الكبيره ٢ بقلم / لولو_محمد

الحلقه ١٠٦

((((( الكبيره ٢)))))
#لولو_محمد
الحلقه ١٠٦
عمران / اصل دى أمور عائليه ما حدش يقدر يدخل فيها
صوفيا / يعني مش هتقدر تساعدني
عمران / هعمل اللى هقدر عليه و هقول لبابا و عمى امين برده محامى كويس جدا هيرجع الأوراق بتاعتكوا و يشوف هيقدروا يعملوا ايه اكيد مش هنسيبكوا لوحدكوا يعني
صوفيا / كنت عارفه انى كنت صح لما قررت اكلمك ... بجد انت مش عارف انت ريحتنى ازاى بجد انا مش عارفه اشكرك ازاى
عمران / مفيش داعى خالص لاى شكر انا ما عملتش اى حاجه
صوفيا / ازاى بس دا كفايا وقفتك جنبنا فى المستشفي و انك سمعت لى دلوقت و فكرت معايا فى حل واحد غيرك كان قال انا مالى بكل ده و كفايا كل اللى جرالك من ورانا
عمران / عيب الكلام ده على فكره ... تمام ... أنا هكلمهم و اشوف هيقدروا يعملوا ايه و اخليهم يكلموكى ... تحبى اوصلك و لا معاكى العربيه
صوفيا / لا بصراحه جيت فى كريم ... بس ممكن اطلب كريم عادى مش عاوزه اعطلك
عمران / لا و لا عطله و لا حاجه ما يصحش ... تمام اتفضلى
عمران يسيب فلوس و يقوم يروح يركب صوفيا تفتح الباب اللى جنبه تلاقيه مقفول عمران يفتح لها الباب اللى ورا 
عمران / اركبى تعالى
صوفيا تستغرب و تركب و تقفل الباب
عمران / عندنا الحريم بيبقوا على راحتهم اكتر ورا
صوفيا / بس انا بحب اركب قدام اكتر على فكره
عمران / مره تانيه عشان بتشتت لما بيبقي حد راكب جنبى معلش واخد على الموتوسيكلات اكتر و كدا معلش كدا احسن
عمران يسوق و صوفيا تفتكر لما كان مركب مهره جنبه قدام المستشفي ملامحها تقلب و تبص الناحيه التانيه
........................
فى مخزن فى البلد
اكرم نايم على مرتبه فى الارض الباب يتفتح و مختار و جوزيف يدخلوا يتعدل
مختار/ اتحسنت ما شاء الله
اكرم يبص فى الارض
مختار / المدام عندى اتكلمت مع المدام عندك و حكت لها كل حاجه
اكرم / البنات
مختار / ما قولنالهمش اى حاجه و الصراحه الست عندك ما صدقتش لا صدقت بنتها و لا صدقتك انت شخصيا فى الفيديو فانا بقول نروحك تواجه مصيرك
اكرم / لا لا لا انا مش هقدر ابص فى عين بناتى
جوزيف / يا راجل ... يعنى مش حاجه تانيه ؟!
اكرم / انا ما كنتش اقصد كل ده يحصل ... انا كل اللى كنت عاوزه ... الشيطان عمانى ... ضميرى قاتلني اقسم بالله بموت عشانها كل ثانيه انتوا ما تعرفوش مهره كانت بالنسبالى ايه
جوزيف / لا ما احنا شوفنا
اكرم / انا مش قادر اعيش
جوزيف / طب ما دام كدا كدا مش قادر تعيش ما نسيبك بقي تخرج و تواجه مصيرك
اكرم يبص فى الارض
مختار / البيت بيتك و الباب مفتوح حبيت تمشي بكيفك احنا مش خاطفينك حبيت تخليك بكيفك برده ... مع انك قدامك فرصه تروح تكفر اللى عملته و تصلح جزء و لو بسيط منه
اكرم / و اواجها ازاى ابص فى وشها ازاى ... ابص فى وش بناتى ازاى ... ما حدش هيفهم هيكرهونى
جوزيف / طب ما انت قولتلهم انك بعتهم عشان عيله صغيره ايه اللى فرق
اكرم / البنت دى مش مهره و ما جرالهاش اللى جرا لمهره البنت دى ممكن تكون نزوه انما مهره جريمه
مختار/ الحمد لله انك اعترفت اخيرا
اكرم / قولتلك مش هتفهم حاجه
مختار / مش عاوز افهم ... المهم انك لازم تفهم انك اكيد مش هتعيش هنا العمر كله احنا مش هنستحملك كتير ... الباب مفتوح
اكرم يهز راسه مختار و جوزيف يطلعوا بره
جوزيف / انت عارف انها هتقتله اول ما يخرج من هنا صح ؟
مختار يبص لجوزيف و يمشي جوزيف يروح وراه
............................
فى شقه عمران
نجاه قاعده فى الصاله بتلعب فى الموبايل الباب يتفتح و عمران يدخل شايل علب حلويات يشوف نجاه
عمران/ امال الجماعه فين جبتلكوا شويه حلويات من المحل اللى فى الشارع اللى ورانا
عمران يحط العلب على الترابيزه
نجاه / دخلوا يناموا ... كنت فين ؟
عمران / خير دا امى ما عملتهاش
نجاه / ما بهزرش معاك يا عمران يا ابن مختار الزيني
عمران يكتم الضحك
عمران / هى حصلت
نجاه / كنت فين؟ و مع مين ؟
عمران / اه ... كنت مع صوفيا بتطلب منى اشوف حد يدير ليهم الشركه ... شوفتى ابن عمك مؤدب ازاى و بيعترف من غير ولا ألم
نجاه / لا ما شاء الله راجع رايق و مبسوط لا و صارف و مكلف كمان
عمران مش قادر يمسك نفسه من الضحك
نجاه / انا مش طيقاك على فكره يلا ادخل على اوضتك
عمران / حاضر
عمران يمد ايده ياخد علبه
نجاه / سيب الحاجه
عمران / حاضر ... دا انتى شريره جدا
نجاه تبص الناحيه التانيه جابر يفتح الباب و هو مش قادر يمسك نفسه
جابر / طب ممكن ادوق انا يا ابله اصل انا اللى طالبهم
نجاه / حاضر هعملك طبق
نجاه تروح المطبخ
جابر / مش هاكله معايا ما تخافيش
عمران / طب عملت ايه انا طيب
جابر / انت !! دا انت هتشوف سواد ادخل نام ... ادخل
عمران / حاضر
عمران يدخل و هو بيضحك نجاه تطلع شايله طبق
جابر/ ما عاش اللى يضايقك يا قمر
نجاه تبص له و ترزع الطبق و تخش الاوضه و تقفل الباب جابر يضحك و يبص لعمران
جابر / و انت بقي صدقت حوار الشركه ده مش كدا
عمران / ثقتكوا فى جمدانى و ان البنات بيقطعوا نفسهم عليا بهرانى الصراحه
جابر / و انت شويه و لا ايه يا ابن خالى
عمران / شوفتها و هى بتقولى يا عمران يا ابن مختار الزيني
جابر / زعلها وحش اوى
عمران يضحك
عمران / ما تروح تخطف لنا علبه من اللى بره
جابر يبص على الاوضه مقفوله و يبص لعمران و يهز راسه و يروح ياخد العلبه و الطبق و يدخل الاوضه يجرى و هم بيضحكوا
.........................
فى اوضه صوفيا
بياتريس / انتى بتهرجى انتى ازاى تعملى حاجه زى دى و لا حتى ازاى متخيله انى هوافق على الهبل ده
صوفيا / هو حاتم لقى عروسه بعد ما ساب هنا
بياتريس / و هو بعد اللى عمله فى هنا فى واحده عاقله هترضي ترتبط بيه دا سايكو دا البنت لسه بتتعالج من اللى عمله فيها
صوفيا / كويس
بياتريس / هو فى ايه صوفيا انتى بتفكرى فى ايه
صوفيا / ما بفكرش انا عاوزه انام بليز اطفى النور و اطلعى بره
بياتريس / صوفيا
صوفيا / تصبحى على خير يا باتى بليز
بياتريس تقفل الباب و تروح اوضه مامتها
كارمن / مالها
بياتريس / بتقول طلبت من عمران يشوف حد يدير الشركه
كارمن / اتجننت دى و لا ايه
بياتريس / رسمى طبعا مين دول اصلا
كارمن/ انا مش فاهمه الناس دول اتحدفوا علينا من انهى داهيه
بياتريس / المشكله مش فيهم على فكره بنتك اللى معجبه بيه و انتى عرفاها كويس ما دام حطته فى دماغها مش هتهدى الا اما يعمل اللى على مزاجها لحد ما تزهق منه تقلبه
كارمن/ مش قادره استحمل جنان فى حياتى اكتر من كدا
بياتريس / هو مش حضرتك اللى كنتى بتقولى سبيها تعيش سنها و تكتسب تجارب و خبرات عشان لما تقرر ترتبط تختار صح
كارمن / بس مش للدرجادى
بياتريس / بصي هو شكله مش مديها وش و كل ما هيصدها اكتر هتتعلق بيه اكتر و المصيبه لتلاقيها مقرره تتجوزه ... ماما دى هتبقي فضيحه دا حتى لو على ورق قدام الناس طليق مهره
كارمن / مفيش الكلام ده ... انا هكلمها بكره و مش هسكت على الهبل ده
بياتريس / و ليه بكره
كارمن / عشان تبقي هديت
بياتريس / وجه نظر
كارمن / اطلعى بره و سبينى مع نفسي شويه
بياتريس تهز راسها و تطلع بره
كارمن / ماشي... ماشي... ماشي
.......................
فى كافيه تانى يوم
صوفيا / انتى مستوعبه انتى بتعملى فى نفسك ايه انتى لسه قاعده فى بيته حتى بعد ما طلقك... عارفه انكوا ما كنتوش متجوزين اصلا بس الناس يا قلبي فى قسيمه على فكره ... اى حد ممكن يسأل و اكيد مش هنمشي على واحد واحد نقوله الحقيقه
مهره تكتب على الموبايل
مهره / انا قولت ارجع بيتى بس هم خايفين عليا
صوفيا / و انا كمان خايفه عليكي على فكره ... هم ناس كويسين انا مش هقول لا بس الناس مش هتفهم ده علاقتك بعمران ما ينفعش تحت اى شكل و اى اسم
مهره تكتب
مهره/ انا ما ليش علاقه بيه
صوفيا / مش ده اللى باين للناس قاعده فى بيته و رايحه جايه معاه و مامته محتوياكى على الآخر كأنها حماتك يعني واضحه لاى حد ... انا عارفه انك صعبانه عليهم انا عارفه بس الناس ما تعرفش التفاصيل
مهره تبص فى الارض بحزن
صوفيا / اقولك حاجه بس ما تقوليش لحد
مهره تهز راسها
صوفيا / انا امبارح جاتلى فكره ان ما دام بيحبوكى اوى كدا يبقي ليه لا ما خير البر عاجله و نقلب الكدبه حقيقه
مهره تهز راسها لا بسرعه
صوفيا / انا ما عنديش مشكله على فكره و لو على الكلمتين الهبل اللى قولتهم لك قبل كدا فانتى عرفانى يعني انا بكراش على اى عضله معديه و دا انا لما شوفت ابن عمه التانى اللى كان معاه دوخت
صوفيا تضحك باصطناع و مهره متفاجئه
صوفيا / ما تاخديش فى بالك من هبلى هو انا سينجل لدلوقت من شويه ما هو من الجنان ده شكلى هعيش و اموت بكراش بس
مهره تكتب
مهره/ انتى لسه صغيره جدا على فكره
صوفيا تضحك
صوفيا / سيبك منى ... عمران جدع و ما كانش عنده اى مانع من الاول انه يحط اسمك على اسمه و يواجه باباكى و يشيل الحوار يعني بشويه دلع منك على كام تريك منى هيجي سكه و يكمل
مهره تهز راسها لا و تكتب
مهره/ ما ينفعش
صوفيا / انا بس خايفه من بكره
مهره تبص لصوفيا بتتكلم بحزن مفتعل
صوفيا / مفيش اتنين فى الدنيا ما بيتخانقوش او حتى يختلفوا دا غير بقي ان له اخوات و كل واحد منهم ليه مراته و على ما اسمع هتعيشوا فى بيت واحد و شوفى بقي بيت العيله و مشاكل و قرف العلاقات القديمه دى ..  تخيلى فى اى مشكله يعايروكى و لا يجيبوا القديم مع الجديد ... الناس مهما كانت كويسه الشيطان بيدخل برده... و اللى اتبنى فى سنين عادى جدا يتهد بكلمه
مهره تبص فى الارض بحزن
صوفيا / المشكله انك طول ما انتى جنبهم عمرك ما هتموفى اون هتفضلى تقربى تقربى و يمكن حنيتهم الزايده دى تخليكي تتعلقي بيهم اوى و تفتكريهم عوض ليكي عن كل اللى عشتيه
مهره تتنهد
صوفيا / انتى لازم تقفى على رجليكي فى اسرع وقت ... ما ينفعش تفضلى تايهه فى الدنيا كدا تخبط فيكي و تستنى الناس دول يقولوا لك تعملى ايه و ما تعمليش ايه او تفضلى معتمده عليهم العمر كله ... ما حدش بيفضل معانا العمر كله
مهره تهز راسها ايوه صوفيا تبتسم و تلم نفسها
صوفيا / احنا هنكمل علاج عادى ... ما انتى لازم ترجعى احسن من ما كنتى طبعا ... بس اهم حاجه نسوشياليز نخرج للناس و نواجهم انتى مش عامله اى حاجه غلط عشان تستخبى او تقفلى على نفسك انتى لازم تبقي قويه و ترجعى مهره بتاعه زمان ... كلمه و رد غطاها بدايه جديده و انا معاكى و هفضل جنبك احنا فى الاول و الاخر اخوات و ما لناش غير بعض و مهما حصل او هيحصل عمرنا ما هنفترق و لا فى اى حد هيدخل بينا
مهره تبتسم
صوفيا / بصي بقي... انا عارفه ان العلاقه بينك و بين مامى مش احسن حاجه و انا مش هقولك دلوقت خالص كلميها او قربى منها او اى حاجه انا كل اللى هطلبه منك دلوقت انك ترجعى شقتك و انا هروح و اجى عليكي و فى نفس الوقت ههدى الدنيا مع مامى خالص و اول ما اقنعها و هى كمان تشوفك و انتى قويه الدنيا هتظبط بينكوا خالص
مهره تهز راسها موافقه
صوفيا / انا كنت متاكده انى هقدر اقنعك انا دخلت اوضتك و لميت حاجتك و جبتهالك فى شنطه العربيه حتى لو ما اقتنعتيش بكلامى هتحتاجيهم برده هتفضلى تلبسي من هدوم اسمها ايه دى لامتى يعني
مهره تهز راسها اه
صوفيا / معاكى مفتاح الشقه ؟
مهره تهز راسها اه
صوفيا / حلو اوى هنطلع على هناك و نرتبها و نحط فيها كل اللى هتحتاجيه و هسيب معاكى فلوس كفايا و اجيلك كل يوم نخرج و نقضي اليوم سوا هنسيب بعض على النوم بس و هحاول اقنع مامى ابات معاكى كمان
مهره تبتسم
صوفيا/ انتى عمرك ما هتصدقى انا سعيده قد ايه ان الحقيقه بانت و رجعنا لبعض تانى انا بجد ما كانش ينفع أصدق الكلام العبيط ده من الأول بجد مش قادره اسامح نفسي و لا اسامحهم منهم لله بجد مش قادره اصدق ان فى ناس وحشه اوى كدا
صوفيا تعمل بتمسح دموعها مهره تمسك ايدها صوفيا تبص لها و تبتسم 
......................
فى شقه عمران
نجاه / ما هو الجنان ده لازم ليه آخر
جابر / هى ليها دماغ برده
نجاه / انهى دماغ كل ما حد من عيلتها المريضه دى يطبطب عليها تجرى عليه و تفوق على خازوق مغرى
جابر / ما هو المشكله انهم اهلها
هند / اهل النيله و السواد
نجاه / شكرا... قوليله عشان مش مصدقنى
جابر / مصدقك بس مهما كانوا اهلها و هى محتاجه لهم
عمران / انا نازل
هند / رايح فين
عمران / عندى سيشن ساعتين و راجع
جابر / سيشن ايه
عمران / لغه يا جابر تحب تيجي معايا تتأكد
جابر / فى ايه يا عم اهدى
عمران / هتعوزوا حاجه و انا جاى
هند / لا احنا كدا كدا نازلين ... هروح لمهره اطمن عليها و اتاكد انها مش ناقصها حاجه و اعرفها اننا جنبها برده
نجاه / انا جايه معاكى قوم اللبس يا جابر
جابر / حاضر ... انت مستنى حاجه ؟
عمران / هشوف هتعملوا ايه
جابر / و السيشن؟ مش ليه معاد و لا ايه ؟
عمران/ خش اللبس يا جابر
جابر / ااااه ... تمام هلبس ... ثوانى
جابر يدخل الاوضه و نجاه تروح اوضتها
هند / كنت هتروح فين يا عمران
عمران / بروح انا و مهره نتعلم لغه الإشاره
هند / كويس ... كويس
......................
فى شقه مهره
صوفيا / تعرفى ان دى اول مره انضف
مهره تضحك
صوفيا / هو مرهق بس استمتعت مش هنكر
تليفون صوفيا يرن حاتم
صوفيا / ثوانى تليفون ... ازيك فينك ... انت مش هتتغير ابدا اه رنيت عليك ما اكيد الرقم ظاهر لك يعني
مهره تضحك
صوفيا / لا فى التليفون كدا لازم نتقابل و افهمك كل حاجه  .. و انا من امتى جالك من ورايا غير كل خير و لا بتنسي ... اوك تمام هعدى عليك  ... سلام
صوفيا تقفل
صوفيا/ دا حاتم قريب ماما من بعيد بس صديق مقرب جدا العيله و فى شراكه بين بابا و اونكل من سنين هو علاطول مسافر بس الفتره اللى فاتت نزل مصر و خطب بس للاسف الموضوع ما مشيش معاه فبيفكر يرجع يسافر تانى و بنحاول نقنعه انه يدى لنفسه فرصه تانيه عشان خاطر باباه بجد زعلان اوى دا ابنه الوحيد
مهره تهز راسها فاهمه جرس الباب يضرب
صوفيا / مين يعرف اننا هنا
صوفيا تروح تفتح تلاقى هند و نجاه و ورا عمران و جابر شايلين أكياس كتير تفتح الباب
صوفيا / اهلا اهلا كويس هسيبكوا مع مهره شويه رايحه مشوار بسرعه و راجعه ... شوفتى قولتلك مش هسيبك الا اما اطمن عليكي ... اوعوا تمشوا لحد ما ارجع
نجاه / ما تقلقيش احنا قاعدين
صوفيا / كويس ... ازيك يا طنط اوعى تمشي هاه
هند تبتسم صوفيا تشاور لعمران سلام يبتسم و تمشي الكل يدخل و نجاه تقفل الباب
نجاه / انا هقتلك على فكره
هند / بقولكوا ايه يلا روحوا شوفوا هتعملوا ايه و سيبونا حريم فى بعض طلعتوا الحاجه كتر خيركوا و انت لو وراك السيشن ده لسه روح
عمران / انا رايح المركز... و هبعتلك مواعيد الاونلاين
مهره تهز راسها عمران و جابر يمشوا و يقفلوا الباب وراهم
نجاه / بالراحه كدا اديني سبب العبط ده لو سمحتى
هند / طب مش ناكل لقمه الاول و لا ايه
نجاه / هروح اغسل طبقين و ارجع
نجاه تروح المطبخ هند تقعد مهره جنبها
هند / انا عوزاكى تعرفى حاجه واحده بس ... اى كان قرارك انا هحترمه ... و اى كانت النتايج انا هبقي جنبك و انك بالنسبالى انا و عمك زيك زى نور و رحمه  بالظبط
مهره تبتسم بخجل
هند / انتى متاكده انك عاوزه تعيشي هنا
مهره تكتب
مهره / دا بيتي
هند تبتسم مهره تكتب
مهره / هلاقي شغل و باذن الله هدخل الترم التانى و اظبط الدنيا و اظبط حياتى
هند/ انا واثقه من ده
مهره / انا عمرى ما هنسي وقفتكوا جنبى
هند / وقفه ايه بس ... على العموم اعملى اللى يريحك و افتكرى ان شغلك مستنيكى عندنا فى البلد
مهره / فى البلد موقفى وحش
هند تستغرب مهره تكتب
مهره / الكل عارف انى طليقه عمران هسبب له احراج و مشاكل
هند/ يا اختى يا ريت كل المشاكل تبقي من النوع العسل ده دا انتى هبله
مهره تضحك نجاه تطلع من جوه و معاها اطباق تحطهم على السفره و تفردها مهره تروح تساعدها
نجاه / انا جايه عشانك على فكره
مهره تحضن نجاه
نجاه / ينفع ابات معاكى النهرده
مهره تبص لنجاه و تهز راسها بحماس
نجاه / ينفع يا عمتى ؟
هند / ينفع بس بشرط ... ابات معاكوا
نجاه و مهره يتحمسوا جدا
........................
فى مكتب الزنايته
عباده / يعني ايه قرروا من نفسهم و انتوا لازمتكوا ايه ... يا سيدي ما قولتش كدا ... خلاص خلاص انا هكلم مختار و اشوف هنقدر نعمل ايه ... اقفل
عباده يقفل و يطلع بره يقابل مريم
عباده / ما شوفتيش مختار ؟
مريم / كان فى الجنينه من شويه
عباده يتصل بمختار و هو رايح ناحيه الجنينه يلاقيه راكب عربيته و بيطلع من البوابه و فجاه يفرمل و ينزل
مختار / بترن ؟
عباده / وصلك اللى عملته ام شاكر
مختار / تمام و الرجاله هياخدوا وضعهم
عباده / مستسهلها اوى المنطقه دى مش متامنه يا مختار
مختار / اهدى كل الرجاله بدات تتحرك و منصور امن كل كاميرات المنطقه و فكل عربيه اتنين درون جاهزين لاى حوار يعني كلو باذن الله تحت السيطره
عباده/ انا لسه قافل مع جابر
مختار/ و انا لسه قافل مع منصور و رايح ليونس
عباده/ بقولك ايه
مختار/ يونس لا هيروح و لا هيجي يونس تعبان.. بس باعت رجالته يحرسوا عيون تانيه فوق رجالتنا زياده امان
عباده / و هو ماله بينا
مختار / المصلحه واحده
عباده / بلاش استفزاز
مختار / بقولك ايه هند معاها يعنى انا نايم و فى بطنى بطيخه صيفي قد دماغك المصفحه دى ... انا ماشي ورايا هم ما يتلم
عباده / خير يا خويا هم ايه اللى وراك غير الجرى ورا المشاكل
مختار / فس فس فس
مختار يركب العربيه و يمشي
عباده / فس فس فس !!! عربيات الرش
عباده يروح يركب عربيته و يمشي ورا مختار
…………………..
فى اوضه مهره
صوفيا / انا مش مصدقه انهم هيباتوا معانا بصراحه
مهره تبتسم
صوفيا / هو مش حاجه وحشه بس ... انا مستغربه بس مش اكتر
نجاه تخبط على الباب صوفيا تفتح
نجاه / العشا جاهز
صوفيا / ميرسي مش باكل بالليل
نجاه/ مهره بتاكل عادى ... هتيجي يا مهره
مهره تهز راسها تمام و الكل يطلع بره
صوفيا / انتوا هتناموا فى انهى اوضه
هند / احنا بنام فى اى حته ما تشغليش بالك بينا اصل اللمه و التجمعات دى اكتر حاجه بنحبها ممكن ننام كلنا فى اوضه واحده عادى
نجاه / شغل مصايف و أفراح
صوفيا تبص لهم باستغراب
هند / ما تشغليش بالك مش كل الناس لسه محتفظه بالروح دى
صوفيا/ انا ما عنديش مانع اجرب على فكره
هند / هتنبطسي
صوفيا تبتسم
صوفيا/ هو انتوا هترجعوا مع عمران لما يخلص امتحانات ؟
هند / باذن الله
صوفيا / اصل انا لقيت لعمران شغل كويس اوى هنا
نجاه / شغله مستنيه فى البلد تسلمى و تسلم مجايبك
صوفيا / انتى عارفه هنا هيقبض كام
هند / الفلوس مش كل حاجه و بعدين عمران روحه فى حته تانيه مش بيرتاح هنا
صوفيا تهز راسها و تبص على مهره
نجاه / عملتى ايه فى السيشن بتاعتك خلصتيها؟
مهره تهز راسها اه
نجاه / عمران و مهره بيتعلموا لغه الإشاره و انا كمان سجلت و هبدا اتعلمها انا كمان
هند / نجاه ما بتسيبش لغه ما بتتعلمهاش حتى دى مش هتسيبها اهو
نجاه / المفروض كلنا نتعلمها
هند / بكره تتكلم و ترجع تشجينا بصوتها اللى زى الكروان من تانى   .. ما بتاكليش ليه يا حبيبتي هو الاكل مش عاجبك
صوفيا / جميل اوى بس جسمي يبوظ لو ضعفت
هند / ساعتين تمرين تحرقى كل ده كلى كلى هو الواحد هيعيش كام مره
صوفيا / تفتكرى
هند / دا اكل فلاحى على ابوه مش ريحه و لون دوقى انتى بس و انتى تفهمى كلامى
مهره تشاور لصوفيا و تهز راسها صوفيا تدوق يعجبها
صوفيا / شكلى هحب الصعيد اكتر ما انا بحبه
هند / دا اكيد طبعا سمي و كلى الف هنا
صوفيا تاكل و هى مستمتعه
.......................
فى هنجر كبير فى البلد
اوتوبيسات و عربيات رش راكنين حراميه ملثمين يدخلوا يفكوا الكاوتش و أجزاء من المواتير و يهربوا
.................
فى القسم
احمد بيتكلم فى التليفون
احمد/ معاليك احنا شغالين اربعه و عشرين ساعه ... لا يا فندم اكيد  ... تحت امر معاليك ... باذن الله... قبل كدا كمان سعادتك ... فى حفظ الله ... فى حفظ الله
احمد يقفل التليفون و ينفخ الباب يخبط
احمد / ادخل
صابر يدخل
صابر / صباح الخير يا باشا
احمد / اهلا يا صابر تعال اقعد
صابر يدخل يقعد
احمد/ عرفت اللى حصل
صابر / وصلنى يا باشا نقول ايه ولاد الحرام ما خلوش لولاد الحلال حاجه
احمد / لا يا راجل
صابر / بقولك ايه يا باشا انا لا عندى اللى أبكى عليه و لا اللى يبكى عليا فلا بخاف و لا ليا لى فى اللف و الدوران
احمد / يعني عاوزنى أصدق انك ما تعرفش مين اللى عملوا كدا
صابر / ياباشا رجاله الجبل طول النهار بيكسروا و يحملوا حجاره و آخر الليل يا نايمين يا ورديات حراسه و بيقبضوا كويس الحمد لله يعني مش محتاجين يسرقوا خصوصا لو حاجات بسيطه زى دى
احمد / انت عارف تمن المسروقات كام يا صابر
صابر / اللى اعرفه انها شويه فرد كاوتش... شويه فكه يعني
احمد / اااه ... فكه
صابر / يا باشا انا وقت اللى حصل كنت مع الباشمهندس مختار و الدكتور شاكر و الرجاله عاملين قاعده و شاويين عقبال عندك خروف و كانت سهرايه عنب يعني عندى بدل الشاهد عشره انا كنت فين امبارح
احمد / و انا ما اتهمتكش اصلا يا صابر
صابر/ امال انا بعمل ايه هنا يا باشا
احمد / اللى عملوا كدا متاويين عندك فى الجبل فتجيبهم بالزوق بدل و رب الكعبه
صابر / ياباشا هاتلى اساميهم و انا اجيبهم لك مربطين فى شوال
احمد/ افندم
صابر / سهله يا باشا انا هطلع ألم لك كل الرجاله اللى فوق و اجيبهم لجنابك و حقق معاهم واحد واحد لحد ما تمسك العيال دى ايه قولك ؟
احمد / انا عاوز العيال دى يا صابر
صابر / ياباش اعمل لجنابك ايه طيب ما تقولى و انا اعمل
احمد / و لا حاجه يا صابر انا اللى هعمل
صابر/ هتعوز منى اى حاجه تانى يا باشا
احمد / كتر خيرك يا صابر
صابر / طب بالاذن انا بقي
صابر يطلع بره يقابل فيراس داخل بيجرى اول ما يشوفه يتخشب صابر يروح له
صابر / ازيك يا فيراس عامل ايه خير فى حاجه ضايعه منك و لا حاجه ؟
فيراس يبص له باستغراب
صابر  / بص انا لو منك ما اكلمش الباشا فى اى حاجه دلوقت ... اصل مزاجه مش تمام ... بيني و بينك ... امبارح فى ناس نزلوا على البلد قشطوها اشي كاوتش عربيات قطع غيار موتور و شنطه مليانه فلوس ما حدش عارف مصدرها ايه ... خش بلغ يا فيراس خش ... مع السلامه يا حبيبي
صابر يجي يمشي فيراس يوقفه
فيراس / انت فاكر لما تسرق مهر نسمه الجوازه هتبوظ
صابر / انا اسرق !! ليه هو انا محتاج فلوس لا سمح الله ... و لا حتى كنت حرامى ... اخص عليك يا فيراس و الله اخص
صابر يجي يمشي فيراس يوقفه
فيراس / ما تنساش تبقي تيجي الفرح
صابر / ما تقلقش نفسك انت خالص ... أنا كدا كدا هحضر باذن الله ... بس المهم انت تحضر
صابر يمشي فيراس يبتسم و يروح للعسكري يطلب يقابل الظابط
..........................
فى النادى
صوفيا / لا انتى ما تعرفيهوش حاتم دا الكريزما بتاعنا جدا ما يغركيش خفه دمه و الحركات اللى بيعملها دا عليه شويه تقل
حاتم / و الله و لا تقل و لا حاجه انا لما ببقي مسافر ببقي فعلا مشغول جدا انما انا هنا فى اجازه يعني فاضي فطبيعي اكون رايق
صوفيا / و فى حد برده يبقي قدامه اجازه حلوه كدا و يبقي عاوز يقطعها و يسافر تانى للهم برجليه
حاتم / يا ستى و الله ما هسافر دلوقت لسه قدامى شويه
صوفيا / ساعتين تلاته كدا
حاتم / عرفتى ليه بقي بتهرب منها
صوفيا / اهو اعترف
مهره تكتب / استاذنكوا اروح اركب خيل شويه
حاتم / بتعرفي تركبى خيل
صوفيا / طبعا دى بطله محليه و دوليه يا ابنى
حاتم / انا كمان كنت بلعب فروسية بره بس مش احتراف ... هوايه
صوفيا / بجد!! طب ما تقوم كدا تورينا شطارتك
حاتم / و ماله ... يلا بينا
صوفيا / لااااا انا ما ليش فى الجو ده خالص خد انت بقي مهره و روحوا انجوى و انا هستناكوا هنا
حاتم / يلا
مهره تتحرج و تبقي مش عارفه تعمل ايه عمران و نجاه يدخلوا مهره تتحمس جدا و تقوم تحضن نجاه
صوفيا / اهلا ايه المفاجاه الحلوه دى عرفتوا مكانا ازاى
عمران / انا كنت جاى اتمرن عادى صدفه سعيده جدا.... عمران الزيني
حاتم / سمعت عنك
عمران / يا رب يكون خير
حاتم / خير اكيد ... اه سورى حاتم شركس رجل أعمال و صديق قديم لعيله الصيردى
عمران / اهلا و سهلا
نجاه / طب هاخد انا مهره و نسبقكوا و تبقوا تحصلونا
حاتم / على فين ... اصل كنت متفق مع مهره نركب خيل سوا
عمران يبص لحاتم و يلم نفسه و يبتسم
...........................