحوار ده غير اللى انت علمتهونى خالص طول الفتره اللى فاتت
جوزيف / ما اكيد ما ينفعش احدفك على ليفل الوحش مره واحده
كارم / مش سهل فعلا
جوزيف / و لسه ... خليك انت معايا و انا هعلمك حاجات اصعب من كدا بكتير
كارم / انا عاوز اتعلم
جوزيف / انا اللى عاوز اسأل انت ايه سر اهتمامك المفاجئ بالتكنولوجيا انت مش كدا
كارم / لا انا كدا عادى فين المشكله... مين اصلا دلوقت ما بيهتمش بالتكنولوجيا و بعدين انا مش فاتح كتاب و بذاكر نظرى انا بتعلم عملى و دا شئ ممتع جدا
جوزيف / انا اتعلمت كدا برده ... اخدت ثقه بروفيسور عبقري خليته يعلمني كل حاجه و يعرفني على أصحابه العباقرة و خلاهم يعلمونى كل حاجه و انا بقي اخدت كل خبرتهم و طورتها ما درستش فى نظام التعليم الروتيني اللى بيضيع العمر ده
كارم / أنجزت.. شوفت بقي مش بقولك
جوزيف / انت عارف البروفيسور العبقرى ده فين دلوقت
كارم / فى امريكا ... كانوا بيقولوا أشطر واحد فى المجال دانيال برادلى و دا طلع انت
جوزيف يبتسم
جوزيف / صح كان فى امريكا... بس مات ... قتلته بعد ما اتعلمت كل حاجه و ما عادش عنده جديد يديهونى
كارم الابتسامه تروح من وشه
جوزيف / تصدقنى لو قولتلك انى ... كنت بنفذ الاوامر ... كنت عيل مراهق صغير لسه خارج من تجربه خلته ... حاولت أرفض المهمه دى من الاول لأنهم كانوا ناس طيبين اوى ... بس ما قدرتش ... فى المقابل كان فى روح طفله صغيره اوى مسؤله منى هتروح لو ما نفذتش
كارم / امايا
جوزيف يهز راسه
كارم / يا ريتها كانت راحت
صمت و تبادل نظرات حزن من الطرفين جوزيف يبتسم و يقوم
جوزيف / هو ميخا فين ... أما اقوم ارخم عليه شويه الراجل ده مش فاهم انا سايب بيته و قاعد لنا هنا ليه ما انا قولت له كل حاجه هو ايه الناس دى
جوزيف يفتح الباب و يطلع بره يلاقي مختار نايم على كرسي جوزيف يبصله و يفضل واقف و يروح يصحيه بالراحه مختار يفتح
جوزيف / ادخل افرد ضهرك جوه رقبتك هتوجعك
مختار يتمطع و يفوق
مختار / لا انا خلاص فوقت فى جديد ؟
جوزيف / ما تكابرش انت محتاج تنام و ترتاح كل الارهاق ده هيسببلك فاتيج واحد فى سنك مش هيستحمله
مختار / فى سنى !! تصدق انك ابن ابوك صحيح ... كان غتت كدا برده ... بس حنين ... و ما بيعرفش يدارى مع انه كان بيحاول بس كان حنين
جوزيف / حكايه البت اللى حبها و جابت اجله
مختار/ ما جابتش اجله ... اجله كدا كدا كان هيجي ... بس يا بخته بقي ... نحسبه عند ربنا شهيد
جوزيف / يعني انا لو روحت فتحت تربته دلوقت هلاقي جثته ما اتحللتش زى ما بتقولوا عن الشهدا
مختار / انا بقول نحسبه مش بقول انه شهيد انا ما اعرفش ... و لعلمك هم فتحوا عليه فعلا بس للاسف الدكتور المسؤل هو اللى كان واقف لوحده و ما سمحش لحد يدخل معاه و قال ان دى حرمه اموات
جوزيف / يعني ايه
مختار / لا دا انت تروح تعملى قهوه الاول و بعدين نبقي نقعد نرغى براحتك
جوزيف / لا انا خارج زهقت
مختار / ما تروحش ناحيه السرايا
جوزيف يبتسم
مختار / يونس انا قولت كلمه
جوزيف / مش فاكر امتى كلامك كان بيمشي عليا
مختار يتنهد
مختار / اعمل اللى يريحك
جوزيف يروح يفتح الباب و يمشي مختار يتنهد و يضرب كف على كف
....................
فى المضيفه
مهره بترجع و هند و مريم مسندينها هند تغسل ليها وشها و ترجعها السرير تانى
هند / ارتاحى يا ضنايا ارتاحى هانت شده و تزول يا كبدى ارتاحى
مهره / حسبي الله و نعم الوكيل فى اللى كان السبب حسبي الله و نعم الوكيل
هند / حسبي الله و نعم الوكيل الف مليون مره ما تضايقيش نفسك ربنا ما بيضيعش حق مظلوم
مهره / انا بموت من الوجع انا مش قادره استحمل اقسم بالله دماغى و جسمي مش قادره بتقطع مش قادره
مريم / هديكى دوا دلوقت يريحك شويه اهدى انتى بس
هند / و بعدين يا بنتى كلو يهون بس تقومى بالسلامه و لا ايه
مهره تعيط هند تاخدها فى حضنها مريم تروح تحضر حقنه نجاه تدخل
نجاه / الزفت عامل محضر خطف و عاوزين يفتشوا السرايا
هند / خطف ايه ما يحطوا القسيمه فى عين اللى جابوهم
نجاه / ما هم بيدوروا على عمران نفسه
هند / و المطلوب يعني
نجاه / عاوزين مهره لو كويسه تقول انها مش مخطوفه و انها هنا بمزاجها عشان يمشوا
مريم / مش هتقدر تتكلم ... هتقدرى يا مهره
مهره / انا تعبانه اوى بس هقدر .. قولولى اقول ايه و انا اقول
نجاه / قولى انك متجوزه عمران من سنه جواز رسمي و انك هنا فى بيت جوزك مش مخطوفه و لا حاجه و ان جوزك مسافر و ما قالكيش مسافر فين
مهره / انتى بتقولى ايه
هند / قولى كدا بس و هنبقي نفهمك بعدين قولى انك تعبانه و مش قادره تقفى و احنا هنكمل
مهره / انا و عمران متجوزين ازاى !!
نجاه / ما كانش فى طريقه تانيه نخرجك بيها من المصحه غير كدا قولى كدا بس و احنا هنصلح كل حاجه لما تخفى و تقومى بالسلامه
مهره تقوم تقعد هند تناولها طرحه و تحط عبايه رجالى على ضهرها و تسندها بره المضيفه رجاله كتير واقفه حوالين البوليس
جابر / ما انا وريت سعادتك القسيمه ايه هو فى راجل بيخطف مراته و لا فى ايه
الظابط / يا جابر بيه ابوها اللى عامل المحضر احنا بس عاوزين امضتها الكريمه هنا اكتر من كدا مش عاوزين
امين / اهى جايه هناك اهى اياكش ترتاحوا لما تقوموا البت تعبانه من فرشتها عشان تمضى ورقه ما لهاش اى تلاته لازمه ... تعالى يا مهره يا بنتى قولى للباشا انتى هنا ليه
مهره تبص للظابط و الرجاله
الظابط / انتى مهره على الدسوقى
مهره / ايوه انا
الظابط / والدك مقدم محضرين فى عمران الزيني واحد سرقه مجوهرات و التانى خطفك انتى ايه رايك فى الكلام ده
مهره / عمران مش خاطفنى انا هنا بمزاجى
الظابط / و فين عمران؟
مهره / ما اعرفش ما شوفتوش من ساعه ما جيت هنا
الظابط / فى واحده ما تعرفش جوزها فين ؟
مهره / ما قاليش ... انا مش قادره اقف بجد
امين / حاجه تانى يا باشا
الظابط / لا امضي هنا و اسفين على الازعاج
مهره تمسك القلم و ايدها بترتعش تمضي الظابط يبصلها و ياخد الدفتر و الرجاله و يمشوا و هند و نجاه يسندوا مهره ناحيه المضيفه و مهره منهاره من العياط
مهره / يا ترى بيقولوا عنى ايه دلوقت
نجاه / مين
مهره/ بابا و ماما و اخواتى ... انا ايه اللى وصلنى لهنا يعني مش كفايا مدمنه كمان متجوزه من وراهم ... يا رب خدنى بقي يا رب انا تعبت و مش قادره اتحمل كل الابتلاء الشديد ده
نجاه / طب ادعى يرفعه انما ياخدك ليه بس
مهره / يرفع ايه انا ضعت انا حتى لو خفيت من المخدرات ... انتى مستوعبه ... انا سمعتى بقت فى الارض ... أنا ما حلتيش غيرها .. و راحت
هند / ما عاش و لا كان اللى يهوب من سمعتك انتى ست الكل و ما حدش له عندك حاجه و احنا جنبك و فى ضهرك
مريم تروح تدى لمهره حقنه
مريم / ما تفكريش فى حاجه دلوقت اهدى و نامى و ارتاحى و كل حاجه هتتحل بإذن الله
مهره تنام فى السرير نجاه تطلع بره و هى بتمسح دموعها جابر يشوفها واقفه فى جنب بتعيط يفكر ثوانى و يروح لها
جابر / هى كويسه ؟!
نجاه/ ما انت لو كنت خدت كلام يونس جد مره واحده فى حياتك ما كانش كل ده حصل
نجاه تسيب جابر و تجرى على السرايا و هو متابعها بحزن هند تطلع من المضيفه
هند / فى حاجه يا جابر
جابر / لا يا خالتى ما فيش تسلمى
جابر يروح ناحيه بيته
........................
فى السوق
جوزيف بيتمشي و بيعد الكاميرات بعنيه عربيه صابر تدخل
صابر / نورت يا خواجه ليك وحشه
جوزيف / اهلا !! ايه العربيات الحلوه دى ايه الفرسه بتاعتك تعبانه و لا ايه
صابر / اركب عاوزك
جوزيف / عيونى
جوزيف يلف و يركب
صابر / خير كنت بتعمل ايه كدا لوحدك فى البلد
جوزيف / بشوف الجديد بصراحه الرجاله عاملين شغل جامد بس للاسف برده مش كفايا
صابر / افتح التابلوه هتلاقي فلاشتين
جوزيف يفتح التابلوه و يطلع الفلاشتين
صابر / انا محتاج منك جميل و هديك اللى انت عاوزه
جوزيف/ لو قبضت التمن مش هيبقي جميل بلس انك ما تقدرش على تمنى
صابر / و انت ما تعرفنيش
جوزيف / لا عارف كويس و عارف ايه اللى فى الفلاشتين و عارف هتطلب ايه و اقدر اريحك دلوقت لو تحب
صابر يفرمل و يبص له
جوزيف / حوار عيله الجزار اللى انت ادبست فيه ... الا قولى صحيح انت بجد بتحبها ؟؟
صابر / خرجها من الموضوع
جوزيف/ انا ما دخلتهاش اصلا انا بتكلم معاك عادى
صابر / مين اللى خطف الواد
...........................
أنت تقرأ
الكبيره ٢ بقلم / لولو_محمد
Humorالحرب لسه مستمره و الحقيقه مسيرها فى يوم تظهر النور و كل واحد لازم يختار طريقه
