((((((( الكبيره ٢))))))))
#لولو_محمد
الحلقه ٤٦
عباده / الموت مش شر اكل الأخوات لبعض و خساره الضهر و السند هم اللى شر انا تصغر اختك و تفرج عليها الناس هم اللى شر انك تخلى اللى يسوى و اللى ما يسواش يجيبوا فى سيرتها بالباطل هو ده الشر بعينه
فارس / ما انا اتعصبت من خوفى عليها يابا انت يعني عاجبك تصرفاتها و لا عاجبك الجدع ده دا انا اقسم بالله ما كرهت حد فى حياتى قده و كل مادا عماله تديله وش و هو دايس مش عامل حساب لحد خالص
همام / يا فارس
فارس / ماشي اتسرعت و كبرت الموضوع بدل ما اللمه بس ما انا لحم و دم برده و غرت عليها و اضايقت و عشان خاطرك اول ما ترجع هراضيها و ابوس راسها قدام الكل المهم ترضي عنى
همام / مرضي يا كبير
عباده / اخوك فين
فارس / راح وسط الرجاله اللى مع نجاه
عباده / تمام روح شوف وراك ايه اعمله
فارس / يعني مش زعلان منى
عباده / لا مش زعلان بس هتراضي اختك
فارس / و الله هراضيها
عباده يهز راسه همام يبتسم
همام / نسيب حضرتك بقي ترتاح
عباده يبتسم و يهز راسه
همام يبص لفارس يقوموا يطلعوا بره و يقفلوا الباب
...........................
فى شقه نسمه
الباب يخبط نسمه تروح تفتح تلاقى محمود شايل أكياس كتير جدا
نسمه / السلام عليكم
محمود / و عليكم السلام ازيك ... عمتى موجوده
نسمه / لا خرجت من بدرى و لسه ما جاتش
محمود/ بجد !! طب اصل انا كنت جايب الحاجات دى للعيال يعني شويه لبس على لعب على شويه طلبات تنفع البيت يعني انا عارف انكوا لوحدكوا دلوقت و ما حبيتش تنزلوا تتبهدلوا فى السوق وسط البياعين و اولاد الحرام و كدا
نسمه / تسلم بس احنا كل حاجه حوالين البيت عادى مش بحتاج اروح فى حته على العموم تسلم تعبت نفسك و كلفت روحك
محمود / تعب ايه و تكليف ايه دول ولاد اخويا يعني ولادى انتى اصلك ما تعرفيش عبد الهادى ده كان غالي عندى قد ايه دا كان اخويا الكبير دا كان صاحبى و كل حاجه بالنسبالى ياما وصانى عليكوا قالى يا محمود لو فى يوم جرالى حاجه و انا اقاطعه و اقوله ما تفولش على نفسك يلا نقول ايه
نسمه / حسبي الله و نعم الوكيل
محمود / على العموم انا مش عاوز يكون عندك اى فكر كل حاجه هتمشي زى ما كان عبده عايش و احسن و انا هشرف على كل حاجه بنفسي و اى حاجه تحتاجوها اتصلى بيا على طول
نسمه / تسلم كتر خيرك ما نتحرمش منك
محمود / انا عارف ان وقفتى على الباب دى ما تصحش بس كنت عاوز اطلب منك حاجه
نسمه / خير اؤمر
محمود / كنت عاوز استأذنك اخد العيال اخليهم يغيروا جوا كدا ساعتين تلاته فى اى حته و ارجعهم ... انا و انتى عارفين انهم صغيرين على كل اللى بيحصل و بيعيشوه و انهم ما لهمش ذنب فيه ... انا طبعا كان الود ودى اقولك تعالى معاهم بس انا عارف عمتى مش هتسكت و هتفهم خروجك معاهم غلط عشان كدا
نسمه / العيال كويسين و عندهم دنيتهم و لعبهم جوه و مش ناقصهم اى حاجه تسلم لو فى يوم حبوا يخرجوا هخلى امى تكلمك و ترتب معاك
محمود / تمام ... هسيبك انا بقي
نسمه تهز راسها و محمود يمشي و كل شويه يبص عليها و هى بتحول الحاجه جوه لحد ما تقفل الباب
..........................
فى جيم دورين
شحته واقف بيمرن شاب بديبيلدينج و بيشخط فيه جوزيف يدخل
جوزيف / الجهاز ده فاضي يا كوتش
شحته يشوفه يفرح و يروح ياخده فى الحضن
شحته / يوسف !! اخص عليك كدا تنساني طول المده دى
جوزيف / ما بجيلكش اه لكن ما نسيتكش و انت عارف
شحته / حبيبي ... اؤمر يا غالى خير اقدر اخدمك ازاى
جوزيف / انا مخنوق و مش فى المود استناك فين لحد ما تخلص شغل
شحته / اعتبرنى خلصت انا ما عنديش اهم منك ... يا ابنى كمل انت و لا كنسل النهرده خالص و هعوضهالك ما تقلقش انا ماشي ... يلا يا يوسف
شحته يروح يشد جاكت و يلبسه فوق هدومه و يمشي مع جوزيف و اول ما يطلعوا من المكان بابلو يدخل و يركن عربيته قدام جوزيف و ينزل ياخده بالحضن و جوزيف مش متفاعل
بابلو / يا واطى بقي تطلع عايش و تسبنى هتجنن عليك
جوزيف / انا جعان و عاوز اروح حته نضيفه اكل فيها لقمه حلوه
بابلو / و ماله و انا اللى عازم
جوزيف / لا معلش خليك انت مره تانيه و انا هروق كدا و اجيلك
بابلو / تمام و انا مش هتاخد اى خطوه الا اما تيجي و تتمم بنفسك على الشغل
جوزيف / يا ريت اصلي تعبت من الفشل ... صوره حراريه بالقمر الصناعى كانت هتعرفك ان مفيش مخلوق فى الفيلا فكنت وفرت كل الجاز اللى حرقته
بابلو / و ما دام انت عارف كدا رميت نفسك فى النار ليه
جوزيف / عشان اشوف النظره دى على وشك لما تعرف انى عايش ... يلا يا شحته
شحته / العربيه هناك اهيه
جوزيف يمشي مع شحته و بابلو بيتابعهم و مبتسم
بابلو / و انا طبعا مصدقك يا حبيب قلب اخوك
.........................
قصاد المطعم اللى نجاه قاعده فيه
عربيه راكنه و راكب فيها راجل مكان السواق و جنبه كارم منيم الكرسي و فارد ضهره و كارم قاعد على الكنبه ورا السواق الباب الورانى يتفتح عمران يعدل الكرسي جابر يركب و شايل أكياس فيها ساندوتشات يوزع
كارم / فول و طعميه يا جابر !!
جابر / هعوضهالك بعشوه حلوه لما ربنا يفكها و نروح
عمران / عاملين ايه شوفتهم ؟ لسه بيعيطوا
جابر / لا اكلوا و ملوا الزنبيله و هاتك يا ضحك دلوقت
السواق / هرمونات
عمران / طب مش باين لها مرواح طيب
جابر / بقولك ايه صبر نفسك باى لقمه و سبها على الله
عمران / انا عاوز افتح موضوع بس خايف حد يتعصب عليا
جابر/ بجمله يا عم قول خير
عمران / حد يعرف مكان يونس فين دلوقت
كارم / و الله عاوز اسأل نفس السؤال بس اكيد هم متابعينه يعني
عمران/ بصراحه مش مصدق انه مشي بالبساطه دى
جابر / كان هيعمل ايه يعني
عمران / لو على العمايل فيعمل كتير ما كناش نايمين فى العسل السنين اللى فاتت
الراجل / يعني ايه نجهز الرجاله
جابر / و انت كنت صرفتهم و لا ايه ما الطبيعي اننا نبقي جاهزين طول الوقت لو مش هو بيبقي غيره على قوله ما عشناش عمرنا كله نايمين فى العسل يعني ... دى حياتنا اللى وعينا عليها
كارم / و الله انا عاوز اقول حاجه و خايف أتفهم غلط
جابر / ابو شكلكوا انتوا الجوز مالكوا ايه الخوف اللى ركبكوا فجاه ده
كارم / يعني الواحد لازم يكون حسيس يعني
عمران / تقصد ايه
كارم / بصراحه انا مضايق انه مشي بالطريقه دى
جابر / كان المفروض يمشي ازاى يعني
كارم / الجدع كان بيحاول يا جابر و كلنا نشهدله باع كل حاجه و اشتري آخرته
جابر / و انت صدقته
عمران / هو انت كنت دخلت فى نيته
جابر / ديل الكلب
عمران / يا جابر انت اكبر من كدا انا عارف انك ما بتحبوش بس دا ما يديكش الحق تحكم عليه أو تقف فى طريق توبته
جابر / انا يا عمران
كارم / عمران بيتكلم من عشمه يا جابر
جابر / يا عم براحتكوا انا كدا كدا هاكل اللقمه و اغفل لحد ما نشوف اليوم هيخلص على ايه الله يعينك يا خالى قاعد متزنب بطوله جوه اياكش الحريم تخلص رغى فى سنتهم
جابر يشد ساندوتش من الكيس و ياكل و هو بيغل و يبص من الشباك
.......................
فى الكافيه
مهره / انتى مش متخيله انا كانى كنت فى بير ضلمه و انتى خرجتيني اشم نفسي
نجاه / اى خدعه فى اى وقت تلاقى نفسك نزلتى البير اديني رنه هتلاقيني نطالك
مهره / بس برده ... انتى اللى اتصلتى بيا عشان مخنوقه و عاوزه تخرجى و من ساعه ما قعدنا و انتى بتسمعينى انا و ما قولتيش اى حاجه مع ان واضح انك فى حاجه كبيره مضيقاكى
نجاه / لا و الله عادى
مهره / بتحلفى بالله
نجاه / عادى و الله
مهره / هو ايه اللى عادى ما تنطقى مالك
نجاه / بصراحه
مهره / اكيد اتكلمى
نجاه / بحاول اطمن نفسي ... بحاول ... ما اسمحش للى عشته انه ... انا لو استسلمت مش هقدر اثق فى اى انسان تانى ... و للاسف حاليا... كنتى بتقولى علينا بكدج ... انا زعلانه منهم شويه
مهره / بس هم بيحبوكى اوى
نجاه / و انا كمان بحبهم ... بحبهم اوى لدرجه أنى... بصي ... انا مش عارفه اقولك ايه
مهره تبص الناحيه التانيه الوايتر بيحط لمختار قهوه
مهره / احنا زنبنا عمك جنبنا كتير اوى و بصراحه بدا يصعب عليا
نجاه تبص و تتنهد
نجاه / ممكن اثق فيكي يا مهره صح
مهره / ايه كنتى شاكه ان ليا دخل بخطفك و لا ايه ما دا اللى ناقص بجد
نجاه تضحك
مهره / كنتى شاكه فيا بجد !!
نجاه / تؤ ... انا انضحك عليا من ناس اعبط منك بكتير
مهره / اخص عليكي يعني انا عبيطه
نجاه/ عزيزتي كلنا عبط دا اتلم المتعوس على خايب الرجا
مهره تضحك نجاه تبص على مختار
نجاه / انا بقول كفايا كدا معاكى حق صعب عليا اوى
مهره / انا عاوزه اقولك حاجه قبل ما تمشي ... انتى عندك حاجه مش عند اى حد انتى عندك عيله بتحبك اوى ... مهما عملوا ما تزعليش منهم و ما تتخليش عنهم
نجاه / ما اقدرش اصلا انا من غيرهم و لا حاجه و على فكره انتى واحده مننا دلوقت
مهره تبتسم نجاه تشاور للمتر
مهره / انا هحاسب لنفسي على فكره
نجاه / بس يا ماما
الوايتر يدخل
نجاه / الحساب لو سمحت
الوايتر / الاستاذ اللى هناك دفعه كامل حضرتك
نجاه و مهره يبصوا الوايتر يشاور على مختار نجاه تبتسم الوايتر يمشي
مهره / ايه الاحراج ده
نجاه / و لا احراج و لا حاجه طبيعي على فكره قومى قومى اما نوصلك قبل ما نروح يلا
مهره / ما لوش لزمه هطلب عربيه و خلاص
نجاه / ارحمى امى و ريحي تمام
مهره / بالراحه طيب دا انتى قلبتك وحشه اوى
نجاه تضحك و تقوم هى و مهره مختار يقوم يقف و يعدل هدومه و يتنهد
مهره / انا اسفه اوى لطعنا حضرتك و تعبناك و
مختار/ مفيش تعب و لا حاجه طب يا ريت نكررها كتير دا حتى المكان هنا رايق و حلو و قهوته حلوه كمان
مهره تبتسم
مختار / ايه هتروحوا و لا تحبوا تروحوا حته الاول
مهره / لا حته ايه كفايا اوى كدا تعبنا حضرتك
مختار / برده !! هى شيفانى عجوز صح
نجاه / سامحها ما تعرفش
التلاته يضحكوا مختار يدوس على الخاتم و يشاورلهم يتحركوا يطلع الاول و يمسك لهم الباب يطلعوا يبص عربيه تركن يفتح الباب يركبوا
مختار / فينك يا هند تشوفى جوزك
مختار يقفل الباب و يفتح الباب القدمانى و يركب و العربيه تمشي
.......................
فى شقه شحته
شحته بيحط اكل على ترابيزه السفره
شحته / يوسف يا يوسف الاكل ... امال لو ما كنتش عمال تقول جعان ... انا بس مش فاهم ايه اللى خلاك تغير رأيك و تخلينا نطلب الاكل دليفرى على البيت مش كنت عاوز تروح مطعم
شحته يفتح باب اوضه جوزيف يلاقيه بيصلى
شحته / الله اكبر ... و الله استجاب ... دعايا استجاب ... الله اكبر الله اكبر
جوزيف يسلم و يقوم
جوزيف/ ايه يا عم الاوفر ده فصلتني
شحته / طب تصدق و تؤمن بايه انا لازم اطلع حاجه لله شكر ... تصدقنى لو قولتلك انى دعيت ربنا كتير جدا انه يهديك ... و الله فرحتنى انك بتصلى اكتر من فرحتي انك افتكرتنى و جيت تشوفني
جوزيف / ليه
شحته / ليه !! انت بتسال ليه !! يا ابنى انت نسيت انك كنت السبب ان ربنا يهديني
جوزيف يتنهد و يروح يقعد على الاكل شحته يجرى يقعد معاه
شحته / احكيلى بقي احكيلى كل حاجه بالتفصيل ايه اللى حصل
جوزيف / ما حصلش حاجه
شحته / امال صحيت من النوم كدا فجاه غيرت رايك و آمنت و بقيت تصلى ... قادر على كل شئ ما علينا لما تبقي عاوز تحكى احكى غير كدا مش مهم بدات ازاى المهم انك وصلت بالسلامه
شحته بيتكلم بحماس و فرحه اطفال جوزيف يضحك
شحته / طمنى لسه برده حاطت البت اياها فى دماغك
جوزيف يبصله و يكمل اكل شحته الابتسامه تروح من وشه
شحته / اه ... شكلها حكايه غامقه
جوزيف / و لا غامقه و لا حاجه ... انا اسمى يونس على فكره
شحته يتكلم بفرحه و حماسه
شحته / دا اسمك الجديد بعد الاسلام
جوزيف / دا اسمى اللى امى سمتهونى قبل ما اتخطف و انا صغير و اتبعت المعسكر و اتمرن و ابقي جوزيف
شحته / انت
جوزيف / انا وصلت لنجاه و كنت بدات اشتغل عليها فعلا ... كانت طول الوقت تصلى و تقرا قران كانت ثابته و قويه ... كانت على حق ... ما اللى على حق ما بيخافش و قلبه بيبقي جامد ... اتحديتها... قولتلها ادعيه خليه يخرجك من هنا
شحته / لا حول و لا قوه الا بالله
جوزيف / انا اللى طلعتها بايدي و رجعتها لأهلها بايدي
شحته / الله اكبر
جوزيف / اول ما شافتني قالت يونس و رشيد الاسمين دول هم كل اللى فاكرهم من طفولتى و حقيقتى رجعت معاها بلدها و عرفت مين ابويا و مين امى
شحته / و بعدين
جوزيف / الناس ممكن تتقبل فكره ان شحته البلطجي يتوب بس مش ممكن تقبل ان جوزيف يبقي يونس
شحته / طظ فى الناس المهم انت شايف نفسك ازاى... انت فاكرها سهله... دا انا لحد النهرده فى ناس بتضايقنى و تستفزني عشان ارجع للى كنت فيه ... بيحاربونى فى اكل عيشي عشان اتحوج لهم او على الاقل ينتقموا منى على اللى عملته فيهم زمان ... تعرف بعمل ايه
جوزيف / بتعمل ايه
شحته / بقول يا رب ... اللى معاه ربه ما حدش يقدر عليه ابدا
جوزيف / انت عارف المشكله فى ايه ؟
شحته / ايه ؟
جوزيف / ان لو مش جوزيف هيبقي غيره ... الخطه هتفضل مستمره و لو حاولت اقف فى طريقهم هيدوسونى عادى
شحته / هو ده بقي اللى مضايقك اوى كدا
جوزيف/ انا مش مضايق و لا حاجه انا مرهق ... و جعان
شحته / يعني مش عشان خايف عليها
جوزيف / انا كنت قاعد وسطيهم بحاول امرنها و احميها طلبت منى امشي خلاص يشيلوا شيلتهم
شحته / تحميها !!! دا الحكايه غوطت اوى .. لتكون حبيتها
جوزيف / ما حبيتش حد و عاش يا شحته
شحته / ما انا عايش اهو
جوزيف يضحك هو و شحته
شحته / بص انا متاكد ان الحكايه دى مليانه تفاصيل انت تخلص اكلك ده و اعملك كبايتين شاى و تقعد تحكيلى كل حاجه من طقطق لسلام عليكم
جوزيف / هحكيلك بس انا جايلك فى حاجه تانيه اهم
شحته / رقبتى ما دام فى الحلال ما اتاخرش عنك ... انت اصلا مش هتصدق انا فرحان بيك ازاى دلوقت... يونس صح ؟
جوزيف / يونس رشيد السبع
شحته / رشيد السبع !!
جوزيف/ تعرفه ؟
شحته / شخصيا لا للاسف يا ابنى دا كان اسطوره دول كانوا مسمينه الشبح و انك تقابله او تشوفه دى كانت تكلفك كتير اوى و انا وقتها كنت حته صبى صغير فى المينا ما اساويش فى سوق الرجاله تلاته ابيض
جوزيف / بيقولوا انى نسخه طبق الأصل منه لدرجه ان نجاه اول ما شافتني افتكرتنى هو
شحته / و ايه علاقه نجاه دى برشيد السبع اصلا
جوزيف / دى حكايه فوق الحكايه يا شحته
شحته / و ماله خلص اكلك و نقعد نحكى للصبح احنا ورانا ايه
جوزيف / بسم الله
شحته / الله اكبر الله اكبر
جوزيف / يا عم ما تفصلنيش بقي دا انت اوفر جدا
شحته يضحك و يغرف لجوزيف جوزيف يضحك و ياكلوا هم الاتنين
........................
فى سرايا همام
دياب يدخل اوضه وفاء قاعده حاطه ايدها على خدها تشوفه تقوم تقف
وفاء / انت دى فكرتك عن الفسح يعني
دياب / هههههههه ما هو لو صبر القاتل على المقتول انا جايلك اقولك اللبسي ننزل نلف بالعربيه شويه
وفاء/ انا مش مرتاحه هنا
دياب/ عاوزه تروحى فندق
وفاء/ فندق او شقه لوحدنا يا دياب انما انا ايه اللى يقعدني هنا
دياب / امانك مش اكتر يا قلبي هنا امان ليكي عن اى مكان تانى و الناس هنا مرحبين بيكي جدا و يا ستى مفيش مشكله عدى النهرده لحد ما نجهز و نامن مكان تانى نبات فيه بكره مرضيه كدا ؟
وفاء / حقك عليا انا عارفه انك عامل اللى عليك ... انا اللى عشمت نفسي بزياده ... بس و الله انا مقدره و متفهمه حياتنا
دياب يبوس راسها
دياب / تمام اللبسي و أجهزى و انا هدخل الحمام عشر دقايق اتشطف و نخرج على طول تمام ؟
وفاء / تمام
دياب ياخد غيار و يروح الحمام وفاء تبص من الشباك على منظر البحر
وفاء/ كنا فين ... الحمد لله
........................
فى اوضه نجاه
نجاه بتسرح شعرها مبلول الباب يخبط
نجاه / مين
عباده / انا
نجاه تروح تفتح الباب عباده يدخل
نجاه / اتفضل تعال
نجاه تقفل الباب
نجاه / اتفضل تعال اقعد ... اجيب لحضرتك حاجه
عباده/ الفرشه... من زمن ما سرحتش شعرك
نجاه / و لما ستى تشوفك و تتخانق معاك تانى
عباده / ما فيش حد فى الدنيا يمنعنى اللعب فى شعر بنتى
نجاه تضحك و تروح تناوله الفرشه و تقعدله
نجاه / اللعب بالراحه هو بيقع من غير حاجه
عباده / عشان هملاه ... شاغله نفسك بحاجات كتير غيره اتقمص و سابك
نجاه / كلام عميق حاسه ان مش المقصود بيه شعرى
عباده يضحك
عباده/ لا شعرك انا ما برميش كلام زى الحريم لو شايف حاجه مش عجبانى هقولك مش هخاف يعني
نجاه / هم ليه بيقولوا زى الحريم و كانها شتيمه
عباده / طب ما هم بيقولوا مسترجله كانها شتيمه ينفع حد يقول مسترجل على أنها شتيمه او منسونه على أنها شتيمه ... لا ... الراجل راجل و الست ست اى حد بيلبس توب مش توبه بقي ... بيقل منه
نجاه / معاك حق .. و انا قليت من نفسي صح ؟
عباده / انتى رافعه راس كل اللى حواليكى ... انتى زعلانه انه مشي ؟
نجاه/ كدا احسن للكل
عباده / دى مش اجابه سؤالى
نجاه / مش زعلانه بس فى اسأله كتير فى دماغى
عباده/ عنه و لا عن المجلس و لا عننا
نجاه تلف لابوها يستغرب و يبتسم
نجاه / عن كل حاجه و على فكره الاجابات مش كلها عنده برده بس ... هو صعبان عليا
عباده / انتى سامحتيه على كل اللى فات
نجاه / يا بابا انا ببذل مجهود رهيب انى افصل و على فكره يمكن لحكمه من ربنا ان كل اللى فات ما كناش شفنا فيه وشه فالملامح دى مرتبطه عندى باسم يونس بس
عباده / عملتيها ازاى طيب احنا ما حدش فينا قادر يفصل و طول الوقت اللى فات انتى اللى كنتى منعانا عنه
نجاه / و اهو مشي روحوا اقتلوه ايه اللى مانعكوا روحوا خدوا حقكوا و اقتلوه ساكتين ليه
عباده يبتسم و يبص فى الارض
نجاه / من احياها فكأنما أحيا الناس جميعا ... مش شرط احياها بمعنى انه سابها عايشه ممكن رد الروح ليها ... هداها ... واحد حياته كانت كلها سواد عرف طريق ربنا ... يا بابا هو بيحاول و الله
عباده / انتى طيبه اوى و
نجاه / انا مع ربنا عشان كدا بينجيني ... يا بابا فكر بس فيها ليه كل ده بيحصل ازاى بنجى من كل ده ... ازاى هو بينجي ... يا بابا الهدايه دى بتاعه ربنا و خواتيم الأعمال بتاعه ربنا برده ... حضرتك بعد عمر طويل ان شاء الله لما تقف قدام ربنا عاوز يكون مكتوبلك انك هديت انسان و غيرت حياته و لا انك وقفت فى طريقه
عباده / اى كان دا قراره هو
نجاه / ايوه بس الكلمه الطيبه صدقه و ممكن تغير حياه انسان
عباده / بطلى مثاليتك دى
نجاه / بطلتها و سبته يمشي و يكمل حياته لوحده و يواجهم لوحده
عباده / خايفه عليه !!
نجاه تتنهد
نجاه / يا بابا انا ببص للدنيا بنظره تانيه عنكوا
عباده / هو مش رشيد
نجاه / و للمره المليون عم رشيد ما كانش أمام مسجد دا كان اللعن منه
عباده / كان مسلم مهما عمل من معاصي من جواه كان مسلم و مؤمن و موحد
نجاه / و ده اسلم يا بابا اخر حوار بينا كان بيقولى انه بيحاول يقرأ القرآن و مش فاهم العربى بتاعه و روحت انا و عمى مختار جبناله كتب تفسير عشان يبحث بنفسه دا انسان بيحاول و يسعى يا بابا غانيه سقت كلب دخلت الجنه يا بابا ما حدش عارف نهايته امتى و ازاى مش يمكن الانسان الوحش الحقير ده تكون نهايته عند ربنا احسن مننا تعرف منين
عباده / ما اعرفش و ما اعرفش برده ما يمكن يكون كل ده فخ ما يمكن ياذيكي
نجاه / و مين اللى منعه ياذيني طول السنين اللى فاتت و مين اللى هيمنعه ياذيني طول السنين اللى جايه ... هو او غيره على فكره انا بتكلم عموما... بابا انا فاهمه جدا أن كلامى عن يونس خصوصا بيحطنى فى موقع مش حلو ... عشان انا بنت و هو راجل ... بس اقسم بالله يا بابا انا بتكلم عموما انا مش عاوزه اتعامل معاه تانى بس ... ساعدوه انتوا
عباده / انتى عارفه ان العلاقه بينى و بينك عمرها ما كانت علاقه اب و بنته احنا طول عمرنا أصدقاء
نجاه / عارفه و عشان كدا بتكلم مع حضرتك من غير ما ازين كلامى و لا أحاسب عليه بقول اللى فى قلبى حتى لو نفس الكلام ده ممكن يتحول او يتفسر غلط مع اى حد غير حضرتك
عباده / فاهمك بس برده انتى كمان لازم تفهمى ان العنين الزرقا ليها سحرها برده
نجاه / لا مش سكتى ما تقلقش عليا
عباده و نجاه يضحكوا
عباده / امال انتى ايه سكتك اموت و الاقيلك سكه
نجاه / بعد الشر عنك ... و الله يابا الموضوع ما فى دماغى
عباده/ هتترهبنى يعني هتفضلى طول عمرك عايشه فى دور مش دورك
نجاه / لا احنا نتكلم فى موضوع يونس احسن
عباده / ما بتتجزاش
نجاه / يعني انتوا مشيتوا يونس عشان خايفين لاحبه دا خلاصه الكلام يعني ... لا حول و لا قوه الا بالله
عباده يضحك
نجاه / انا بتكلم جد على فكره
عباده / يا ستى لو ده هيهديكي شويه احنا ما خليناهوش يمشي يونس لسه تحت عنينا
نجاه تبص لابوها مبتسم
.......................
فى شقه شحته
شحته / دى مكلكعه اوى
جوزيف / بس ليهم حق
شحته / ليهم طبعا ... دول جبابره ... تعمل كل ده و يسيبوك عايش .. و الله الناس دول ليهم الجنه
جوزيف / هى ليها الجنه ... هى اللى جبراهم
شحته / دول رجاله صعايده و الراجل مفيش ست تمشيه
جوزيف / هى تقدر ... هى تقدر تمشي بلد بحالها
شحته / مش شطاره منها رجوله منهم ... هم بيحبوها و يعملوها خاطر و مش عاوزين يكسروها فحطينها فوق روسهم مش هى اللى ركباهم فى فرق
جوزيف / النتيجه ايه
شحته / برده ... انت اذكى من كدا
جوزيف / ما علينا خلينا فى الوضع الحالى انا بقيت بطولى قصاد الكل دلوقت هم و المجلس
شحته / معاك ربنا اقوى من الاتنين
جوزيف / ايوه هيبعتلى ملايكه تحارب معايا يعني و لا ايه
شحته / او تحوش عنك انت اش فهمك انت
جوزيف / صحيح و انا افهم ايه انا
شحته / لما دخلت البيت مش فى ملاك خرج من جحره ينقذك فى مكان فيه اكل و مايه لحد ما يخرجوك
شحته يغمزله جوزيف يضحك
شحته / ليه خرجت مين خلاها سبب فى انقاذك
جوزيف / ربنا !!
شحته / طبعا و دى فيها كلام ... مين اللى هدانى ... مين اللى سد أبواب الدنيا فى وشك و خلاك ترجعلى ... و مين اللى هيخلينى اموت و انا بدافع عنك ... ربنا يا ابنى
جوزيف / انت وصلت للهوبا على فكره
شحته يضحك
جوزيف/ ماشي خليني معاك ... ايه برده الدنيا هعمل ايه ... انا محتاج اهدى و افكر و اركز كويس فى اللى جاى انا فعلا
تليفون جوزيف يرن رقم مجهول يبص لشحته و يرد
جوزيف / الو
امايا / باعوك و لا انت اللى سبتهم
جوزيف ياخد التليفون و يقوم يدخل اوضته و يقفل الباب و هو بيتكلم
جوزيف / بابلو هو اللى باعنى
امايا / يعني مش انت اللى سبتنى و هربت بيها
جوزيف/ مين اللى بعت لبابلو التسجيلات بتاعه الكاميرات ... انا
صمت
جوزيف / عشان يرجع يخرجك و يهرب بيكى
امايا/ كان ممكن يقتلك عشان خاين
جوزيف / انا مش خاين على الاقل مش هخونك انتى
امايا / انا عمرى ما وثقت فى حد قدك
جوزيف / و انا عمرى ما جازفت بكل حاجه عشان حد غيرك
امايا / نجاه
جوزيف/ هى حاجه تانيه ... هبعتلك تسجيل كاميره للى حصل بره الاوضه شوفى بنفسك هى كانت مستعده تعمل ايه و تمشي ... نجاه ماتت و عملتلها سي بى ار يا إيمي... دا غير انى ... ما كانش ينفع اخدك معايا كنت هبقي بعرض حياتك للخطر
امايا / لقيت اهلك يعني فى الاخر
جوزيف / انتى اهلى ... انتى اختى الصغيره انا ما ليش فى الدنيا غيرك ... و انتى ما لكيش غيرى
امايا تعيط
امايا / انت سبتني
جوزيف / عشان احميكي
امايا / انا هرجع
جوزيف / مش دلوقت وقتك لسه ما جاش
امايا/ دى تعليمات
صمت
جوزيف / شاهين ... سكتك الوحيده
امايا / تمام
باب الاوضه يتفتح
شحته / فى ضيوف مستنينك بره
جوزيف يبص لشحته
شحته / واحد اسمه همام الزيني
...................
فى اوضه نجاه
نجاه / و هو عارف ده ؟
عباده يبص فى الساعه
عباده / زمانه عرف ... بصي احنا ما بنحبوش ... لا احنا مش طايقينه و بنكرهه و كل حاجه كل حاجه هو ماشي
نجاه تضحك
عباده / بس احنا مش شياطين ... و فى خاطر برده لعضم التربه ... و لعمك مختار ... و ليكي
نجاه / و انا مالى !!
عباده/ و حياه امك
نجاه / ايه يابا فى ايه
عباده/ المشكله انى ما ليش حكم على بحرى و هو دلوقت فى اسكندريه
نجاه/ همام !!
عباده / جوزيف قتل ابوه
نجاه / مش هو
عباده / ما تضحكيش على نفسك يا بت جوزيف اللى رتب كل ده
نجاه / ماشي و جوزيف مات فى تركيا دلوقت اللى هنا ده يونس بدل ما يروح يتشطر عليه يروح يتشطر على المجلس ... انا هكلم همام
نجاه تقوم تجيب التليفون و تبص لابوها متابعها
نجاه / ايه عاوزنى اسكت
عباده / هتقوليله ايه ... ما تقتلوش عشان خاطرى ؟!
........................
أنت تقرأ
الكبيره ٢ بقلم / لولو_محمد
Humorالحرب لسه مستمره و الحقيقه مسيرها فى يوم تظهر النور و كل واحد لازم يختار طريقه
