الكبيره ٢ بقلم / لولو_محمد

الحلقه ١١٧

(((((( الكبيره ٢))))))
#لولو_محمد
الحلقه ١١٧
نجاه / هتسافر لوحدها ؟!
جابر / امى و امين و جماعته هيروحوا معاها
نجاه / و انت
جابر يهز راسه لا
نجاه / بتهزر
جابر / انتى عارفه احنا داخلين على ايه صح
نجاه تتنهد
جابر / توقيت الفرح فى نفس يوم الافتتاح ... بصراحه خايف مش مرتاح
نجاه / احنا كتير يا جابر اللهم بارك يعني ما تقلقش
جابر / و هم ؟! قليلين ... دى جايه برجليها وسطينا يعني اكيد مش جايه بايدها فاضيه
نجاه/ و يونس كمان مش هنا
جابر / و هيفرق فى ايه يعني سي يونس
نجاه / ما اعتقدش انها ممكن تاذيه دا غير انه يعرف عنها كتير يعني اكيد كان هيساعد فى حاجه
جابر / احب افكرك انه فى صفها هى
نجاه / مش حقيقي
جابر / يا سلام
نجاه / هى غاليه عنده لأنها اخته بس هو فى صفنا احنا دلوقت
جابر / انتى جايبه البراءه دى منين
نجاه / انا عرفاه كويس
.........................
جابر / حقيقي !! من امتى بقي ... اذا كان هو مش عارف نفسه انتى هتعرفيه
نجاه / انا مؤمنه انه اتغير و بيحاول
جابر / تمام ... نغير الموضوع لو سمحتى
نجاه / هو فين دلوقت معانا و لا معاها ؟!  معانا ... تعبان؟! اه تعبان ... بيعمل ايه بيرتاح؟! لا بيساعدنا ... اهدى عنه بقي هو مش عدوك على فكره
جابر / لا مش عدوى ... بس فى نفس الوقت مش حبيبي
نجاه / حقك ... بس ... نغير الموضوع احسن ؟!
جابر / يا ريت
الاتنين كل واحد يبص فى مكان نجاه تبص لجابر باين جدا انه مضايق
نجاه / مش انا جبت لى فستان
جابر يبص لها
نجاه / انا ما بحبش الفساتين و انت عارف بس يعني قولت اغير ... و بصراحه شكله كان حلو اوى
جابر يبتسم
نجاه / واضح ان فى حته صغيره لسه جوايا مستخبيه من فطره الانوثه اللى بيقولوا عليها دى حب الزينه و كدا
جابر يضحك و يبص الناحيه التانيه
نجاه / ما هو عشان كدا ما بتكلمش فى الكلام ده و لا بحب حد يشوفني كدا ... عشان دا اللى باخده... بتضحكوا عليا
جابر / بس انا ما كنتش بضحك عشان انتى بتحبى الزينه انا بضحك انك لسه مكتشفه ده دلوقت ... فاكره و انتى صغيره لما كنتى بتلبسي فساتين منفوشه فى العيد و تسيبي شعرك
نجاه / و كنتوا بتضحكوا عليا برده
جابر / مين؟! انا ؟! عمرى
نجاه / يا سلام طب فاكر لما اخدت الشنطه بتاعتى و خبيتها و خلتنى الف عليها اليوم كله
جابر / ايوه طبعا فاكر ... بس دا كان عشان نقضي وقت أطول سوا و احنا بندور مش عشان شكلك كان وحش او يضحك
نجاه / طول عمرك رخم ... دا انا كنت هتقهر يوميها ابويا اللى كان شاريلى الشنطه دى و كنت خايفه اقوله انى ضيعتها يزعل فى العيد و انت واقف تتفرج عليا و ساكت... كنت عيل غتت
جابر/ غتت بس جدع ... ما سبتكيش و فضلت ادور معاكى عليها
نجاه / يا سلام دا انت ما طلعتهاش الا لما عيطت
جابر / لا لا لحظه انا طلعتها عشان ما استحملتش اشوف دموعك مش عشان كنت عاوز ابقي السبب فيها انا كنت عاوزك تلعبى معايا لوحدى بس
نجاه / يا سلام
جابر / و حصل و ما روحتيش قولتى لاى حد يساعدك غيرى و لولا اننا اتخانقنا لما قولت لك الحقيقه ما كانش حد عرف بالحوار ده غيرنا احنا الاتنين حصل و لا لا
نجاه تبص الناحيه التانيه
جابر / من و احنا عيال ما بترتاحيش مع غيرى و ما بتثقيش فى حد قدى
نجاه / نوعا ما و مازلت
جابر / طب كويس انك واخده بالك ... لسه فى فرصه نخلى الفرح فرحين على فكره
نجاه / انت كمان ما اتغيرتش لساك غتت برده ... ايه الفصلان ده بس يا ربى
نجاه تسيب جابر و تدخل و هو بيضحك
..........................
فى المستشفي
جوزيف / يعني تقدر تخرج ؟
الدكتور/ ايوه و مره تانيه تاخدى بالك ... الف مليون حمد الله على سلامتك
مهره تبتسم للدكتور بتعب الدكتور يمشي جوزيف يكلم مهره بالاشاره
جوزيف / ناويه تكملى لامتى
مهره تستغرب جوزيف يتكلم
جوزيف/ ناويه تكملى فى الهبل ده لامتى
مهره تبص الناحيه التانيه و تتنهد
جوزيف / انتى عارفه ان امك بتكدب عليكي صح ؟ انتى عارفه انه كان عارف انك ما بتعرفيش تعومى و رماكى و شافك بتغرقى و ما نطش وراكى ... لا امك و لا اخواتك نطوا وراكى و لا رمولك عوامه حتى
مهره تبص له
جوزيف / على فكره انا فاهمك جدا ... الواحد مستعد يرمى نفسه فى النار عشان يكون ليه اهل ... بس على الاقل يحس ان الاهل دول مؤمنين بيه ... لو حتى واحد بس منهم يحاول عشانه
مهره تشاور
مهره/ انا هتكلم معاهم فى اللى حصل و هنهى الموضوع ده النهرده باى شكل
جوزيف يطلع الموبايل و يلعب فيه
جوزيف / لسه عندك امل فيهم يعني ... مفيش مشكله على العموم هم فى المستشفي هسمح لهم يدخلوا و اتعاملى ... انا هبقي جنبك الفتره الجايه عشان بنحاول نبعد عمران عن الصوره بس الحقيقه هو رافض يرجع البلد من غيرك
مهره تبص فى الارض و ترجع تبص له
مهره / دى امى ... ممكن تكون مش بتحبنى قد اخواتى... بس مش هتاذيني ... مش عن قصد ... بعد اللى حصل النهرده اكيد هتاخد موقف
جوزيف / حساب امك فى البنك فيه فلوس كتير جدا مستحيل تكون ماضيه شيكات لحاتم
مهره تشاور / حساب مشترك و لازم امضه اكرم
جوزيف / امك كذابه ... و اقدر اثبت لك ده لو عاوزه ... انا ما اعرفش ايه مصلحتها فى كل ده بس فى حاجه امك مخبياها عليكي
الباب يتفتح و كارمن و البنات يدخلوا بيجروا و حاتم وراهم
كارمن/ حبيبتي متنا من الرعب عليكي ... انت اللى انقذتها !! حقيقي مش عارفه اشكرك ازاى بجد ... انا مش عارفه اقول لك ايه و لا اشرح اللى حصل ازاى بس هو اكيد ما كانش مقصود
حاتم / على فكره انا كنت هنط وراها بس انت سبقتنى
جوزيف يمد ايده لحاتم
جوزيف / يوسف المصرى
حاتم يسلم
حاتم / حاتم شركس
جوزيف / سعيد انى اتعرفت عليكوا و سعيد اكتر انكوا جيتوا فى الوقت المناسب الدكتور كتب ليها خروج و اتمنى نتقابل تانى فى ظروف احسن من كدا ... عن اذنكوا
جوزيف يمشي كارمن تجرى على مهره و تمسك ايديها و بياتريس تطلع ورا جوزيف
بياتريس / استاذ يوسف ... استاذ يوسف
جوزيف يبص لها
بياتريس / انا بياتريس اخت مهره ... انا مش عارفه اشكر حضرتك ازاى احنا كنا هنموت من القلق عليها و اتصلنا بكل المستشفيات و من اول ما نزلنا من اليخت و احنا بنلف على المستشفيات بجد انا مش عارفه اشكرك ازاى انك انقذتها و فضلت جنبها لحد ما جينا
جوزيف / حمد الله على سلامتها انا ما عملتش حاجه
بياتريس/ طب قولى اقدر ارد جميلك ده ازاى
جوزيف/ لما نتقابل تانى هبقي اقول لك ... هستاذنك
جوزيف يمشي بياتريس تدخل الاوضه
حاتم / اكيد ما كنتش ناوى اقتلك يعني ما تافوريش اوى كدا كنت هنط وراكى
مهره تكتب / انت مكانك مستشفي المجانين على فكره
كارمن / اهدى يا مهره عيب كدا
مهره تكتب / احنا محتاجين نتكلم لوحدنا
كارمن تبص فى الارض و تبص لهم
كارمن / سيبونا لوحدنا لو سمحتوا
حاتم / هستناكم بره
حاتم يطلع
كارمن / و انتوا كمان يا بنات
صوفيا و بياتريس يبصوا لبعض و يطلعوا بره
كارمن / بقينا لوحدنا اتكلمى يا قلبي
مهره تكتب / كام المبلغ اللى عليكي لحاتم
كارمن / ليه ؟
مهره تكتب / هتصرف و اجيبه و أخرجه من حياتنا الانسان ده مريض و وجوده جنبنا خطر انا المرادى المره الجايه صوفي او باتى او يمكن حضرتك
كارمن / الموضوع سوء تفاهم مش اكتر هو كان هينط احنا اللى من توترنا من الموقف ارتبكنا و عطلناه
مهره تكتب/ كام المبلغ يا امى
كارمن / انسي يا حبيبتي انسي انا هحل الموضوع ده خلاص ... هرجع له الشبكه بتاعته و ننهى الموضوع ... هو انتى قولتى لعمران يرجعها و لا ايه
مهره تكتب / عمران ما سرقهاش
كارمن / يعني انا لو بلغت البوليس بالسرقه مش هتطلع بصماته فى اوضتك... السيكيوريتي شافه يا مهره مش المفروض تكابرى و تفضلى تكدبى عليا فى وشي اكتر من كدا ... مين اللى كان فى اوضتك
مهره تبص فى الارض
كارمن / خلاص اكلم البوليس و هو يعرف بطريقته
كارمن تيجي تقوم مهره تمسك ايدها
كارمن / كان عمران مش كدا
مهره تهز راسها اه
كارمن / طب واحد زى ده لما يسرقك هتطلبى منه فلوس ازاى
مهره تكتب / مش هو اللى سرق الطقم
كارمن / امال مين ؟ ... فى حد غيره دخل اوضتك
مهره تكتب / ما اعرفش يمكن حد دخل يمكن حد من اللى فى البيت
كارمن / دول معانا من سنين ما فيش قشايه نقصت من البيت... هيكون مين انا مثلا و لا اخواتك
مهره تهز كتفها ما اعرفش
كارمن / الواد ده مش كويس يا مهره صدقيني ... انا ما اعرفش ايه مصلحته من كل ده بس صدقيني الواد ده بيستغلك
مهره تكتب / انسي عمران و خلينا فى حاتم
كارمن/ انسي انتى حاتم و فهميني ايه اخره موضوع عمران ... يعني ايه يدخل اوضتك من الشباك فى انصاص الليالى كان عاوز منك ايه و ايه اللى جرأه عليكي كدا ... و يا ترى الموضوع ده كان بيحصل قبل كدا ؟
مهره تهز راسها لا و تكتب
مهره / اقسم بالله ما حصل
كارمن / عمران شاب كويس ؟
مهره تهز راسها اه
كارمن / و لسبب ما غلط و اتسبب لنفسه و ليكي فى سوء تفاهم بيحصل دا نفس الوضع مع حاتم
مهره تكتب / انا ما بحبوش
كارمن / رجعيله شبكته و انهى الموضوع
مهره تكتب / هعمل واحد زيه بالظبط و ارجعهوله
كارمن / اتفقنا و لحد ما تعملى كدا لو سمحتى لمى الدنيا معاه مش عاوزين الدنيا تعرف اللى عمران عمله
مهره تكتب / بس مش عمران اللى عمل كدا
كارمن / ما انا لو حاولت اعرف هضطر اكلم البوليس و ساعتها هيعرفوا ان عمران دخل اوضتك و هيتعرف الحل اننا نحل الموضوع ده فى السر بينا و بين بعض
مهره تبص فى الارض
كارمن / معاكى صوره للطقم
مهره تفكر و تهز راسها لا
كارمن / هشوف على موبايل حد من اخواتك ... تبقي مصيبه لو ما لقيناش ليه صوره هنطلع منه نسخه ازاى ساعتها
مهره تكتب / هقول له ضاع منى و ياخد تمنه اكيد هو عارف دفع فيه كام
كارمن / و ده كلام برده
مهره تهز راسها اه الباب يتفتح و حاتم يدخل
حاتم / انا اسف انى دخلت فجاه بس بصراحه راجعت نفسي و فعلا ليكي حق تزعلى بس صدقيني انا ما كنتش مخطط ان كل ده يحصل انا عامل كل ده عشانك اصلا
كارمن / كنت لسه بقول لها الكلام ده
حاتم / على العموم انا هصالحك و انا متاكد ان الموقف ده هنضحك عليه بعدين
كارمن / خلينا بس نروح دلوقت نرتاح و بعدين نبقي نشوف هنعمل ايه
كارمن تمسك ايد مهره
كارمن / بقولك صحيح يا حاتم معلش من باب الفضول بعد اذنك
حاتم / اؤمرى يا طنط خير
كارمن / هو الطقم اللى جبته لمهره كان بكام
حاتم / ايه السؤال ده
كارمن/ اصله عجبنى اوى و كنت عاوزه اجيب زيه لواحده حبيبتي
حاتم / هو للاسف مش هينفع لان الجاليرى اللى بتعامل معاه بيعمل الحاجات دى ليمتد اديشن ون بيس اونلى و بيبقي فى ضمان ان مش هيتم تكرارها و الا انا هقاضيه لو كررها و هو اكيد لو اكتشف ان فى حد تانى قلدها هيقاضيه هو كمان يعني مش هينفع بس اكيد هتلاقي عنده حاجات تانيه حلوه اكيد مش احلى من حاجه مهره بس مناسبه
كارمن / طب هو كان بكام
حاتم / لا مش فاكر لانى مش بركز فى الحاجات دى عجبنى اشتريته الموضوع بسيط انما التفاصيل دى مش احنا اللى نركز معاها اكيد
كارمن تبص لمهره
كارمن / تمام يا حبيبي ... يلا نروح بقي
حاتم / اكيد يلا
كارمن تسند مهره و يمشوا و مهره باين عليها الهم
.........................
فى شقه عمران
ناصر / دى واحده غاويه تشيل طين انت توحل نفسك معاها ليه
عمران/ هو انت ما بتعقلش ابدا
ناصر / و انت بعد اللى عملته للمره المليون ده جاى تكلمني انا عن العقل دا انت ضايع
جرس الباب يضرب
ناصر / انا هروح افتح
ناصر يطلع بره الاوضه يلاقي هند فتحت و فى راجل واقف و وراه ست
الراجل/ الست بتسأل عن سى عمران
هند / اهلا و سهلا اتفضلى
الست تدخل و ناصر مستغرب الست و هند يقعدوا عمران يطلع من جوه
الست / انا ولاء شغاله فى فيلا اكرم بيه الصردى
هند / اهلا و سهلا خير
ولاء / انا طبعا شغاله هناك من سنين و عارفه الاستاذ عمران و كنت دايما بسمع عنه كل خير و سمعت كمان انه جوز الست مهره و كدا
هند تبص لعمران
ناصر / خير يعني يا ست الكل اؤمرى ايه الموضوع
ولاء / الموضوع انى سمعتهم بيتكلموا عن ... هو انا اتكلم قدامهم عادى
هند تبص لهم الراجل ينزل و ناصر يقفل الباب و يدخل هو و عمران الاوضه
هند / بقينا لوحدنا
ولاء / بصراحه كدا انا بحب الست مهره اوى و ما بستحملش عليها الهوى و هم ناوين يجوزوها واحد استغفر الله و هى يا قلبي مش موافقه بس امها ضاغطه عليها و البت نسمه ما بتقولش لا و بعدين عرفوا ان الاستاذ عمران كان عندها فى الاوضه ... الشهاده لله انا لما عرفت قلبي انشرح و قولت اكيد بيحبها و عاوز يردها و اهو جحا اولى بلحم طوره فبدل يعني ما الموضوع يبقي سرقه كدا و تحصل مشاكل ليه و للست مهره ما يكلم الست كارمن و يطلبها رسمي و اهو احسن من اللى اسمه حاتم ده اكيد
هند / شكرا
ولاء / انا عارفه انى طلعت نزلت خدامه فى بيتهم بس اللى سمعته عنكم انكم ناس ولاد أصول و مرتاحين فأكيد الكلام منكوا هيبقي احسن منى و برده انا مش عارفه انا جايه اقول ايه ... انا محرجه منكوا اوى
هند/ ما تتكسفيش عادى كتر خيرك
ولاء / انا و الله بحب الست مهره اوى دونا عن البيت كله تحسيها مننا كدا ... انا ما اقصدتش حاجه و الله و لا انا بتاعه مشاكل انا غصب عنى
هند / انتى عرفتى العنوان منين صحيح ؟
ولاء / اللى يسأل ما يتوهش
هند / سألتى مين برده مش فاهمه
ولاء / سألت عبد الرحمن السواق
هند / و عبد الرحمن عرف عنوانا منين
ولاء / و الله ما اعرف انا سألته ان كان يعرف قالى اه و اداهونى و خلاص ... هو انا غلطت لما جيت و لا ايه ما تاخذينيش
هند / لا ما غلطتيش و لا حاجه انا بسأل بس ... تشربى ايه
ولاء / لو شويه مايه يبقي كتر خيرك انا المكرباص نزلنى بعيد و جيت الحته دى كلها مشي
هند / ثوانى حاضر
هند تقوم ولاء تبص يمين و شمال و تطلع كيس من شنطتها و تدفسها بين شلت الكنبه هند تطلع من جوه معاها الكبايه و قطعه كيك و كنزايه و تحطهم على الترابيزه ولاء تشرب شويه مايه و هى واقفه
هند / وقفتى ليه احنا لسه ما خلصناش كلامنا
ولاء / غصب عنى و الله انا واخده اذن ساعتين و يا دوب ارجع بدل ما يفتحوا عليا فاتوحه و يخصمولى اليوم
هند / تمام اللى يريحك هخلى حد من اللى تحت يوصلك عشان ما تتبهدليش فى المواصلات و انتى راجعه
ولاء / تسلمى ربنا يخليكي بس مش عاوزه اتعبكوا
هند / ازاى بعد كل ده ما يصحش
هند تتصل بالتليفون بحد
هند / وصل الست ولاء مكان ما تحب بعد اذنك ... تمام شكرا … مستنينك تحت
ولاء تبتسم هند توصلها لحد الباب ولاء تنزل هند تقفل الباب عمران و ناصر يخرجوا من الاوضه
عمران / خير فى ايه
هند / مش عارفه بس مش مرتاحه
عمران / قالت لك ايه يعني
هند / قالت لى انهم عارفين انك كنت عند مهره فى اوضتها يا اذكى اخواتك
ناصر / و حضرتك ما انكرتيش ... دا زمانهم كانوا بيتاكدوا منك انه عمران فعلا اللى كان فى اوضتها
هند تعض على شفتها بندم
……………………
فى الفندق
كارمن / انتى هتفضلى حابسه نفسك فى الاوضه كتير
مهره تشد الغطا عليها
كارمن / ما تزوديهاش بقي بطلى دلع
مهره تمسك الموبايل كارمن تشده من ايدها
كارمن / هنقعد فى اللوبي نشرب اى حاجه لا هنروح و لا نيجي و لا نتمشي ما تكبريش الحكايه بقي
مهره تهز راسها لا
كارمن / براحتك ... اه انا بلغت البوليس عن الطقم اللى اتسرق
مهره تقوم تقعد
كارمن / عاوزه ننهى القصه ننهيها
كارمن تروح ناحيه الباب مهره تجرى تمنعها
كارمن / انتى قلقانه من ايه مش انتى متاكده انه ولد كويس و عمره ما هيكون هو اللى سرقه خلاص اكيد البوليس هيثبت انه مش هو و هيطلع براءه و هنلاقى الحرامى الحقيقي و نرجع العقد و نرجعه لحاتم و ننهى القصه ... و لا انتى عارفه ان عمران اخده و مخبيه عليا
مهره تهز راسها لا
كارمن / تمام انا نازله اللوبي تحت غيرتى رايك و نزلتى ورايا كان بها نمتي و ارتحتى برده ما فيش مشكله انا عمرى ما هجبرك على حاجه
مهره تبص فى الارض و تفكر كارمن تمشي
............................
فى سرايا الزنايته
قاسم بيتكلم فى التليفون
قاسم/ بنهزر ايه بس يا ست الكل هى الحاجات دى فيها هزار
الست / يعني هتتجوز واحده لا شوفناها و لا نعرف حاجه عنها
قاسم / اسمها احلام الزيني و باذن الله هجيبها و اجيلك تتعرفى عليها بنفسك
الست / يعني مش من حقى اكون جنبك فى يوم زى ده
قاسم/ يا ست الكل هتاخدى الطريق رايح جاى و انا اساسا هعمل الفرح و تانى يوم هجيبها و اجيلك
الست / مفيش الكلام ده انا هركب اول طياره و اجيلك و يكون فى علمك لو البت دى ما عجبتنيش مفيش جواز
قاسم/ اما
الست / هى و لا انا يا قاسم
قاسم / مفيش مقارنه اصلا و مفيش داعى نكبر المواضيع و نعمل حوارات ما لهاش لازمه
الست / لما اجى هنشوف
قاسم/ على راسي يا ست الكل هستناكى فى المطار
الست / سلام
قاسم يقفل و يتنهد مازن يطلع من السرايا و احلام وراه يبصوا لبعض و يبتسموا قاسم يشيل مازن
احلام / شكلها ما كانتش مكالمه حلوه
قاسم / بالعكس كانت امى زعلت انها مش هتحضر الفرح
احلام / ليه هى ما كانتش جايه ؟!
قاسم / لا جايه بس انا كنت افضل انها ترتاح و كدا كدا رايحين احنا لها
احلام / برده ... و بعدين اكيد انا نفسي اتعرف عليها
قاسم/ هتحبيها اوى على فكره هى شديده ... بس حنينه
احلام / فهمت
قاسم يبتسم
احلام/ انا هسيب مازن معاك شويه عشان ورايا شويه تجهيزات كدا
قاسم / دا ابنى انا على فكره
احلام / ما عدتش متاكده من الموضوع ده حتى اسأله... عن اذنكوا
قاسم يبتسم احلام ترجع السرايا
قاسم/ ادعى ربنا ستك ما تبوظش الجوازه و نعدى اليومين دول على خير
مازن / ياااا رب
قاسم يشيل مازن و يدخلوا المضيفه
...........................
فى اوضه مهره
الباب يخبط مهره تعدل لبسها و تفتح تلاقي حاتم بيلعب فى موبايله مهره تستغرب يوريها فيديو البوليس و هو بيقبض على عمران و بيركبه البوكس
حاتم / ما قولتليش ليه أن عمران سرق الكوليه اللى كنت شاريهولك
مهره تتوتر
حاتم / لقيوه فى بيته
مهره تهز راسها لا
حاتم / كنت بحترمه الواد ده ما كنتش اعرف انه ... ما لو كان مزنوق فى قرشين كان قالى بدل ما يمد ايده و يسرق .. و يسرق مين ... انتى ... اللى كنتى معتمده عليه يسد لك الفلوس اللى على مامتك ليا
مهره تبص الناحيه التانيه حاتم يزقها و يدخل تتفاجئ بجرئته
حاتم / الا لو قدمت الشيكات اللى معايا دى و اتقبض على كارمن هانم هتروحى تجبيلى الفلوس من مين دلوقت ... و لحد ما تجيبى الفلوس و احب افكرك انك لحد ما تجيبى الفلوس هتكون سيرتكوا على كل لسان اصلك شكلك بتنسي ان مامتك شخصيه عامه
مهره تجيب الموبايل و تكتب
مهره / انت عاوز ايه ؟!
حاتم / انا معجب بيكي اوى على فكره شخصيه غريبه كدا ... كل حاجه و عكسها ... قويه اوى و ضعيفه اوى ذكيه اوى و غبيه اوى هاديه اوى و مزعجه اوى اوى اوى حاجه كدا تخرج الواحد من الروتين و الملل اللى عايش فيه
مهره توري له الجمله تانى
حاتم / ما انا قولت معجب بيكى
مهره تورى له الجمله تالت
حاتم/ عاوزك ايه ما بتفهميش
مهره تكتب / و لو اتجوزنا هتخرج عمران من السجن و تقطع الشيكات اللى على ماما
حاتم / هخرج عمران ... بس مش هقطع الشيكات هسيبها بس مش هقدمها  ... يعني يبقي فى ايدي كارت اللاعبك بيه لما تنسي نفسك و ترفعى مناخيرك الحلوه دى فى وشي
مهره تبص الناحيه التانيه
حاتم / الماذون و الشهود فى اوضتى البسي حاجه حلوه و حصلينا و ما تتاخريش عشان انا بزهق بسرعه
.............................
فى اوضه اكرم
دياب يدخل اكرم يتعدل
دياب / انا عمى قالى ضيافتك خلصت و ارميك فى الشارع تواجه مصيرك بس قبل ما اعمل كدا جيت اوريك صوره حلوه ... بص كدا شوف مين اللى بيتكلم مع بنتك
دياب يورى اكرم صور جوزيف بيتكلم مع بياتريس
دياب / بيقولك يا ترجع تلم اهلك يا هيلمهم لك بنفسه و القرار قرارك
اكرم / طب هم عملوا ايه طيب و انا هتصل اتكلم معاهم
دياب / انت كدا كدا مش هتبات هنا لحظه واحده يا تشوف لك حفره تانيه تدفن نفسك فيها يا ترجع تلم مراتك و بناتك احنا فينا اللى مكفينا لا فاضيين ليك و لا لقرفك
اكرم يبص لدياب
دياب / المشكله اننا كنا بنحترمك فى يوم من الايام و شايفينك راجل محترم و اب كويس طلعت لا محترم و لا حتى بتعرف تربى
......................
قدام القسم
هند بتركب عربيه ناصر
هند / ان ما نتفتلهاش شعرها ده شعرايه شعرايه ما ابقاش ام شاكر
ناصر يسوق
هند / هى الناس جرالهم ايه اتهبلوا
ناصر / ممكن تهدى شويه
هند/ سوق بسرعه شويه انت ماشي على قشر بيض انت كمان
ناصر / ادوس على الناس يعني يا امى ما انا سايق
هند / ابوك قالك ايه
ناصر/ قالى اخد بالى منك و اروحك البيت
هند / برده !! انا قولت مش مروحه الا اما احط كل واحد فى مقامه يعني هحط كل واحد فى مقامه
ناصر / طب ممكن حضرتك تثقى فينا شويه و احنا و الله هنشرفك
هند / دا كان ممكن يحصل لو ما كانوش حشرونى فى الموضوع انما انا يختمونى على قفايا يمين بالله لندمهم
ناصر / تمام ماشي
هند / انت بتاخدني على قد عقلى ياله
ناصر / يمين بالله ما اقدر
هند / انا مش مروحه... انا رايحالهم بنفسي انت سامع و لا لا
ناصر يتنهد و يفرك فى الدريكسيون
هند / سامع و لا لا
ناصر / سامع سامع ... بس هعمل ايه فى ابويا دا هينفخنى كدا
هند / و انا هنفخك اكتر
ناصر / فى ضهرى يعني
هند / فى ضهرك ما تخافش اعمل بس اللى بقول لك عليه
ناصر / امين
ناصر يدوس بنزين و يسوق بسرعه
………………………….
فى اوضه حاتم
مهره و كارمن واقفين فى جنب و حاتم و اتنين رجاله واقفين فى جنب تانى و فى مأذون قاعد و بياتريس و صوفيا واقفين عند بوفيه بيتفرجوا على الاكل المرصوص و المشروبات و يضحكوا مهره تكتب على الموبايل
مهره / يعني هو اللى بلغ مش حضرتك؟!
كارمن/ هو الواد ده فارق معاكى فى ايه ما ترفضي الجوازه
مهره تكتب/ و الشيكات اللى على حضرتك
كارمن/ انا مش فهماكى انتى ايه اللى مضايقك بالظبط
مهره تكتب / حضرتك بجد بتسالي
كارمن / بصي بقي انا ما ليش دعوه بالصداع ده العريس قدامك موافقه كان بها مش موافقه ما تتحججيش بيا و لا بسي زفت بتاعك ما حدش فينا هينفعك لما يتقفل عليكوا باب واحد و لا انتى فاكره الجواز ده ايه
مهره تبص الناحيه التانيه كارمن تمسكها من وشها و تجبرها تبص لها
كارمن / انتى قدامك فرصه تبقي ملكه و مع كدا مصره تعيشي دور الضحيه المغلوبه على أمرها الدور ده ممكن يجيب كويس مع حاتم هو بيحب كدا بيحب يحس انه الفا انما انا مش فارق معايا تضحيتك لا طلبتها و لا عوزاها اعملى اللى انتى شيفاه فى مصلحتك مش هتكون اول مره يعني
مهره تبص لكارمن باستغراب
كارمن / ايه مش فاهمه كلامى ... انتى عارفه انى طلبت من ابوكى ياخدك و رفض للمره المليون عارفه مين الوحيد اللى وافق يقبلك ... اكرم ... اكرم اللى عمران خاطفه و حابسه عنده فى البلد و حارمنا منه
مهره تهز راسها لا
كارمن / اكرم اللى اتحرمت انا و بناتى منه لأنك بطريقه الضحيه بتاعتك دى سرقتيه مننا
مهره تيجي تكتب
كارمن / حبك !!! حبك انتى ؟! حبك اكتر منى و اكتر من بناته ... حبك ليه و باماره ايه ؟ انتى عارفه انتى بالنسبالى ايه ؟! انتى اسوء حاجه حصلت لى فى حياتى ... سبب تعاستى الوحيد مش عارفه انا عملت ايه عشان استاهلك
مهره عنيها تتملى بالدموع
كارمن / حبيت واحد و حبنى و كنا عايشين فى منتهى السعاده و عشان انتى شرفتى باعنى قولت مش مشكله ادى لنفسي فرصه تانيه و ربنا عوضني بس عشان انتى انانيه ما بتفكريش غير فى نفسك و بس استكترتيه عليا ... استكترتيه حتى على بناته يكون ليهم اب و عايشين حياه طبيعيه زى اى حد
حاتم / يلا يا جماعه و لا ايه مش عاوزين نعطل الراجل اكتر من كدا
كارمن / انا بقول لك دلوقت انك ما تلزمنيش و مش عاوزه اشوف وشك تانى يا تروحى تتجوزى حاتم و تخرجى من حياتى نهائى يا تغورى برده من حياتى نهائى بس وحياه الفرحه اللى شوفتها فى عنيكى لما عشيقك الواطى اعترف لك بحبه ما ههنيكوا ببعض و نفس وجع الفراق اللى عشته هعيشهولك يا بنت على الدسوقي
حاتم يدخل و مهره مصدومه ما فيش اى رد فعل و الدموع بتنزل من عنيها ما بتقفش
حاتم/ ايه يا جماعه بترغوا فى ايه كل ده احنا لو ما نزلناش مصر دلوقت مش هنلحق النيابه و ساعتها عمران هيضطر يبات فى الحجز لحد بكره بالليل ... ايه ده انتى بتعيطى ليه ... هو حد زعلك و لا حاجه ... فى ايه يا طنط مالها مهره
كارمن / دى دموع الفرح يا حبيبي مش مصدقه نفسها ... صحيح انا قولت لها أن ما فيش بينا شيكات و لا حاجه دا جواز و ما ينفعش تبدأوا حياتكوا على كدبه
حاتم / طب قولتى لها كمان على الكاميره اللى كانت متركبه فى الحمام
مهره تتفاجئ و تنتبه
كارمن / اوبس نسيت دى خالص ابقي قول لها انت بقى و انتوا بتتفرجوا على الفيديوهات سوا ... الا قولى وصيت الشيف يعملى بيف ترياكى زى ما طلبت انا نفسي مفتوحه موت
حاتم / طبعا و انا اقدر انسى حاجه زى دى برده
كارمن / الف مبروك يا حبيبتي اسيبكوا بقي شويه لوحدكوا
كارمن تروح ناحيه البوفيه مهره تكتب
مهره / فيديوهات ايه اللى بتتكلموا عنها
حاتم / بصراحه انا ما شوفتهاش لسه ما كانش فى وقت زى ما انتى عارفه بس يعني فى كام كاميرا كدا فى الاوضه و الحمام هنا فى الفندق و زيهم فى اليخت وقت ما غيرتى و وقت ما استحميتي و كدا يعني هنبقي نتفرج عليهم سوا و نستكشفهم مع بعض
مهره تكتب / انت ازاى بالحقاره دى
حاتم / و انا مالى دى كانت فكره مامتك و هى اللى دفعت كمان على فكره مامتك متحمسه للجوازه دى اكتر منى و بصراحه انا عمرى ما هنسي فضلها عليا
مهره تكتب / انت بتعمل معايا كدا ليه اشمعن انا ما تفكك منى
حاتم/ ما قولتلك انتى كل حاجه و عكسها حاجه كدا طريه بس حرشه بنت ناس ملفوفه فى ملايه لف رافعه مناخيرك لفوق اوى و فى نفس الوقت مكسوره حاجه تكسر الملل و الروتين
مهره تكتب / و ان رميت كرسي فى الكلوب و بوظت ام الجوازه الزباله دى هتعمل ايه
حاتم / ابوس ايدك اعملى كدا ... ارفضي و خلينا نشوف سوا انا ممكن اعمل فيكي ايه
مهره تكتب / مش هيسيبوك على فكره
حاتم / هم مين؟ الزنايته ؟ امال انا اخترتك ليه من الاول ما عشان قريت نظراته ليكي هو انتى لسه ما فهمتينيش انا مش قادر اعيش فى العالم المتحضر الممل ده بحتاج اكشن فى حياتى مدمن ادرينالين عملت كل حاجه ممكن تتخيليها و مفيش حاجه كفايا انا حتى
حاتم يوطى على مهره يوشوشها
حاتم / قتلت قبل كدا
مهره ترد بلغه الاشاره حاتم يمسك ايدها و يكسر صابعها تنزل على ركبها و هى بتصرخ الكل ينتبه و يقفوا
.......................