الكبيره ٢ بقلم / لولو_محمد

الحلقه ١٠٢

((((((( الكبيره ٢)))))))
#لولو_محمد
الحلقه ١٠٢
خديجه / انا فهماك و حاسه بيك بس هى مش فاهمه اللى جواك و انت حاطتها تحت عينك و بتعرف كل صغيره و كبيره و نجاه مهما كان فيها عبر مش هتعمل فيك كدا صدقنى

عباده يهز راسه

خديجه / بص هى نجاه كدا كدا عمرها ما هتزعل منك بس الكلام اللى قالته لمختار يزعل .. يعنى ايه تايهه فى بيتها امال ترتاح فين و تطمن فين و المشكله انها فعلا المرادى ما عملتش حاجه

عباده / طول ما هو قدامى عمرى ما هطمن و لا هرتاح

خديجه / لو مش هو هيبقي غيره يا عباده

عباده / اى حد الا هو

خديجه/ و اش عرفك مش يمكن هو يكون احسن من الكل

عباده يبص لها

خديجه/ الله اعلم هو احنا عرفنا الغيب و لا حتى دخلنا فى النفوس و بعدين الجدع ما اتكلمش فى اى حاجه و كل اللى فى دماغك تلميحات او احساس ممكن جدا يكون غلط...وارد على فكره

عباده / مش قادر يا خديجه

خديجه / حقك و فهماك و الله بس انت طول عمرك راسي و عاقل و بتوزنها بميزان الدهب ... انا عارفه ان الضغط عليك شديد بس ... انت قدها يا عباده سنين و انت شايلها على كتافك و ياما دقت على الراس طبول

عباده / هو عيب انى اقول تعبت يعني

خديجه / لا مش عيب يا سيد الناس و حقك اطخن منك و بينخوا من اول قلم بس انت مش لوحدك كلنا جنبك و حواليك

باب الاوضه يخبط

.............................

خديجه/ دا اكيد فارس قولتله يجيب لى شويه حاجات و هو راجع من بره

خديجه تقوم تفتح تلاقى فارس شايل كيس حلويات كبير

فارس / كل اللى طلبتيه يا ست الكل

خديجه / تسلم

فارس / هو ابويا صاحى

خديجه / ايوه ادخل له لو عاوز

فارس يدخل و هو بيحمحم

فارس / السلام عليكم

عباده / و عليكم السلام تعال اقعد ... خير يا عمهم تعال

فارس يقعد و خديجه تحط الكيس و تقعد و فارس عمال يبص لهم و باين عليه الاحراج

عباده / ايه هنلعب عروستى و لا ايه شكلك عاوز تقول حاجه و مش عارف تفتحها ازاى

فارس يبتسم

خديجه / قول يا قلبي ما تخافش

فارس / هو مش خوف ... هو يعنى انا ... بصراحه كدا كنت بفكر اتجوز

عباده / و ماله حد يكره ... مين بقي زينه الصبايا اللى غيرت حالك كدا

فارس / مفيش واحده محدده يعني هو انا بتكلم فى المبدا