الكبيره ٢ بقلم / لولو_محمد

الحلقه ٦٩

((((((( الكبيره ٢))))))))
#لولو_محمد
الحلقه ٦٩
ناصر / هستاذن انا و لو فى جديد هبلغكوا باذن الله
نور / خد بالك من نفسك
ناصر يبتسم و يمشي
ام نور / انا قولت اول ما دخلنا البلد فى حاجه غريبه بتحصل الناس وشوشها ما كانتش طبيعيه و بيبصولنا بصات مش طبيعيه يلا ربنا يرجعه لحضن امه بالسلامه
عبد العزيز / أنا هروح اعدى على الجماعه اللى فى البيت اشوف لو حد منهم ناقصه حاجه
نور / انا متاكده ان ناصر مش هيخليهم محتاجين حاجه خالص
ام نور / و الله ما عدتش متفائله
نور / ليه كدا بس يا ماما هو قصر فى ايه
ام نور / ما اعرفش بس قلبي مقبوض و عيني بترف و انتى عرفاها
عبد العزيز / يا ربى عليكي دا انا لسه بستغرب على تفكير اهل البلد تطلعي لنا انتى ما تشوفى امك دى يا نور ... انا نازل
عبد العزيز يطلع بره و يقفل الباب بنت تطلع من الاوضه
البنت / دا فى رجاله كتير اوى فى الشارع شايلين سلاح و على اسطح العمارات اللى حوالينا كمان
ام نور / ايه الكلام ده
البنت / و الله تعالى شوفى
ام نور تروح مع البنت جرى تبص من البلكونه تلاقي كلام البنت صح
....................
فى عربيه مختار
جوزيف شغال على اللاب تليفونه يرن يفتح الاسبيكر
جوزيف / اتكلم
دياب / بعتلك لوكايشن اخر حاجه قادر اتابع فيها تاهو منى بعدها
جوزيف / الجراج صح
دياب/ الكاميرات مفصوله فيه و العربيه ما طلعتش
جوزيف/ ابعت رجاله للوكايشن هتلاقيهم ميتين غالبا ما دام ما طلعوش لحد دلوقت من هناك
صمت
جوزيف/ بعتلك رقم عربيه تابع خط سيرها هم دول
دياب / عرفت منين
جوزيف / ما حدش بيدخل الجراج يقعد فيه تلت ساعات يا ديبو الا لو كان مستني حاجه بلس أنهم مزز جامدين
دياب / تمام هكمل من هناك
جوزيف / تمام
جوزيف يقفل و يكمل شغل مختار يركب
مختار / وصلت لحاجه تاهو من دياب
جوزيف يهز راسه
مختار / جبنا اكل تاكل لقمه
جوزيف يهز راسه لا
مختار / انت مضايق من اللى حصل فى الجيم ؟
جوزيف / من مين فيهم بالظبط
مختار / اختصر انت عليا الكلام و قولى انت مضايق من مين ؟
جوزيف / مش مضايق من حد مش فارقه اصلا
مختار / فارقه بالنسبالى
جوزيف / و لا بالنسبالك
مختار / ياااااه دا الموضوع كبير اوى ... بص انا عارف انك بتبذل مجهود و بتحاول بس كل اللى حواليك مضغوطين جامد اوى و احنا بشر مش سهل نسامح او ننسي و انت برده احيانا كتير بتكون مستفز مش هنكدب على نفسنا
جوزيف / ما كنتش مستنى رد تانى على فكره
مختار / اقسملك بالله انى بحاول على قد ما اقدر مع الكل و بعدين مش كلهم وحشين معاك برده نجاه و دياب و كارم و انا بنعاملك كويس بنعاملك كويس لدرجه ان احيانا بنتحط فى مشاكل و انتقادات لمجرد اننا بندافع عنك
جوزيف / ما تدافعوش انا مش مستني حد يدافع عنى
مختار / ما حدش بيعيش لوحده
جوزيف / انا عندى كام سنه ؟! عشتهم لوحدى
مختار / طب حقك عليا
جوزيف / قولتلك اصلا مش زعلان... لقيتهم
جوزيف يتصل بالتليفون
جوزيف / ايوه بعتلك اللوكيشن اللى هم فيه و زياده امان هكشف برده على كل الكاميرات اللى حواليهم يمكن يكونوا خرجوا او عملوا تبادل فى اى مكان منهم ... انا عارف ان المبنى فيه خمسه و عشرين شقه على الاقل بس دا اللى قدرت عليه ما شوفتش منك حاجه عشان تتآمر اصلا
جوزيف يقفل السكه و مختار متابعه جوزيف يقفل اللاب و ينزل من العربيه و يرزع الباب مختار يتنهد و ينزل وراه
مختار / بقولك ايه انسي كل الهبل ده و تعال معايا ناكل لقمه سوا
جوزيف / مش عايز
مختار / وله هرمونات الحريم دى لمها ما يغركش هزعلك
جوزيف يبصله بطرف عينه باستهزاء و يبص قدامه
مختار / لا حول و لا قوه الا بالله ... هروح اجيب الاكل هنا يمكن تغير رأيك 
جوزيف / هى نجاه فين
مختار / مقعدينها جوه يمكن تحب تاخد راحتها او تفرد ضهرها او تغفل او اى حاجه ما تبقاش وسط الرجاله كدا و الرايح و الجاى يبص عليها
جوزيف / و صابر سامح ان نجاه تاخد راحتها مكانه
مختار / سامح ... لنجاه ... كل حاجه مسموحه
جوزيف / ليه بقي... افهم ليه يعني ... فيها ايه بقي ست نجاه دى عشان الكل بقدره قادر كدا يبقوا كدا انا مش فاهم و يا ريته عاجب الا ما بيعجب على فكره ... حاجه تقرف
مختار يبص لجوزيف غضبان و مختار بيفكر فى صمت
مختار / هى المشكله طلعت فى نجاه ؟
جوزيف / مش فاهم غريبه كدا و مكلكعه و مش قادر اتوقعها او حتى افهمها
مختار/ بعيد عن الجبل بشويه هناك كدا الحته السهله دى كنت بفرش انا و ابوك كتير اوى
جوزيف يبص له
مختار/ كان بيحب يتكلم عن الحريم و انا ما كنتش بحب بالنسباله خبرتى كانت صفر اصلا يعني هو ..  ما كانش عاتق .. و كان دايما بيالس عليا انى سنجل و وقتها فهم انى معجب بام شاكر و ... وقتها يعنى ما كنتش حتى عارف اكلمها
جوزيف يبتسم
مختار / كان مستلمنى بقي عيب على ابسك و لو قلعت التيشيرت بس هتوقعها و كلام اهبل كدا كنا بنضحك عليه... لحد فى يوم و بقدره قادر سبحان الله ... حرمه واحده بس غيرته زى ما حرمه واحده بس غيرتنى برده
جوزيف / هند
مختار / ام شاكر اه ... قبلها كنت شايف ان ... ما ينفعش ... احنا غير القهراويه خالص ما كانش ينفع و فعلا انا لخبطت ليها حياتها و هى لخبطت ليا حياتى لولاها كان زمانى انا الكبير على فكره
جوزيف / ندمان ؟!
مختار / عمرى دى احلى حاجه حصلت فى حياتى و لو رجع بيا الزمن مليون مره هختارها مليون مره برده
جوزيف يبتسم
مختار/ المهم يعني ابوك بعد ما لف و دار و من بينهم الست و الدتك قابل اللى غيرته برده و لخبطتله حياته هو كمان
جوزيف / و جابت اجله اتحكتلى الحكايه دى كتير و مش فاهم ليه كل شويه تفكرونى بيها
مختار / و لا حاجه ادينا بندردش
جوزيف / انا قابلت بنات بالعبيط الجميله و الذكيه و القويه و الخطره و بكل الاشكال و الالوان و الاحجام
مختار / يا كبدى يا ابنى
جوزيف / حرفيا نجاه هى الأولى اللى خرجتنى عن شعوري
مختار/ اقل حاجه عندها ... عارف بقي ايه المشكله
جوزيف / ايه ؟!
مختار / انها حرفيا ما عندهاش أدنى فكره هى عملت ايه
جوزيف يضحك بصوت ملفت
مختار / عارف بقي المشكله الأكبر ايه
جوزيف يبص له باهتمام
مختار / انها دايما على حق ... الموضوع ده مشكله فى الستات كلها على فكره ... انهم غالبا صح و على حق و المفروض ان احنا كرجاله طول بعرض نسمع كلامهم و ناخد شورتهم عارف ليه بقي
جوزيف / ليه ؟!
مختار / عشان لو طلعوا غلط تلاقى شماعه و لو طلعوا صح تفلت من بستفه مش انا قولتلك
جوزيف يضحك
جوزيف / شكلك مش مسيطر يا مخ
مختار / لا انا متصالح ان كل واحد فينا له مكان ما ينفعش غيره يكون القائد فيه ... انا مثلا زى ما انت شايف كدا كلمتى مسموعه جدا بره البيت
جوزيف / و جوه ؟!
مختار / لا دى مملكتها هى بقي حد يجرؤ يزعل سمو الملكه؟!!
جوزيف / و لا حتى الملك؟!
مختار / الملك بيدهول بغمزه من عنين سموها
جوزيف يبتسم و يبص الناحيه التانيه و يرجع يبص لمختار
جوزيف / انت من الناس القليله اوى اللى بحبها و دا بيخليني اخاف عليك
مختار / حبيبي ... احكيلى بقي نجاه زعلتك اوى فى ايه
جوزيف / ما اعرفش بتكلم معاها عادى هبت فيا
مختار / من غير سبب ؟!!
جوزيف / قولتلها وحشتيني
مختار / قلبي !!! اللهم انى لا أسألك رد القضاء و لكنى اسالك اللطف فيه ... طب دا اعمل معاه ايه ده اضربه و لا افهمه غلطه بالراحه و لا اعمل معاه ايه ده
جوزيف / ايه الاوفر ده
مختار / يا ابنى انا بحاول ابقي فى صفك ما تقلبنيش عليك الحريم عندنا خط أحمر تطير فيها رقاب دى
جوزيف / و انا عملت ايه غير انى قولتلها اللى انا حاسه
مختار يبص لجوزيف و يتنهد بنفاذ صبر
مختار/ يا حبيبي ما ينفعش فى حدود فى التعامل
جوزيف / و هو انا لمستها و لا
مختار / حتى فى الكلام فى حدود
جوزيف/ بس هى وحشتنى فعلا انت لو وحشتنى هقولك انا لو وحشتك هتقولى
مختار / احنا رجاله زى بعض نتكلم عادى انما الحريم دنيا تانيه
جوزيف / ايوه دا لو
مختار / دا فى كل الأحوال الحريم ممكن يتكلموا مع بعض فى اى حاجه احنا الرجاله نتكلم مع بعض فى اى حاجه دخل حريم فى النص بينا او راجل بينهم الكلام مات
جوزيف / دا عبط على فكره
مختار / احنا كدا
جوزيف/ ايوه يعني لما توحشنى
مختار/ ما توحشكش اصلا توحشك باماره ايه
جوزيف / هو بمزاجي دا شعور انسانى
مختار / أكتمه جواك
جوزيف / هو دخان سجاره
مختار/ اللعن و بعدين انت اش عرفك بكتمه الدخان انت
جوزيف / ما تغيرش الموضوع... قولى هو انى اعبر عن مشاعري حرام
مختار/ ايوه ... يا أيها الذين آمنوا لا تتبعوا خطوات الشيطان ومن يتبع خطوات الشيطان فإنه يأمر بالفحشاء والمنكر
جوزيف / و فين الفحشاء و المنكر هنا بس
مختار / يا ابنى الكلمه بتجر اختها و نظره فابتسامه و انت عارف
جوزيف / لا ما تقلقش انا مش عبيط للدرجادى و بعدين انت عارف انا عرفت بنات ملكات جمال شويه عليهم دلع و عنين و شعر و اجسام تحرك الحجر انا مش تلميذ و لا عيل جعان ما شافش لحمه قبل كدا دا لو اعتبرنا نجاه دى لحمه اصلا دى انشف منك
مختار / احمد يا عمر انت بتغلط فى نجاه دى ستك و تاج راسك يلا انت تطول تبصلك اصلا
جوزيف يبصله و يضحك
جوزيف / و الله بتعامل معاها كانها واحد صاحبى
مختار/ و لا متخذات اخدان ... يعني مفيش صحبيه بين ولد و بنت
جوزيف / بناقص انتوا هتوجعوا قلبي ليه
مختار / اريح و يا ريت الكلام ده ما يطلعش بره عشان الكلام فيه هيفتح علينا احنا التلاته سكك توجع القلب حرفيا
جوزيف / اتنسي اصلا
مختار / جدع
جوزيف / بس انا لسه مضايق
مختار / لا حول و لا قوه الا بالله
جوزيف يفتح باب العربيه و يركب و يفتح اللاب و يكمل شغل و مختار متابعه يروح ناحيه الرجاله و يتكلم معاهم
..........................
فى مضيفه الزنايته
نسمه قاعده بتعيط امها تروح تطبطب عليها تبعد عنها
ام نسمه / كدا يا نسمه ؟!!
نسمه / انا فيا اللى مكفيني
ام نسمه / قولنالك قعادك مع الحربايه حماتك فيه خطر عليكي ما صدقتيناش عندك طمع فيكي اللى يسوى و اللى ما يسواش و اللى عملتيه مع ابوكى النهرده هيخلى الكلاب تسن سنانها عليكي
نسمه / بقولك ايه ياما ما تروحى تشوفى وراكى ايه و تنسيني صدقيني هترتاحى و تريحي
ام نسمه / اقسم بالله لولا انى مقدره وجعك دلوقت لكان بقالى معاكى صرفه تانيه انا امك يا بت
نسمه / فاكره ياما لما كنت بتحايل عليكي تديني بق ميه اشرب فى عز الحر و بترفضي طب فاكره لما اغم عليا من قله الاكل و افتكرتونى حامل و شككتوا فى شرفى و كنتوا هتاخدونى تفضحونى عند الدكتوره لولا انى وافقت اتجوز عبد الهادى... فاكره اخدت ضرب قد ايه يوميها
ام نسمه / امال كنا نسيبك لابن المطاريد يضحك عليكي
نسمه / اديني هربت من بيتكوا و اتجوزت عبده الله يرحمه فاكره انتى بقي انى حتى لو مات ممكن ارجع ليكوا تانى
ام نسمه / احنا اهلك اى حاجه عملناها عملناها عشان مصلحتك
نسمه / و انا مصلحتى مش معاكوا ابعدوا عنى بقي و انسونى
ام نسمه / لو اتجوزتى صابر
نسمه / مش هتجوز زفت مش هتجوز حد خالص انا جوزى لسه ما بردش فى قبره و الكل عاوز يتجوزنى ... ايه احلويت فجاه فى عنين الكل ... انتوا فاكريني هبله ... فاكرينى هسلمكوا ارض عيالي فراس و لا محمود و لا مين ما كان ... انا هعيش لعيالي و بس ابعدوا عنى و سيبوني اربيهم
ام نسمه / و هى حماتك اللى كل يومين تضيع عيل من عيالك
الباب يتفتح و هند تدخل
هند / عرفنا مين اللى عملها
نسمه / لقيتوه
هند / لسه بس عرفوا مين اللى ورا الموضوع و غالبا هو السبب فى كل اللى كان بيحصل قبل كدا
ام نسمه / اكيد صابر
هند / لا ... اللى ما يتسموش ... عاوزين يلبسوها فى صابر و للاسف نجحوا صابر ساب الجبل بنص رجالته و طار يدور لك على ابنك
ام نسمه / يعملوها و يخيلوا ما حدش له مصلحه و لا عنده رجاله و سلاح يقدروا
هند / اتنين من رجاله صابر ماتوا هناك هيقتل رجالته ليه
ام نسمه / عشان يرجع الواد و يبان بطل قدام البت
نسمه / و انهم يلاقوا الواد فى مخزنه و قتله لعبده
هند / شاكر ابنى كان معاه طول الوقت مش هو اللى قتل عبده و اتفاجئ بموته زى ما اتفاجئ انهم لقوا الواد فى مخزنه و لعلمك ما كانش ساكت الكل كان بيدور على الحقيقه
ام نسمه / جرا ايه يا ام شاكر انتى جايه تلعبي فى دماغ البت و لا ايه
هند / انا بعرفها الحقيقه مش اكتر صابر برئ من كل حوارات عيله الجزار دى ... المشكله ان لا انتى و لا عيالك فى امان بعد كدا
ام نسمه / طب يبقي حد يستجرى يهوب منها و انا اكله بسنانى
نسمه / ما استجروا و قتلوا جوزى و خطفوا عيالى واحد ورا التانى عملتوا ايه
ام نسمه / يا بنتى ما تخليش الشيطان يلعب فى دماغك
نسمه / انا مش هتجوز صابر كفايا بقي ... هو اصلا الوحيد اللى ما فتحش الموضوع هو صابر
ام نسمه / امال لازق ليكي ليه
هند / عشان هددوه بيها كان بيحاول يحميها طول الوقت
ام نسمه / جرا ايه يا ام شاكر ما توحدى الله فى قلبك كدا
هند / لا اله الا الله جرا ايه قولت ايه انا غلط
ام نسمه / و هم كبارات البلد بيغلطوا برده ..  صحيح المصالح بتتصالح
هند / تاخدى ضيافتك و تطلعى بره بيتي
ام نسمه / بنتى و حفيدي قبل منى
نسمه / مش هيحصل... و ان قدرتوا تاخدونى من هنا ... امانه يا ست هند ما تناوليهم بدر ابنى
ام نسمه / هى حصلت ... تمام اوى انا ماشيه و ابقي شيلى طينك
نسمه / شيلاه
ام نسمه تمشي و نسمه تقعد تعيط
هند / قربوا صدقيني قربوا و دلوقت تلاقيهم بيتصلوا يقولوا الواد معاهم ما حدش هيرجع من غيره ما تخافيش
نسمه / و بعد ما يرجع ..  ما حدش هيسيبنى فى حالى دول كانوا هيموتونى النهرده عشان اتجوز محمود
هند / الواد يرجع و هنقعد و نتحاسب بس فايز يرجع بالسلامه
نسمه / يارب
هند / يا رب
………………………..
فى منطقه سكنيه
صابر قاعد فى عربيه و شاكر جنبه تليفونه يرن يحط الايربود فى ودنه
صابر / السلام عليكم
امايا / هتفضل مستنى كتير مش هتدخل
صمت
امايا / امال جيت ليه
صابر / انتى بتعملى كدا ليه
امايا / انت اللى بتعمل كدا ليه بتساعدهم ليه
صابر / هم مين بالظبط
امايا / اهل البلد دى ... انت كان المفروض تكون دكتور دلوقت ايه اللى يخليك تسيب الطب و تعيش وحيد فى الجبل
صابر / و انتى ايه اللى خلاكى تسيبي عيشه الاستقرار وسط اهل يحبوكى بجد و تعيشي عيشه المجرمين دى
شاكر / اميره ؟!
امايا / شاطر عرفتني لوحدك
صابر / انا لحد دلوقت مفيش بيني و بينك حاجه سيبي الواد يمشي و انا
امايا / سابتك و اتجوزت غيرك بترمى نفسك فى النار عشانها ليه ما تنساها زى ما نسيتك و لا موت جوزها صحى جواك الحب القديم تعرف ان الأسد لما بيدخل على قطيع جديد و يقتل الأسد بتاعه اول حاجه بيعملها انه بيقتل كل أولاده ساعتها مراته بتبقي كلها ليه
صابر / بس انا ما قتلتش جوزها
امايا / عشان جبان و خاضع ماسك الكرباج فى ايدك طول الوقت بس الحقيقه انت الوحيد اللى بيتجلد
صابر / و ايه كمان
امايا / انت عاوز ايه كمان؟
صابر / انا عاوز الواد عشان اروح
امايا / طب ما تدخل تاخده مستنى ايه ... اااااه مستنى نتيجه المسح الحرارى للمبنى ... على العموم الولد فى الدور الرابع شقه اربعتاشر تانى اوضه على ايدك الشمال
صابر يفتح باب العربيه و ينزل يدخل المبنى شاكر وراه رجاله ينزلوا من عربيات تانيه و يدخلوا المبنى
امايا / المرادى قدمت السبت المره الجايه هاجى اخد الحد بتاعى
صابر يقفل تجيله مكالمه يرد
دياب / الشقه فاضيه ما فيهاش اى حد
صابر / هبص بنفسي
دياب/ الدور الرابع كله فاضي ما فيش غير شقه ستاشر فيها خمس اجسام حراريه مفيهمش أطفال غالبا ده فخ ما تطلعش
صابر / هطلع لوحدى
شاكر / انا معاك
دياب / اعقل يا صابر الحدايه ما بتحدفش كتاكيت اهدى شويه
صابر يشيل الايربود من ودنه و يحطه فى جيبه
صابر / انا هطلع من السلم ده و انتوا روحوا من السلم التانى
الرجاله تروح و صابر يطلع و شاكر وراه و كل واحد ايده على سلاحه راجل ينزل من فوق يعديهم يتعدلوا فى طلعتهم و يكملوا لحد ما يوصلوا للدور الرابع باب الشقه اربعتاشر متوارب شاكر يمسك صابر من كتفه
صابر / خليك هنا و امن ضهرى
شاكر / استنى باقي الرجاله احنا كدا كدا عارفين ان الواد مش جوه
صابر / استنى هنا
صابر يدخل و شاكر مامن ضهره و عمال يبص يمين و شمال اول ما صابر يدخل يشوف بوكس كبير من الدبل جلاس بين الطبقتين تلج و فايز واقف جوه صابر يلف حوالين الصندوق يحاول يدور على فتحه مفيش يطلع المسدس و يضرب طلقه فى الازاز يطلع مضاد للرصاص شاكر يدخل الباب يتقفل بباب حديد من السقف و الشبابيك تتقفل بحديد و تليفون صابر يرن يحط الايربود
صابر / افندم
امايا / افتح الاسبيكر
صابر يفتح الاسبيكر
امايا / ايه رايكوا فى التحفه المعمارية دى غرفه الأمان دى مصممه انها تستوعب عدد معين بس من البشر و تقفل عشان ما تسمحش لاى حد تانى يدخل و عشان تقدر تخرج منها لازم يكون معاك الكود اللى بيفتحها و الديفايس اللى هتحط فيه الكود و طبعا اتنين دكاتره زيكوا خبرتهم فى التكنولوجيا معدومه مش هيقدروا لا يكتشفوا مكان الديفايس و لا الكود يعني باختصار انتوا ضيوفى انتوا التلاته لحد ما واحد فيكوا يموت
صابر / ما بنفهمش فيها بس معانا اللى بيفهموا و اكيد مش هيسيبونا
امايا / يعني صارفه و مكلفه كل ده و تفصيله زى دى هتفوتنى
الطبقه اللى جوه من الازاز تفتح بالتدريج و الصندوق يبدا يتملا بالمايه و فايز مرعوب و بيخبط على الازاز
امايا / الباب هيفتح لما واحد فيكوا انتوا التلاته يموت قدامكوا دقيقه تختاروا قبل ما الولد يغرق
شاكر و صابر يبصوا لبعض و يجروا يحاولوا يكسروا الصندوق ما بيتكسرش صابر يفضي مسدسه كله فى الصندوق ما بيتكسرش يطلع خزنه تانين و يفضيها فى الأبواب الحديد و الشبابيك و الحيطان مفيش اى تغير و شاكر عمال يدور فى كل حته عن مخرج مفيش سلاح صابر يفضي و يفضل يتك على الزناد مفيش رصاص الاتنين يقفوا يبصوا لبعض و المايه واصله لرقبه فايز اللى بيصرخ و يخبط و يعيط
...........................
فى الجبل
مختار بيجرى على عربيه جوزيف قاعد شغال يفتح الباب و الكل بيجرى وراه
مختار / وصلت لحاجه قدرت تعرف حاجه
جوزيف / انا ما اعرفش اى حاجه عن النظام ده او انه حتى موجود و مفيش وقت اعمل سيرش او اتصل باى حد
مختار / يعني العيله دى تعرف حاجه انت مش عارفها يا يونس
جوزيف / انت شايفني بلعب لو تقدر انت تعمل حاجه اعملها
مختار يسيب المكان و يمشي و هو بيتكلم فى التليفون
نجاه / يونس !!!
جوزيف يبص لها و يكمل شغل نجاه تجرى ورا مختار
مختار/ هدوا الحيطه لو حكمت ... انا عارف انك قولت لصابر انه فخ انا عارف
مختار يحدف الموبايل على اخر دراعه
نجاه / هيبقوا بخير ما تقلقش هتلاقى حل
مختار / شاكر هيضحى بنفسه
نجاه / لا مش هتوصل للدرجادى اكيد مش هتوصل للدرجادى هيرجعوا التلاته سلام هيطلعوهم انا متاكده يونس هيلاقي حل انا متاكده
مختار يبص لنجاه و يتنهد و يروح يجيب الموبايل مكسور يرميه فى الارض تانى و يروح يقعد على صخره و الرجاله بيبصوا لبعض جوزيف ينزل من العربيه
جوزيف / نجاه ... تعالى ... لقيت حل
الكل يقوم و يجروا عليه جوزيف يزق نجاه تركب يجرى يركب الناحيه التانيه
مختار / فى ايه يا يونس
جوزيف / ثق فيا ... ثق فيا
مختار/ طب استنى هاجى معاك
جوزيف / مفيش وقت اوعى
جوزيف ياخد العربيه و يطير
كارم / انت سبته ياخدها لوحدهم !!!
مختار يبص لكارم
مختار / الكل يفضل مكانه و فتحوا عنيكوا تعال معايا يا كارم
مختار و كارم يركبوا عربيه و يطيروا ورا جوزيف و نجاه
....................
فى اوضه ام محمود فى المستشفي 
ابو محمود / احنا غلطنا جامد اوى
محمود / ما تقلقش يابا كلو معمول حسابه و الست طمنتني على الاخر قالت اننا بس نتمسك بكلامنا و كلو هيعدى
ابو محمود / ايوه بس نسمه ما طلعتش لقمه طريه زى ما كنا فاكرين و اتكلمت
محمود / كلامها قصاد كلامنا و اللى يعرف يثبت حاجه يثبتها خناقه حريم فى بعض
ام محمود / ام عبده مش هتستر لو فاقت هتقول كل حاجه عشان ترجع الواد
محمود / دا لو فاقت خلاص خلصنا منها المهم تتمسكى انتى بكلامك ان رجاله الكبير هم اللى عملوا فيكى كدا عشان نقدر نخرج نسمه من بيتهم
ابو محمود / يا ابنى الحكايه دى وسعت اوى ما زى ما الجماعه دول جامدين و عملوا كل ده ما يخلصوا عليهم التلاته و نخلص
محمود / ما قولتلك عاوزين البت تحت طوعهم و لعلمك زمانهم برده متفقين مع ابوها و اللى سبق اكل النبا كله يابا
ام محمود / دماغى هتتفرتك ايديهم كانت تقيله اوى يا ابنى
ابو محمود / معلش يا ام محمود حقك عليا انا علقه تفوت و لا حد يموت
ظابط يدخل الكل يرتبك و يقف و ام محمود تتعدل فى نومتها و عنيها توسع
.........................
فى الاوضه عند صابر
شاكر يبص لفايز واقف على طراطيف صوابعه و كل شويه يغطس و يحاول يقوم
شاكر / ما بيعرفش يعوم هيغرق قبل حتى ما الصندوق يتملا ميه
صابر / سلاحك فيه رصاص
شاكر / الصندوق مقاوم للرصاص ما جربنا فيه خزنه كامله
صابر / بس انا مش مضاد اضرب
شاكر / واثق فيها اوى انها هتنفذ كلامها
صابر / مش فارقه لو فايز جراله حاجه مش هقدر ارجع البلد و لا ابص فى وشها اضرب و انقذه
شاكر / مش هقدر اعمل كدا مش هعرف
صابر يصرخ فيه
صابر / ما فيش وقت اخلص الواد هيموت
شاكر / اكيد فى حل اكيد هنلاقي حل التوتر ده
صابر / هات المسدس ان كنت انت مش قادر انا هقدر هات المسدس
شاكر / ان كان فى حد فينا هيموت يبقي انا ارجع بالواد لامه
صابر / انت صغير و العمر لسه قدامك
شاكر / و انت يعني اللى كبير انت بتحبها ارجع صلح اللى اتكسر بينكوا و عيش
صابر / اللى اتكسر عمره ما هيتصلح و اللى حصل ده طول ما انا عايش هيفضل يتكرر الحل الوحيد انى اموت
شاكر يشد الاجزاء و يحط المسدس على دماغه صابر يرجع لورا
صابر / اهدى يا شاكر ما تتهورش
شاكر يبص على فايز و يبص لصابر صابر يهجم عليه و يمسك ايده طلقه تخرج من المسدس بالغلط صابر يفضل يحاول ياخد المسدس من ايد شاكر و كل واحد بيحاول يشد المسدس ناحيته صابر يقلب شاكر فى الارض ايده تفلت المسدس بس يكون سحب منه الخزنه
شاكر / خلاص يا صابر خلاص
صابر/ لسه فى طلقه فى الماسوره... اشهد ان لا
شاكر يحدفه بالخزنه فى وشه صابر يتهز و يقع فى الارض و مناخيره بتنزف شاكر يجرى يشد منه المسدس و يجيب الخزنه و يركبها صابر ينط على ضهره ينطر المسدس من ايده فى الارض و يحاول يجيبه شاكر يمسك رجل صابر يقلبه على وشه بس صابر يمسك المسدس شاكر ينط عليه و كل واحد بيحاول يشد من التانى المسدس طلقه تطلع و شاكر و صابر باصيين لبعض و مصدومين
...........................
فى اوضه ام عبده
ممرضه لابسه كمامه تدخل تلاقي ام عبده بدات تفوق تنزل الكمامه
الممرضه / حمد الله على السلامه فى معادك بالملى
ام عبده / الواد خدوا منى الواد محمود فين الحكومه فين
الممرضه / انهى واد ؟؟ اللى انتى قتلتيه !!
ام عبده تستغرب
الممرضه / زى ما قتلتى ابوه قبل كدا تؤ تؤ تؤ
ام عبده / انتى بتقولى ايه يا بت انتى ؟! انتى مين ؟! انتى مين و عايزه منى ايه
الممرضه تفضي حقنه فاضيه فى المحلول بتاع ام عبده ام عبده تحاول تفك الكانوله من ايدها الممرضه تمسكها
الممرضه/ عيب عيب دا انا جايه اريحك من وجع الضمير بعد ما بغبائك دمرتى بيتك حطيتي ايدك فى ايد اللى قتل ابنك و اللى خطف حفيدك قبل كدا عارفه عمل كل ده ليه عشان ياخد الارض و هياخدها عارفه هياخدها ازاى هيقتل حفيدك التانى بدر و مراته
ام عبده بتعانى انها تتنفس
الممرضه / ثوانى و كل عذابك فى الدنيا الوحشه دى يخلص انتى قمتى بدورك على أكمل وجه و ما عادش ليكي اى اهميه نسيبك عايشه عشانها ارتاحى
ام عبده تموت الممرضه تعدلها فى السرير و ترفع الكمامه و تمشي
……………………………
فى المضيفه
نسمه تحط ايدها على قلبها
هند / مالك يا بنتى
نسمه / قلبي انقبض جامد اوى ... قلبي واجعنى اوى
هند / استهدى بالله بس بإذن الله خير
نسمه تهز راسها
نسمه / بدر فين بدر ابنى فين
خديجه / بيلعب مع العيال فى الجنينه
نسمه تطلع تجرى خديجه تيجي تطلع وراها هند تمسك ايدها خديجه تبص لها
هند / فى حاجه وحشه اوى بتحصل يا خديجه انا كمان قلبي اتقبض فجاه بس ما قدرتش اقول قدامها
خديجه تبص لهند بخوف و تبص بره نسمه بتجرى ناحيه الجنينه الورانيه
...........................
فى الصحرا
مفيش نور غير نور العربيه
نجاه / انت عارف انت رايح فين
جوزيف يتصل بنمره فيديو كول
جوزيف / كل اللى طالبه منك انك تثقى فيا
نجاه / انا مش مهم اللى عملته ده مش هيعدى على خير ما حدش هيسكت
جوزيف / ردى
امايا / افندم ...اهلا دا الحبايب متجمعين اهو
جوزيف يركن و ينزل و الموبايل فى ايده و يعدى الناحيه التانيه يفتح باب نجاه
جوزيف / مش قولتلك لو وقفتى فى طريقي مش هسمى عليكي و لا ما قولتش
امايا / اتاخرت يا بيبي انا اخدت اللى انا عوزاه خلاص
جوزيف / بس ما عملتيش حساب زعلى
جوزيف يلف الكاميره على نجاه و يطلع المسدس و يضربها بالنار تقع فى الارض و هى بتصرخ امايا تصرخ
امايا / نجاه نجاه لو جرالها حاجه هقتلك فاهم هقتلك ... نجاه ردى عليا نجاه
جوزيف يركب العربيه و يمشي
امايا / انت رايح فين انت هتسيبها جو نجاه لا يا جو نجاه لا
جوزيف / اشبعى باللى عندك بقي
امايا / لو جرالها حاجه عمرى ما هسامحك هقتلك بايدى فاهم و لا لا
جوزيف / انهى الفيلم ده و انا ارجع لها انهيه حالا
امايا / ماشي انتهى ... بس لعلمك هنتقابل و قريب اوى كمان ... و اللى حصل ده هتدفع تمنه غالى اوى
جوزيف يقفل الخط و يرجع مارشدير يلاقى عربيه مختار وصلت لنجاه
………………………….