الكبيره ٢ بقلم / لولو_محمد

الحلقة ٤٧

((((((((( الكبيره ٢ )))))))))
#لولو_محمد
الحلقه ٤٧
عباده يبص فى الساعه
عباده / زمانه عرف ... بصي احنا ما بنحبوش ... لا احنا مش طايقينه و بنكرهه و كل حاجه كل حاجه هو ماشي
نجاه تضحك
عباده / بس احنا مش شياطين ... و فى خاطر برده لعضم التربه ... و لعمك مختار ... و ليكي
نجاه / و انا مالى !!
عباده/ و حياه امك
نجاه / ايه يابا فى ايه
عباده/ المشكله انى ما ليش حكم على بحرى و هو دلوقت فى اسكندريه
نجاه/ همام
عباده / جوزيف قتل ابوه
نجاه / مش هو
عباده / ما تضحكيش على نفسك يا بت جوزيف اللى رتب كل ده
نجاه / ماشي و جوزيف مات فى تركيا دلوقت اللى هنا ده يونس بدل ما يروح يتشطر عليه يروح يتشطر على المجلس ... انا هكلم همام
نجاه تقوم تجيب التليفون و تبص لابوها متابعها
نجاه / ايه عاوزنى اسكت
عباده / هتقوليله ايه ... ما تقتلوش عشان خاطرى ؟!
........................
نجاه / اكيد لا الموضوع مش كدا
عباده/ امال الموضوع ازاى يعني انتى ناويه تقوليلي ايه بالظبط... لا لا لا ... السؤال الأهم انتى ماسكه التليفون فى ايدك و بصالى ليه ... ما اتصلتيش على طول ليه
نجاه/ هو مش هيعمله حاجه على فكره
عباده/ واثقه ؟
نجاه تروح تقعد جنب ابوها و تمسك ايده يحط ايده التانيه تحت خده و يسند عليها و يبص لنجاه
نجاه / انسان غلط و تاب نبقي كلنا عليه
عباده / ما لازم حد يدفع الفواتير دى كلها امال حقوق الناس دى كلها هتروح كدا... يعني احنا مثلا ما قولناش لمخلوق مين الجدع ده و عملنا نفسنا ما نعرفش تفتكرى لو اهل البلد شموا خبر ان ده اللى عمل فيهم و فى عيالهم كل ده هيسيبوه دول هياكلوا لحمه ني هتقفى لاهل بلدك و تدافعى عنه
نجاه / ده مش جوزيف
عباده/ و لا هم اصلا يعرفوا ان كان اسمه جوزيف من أساسه
نجاه / باع كل حاجه و جرى يدور على اهله و أهله رموه قصاد المدفع و قالوا احنا مالنا ... دا ظلم
عباده يقوم يقف
عباده / انا هروح امر على الرجاله ليكون حد ناقصه حاجه
نجاه / دا مش عدل
عباده / هو ربنا بيظلم حد؟
نجاه / حاشا لله
عباده/ خلاص ما تخافيش عليه اوى كدا اللى ربنا كاتبهوله هيشوفه ... و على قد نيته هياخد
عباده يمشي و هو بيضرب كف على كف نجاه تقعد على السرير و هى مضايقه و باصه فى الموبايل و بتفكر
.........................
فى شقه شحته
شحته / تشرب حاجه يا ابنى
همام / كتر خيرك انا جاى فى كلمتين و ماشي بإذن الله مش هطول
شحته / ولو برده انت اول مره تنورنى فى بيتي
جوزيف / اتنين شاى على نار هاديه يا شحته
شحته / تمام
شحته يروح المطبخ و جوزيف و همام باصين لبعض
جوزيف / تتكلم انت و لا اتكلم انا
همام / هتكلم انا
جوزيف / سامعك اتفضل
همام / انت طبعا مستغرب انا عرفت مكانك ازاى
جوزيف يهز راسه لا و هو مبتسم
جوزيف / بالعكس انا ما حاولتش إدارى اصلا و عارف انكوا ورايا من اول ما خرجت من البيت فى القاهره
همام / كويس نخش بقي فى الموضوع... أنا ليا حق عندك و جاى اخده ... تارى ... تار ابويا اللى دمه فى رقبتك
جوزيف يهز راسه ايوه
همام / حتى لو انا ربايه بحرى انا راجل صعيدي ابا عن جد ... و ما بسيبش تارى ابدا
جوزيف يهز راسه ايوه
همام / يمكن فى ظروف تانيه ما كنتش اترددت ثانيه ... بس ... انا ما حدش فى اهلى عارف ... ما حدش عارف انى عارف مكان اللى قتل ابويا و قاعد قدامه وش لوش و ما برفعش سلاحى و اخلص عليه و اخد تارى ... انت عارف لو حد شم خبر انا وضعى هيكون ايه ؟
جوزيف / انا ما اديتش امر مباشر ان ابوك يموت انا شخصيا ما كانش هيفرق معايا ان انت شخصيا تموت
همام يبتسم بسخريه و صدمه
جوزيف / كنت متوقع اجابه تانيه ؟
همام / يمكن شويه خيشا
جوزيف / عارف ان الصراحه وقاحه بس ... دى الحقيقه اعمل ايه ... انا خطتى كان فيها موت اى حد فى طريقي ... دى حاجه بديهيه ما اقدرش انكرها
همام / و الوضع دلوقت ؟
جوزيف/ اللى انت عاوزه ... عاوزها حرب عاوز هدنه عاوز تنسي ... اللى يريحك ... و مش لازم تبلغنى بقرارك انا مش منتظر منك حاجه ... انا حتى انك تقعد قدامى تتكلم معايا كدا بصراحه مستغربها يعني الاول ... كان فى اتفاق بيني و بين كبيركوا ... بس دلوقت المفروض ان الاتفاق ده لاغى و انا على أرضك.. نظريا يعنى ... فبكيفك اللى يريحك اعمله
همام / دا ايه التصالح مع النفس ده ... و لا ده غرور و مش همك
جوزيف / انا بعرف ادافع عن نفسي كويس و مش مستني منكوا حاجه ... ما كنتش مستنى و مش هستنى ... بس اكيد لكل فعل رد فعل
همام / احنا رد الفعل ده ... احنا  ...  انت كنت الفعل و عملت كتير اوى
جوزيف / طب و ما دام انت عارف ده قاعد قدامى ليه ... ما ترفع سلاحك و تصفيني و تخلص ... مش ده هيريحك و يريح جته ابوك فى قبره على كلامكوا ... قاعد بتتكلم معايا ليه ما خلاص ... بتهرى كل ده فى ايه ما تنفذ
همام / مش ده اللى انا عاوزه
جوزيف / ايوه كدا ننجز وقت ... انت بقي عاوز ايه
همام / عاوز اللى فوقيك ... من أكبر راس
جوزيف / و انت شايف انك قده ... لما اصغر راس عمل فيكوا كدا فاكر انك قد اكبر راس
همام / ما عنديش اللى أبكى عليه
جوزيف/ و لا عيالك بما فيهم ابن اخوك الله يرحمه .. مراتك و امك ... اهلك كلهم
همام / ليهم رب اسمه كريم
جوزيف / يعني انت جاى عاوزنى أدلك على طريق المجلس ... للاسف لو كنت اقدر كنت نفذت من زمان ... تارى معاهم اكبر من تارك بكتير
همام / حق ابوك الله يرحمه ؟
جوزيف يبتسم بسخريه و يبص الناحيه التانيه و يرجع يبص لهمام
جوزيف / حقى ... ابويا ده انا ما اعرفوش و بطلت ادور عليه من زمان ... حقى و حق كل الناس اللى حبيتهم فى حياتى و المجلس حرمنى منهم ... حق سنين عمرى اللى قضيتها فى عذاب
همام / و ما دام كدا كنت بتساعدهم ليه
جوزيف / عشان اوصلهم ... عشان اكبر و اكبر و اقرب لحد ما يثقوا فيا و اوصلهم
همام / انت كداب
جوزيف / هكدب عليك انت !! همام ما تتغرش فى نفسك انا لو عاوز اصفيك مش هتاخد فى ايدي غلوه فوق لنفسك ... انا لو عاوز ادارى منك هلففك حوالين نفسك زى ما لفتتكوا سنين آخرها تركيا ... همام انا اعرف عنكوا كل حاجه و انتوا ما تعرفوش عنى حاجه
همام / خفت انا من الكلمتين دول
جوزيف/ عرفت ليه بقي المجلس اختار نجاه بينكوا كلكوا
همام / خرج الحريم من كلامنا انا جايلك راجل لراجل ما تجيبش سيرتها
جوزيف / ليه مش هى اللى طردتك انت و اهلك لما روحت تخطبها
همام / دا كلام قديم و ما لكش دخل بيه قولت
جوزيف / تمام
همام / لو فاكر انك هتقدر تستفزني تبقي غلطان
جوزيف / ما بحاولش اصلا
همام / انا هسالك سؤال واحد ... سؤال واحد بس اجابته هتحدد انا هتعامل معاك ازاى
جوزيف / اتفضل
همام / انت مين فيهم ..  جوزيف و لا يونس
جوزيف/ اجابته سهله جدا ... بس عندك انت ... انت عاوزنى ابقي مين هكون ليك
همام / دى مش اجابه
جوزيف / انا لا ده و لا ده و لا دنيال و لا يوسف المصرى و لا اى حد من دول ... انا شبح ما ليش وجود فى الدنيا دى و لا ليا بلد انا زى الحربايه بتلون بالبيئه اللى بتحط فيها و بعيش وسط اهلها فهمت حاجه ؟
همام / انت من جواك عاوز تكون ايه ... عاوز تكون يونس هحط ايدى فى ايدك و ادوس على قلبي بالجزمه و احتسب صبرى عند ربنا عاوزها حرب هقيدهالك نار ما لهاش اول من اخر
جوزيف يمد ايده لهمام همام يسلم
همام / الفاتحه على الخاين و ابن الحرام
جوزيف / همام انا ابن حرام يا همام
همام / الفاتحه على الخاين
جوزيف / الفاتحه
.......................
فى البلكونه عند نجاه
نجاه واقفه و سانده بجنبها على السور بتشوف الشروق مختار يدخل
مختار / اللى واخد عقلك
نجاه / ابدا مفيش حاجه كنت بتفرج على الشروق ... عن اذن حضرتك
نجاه تيجى تعديه
مختار / الله هو اذا حضرت الشياطين و لا ايه
نجاه / استغفر الله انا كدا كدا كنت داخله
نجاه تبتسم و تحاول تعديه و تدخل
مختار/ هو انتى زعلانه منى
نجاه / لا خالص هو بس حضرتك مش محرم عن اذنك
نجاه تتحرك ناحيه اوضتها
مختار / هو انا بتربى معاهم !! طب هم عيال و زعلوكى انا بقي ذنبى ايه
نجاه تبصله
نجاه / ايه الكلام ده يا عمى دا شرع ربنا ما فيهوش جدال و لا استثناء
مختار/ معاكى حق انا مش معترض بس دا انا اللى مربيكي
نجاه/ عن اذنك
نجاه تدخل اوضتها مختار يدخل اوضه يلاقي عباده قاعد بيقرأ قران
مختار / تقوم تشوفلك صرفه مع بنتك حالا بدل ما هروح ابطح عيالك الدكوره الاتنين
عباده / صدق الله العظيم ... لا اله الا الله فى ايه على الصبح
مختار / بتقولى انت مش محرم و مش عاوزه تقف تتكلم معايا
عباده يضحك مختار يقعد جنبه و هو هيطق
مختار / انت بتضحك على ايه بقى بعد العمر دا كله اكتشفت انى مش محرم
عباده/ و انت يعنى مش عارفها هى بس مضايقه شويه و بكره و لا بعده
مختار / احنا بنتكلم عن نجاه ... و بعدين مضايقه مش مضايقه انا ذنبى ايه
عباده / لا اله الا الله يا مختار مالك يعنى ايه هتموت لو ما وقفتش تتكلم معاك
مختار / لو عملتها معاك مش هتضايق
عباده يضحك
مختار / يلا هبطحك انت كمان بلاش استفزاز
عباده / انا ابوها يا مختار
مختار / و انا كمان ... انا اللى مربيها انا كل حاجه هى عرفاها انا اللى معلمهالها
عباده/ و انا كنت مسافر و لا ايه
مختار/ و كل حاجه عدله انت عارفها انا اللى معلمهالك
عباده / لا حول و لا قوه الا بالله اهدى انت بس و هى يومين تلاته و مش هتقدر على الحوار ده و هتراجع نفسها و هتلاقيها راجعه فى كلامها
مختار / دلوقت
عباده/ يا عم احنا فى بيت عيله و تمرينها ايه هتعيش لوحدها يعني اكيد مش هتقدر
مختار / و ان قدرت
عباده / يبقي خير
مختار / خير انها ما تكلمنيش
عباده / ابقي خد محرم فى ايدك يا مختار ما تقرفنيش معاك بقي
مختار / تصدق انك تنح
عباده / ايوه انا كدا اطلع بره بقي خليني اخلص الورد بتاعى دا انت غريب اوى
مختار / انا اللى عملت كدا فى نفسي انا اللى سكت على الأربع بغوله اللى عندى و ما جبتليش بنت تقولك انت مش محرم
عباده يضحك على آخره
مختار/ طب و الله ما انا ساكت لها
مختار يجي يقوم عباده يشده
عباده / هم بيكبروا بيتهطلوا بصحيح و لا ايه اقعد يا عم مش قادر لك
مختار / انا مضايق اوى يا عباده مضايق اوى اقسم بالله
عباده / ما دا اللى هى عوزاه
مختار / انا عارف انها صح بس مضايق ... مضايق اوى و عارف ايه اللى يغيظ
عباده / ايه ؟
مختار / انها لو رجعت فى كلامها هبقي مضايق برده ... لأنها كان معاها حق و ما ثبتتش على موقفها ... انت عارف يونس قالى ايه و هو ماشي
عباده يتنهد
عباده / ايه ؟
مختار / قالى لو كان نفس الموقف حصل مع جابر ما حدش كان اضايق و لا اتحرك
عباده / بتقارن مين بمين
مختار/ معاه حق زى ما نجاه برده معاها حق
عباده / الدنيا ما بتمشيش كدا
مختار / الحلال بين و الحرام بين
عباده / يا ابنى الموضوع
مختار / فكر فيها يا عباده ...احنا مش ملايكه
عباده / بالظبط بس مش شياطين و الجدع ده شيطان شوفت شوفت فى مده بسيطه ازاى دخل وسطينا هزنا كلنا ...يا ابنى احنا غلطانين و بنعصا ربنا بس مش مجرمين و لا غرقانين فى الحرام ... احنا بنحاول
مختار/ طب ما هو كان بيحاول
عباده / يحاول و يكمل و يثبت انه تاب و اتغير و ساعتها هفتحله دراعاتى و اخده فى حضنى و استقبله استقبال الفاتحين غير كدا مش هصدقه ... سنين يقتل فينا و يتوب فى شهر ... يا اخى دا انا حجر و انزاح من على قلبي و انت جاى عاملى فيلم
مختار يبص لعباده
عباده / انت ما قصرتش فى حاجه و اى كان اللى حصل و اللى بيحصل او اللى هيحصل مش ذنبك فاهدى و بطل تلوم نفسك
مختار / امنى عليه
عباده / و انت قلبت الارض عليه و ما سكتش لحظه خلاص الباقي فى ايده هوه
الباب يخبط و نجاه تدخل
نجاه / السلام عليكم
عباده / و عليكم السلام ... مزعله عمك ليه يا نوجه
نجاه / ما اقدرش دا حبيبي ... بعد اذنكوا كنت عاوزه اسأل هو احنا هنرجع البلد امتى
عباده / يومين تلاته كدا دياب يرجع نروح كلنا سوا
نجاه / مش فاهمه
مختار / هنغير جو كام يوم و نرجع انتى وراكى حاجه مستعجله عليها
نجاه / لا خالص انا كنت عاوزه ارتب مع مهره بس خروجه تانيه لو الدنيا سامحه
عباده/ رتبى احنا قاعدين هنا شويه
نجاه / كلنا !!
عباده / هو احنا قاعدين على حجرك ما تعيشي حياتك و احنا كمان نعيش حياتنا
نجاه / لا ما هو التجمع ده بيبقي اكيد لسبب
عباده / اه بس انتى بنت و طلوعك معانا لازم يبقي بمحرم
مختار يبص لعباده و يبتسم نجاه تبتسم و ترفع مناخيرها لفوق
نجاه/ ما حضرتك و فارس و كارم هتبقوا معايا
عباده / لا احنا التلاته هنقعد معاكى هنا نحرسك
نجاه / تمام هروح اشوف اللى ورايا لحد ما مهره تصحى عن اذنكوا
نجاه تمشي
مختار / انا ما ليش فى الجو ده هقوم امر على الرجاله
عباده / احسن خد الباب فى ايدك
مختار يطلع بره و يقفل الباب و يتنهد
مختار/ الصبر من عندك يا رب و العقل ... العقل عشان العيشه فى العيله دى سكتها على السرايا الصفرا عدل
.....................
فى شارع شحته
جوزيف ماشي فى الشارع يدخل البيت شايل كيس يفتح الباب بالمفتاح و يدخل يلاقي شنطه هدايا على السفره يروح يبص فيها يلاقي مجموعه المصاحف و كتب التفسير و فى ظرف يفتحه
جوزيف / التالته تابته حافظ على حاجتك مش فلوس حرام هى ... عمك
جوزيف يضحك و يطلع من كيسته نفس المجموعه و يصورهم جنب بعض و يبعت الصوره لمختار شحته يطلع من اوضه لابس
شحته / حمد الله على السلامه كلمتك ما رديتش
جوزيف/ اه معلش كنت بتمرن و ما اخدتش بالى غير بعدها و لما لقيتك ما بعتش رساله و ما كررتهاش قولت حاجه مش مهمه خير كان فى حاجه و لا ايه
شحته / كنت بقولك ان فى مندوب جايب لك الحاجات دى و بيقول مدفوع تمنها بس لما فتحتها لقيت فيها الجمال ده كله فرحت و سكت عرفت انها خير و خير كبير اوى ... الله ما تقولش ... الله اكبر لا و الله الله اكبر
جوزيف / انت بتقتلني ضحك بجد انت مش طبيعي
شحته / خلاص خلاص مش هافور ..  انت بتقول كنت بتتمرن طب مش كنت قولتلى كنت ظبطتك
جوزيف/ لا ما انا سايبك للتقيل انا كنت بتمرن على حاجات تانيه خالص
شحته / المهم انك بخير ... انا رايح الجيم لو احتجت اى حاجه كلمنى او تعال ..  فى اكل جوه و فى ميه سخنه فى السخان و لو احتجت اى حاجه
جوزيف / هو انت امى انا بجد حاسس انك امى ايه يا شحته مالك
شحته / يا عم فرحان بيك
جوزيف / كفايا فرحه ارحمنى
شحته / خلاص خلاص انا نازل
جوزيف / بالسلامه يلا
شحته يضحك و يمشي جوزيف توصله رساله من مختار يبص فيها
جوزيف / كنت متأكد !! دا انت كداب اوفر يا مخمخ قال متاكد قال
جوزيف يبص للكتب
جوزيف / ما هو لو متاكد باعتكوا ليه يعني
جرس الباب يضرب جوزيف يروح يفتح يلاقي بابلو
جوزيف / اهلا كنت مستنيك تعال
بابلو / انت لوحدك و لا ايه
جوزيف / ادخل تعال عاوزك تعال
بابلو يدخل جوزيف يقفل الباب بابلو يشوف الكتب يضحك بسخريه
بابلو / ايه ده
جوزيف / ما تاخدش فى بالك ... خير ايه الجديد
بابلو / دياب و مراته نازلين فى أوتيل تبعنا ..  لوحدهم
جوزيف يضحك
بابلو / وفاء كانت طول عمرها جزء من الخطه
جوزيف / عشان نلاقى طريقه ندخل السيستم اللى هم فاضلهم تكه و يفتحولهولى بالكامل انا بقي عاوز وفاء عشان تدخلني اسرق كام معلومه قبل ما يتقفل و يتعمل واحد جديد أو يتفعل جدار الحمايه ..  عبقري حقيقي عبقري
بابلو / و انت بجد مصدق انهم لسه على اتفاقهم امال مشوك ليه
جوزيف / عشان اكمل على اسكندريه و لا انت مش عارف الحوار اللى دار بيني و بين همام
بابلو / ااااه لا كدا معاك حق بس ... نجاه ايه دنيتها
جوزيف / انت ما جاتلكش تعليمات و تايه صح و مش عارف تتصرف من دماغك تبوظ الدنيا و تعك صح
بابلو / كان عندى تعليمات لحد ما انت بوظتها و عكيتها
جوزيف / احنا فين دلوقت ... انا دخلت لحد اوض نومهم و مفيش حد فتح بقه معايا بربع كلمه ... بالعكس ... دول بيحاولوا يقربوا منى و يكسبونى ... فاكر عشنا كام سنه بنحاول نكسبهم و ندخل وسطهم ... تخيل هم اللى يفتحولك الباب
بابلو / مش كلهم
جوزيف / و دا بيسبك الحكايه اكتر ... ايه اخبار دنيه شاهين عملتوا جديد معاه و لا سبتوها تبرد و تنام
بابلو / قافل على نفسه الفتره اللى فاتت
جوزيف / و انت مش عارف تخرجه من جحره يعني
بابلو / قولت اشوف الدنيا الاول قبل ما اخد اى قرار
جوزيف / شاهين بتاعك اعمل اللى انت شايفه صح هو كدا كدا لقمه طريه مش هيقاوم كتير و ما حدش مديله اهتمام انجز على ما اخلص مع بحرى
بابلو / و انت فاكر انك هتقدر على همام بطولك
جوزيف / مش كنا متفقين انه اربعه على عشره
بابلو / تمام ... سلام
جوزيف / سلام
بابلو يروح يفتح باب الشقه
بابلو / اه صحيح كنت هنسي ... احنا ما طلعناش لوحدنا فى الملعب ... المجلس بعت فريق كامل غيرنا ينفذ نفس الخطه و معاهم تعليمات ان لو وقفنا فى طريقهم يخلصوا مننا
جوزيف / و انت بقى عرفت المعلومه دى منين
بابلو / عشان انا ما جتلكش عشان ما عنديش تعليمات انا تعليماتى ان الخطه مستمره و انى اختار هنضم لانهى فريق و اختارتك و التعليمات كمان بتقول ان البقاء للاقوى
جوزيف / حقيقي انتابتنى القشعريره
بابلو يضحك و يقفل الباب و يمشي
جوزيف / اغمقت اوى ... كدا اغمقت اوى
جوزيف يدخل الاوضه و يفتح اللاب و يشتغل
........................
فى اوضه نجاه
نجاه ممده على السرير بتفكر تقوم تروح اوضه ابوها و تخبط ما حدش يرد تفتح الباب بالراحه الاوضه فاضيه تتنهد و تمسك الموبايل و تتصل بيه يرد
نجاه / السلام عليكم
عباده / صح النوم ما رضيتش ازعجك و انا نازل و نبهت على الكل ما حدش يزعجك
نجاه / هو حضرتك فين
عباده/ روحت مشوار كدا خير فى حاجه
نجاه / هو حضرتك سمعت الكلام اللى دار بيني انا و مهره امبارح ؟
عباده / انا ما كنتش معاكوا هسمعه ازاى
نجاه/ انا لابسه الخاتم و الحلق و السلسله يا بابا
عباده / حبيبتى احنا بنستخدم الحاجات دى للطوارئ حوار بينك و بين صاحبتك هنسمعه ليه
نجاه / يعني حتى ما فيش فضول تعرفوا كانت بتعيط ليه
عباده / ممكن اكلم منصور اساله ان كان احتفظ بنسخه من الحوار و ممكن انتى تقوليلى لو فى حاجه ضروريه محتاج اسمعها
نجاه/ ما انا مش عارفه المفروض اقول لحضرتك و لا لا
عباده / اه ... طب تمام ما تقوليليش ... هتحتاجى حاجه اجيبها و انا جاى
نجاه / لا تسلم
نجاه تقفل و تروح تقف فى البلكونه جابر يدخل شايل مج نسكافيه
جابر / نسكافيه؟
نجاه تبصله و تبتسم و تعديه و تدخل
نجاه / لا شكرا ... عن اذنك
جابر / حوار المحرم صح
نجاه/ اعتقد دى حاجه المفروض تشجعونى عليها مش فاهمه ليه كلكوا مضايقين اوى كدا
جابر / انا مش مضايق بالعكس انا فرحت جدا و اتمنى انك تثبتى على الموقف ده و ما ترجعيش فيه و اتمنى اكتر انك تكونى وخداه عن اقتناع مش عند معانا او انتقام
نجاه / انتقام !!! انتقام من مين و عشان ايه و ليه الاوفر ده
جابر / شوفى انتى بقي
نجاه / ايه شغل الاهتمام ما بينطلبش و لو مهتم كنت عرفت لوحدك ده ما تقول اللى جواك عادى فى وشي كدا
جابر / ما عادش فى جوايا حاجه روحى شوفى طريقك عشان اللت ده يعتبر خلوه
جابر يسيب الشقه و يمشي و يرزع الباب وراه و هى متبعاه باب اوضه يتفتح و كارم يخرج منها
كارم / هو فى ايه
نجاه / عاوزه اخرج تيجي معايا ؟
كارم / اجى هنروح فين
نجاه / اى حته بعيد عن البيت ده
كارم / تمام اديني نصايه الرجاله ترتب نفسها و اخد الاذن من ابونا و اجى معاكى فى اى حته
نجاه تروح تحضن كارم و هو مستغرب يطبطب على راسها بتردد
كارم / انتى كويسه ؟!!!
نجاه تروح اوضتها و تقفل الباب
كارم / دى اكيد الهرمونات اللى بيقولوا عليها
كارم يدخل اوضته تانى و يقفل الباب
.......................
فى البلد
ام عبده ماشيه مع محمود و فى ايدهم بدر بيجيبوله لبس
ام عبده / يا ابنى انت ابن أصول مش التانين يعني حركه زى دى لا جت من جده و لاجدته و لا خالاته و لا خيلانه و لا حتى من قرايبهم من الدرجه السابعه
محمود / انتى بتقولى ايه يا عمتى دا ابنى ده طب تصدقى و تؤمنى بايه
ام عبده / لا اله الا الله
محمود / انا ما اقبلش ان حد غريب يصرف على ولاد اخويا جنيه لما ابقي اموت ابقوا اصرفوا و لا حتى بعد ما اموت هيحتاجوا يمدوا ايدهم لحد اللهم بارك عيله الجزار من يومها ولاد عز
ام عبده / مش بقولك ابن أصول استنى اما نشوف المحل ده شكله عندهم حاجات حلوه
محمود / لا لا شكلها شعبى و ايه الاسعار دى خلينا نشوف المول اللى هناك ده فيه محلات افخم عاوزه الناس لما تشوفه تقول ايه لبس اى كلام بعد ما ابوه مات دا عبد الهادى ما كانش بيستخسر فيهم حاجه
ام عبده / حقه دا كان مهنيهم و مدلعهم تعال
ام عبده و بدر يدخلوا المول و فى اتنين شباب واقفين فى جنب بيشربوا سجاير محمود يبصلهم واحد فيهم يهز راسه بالراحه و يرموا السجاير و يعملوا بيتفرجوا على البضاعه محمود يدخل المول ثوانى و الاتنين يدخلوا وراهم المول
.........................
فى عربيه كارم
كارم سايق و هو زهقان و نجاه قاعده ورا بتكلم مهره واتس رسايل
كارم / ها حددتى رايحه فين و لا هفضل هايم فى ملكوت الله انا و الرجاله اللى ورانا دى
نجاه / انا فى حاجه كبيره اوى مضيقانى و قبل ما تفتكس ما لهاش علاقه بيونس بس عندى احساس انه هينجزهالى
كارم / و ماله خير ايه بقي الحوار الخطير اللى مضايق جنابك و ما فيش مخلوق فى الكوكب يقدر  يحله الا يونس مع العلم ان ما لوش علاقه بيه
نجاه/ سر
كارم / حلولى ... انا عارف انك كنتى ادبى بس انا انسان مش سلحفه يعنى من ذوات الدم الحار وخدالى بالك يعني مش معنى انى كنت بعامله حلو و بديله فرصه و بحبك و بحترمك و بقدرك انك اختى الكبيره انى ما بغيرش عليكي على فكره
نجاه / ما عشان امخاخكوا الضيقه دى ما بتكلمش مع حد
كارم يركن العربيه و يبصلها
كارم / سامعك اتكلمى ايه اللى مضايقك
نجاه / سر ما اقدرش اقوله بس لو ما قولتوش ممكن يحصل كارثه و لو قولته ابقي بخون الامانه فاهمنى
كارم / دا بخصوص عياط مهره امبارح ؟
صمت
كارم / طب و لامؤاخذه يعنى يونس يقدر يساعد فى الحوار ده ازاى
نجاه / اكرم اول ما شافه ارتبك و خاف و جرى
كارم / عشان معاه غسيله الوسخ
نجاه / بالظبط كدا
كارم/ ايوه طيب فين الحوار بقى
نجاه/ دا انا لسه قيلالك بالظبط
كارم / نجاه انتى كنتى نازله من البيت رايحه على فين ؟
نجاه/ هقابل مهره او كان عندى امل انها تقابلنى بس للاسف هى مع اخوها فى البيت جاب غدى و صمم يقضوا اليوم سوا و جايب بروجكتور و عامل موفى نايت و كدا
كارم / عاوزه تروحيلها البيت
نجاه / جدا بس للاسف ما ينفعش ما عزمتنيش اروح بس ... انا محتاجه اتكلم معاها تانى فى موضوع امبارح
كارم / اللى احنا ما نعرفش عنه حاجه ده
نجاه / يوووووه كل ما اقول فهمنى نرجع لنقطه الصفر
كارم / اصل انا كدا كدا ما عييش العنوان و لو اتصلت اسأل عنه هيتفتحلى سين و جيم بس لعلمك ... انا دايس معاكى فى اى مصيبه نشنى انتى بس و انا اغرز معاكى على طول
نجاه / يعني رايك انها مصيبه ؟
كارم / نوجه حبيبه قلب اخوكى الصغير انا مش عاوز اصدمك بس آنتى تقريبا مش واخده بالك من الوضع انتى نفسك بذات نفسك مصيبه حبيبتى انتى طلعتى سهرايه فى الجبل انتى الوحيده فينا اللى رجعتى مصابه و مش اى أصابه طلعتى مسابقه اتخطفتى مجلس الاشرار و حلف شمال المجره سابوا مليارات البشر على الكوكب و استهدفوكى انتى حبيبتي اقول كمان و لا الرساله وصلت الحمد لله
نجاه / انت بجد شايفني كدا
كارم / دى مش حاجه وحشه دا ساسبينس على اكشن على مغامره على اثاره على رعب حاجه كدا من اللى بتعلى الادرينالين
نجاه / انا قلقانه و انت بتهزر
كارم / طب بصي انا هعمل معاكى اتفاق مجدعه
نجاه / قول
كارم / انا هروح و هاخد بعضي و اروح ادعبس وراها و اطمنلك عليها و اجى اجيبلك المفيد بس لعلمك جوده النتائج بتعتمد على جوده المعطيات و انا معطياتى بلح يكون فى علمك
نجاه / خلاص يا كارم ما تتعبش نفسك
كارم / ماشي
كارم يسوق و ياخد اول يوتيرن و يرجع
..................
فى الجيم عند شحته
شحته / بسيطه احزرهم انا
جوزيف / مش وقت غباوه ما لو حد حزرهم هيبقي اكيد انا اللى باعتك كل ده مجرد اختبار ليا
شحته / بس انت بتقول انهم فى الضياع و البت كدا ممكن تروح ما ترجعشي
جوزيف / انا محتاج رجاله تكون بتثق فيهم و الفلوس انت عارف
شحته / محتاج كام واحد
جوزيف / كتير اوى
شحته / حاضرين
جوزيف / امتى
شحته / وقتى ... يا رجاله
كل الرجاله تقف بدى بيلدينج
شحته/ يكفوك و لا نبعت نجيب من بره
جوزيف / اوعى هى الاشتراكات كلها ... امال الهلومه دى كلها منين... شحته لتكون رجعت للشقاوه
شحته/ فى الحق بس ..  زى وقفتى معاك كدا و بعدين انت جاى الدور الرجالى و الرجاله شقيانه الفلوس كلها بتيجي من دور الحريم جاكوزي و اسبا و مساج و سونا و حاجه اخر دلع و الصرف ايه على ودنه
جوزيف / و انا لو قولت يا حريم هيقفوا كلهم كدا زى دول
شحته / هو انت ياض مش تبت
........................