الكبيره ٢ بقلم / لولو_محمد

الحلقه ١٣٨

((((((( الكبيره ٢)))))))
#لولو_محمد
الحلقه ١٣٨
نسمه / هبقي ادخل المسجد افرد ضهرى شويه
فيراس / بقي ده اسمه كلام برده عيب الكلام ده
نسمه / انا اتلخمت و نسيت اكلم ابويا اطمن على العيال
فيراس/ نايمين لسه قافل معاه و خليته يصورهم لى
فيراس يوريها صوره عيالها نايمين نسمه تتنهد
فيراس/ انا معيش نسخه تانيه من المفتاح و كدا كدا كل الاوض فيها مفتاح من جوه و الشقه فيها ترباس يعنى مستحيل ادخل عليكي الشقه
نسمه / انا مش هسيب امى يا فيراس
فيراس/ ما انتى مش هينفع تباتى هنا يا نسمه
نسمه / هينفع هينفع ما تشغلش انت بالك
شاكر يدخل فيراس عينيه توسع
شاكر / السلام عليكم ... ازيك يا فيراس ازيك يا ام بدر
نسمه / دكتور شاكر !!! خير بتعمل ايه هنا ؟
شاكر / عرفت ان الحجه بعافيه قولت اجى اطمن ... مالك يا فيراس شوفت عفريت و لا ايه
……………………………….
فيراس / عفريت ايه بس انا بس متفاجئ اهلا و سهلا آهلا و سهلا
شاكر / بقولك يا ام بدر الحج فاروق مجهز لك مطرح كدا وسط الحريم عنده فى البيت لو تحبى تروحى ترتاحى طبعا نجاه و الجماعه لما بيجوا هنا بيروحوا يقعدوا هناك... على الوقت اتأخر يعني و كدا و اكيد وراكى لسه يوم طويل اوى الصبح
فيراس / ما فيش داعى انا
نسمه / تمام... استاذنك توصلني
فيراس / نعم
نسمه / معلش يا فيراس استاذنك الشنطه من العربيه عشان تعبانه اوى
فيراس / و دا من ايه ان شاء الله ما انا من الصبح بتحايل عليكي اروحك انتى مش واثقه فيا و واثقه فيه هو
شاكر / و انا مالى بالقصه و بعدين صوتك احنا فى مستشفي
نسمه / انا مش هبات فى بيت غريب لوحدى انما الحج فاروق انا عرفاه من زمان و زورته هو و جماعته اكتر من مره لما كنت بدرس هنا و لا نسيت انى كنت بدرس فى مصر
شاكر / الشنطه يا فيراس بعد اذنك
فيراس / عنيا ... اتفضلوا
فيراس يمشي و شاكر يمشي وراه يبص على نسمه وراه تحرك شفايفها من غير صوت
نسمه / شكرا
شاكر يهز راسه و يكمل مشي
………………………..
فى الجبل
صابر واقف مع راجل
الراجل / و عاملين حفله و سماعات و ناصبين خيمتين واحده الحريم و التانيه للرجاله و جايبين معاهم حراسه و عربيات و ايس بوكس و طباخ و الصرف باين
صابر / ما تشيلوش عينكم من عليهم برده
الراجل / من غير ما تقول يا كبيرنا كلو تحت السيطره
صابر يشاور للراجل براسه يمشي الراجل يمشي صابر يتصل بشاكر غير متاح صابر ينفخ و يرمى الموبايل جنبه و يقف مخنوق تليفونه يرن دياب يروح يجيبه
صابر / فى جديد ؟
دياب / مفيش اى تحاليل او اشاعات او كشف اتعمل من اى نوع و لا عتبت المستشفي غير و هى بتزور فيراس و دخلت من البوابه على الاوضه و من الاوضه على الشارع و وشها بدر منور فى كل الكاميرات
صابر / قولت وربنا قولت 
دياب / على العكس خالص بقي الملف بتاعها فى مصر اسود و نيله و الحاله بتودع و لازم العمليه فى اسرع وقت
صابر / طب انا ما بفهمش انت شايف ان ده منطقى ؟
دياب / و لا عدى برجله من قدام باب المنطق حتى
صابر/ و العمل
دياب / هى كدا كدا فى بيت عم فاروق و شاكر بايت فى الاوضه اللى تحت و البوابه مقفوله و عليها حراسه مشدده و من اول طلوع للنهار هتروح المستشفي بحراسه و لا حراسه رئيس مجلس الوزراء فى زياره تفتيشيه مفاجئه
صابر / ما تحاول تعرف لى تفاصيل المتبرع دى البت عيالها صغيرين و حرام
دياب / هو مش على قد علمى الكبد بيتجدد يعنى مش هياثر عليها
صابر / هو فى حاجه اسمها كدا مش فتح بطن ده و جراحه و عمليات و لا شكه دبوس يا ابنى العمليه مش بالبساطه دى
دياب / على العموم هشتغل على الموضوع و عم عبد الله كمان شغال فى الملفات اللى معاه و باذن الله نلاقى حاجه كويسه
صابر / انا كدا كدا خليت دكتور عبد الله يعمل لى التحاليل كلها
دياب / بتهزر صح
صابر / انا صحتى كويسه و لا ورايا عيل و لا تيل يعني لو مناسب انا اولى منها
دياب / اولى بمرات عويس من بنتها
صابر / انا غلطان انى اديتك وش اصلا..  و من غير سلام
صابر يقفل السكه و ينفخ
.......................
فى اوضه امايا
امايا بتتكلم فى التليفون
امايا / انت بتفكرنى بواحده مصريه اعرفها كانت بتقول جمله بتضحكنى اوى مع انى عمرى ما فهمتها
فيراس / جمله ايه دى ؟
امايا / خيبتي فيك راكبه جمل
فيراس / و انا قصرت فى ايه
امايا / سحبت لك البت بره البلد و لوحدها و حجزت لك امها فى المستشفي و انت يا طور مش عارف تسحبها على شقتك ايه اجى اعملهالك دى كمان و الله شوف و الله لو كنت بعتلها اقل واد عندى كان خلص انما اقول ايه فاشل
فيراس/ تمام احنا فيها ابعتى
امايا / مش هقدر اسحبك لازم تفضل هناك ... بس اقدر اسحب شاكر
فيراس / يا ريت
امايا / تمام هشوف هقدر اعمل ايه و انت اتعامل عادى و خليك جاهز
فيراس / تمام
امايا تقفل الموبايل و تنفخ
امايا / اعمل فيك ايه يا شاكر مش عاوزه ائذيك ... اوف
امايا تقلب فى النمر
امايا / حبيبه قلبي اللى ما بتسالش ... هههههههههههه يتوب علينا ربنا بطلناها خلاص... المهم عندى ليكي شغلانه هتكسبى منها حلو اوى ... لا و حياه امك مش من اياهم دا العكس تماما ... اه هيتعبك شويه معلش ما هو كله بتمنه ... على العموم انا هقولك تتعاملى معاه ازاى و كدا كدا كل اللى طلباه منك انك تسحبيه شويه لحد ما اخلص حوار كدا يخصنى ... روح قلبي هحولك دلوقت عربون و ابعتلك التفاصيل و هستنى منك خبر حلو زيك ... سلام
امايا تحط الموبايل و تتمطع بنت تدخل
البنت / ريكو ما اتعشاش لسه
امايا / ازاى يعني المفروض اخد وجبته من ساعتين ايه الاستهتار ده قوليله لو ما اختارش بمزاجه هنخلى ريكو هو اللى يختار بنفسه و ريكو طماع بدل ما كان هياخد حته على الميزان هياخد على قد ما بقه يجيب
البنت / قولتله و عمال يعيط و يصوت كل ما حد يقرب منه
امايا / يعيط و يصوت !!! هى الرجاله خابت و لا ايه ... انا قيماله بنفسي اشوف اخرتها ايه مع العيال الطريه دى امال كان عامل فيها أسد و نافخ صدره يعني تعالى وريني سى زفت ده اما اشوف اخرتها
امايا تقوم مع البنت
...........................
فى مكتب الزنايته
عباده/ مش هيتكلم بس هيزعل اقله ما يحضرش و بصراحه مفيش فرحه بتكمل من غيره بس شوف اللى يعجبك و اعمله
مختار / معاك حق
عباده / انت مستعجل على ايه
مختار/ زهقان
عباده / سبب منطقى فعلا انا برده كل ما بزهق بصحى اجوز واحد من عيالي
مختار / عملت ايه صحيح مع فارس مش كنتوا بتدوروا ليه على عروسه
عباده / امه بقي معاه مفيش حاجه بتتحكيلي يبقي مفيش حاجه مهمه فى الموضوع
مختار / ربنا يرزقه ببنت الحلال اللى تصونه
عباده / امين ... عرفت نجاه عملت ايه امبارح؟
مختار / لسه ما جاتش برده
عباده / لا جت بس ما حكتش و انا ما سالتش ... بس عارف او حاسس قلب الاب بقي
مختار / عارف ايه
عباده / اتكلمت مع يونس فى الملعب شافوهم بيضحكوا سوا فى جنب
مختار/ ايه الهبل ده مين اللى شافهم و بعدين ما جابر كان معاها ما كانش هيقبل بالهبل ده طبعا
عباده / ما انا طلبت الكاميرات و اتاكدت بنفسي اه كلمتين و رد غطاهم بس اقولك ايه الواد حلنجى و لعيب بيتلولو كدا زى الحيه و يدنجل و شغل فاخر من الاخر
مختار / هبقي اشوف الفيديو
عباده / بس انا مبسوط انها لسه قادره تسحب الفرامل قصاده دا انا اللى راجل لو مكانها كان زمانى حبيته
مختار يضحك
مختار/ و ايه اللى مانعك ما انا بحبه
عباده/ بنتى منعانى ... بنتى يا مختار
مختار/ ما يمكن يسعدها ما يمكن يبقوا قصه ما حصلتش
عباده يبتسم بسخريه و يبص الناحيه التانيه
مختار / انت ليه لاغيها من حساباتك دى حياتها هى دا قرارها هى
عباده / و انا ابوها و من واجبى احميها ... نجاه اتربت فى بيئه مقفوله ما احتكتش مع ناس كفايا انها تقدر تميز كويس
مختار / دى نجاه ؟! بنتك
عباده / اه بنتى ... و اه اتربت فى بيئه مقفوله ... بيئه ما فيهاش غير ناس زينا انا و انت و اخواتها و اولاد عمامها بيئه كل الرجاله اللى فيها احنا هو مختلف
مختار / و ايه الوحش انه يكون مختلف
عباده/ انه مختلف
مختار / يا راجل
عباده / انا مش قادر اثق فيه اديته فرص كتير بس هو
مختار / هو مستفز فاهمك بس برده دا لازم يكون قرارها هى
عباده / انا عارف مصلحتها كويس
مختار / مش قادر اجادلك انت حر انا مالى هو يعنى كان واقف على الباب
عباده / واقف
مختار يبص لعباده
عباده/ واقف و مستني اقل فرصه اغفل فيها
مختار / ما تزعلش منى بس انت مستهون بيه اوى ... يونس لو عاوز يعمل حاجه هيعملها هو حتى لو كان واقف على الباب مش مستنى فرصه تغفل مستنى فرصه تغفر
عباده يبص لمختار
مختار / يونس انسان جديد بيحاول بكل اللى يقدر عليه انه يلاقي لنفسه مكان وسطينا و فى ناس كتير بتحبه يونس ما اتاخرش فى اى حاجه طلبناها منه بأدب رمى نفسه فى النار بدل المره اتنين و تلاته عشان بنتك و فى كل مره ربنا بينجيه من الموت بمعجزه مش عاوز منك حاجه و لا بيطلب منك حاجه هو اصلا مش محتاج منك حاجه هو عاوز بس يبقي جزء من العيله ... هو محتاج يحس انه مقبول و ان فى امل فى التغير و فى بكره
عباده / انت فاكره ابوه
مختار / و ابوه كان ايه ؟! ما كان النجس و لا نسيت ... و بعدين بقي ايه ؟ ... كل اللى كان محتاجه هدف ... هدف يتغير و يهد الدنيا عشانه ... هدف
عباده / عنده ملعب مفتوح ينقى الهدف اللى يعجبه بعيد عن بنتى
مختار / هو بالكيف اصله
عباده / انت لتات كدا ليه ما تضيقش خلقي بقي قوم شوف لك حاجه تعملها و لا خليك انا اللى قايم
عباده يسيب المكان و يمشي
........................
قدام بيت فاروق
شاكر واقف نسمه تطلع من البيت يفتح لها الباب اللى ورا و يركب قدام و يسوق
نسمه / ما حدش كلمنى من المستشفي
شاكر / خير ما تقلقيش ... على فكره فى رجاله كتير جايين معانا عندهم استعداد يتبرعوا للحجه و فى البلد كمان يعني ما تقلقيش اكيد بإذن الله هنلاقي واحد منهم ينفع
نسمه / يا رب بجد ... الدكتور رعبنى امبارح انا مش قادره أصدق ازاى بالسرعه دى انا طول الليل عماله ادور على اى معلومه توحد ربنا تفسر اللى حصل
شاكر / النصيب
نسمه / طب امتى طيب
شاكر / مش عارف بس هو فى حاجه غريبه فى الموضوع انا مش فاهمها
نسمه/ خير ؟!
شاكر / هى الست الوالده اكتشفت مرضها امتى و ازاى و هى ما كشفتش عند اى دكتور و لا عملت اى تحاليل او فحوصات فى البلد و الأهم انها ما سابتش البلد خالص تكون عملتها بره مثلا
نسمه / ما اعرفش ما قالتليش قالت إنها ما كانتش عاوزه تكبر الموضوع و تلمه من غير ما تشغل حد لحد ما اتفاجئت انه كبير و مش قادره تدارى اكتر من كدا
شاكر / طب و رد فعل والدك و اخواتك طبيعي من وجهه نظرك ؟
نسمه / اه طبيعي ... ايه الجديد يعني ... ربنا يعين كل واحد على حاله ما لناش نحكم على حد
شاكر / معاكى حق
نسمه توصلها رساله
نسمه / دى المستشفي باعته التحاليل بتاعتى ... أنا مطابقه
صمت
.......................
فى الجبل
صابر / هى رحله يعني مش ليله و انفضت هيعيشوا هنا نبعت نجيب حمولتين طوب على اسمنت و نبنى لهم بيت هنا
راجل / اؤمرنى و انا امشيهم وقتى
صابر / للاسف مش بالبساطه دى الناس دى صارفين جامد و دا معناه انهم مسنودين و اى تصرف مش محسوب هيجي على دماغنا احنا فى الاخر و هيفتح علينا فواتيح ما لهاش لازمه ... المشكله انهم جايين فى وقت انا مش رايق فيه و لا عارف افكر
صابر يطلع الموبايل و يتصل
صابر/ السلام عليكم ... ايه الدنيا عندك
دياب/ مفيش جديد نفس الروتين اغانى و رقص و اكل و ضحك و مسخره
صابر / و اخرتها
دياب / زى اولها عملت تليفون كدا و عرفت انهم للاسف معاهم تصريح و جايين من مصر مخصوص يعملوا سفارى يومين و ينبسطوا تبع شركه كبيره كدا و معاهم للاسف سياح
صابر / كنت عارف و الله كنت حاسس ما هو الصرف ده مش ببلاش
دياب / مضايقينك و لا ايه ؟
صابر / لا لا مش فارقين معايا بس ... خايليني بس
دياب / بص انا كدا كدا راصدهم و عيني عليهم و فى رجاله كدا كدا قريبين منك لو حصل اى حاجه
صابر / ما انا واخد بالى بس مش مرتاح لا عارف انام و لا عارف اهدى
دياب / مقدر بس هى هناك فى امان و معاها حراسه محترمه و ناصر رايح لها برجاله زياده
صابر / ناصر !!
دياب / زياده امان مش اكتر
صابر / خير
دياب/ خير ما تقلقش
..............................
قدام المستشفي
ناصر يركن عربيته و ينزل منها و يدخل المستشفي ست عجوزه تخبط فيه و تقع فى الارض يسندها
ناصر / حقك عليا يا أمى حقك عليا
الست / مش تفتح يا ابنى هو انا قدك
ناصر / حقك عليا و الله ما اقصد ... اتفضلى اقعدى
الست / قعدنى يا ابنى سندنى
ناصر يساعد الست تقعد بنت تحقنه فى رقبته يبص لها و يحاول يقوم الست ماسكه فيه لحد ما يقع فى الارض الست تصرخ
الست / الحقونا يا عالم الجدع وقع من طوله
اتنين ممرضين يدخلوا و معاهم ترولى يشيلوا ناصر و يجروا بيه على اوضه
الست / لا حول و لا قوه الا بالله لا حول و لا قوه الا بالله
...........................
فى المستشفي
شاكر واقف على باب اوضه دكتور و فيراس واقف الناحيه التانيه يطلع التليفون و يتصل بامايا
فيراس/ الو ايه الدنيا مطولين و لا ايه
امايا / فى ايه مش فاهمه
فيراس / عم زفت اللى طالعلى زى الخازوق ده ايه مش هنخلص و لا ايه
امايا / ما تقلقش الجماعه فى الطريق
فيراس / طريق ايه دا المستشفي مردومه رجاله بتحلل عشان يتبرعوا بدل نسمه هو ايه الموضوع هى الست طلعت عيانه بجد و لا ايه
امايا / انت عبيط ما انا اللى مخططه لكل ده سيبك كدا كدا عينتك بس الوحيده اللى هتطلع مناسبه ما تقلقش و انت فاهم طبعا جوازك منها قصاد امها
فيراس / انا ايه و لا مؤاخذه امال نسمه عند الدكتور جوه بتعمل ايه ... نسمه طلعت مطابقه
امايا / انت بتقول ايه ؟
فيراس / بقولك نسمه عند الدكتور جوه بيتكلم معاها عن العمليه و هتطلع من عنده على العمليات دى جايه بشنطه و معاها واحده كدا ما اعرفهاش ... انا تايه هنا
امايا تقفل السكه فيراس يستغرب و يروح يخبط على باب الدكتور و يفتح الباب
فيراس / لا مؤاخذه بس اتاخرتوا اوى قلقت
الدكتور / احنا خلصنا خلاص ... مس مريان هتنقلكوا الاوضه فوق على ما مدام نسمه تجهز نكون جهزنا اوضه العمليات تحت
شاكر / طب هو فى مشكله لو اجلنا العمليه دى لبكره يمكن نلاقى متبرع انسب
الدكتور / براحتكوا طبعا بس انا كنت صريح معاكوا حاله المدام مش مستحمله اى تأخير احنا اصلا عاملين المستحيل عشان تفضل متوصله بالاجهزه فى العنايه
شاكر يبص فى الارض
نسمه / مفيش مشكله انا كدا كدا جاهزه
فيراس / بس انا مع شاكر ... احنا ممكن نعيد التحاليل دى فى معمل تانى انا اساسا مش مرتاح للموضوع و عيالك و كدا
نسمه / خلاص يا فيراس ما عادش فى وقت
الممرضه / يلا و لا ايه
نسمه و مرات فاروق يتحركوا مع الممرضه نسمه ترجع تدى ظرف مقفول لشاكر
نسمه / لو جرالى حاجه افتحه
شاكر / ان شاء الله تقومى بالسلامه و تاخديه منى و تقطعيه
نسمه تبتسم و تمشي
فيراس / هى مالها ضلمت كدا ليه انا مش فاهم حاجه
..................................
فى الجبل
عربيتين جيب يركنوا و ينزل منها الرجاله اللى باعتهم ابو حاتم يستقبلهم رجاله صابر
راجل حاتم ١ / صابر موجود يا ابن عمى
راجل صابر ١ / اسمه صابر حاف كدا ؟!
راجل حاتم ٢ / قوله ولاد سليم الغازى عاوزينه فى حاجه ضرورى و يكون فى علمك التأخير مش فارق معانا احنا بس هيزعله هو
راجل صابر ٢ / انتوا جايين تهددونا فى ارضنا و لا ايه دا احنا ندفنكوا فيها وقتى
راجل حاتم ١ / لا نهدد و لا احنا جايين فى دم من اساسه فى الاول و الاخر كلنا ولاد عم و لا ايه
راجل حاتم ٣ / بلغوا بس صابر اننا جايين له فى زياره من مصر
صابر ينزل
صابر / و صابر ما يتأخرش عن ضيوفه ما تاخذوهمش اللى ما يعرفكوا يجهلكوا ... خير ايه اللى فكركوا بينا السعادى
راجل حاتم ١ / على الواقف كدا مش نطلع و نضايف و لا ايه ؟
صابر  / نطلع ... اتفضلوا
صابر يشاور لهم على الطريق و يغمز لرجالته و يطلع وراهم الراجله توشوش بعض يتصلوا ببعض بالتليفونات
.............................
فى اوضه العمليات
نسمه قاعده على سرير و دكتور التخدير بيديها حقنه
نسمه / هى امى مش المفروض تيجي هنا برده
الدكتور / ما تفكريش فى اى حاجه و ارتاحى و بمجرد ما تصحى كل حاجه هتبقي تمام بإذن الله
نسمه تهز راسها الدكتور يحط لها ماسك الأكسجين تبص للكشاف الكبير اللى فوق راسها و عينها بتقفل الدكتور بيتابع جهاز يبص على نسمه نايمه يطلع موبايله و يصورها لايف
.........................
فى الجبل
راجل يقدم شاى للرجاله و واحد من رجاله حاتم فاتح موبايله و بيتفرج على فيديو
صابر / الشاى
راجل حاتم ١ / يدوم العز ... نخش فى الموضوع... الصراحه احنا كنا جايين و ناويين على ليله و جهزنا الرجاله و السلاح و كانت هتبقي ميغه
صابر / و ماله مش اول مره ياما جربتوا
راجل حاتم ١ / ما احنا قولنا كدا برده ليه كل مره ندخل نفس الدخله لما ممكن نشوف سكه تانيه احسن مليون مره
صابر  / اسمعها
راجل حاتم ٢ / لا شوفها احسن
الراجل يورى حاتم الفيديو صابر عنيه توسع و يقف و قبل ما ياخد رد فعل
راجل حاتم ١ / انت اعقل من كدا اى رد فعل هتعمله هنا هتدفع هى تمنه هناك و ياما ناس دخلوا اوضه العمليات و ما خرجوش منها
صابر / من امتى الرخص ده يا ولاد الغازى
راجل حاتم ٢ / معاك حق احنا لو علينا ما نعملش كدا بس منه لله بقي اللى زنقنا الزنقه دى
راجل حاتم ٣ / بس بايدك تخلص الموضوع ده فى كلمه منك
صابر / و انا اضمن منين
راجل حاتم ١ / ما فيش ضمانات الموبايل معاك مفتوح لايف قدامك نص ساعه يا تنفذ المطلوب منك يا تستودعها عند ربنا
راجل حاتم ٢ / انا لو منك أرفض... ما تستاهلش تضيع نفسك عشانها
صابر / كنت فاكركوا هتطلبوا الجبل
راجل حاتم ٣ / لا ما احنا كدا كدا كنا هناخده ما تشغلش بالك انت كدا كدا مش هتبقي موجود و اكيد لازم حد يملا مكانك و مين احسن من ولاد عمك الغازى يملوا المكان ده
راجل حاتم ١ / ما فيش وقت النص ساعه بتعدى
صابر / ايه المطلوب
راجل حاتم ١ / تقتل دياب
صابر عنيه توسع
راجل حاتم ٣ / العين بالعين و السن بالسن روح بروح و دم بدم و الاختيار ليك ... يا صاحبك يا الحرمه اللى فى الفيديو
صابر / انتوا عارفين انتوا بتطلبوا منى ايه
راجل حاتم ١ / باقي خمسه و عشرين دقيقه يا صابر و الوقت بيعد ما بيقفش لحد
صابر / لو فاكرين انكوا لو خلصتوا منى هتتهنوا بالجبل تبقوا غلطانين انا مش لوحدى لا عمرى كنت و لا عمرى هكون
راجل حاتم ٢ / ما انت هتاخد رجالتك و انت نازل
راجل حاتم ١ / فاضل واحد و عشرين دقيقه و قدامك طريق طويل يا صابر و يا عالم هتعرف تقابله و لا لا
راجل حاتم ٣ / صحيح ما تنساش تفتح لنا لايف من موبايلك و انت بتنفذ
راجل حاتم ١ / تلت ساعه
صابر يبص لهم و يبص للايف فى ايده على نسمه يبتسم و يهز راسه و يطلع بره
صابر / لم الرجاله و اخلوا الجبل
راجل ١ / نخلى الجبل؟!
صابر / اعمل اللى قولت عليه بالحرف
صابر يجرى على عربيته و هو بيتصل بالتليفون
صابر / محتاج اشوفك حالا
دياب / خير فى حاجه و لا ايه ؟
صابر / قابلني عند مسقى الكلاب الجديد و ارجوك ما تتاخرش مسأله حياه او موت مفيش وقت
دياب / بدأت اتحرك ما تقلقش
صابر / انا بجد اسف
صابر يقفل السكه و يتصل بشاكر
صابر / شاكر اسمعنى كويس نسمه لازم تخرج من اوضع العمليات باى شكل دا فخ
شاكر/ بس هى جوه من بدرى هخرجها ازاى
صابر / اعمل اللى يقدرك عليه ربنا بس تدخل و تخرجها و تطمنى مستنى منك تليفون حالا
شاكر / هحاول حاضر انا رايح لها اهو
صابر / عاوز أوصيك بحاجه
شاكر / توصيني؟!
صابر / لو جرالى اى حاجه ما تسيبش فى اولاد الغازى دكر عايش
شاكر / ايه اللى فكرك بيهم دول ؟!
صابر / مفيش وقت افتكر كلامى و بس
شاكر / انا وصلت اوضه العمليات بس مقفوله لازم تتفتح من جوه
صابر / اتصرف يا شاكر ارجوك
شاكر / هعمل اللى اقدر عليه و اكلمك
صابر يقفل
.............................
فى اوضه امايا
امايا / انا عاوزه اعرف ازاى ده حصل و المسؤول يكون قدامى حالا
بنت ١ / فى حد غيرنا دخل سيستم المستشفى
امايا / و انتى جايه تكتشفي ده دلوقت ؟! ... اتاكدى انه ما دخلش عندنا
امايا تطلع الموبايل و تتصل
امايا / انا غلطت غلطه كبيره و محتاجه مساعدتك
جوزيف / انتى فين ؟
امايا / فى السيرك
جوزيف/ انا فى الطريق... اشرحيلى باختصار ايه اللى حصل
بنت ٢ / فى حركه غريبه فى الجبل كل الرجاله بينزلوا منه ما اعرفش رايحين على فين
امايا / طلعى كل الكلاب و حمليهم فى العربيات و اجهزى للهجوم
جوزيف / امايا ايه اللى بيحصل عندك ؟
امايا / ابعتى الدرونز اسرع الاول مش عاوزه ابعت الكلاب للمجهول
جوزيف / ردى عليا هنا ايه اللى بيحصل عندك
امايا / انت لازم تيجي حالا مش انا اللى بعمل كدا
جوزيف / فى الطريق
.......................
عند المسقى
دياب يركن عربيته و ينزل
دياب / فى ايه يا صابر خير جبتنى على ملا وشي ايه اللى حصل و منصور لسه مكلمنى قالى ان الرجاله كلها بتسيب الجبل ايه اللى حصل
صابر / فى انى خسرت ... دياب انا اسف
دياب / مش فاهم حاجه
صابر / انا بس عاوزك تعرف انك كنت اعز اخ ليا و انى حبيتك زى ما بحب نفسي بالظبط
دياب / و انت بالنسبالى
صابر / سامحنى
صابر يضرب دياب بالنار فى صدره دياب يقع على الارض صابر يروح يجيب الموبايل من على عربيته
صابر  / انا نفذت الدور عليك
الناحيه التانيه شاب يشوف اللى حصل يطلع يجرى
.......................
فى السيرك
جوزيف يدخل بيجرى راجل يقابله
الراجل/ من هنا اتفضل
جوزيف يجرى ورا الراجل لحد ما يوصل لاوضه
الراجل / اتفضل هم جوه
جوزيف يدخل اوضه فيها اجهزه كومبيوتر كتير جدا
امايا / فى حد نط على خطتى و عدل فيها كل حاجه كانت ماشيه كويس و فجاه
جوزيف/ مين اللى ماسك السايبر سيكيوريتي عندك
بنت / انا
جوزيف يبص لها و يبص لامايا
جوزيف/ مشيها و ابقي استنضفى الناس اللى تمسكيهم حاجه مهمه زى دى
امايا تطلع المسدس و تقتلها جوزيف ينفخ و يكمل شغل
امايا / وصلت لحاجه ؟
جوزيف / اه وصلت بس مش هتستفيدى منه بحاجه
امايا / ليه
جوزيف/ عشان العمليه خلصت يا إيمي انتى ايه اللى جرالك فين بلان بى بلان سي المفروض انك عامله حساب كل خطوه
امايا / دى ما كانتش عمليه اصلا دى كانت... معاك حق انا غلطانه بس ملحوقه انا كدا كدا خمس دقايق و اسيطر على الوضع هنا الدور و الباقي على انى الاقى الكلب اللى عمل كدا و اعرف عمل كدا ليه
جوزيف / يمكن عشان احنا مش لوحدنا فى الملعب
امايا / لقيته ؟ بليز قولى انك لقيته
جوزيف يجيب ورقه و قلم و يكتب عنوان و يديهالها تديها لبنت من اللى شغالين على الاجهزه
جوزيف / انا مش هقدر اساعدك تانى
امايا / كان ممكن ترفض تساعدني اولانى على فكره
جوزيف / قلب الأخ بقي ... انا خلصت و ماشي ... انتى فعلا محتاجه حد كويس يمسك لك السايبر سيكيوريتي كانت عامله شغل كويس بس سبعه و نص من عشره
امايا / اعمل ايه ما دى احسن حد لقيته بعد ما انت بعتنى عشان خاطر عيون نوجه بس مش خساره فيها و كدا كدا انا شغاله على الموضوع
بنت ٢ / الدرونز و صلت و العربيات فى الطريق 
امايا / خلى الدرونز تنضف قبل ما تفتحى للكلاب
جوزيف يبص على الشاشه يشوف الدرونز بتحدف قنابل و فى رجاله بتطير و رجاله تفتح النار درونز تصطادهم
جوزيف / انتى بتعملى ايه ؟
امايا / صابر سحب رجالته من الجبل و سابه لناس غريبه يرضيك اسيبهولهم
جوزيف / ما تستهونيش بصابر يا امايا اعرفى خصمك كويس و اعملي له الف حساب
امايا / كنت عملاله الف حساب و جه حد نط على خطتى و خد اكتر من اللى كنت ناويه اخده من غير حساب خالص يا جو و انا مش ناويه اسيب حاجه زى دى تعدى من تحت ايدي ما دام ممكن يبقي انا اولى
جوزيف / انا ما ليش دعوه بكل ده بس لازم تفهى ان الجبل هو أهم نقطه فى البلد دى يعني ثوانى و هتلاقي الجوارحه و الزنايته كلهم رايحين هناك
امايا / ادينا بنتسلى و البقاء للاقوى
جوزيف / انتى حره ما تطلبيش مساعدتى تانى و نضفى القرف ده
امايا / كدا كدا من غير ما تقول
جوزيف يمشي
امايا/ ايه الجديد عند نسمه
بنت ٣ / شاكر قدر يدخل اوضه العمليات و مشتبك مع الدكاتره اللى جوه
امايا / شاكر !!
امايا تروح تشوف الفيديو
امايا / دول مش دكاتره ... ابعتى فرقه تجيب لى التلاته دول عايشين ... او اللى يتبقي منهم المهم اعرف حكايتهم و مين اللى وراهم  ... امال المسطوله دى هههههههههه يا ابن المحظوظة سامحتها و الله سامحتها بصراحه عندها حق ... هى عملت ايه فى ناصر بعد ما خدرته فكريني كدا ؟
بنت ١ / البنات جابوا الدكتور من المستشفي
امايا / استفدت ايه انا من المعلومه دى ما كان يهرب منكوا كمان بالمره عاوزه اعرف مين اللى وراه ... هو ازاى ما حدش شال جثه ميشيل من على الارض لحد دلوقت ايه القرف ده
بنت ٣ / فريق اتحرك ناحيه العنوان اللى جوزيف اداهولنا بس واضح انه فندق
امايا / ادخلى السيستم عندهم و فرغى البيانات كلها عاوزه اى خيط امشي وراه
بنت ١ / محتاجه تشوفى ده
امايا تبص على الشاشه تشوف الأمن و دكاتره يدخلوا يحتكوا بشاكر و فى خناقه كبيره دكتور يدى لشاكر حقنه مخدره يقع فى الارض يطلعوه بره و يكشفوا على نسمه و يطلعوها بره اوضه العمليات و الأمن مالى الاوضه و يقوم الرجاله اللى فى الارض اللى لابسين دكاتره واحد من الأمن يبص على الكاميره و يعمل صابعه مسدس و يضرب نار و يطلعوا كلهم بره
امايا / قدامك خمس ثوانى تقولى ان البنات بتوعنا ادخلوا قبل ما انفجر فيكوا كلكوا
..........................
فى البلد
الشاب بيجرى و هو بيصرخ
الشاب / يا أهل البلد اللحقوا يا أهل البلد صابر القط قتل دياب الجارحى يا أهل البلد ... يا اهل البلد صابر القط ضرب دياب الجارحى بالنار عند المسقى يا أهل البلد
أهل البلد كلهم يجروا ناحيه المسقي و الشاب لسه بيجرى و يصرخ
الشاب / يا أهل البلد دياب الجارحى اتقتل يا أهل البلد و صابر القط هو اللى طخه يا أهل البلد
........................