الكبيره ٢ بقلم / لولو_محمد

الحلقه ١٦

((((((( الكبيره ٢)))))))
#لولو_محمد
الحلقه ١٦
فى شقه همام
جوزيف يطلع من اوضه و يقفل الباب يلاقي همام و اتنين رجاله بيتفرجوا على التليفزيون
جوزيف / حد هيحتاج الحمام ... هاخد شاور سريع قبل ما انزل
همام من غير ما يبصله
همام / خد راحتك
جوزيف يبتسم و يدخل الحمام راجل يغمز همام على اوضه جوزيف
راجل ٢ / اديله دقيقتين لما يقلع
همام / اتلموا
راجل ١ / هو احنا هندخل عليه الحمام احنا هندخل نفتش فى حاجته يمكن نلاقى حاجه
همام /  و هو عيل اهبل مش مركب كاميره يلقط وش اللى يدخل
راجل ٢ / اللى فى ايده يعمله انا قايم ابص
همام / ممدوح  ... ممدوح اقعد
ممدوح يروح ناحيه الباب اول ما يمسك الاوكره يتكهرب يصرخ يسحب ايده و هو بينطرها
...............................
ممدوح / دا مكهرب الباب
همام يضحك و يكمل فرجه
ممدوح / طب و الله ما هعديها
همام يطفى التليفزيون
همام / هتعمل ايه هتتخانق معاه عشان ما سمحلكش تدخل تفتش فى حاجته اهدى يا ممدوح و اعقل
ممدوح يبص لهمام و يروح يقعد همام يدخل اوضه تانيه و يقفل الباب
الراجل / هو همام ماله ... دا انا قولت ما هيشوف الخواجه هيطلع تلاته عين اهله
ممدوح / قعد يتكلم كتير مع اللى اسمه مختار الزيني كل ودنه و شكله كل عقله كمان
الراجل / لااااا همام مش هيمشي تحت طوع قبلى فى حكايه فى الموضوع ده
ممدوح/ يا خبر بفلوس بكره يبقي ببلاش
الراجل / دا احنا اللى هنبقي ببلاش لما الخواجه يتمريس علينا
ممدوح / يتمريس على مين انت هتهب منك و لا ايه
همام يطلع من الاوضه لابس ترنج ملتون
همام / هو انتوا مش جايين و لا ايه
ممدوح / انا لابس
الراجل / لا خليني انا هنا و توكلوا انتوا مع الله
همام / كلم باقي الرجاله خليهم يجهزوا
جوزيف يطلع من الحمام بينشف شعره
همام/ احنا جاهزين نستناك تجهز و لا نسبقك
جوزيف / انا جاهز ثوانى بس هجيب حاجتى من اوضتى
جوزيف يروح يفتح الباب و عينهم عليه ما يتكهربش و الباب يتفتح
جوزيف / بقولكوا ايه صحيح و انا فى الحمام سمعت صرخه بت كدا ما عجبتنيش
التلاته يبصوا لبعض و ممدوح بيفرك فى ايديه و جوزيف متابعهم يبتسم 
جوزيف / ماشي اشبعوا بيها لوحدكوا بس لما اجيب انا ما حدش يقولى هات حته ثوانى اجيب شنطتى و جاى
جوزيف يدخل و يقفل الباب
همام / عاجبك الكلام ده
ممدوح / يمين بالله لاكون مندمه و مخليه يقول انا مره الليله
همام يتنهد
همام / اسبقنى على العربيه اسبقنى
ممدوح يمشي و هو بينفخ همام يبص للراجل
همام / اتمنى ارجع ما لاقيكش انت راخر عامل مصيبه ما انا جايب ولاد اختى افسحهم
جوزيف يطلع شايل شنطه على ضهره
جوزيف / انا جاهز
همام / اتفضل
جوزيف يسبق همام همام يبص للراجل و يمشي ورا جوزيف
.........................
فى جنينه الزنايته
الشباب بيركبوا عربيات نجاه طالعه بتجرى مختار يوقفها
مختار / خير خير على فين كدا
نجاه / الرجاله رايحين الملعب هروح معاهم
مختار / الرجاله رايحين الملعب انتى بقي هتروحى معاهم ليه
نجاه / جرا ايه يا عمى من امتى فى بينا الكلام ده
مختار/ روحى ارتاحى يا نجاه انتى بتتمرنى الفجر بدرى
نجاه تبص لمختار و تتنهد العربيات تمشي و هى متابعاهم نجاه تيجي تدخل تغير رايها و تبصله
نجاه / هو فى حاجه هتحصل يا عمى ... لعلمك لو فاكر انهم ممكن يتكاتلوا عليه فدى فكره وحشه اوى
مختار / معانا و لا معاه
نجاه / معاكوا و عشان كدا بقولكوا انه غبى و انه مش هيلاعبهم بقانونا يعنى تبدا لعبه تنتهى جنازه و احنا مش ناقصين
مختار / و ان قدروا عليه و كسروا عينه
نجاه / لا الاولى يقطموا رقبته عشان حضرتك عارف اكتر منى انه غلاوى و هينتقم
مختار يبتسم
مختار/ ما تقلقيش هم مش ناويين يعملوا حاجه
نجاه / طب مين معاهم من الكبار
مختار / معاهم ربنا
نجاه / و نعم بالله انا رايحه
مختار / ايه يا بت مالك مفيش كبير واقف قصادك
نجاه تتنهد و تبصله
مختار / كل شئ فى الدنيا دى بيحصل لحكمه و النظره دى بتقولى انا ليه ما خلفتش بنات ... روحى و ما تعمليش مشاكل
نجاه تضحك
نجاه / اللهى ربنا يباركلى فيك و يسعدك يا احلى عم فى الدنيا
مختار يضحك و نجاه تجرى على البوابه العربيات بعدت نجاه تنفخ و تبص على اى عربيه معديه مختار يكلكس نجاه تبصله و تنط من الفرحه تجرى تركب جنبه
مختار / قالوهالنا زمان ما تمشوش ورا الحريم
نجاه / دا انت حبيبي يا عمى اطلع اسبقهم اطلع
مختار / امال مش حبيبك هطلع يا اخره صبرى
مختار يسوق و نجاه تربط الحزام
.......................
على المحطه
قطر يوصل و ناس كتير تخرج و ناس تانيه تركب و ناس بتسلم على ناس من اللى واصلين و ناس غيرهم تطلع بره المحطه كل واحد فى حاله اللى يركب تاكس و اللى بيمشي على رجله و كل واحد ماشي فى سكه
........................
على الطريق
كونتاينر ماشي بسرعه ثابته على الطريق و حواليه عربيات نقل و عربيات دفع رباعى ماشين بسرعه ثابته بترتيب ثابت سواق الكونتايتر يجيله تليفون
السواق / الو ... ايوه يا رياسه قربنا من البلد ... عشر دقايق بالكتير و نوصل باذن الله ... معانا صوره البت يا رياسه ... تمام يا رياسه ... خالصه سلام
السواق يقفل و يكلم التباع
السواق / الجماعه سبقونا و وصلوا البلد و كل واحد اخد مكانه كلم باقي العربيات و بلغهم و خلي الرجاله تستعد
التباع / اعتبره حصل
........................
فى الملعب
الرجاله متجمعين و صوت تشجيع عالى و حماسي نجاه تدخل هى و مختار
نجاه / عاجبك سواقتك دى يا عمى ادينا اتاخرنا اهو 
مختار / شجعى و اعملى حسابك مش هتدخلى تلعبى
نجاه / ليه لاعبت همام قبل كدا
مختار / و النتيجه كانت ايه ؟!
نجاه تتنهد و تجرى تحاول تعدى بين الرجاله يوسعولها تروح تقف جنب جابر الرجاله توسع من حواليها تشوف جوزيف بيلاعب ممدوح يثبته فى الارض و يلوى دراعه و ممدوح بيتالم مختار يدخل يقف جنب نجاه
جوزيف / ها ... مين المره دلوقت ... اكسرهولك و لا تقول انك مره
ممدوح / اكسره يا دكر
همام يدخل و يفك جوزيف من فوق ممدوح
همام/ كفايا يا وحش خسر ماتضيعش وقتك عليه ادي فرصه لغيره يلاعبك ... قوم روح ارتاح هناك شويه
ممدوح واقف مصدر وشه دياب يروح يشده يقعده فى جنب جوزيف يشاور باى لنجاه و هو مبتسم همام يخبطه بضهر ايده على صدره جوزيف يبصله
همام / لو تعبت ريح عشان انا ليا كيف الاعبك
جوزيف / طب ما تيلا و انا سخن كدا قبل ما ابرد
همام / عيني ... احنا نكست يا رجاله انا و الوحش
جوزيف يبتسم و فى اقل من لحظه يبداو و مفيش فرصه لاى حد يتنفس جوزيف ينطر همام بعيد الرجاله تسنده يدخل يجرى يكمل مع جوزيف بعنف اكتر و الرجاله حماسها يزيد و تشجيعها كله مع همام بصوت عالى و نجاه واقفه تتابع فى صمت همام يضرب جوزيف ضربه جامده توقعه فى الارض يلف و ينط همام يهجم عليه
جابر / حلوه يا همام حلوه كمل
نجاه / هو يونس لاعب حد قبل اللى كان هنا ... جابر جابر
جابر يبصلها
نجاه / هو ده الماطش الكام ليونس
جابر / التانى ممدوح اللى فات و دلوقت همام ليه
نجاه / تفتكر تعب ؟
جابر / ما يولع ... اجمد يا همام عندك احسن
نجاه تبص همام مسيطر و جوزيف بيدافع بس رتم اللعب يبدا يهدا و همام بدا يتعب جوزيف يحول مجرى اللعب من دفاع لهجوم و همام مش ملاحق الكل ينتبه مختار يبتسم و يوطى على نجاه
مختار / دا لو ربايه ابوه مش هيعملها بالحرفنه دى 
نجاه تبصله
مختار / ابوه كان بيعمل كدا لما يلاقى اللى قدامه لعيب كان يفرهده و بعدين يلبه و همام وقع فيها
نجاه / بس دى مجازفه ممكن يخسر جامد
مختار / ياما فى الجراب يا حاوى حد عارف مبلبع ايه
نجاه تبص تلاقى جوزيف مسيطر و همام ما بيستسلمش لحد ما رجله تخونه و يقع جوزيف يوقف و يبعد نجاه تستغرب همام يقف الاتنين يبصوا لبعض و يروحوا يسلموا على بعض
جوزيف / عجبتنى عاوزين نبقي نكررها
همام / اكيد بس مش كل مره هتيجي معاك
جوزيف / ماشي يا وحش
الاتنين يضحكوا و يروحوا ناحيه مختار مبتسم
مختار / اللى بعدهم ينزلوا
جابر يبص الناحيه التانيه و هو مضايق دياب يروح ناحيه جوزيف
دياب / انا كنت جاى اللاعبك
جوزيف / لا تحجزوا ادوار بقي و بعربون انا الطلب عليا عالى اوى هنا
همام / كل دول جايين عشانك اساسا يا نجم حتى تلاقيهم هيلعبوا دلوقت تحصيل حاصل ... ازيك يا نجاه ما كنتش اعرف انك جايه
نجاه / ازيك يا همام البقاء لله
همام / و نعم بالله 
مختار / تعال يا يونس عاوزك
جوزيف / اتفضل
جوزيف و مختار يروحوا يقعدوا فى جنب
مختار / كنت فاكر ان سياستك اللى تكسب بيه تلعب بيه
جوزيف / حصل
مختار / امال لما همام وقع ما كملتش عليه ليه
جوزيف / كنت فاكركوا ما بتضربوش اللى واقعين
مختار / احنا كدا فعلا بس انت مش كدا
جوزيف يضحك و يبص الناحيه التانيه مختار يبتسم جوزيف يبصله
مختار / قولى بجد انت مبلبع حاجه
جوزيف / واحد رايح مكان عارف انه هيقف فيه بطوله قدام جيش كلهم جايين بس يكسروه تفتكر هيجي بايده فاضيه
مختار / ليه ما تقولش يتعلموا منك
جوزيف / يعلموا عليا
مختار يضحك و يبصله
جوزيف/ مش هنكدب على بعض احنا مش تلامذه
مختار / تلامذه ايه دا انت استاذ
الاتنين يضحكوا جابر يبصلهم بغضب نجاه تروحلهم
نجاه / عاوزه اللعب
مختار / احنا اتفقنا
جوزيف / سيبها ... بس لو خسرتى هزعلك 
مختار / و احنا ما يخلصناش زعلك اقعدى يا نجاه
نجاه تتنهد و تروح تقعد فى جنب مضايقه جوزيف يتابعها يقوم و يروح ناحيه همام
جوزيف / انت مش ناوى تلاعب نجاه
همام يستغرب السؤال
جوزيف / انا عارف انك اخر مره لاعبتها كسرت رجلها بس انا اتحداك انك لو لاعبتها تانى هتكسر هى رجلك
همام / حقيقي ... لانى مش هعرف اللعب قصادها ... انا غلطتها مره مش هقدر اكررها
جوزيف / خلاص هلاعبها انا و هسكر انا رجلها
همام / ربنا يعينك
همام يسيبه و يمشي جوزيف يضحك و يروح يقعد جنب نجاه
جوزيف / همام بيفاجئنى كل يوم عن اللى قبله
نجاه / بس انا فخوره بيك
جوزيف / بيا انا !!!
نجاه تهز راسها
نجاه / لما وقع ما ضربتوش و نهيتوها باخلاق
جوزيف يضحك بصوت نجاه تستغرب و الرجاله تاخد بالها دياب و جابر يروحوا ناحيتهم و مختار متابع
جابر / قومى تعالى
دياب / ايه يا بطل مش ارتحت شويه ننزل نيكست
جوزيف / ننزل
مختار/ دياب ... تعال عاوزك
دياب يهز راسه و يروح لمختار يوشوشه جوزيف يبص لنجاه و يضحك
جوزيف / بيتامروا عليا
نجاه تبتسم
جوزيف يقلع التيشيرت نجاه ما تبصش و جوزيف لسه بيكلمها
جوزيف / هتشجعى مين ؟ هو طبعا مش كدا
جابر يشد جوزيف و يضربه و هو بيزعق الكل يحوش بينهم
جابر / انت مفيش احترام لاى حد خالص كدا
جوزيف / انت مجنون !! لتكون فاكر ان سكوتى ليك ضعف انا اقدر انسف البلد دى باللى فيها انت فاهم انسفكوا كلكوا
صوت انفجار شديد يهز الارض تحتهم و صوت تبادل نار الرجاله كلها تجرى على الباب الا جوزيف يجرى على شنطته و يطلع منها مسدسين يتاكد ان الخزن مليانه فى نفس الوقت مختار يجرى يفتح باب تحت الارض و ينزل و نجاه تجرى وراه تلاقى مخزن سلاح كبير مختار يشد السلاح و نجاه تاخد منه
مختار/ خليكي هنا
نجاه / اقدر اساعد
مختار/ اسمعى الكلام مره فى حياتك خليكي هنا
مختار يطلع شايل كذا سلاح يحدفهم للرجاله
مختار / المخزن تحت مليان
الرجاله تجرى تاخد سلاح و تطلع تشتبك مع الرجاله بره و الدرونز باعداد مهوله دياب يحط اير بودز فى ودانه و يتكلم و هو بيضرب نار
دياب / وفاء
وفاء / سمعاك احنا خرجنا كل الدرونز اللى عندنا ما تقلقش دقايق و نسيطر على الموقف
دياب / مين عندك يقدر يشغل المولد المغناطيسي
وفاء / انا اقدر
دياب / اوعى ... وفاء اوعى حاولى توصلى لاقرب حد من الرجاله للمحول انتى لا
وفاء / كل ده هياخد وقت انا هعمله اسرع
دياب / اسمعى الكلام
دياب يبص يلاقي جوزيف بيصطاد الدرونز بصدر مفتوح و مش واخد باله من راجل بيحاول يصطاده يجرى ينط يزق جوزيف و يضرب الراجل يقتله
جوزيف / ما تقولش
دياب / وفاء ..  وفاء ردى وفاء
دياب يشد الايربودز و يرميها على اخر دراعه بعصبيه و يجرى يركب عربيته جوزيف ينط من فوق العربيه و يركب الناحيه التانيه  دياب يبصله باستغراب
جوزيف / انت هتصورنى ما تجرى تلحق مراتك
دياب يسوق و يشوف راجل ماسك رشاش و فاتح النار يروح يطيره
.........................
فى اوضه ياسمينا
ياسمينا بتمكيج وفاء الصغيره و ترسم عنيها
ياسمينا / طب و الله ما محتاجه ذره مكياج بس اما نشوف اخرتها
وفاء / طب و الله ما هى اول مره و برده ما هينوبنى غير قفلته ليا  و سده نفسي
ياسمينا تضايق و تحاول تداريها و تقوم تلم حاجتها 
ياسمينا/ نبقي عملنا اللى علينا ... احنا خلصنا
فجاه حاجه جامده تخبط فى الشباك ياسمينا و وفاء يتخضوا ياسمينا تجرى تفتح الستاره تشوف درونز طايره فى الجنينه و الغفر فاتحين عليها النار و العيال بتجرى تحاول تدارى منهم ابنها تصرخ و تنزل تجرى
ياسمينا/ عبد الرحمن!!!
ياسمينا تجرى و وفاء تطلع تجرى وراها
.........................
فى عربيه دياب
دياب سايق بسرعه جنونيه و فى اشتباكات كثيفه حواليه
جوزيف / اللحقها بسرعه قبل ما تتجنن و تودينا كلنا فى داهيه
دياب / دا اسرع حل عشان نخلص من كل الدرونز دى
جوزيف / ما عشان غبى و ما بتطورش من نفسك فى عربيتين درونز واحده منها معزوله و التانيه فضت دروناتها بمجرد ما هتشغل المولد كل الدرونز بتاعتك هتموت العربيه التانيه هتتفتح و هتنسفنا كلنا
دياب يبصله
جوزيف / لما المحول بوظ خطتى المره اللى فاتت عملت الخطه دى بس ما نفذتهاش
دياب/ و الحل احنا مش هنقدر على كل دول الناس بتموت
جوزيف / انا اللى مبرمجهم كل اللى محتاجه اوصل لاى جهاز كومبيوتر و اعمل لوج ان للسيستم بتاعهم و هعملهم سيلف ديستركت و افجرهم فى مكانهم
دياب / و الدرونز اللى فى العربيه التانيه
جوزيف / يا هياخدوهم و يرجعوا ياما باعتين عيال هبله هتنفذ و تفتح العربيه التانيه و ساعتها السيجنال هتوصل و هينفجروا كلهم
دياب / انا مش المفروض اثق فيك ... بس هديك الفرصه دى
جوزيف / من هنا الشركه من هنا
دياب يحود / انا عارف طريقي كويس كتر خيرك
دياب يشوف وفاء بتحاول توصل للمولد و ضرب النار شديد حواليها
جوزيف / هو الحريم عندكوا كلهم كدا
جوزيف يفتح باب العربيه و ينط منها و هى ماشيه يدحرج فى الارض و يصطاد الدرونز اللى فى الجو دياب يلف العربيه و يركنها قدام الشركه و ينزل يضرب نار مع باقى الرجاله و يروح لوفاء
وفاء / ما عرفتش اوصل كنت ركنت هناك
جوزيف يدخل بيجرى
دياب / خديه على اقرب جهاز و انا هساعد الرجاله
وفاء / ادخله السيستم
دياب / ايوه ... بسرعه اتحركى
وفاء تبص لجوزيف من فوق لتحت لابس بنطلونه بس و تجرى على جوه و هو وراها
دياب / يا رب ما اندمش على الهبل اللى بعمله ده
دياب يطلع يفتح النار لحد ما سلاحه يفضى يتشقلب فى الارض لحد ما يوصل لواحد ميت و يخطف سلاحه و يقوم تانى يكمل ضرب فى باقي الرجاله و الدرونز
.........................
فى جنينه الجوارحه
ماجده تطلع تجرى من السرايا تساعد العيال و تشيل عيل صغير و تجرى بيه على جوه تاخد طلقه فى ضهرها تقع على وشها بتصرخ ياسمينا تجرى تسندها و تسحبها لجوه
ماجده / دخلى العيال دخلى العيال
ياسمينا/ دخلوا .. ساعدونى حد يساعدنى ساعدونى !!!
وفاء تشد ماجده مع ياسمينا تدخلها جوه و يقفلوا الباب سماح تنزل من فوق جرى شايله رشاش و الدرونز تدخل من الشبابيك و تدخل سماح تفتح فيهم النار سماح تصرخ فيهم
سماح / اقفلوا الشبابيك اقفلوا الابواب كلها
الستات تجرى تقفل و ياسمينا قاعده على الارض حاضنه ماجده بتنزف و العيال حواليها بيعيطوا و الكل خايف  و فى صوت انفجارات
.......................
فى الشركه
جوزيف شغال و وفاء واقفه وراه و المهندسين متابعينه وفاء تشخط فيهم
وفاء / انتوا بتتفرجوا على ايه الدنيا والعه بره و انتوا بتتفرجوا علينا كل واحد عينه فى جهازه يلا
جوزيف يبرطم
جوزيف / شخصيه
وفاء / بتقول حاجه
جوزيف / ثرى تو ون خلصت
وفاء تجرى ناحيه الشباك تلاقى كل الدرونز بتنفجر واحد ورا التانى و بيقعوا فى الارض و مش فاضل غير الدرونز بتاعتهم تساعد الرجاله ثوانى و انفجار كبير يحصل بعيد تبص لجوزيف
جوزيف / الواحد لازم يعمل كل حاجه بنفسه ... البهايم باعتين هواه حافظين مش فاهمين ... انا خلصت هنا هنزل اساعد الرجاله تحت
جوزيف يشد مسدساته من على المكتب و ينزل يجرى
مهندس ١ / هو ده بقي الجينيص
وفاء / الرجاله تحت بتحارب لوحدها كفايانا خساير
مهندس ٢ / كنت فاكرك نازله تشغلى المولد طلعتيلنا بسي عضلات ده
وفاء / كلمنى عدل
مهندس ٢ / حقك علينا معالى حرم المدير بس مش عارف و الله باشمهندس دياب هيبقي رايه ايه فى دخول واحد زى ده الشركه و السيستم كمان
وفاء تكتم جواها و تدخل المكتب
مهندس ١ / كل واحد يبص فى جهازه حسستنى بابله الناظره فى الامتحان ... كل واحد يبص فى ورقته
الكل يضحك ويكملوا شغل
......................
فى المستشفي
دياب يضرب جوزيف و الكل يحاول يحوش
دياب / انا وثقت فيك وثقت فيك
جوزيف / و انا ما ليش اى دخل باللى حصل لامك
دياب / انت قولتلى ان دى خطتك كل ده كان خطتك انى ما اشغلش المولد عشان تكمل خطتك للاخر يا حيوان يا خسيس
جوزيف / انت مجنون و انا هستفيد ايه لما اقتل امك و لا ائذيها حتى فكر لو عندك مخ فكر انا امتى اذيت حريمكوا
جابر / ليه نسيت اللى عملته فى نجاه
جوزيف / نجاه مش حريم نجاه ارجل منكوا كلكوا على الاقل عندها مخ اوعوا
الرجاله تبعد عن جوزيف يتكلم مع دياب بعصبيه
جوزيف / انا جريت وراك لما سمعتك بتنادى على مراتك جريت اساعدك وقفت وسط الرجاله و الدرونز من غير حتى واقى رصاص عشان اساعدكوا دخلت السيستم من اكونت مخفى عشان ما حدش يقدر يتتبعه و يخترق السيستم بتاعكوا انا عملت كل ده و فى الاخر ده اللى باخده منكم ... انا انقذت حياتك النهرده ... و حياتكوا كلكوا ... بس انتوا اغبيه
جوزيف يسيب المكان و يمشي نجاه تجرى وراه
نجاه / يونس استنى يونس
جابر / نجاه نجاه تعالى هنا نجاه
نجاه تحصل جوزيف و تناوله تيشيرت يلبسه وهم بيمشوا و متجاهلين ندا جابر ليهم يجى يجرى وراهم منصور يمنعه
منصور / سيبها يمكن تقدر تهديه
جابر / اقسم بالله لولا حاله امك كان هيبقالى معاك كلام تانى
جابر يجرى وراهم ما يلاقيهمش يقعد يبص فى كل حته ما لهمش اثر يزعق
جابر / ايه الارض اتشقت و بلعتهم يعنى و لا ايه
ممرضه / جرا ايه يا سي جابر دى مستشفي
جابر / لا مؤاخذه
جابر يروح ينادى الاسانسير و يركب
............................
فى مخزن فاضي
دكتور شغال بيعالج واحد عباده يدخل
عباده / ايه الاخبار يا دكتور ... انا عاوزه حى
الدكتور / حالته مش مستقره كان المفروض يروح المستشفي
عباده / لو عتبها مش هيطلع منها و انت عارف ... خليه هنا لحد ما يخف و كل طلباتك اوامر  .... المهم ما حدش يعرف ان فى حد منهم لسه عايش غيرى انا و انت يا دكتور ... عيالى نفسهم ما يعرفوش
الدكتور / تمام يا كبير امرك
عباده / الامر لله يا ابنى شوف شغلك
........................
على سلم الطوارئ
نجاه و جوزيف واقفين كل واحد فى جنب
نجاه / انت اللى خطت لكل ده انت قولتله كدا
جوزيف / ايوه خطت لما كنت خاطفك هناك لما اكتشفت ان عندكوا مولد بوظ خطه الهجوم القديمه عملت بلان بى و اكبر دليل انى ما استخدمتهاش انى منعته يشغل المولد و بنفسي فجرت كل الدرونز كنت اقدر اعمل ايه اكتر من كدا قوليلى
نجاه / و لا اى حاجه بس دى امه
جوزيف / و عشان كدا ما قتلتوش
نجاه / شكرا على فكره
جوزيف / انتى كمان بقي ...
نجاه/ انا بشكرك على كل اللى عملته النهرده
جوزيف / ما عملتوش عشانكوا عملته عشانى لو وقعتوا هموت
نجاه / كنت فاكره ان الموت مش فارق معاك
جوزيف / ما خلصتش اللى المفروض اعمله
نجاه / و هو
جوزيف / مش عارف و مش فايقلك دلوقت
نجاه تبتسم
جوزيف/ انا بكره البلد دى ... مش عاوز اقعد هنا و مش قادر امشي
نجاه / البلد دى ما عملتش فيك اى حاجه وحشه بالعكس بالرغم من كل اللى عملته فيها لما جيتها فتحتلك احضانها زيك زى ولادها
جوزيف / مش حقيقي يا نجاه مهما حصل انا هفضل جوزيف
نجاه / يونس ... ولو كنا بنشوفك جوزيف ما كانوش سمحولك تدخل الشركه ما كنتش جريت وراك اراضيك ... مع العلم انى اكيد هاخدلى كلمتين جامدين بسبب وقفتى دى
جوزيف / طب و وقفاها ليه
نجاه / مش عارفه الصح و الغلط نسبي بس الحلال و الحرام .... ثابت
جوزيف / طب و وقفتنا دى حلال و لا حرام
نجاه / حرام
جوزيف يروح يفتح لها الباب تبتسم
جوزيف / يبقي ما تعمليهاش
نجاه / عمرى ما فهمتك حريص انى اصلى و انى ما اعملش الحرام و كل ده و انت مش مؤمن بربى و لا بديني ... ليه و ازاى انا مش قادره افهمك
جوزيف يقفل الباب و يتنهد
جوزيف / فى حرب شديده بتحصل من سنين طويله اوى ... الحرب دى قايمه على العقل الباطن كل الناس عايشه حياه فاكرينها طبيعيه فى نفس الوقت بيتم غسيل مخهم و برمجه عقلهم الباطن بشكل ممنهج و مبرمج عن طريق رسايل خفيه ... العلماء اكتشفوا ان البشر نوعين نوع مؤمن و دا مش بيستقبل الرسايل دى و نوع مش مؤمن و خصوصا لو بيسكر و دا بيستقبل كل الرسايل اللى بتوصله و بيتبرمج عليها و دا سبب كبير ليه الغرب مختلفين و ليه حتى الناس فى مصر مختلفين عن بلدكوا لانكوا لسه مؤمنين
نجاه / نظريه المؤامره دى قديمه اوى
جوزيف / ما فكرتيش عمرك ليه الناس بقت عنيفه اوى كدا و خلقها ضيق ليه الاباحيه بقت اسلوب حياه
نجاه / التلوث و الاكل المهرمن
جوزيف / فى دراسه اتعملت فى سنه من السنين فى فيلم سينما عن طريق انهم عرضوا فى الفيلم جمل متكرره و بسرعه عينك ما تشوفهاش بس عقلك الباطن مدرك لكل حاجه الجمل دى اشترى كولا و فشار و لاحظوا ان بعد الفيلم مبيعات الكولا و الفشار زادت بمعدل ملحوظ جدا دى كانت تجربه علميه مثبته بس الحقيقه ان التجربه دى اطبقت على كل الناس بشكل يومي انا نفسي طبقتها على اهلك كلهم لما فضلت اعرض اعلانات مركز هيلجا طول الوقت لحد ما جريتوا انتوا وراها و جبتوها تعالجك و الاكتر من كدا انى سحبت كل الضحايا اللى فتحوا لينك تسريبات ياسمينا عشان نخلص منهم انا طبقت النظريه دى كتير جدا
نجاه / بس انا اهلى كلهم بيصلوا و مع كدا على كلامك قدرت تاثر عليهم
جوزيف / مش كلهم ... مش كلهم بيصلوا فعلا و مش كلهم قدرت اسيطر عليهم ... بالاضافه الى الزن على الودان امر من السحر
نجاه تبصله باستغراب 
جوزيف  / و انتى فى الاوضه عندى فى تركيا كان فى صوت زنه بسيطه جدا الودن الطبيعيه ما تاخدش بالها منه غالبا فكرتيه بسبب الفراغ او اللمبه اخدتى بالك من حاجه زى دى
نجاه تهز راسها لا
جوزيف / الزنه دى كانت رسائل صوتيه خفيه زى وسوسه الشيطان فى دينكوا كدا
نجاه / و كان بيوسوسلى بايه
..............................