الكبيره ٢ بقلم / لولو_محمد

الحلقه ٩٠

((((((( الكبيره ٢))))))))
#لولو_محمد
الحلقه ٩٠
مختار / طب فين المشكله
عباده يبص لمختار و يتنهد
مختار / طب انت كلمتها ؟ سألتها؟
عباده / يا مختار ما تعملش عبيط الناس بدات تتكلم
مختار / ما حصلش و ما حدش اصلا يستجرى يقول كلمه
عباده / فى وشي اه لكن فى ضهرى هيعيدوا و يزيدوا
مختار / هم الغلطانين لو الموقف ده حصل مع جابر و لا عمران ابنى ما حدش كان فتح بقه لكن يونس لااااااا انصبوا المشانق و سنوا السكاكين
عباده / ماشي يبقي ايه العمل بقي
مختار / نخرسهم يا عباده الصح صح و الغلط غلط و دا موقف صدفه و الواد عيان و البت اتصرفت بانسانيه ايه مفيش تقدير خالص يعني
عباده يبص الناحيه التانيه
مختار / بص انا مش هكدب عليك انا كمان مش مرتاح لقربهم من بعض بس نجاه متربيه و هو
عباده / اللعبان و نمس
مختار / مش هقدر اكدب و اقول لا برده بس
عباده / بس نفضل سايبين البنزين جنب النار كدا لحد ما نولع كلنا
..........................
مختار / مش هيحصل حاجه نجاه مش من البنات الخفيفه اياهم دى تلعبه هو و أهله على الشناكل
عباده / و الله انت و لا ليك فيها
مختار / انت اللى ليك اوى
عباده/ اسكت اسكت ... بقولك ... لو الواد ده جه فى يوم و وسطك ... تكلمني يعني انه ... او اعترف لك يعني باى حاجه
مختار / تخص نجاه تقصد ؟
عباده/ بيحبها معجب عاوز يتجوزها اى نيله من الحاجات دى ... هتعمل ايه ؟
مختار / و الله الرأى الاول و الاخير لنوجه
عباده / هتتوسط له فعلا !!! طب و جابر
مختار / نجاه عندى و سعادتها اهم من جابر و من يونس شخصيا و زى ما قولت الرأى الاول و الاخير لنجاه
عباده / طب ايه رايك بقي انى مش موافق
مختار / اعتقد اننا كبرنا على اننا نتخانق دلوقت على حاجه غالبا مش هتحصل اساسا و لا ايه رايك فى الموضوع
عباده/ انا ما بحبش الواد ده
مختار / ماشي
عباده/ مختار
مختار / يا عم انت كلت دماغى بخيالاتك دى ... انت غريب جدا
نجاه تخبط على الباب و تدخل راسها
نجاه / احنا جاهزين و الرجاله نزلوا الشنط تحت
مختار / الإسعاف وصلت ؟
نجاه / لا مش عارفه بصراحه
عباده / تمام هنتحرك و لما الإسعاف توصل يبقوا يحصلونا
نجاه / ازاى يعني
عباده يبص لنجاه تسيب المكان و تمشي
عباده/ شوفت
مختار / انسانيه
عباده / على ابو انسانيتك يا جدع
مختار يضحك عباده يتعصب و يطلع بره
………………..
فى البلد
عربيه شاكر تدخل و صابر قاعد جنبه باين عليه التعب و الناس محاوطين العربيه و بيسقفوا و يزرغطوا صابر يحييهم و الغفر بيوسعوا السكه للعربيه تعدى
صابر  / مين اللى عمل كل ده
شاكر / حبايبك كتير و فرحانين بسلامتك
صابر / انت ؟!
شاكر / انا معاك طول الوقت
صابر / ماشي
شاكر / نروح على شقتك و لا نطلع على الجبل
صابر / الجبل
شاكر / متاكد ؟
صابر يهز راسه
صابر / وجودى فى البلد مش هيجيب الا المشاكل
شاكر / و كان ايه اللى غيره الفتره اللى فاتت
صابر / بعدين يا شاكر بالله عليك بعدين مش قادر
شاكر يهز راسه و يسوق يقابله احمد يفرمل و يفتح ازاز صابر
احمد / حمد الله على السلامه
صابر / الله يسلمك يا باشا
احمد / انا عارف انك تعبان بس احنا محتاجين نقعد و نتكلم
صابر  / تحت امرك فى اى وقت اديني رنه بس و رقمى مش هتتعب عشان توصل له
شاكر/ هنستاذنك بس يا باشا عشان زى ما حضرتك شايف يعني جاى من سفر و محتاج يرتاح
احمد/ طبعا
شاكر يقفل الازاز و يسوق
شاكر / مش بالعه بس بيقولوا شايف شغله
صابر / مش عاوزين اكتر من كدا
شاكر / بس خد منى كلمه ... هيطلع من تحتيه حاجه
صابر يبتسم بسخريه و شاكر يكمل سواقه
………………………
فى عربيه عباده
عباده بيتكلم فى التليفون و مختار سايق و نجاه و مهره راكبين ورا
عباده / طب الحمد لله ... و الله احنا كدا كدا هنقف فى البنزينه الجايه شويه بس مش هنطول حصلتونا كان بها ما حصلتوناش نتقابل فى البلد بقي ... تمام ... فى حفظ الله
مهره تفتح شنطه نجاه نجاه تبص لها مهره تطلع الموبايل و تكتب "عمران؟" نجاه تهز راسها
نجاه / هو عمران هيفضل هناك ؟
عباده/ ايوه هيخلص الشهر ده و يرجع على طول بإذن الله ... مش عاوزك تضايقي نفسك باذن الله السنه الجايه نعوضها و مش هياثر فى تقديرك و لا حاجه باذن الله ... و لا يعني هى الشهاده بتعمل ايه ... انا اساسا طول الليل امبارح بفكر ازاى استغلك صح فى انسب مكان فى البلد ... اصل اللى زيك قليلين
مختار / الاسطبل ؟!
عباده/ اكاديميه مهره للفروسيه
نجاه تبتسم و تبص لمهره مبتسمه بس مش فارق معاها
عباده / احنا اصلنا بنركب خيل اه لكن مش زيكوا نط الحواجز و الحركات بتاعتكوا دى ما حدش بيعلمهالنا
مختار / صحيح ... ليه لا ... و الله يا عباده ساعات دماغك بتعجبنى
عباده / ساعات!! يلا معلش مختار بقي هنقول ايه
الكل يضحك
عباده / كلمت عبد الله ؟
مختار / اه ما تقلقش 
عباده / شاف حد يعني ؟
مختار / هو قال ان فى كذا اسم فى دماغه بس ما قالش انه اتفق مع حد فيهم لما نوصل بالسلامه نشوف
عباده / على خير
................................
فى عربيه الإسعاف
جوزيف قاعد على السرير و جابر قاعد على الكرسي
جوزيف / كنت اقدر اسافر بالعربيه على فكره ما كان لهاش لازمه المصاريف يعني
جابر / مش خساره فيك
جوزيف / اقسم لك بالله بدات اخاف
جابر يبتسم و يبص الناحيه التانيه و يرجع يبص له
جابر / ما تخافش احنا مش غدارين
جوزيف / مش موضوعنا بس على قد علمى انكوا بتكرهونى و تتمنوا موتى مش فاهم من امتى حياتى بقت مهمه و واقفين على راسي كدا و لا كانكوا أمى اللى ولدتني
جابر / انا ما بكرهكش ... و ما بكرهش حد ... الكره ده مشاعر تقيله اوى انا ممكن اكون بضايق منك فى حاجات بس مش بتمنى موتك و لا حاجه و ما اعتقدش ان فى اى واحد مننا يفرق عنى فى الموضوع ده ... اصل الموت مش لعبه مش حاجه سهله
جوزيف / و انا مصدقك
جابر / هكدب عليك ليه طيب ... بص ... انت عاملتني كويس هعاملك كويس و هعلى عليك عاملتني وحش هعاملك وحش بس مش هنزل لمستواك فهمت
جوزيف / يعنى انا عاملتك كويس؟!
جابر / لو كنت قولت لى اشغلهم على ما تودى انت نجاه لخالى كنت شغلتهم
جوزيف / ما تقولش
جابر / مش نجاه هتبقي بخير ... مش عاوز حاجه تانى
جوزيف / بحزن عليك و الله
جابر / يادى النيله ... بص وفر بجد ... انت تعبان على فكره ... اقولك خد الدوا و نام شويه انت تعبان بجد و الطريق طويل
جوزيف / لا انا تمام
جابر / طب اسكت
جوزيف / مش بتحبك
جابر/ ماشي شكرا على المعلومه الفظيعه اللى مش عارف كنت هعيش ازاى من غيرها
جوزيف / ما انت فعلا مش عايش يا جابر هو انت كدا عايش
جابر / انت عايش ؟
جوزيف يهز راسه لا و هو مبتسم جابر يضحك
جابر / طب ما تنصح نفسك و تفكك منى على الاقل انا عندى عيله كامله بتنصحنى انما انت ما عندكش حد
جوزيف / عندى كفايا
جابر / ربنا يبارك لك فيهم فكك منى
جوزيف/ براحتك
جابر / ياااااه بحب الكلمه دى اوى ... ايوه سبنى براحتى
جوزيف يمدد و يغطى عينه بكوعه جابر يتنهد و يطلع الموبايل يقلب فيه جوزيف يقوم يقعد
جوزيف / تعرف
جابر / يا حول الله يا رب
جوزيف / حتى لو حصلت معجزه من السما او غالبا ابوها هيجبرها يعني و دى حاجه ما اعتقدش انها سهله بس اتوقع منكوا كل حاجه لو المسأله دخلت فى العند
جابر / ما حدش يقدر يجبرها على حاجه
جوزيف / برده عمرها ما هتحبك
جابر / كذب المنجمون و لو صدفوا
جوزيف / انا ما بنجمش انت مش اللى هى عوزاه مش بتعاملها صح حتى و لا حتى فاهم شخصيتها
جابر / تصدق و تؤمن بايه ... قول لا إله إلا الله
جوزيف / لا اله الا الله
جابر / انا قولت لنجاه قبل كدا و دى حقيقه اتحاسب عليها قدام ربنا ... لو فى يوم ربنا بعت ليها اللى يحميها و يسعدها اكتر منى انا مش هقف فى طريقها ... فاهمد ... انا مش انانى ... بحبها و دى حاجه امه محمد كلها عرفاها زى ما هم عارفين برده انى بحبها اكتر من نفسي و سعادتها عندى اهم من سعادتى و راحتها اهم من راحتى ... اؤمر عاوز حاجه تانى
جوزيف / كلام
جابر / مفيش حاجه ممكن تثبت صحه الكلام من عدمه إلا الايام ... فالمطلوب منك بقي ترتاح دلوقت عشان تخف كدا و تقوم لنا بالسلامه و تعيش كدا عشان تتأكد بنفسك مع الايام من صحه كلامى ... نام بقي طولت علينا الطريق
جوزيف يضحك و يهز راسه و ينام جابر يتنهد و يطلع الايربود و يحطها فى ودانه و يشغل قرآن و يسند راسه لورا و يغمض عينه جوزيف يبص عليه و يرجع يغطى عينه تانى
.......................
فى شقه نسمه
عويس قاعد جنب الشباك متشيش بيتابع الشارع و هو بيغلى نسمه تدخل
نسمه/ الاكل جاهز يابا تحب تاكل معانا و لا اجيب لك الأكل هنا
عويس / مليش نفس
نسمه تقرب منه
نسمه / ليه بس يابا دا انا حتى عملتلك الاكل اللى حضرتك بتحبه
عويس يبص لها
عويس/ بفكر نسيب ام البلد دى و نشوف لينا اى مخروبه تانيه نعيش فيها بعيد عن هنا
نسمه / و الارض؟!
عويس/ نبيعها و نجيب بدالها و الف من يشترى و الف من يبيع
نسمه / بقي أرضك اللى تعبت و شقيت عليها سنين هتبقي زى ارض الناس برده يابا
عويس/ خلاص تتجوزى
نسمه / لا اله الا الله ايه علاقه ده بده بس
عويس/ اعمل لك ايه يعني ... يا بنتى هو انتى طول ما كان عبد الهادى جوزك الله يرحمه عايش انا أدخلت فى حياتك انا مش عاوز غير مصلحتك ... حتى لما قسيت عليكي زمان كان عشان مصلحتك برده عشان سمعتك و عشان
نسمه / الاكل هيبرد يابا
عويس / روحى كلى انتى و اكلى العيال
نسمه / و هو انك ما تاكلش هيغير حاجه فى حياتنا
عويس / طب تعالى عيشي معايا فى البيت ما وضعنا ده ما يرضيش ربنا برده
نسمه / احنا اتفقنا على فكره
عويس / يعني انتى عاجبك حالك ده
نسمه / ماله حالى بس ما انا قافله بابى عليا اهو حضرتك اللى خايف من حاجه انا مش فهماها اصلا
عويس/ مش فهماها !! ماشي ... افهمك ... افهمك انى ابعت بنتى اللى تعبت و شقيت فى تربيتها تتعلم و اثق فيها و فى الاخر تحط راسي فى الطين
نسمه/ انا !!
عويس / ما غلطتيش يعني ... ما خنتيش ثقتى يعني ... ما خلتيش ابن الجبل يجى بعين قويه يحط راسه براسي و يكسر عيني و هيبتي وسط الناس ... اقسم بالله واحد غيرى كان دفنك بالحيا ... المره اللى فاتت ربنا ستر و لميناها و الحمد لله ان عبد الهادى الله يرحمه كان بيحبك و رضي يسترك و يلم الفضيحه فى اولها انما المرادى مش هتتلم ... المرادى فضيحتك هتبقي بجلاجل ... المرادى ... اللحقى نفسك و اقبلى باللى راضي بيكى قبل ما يفوت الأوان
نسمه / خلصت يابا ؟! على العموم كتر خيرك ... مش هرد ... و مش هحسبن و مش هدعى و مش هنهار و لا هصرخ ... مش اول مره و مش هتبقي الاخيره و كل ما هتشوفنى هتفضل تجرح فيا و تهيني بكلام ... انا هروح اكل عيالي ... عن اذنك
نسمه تمشي و هى حزينه و بتدارى دموعها عويس يقعد مكانه و هو بيضرب كف على كف
......................
فى الجبل
شاكر يدخل على صابر فى ايده صينيه عليها اكل
شاكر / الاكل الجميل
صابر / مش جعان تسلم
شاكر / بقولك ايه فوق كدا و صحصح معايا انت مش جاى تنام دا احنا ما صدقنا و لو سعادتك هتعمل لى فيها عيان فالاولى برده انك تقوم تاكل و تاخد الدوا
صابر / الرجاله عملوا ايه ؟
شاكر / فى ايه
صابر / شاكر
شاكر / قافل على نفسه البيت و ما بيفتحش بس هو جوه و دياب أكد لى
صابر / و ما حدش فى الرجاله اللى راحوا فيه صحه يهبد الباب رجل و يجيبه من قفاه !!
شاكر / الكبير نبه ان ما يحصلش شوشرة الظابط اللى اسمه احمد مركز اوى فى حكايه محمود و الموضوع هيكبر و مش هنعرف نلمه
صابر يتنهد و يبص الناحيه التانيه
شاكر / مسيره هيطلع من البيت مش هيفضل قافل على نفسه العمر كله يعني اهدى لو مش النهرده بكره اهو تكون شديت نفسك و قمت بالسلامه بدل ما تقف قصاده و انت مش قادر تصلب طولك كدا
صابر يهز راسه
شاكر / قوم بقي كل لك لقمه و الاكل سخن ما تضيعش حلاوته
صابر / مش جعان يا شاكر بجد بعدين
شاكر واقف مكانه صابر يتنهد و يقوم يقعد
صابر حط الاكل يا شاكر
شاكر يفرح و يحط الاكل و يقعد صابر يبص له و يبتسم و ياكل
.............................
فى اوضه نجاه
مهره واقفه فى البلكونه بتتفرج على الناس و هى بتعبى الوجبات و الناس اللى قاعده مستنيه دورها الباب يخبط تروح تفتح تلاقى هند شايله صينيه عليها اكل
هند / انا قولت اجى افتح نفسك و ناكل سوا لو مش هيضايقك يعني
مهره تشيل منها و تحطها على ترابيزه هند تدخل تقفل الباب و تحضنها مهره الدموع تنزل من عنيها هند تحوط وش مهره بايديها و تمسح دموعها
هند / هو انا قولتلك انى جه عليا وقت و قطعت الكلام انا كمان
مهره تهز راسها لا هند تشد كرسي و تقعد و تبدا تاكل
هند/ زمان و انا قدك مش من كتير اوى يعني لتقولي عجوزه و لا حاجه
مهره تضحك هند تاكلها مهره تاكل
هند / عمك مختار كان جارنا بيدرس فى مصر معايا فى نفس الدفعه و انا كان عندى ظروف كدا مع اهلى... اهل ابويا الله يرحمه كانوا عاوزينى لابن عمى المدلع ... هو فين و عمك مختار فين ... لما ابويا الله يرحمه مات قرروا يفسخوا خطبتى من عمك و ابن عمى استغل يوم نزول عمك مختار البلد فاتهجم على البيت هو و صحابه و ضربونا و بهدلونا كنت هموت فى ايده
مهره ملامحها حزينه
هند / كتر خيره صعبت عليه و ودانى المستشفي ..  بس مش عشان اتعالج ... عشان يكشفوا على شرفى ... كنت بعيط بس ... لا طالع لى صوت و لا قادره أكل و لا اتعامل مع الناس و لا قادره اشوف حد خطفوني فى فيلا كدا و قرروا انى اتجوز أبن عمى ... بس على مين عمك قلب الدنيا لحد ما لقانى و رجع بعروسته
مهره تبتسم
هند / تعرفى اتكلمت امتى
مهره تبص لها باهتمام
هند / اول ما شديت مع عمك فى الكلام ... عمك اصله مش بيعرف يتكلم ... مش قصدى انه بيهرتل فى الكلام لا سمح الله بالعكس دا الكلمه بتطلع منه بحساب ... بس هو حبه كدا مش بالكلام بالفعل مش زى الافلام حاجه تانيه خالص ... انتى أقوى منى على فكره ..  وجعك أشد طبعا.. ابتلاء شديد... بس انتى قده و هتقومى منه أقوى انا متاكده
مهره تهز راسها بعدم مبالاه
هند / تحبى اجى معاكى نشوف دكتور
مهره تعوج بقها مش عارفه
هند / تحبى نخرج نركب خيل الجبل دلوقت امان الأمان برجوع صابر و شاكر يعني انسب وقت نروح نركب خيل البلد كلها هناك تيجي ؟ بصراحه انا بقالى كتير اوى ما ركبتش خيل مش رقم واحد عندى بصراحه و لا الجبل بس مش هيحصل حاجه لو خرجنا مره كل فين و فين يعني و لا ايه
مهره تهز راسها اه هند تطبطب على ايدها
هند / كلى و ارتاحى و انا هرتب مع الجماعه و نشوف معاد
مهره تهز راسها هند تبتسم و تاكل نجاه تدخل
نجاه / ايه ده خيانه
هند / تعالى اكلك موجود اقعدى
نجاه تروح تقعد جنبهم و تاكل معاهم و تبص لمهره تبتسم نجاه تبتسم
………………………….
فى واحد من الشوارع
عمال بيعلقوا يفطه ديجيتال عملاقه منصور معدى يشوفهم يركن العربيه و ينزل
منصور / صباح الخير يا رجاله
عامل  / صباح الفل يا باشمهندس
منصور / الله ينور خير تبع مين دى
عامل  / دى شركه دعايه كبيره اوى فى مصر هتعمل شاشات اعلانات عملاقه فى كل حته فى البلد
منصور / و هى البلد ناقصه يفط اعلانات ... على العموم ربنا يرزق الجميع ... بالاذن انا 
منصور يرجع العربيه و يبص على اليافطه و يمشي
……………………..
فى الجبل
صابر / هيفضل قافل على نفسه العمر كله يعني ما تبعتوا حد يخبط عليه
شاكر / اخرتها ايه طيب ما تسبها تهدى
صابر / انا متاكد ان الموضوع مش بسيط زى ما انت فاكر ... الواد ده عارف كتير و بكره تقول صابر قال
شاكر / بس مش هيقول حاجه و بكره تقول شاكر قال
صابر / ابقي حاولت ... بس صدقني لو جه تحت درسي هيقر بكل حاجه ... يمين بالله لولا الملامه كنت بعت جبت ابوه و أمه ... و ساعتها هو اللى هيجيلى راكع ... بس حتى دى ما اضمنهاش ... اصله واطى يبيعهم فى ثانيه
شاكر / مش هتهدى انت صح
صابر / لو مكانى هتهدى
شاكر / لا بس مش هفرك كتير
صابر يرفع حاجبه
شاكر / هصبر ... صدقنى التقيل بيقوش فى الاخر
صابر يبص الناحيه التانيه
شاكر/ انت مش كنت فى كليه الطب ؟!
صابر / و دا ايه علاقته باى حاجه؟
شاكر / اصلى مش فاهم دكتور طول بعرض و حالته الماديه مفيش بعد كدا أخلاقه و دينه اللهم بارك ليه رفضك
صابر / عشان مش كل الناس ربنا بيسترها معاهم ... الحلال كان قدامى و اتمرقعت فى الحرام و استحليته ... السكينه سرقتني و ما سمعتش للى نصحوني
شاكر / ربنا ما بيعاقبش من اول مره
صابر / ليه لا عادى ... مش احسن ما كنت تماديت فى الغلط ... اهو خفيف خفيف كدا
شاكر / او يمكن بيبتليك عشان يعوضك سبحانه ما حدش عارف شايل له ايه
صابر / يمكن
شاكر / باذن الله لما عدتها تخلص
صابر/ مفيش حاجه هتتغير يا شاكر هيفضل بيني و بينها الف باب
شاكر / ليه يا عم الكئابه دى و الله هتفرج صدقني
صابر / يا اخى امال لو ما كنتش قاعد جنبك و انت بتسمع الحوار اللى عمله النهرده و النار اللى قادت فيه لما بس عرف أنى راجع... ما تضحكش على نفسك
شاكر / يا عم انت بس ادخل البيت من بابه و ارمى بياضك و كل حاجه هتتحل باذن الله
صابر / طب اسكت دلوقت و وفر الجاز اللى عمال تحرق فيه ده مش جايبه همها
شاكر / هى ايه دى
صابر / اسكت يا شاكر اسكت
شاكر / ماشي هقفل السيره بس هتابع العده و مش هنسي الموضوع
صابر / لا حول و لا قوه الا بالله
شاكر / انا بقولك بس
صابر / يا عم اسكت بقي و ارحمنى انت ما بتفصلش التلاجه بتفصل
شاكر / فصلت
صابر يتنهد و يقوم يطلع بره
……………………….
فى مبنى المحافظه
اتنين موظفين بيتكلموا
موظف ١ / يا عم تلاقيهم راشين ارضيه حلوه امال الورق هيخلص فى ساعه زمن كدا عادى
موظف ٢ / بصراحه انا متفائل ما يمكن الشركه الجديده دى تعمل شغلها مظبوط بدل العذاب اللى بنشوفه كل صيف
موظف ١ / و الله انت علاطول متفائل لحد ما تاخد على دماغك زى كل مره يا جدع هو فى حد فى البلد دى بيشوف شغله و بعدين هو ناموس بلدنا يقدر عليه إلا ربنا دا على راى الوليه مراتى جلده طخين و منحس و كل سنه بينحس عن السنه اللى قبلها
موظف تالت يدخل
موظف ٣ / بتتكلموا عن الشركه اللى هترش الناموس
موظف ٢ / المحافظ مضى الورق من غير حتى ما يبص فيه ثانيتين على بعض
موظف ٣ / افتكروا كلامى كل ده زى قلته و فلوس مرميه فى الارض و بعدين ناموس ايه اللى رايحين نصرف عليه فلوس دا بدل ما نصرفها على حاجه تنفعنا
موظف ١ / قولت كدا بس بيقولوا الموضوع جاى عليه توصيه كبيره من فوق عشان السيرك و السياحه و الحبشتاكانات اللى بيتكلموا عنها اليومين دول و بعدين لسه حالا بقوله و لا اى حاجه هتترش هتقدر على ناموس بلدنا بالعكس هيتكيف معاها و هيجي السنه الجايه أقوى
موظف ٢ / يا عم العيال بتتعب منه برده
موظف ٣ / صحيح يا جدعان زى القرع نمد لبره عاوزين فلوس للتطوير مفيش عاوزين فلوس نزود عماله مؤقته مفيش عاوزين حوافز مفيش انما فى شويه سياح جايين يسترزقوا من البلد اكتر ما هيدوها لاااااا لازم نفرش ليهم الارض رمل  .... رمل ايه نفرشها ورد كمان
موظف ٢ / شكلنا قدام الاجانب و نشجع السياحه يا جدع
موظف ١ / يا جدع انت بطل طيابتك دى شويه بقي السياحه هتسيب كل المحافظات الكبيره و هتيجي تنشط فى بلدنا
موظف ٢ / و ليه لا هو احنا شويه طب يمين بالله انا لفيت البلد طولها بعرضها ما لقيت فى جمال بلدنا و خير بلدنا و لا ناس زى ناس بلدنا  هم بس يسيبوها فى حالها و هى تبقي جنه ... تبقي !! طب يمين بالله جنه اساسا
موظف ١ يبص لموظف ٣ و يضربوا كف على كف
  ..............................
فى الجبل
خيمه مفتوحه منصوبه و نار و شوى و رجاله محاوطه الجبل من كل ناحيه و نجاه و مهره و هند و خديجه و شويه بنات قاعدين تحت الخيمه شاكر يدخل
شاكر / السلام عليكم
هند / و عليكم السلام يا براوى
شاكر / تسلمى يا ست الكل ناقصكوا اى حاجه
نجاه / فين الخيل
شاكر / محمد جايبهم و جاى اديله خمسه بس يكون وصل
نجاه / لا لا لا الخدمه مش عجبانى المرادى أبدا
خديجه / يا بت اتلمى
شاكر / اهو وصلوا اهو ياخد هو بقي الطريحه انا اللى عليا عامله على أكمل وجه و لو فى حاجه ناقصه انا واقفه هنا اهو مع الرجاله
هند / تسلم مفيش اى حاجه ناقصه الحمد لله
شاكر يبتسم و يمشي محمد يدخل
نجاه / ايه التأخير ده كله
محمد / دخلت الاسطبل لقيتهم ملمومين على نجمه بتولد
خديجه / دا الليله عيد بقي و هندلع جابت ايه
هند / نجمه دى فرسه من بتوع عمك عباده بس مش اى فرسه حاجه كدا ايه سبحان الخلاق
خديجه / عمك عباده ما خطفش قلبه غير اتنين نجاه و نجمه
نجاه / انتى الأصل يا ست الكل
خديجه / دا كان زمان يا اختى قبل ما تشرفى و تخطفيه منى
عباده يدخل و فى ضهره مختار
عباده / مظلوم و ربنا ... السلام عليكم
مختار/ السلام عليكم اخبار الاكل ايه
هند / احنا لحقنا
مختار و عباده يقعدوا
عباده / المهم يا ست البنات تحبى تسمى المهره الجديده ايه انا مش هخلى حد يسميها الا انتى
مهره تبتسم بحرج
مختار/ الشهاده لله انا كان فاضل ابوس رجله يديهانى قالى لا دى بتاعه مهره سكت ما قدرتش افتح بقي
هند / دا كدا باين انها فرسه حلوه اوى شوقتونى اشوفها
نجاه / نشوفها بعدين انا هقوم اجرى فى الجبل شويه القاعده دى مش جايه معايا سكه
خديجه / صحيح دا انتى لو قعدتي مكانك عشر دقايق على بعض اقلق
نجاه / ما يهونش عليا قلقك يلا يا مهره قومى احنا جايين نقعد و لا ايه قومى
نجاه تمسك ايد مهره و يروحوا محمد يروح وراهم
عباده / مفيش جديد برده
هند / و لا صوت حتى اخرها تبتسم زى ما انت شايف كدا
مختار يتنهد
عباده / عبد الله استقر على دكتور و اتكلم معاه و باذن الله يبدأوا العلاج على طول
هند / بالشفا
مختار / هو شاكر فين
هند / كان هنا من شويه
مختار يقوم يدور عليه
.........................
فى شقه مجهزه
جابر يخبط على باب و يدخل يلاقي جوزيف قاعد جابر يدخل و شايل أكياس
جابر / جبتلك كل الحاجات اللى طلبتها بنفس المواصفات و فى حاجات جبت أعلى كمان
جوزيف / مش عارف ارد جمايلك دى ازاى
جوزيف يفتح شنطه يطلع منها الموبايل و يبدأ يلعب فيه
جوزيف / مين اللى ظبط الموبايل دياب و لا منصور
جابر / دياب
جوزيف / تمام ... هى نجاه فى الجبل
جابر / عرفت ! .. اه فى الجبل
جوزيف / و انت مش معاها ليه ؟
جابر / الرجاله كلها هناك
جوزيف يبص لجابر بطرف عينه و يبتسم
جوزيف / عاوز انزل اتمشي فى البلد ... تحب تيجي معايا
جابر/ هتقدر؟!
جوزيف/ هقدر
تليفون جابر يرن
جابر / تمام هرد على التليفون على ما تجهز
جابر يطلع بره و يرد
جابر / السلام عليكم... طمنى ... حلو اوى ساعده على قد ما تقدر و انجزنى ... حقك هتاخده و زياده ما تقلقش
جابر يقفل و يبتسم يبص وراه يلاقي جوزيف واقف
جوزيف / مش هتستفيد حاجه من الحوار ده
جابر / مش فارقه
جوزيف / امال بتعمله ليه ؟
جابر / فارق معاك فى حاجه؟!
جوزيف / بالعكس كل ما كان شكلك وحش كل ما كان شكلى قدامها حلو
جوزيف يبتسم باستفزاز
جابر / راجل لراجل كدا انت ايه اخرك يعني ناوى على ايه عاوز ايه
جوزيف / حرفيا ... مش عاوز حاجه و لا ناوى على اى حاجه
جابر / مش مصدقك
جوزيف / و لو حلفت لك برده مش هتصدقنى بس دى الحقيقه كل حاجه فى ثانيه اتلخبطت و ما اعتقدش انى هقدر ارتب ورقي بسرعه فسايبها على الله زى ما بتقولوا
جابر / و ايه علاقه نجاه بالكلام ده
جوزيف / ايه ده !! انت كنت بتسأل عن نجاه من الأول؟
جابر يهز راسه
جوزيف/ من راجل لراجل ؟!
جابر يبص الناحيه التانيه و يرجع يبص له و يهز راسه بابتسامه مصطنعه
جوزيف / عجبانى
...........................