الكبيره ٢ بقلم / لولو_محمد

الحلقة ١٠٩

((((((( الكبيره ٢)))))))
#لولو_محمد
الحلقه ١٠٩
فى جنينه الزنايته
همام / انا فاهم الكلام ده و وارد يحصل بس مش للدرجه يعني مش لدرجه انه يعمل له مشكله نفسيه
امين / انا ما افهمش فى النفسيات و الكلام ده احنا كنا بناخد على دماغنا و ما بنقولش اى حتى الجيل الجديد بتاع التربيه الايجابيه هو اللى حساس زياده و مش مستحمل كلمه و على راى امى كل ما العيل كان اذكى كل ما كانت تربيته أصعب
همام / ايوه سمعت الكلام ده
امين / المهم الواد خايف يقول لابوه ليزعل و احلام مش عاوزه تبان قدامه انها فتانه و نقلت كلامه عشان برده ما يفقدش ثقته فيها و يتكلم معاها تانى
همام / فاهم طبعا فاهم
امين/ هو الموضوع مش خطير و سهل يتعالج فبلاش نكبر الموضوع على الفاضي ... نلمه احسن و لا انت ايه رايك
همام / لا انا هتعامل انا على طول
....................
امين / تمام
قاسم يطلع من المضيفه
قاسم / السلام عليكم ايه الاخبار جاهزين و لا ايه ؟
امين/ امال انا بس كنت لسه بكلم همام اننا نسيب الواد هنا عشان الصحرا و الجبل و الجو ده مش هياكل معاه فتاخد انت راحتك و ما ينكدش عليك
قاسم / بس لو عرف هيزعل
امين / لا ما تقلقش هو ملهى مع العيال
قاسم / هو بعنى خلاص و لا ايه
امين يضحك
امين / و هو يستغنى !! هو بس الجو الجديد سارقه ما احنا كنا عيال برده و بعدين مش هنضحك على بعض العيل فى السن ده بيبقي مشدود اكتر ناحيه امه ... اقصد يعني الحريم
قاسم / لا هى اتقالت صح امه و دى المشكله ان الانسه احلام مش امه و مش هتكون امه و ما ينفعش يفتكرها عوض عن امه لأنها مش هتكون
همام / ما تهدى يا قاسم و تعرف انت بتقول ايه
قاسم / اقسم بالله ما بغلط فيها بس دى الحقيقه هو عيل و سايقنا كلنا وراه و السكه دى مش نافعه
امين / هتهدى لما تطلع الجبل ... يلا ربنا معاكوا لو فى اى حاجه هكلمكم على طول
همام / تمام
همام و قاسم يركبوا العربيه همام يسوق
قاسم / مش فاهم انا احنا جايين نحمى البلد مع رجالتها و لا نتفسح و نعمل سفارى و نشوى لحمه و نغير جو ايه الهبل ده ما كنت شوفت اكل عيشي بقي
همام / هو انت مش ملاحظ حاجه غريبه
قاسم / ملاحظ ان اللى بنعمله غلط و مش منطقى
همام / يعني مش ملاحظ انك بقيت عصبى من ساعه ما شميت الدخان ... اهدى انت مش بتتصرف بطبيعتك
قاسم يبص لهمام
همام / لما بتبقي عارف اللى بيحصل فى جسمك بيبقي سهل تفهمه و تسيطر عليه ... جو الجبل نضيف و مفيهوش القرف ده عشان كدا الرجاله بتتقسم جزء يحرس الجبل و جزء ينزل و بيبدلوا و غالبا المتجوزين هم اللى بيبقوا فى قلب البلد من جوه
قاسم / يا سلام
همام / هنتكلم تانى لما نطلع الجبل
قاسم يشوح بايده مش فارقه
....................
فى المسجد
عباده / يعني لو الجوازه واقفه على فلوس محلوله يا جماعه و يا بخت من وفق راسين فى الحلال خلينا ننجز انا متكفل بجهازهم بالكامل نقطه منى
مغاورى / و لو الموضوع كان واقف على الشقه ... فايجار شقتهم سنه مقدم عندى انا
شاهين / و لو عنده الشقه و واقفه على التوضيب عليا
مغاورى يطبطب على ضهر ابنه بفخر
عباده / لو كلنا حطينا ايدينا فى ايد بعض هنقدر نواجه الملعونه دى و انت يا مولانا انت و كل مشايخنا ليكوا دور نكثف بقي دروس الدين و الذكر و الصلاه و الصوم ما هو مفيش حاجه هتقدر علي السم بتاعها غير كدا
مختار/ طب و العيال هتعمل فيهم ايه ؟
عباده / ما انا لسه قايل
مختار/ يعني عيل فى تالته اعدادى مثلا هيصوم قد ايه
عباده / عندك حل قوله ما لا نزول أنفاق عاجبك و لا مبادره الفرح الجماعى عاجبك اعمل ايه طيب عشان أعجبك
مغاورى يحمحم
مختار / انت عاجبنى من غير حاجه و ما قولتش ان المبادره دى فكره وحشه و انا قبل منك فيها بس اقصد اننا محتاجين نتكلم مع الناس و نوعيهم الناس هى اللى تقدر تنهى الموضوع من اساسه
الشيخ / و الناس فى ايدها ايه بس يا باشمهندس
مختار / الناس لازم تعرف ان فى سم بيترش و الناس هتعرف تتصرف كويس
شاهين / و لو خافوا و هاجوا على العربيات و اتغابوا على السواق هيقولوا احنا اللى سخناهم و احمد باشا ده مش سهل
مختار / انا ما قولتش كدا ... او مش بالظبط
عباده / امال تقصد ايه
مختار / احنا مش هنقول للناس كل حاجه بس هنخليهم فعلا يهيجوا على العربيات دى و يكسروها ... او ... نكسرهالهم احنا ... الاخبار هتوصل للمحافظه اننا مش عاوزين رش الناموس و كل ما يجيبوا عربيات جديده هندغدغها مش هنسمح لهم يرشوا السم ده تانى
الشيخ / طب انا اقدر اعمل ايه
عباده / مش اكتر من دورك يا مولانا مش اكتر من انك تتكلم مع الناس عن غض البصر و العفه و عقوبه الزنا و الفواحش و فضل الصلاه و الصيام ... يعني العادى بتاعك و اتكلم معاهم و اللفت نظرهم و زى ما قولنا هنعلن باذن الله عن المبادره و احنا جاهزين
الشيخ/ و ماله ما حدش يكره ... نستعين بالله و من بكره اتكلم مع الناس
.......................
فى الجبل
قاسم بيتكلم فى التليفون
قاسم / يعني قولتى له كدا فعلا
الست / هو كان ايه حصل اصلا لكل ده
قاسم/ فى انى بجرى بابنى رايح جاى على الدكتور قدامك اعالج حاجه انتوا اللى خبيتوها عليا 
الست / بقولك ايه يا قاسم حوارات التربيه الايجابيه بتاعتك انت و مراتك الله يرحمها دى مش هتقدر تمشيها على حريم السرايا كلهم ما حدش قصر مع ابنك و ده قدام عيني بس ابنك مدلع و انت عارف
قاسم / معاكوا حق ياما ابنى فعلا مدلع
الست / انا عارفه انه عيل و محتاج اهتمام و احنا اقسم بالله ما قصرنا معاه و اللى كان بيعوزه كنا بنعمله بس لو اتاخرنا عليه شويه كان بيتقمص و يرفض و لو كلمناه كان بيتعصب و يكسر ... عالم ربنا ان ما حد فينا مد ايده عليه و لا وجه له كلمه و كنا بيستحمل الجنونه بتاعته و نقول عيل و عشان خاطرك و عشان خاطر المرحومه امه
قاسم / حقك عليا ياما انا الغلطان مش انتى
الست / اعز الولد ولد الولد يا قاسم يعني ابنك اغلى عندى منك و ربنا يشهد
قاسم/ عارف ياما عارف ... عرفت المشكله و ربنا يقدرني و الاقى العلاج
الست / يعني ناوى تعمل ايه ؟
قاسم / ادعيلي بس و باذن الله ربنا يسهلها لى
الست / ربنا ينور بصيرتك و يوفقك و يوقف لك ولاد الحلال يارب
قاسم / امين ياما ... بقولك يا ست الكل بعد اذنك ممكن ما تتكلميش مع مازن او اى حد فى السرايا فى الكلام ده مش عاوز مازن يعرف انى عرفت الكلام ده
الست / احسن برده
قاسم / تمام يا امى هستاذنك عشان الرجاله بتشاور لى
الست/ ربنا يحفظك يا ضنايا
قاسم/ تسلمى يا اما تسلمى
قاسم يقفل همام يدخل
همام / ها هديت لما ولعتها
قاسم يبص لهمام
همام / هو ده اللى اتعامل بهدوء
قاسم / تضمن منين ان احلام تفضل تعامله كويس لو اتجوزتها
همام يبص حواليه يتأكد ان ما حدش سامع
همام / الحاجات دى ما ينفعش تتكلم فيها كدا
قاسم / ما هى من حقها تخلف هى كمان تفتكر هتعدل بينهم هعمل ايه ساعتها ... تفتكر انا بفكر بعقل اصلا فى حوار الجواز و لا ده بسبب السم اللى شميناه
همام / كلو وارد بس جوازك كان هيحصل هيحصل و هى مش هتلاقي احسن منها بس هو السؤال الأهم هى اساسا هتقبل بيك ؟
قاسم / و انا ناقصني ايه ؟
همام / و هى تعرفك منين و لا يعني هو انت فاكر نفسك مين عشان ما تترفضش ... احسن منك و اتمرمطوا على فكره
همام يشاور على نفسه قاسم يضحك
همام / اهدى كدا و فكر فيها بشويش و اتكلم مع امين و قوله انك عاوز تقابل احلام و اتكلم معاها
قاسم / يا عم انت فاكر نفسك فى بحرى
همام / بحرى قبلى الشرع واضح و صريح و ده حقك من حقك تتعرف عليها و تتكلم معاها و تعرفها ... الاول مثلا انك عاوز تشوف حوار مازن ده و تسمع منها الكلام بالظبط طبعا القاعده دى فى وجود امين  ... ركز انت بقي معاها حسيت بقبول توكل على الله و فاتحه و اطلب رؤيه تانيه و اتكلم معاها اكتر واللى له نصيب فى حاجه هينولها
قاسم/ و لو ما ليش نصيب
همام / وقتها ربك يفرجها احنا قاعدين هنا حبه مشي امورك و اهو
قاسم يهز راسه و هو بيفكر
....................
فى شقه نسمه
ام نسمه / يا ستى انا اتكلمت معاه و نهينا الموضوع ده خالص هو بس كان خايف عليكي مش اكتر
نسمه تهز راسها
ام نسمه / ابوكى مش عاوز حاجه من الدنيا غير سلامتك و سعادتك و كل اللى عمله و بيعمله و هيعمله عشانك و بعدين يا كبدى انتى ام و عارفه غلاوه الضنا يعني المفروض فهماه
نسمه / تمام ياما حصل خير
ام نسمه / عوزاكى بقي تراضي ابوكى ما تصغريهوش
نسمه / حاضر ياما
ام نسمه / حضر لك الخير يا ضنايا ربنا يهديكي كدا ايوه كدا ربنا يكملك بعقلك
نسمه تبتسم و تبص على عيالها و ترجع تبص لأمها و مش مرتاحه
......................
فى مكتبه كتب
مهره بتلف بين الرفوف تبص على الكتب و تقلب فيها تسحب كتاب و تروح تقعد على ترابيزه تقرأ حاتم يقعد قدامها تتفاجئ
حاتم / ما تقوليش ان دى كمان صدفه؟!
مهره تشاور له الصوت يبتسم و يطلع موبايله و يكتب و يناولها الموبايل
حاتم / انتى بتيجي هنا كتير ؟
مهره تكتب / من و انا صغيره ده مكانى المفضل بعد الفروسيه
مهره تدى لحاتم الموبايل يقرأ و يبتسم و يكتب
حاتم / قولت من الاول انك مختلفه انا باجي هنا بس لما بكون عاوز ابعد عن الزحمه و اقعد فى هدوء عشان افكر
حاتم يوريها الموبايل و يسحبه تانى و يكمل كتابه
حاتم / بصراحه ده المكان الوحيد اللى ببقي فيه لوحدى لان مستحيل اى حد من الشله يدخل مكان زى ده او يستحمل يقعد فى هدوء
حاتم يخليها تقرأ تبتسم يكمل كتابه
حاتم / كنت جاى افكر فى موضوع لقيت الموضوع هنا تفتكرى دى علامه ؟
حاتم يوريها الموبايل يبان انها مش فاهمه يسحب الموبايل
حاتم/ تحبى نروح مكان تانى نتكلم شويه ؟
حاتم يديها الموبايل تكتب
مهره / انا اسفه جدا بس انا كنت محتاجه اقرا الكتاب ده جدا
حاتم يقرأ و يكتب
حاتم / احنا ممكن نستعيره او نشتريه عادى و تقريه فى البيت و ممكن برده تحمليه بى دى اف مش هتفرق ... الا لو كنتى مش عاوزه تقعدى معايا بقي ساعتها فى كلام تانى
حاتم يديها الموبايل تقرأ و يبان على وشها الاحراج و تبص له و تكتب و تفضل تكتب و تمسح و تكتب و تمسح
حاتم / هو الموضوع صعب اوى كدا؟!
مهره تناوله الموبايل يقرا و يبتسم
مهره / الموضوع ما لوش علاقه بيك بس انا كمان باجى هنا عشان اهرب من الزحمه و الناس و اقعد فى هدوء و دا اللى انا محتاجاه دلوقت ممكن مره تانيه فى وقت تانى فى ظروف تانيه
حاتم / هعتبر ده وعد ... عن اذنك
حاتم يقوم و يمشي و يلف يبص عليها يلاقيها بتقرا فى الكتاب يبتسم و يمشي
...........................
فى جنينه الزنايته
امين / و الله مش عارف اقول لك ايه
همام / هو الرأى مش رايها برده و لا ايه يا عم امين ما تسالها ما يمكن توافق
امين / هتوافق على واحد عاوز يتجوزها بس عشان خاطر ابنه دا كلام
همام / و ليه تحسبها كدا و بعدين هو الجواز ايه غير قبول و جواب و احنا بقالنا فتره بنزن عليه و هو ابدا ما فيش غير الانسه احلام هى اللى غيرت رايه ان فعلا ممكن يلاقى له زوجه بنت ناس تصونه و تراعى ربنا فى ابنه و دخل البيت من بابه نعمل ايه احنا بقي ؟! نقعدهم مع بعض يتعرفوا و ياخدوا و يدوا مع بعض حصل قبول كان بها ما حصلش ... خلاص
امين / انت كلامك ما فيهوش غلطه يا همام بس الحاجات دى ما عادتش بتيجي كدا و خصوصا ان احلام ليها ظروف خاصه
همام / و قاسم كمان ليه ظروف و عشان كدا بقترح اننا نرتب قاعده كدا بينهم وسطينا قال يعني بيتكلموا عن حوار مازن و اللى هى عرفته و ازاى قدرت تحتويه و يعمل ايه و اهو ... و بعدين تكلمها حضرتك بقي و تشوف ان كان فى قبول و لا لا ... هو بصراحه انا كنت ناوى اطلب انه يكلمها و نعمل الحوار ده و بعدين افاتحكوا بس لما فكرت فيها استعيبتها اصل هيحصل ايه لما اجي و اصارحك و نرتب الدنيا انا و انت و تبقي كل حاجه على نور
امين يتنهد
همام / جرا ايه يا عم امين انت مش عاوز تفرح و لا ايه ... و لا نكون مش قد المقام و لا حاجه
امين / انت هتركبنى العيبه و لا ايه
همام / على فكره لو مقلق من قاسم فانا اضمنهولك برقبتى يمين بالله راجل يعجبك و هيصونها و هتعيش ملكه معززه مكرمه و ليك منى كلمه شرف ما حد هيدوس لها على خاطر فى بيتنا ابدا
امين / انا متاكد بس الحاجات دى 
همام / رتب القاعده و بلغها بس ان قاسم عاوز يتكلم معاها عن مازن و يسالها عن حاجات وش لوش و سيب الباقي على ربنا و اديك هتكون موجود معاها و شوف الدنيا ... مشيت يبقي خير حسيت بحاجه نبقي اهل و حبايب و كل شئ قسمه و نصيب قولت ايه ؟
امين/ انا شخصيا ما عنديش مشكله بس انا فى الحاجات دى احب اشور خالى و الكبير و اخوها برده ليه رأي
همام / حلو اوى يعني النهرده بالليل باذن الله تكون ادتنى رد 
امين / جرا ايه يا همام
همام / خلينا نفرح بقي يا عم امين الله !!!
امين يضحك و يهز راسه موافق
همام / ايوه بقي ما يجيبها الا رجالها بصحيح
....................
فى اوضه مهره
صوفيا / بيقولوا عموا اتخانق خناقه كبيره اوى مع الراجل اللى عمران بعته و طرده و باتى اعتذرت له بس واضح اننا محتاجين حد شخصيته اقوى من كدا يقف قصاد عمو ... بصراحه انا كنت متوقعه اكتر من كدا من عمران ... بس اتز اوك اكيد هو مش فاضي دلوقت ... امتحاناته و كدا ... انا سمعت انه كان عامل اختراع كدا زمان كرسي متحرك حاجه كدا ... انا عمرى ما نظرتى فى الناس طلعت اوت ... انا بكلمك على فكره
مهره تبتسم
صوفيا / مالك فى ايه ؟ صحيح مش حاتم كلمنى ... كان بيسالنى عنك على فكره
مهره تستغرب
صوفيا / اصل حاتم متعقد من كتر البنات اللى بيجروا وراه عشان فلوسه و نفوذه بس بمجرد ما بيقربوا منه بقي حقيقتهم بتبان فهو لما قابلك صدفه كذا مره ... افتكرك بتطارديه  .. ما يعرفش انكوا نيردز زى بعض ههههههههههههه
مهره تكتب
مهره / لو هو غنى و له نفوذ اوى كدا ما تكلميه فى موضوع عمك
صوفيا / مش عارفه ممكن يقول ايه بس هو و عمو فى بينهم بيزنس كبير اوى من سنين ما اعتقدش انه هيقبل يقف قصاده و يخسره
مهره تكتب / لو ما وقفش مع الحق يبقي وحش
صوفيا/ انتى لسه فى الدنيا البينك دى حبيبتي الدنيا مش بتمشي كدا هو مش هيجي علينا بس هيقول اهل فى بعض
مهره تعوج بقها مش عاجبها الكلام
صوفيا/ عارفه انتى انا بفكر فى ايه ؟
مهره تنتبه
صوفيا / اقنع باتى تقرب منه هو سينجل دلوقت ... ساعتها هيدخل و هيحط كل واحد عند حده و عمى هو اللى هيخاف على مصالحه ... ايه رايك
مهره تهز راسها ما اعرفش
صوفيا / انتى تعرفى حاتم ده عنده فلوس قد ايه
مهره تبتسم بسخريه و تبص الناحيه التانيه
صوفيا / انا سمعت ان عمران برده من عيله غنيه اوى بس حساهم بخلا كدا و الموضوع ده مخوفنى اوى
مهره تهز راسها لا باصرار و تكتب
مهره/ دول كرما جدا
صوفيا / امال ليه لبسهم كدا و حياتهم كدا
مهره تكتب / ماله لبسهم و حياتهم عندهم كل حاجه احسن حاجه بس هم بيحبوا الحاجات تكون سيمبل
صوفيا / تفتكرى
مهره تهز راسها اه صوفيا تفكر
.......................
فى المضيفه
همام / انت غريب جدا انت مش لسه قايل مرتاح
قاسم / ايوه بس خايف ... دا ابنى الوحيد يا همام
همام / يا حبيبي دى بنت ناس و عارفه ربنا عمرها ما هتاذى ابنك و بعدين هى يعني وافقت عليك عشان تفكر هتعمل ايه فى ابنك بعد الجواز و الخلفه
قاسم يتنهد
همام / ابنك فين يا قاسم من يوم ما جينا بيجى يسلم عليك و يديك بوسه و يجرى على اوضتها ... بتقولك ما عملش على روحه و قومته دخل الحمام و هادى لا بيتخانق و لا بيكسر انت عاوز لابنك اكتر من كدا ايه ؟
قاسم/ مش عاوز
همام / خلاص بكره الصبح تكلم اخوها
قاسم / باذن الله
همام / اشهد ان لا اله الا الله اخيرا
قاسم/ انت زنان جدا على فكره
همام / بس يلا
قاسم يضحك
......................
فى سرايا الزنايته
جابر يحط شنطه على الارض و خديجه بتحضن نجاه
خديجه/ السرايا ما كانلهاش حس من غيرك
نجاه / تسلمى
خديجه / كل حاجه هاديه لا فى خناقات و لا مشاكل و لا خساير
جابر يضحك
نجاه / تسلمى يا ست الكل ... امال ابويا فين
خديجه / زمانه جاى على ما تتشطفى يكون وصل
جابر / سيبك انتى من كل ده يا عمتى و طمنيني الاكل اخباره ايه حبيبك واقع
نجاه / احنا مش لسه واكلين سندوتشات فى الطريق
جابر / بالله عليكي دا اسمه اكل
خديجه / فشر دا انا عملالك شويه ملوخية بشربه البط انما ايه تاكل صوابعك وراها
جابر / احبك
خديجه / لا و خد عندك الحلو
نجاه/ لا دا انا اطلع اتشطف بقي قبل ما تجوعونى
نجاه تاخد الشنطه و تطلع تجرى
جابر / سيبك منها دلوقت تنزل تجرى تقول فين منابى ... خشي عليا بالحلو خشي
خديجه / سيبك من الاكل الحلو الحقيقي حاجه تانيه
جابر / خير
خديجه / قاسم الزيني ... فاتح اخوك و طلب ايد اختك احلام
جابر / ازاى يعني
خديجه/ و ماله قاسم ناقصه ايه ؟
جابر / ما نقصوش بس ما يعرفهاش شافها امتى و ازاى
خديجه / ما انت عارف ان ابنه متعلق بيها قعد معاها و اتكلموا و بيقولوا ارتاح و قرر يتقدم رسمي
جابر / عاوز يتجوز داده يعني ... لا شكرا ما عندناش بنات للجواز
خديجه / ليه بس يا جابر دا الكل شايف غير كدا خالص
جابر / و هى شايفه ايه ؟
خديجه/ قاعدين بيكلموها فوق اهو
جابر / طب كويس هطلع اشوف بيقولوا ايه بقي
خديجه / طب بالله عليك خدها على الهادى قاسم ابن حلال و سمعته طيبه و حتى ابنه نسمه و يتحب
جابر يبتسم و يطلع على فوق يروح اوضه احلام يلاقى نجاه قاعده جنبها
نجاه / بس دا مش سبب ترفضي عشانه
احلام / شوفوا مين بيتكلم
نجاه / اه ارفضي عشان مفيش قبول مش بتحبيه مش مرتاحه للجواز انما عشان هتعيشي فى اسكندريه ... مالها اسكندريه يعني
ام احلام / قولي لها
امين / و بعدين الطريق ما عادش صعب زى زمان يعني هتيجي تزورينا و نيجي نزورك كل شويه
احلام / هو انا تقيله عليكوا اوى كدا عاوزين تخلصوا منى
جابر / فشر حالا انزل اقوله كل شئ قسمه و نصيب و نفضها سيره انا اساسا بتلكك
امين /و بتتلكك ليه بقي ان شاء الله
جابر / عشان هو عاوز داده لابنه مش زوجه
ام احلام / ردى يا اختى
احلام / ارد اقول ايه
ام احلام / واد سكر يا ماما عيل يدخل القلب بضايق اوى لما بفتكر انه هيمشي و يرجع اسكندريه اتعلقت بيه اوى ... كلام مين ده يا بت
جابر / ماشي كلنا اتعلقنا بالواد و بنحبه اروح اتجوز قاسم يعني و لا اعمل ايه
نجاه / ممكن تهدى الحاجات دى ما بتتحلش كدا
جابر / امال بتنحل ازاى
احلام / نفسي اعرف
نجاه / تانى لازم تقعدى معاه و لو حصل قبول يبقي خير و بركه ما حصلش لا يكلف الله نفسا إلا وسعها
احلام / و اعمل كدا ليه أن كنت رافضه المبدا
جابر / يعني انتى لو هو عايش هنا فى البلد الدنيا ماشيه معاكى عادى
احلام / لا بس
ام احلام/ هو ايه اللى لا بس
امين/ جرا ايه ياما اهدى الحاجات دى ما ينفعش فيها سربعه
احلام / لو قاعد هنا فى البلد ممكن ساعتها اقعد معاه و اشوف حكايه القبول بتاعه ست نجاه دى
جابر / سهله نقوله و نشوف شارى و لا بايع
امين / هو تعجيز و خلاص
جابر / اختنا فى حضننا و صغيره و حلوه و على يدك بيجي لها بدل العريس الف و احنا اللى بنتامر و بنرفض اشمعن قاسم بقي اللى كلكوا هتموتوا عليه اوى كدا
امين / اولا زيني .. ثانيا مستواه كويس و هيعيشها فى نفس المستوى بتاعنا مش اقل
جابر / بجد !!
امين / مش هيطمع فى فلوسها و لا ورثها
جابر / مش مصدق انك بتفكر كدا
ام احلام / و ليه لا ما دا طبيعي واحد متدين و أخلاقه كويسه و من عيله و ربنا فاتحها عليه انت بقي شايف ان ده يترفض
جابر / احسن منه و مذلول و مش لاقى ريق حلو
امين/ اهلا
الكل يبص لنجاه
نجاه / الله و انا مالى انتوا حشرتونى فى الموضوع ليه
جابر / اهو ... عادى ما حصلش حاجه يتحايل علينا شويه نقوله شرطها و نشوف رد فعله شارى و لا بايع
ام احلام / و ربنا ما كنت خايفه الا منك انت عشان كدا قولت نقنعها قبل ما تنط لنا فيها
جابر / كتر خيرك يا ست الكل... شايفه يا ست هانم ادى أخرتها بقيت انا الوحش
احلام / دا انت زينه الرجاله كلها
امين / و ماله و ماله اشبعوا ببعض اما انزل اتكلم مع الراجل اشوف مايته ايه
جابر / هاجى معاك
امين/ بلاش انت يا حريقه انت راجع من السفر تعبان انا هحلها
نجاه / و انت فاكره مش هيعرف يحلها و لا ايه طب دا انا عندى تسريبات مؤكده ان ده كبيرنا خلاص مساله وقت مش اكتر
جابر / ربنا يبارك فى عمر الكبير و صحته انا نازل
جابر و امين ينزلوا
احلام / و انتى قدرتى تتقبلى الموضوع ده عادى
نجاه / الصراحه ما قبلتوش ... بس رايي لا هيقدم و لا هياخر ابويا ليه نظره و اكيد نظره فى محله .... ربنا يولى من يصلح ... انا هنزل اشوف بيقولوا ايه
ام احلام / عيب يا نجاه دى قاعده رجاله
نجاه / الله !! ما دا يعني مكانى عادى ايه اللى جد
نجاه تجرى على تحت و ام احلام بتخبط كف على كف
.................
فى وسط البلد
يافطه الإعلانات تطفى و تعرض شاشه سوده فيها تايمر تنازلى بالايام و و الساعات و الدقايق و الثواني و مكتوب فوق العداد باللون الأحمر
Get ready for the fireworks
( استعدوا للألعاب الناريه )
و الناس معديه رايح جاى تبص على اليافطه و يبصوا لبعض
..........................
فى المضيفه
قاسم / بس انا شغلى فى اسكندريه
همام / و يبقالك شغل هنا ايه اللى يمنع يعني 
قاسم يبص لهمام
همام / تشترى حته ارض محترمه على النيل تفتح عليها اكبر مطعم أسماك فى مصر و انا متاكد انك هتولعها هنا
قاسم / موافق بس انا كمان ليا شرط
جابر / حقك
قاسم / زى ما هبقي بين هنا و هناك هى كمان بين هنا و هناك و نفس الطياره اللى قصرت المسافات عليا تقصرها عليها
نجاه / ما اعتقدش هترفض
قاسم / و ليا شرط تانى
همام يبص له باستغراب
قاسم / انا مش هقعد فى السرايا هنا ... هجيب مكان محترم و تفرشه على كيف كيفها نعيش فيه سوا
نجاه / طب و انت فى شغلك ينفع تيجي تقعد معانا بدل ما تقعد لوحدها؟
قاسم/ بكيف كيفها هوصلها و ارجع اخدها
نجاه / هطلع ابلغها
جابر / ثوانى
نجاه تبص له
جابر / طب لنفرض انها لاى سبب ما قالت مش عاوزه او مش قادره اسافر معاك يجرا حاجه لو سافرت لوحدك يومين تلاته و هى عندنا هنا لحد ما ترجع لها بالسلامه زى ما همام كدا قاعد وسطينا و سايب بيته هناك؟
قاسم يفكر
همام / عادى على فكره ما فيهاش حاجه و بعدين هى لما تختلط بينا هتحبنا و نحبها و هى اللى هتختار بحرى طب دا السرايا عندنا هواها يرد الروح
جابر / اكيد بس عشان نبقي على نور من اولها
قاسم/ انا امى هناك ما اقدرش اسيبها و مش هقدر اجيبها هنا ... زى ما احلام عاوزه تبقي جنب اهلها و دا حقها أمى كمان من حقها تشوف و تقعد مع حفيدها و مرات ابنها
جابر / احلام بنت أصول و لو امك احتاجت حاجه هتلاقى احلام قبل منك عندها
قاسم / انا متاكد و أمى كدا كدا مش هتحتاج حاجه و عندها بدل اللى يخدمها و يشوف طلباتها الف بس انا بتكلم عن حاجه تانيه ... بتكلم عن الونس و المه و الحاجات دى
نجاه / انا هطلع اقول الكلام ده لأحلام
همام / طب احنا ما ينفعش يعني نخليهم يقعدوا مع بعض يتكلموا منهم لبعض انا متاكد انهم هيتفقوا اكتر كدا
نجاه تبص لأمين باصص لجابر
جابر / اطلعى قوليلهم و شوفى هيقولوا ايه
نجاه / حاضر
جابر / هو خالى فين صحيح
........................
فى جنينه الموالح
عباده قاعد مع شاهين و مختار و مغاورى و فارس و كارم و دياب
مختار/ ما احنا مش هينفع نطول فى القاعده دى  اكتر من كدا يا ناخد قرار دلوقت يا نقوم نشوف الحوار التانى اللى داير فى السرايا
مغاورى / حوار ايه ؟
عباده / عريس لأحلام
مغاورى / على البركه باذن الله
عباده/ انا برده مش مرتاح لفكره ردم الإنفاق دى
شاهين / و لا انا
مختار / يا جماعه فى عد تنازلى شغال و احنا قاعدين ما بنعملش حاجه هنستنى لامتى
مغاورى / طب ايه رايكوا نغرقها بالمايه
دياب / هنحتاج مايه كتير جدا و مش عارف ان كانت المايه دى هتفيد و لا هتضر كان جابر اللى يقدر يفيد فى الحوار ده
مختار / كلمه فى التليفون اسأله
دياب يهز راسه و يقوم يقف فى جنب بيتكلم فى التليفون
مختار / اصلا حتى لو غرقناها ما هيجي وقت و هتنشف و لا يمكن يسحبوا المايه من الناحيه التانيه
عباده / اللى احنا مش عارفينها
مختار / و ما يفرقش معانا نعرف على فكره احنا لينا بالبلد نفسها
دياب يرجع
دياب/ بيقول مش هنعرف اصلا و ان المايه دى ممكن تسرب و تعمل انهيار فى التربه فى المناطق الضعيفه و كلام كتير ما فهمتوش خلاصته بلاشها
مختار / رجعنا لنقطه الصفر يا نسيبها يا نسدها
الكل يبص لعباده
عباده / سدها
مختار يقوم يبوس راس عباده
مختار / اخيرا ... اخيرا ربنا نور بصيرتك و هديت
عباده / اما نشوف اخرتها يا خويا
مختار / اخرتها خير بإذن الله ... نقوم بقي نعمل اى منظر قدام الجماعه شكلنا بقي عره
مغاورى / طب ما شوفناش هنحتاج ايه لحكايه السد دى
دياب / دى شغله جابر بقي هو اللى هينفذ هو و جماعته و اللى يطلبه هنوفرهوله
شاهين واقف وسطيهم مضايق
....................
فى المضيفه
قاسم قاعد و احلام قاعده الناحيه التانيه خالص و الباب مفتوح و الاتنين مش بيتكلموا و بيبصوا لبعض و احلام كل شويه تبص بره اخواتها واقفين عينهم عليها
قاسم / انا مش شاطر فى فتح المواضيع
احلام/ و انا ما عنديش غير سؤال واحد
قاسم / طب ما تساليه
احلام / حوار الجواز ده جه فى دماغك بسبب البتاع اللى بيقولوا عليه ؟
قاسم / بتاع ايه
احلام / سمعتهم بيتكلموا عن رش بيخلى الناس عاوزه تتجوز
.......................