الكبيره ٢ بقلم / لولو_محمد

الحلقه ٨

((((((( الكبيره ٢)))))))
#لولو_محمد
الحلقه ٨
عبد الله / طب ممكن بقي تركزى معايا دقيقه و تشوفى الدوا ده عشان خاطر جوزك كمان و لا ان جت نجاه خلاص نحلق لعباده مع احترامى يا كبير
عباده يضحك و باين عليه التعب
خديجه / و احنا لينا بركه غير ابو فارس وريني الروجته و انا ههتم بيه بنفسي
عبد الله / اتفضلى ... انا هروح ابص على باقي الناس
عباده / اتفضل
عباده يقعد على اقرب كرسي
خديجه / مالك مش المفروض تكون فرحان
عباده / فرحان يا خديجه ... الارض مش سيعانى بس جسمي خاينى مش قادر اعصابى كلها سايبه و عضمى بيوجعنى
خديجه / سلامتك يا خويا اللى حصل ما كانش شويه برده بس اهى كلها كام ساعه و تيجي تترمى فى حضنك دا احنا بنعمل ولايم فى السرايا عندنا
عباده / خديجه ... الناس منصابه فى عيالها و اللى وقعوا مننا كتير ... اهدوا شويه
خديجه / معاك حق فاتتنا دى يا خويا صح هقولهم هكلمهم و اقولهم... بس احنا برده معزورين ... دى كانت حاجه تانيه و انت فاهم
عباده يمسك ايد خديجه و يبوسها تاخده فى حضنها
خديجه / انا ما بطلتش صلاه و دعا و ربنا استجاب انا لازم ادبح و اكل الناس يا عباده دا الصدقه دى اللى حايشه عننا
عباده / بالاصول هنعمل كل ده بالاصول ترجع بالسلامه و باذن الله كل حاجه هتتصلح و تبقي احسن من الاول كمان
خديجه تنزل على ركبها قدامه
خديجه / طول ما حسك فى الدنيا كل حاجه هتبقي تمام
........................
فى المستشفي
نجاه قاعده جنب جابر و فى كذا ظابط واقفين حواليها
نجاه / انت وعدتنى
جابر يبصلها
نجاه / لو طلع بيكدب عليا هتقتلنى و تقتله
جابر يبص قدامه
نجاه / مش هرجع لابويا كدا يا جابر
جابر / لو لا قدر الله فى اى حاجه هتبقي بينا انا و انتى و بس و هقتله فعلا بس انتى هترجعى البلد راسك مرفوعه حتى قصاد ابوكى تمام
نجاه / مش هينفع يا جابر
جابر / ابوس ايدك انا من ساعه اللى حصل ما نمت الا بمهدئ و دماغى بوابير جاز بتغنى و ترد على بعض فارحميني و باذن الله ما فيش حاجه ..  و لو لا قدر الله في انا يا ستى راضي ... اتجوزيني شويه و اطلقك و اوعدك مش هفرض نفسي عليكي و هيبقي سر بينا يندفن معانا لاخر العمر ... بس انتى مش هتموتى يا نجاه و لا هتتلمس منك شعره ... و اقفلى السيره بقي عشان انا بموت خلقه
نجاه / انا اسفه
جابر / على ايه
نجاه / على كل اللى عشتوه بسببي
جابر / هم خبطوكى على دماغك و لا ايه يا هبله
نجاه / هى دماغى بس دا انا خدت علقه موت
جابر يبص قدامه
نجاه / دا ربنا نجدها احلام ... كل ما افكر ان الحيوان ده كان عاوز يتجوزها
جابر / بلال اللى ضربك ؟
نجاه / بلال !! اسمه بابلو ... و اميره اسمها امايا و هيلين رخره طلعت منهم ... اقولك ايه بس ... شياطين شياطين ... الله يعينه ناصر لما يعرف انها عايشه لا و مش اى عايشه دى منهم و كل اللى عشناه معاها تمثيل و كدب
جابر يبص الناحيه التانيه
ممرضه تخرج من اوضه الكشف و معاها ملف
الممرضه / نجاه الزيني
نجاه benim /
( انا )
نجاه تبص لجابر و تروح معاها جوه و الممرضه تقفل الباب جابر ياخد نفس عميق و يتنهد بوجع
.......................
فى اوضه مهره
مهره بتتكلم فى التليفون
مهره / انا فرحانه اوى انا مش مصدقه نفسي انا عاوزه اعرف هى هتيجي امتى عشان استقبلها فى المطار انا بجد رجلى مش لامسه الارض يااااه انا فرحانه اوى انك افتكرتنى و طمنتنى
عمران / بصراحه عيب اوى بعد كل اللى عملتيه معانا اننا لما ربنا يفرجها علينا ننساكى
مهره / انا بجد فرحانه اوى و مش مصدقه نفسي بجد ... طمنى انت عليك احسن و لا لسه تعبان
عمران / انا باخد مسكن قوى و هسافر على اول طياره راجعه احنا خلاص ما عادش فى حاجه تجبرنا نفضل هنا
مهره / تنوروا بلدكم يا رب ... انا باذن الله هستاذنكوا اجى ازور نجاه
عمران / طبعا دا انتى تنورى فى اى وقت عربيه من باب البيت تيجي تاخدك و ترجعك
مهره / ميرسي اوى انت زوق جدا 
الباب يخبط و اكرم يدخل
مهره / استنى ثوانى ... بابا اكرم اللحق نجاه رجعت لقوها و رجعت الحمد لله و هترجع مصر قريب جدا
اكرم / بجد !! الف مبروك ايه الاخبار الحلوه دى
مهره / خد بارك لعمران بنفسك بقي ما رضيش يستنى للصبح عشان يفرحنا
اكرم ياخد الموبايل
اكرم / الف مبروك يا بطل
عمران / الله يبارك فى حضرتك
اكرم / باذن الله لما توصلوا بالسلامه تكلمونا اجيب مهره و نيجي نزوركم
عمران / اكيد حضرتك تنورنا
اكرم / حبيبي تسلم ... هسيبك ترتاح بقي و مش هطول عليك بس هستناك تطمنى انكوا وصلتوا بالسلامه
عمران / اكيد باذن الله
اكرم / سلام يا حبيبي سلام
اكرم يقفل
مهره/ انا طايره من الفرح يا بابا انا بجد
اكرم / محتاجين نتكلم
مهره فرحتها تتكسر و تتخض
اكرم / انا عارف انك متربيه اوى و انك متدينه ... بس ... عمران معاه رقمى ... كان ممكن يكلمنى انا و لا ايه
مهره / هو حضرتك اضايقت؟؟
اكرم / الطبيعي اخدها ايزى و كدا صح
مهره / تمام ... مش هرد عليه تانى
اكرم / و هتحطى حدود للتعامل معاه او مع اى شاب يقرب منك اى حد عاوز يقرب منك لازم ياخد الاذن منى الاول ... انا ما لقتكيش فى الشارع
مهره تبتسم
اكرم / و بعدين المفروض عمران ده شاب متدين و ملتزم ايه نسي كل ده فجاه و اخد عليكي ليه
مهره / خلاص بقي يا اكرومى ما تزعلش
اكرم / لا ما دام فيها اكرومى دا احنا نطلب عشا بقي
مهره / دلوقت
اكرم / بقولك ايه انا جعان فى ام البيت الفقر ده و قولت هى مهره قلبي و ونيسه ايامى هى اللى هتفتح نفسي على الاكل زى ما فتحت نفسي على الدنيا ... يرضيكي اكرومك ينام جعان
مهره / فشر حالا هنزل اعملك احلى عشا ... لما تدوقه هتفتحلى مطعم تانى يوم
اكرم / و حد فى الدنيا ربنا يكرمه بجوهره و يشاركها مع العالم ... دا انا لو عليا احطك فى قلبي و اقفل عليكي و احميكي من الدنيا بحالها و استمتع بيكي لوحدى
مهره / ايه ده ايه ده ايه ده احنا ما فيناش من كدا
اكرم / انا فى الحب ما عنديش ياما ارحميني
مهره / انا مفيش حد فى الدنيا بيضحكنى قدك دقايق و الاكل يكون جاهز ... عن اذن حضرتك
مهره تمشي و اكرم بيتابعها و مبتسم
......................
فى الشركه
منصور / انا بعت صور بلال و اميره و هيلين و ابتسام لكل الناس اللى تبعنا فى كل انحاء العالم و حطيت جايزه ممتازه على راس اى واحد منهم يبقوا يورونى هيعرفوا يتنفسوا تانى ازاى
دياب / ظبطتى تزاكر الرجوع
وفاء / ايوه و مش كلهم على نفس الرحله
منصور / نجاه و عمران و جابر على اول رحله الباقي خمسه فى خمسه بين بحر و جو
وفاء/ ايوه عملت كدا و همام هيرجع زى ما راح هو و رجالته
مهندس ١ / اخيرا هنام
دياب / ما تتعشمش اوى اللى حصل ده مش هيتسكت عليه
وفاء / و الجدع اللى نجاه قالت عليه هيجي معاهم دا هكر محترف يعني وجوده قريب اوى كدا لازم يخلينا كلنا نصحصح و الا كل تعبنا هيروح للابد
مهندس ٢ / انا مش فاهم برده مين الجدع ده و ايه اللى خلانا نغير موقفنا ناحيته بالسرعه دى
دياب / مفيش حاجه اتغيرت المجرم برئ الى ان تثبت ادانته دى هناك عند الحكومه انما هنا الكل تحت الميكروسكوب و الضربه ما تجيش غير من القريب مفهوم
منصور / بس ما حدش يقلق كل اوفر تايم الفتره اللى فاتت و الفتره الجايه بينضرب فى خمسه
دياب / اللى فاتت خمسه و اللى جايه عشره عشان هتتفحتوا
الكل يضحك
دياب / انا ما بهزرش الضيف اللى جايلنا اخطر بكتير مما انتوا ممكن تتخيلوا ... و المشكله الحقيقه مش فيه ... فى اللى هيجوا وراه ... ياما عشان ينتقموا منه او عشان ينتقموا مننا اننا بوظنا لهم خطتهم
مهندس ١ / بس احنا ممكن نستفيد برده من الجدع ده
دياب/ ما ينفعش تثق فى حرف هيطلع من بقه كل حاجه ممكن يعلمهالك ممكن تطلع فخ فى الاخر
منصور / سيبوا كل حاجه لوقتها ... انا هنزل الف البلد اتابع مع الجماعه بتوع الكاميرات لازم نتاكد ان كل شبر فى البلد متغطى بالكاميرات
وفاء / ممكن تروحنى فى طريقك يا منصور
منصور / اكيد طبعا ... هتعوز حاجه يا دياب ... حد من الرجاله يلزمه اى حاجه ... الغدى عندنا النهرده يا رجاله
المهندسين / يدوم العز يا هندسه ... تسلم يا كبير
منصور / سلام يا دياب
دياب / خدوا بالكوا من نفسكوا سلام
دياب يروح مكتبه و يقفل الباب و يروح يقف عند الشباك و يروح يتكلم فى التليفون
دياب / ايوه يا عمى اخدت العينه بتاعه عم رشيد و لا لسه ... طب تمام على بركه الله بس ما تاخذنيش يعني لو طلع مش هو ايه العمل وقتها ... يعني هتسيبوه يمشي عادى !! بعد كل اللى عمله !! ازاى ... تمام هجيلك تفهمني اللى بتقول عليه ده
........................
فى شقه
هيلجا / اكيد التعليمات جياله بده بدليل اننا ما جالناش اى تعليمات اننا نمنعهم ينزلوا مصر او نتعرض لهم
بابلو / الخطه كانت خطه جو و على مسؤليته و طبعا طول الوقت ما ينفعش يبان بوشه و لازم كمامه او تنكر و حرق وشوشنا كلنا و رايح بقي هو يرجع معاهم عوده الفاتحين
امايا / طب احنا هنعمل ايه برده مش فاهمه هنفضل هنا
ابيك / لازم ندارى اكيد بيدوروا علينا اذا كنت انا و هم لسه ما يعرفوش حقيقتي كانوا مش مديني فرصه اتلفت امال دلوقت هيعملوا ايه
بابلو / مش كلهم نزلوا مصر بس اكيد كلهم هينزلوا و هنقدر نتحرك بحريه تانى
هيلجا / كل اللى تعرفهم خد بالك هم مش سهلين اوى كدا عشان يكشفوا كل ورقهم ما تديهمش فرصه يفاجئوك
بابلو / و انا مش هستناهم يفاجئونى انا شخصيا مرتب لهم احلى هديه ... هينبسطوا بيها اوى
هيلجا / هى ايه بقي
بابلو / هتعرفوها وقتها ... لما اخد الاذن الاول انى ابدا اتصرف
امايا / هو انا لما احب اكلم حد من المجلس اكلم مين
بابلو / هم لما يشوفوكى تستاهلى هيدوكى اللينك
امايا / بجد !! طب تمام
امايا تيجي تمشي
بابلو / عوزاهم فى ايه عندك افكار
امايا / لا لما استاهل ابقي افكر عن اذنكوا
ابيك / ما قدرتش تصلح اللى بينكوا برضه
بابلو / خليكي فى حالك
بابلو يسيب المكان و يمشي
ابيك / انتى اتعاملتى مع جو ده من قريب
هيلجا / ايوه
ابيك / ايوه ايه هو انا هسحب الكلام منك ما تحكى تعرفى ايه عنه
هيلجا تتنهد
هيلجا / و لا اى حاجه انسان غريب و هادى جدا ما لوش كبير و لا بيلتزم بالتعليمات شعاره الخطه بتتغير طول الوقت
ابيك / تفتكرى ممكن يكون غير الخطه و المجلس موافق على التغير
هيلجا / المجلس مش بيحجمك انتى ليكي هدف توصليله ازاى دى طريقتك المجلس بيدخل بس لو خطتك ما نجحتش باى باى
ابيك تتنهد
هيلجا / انتى مع المجلس من قد ايه
ابيك / من زمان اوى
هيلجا / و ما تعرفيش المجلس بيشتغل ازاى !! دا معناه انك ملفك ما فيهوش غير استماره حمره
ابيك / يعني ايه استماره حمره
هيلجا/ يعني الكريزه اللى على وش الكب كيك شكلها حلو طعمها حلو بس ... اكيد مش وسيله اغراء مش اكتر ... ديكوريشن
ابيك / و انتى بقي شوفتى الملفات بتاعه المجلس قبل كدا
هيلجا / صدقى او ما تصدقيش انا وصلت لاعلى مما تتخيلى بكتير بس للاسف غلطت غلطه عمرى و رجعت للصفر تانى او يمكن تحت الصفر بكتير كمان ... بس عشان انا ملفى تقيل اوى لسه سايبيني عايشه لدلوقت
ابيك / انا هقوم اشوف امايا
هيلجا /  سلام
.....................
فى البلد
عربيه ماشيه راكب فيها جابر جنب نجاه ورا و عمران قدام و مختار سايقها اهل البلد متجمعين مختار يوقف و نجاه تنزل و الستات يحضنوها و يسلموا عليها جابر و مختار ينزلوا يحوطوا عليها و يبعدوا الناس و الغفر حواليهم
ست ١ / حمد الله على سلامتك يا ضنايا انا قلبى اتخلع عليكي
نجاه / تسلمى يا حجه و يسلم دعاكى ربنا ما يوريكى حاجه وحشه فى حبايبك ابدا
ست ٢ / قلقتينا عليكي يا بنت الاكابر ربنا ما يعيدها
نجاه / عشتى تسلمى
ست ٣ / و الله لولا الملامه و الناس اللى موجوعه فى عيالها كنت زرعط
نجاه / كانك و اكتر تسلمى
مختار / ايه يا جماعه نسيبها ترتاح و نرتاح كلنا و لا ايه انا عارف ان مجيتها غاليه بس امها كمان هتموت و تشوفها
ست ٤ / الف حمد الله على السلامه الف مليون حمد الله على السلامه
مختار / الله يسلمك الله يسلمكوا كلكوا
مختار يحرك نجاه ترجع تركب و الغفر يوسعوا السكه العربيه تتحرك
مختار / هو الباشا ما قالش هيجي امتى
نجاه / ما اعرفش
مختار / انتوا متاكدين انه ابن رشيد
نجاه / اسال جابر يا عمى حته منه نفس الصوره بالظبط
جابر / انا بقول تجميل
مختار / ما حدش يعرف ان رشيد عنده ابن غيرنا
جابر / الكلام بيتنطور و البت عاشت وسطينا كتير
نجاه / بس ما شافتوش
جابر / صوره فى الالبومات سهل اوى تخلى اى حد يطلعهولها ... البت كانت حربايه و ضاحكه على البلد بحالها
مختار / انا لسه ما قولتش لناصر و الحقيقه مش قادر اقوله
نجاه / لازم يعرف
مختار/ هقوله اكيد هقوله ... انت كويس
عمران / بخير طول ما انتوا بخير
مختار / حمد الله على سلامتك الحمد لله على سلامتكوا كلكوا
مختار يوصل السرايا البلد كلها متجمعه و بيوسعوله السكه يدخل يركن حريم العيلتين متجمعين نجاه تنزل الكل ياخدها بالبوس و الاحضان
خديجه / نورتى بيتك نورتى الدنيا بحالها
نجاه / تسلمى ياما ابويا فين
خديجه / فى اوضته اطلعيله هو تعبان شويه و الدوا هده
نجاه تبص فى الارض خديجه تحضنها هند تشدها
هند / هاتى شويه مش بتاعتك لوحدك
سماح / و الله لولا الملامه كنت زرغط حمد الله على سلامتك
ياسمينا / نورتى يا نوجه كنا هنموت عليكي
نجاه / عدت الحمد لله ... و الله كلكوا واحشيني بس استاذنكوا اطلع اطمن على ابويا
ماجده / اطلعى و ارتاحى و احنا هنبقي نيجي تانى بالليل
هند / بالليل ايه ما حدش ماشي هنتغدى سوا الاكل على النار قول حاجه يا مختار
مختار / اقفل البوابه دى يا ابنى
الكل يضحك نجاه تبتسم و تعدى بينهم تدخل مختار يوطى على جابر
مختار / انا عارف انك مرهق بس انت اللى عارف شكله ... فتحوا عنيكوا كويس
جابر / ما تقلقش يا خالى انا هتابع كل حاجه بنفسي
مختار يروح يسند عمران شاكر يدخل من بعيد يسند اخوه هند يبان عليها الحزن
عمران / انا بخير ياما ما تقلقيش دا جرح صغير خالص
هند / و لا استحمل عليكوا شكه الابره يا ضنايا الف مليون حمد الله على سلامتك
ماجده / السكه يا جماعه السكه بالله عليكوا
مختار و شاكر يسندوا عمران لجوه
عمران / امال محمد فين
مختار / مع الرجاله حوالين البلد انت عارف اننا محتاجين دلوقت لكل راجل ما حدش عارف هيجرا ايه
عمران / باذن الله خير
شاكر/ ارتاح انت بس و انا هروح مكانه و ابعتهولك يسلم عليك انا عارف انه واحشك
عمران ينام فى سريره
مختار / ليك علاج او اى حاجه
عمران / واخده افرد ضهرى بس و ممكن اكل لقمه و كتر الف خيركوا على كدا
هند تدخل شايله صينيه الاكل شاكر يجرى يشيل من امه
هند / سامعه حد بيقول عاوز ياكل
مختار / امك سرعه الصوت
هند / مش متصاب و لازمله غزا
عمران / تسلم ايدك شيلاها بنفسك لحد هنا
هند / و انا عندى اغلى منك اشيله عقبال ما اشيل و احط فى افراحكوا واحد واحد
مختار / هو الاكل ده كله لعمران لوحده و لا نجابر الزاد
هند / كل لما تشبع و فى تحت كتير هنزل اساعد نضايف باقي الناس لو عاوزين تانى نادولى بس
شاكر / تسلم ايدك يا ست الكل
هند تبتسم و تمشي
شاكر / احنا عشنا يومين صعبين اوى هنا و خصوصا على امى
مختار / عدوا عدوا خلاص الحمد لله الحق كلك لقمه عشان تروح تريح اخوك الصغير شويه
شاكر / تمام حاضر
............................
فى اوضه عباده
نجاه تدخل بتجرى تلاقي ابوها ممدد فى السرير اول ما يشوفها يبتسم تجرى فى حضنه اول ما تحضنه تعيط
نجاه / انا حاولت اقولك انا كنت بقولك انى بخير ما اعرفش ما كنتش سامعنى انا كنت بخير ما اتلمستش ما تخافش عليا انا ما حدش لمسنى
عباده يبوس راسها
نجاه / انا اسفه انا اسفه اوى انتوا عيشتوا حاجات كتير صعبه بسببي
عباده / الحمد لله انك بخير اى حاجه تانيه مش مهم
نجاه / حقك عليا حقك عليا اوى انا اسفه انا اسفه اوى
عباده / بس يا بت بطلى هبل
نجاه / مالك يابا انت ليه نايم فى السرير
عباده / الاسترس مقصر على اعصابى باخد فيتامينات و مسكنات و حاجات بس بيقولوا هتاخدلها وقت و امك قالت اخليني مرتاح و ما اضغطش على نفسي و انا مش قادر عليها لوحدى كنت مستنيكي تيجي تسنديني
نجاه / انا اسفه
عباده / بطلى ... انتى ما عملتيش اى حاجه غلط تعتزرى عليها ... انتى هتفضلى طول عمرك احلى حاجه حصلتلى فى حياتى ... حمد الله على سلامتك
نجاه / عرفت انى لقيت يونس
عباده/ لسه ما اتاكدناش انه يونس ... و حتى لو طلع يونس ... مستنيه منه ايه لمجرد ان طلع اسمه يونس مش جوزيف ده هيغير فى اللى حصل حاجه هيغسل الدم اللى مغرق ايديه
نجاه / الاسلام يمحو ما قبله
عباده / و لمجرد ان ابوه طلع مسلم دا هيخليه يغير دينه و يسلم يعني ... نجاه ما تبقيش عاطفيه زياده عن اللزوم ما تستنيش من ورا الجدع ده خير
نجاه / المجلس مش هيسيبه يعيش بعد ما بوظ خطتهم و رجعنى ابا انت مش متخيل هما كانوا جوانا ازاى دا بلال اللى كان متقدم لاحلام بنت عمى كان واحد منهم اميره اللى كانت بتنام فى حضنى طلعت منهم هيلين اللى كانت بتعالجنى بايدها كانت منهم و بيقولوا فى غيرهم كمان
عباده ساكت
نجاه / احنا نقدر نستفيد منه و نقدر كمان نعرف على الاقل احنا بنحارب مين ... انت لسه بتثق فيا يابا
عباده / اكتر من نفسي ... بس بخاف عليكي من مشاعرك و حماسك الزياده انتى صغيره و ما بتفكريش بعقلك
نجاه / عشان خاطر عمى رشيد حتى ايه مش كان مامنكوا تلاقوا ابنه
عباده / لو طلع ابنه هنسلمه ورثه على داير مليم ياخده و يرجع من مطرح ما جه
نجاه / لو راح مش هيرجع و لو ما كسبناهوش هنخسر كتير احنا محتاجين نفهم الناس دول و دا مصدرنا الوحيد
عباده / الحدايه ما بتحدفش كتاكيت
نجاه / هو كمان بيدور على اهله
عباده / اهلوا ماتوا
نجاه/ و احنا !!
عباده يبص لنجاه
نجاه / ما تبقاش ايد للشيطان عليه يابا ... يمكن يتوب بجد
عباده / و يمكن ينهينا كلنا ما اقدرش اجازف
نجاه/ اديله فرصه و خد حذرك ... دا رجعنى ليك ... لو ما كانش يونس لو ما كانش شبه عم رشيد الخالق الناطق كان زمانى فين دلوقت كان ايه ممكن يكون مصيرى ... ما اساويش عندك الفرصه دى
عباده / تساوى الدنيا باللى فيها بس ... نجاه انتى عمرك ما هتفهمى انا ما عدتش زى زمان ... انا كبرت
نجاه تلعب فى شعر عباده
نجاه / و احلويت
عباده يبتسم
عباده / بس يا بكاشه
نجاه / طب و الله بحبك
عباده / و انا كمان بحبك بس ما تغيريش الموضوع ... نجاه انتى ما تعرفيش اللى عشناه مات مننا كتير و وقع مننا اكتر دا حتى بدر لجل قدره جه لحد هنا مخصوص عشان يموت يا كبدى
نجاه / يا حبيبتي يا احلام ... هى فين دلوقت
عباده / و الله يا بنتى ما اعرف
نجاه / طب هستاذنك اروح اطمن عليها و اعزيها و ارجعلك
عباده / ما اعتقدش هتقدرى ترجعى دا انتى لو اخدتى دقيقه بتسلمي على كل واحد و واحده من العيله فيها و لا يجي اسبوع
نجاه / ربنا يطرح فينا البركه و نزيد ما ننقصش
عباده / فوتى على ستك كانت هتموت عليكي
نجاه / حاضر
نجاه تفتح الباب تلاقى بطه رحمه مسنداها جايه تطلع و تقفل الباب وراها قبل ما فاطمه تشوف عباده راقد و تحضن بطه اوى
نجاه / وحشتيني وحشتيني اوى يا ستي ربنا ما يحرمنى منك و لا من دعاكى كنت جايالك و الله
رحمه / الف حمد الله على سلامتك يا نوجه و الله كنا هنموت من القلق عليكي
نجاه / حقكوا عليا حقكوا عليا كلكوا
فاطمه / و انتى ذنبك ايه بس يا ضنايا الحمد لله انك بخير
نجاه / بركه دعاكوا ما اتحرمش منكوا ... تعالى ارتاحى تعبتى نفسك ليه الله يعينك ارتاحى
فاطمه / هدخل اطمن على عباده
نجاه / نايم ... ابويا نايم و ما هانش عليا اصحيه
رحمه / يعني ما يعرفش انك جيتي
نجاه / الله يعينه بقاله قد ايه سهران بسببى سيبوه يرتاح ربنا يعينه و يقويه
فاطمه / خلوه يرتاح هم و انزاح الحمد لله هم و انزاح
نجاه / الحمد لله ... هروح اطمن على احلام
فاطمه / تمام يا بنتى ... رجعيني الاوضه تانى يا رحمه
نجاه / لا بقولك ايه اجمدى شغل العيانين و العواجيز ده مش معايا امال مين اللى هيعلم عليا فى تمرينه النشان الجايه لو هتتحججى من دلوقت بقولك اهو مفيش اعزار
فاطمه / يلا يا بت من هنا احنا قادرينلك
نجاه / ربنا يديكى الصحه و طوله العمر يا احلى بطه فى الدنيا
فاطمه / شوفوا روقان البت دا و لا كانها كانت مخطوفه فى العالمين
نجاه / ابوس رجلك ما تفكريني بصي هبقي احكي لكم كل حاجه بس مش دلوقت لما نتجمع كلنا مره واحده اقسم بالله ما هتصدقوا اللى حصلى تعرفى كان ربنا كان باعتلى الملايكه تحرسني يمين بالله ما هتصدقى
فاطمه / الف حمد و شكر ليك يا رب
نجاه / روحى ارتاحى و انا هروح لاحلام و ارجعلك
فاطمه / تمام يا قلب ستك
فاطمه تتسند على رحمه و ترجع اوضتها و نجاه تطلع السلم
...........................
فى الشركه
جابر يدخل
جابر / دياب او منصور هنا
مهندس / بشمهندس دياب فى المكتب جوه
جابر / تشكر … عن اذنك
جابر يخبط و يدخل يلاقي دياب شغال على اللاب بتاعه يدخل و يقفل الباب دياب يقوم ياخده بالحضن
دياب / حمد الله على السلامه الف مليون حمد الله على السلامه و الله لولا الضغطه كنت جيت ليكم المطار
جابر / سيبك منى و طمنى الواد ده هيعرف يدخل البلد زى ما قال
دياب / انتوا قولتوا انه شبه عم رشيد
جابر / بالملى استنساخ ما خدش من امه حاجه
دياب / تمام و انا دخلت على السيستم صوره عم رشيد اى حد فى البلد شبهه او حتى قريب منه فى الملامح على اساس انه اتنكر هيجيبه على طول و يحدد مكانه و يبعتلنا كلنا رسايل باللوكايشن بتاعه و هيتتبع خط سيره كمان و يبعتلنا ابديت اول باول
جابر / الواد ده مش سابقنا بخطوه دا حافظنا و دارسنا صم يعني ما تستهونش بيه
دياب / يا عم دا انا مستنيه بقالى سنين طويله اوى هو بس يشرف
جابر / مش مطمن لنجاه
دياب يبصله باستغراب
جابر / طول الطريق بتتكلم عن عم رشيد و حكايات خالى مختار عنه ... نجاه مش فى وعيها اللى حصل ماثر عليها جامد
دياب / اعتقد ممكن اكون فاهم قصدك  خصوصا انى عارف نجاه كويس بس هى عمرها ما هتبقي حد على مصلحه البلد
جابر / يا ابنى دى مقتنعه انه لمجرد انه عرف انه ابن رشيد هيتحول لملاك خلاص و ينسي كل اللى فات و كل ما تقولها كلمه تقولك الاسلام يمحو ما قبله هو اسلم امتى
دياب / يا سلام ما هو اتشاهد لها فى التليفون فعلا لما قالتله جوازى منك ما يجوزش ... هو فى حاجه احنا مش عارفينها
جابر / حاجه ايه ؟!
دياب / انا و الله ما اقصد حاجه بس ... انت شوفت الصور
جابر / انا كنت مع نجاه فى الكشف الطبى نجاه زى الفل
دياب / يا عم على راسي ما اقدرش افتح بقي ... دا لو فيها البدع لحمنا انا اقصد ... بص ... انسي انسي
جابر / لا مش فاهم معلش فى ايه
دياب / يكون ماسك عليها حاجه يعني
جابر / مش نجاه لا
دياب / متاكد
جابر / يا عم ما تطلعش جنونتى بقي ... كانت قالتلى او على الاقل تجرى تقول لابوها ... نجاه حلفتنى لو طلعت مش بنت اقتلها تموت و لا تطاطيش راسنا يعني مش دى اللى يتلوى دراعها و بعدين دا لو ماسك عليها ايه هتخاف منه و احنا حواليها دا احنا نهد الدنيا يا جدع ... اعقل الكلام مش كدا
دياب/ طب اهدى بس ... على العموم كل حاجه هتبان مع الوقت
جابر / انا مش فارق معايا دلوقت غير ان الحيوان ده ما يدخلش البلد كدا ... لازم يكلمنا الاول و احنا اللى ندخله فاهمنى ... كفايانا كسره عين قصاده بقي ... الجدع مستهيفنا على الاخر ... و بصراحه مش قادر ارد دا علم علينا فى مقتل
دياب يهز راسه و هو باصص فى الارض
جابر / انا هروح الف على الرجاله ... و اتاكد انهم شافوا صوره رشيد انا بعتهالهم كلهم
دياب / عارف .. تمام ربنا معاك
جابر / مش هوصيك
دياب يبتسم بحرج جابر يمشي و يقفل الباب وراه
دياب / هو مرار طافح باين عليه
………………..
فى اوضه احلام
احلام حاضنه نجاه و مش بتسيبها
نجاه / حقك عليا حقك عليا سامحيني
احلام / سلامتك بالدنيا و ما فيها الف مليون حمد الله على سلامتك
نجاه/ انتى مش متخيله انتى مرزقه قد ايه انتى مش متخيله مين اللى كان خاطفنى انتى مش هتصدقى الحقيقه
احلام / قالولى ان بلال طلع واحد من ولاد الكلب
نجاه / دا مش اى واحد ... اه لو شوفته اه لو ليمونى عليه يمين بالله لقطع من لحمه نساير ابن الحرام ده ... دا شيطان دا واحد تانى غير اللى كان راسمه هنا فاكره كان بيتمسكن ازاى فاكره الواطى ابن الواطى كان بيتعامل معانا ازاى طلع ابن كلب جزمه ما يتقلعش من رجلك
احلام / طب اهدى الحمد لله قدر و لطف
نجاه / كلمتى اهل بدر
احلام / ما حدش فيهم عاوز يرد عليا و امين كلمهم ابوه رد عليه و فى وسط الكلام سمع مراته نازله عليا دعا و حسبنه و كانى انا اللى قتلته
احلام تعيط نجاه تحضنها
نجاه / و انتى ذنبك ايه بس
احلام/ اول ما عرف انك اتخطفتى جالى طيران ساب اللى فى ايده و اللى وراه و اللى قدامه و جرى علينا اتاريه بيجرى على قضاه قتلوه على اول البلد
............................