(((((((( الكبيره ٢))))))))
#لولو_محمد
الحلقه ١٠٨
عويس يضرب نسمه بالقلم
عويس / اتكلمى مع ابوكى بأدب
نسمه تمنع دموعها
نسمه / حقك عليا بس انا مش عاوزه اتجوز
عويس / مش بكيفك و زمن المداديه خلص من عندى و آخر كلام تجهزي نفسك عشان تتلفى بالأبيض و بكيفك يا فستان يا كفن
نسمه / و لا هتقدروا على ده و لا على ده
عويس يقرب من نسمه ما بتتهزش
عويس/ قلبك قوى قوى المرادى خير
نسمه/ عندى اللى ادافع عنه و اعيش عشانه ... عيالي
عويس / هتخسرى عيالك كدا على فكره
نسمه / مش هيحصل
عويس / مين اللى مقوى قلبك و معصيكي على ابوكى
نسمه ما تديش رد فعل
عويس / تمام ... انا من اللحظه دى رفعت ايدي عنك و وريني بقي هتعملى ايه فى الدنيا دى بطولك ... مش انتى عملالي سبع رجاله فى بعض اشربي يا ... يا ام بدر
نسمه / تسلم يابا
عويس يمشي و يرزع الباب وراه نسمه تتخض و تعيط
.....................
على الطريق
قاسم سايق عربيه و جنبه همام على رجله مازن و فى ورا اتنين رجاله
قاسم / يمين بالله يا مازن ان عملت اى شقاوه
همام / ما خلاص بقي يا عم مش هيعمل و بعدين هو وعدنى مش كدا
مازن / الزيني ما يخلفش وعده ابداااااااا
همام / راجل ياض
قاسم / و اخرتها
همام / يا عم خير بإذن الله
تليفون همام يرن يطلعه و يرد
همام / السلام عليكم
عباده / ايه الاخبار اتحركتوا و لا لسه
همام / فى الطريق اهو يا كبير
عباده / فهمتهم احنا داخلين على ايه ؟
همام / ما تقلقش مفهمهم كل حاجه ما تقلقش حضرتك
عباده / و اخبار الزيني الصغير ايه انا سامع ان عندنا معجب جامد اوى بالبلد عندنا
همام / امال جاى معانا اهو
عباده / طب ادهونى كدا اسلم عليه
همام / خد ياض كلم الكبير بذات نفسه بيسأل عليك
مازن / امال انت مين
همام / ياض بطل لماضه و رد
مازن ياخد التليفون
مازن / السلام عليكم
عباده/ ازيك يا مازن بيه عامل ايه ؟
مازن / انا الحمد لله انت عامل ايه
قاسم / اسمها حضرتك انت ايه بس يا اخى دا انت
عباده/ انا تمام الحمد لله الجماعه هنا سمعوا انك بتحب القطايف عملولك كميه كبيره تكفى البلد كلها
مازن / لا انا جاى عشان احلام
قاسم / خد منه التليفون خد منه الزفت هيفضحنا
الكل يضحك
مازن / قولها ان انا جاى
عباده/ دا هى مستنياك على نار
مازن / ماشي مش هتاخر اهو .. خد عمى همام معاك اهو
همام ياخد التليفون
قاسم / انت هتتنفخ فى اول استراحه اصبر عليا
همام / تمام يا كبير فى حفظ الله فى حفظ الله ... ما تهدى يا عم و تركز فى الطريق ما تقلبناش بغباوتك دى
قاسم يبص لهمام و يتنهد و يكمل سواقه
.................
فى فيلا كارمن
كارمن قاعده فى الجنينه بتشرب نسكافيه صوفيا تدخل تقعد و هى مضايقه
صوفيا / انتى قولتى ايه لحاتم
كارمن / ما قولتش حاجه مهمه
صوفيا / امال ما فيش جديد فى الموضوع ليه ؟
كارمن / عشان الحاجات دى ما بتجيش كدا
صوفيا / ما هو لو مش حاتم يبقي غيره
كارمن / خلاص شوفى غيره عاوزه منى انا ايه ؟ من كتر الرجاله اوى ... واقفين على الباب بالطوابير
صوفيا / تمام يا مامى شكرا
صوفيا تقوم بياتريس تدخل
كارمن / خير انتى كمان
بياتريس / عموا اتخانق مع الراجل اللى عمران بعته و طرده
كارمن / كويس
بياتريس / ازاى يعني ؟!
كارمن / زى الناس ما هو ده اللى احنا عاوزينه... انتى بقي عملتى ايه ؟
بياتريس / اعتذرت له طبعا و حاولت اللطف الدنيا بس مش هقدر بجد لازم حضرتك تساعديني
كارمن / اجرى ورا صوفى و خليها تكلم عمران تبقي اديتيها حجه تكلمه و فى نفس الوقت يشد الراجل بتاعه ... خليهم يضربوا فى بعض و البقاء للاقوى
بياتريس / هو حضرتك متاكده من اللى بنعمله ده احنا كدا بنخسر عمو
كارمن / احنا كدا بنرجع ابوكى هو الوحيد اللى يقدر يصلح كل ده و عمك الوحيد اللى يقدر يرجعه
بياتريس / هو عمو عارف بابا فين ؟
كارمن / لا بس لو عاوز هيعرف
بياتريس تهز راسها
كارمن / حصلى اختك يلا
بياتريس تقوم تجرى ورا صوفيا
.......................
فى سرايا الزنايته
العربيات تركن قدام السرايا
قاسم / مش هعيد الكلام تانى
الغفير يفتح الباب قاسم يدخل بالعربيه و اول ما همام يفتح الباب مازن ينزل يجرى يعدى من بين الرجاله على جوه و الكل بيضحك الا قاسم يتنهد و ينزل
عباده/ حمد الله على السلامه السرايا نورت
همام/ منوره بناسها
عباده / اتفضلوا الاكل جاهز ناكل لقمه الاول و بعدين نوزع الرجاله على مطارحهم ... طبعا انت و ابو مازن هنا فى السرايا فى المضيفه و لا ايه
همام / و ماله ناكل لقمه و نريح شويه و بعدين استاذنك كنت عاوز اطمن على يونس
عباده / ماله يونس
همام/ كنت سمعت انه منصاب و كدا
عباده يبتسم و يهز راسه تمام و يدخلوا المضيفه و قاسم عينه على السرايا
عباده / ما تقلقش عليه و انساه خالص
قاسم / انا بس خايف من شقاوته دى
عباده / هيكون اشقي من عيالنا يعني يا راجل ما تاخدش الدنيا على صدرك اوى كدا الدنيا ابسط من كدا بكتير سيبه يعيش سنه
قاسم يبتسم و يهز راسه
عباده / يلا بقي الاكل هيبرد دا انا ما رضيتش اكل مستنيكوا
قاسم / اتفضل
الاتنين يدخلوا المضيفه احلام تطلع من السرايا شايله مازن و يروحوا الجنينه الورانيه
.......................
فى اوضه مهره
صوفيا تفتح الباب تلاقي مهره فاتحه فيديو تعليم لغه الإشاره و بتتكلم
صوفيا / يخربيت الفراغ اللى مالى حياتك بقولك ايه ما تيجي نخرج
مهره تقفل الفيديو و تطلع نوته
صوفيا / انتى لسه هتكتبى انا زهقانه جدا يخربيت الفراغ اللى الواحد عايش فيه ده
مهره تكتب
مهره / انتى قررتى تضيعي السنه انتى كمان ؟
صوفيا / يعنى هو الدنيا واقفه على الترم ده يعني هبقي اعيده عادى يعني كبرى دماغك
مهره تتنهد
صوفيا / ممكن نخرج بقي
مهره تكتب / هنروح فين
صوفيا / اللبسي حاجه حلوه و الباقي عليا
مهره تهز راسها موافقه صوفيا تبوسها و نطلع بره مهره تقوم تفتح الدولاب و تطلع طقم
......................
فى الجنينه الورانيه
احلام / لا طبعا انا بحبك جدا يا مازن
مازن/ امال مش بتيجي عندنا ليه
احلام / ما حدش جابني
مازن / يعني انا الصغير خليتهم يجيبونى و انتى يا كبيره مش عارفه تيجي
احلام / انت صغير اه بس انت راجل و بعدين انت اللى مستعجل اوى انا فعلا كنت هاجى فى اول فرصه
مازن / يعني انتى مش بتعاملينى كويس عشان انا ضيف لكن لو كنت عايش هنا كنتى هتحبى ولادك اكتر منى و تلعبى معاهم و تسيبيني
احلام / اولا انا ما عنديش اولاد ثانيا انت لو بتتكلم عن اللى فى البيت عندك فانا متاكده ان فى سوء تفاهم و انك واخد الموضوع بحساسية زياده عن اللزوم... انت كلمت بابا فى الموضوع ؟
مازن يهز راسه لا
احلام / كلمت اى حد ؟
مازن / ستى
احلام / و قالت ايه
مازن/ بتقول ان ما ينفعش تبقي طلباتى اوامر و ان الناس تسيب اللى فى ايدها و تجرى تعمل اللى انا عاوزه مع انهم بيجروا يعملوا نفس الطلب لو حد غيرى طلبه
احلام / عاوز تقنعنى ان السرايا كلها بتعمل معاك كدا ؟
مازن / انا بطلب الحاجه مره واحده
احلام / يا واد يا كاريزما
مازن / يعني ايه ؟
احلام / طب قولى ... انت الموقف ده اتكرر معاك كام مره
مازن / مش عاوز اتكلم فى الموضوع ده
احلام / ليه بس يمكن لما تحكيلي اقدر اساعدك
مازن / ستى بتقول ان بابا لو عرف هيزعل و انا مش عاوزه يزعل
احلام/ يا حبيبي !!!
مازن / هو انا لو جيت عشت هنا على طول هتعملوا معايا كدا انتوا كمان ؟
احلام تهز راسها لا مازن يحضنها امين يدخل
امين / الله الله دا انا شكلى جيت فى وقت مش مناسب
احلام تغيظ امين
احلام / بيحبنى و انت لا
امين / صحيح الكلام ده يا ميزو ما بتحبش عمك امين
مازن/ بحبك بس بحب احلام اكتر
امين / طب ابوك ماشي تحب تروح معاه ؟
مازن / هو احنا لحقنا!!!
امين / لا دا مشوار و راجع على طول
مازن / خلاص هستناه هنا
امين / مش هتعيط لما يمشي يعني
مازن / لا هقعد مع احلام
امين / يا بركاتك يا احلام
احلام / عقبال ما اقعد بعيال اخوك المحجر ده
امين / من بقك لباب السما امين
امين يمشي يروح لقاسم
امين / يلا يا عم الأوفر بيقولك هيستناك هنا لا عيط و لا صرخ و لا شبط و لا اى حاجه من الفيلم اللى كنت عاملهولنا ده
قاسم/ طب و اخرتها
امين / هو فى ايه انت مضايق بجد !!
قاسم / طب هى بتعمل ايه معاه طيب انا نفسي اعرف بتعامله ازاى و لا بتكلمه فى ايه
امين / ما اعرفش بس انا دخلت لقيتهم حاضنين بعض و فراشات و قلوب و حاجه فى منتهى الجمال اللهم بارك
همام يطلع راسه من العربيه
همام / ما تيلا يا عم مش اطمنت على الواد خلينا نمشي بقي
امين يروح يركب و قاسم يركب ورا و باين عليه مضايق و امين يسوق
......................
فى حفله عيد ميلاد
صوفيا تدخل هى و مهره تسلم على شباب و بنات كتير
صوفيا / هااااااى
بنت ١ / مش ممكن انا قولت مش هتيجي عشان مامتك تعبانه و كدا
صوفيا / بقت احسن كتير و بعدين انا مش ممكن اتأخر عن ماروسكا ابدا هى فين
بنت ٢ / مش عارفه كانت هنا من شويه مش عارفه اختفت فين ... مش هتعرفينا
صوفيا / ايه يا زهايمر دى مهره اختى انتى نستيها و لا ايه ؟
بنت ٢ / مش ممكن انتى خسيتي خالص رقم الدكتور بتاعك نااااااو
مهره تضحك و تعمل مش عارفه
صوفيا/ مهره دخلت فى اكتئاب كدا و للاسف هو ده اللى خلاها تخس جامد كدا بس انا قولت مفيش حاجه فى الدنيا ممكن تفرق معاها قد الاتموسفير ده
بنت ١ / لا ما تقلقيش خالص دا احنا هنفرفشهالك اخر فرفشه
البنات يضحكوا
صوفيا / طب انا هسيبكوا ثوانى ادور على المجرمه دى مش ممكن غطست فين بس ... هاجى على طول ما تتحركيش من هنا اوك
مهره تهز راسها بحرج صوفيا تمشي مهره تبص للبنات و تبتسم بحرج
بنت ١ / انا هروح اجيب حاجه اشربها
بنت ٢ / هاجى معاكى نجيب ليكي حاجه يا مهره ؟
مهره تهز راسها لا بابتسامه يسيبوها و يمشوا تقف تتفرج على الشباب و البنات واقفين جماعات و بيضحكوا و يهيصوا و هى واقفه لوحدها كل شويه تبص فى الساعه شاب يدخل فى ايده كبايتين عصير
الشاب / انا مش بعاكس ولا حاجه بس شوفتك واقفه لوحدك و مفيش معاكى اى درينكس قولت ابقي زوق مش اكتر انا صفوان اخو ماروسكا ... اتفضلى
مهره تبتسم بحرج و تدور بعنيها على صوفيا
صفوان / انا اول مره اشوفك انتى من صحبات ماروسكا فى الجامعه و لا فى النادى ... اتفضلى
مهره تطلع الموبايل و تكتب
مهره / انا اخت صوفيا صاحبتها بس مش عارفه هى راحت فين
صفوان / مارو فوق بتعمل السكند لوك ... البنات دول عليهم حاجات غريبه ... بس انتى شكلك مش منهم
حاتم يدخل
حاتم / هى فعلا مش منهم ازيك يا صفوان
صفوان/ اهلا ... عاش من شافك انا ما كنتش اعرف انك معزوم
حاتم / و دى حاجه حلوه و لا حاجه وحشه
صفوان / عيب يا راجل البيت بيتك ... ثوانى هجيب ليك درينك و ارجع على طول
حاتم / خد وقتك ... ازيك يا مهره
مهره تبتسم صفوان يمشي حاتم يكب العصير على الزرع
حاتم / مش كل الناس كويسين يا مهره و المفروض انك اتعلمتى ده ... ما تاخديش اى حاجه مفتوحه من اى حد الا لو كنتى تعرفيه كويس ... و حتى دول دلوقت بقي فيها كلام
مهره تبص على العصير و تبص على الناس فى الحفله
حاتم / عامله ايه ؟
مهره تهز راسها و تبتسم و ترجع تدور بعنيها على صوفيا
حاتم / لو مضايقه من وجودى انا ممكن امشي انا جيت بس عشان ما حدش يضايقك مش اكتر ... انا عارف انك مش واخده على الدنيا هنا ... انتى مختلفه
مهره تبتسم بحرج و تبص الناحيه التانيه و الاتنين يقفوا فى صمت مهره تحاول تتصل بصوفيا تكنسل عليها
حاتم / لو زهقتى انا ممكن اروحك
مهره تهز راسها لا حاتم يهز راسه تمام صوفيا تدخل
صوفيا / حاتم ازيك ايه الصدفه الجامده دى
حاتم / عامله ايه
صوفيا / مخصماك بس صالحتك لما شوفتك
حاتم / ليه بس انا عملت ايه
صوفيا / ما عملتش بدلع عليك
صوفيا و حاتم يضحكوا
حاتم / ادلعى براحتك ... اصل انتى ما تعرفيش صوفيا دى بالنسبالى اختى الصغيره الدنيا كلها فى كفه و هى عندى فى كفه تانيه خالص
مهره تبتسم
صوفيا / اختفيت من ساعه ما كلمت مامى فى المكتب
حاتم / كنت مشغول و الله و بعدين ما انا هنا اهو
صوفيا / انا قولت
حاتم / ما تقوليش حاجه و ما اعتقدش انك ينفع تستعجلي نهائى فى الحاجات دى
صوفيا / فى حاجات لو ما لحقتهاش وارد جدا تطير منك
حاتم / يبقي ما كانليش نصيب فيها و انتى عارفانى كويس لا ببص ورايا و لا بتفرق معايا الحاجات دى
بنت تدخل لابسه فستان احمر
صوفيا / بيقولوا ده السكند لوك و فى غيره فستانين كمان
حاتم / هروح اسلم عليها و اديها هديه عيد ميلادها و بعدين امشي من بره بره ... سعيد انى شفتكوا
صوفيا / هنشوفك تانى امتى طيب
حاتم / اكيد هنتقابل هنروح من بعض فين
صوفيا / اكيد
حاتم يمشي مهره تطلع الموبايل و تكتب
مهره / اخو صاحبتك جابلى عصير و حاتم كبه
صوفيا تضحك
صوفيا / اصل صفوان ده عليه مقالب انما ايه ... كلنا ياما شوفنا منه
مهره تكتب / هنمشي امتى
صوفيا / لحقتى تزهقى !!! دا انتى ممله اوى
مهره تشاور على رجلها واقفه
صوفيا / اوك اوك خلاص يلا بينا
صوفيا و مهره يمشوا
.............................
فى شقه جوزيف
مختار / انا هتجنن لحقوا امتى
جوزيف / انت غريب جدا هو انت فاكرها مش هتعمل حسابها على حاجه هبله زى دى
مختار/ و اخرتها يعني
جوزيف / ما اعرفش انا زيي زيك على فكره
مختار / طب انا متجوز انت ايه ؟
جوزيف / انا اخر همك فى الحكايه دى فكر فى العيال الصغيره اللى مش فاهمين اى حاجه و لا عارفين عواقب اى حاجه
مختار/ اهى دى مصيبه تانيه
الباب يخبط مختار يقوم
مختار / دا اكيد همام قال عاوز يجي يسلم عليك
جوزيف / فيه الخير
مختار يفتح يلاقى همام و امين و قاسم
مختار / اتفضلوا اهلا و سهلا
امين / عربيات الرش اشتغلت تانى
مختار / شوفتها
همام / هى المحافظه عارفه بالبتاع ده
مختار/ على الورق ده رش ناموس
قاسم / بس فى معامل و تحاليل لو حد اشتكى
جوزيف / المعامل معاملهم و الورق ورقهم و كلو فى السليم
همام / سلامتك ما تاخذنيش
جوزيف/ نورت البلد
همام / قاسم ابن عمى
جوزيف / غنى عن التعريف
قاسم / انت تعرفنى
جوزيف يبتسم
جوزيف / هو فى حد نزل اسكندريه و ما جريش على أسماك الزيني ... دا براند ... احلى طاجن سي فود بالوايت صوص فى العالم مش فى مصر بس تحياتى للشيف
قاسم / شكرا
الكل يقعد
جوزيف / قولى بقي الكبير جابكوا على ملا وشكوا و قال ليكوا ايه
همام / بالنسبالى انا جاى فى خير بس ادعيلي ربنا يتمها على خير
قاسم يبص على همام باستغراب
مختار / البلد محتاجه تأمين من حديد فى كل شارع و فوق اسطح البيوت الناس دى بتعرف تعدى بين الكاميرات بسهوله و عشان كدا مش هينفع نعتمد عليها و برده ما ينفعش نجيب ناس ما نثقش فيهم
همام / و احنا عنينا ليكوا
جوزيف / و دا لحد امتى
همام / مش فاهم
جوزيف/ الحوار ده مش هيبقي يوم و لا اتنين هتستحملوا لحد امتى
همام/ سبها على الله
جوزيف / و نعم بالله ... هقوم اعمل ليكوا شاى
امين / ما تتعبش نفسك هعمل انا
امين يروح المطبخ و قاسم و جوزيف بيبصوا لبعض جوزيف يبتسم قاسم يبتسم بتوتر
.........................
فى شقه عمران
عمران / طب ما تكلميها انتى جايه تكلميني انا فى ايه ؟
نجاه / ما اعرفش بس مضايقه اوى
عمران / خرجت مع اختها ساعه و روحت ما تكبريش المواضيع
نجاه / يعني انت تعرف عن مهره انها بتروح الحفلات اللى زى دى
عمران / راحت و ما انبسطتش و روحت خلاص موضوع و اتقفل
نجاه / انا مش مطمنه عليها
عمران / و لا انا
نجاه/ شوفت
عمران / بس ما فيش فى ايدي اكتر من اللى بنعمله
نجاه / دا كلامك يعنى
عمران / كلميها و اتفقوا تخرجوا و ماما معاكوا اشغليها انتى فى جو بتحبه احسن
نجاه / تمام هعمل كدا ... هتيجي معانا ؟
عمران / ما اوعدكيش اديكي شايفه اللى انا فيه بس هحاول سبيها لله
نجاه / تمام اسيبك تذاكر و اسفه انى عطلتك
عمران يبتسم نجاه تطلع بره تلاقي جابر واقف
نجاه / نفس كلامك
جابر / طب شوفتى بقي
نجاه / بس انا مضايقه و الله و ما تجبليش حلويات انا هفشول منك كدا
جابر / مش هرد عشان بترجعي تتعصبى و انتى مش ناقصه
نجاه / احسن ... انا هتوضي و اصلى متوضي تأم بيا
جابر / متوضي
نجاه / تمام افرش على ما اجى
جابر / عيني
نجاه تروح الحمام و تقفل الباب جابر يفرش سجاده الصلاه
.......................
فى مضيفه الزنايته
قاسم / دا على كدا هنعانى هنا
همام يضحك
قاسم / بتضحك علي ايه مش فاهم
همام / عشان انت فاهم
قاسم / لا و ربنا ما فاهم
همام/ قصدى فاهم اللى هتحس بيه الناس دى قعدت فتره مش فاهمين ايه اللى بيحصل لهم
قاسم / ما فرقتش
همام / لا فرقت طبعا
قاسم / و ربنا ما فارقه كدا كدا هيبقي فى نفس التاثير فاهم سببه بس ماعنديش العلاج
همام/ مصلحه يمكن ساعتها نجوزك
همام يضحك قاسم يبوز
قاسم / ما فيهاش هزار دى ... هو الواد مازن فين صحيح
قاسم يطلع بره يشوف مختار واقف مع عباده يشوفوه
مختار / خير يا قاسم ناقصكوا اى حاجه ؟!
قاسم / كنت بسأل عن مازن يعني يكون تعب الجماعه و لا حاجه
مختار / لا ما تشغلش بالك و على العموم انا هتصل بأحلام دلوقت اطمن لك
مختار يطلع التليفون
قاسم / خليها تنزله لو مش هتعبها انا ما اضمنوش فى نومته و هى مش معاها غيار
عباده / مفيش اكتر من هدوم العيال جوه هتتصرف ما تقلقش كدا
مختار / ايوه يا احلام ازيك اخبار مازن ايه ؟ ... نايم !!! ... نايم
عباده / خلاص يا عم سيبه
قاسم / هيفضحنا و الله
مختار/ تمام اسيبك تشوفى اللى وراكى ... تصبحى على خير انتى كمان
قاسم يتنهد
عباده / لو فى حاجه هتبعت لك ما تقلقش ادخل انت بس ارتاح بقي
قاسم يهز راسه و يدخل
همام / فين الواد ؟!
قاسم / نام
همام / طب ما هو مصلحه اهو نام انت كمان
قاسم يهز راسه و يروح يفرد ضهره و مش مرتاح
همام / ما تقلقش اوى كدا هتاخد بالها منه
قاسم/ نام يا همام بالله عليك ... نام
همام يهز راسه و يلف يديله ضهره و ينام قاسم يتنهد و ينام
........................
فى النادى
مهره بتتمرن عمران يدخل
عمران / مهره !!
مهره توقف الفرس و تقرب و تتكلم بالاشاره " عملت ايه فى الامتحان " عمران مش فاهم مهره تطلع الموبايل و تكتبها عمران يضحك
عمران / اللهم بارك لا دا احنا اتقدمنا خالص انا ما اخدتهاش لسه
مهره تبتسم
عمران / هى نجاه و جابر لسه ما جوش قالوا هيقابلونى هنا
مهره تشاور عليهم جايين بعيد من وراه يلف يشوفهم
عمران / هروح اجهز و اجيلك
مهره تهز راسها ماشي نجاه و جابر يدخلوا
نجاه / عارفه لو كنت جيت ما لقتكيش كنت نفختك
مهره تكتب / جيت جيت لفى و تعالى
نجاه تبتسم و تمشي و جابر لسه واقف مكانه
جابر / كان حلو العيد ميلاد ؟
مهره تهز راسها لا بقرف جابر يهز راسه
جابر / مرتاحه فى البيت عندكوا؟ بيعاملوكى كويس ؟
مهره تهز راسها اه بابتسامه جابر يبتسم
جابر / الحمد لله ... احنا للاسف مش هنطول هنا بس ... انا جبت لك دى
جابر يطلع علبه من جيبه فيها سلسله زى بتاعه نجاه
جابر / اللبسيها طول الوقت و مهما حصل ما تقلعيهاش ... لو حسيتي بخطر فى اى وقت او اى مكان ... لو حسيتي انك عوزانا نيجي ... لو حسيتي انك مش مبسوطه او مش مرتاحه مهما كان السبب ... اضغطي عليها كدا
جابر يدوس فى نص الورده رساله توصل موبايله
جابر / الرساله دى هتوصل باسمك و اللوكيشن بتاعك لكل ارقامنا و أرقام رجالتنا و كلنا بلا استثناء هنتحرك ناحيتك مهما كان اللى ورانا هنجيلك... طبعا أقرب حد هيجي الاول فاى كان الوضع لازم تبقي مطمنه اننا عمرنا ما هنسيبك و جنبك
مهره تبتسم نجاه تدخل راكبه فرس و وراها عمران
نجاه / اديتهالها ؟
جابر يرفع ايده مهره تمد ايدها و تاخدها و تبتسم
نجاه / اللبسيها و حطيها جوه هدومك و ما تقوليش لاى حد عليها و لا حتى اخواتك
الابتسامه تروح من وش مهره
نجاه / لو حد سألك قولى هديه جيالى و بحبها او اى حجه مهما حصل ما تقوليش لجنس مخلوق عن حقيقه السلسله دى مهما كان
مهره ما بتردش و حزينه
عمران / هنتمرن و لا ايه
نجاه تبص له و تاخد الفرس و تتحرك و عمران يتحرك بالفرس ناحيه مهره
عمران / لو مش عاوزه تلبسيها براحتك و لو عاوزه تقوليلها براحتك بس المشكله ان نجاه لما اتخطفت اللى خاطفها كان عارف عن السلسله فاول حاجه عملها شدها و رماها و مشكله البنات انهم رغايين شويه فممكن الكلام يتنطور مش قصدنا نقول اى حاجه وحشه عن اهلك مع ان اللى شوفناه يخلينا نشك فى نفسنا حتى
مهره تشاورله اخويا
عمران / مش شرط و الله بس فعلا الدنيا ما عادش فيها امان و احنا عاوزين نامنك باى شكل انتى بجد غاليه علينا اوى
مهره تهز راسها
عمران/ ها هتلبسيها؟
مهره تهز راسها اه عمران يبتسم مهره تلبسها و تدخلها جوه هدومها
عمران / شكرا
مهره تهز راسها
نجاه/ كنت فاكره انكوا عاوزين تتمرنوا
عمران و مهره يروحوا ناحيه نجاه
......................
فى جنينه الزنايته
همام / انا فاهم الكلام ده و وارد يحصل بس مش للدرجه يعني مش لدرجه انه يعمل له مشكله نفسيه
امين / انا ما افهمش فى النفسيات و الكلام ده احنا كنا بناخد على دماغنا و ما بنقولش اى حتى الجيل الجديد بتاع التربيه الايجابيه هو اللى حساس زياده و مش مستحمل كلمه و على راى امى كل ما العيل كان اذكى كل ما كانت تربيته أصعب
همام / ايوه سمعت الكلام ده
امين / المهم الواد خايف يقول لابوه ليزعل و احلام مش عاوزه تبان قدامه انها فتانه و نقلت كلامه عشان برده ما يفقدش ثقته فيها و يتكلم معاها تانى
همام / فاهم طبعا فاهم
امين/ هو الموضوع مش خطير و سهل يتعالج فبلاش نكبر الموضوع على الفاضي ... نلمه احسن و لا انت ايه رايك
همام / لا انا هتعامل انا على طول
....................
أنت تقرأ
الكبيره ٢ بقلم / لولو_محمد
Humorالحرب لسه مستمره و الحقيقه مسيرها فى يوم تظهر النور و كل واحد لازم يختار طريقه
