((((((( الكبيره ٢)))))))
#لولو_محمد
الحلقه ١٣٧
نجاه / فخوره بيك جدا
جوزيف / و لسه دا انا أعجبك أوى
نجاه / عاجبنى... قصدى عاجبنى التغير و المجهود اللى بتبذله يعني ... انا اصلا طول عمرى مؤمنه ان اللى بيدخل الاسلام جديد بيكون ايمانه احسن و اقوى و أصح من ناس كتير اوى خدت الاسلام بالوراثه و ما تعرفش عنه ربع المعلومات اللى بيعرفها اللى زيك
نجاه تطلع خصله من شعرها و تلعب بيها على صابعها
جوزيف / انا شايفك
نجاه تعدل شعرها بسرعه و تبص حواليها يمين و شمال تشوف ميكرو روبوت تجز على سنانه الروبوت يطير
نجاه / انت مش هتتهد الا اما اجيبك تحت رجلى صح ما تبطل حركاتك القرعه دى
جوزيف / كنت محتاج اطمن ان الموبايل وصلك انتى و ما حدش خد باله و الله و بعدين انا مؤدب انا كان ممكن اقعد اتفرج و ما اقولش بس انا مؤدب
نجاه / ما تعملش الحركات دى تانى انت بتحطنى تحت ضغط انا بحس بتأنيب الضمير انى مخبيه على ابويا حاجه ... ابويا هو اغلى حد عندى فى الدنيا و ما اقدرش اعمل اى حاجه من وراه ... ما اقدرش خصوصا لو الحاجه دى ممكن تضايقه و هو ما شاء الله يطيق العما و لا يطيقكش
جوزيف / شعور متبادل اقسم بالله و يمين بالله لولاكي لكنت
نجاه / دا ابويا يا يونس اتلم
جوزيف / ما تيجي نغير الموضوع احسن ... تعالى نتكلم فى اى حاجه تانيه ... اى حاجه زى ... زى مثلا ... زى .. زى مثلا انتى ليه بعد ما كنتى زعلانه و عاوزه تفردى شعرك رجعتى تانى لاستايل موج البحر
.........................
نجاه / تانى موج البحر !! و بعدين مين قالك انى عاوزه افرد شعرى و زعلانه و لا انت مالك اصلا بشعرى أنت بقيت
جوزيف / انتى قولتيلى قولتى ان اكتر حاجه مضيقاكى ان الراجل اللى ضربك شعره أجمل من حياتك
نجاه / فقولت لى ان شعرى حلو شبه موج البحر
جوزيف / بيغرقك ما بتقدريش تقاومى
صمت ثوانى
نجاه / يعني دا ما كانش حلم ؟!
جوزيف / حاجه زى كدا
نجاه تتعصب / يعني ايه حاجه زى كدا انت عاوز تجنني ما هو يا حلم يا حقيقه هيكون ايه يعني توارد خواطر مثلا
جوزيف / صوتك صوتك هتصحى مهره
نجاه توطى صوتها / ما انت اللى مستفز ... انت اصلا ازاى تعمل حاجه زى دى ازاى تستغل انى نايمه و تقعد جنبى فى السرير دا انا لما اشوفك
جوزيف / انا ما قعدتش جنبك اصلا انا قعدت تحت رجليكى و تقريبا ما لمستكيش انتى اللى مسكتى ايدى
نجاه / انت كداب
جوزيف / اقسم بالله ده اللى حصل انتى ملخبطه بين الحلم و الحقيقه
نجاه / انت اللى بتستغل انى قولتلك انى كنت فكراه حلم عشان تهرب من المسؤليه
جوزيف / بصي هو اقسم بالله ما لمستك بس عموما انا شايف انى ازورك فى الحلم دى جريمه كبيره و لازم فعلا اتحمل مسؤوليتها و اصلح غلطتى احلام بنات الناس مش لعبه
نجاه / انت بتستظرف صح
جوزيف / انا عندى فضول قاتل اعرف انا عملت ايه لما قعدت جنبك فى السرير
نجاه / تعرف انا لو منك لازم اعمل ايه
جوزيف / ايه ؟
نجاه / اختفى عشان لو شوفتك هنفخك ... انت عارف ... انت عارف ... انا اللى استاهل انا ما كنتش هضايق كدا لو ما كنتش رديت عليك اصلا .. تعرف ادى اخره اللى يعمل حاجه غلط ... انا كلامى معاك غلط اهو ... خلاك تتطاول عليا
جوزيف / انا !!
نجاه / انا عمرى عمرى ما هكلمك تانى
جوزيف / طب ممكن تهدى بس
نجاه / لا انا بجد مخنوقه منك و من نفسي اوى
جوزيف / طب انا اسف حقك عليا بس ممكن على الاقل افهم انتى ايه اللى مضايقك منى بالظبط
نجاه / كل حاجه ... اصلا المكالمه كلها غلط انا ما بحبش أعمل حاجه من ورا بابا و بابا هيزعل منى جدا لما يعرف
جوزيف / تمام اوعدك انى مش هكررها تانى و انا فعلا غلطان و مستعد اتحمل اى مسؤليه عن الغلطه دى
نجاه / تتحمل ايه انت فاكرها سهله انت عارف رد فعل ابويا ممكن يكون ازاى
جوزيف / انا ما بخافش من ابوكى اقصي حاجه هيعملها ايه
نجاه/ يقتلك مثلا
جوزيف / ما هو قاتلني فعلا انتى فاكره اللى انا فيه ده اسمه عيشه انا عمرى ما كنت محبوس زى دلوقت محبوس فى سجن انا اقدر اخرج منه و مش قادر ... يعني بمزاجى محبوس عشان انا ... بصي انا ... انا مش بخاف انى اموت بالعكس ... انا عايش عشان حاجه واحده ... بس ساعات بحس ان عمرى ما هوصل ... هيفضل واقف فى طريقي و مش هيسمح لى اوصل ... النهايه واحده يا اقتله يا يقتلنى مسأله وقت مش اكتر
نجاه / دا ابويا ؟!
جوزيف / عمره ما هيقبلنى يا نجاه عمره ما هيشوفنى غير جوزيف عمره ما هيصدق قد ايه انا اتغيرت عشانك او انا مستعد اعمل ايه برده عشانك عمره ما هيقدر انا اتخليت عن ايه او متحمل ايه برده عشانك
صمت
جوزيف / دا فاكر انه بيمن عليا و ان هو الضحيه فى القصه
نجاه / ما هو اتوجع منك جامد اوى برده يا يونس ابويا مش شرير و لا ظالم ابويا بشر اه ممكن يغلط بس بيخاف ربنا و اداك فرصه و هو كمان بيعانى هو خايف منك و له حق يخاف
جوزيف / ليه ... طب اعمل ايه عشان تصدقوا انى فعلا اتغيرت
نجاه / انا مصدقاك بس
جوزيف / بس المشكله فيه هو ... عمره ما هيصدق يعني لازم اموت قصاد عينه و انا بحميكي عشان يتأكد انى عمرى ما هاذيكي طب يا ستى انا موافق اموت عادى ما انا كدا مش عايش اصلا
نجاه / و ليه التشاؤم ده انت ليه مش قادر تصبر
جوزيف / لحد امتى
نجاه / لحد ما توصل ... انت اكتر انسان صبور شوفته فى حياتى انت لما بتحط حاجه فى دماغك بتوصل لها و انا متاكده انك لو حطيت الموضوع فى دماغك هتقدر تكسب ابويا و تثبت له انك انسان كويس بجد
جوزيف / و ان ما حصلش
نجاه / هيحصل لو صبرنا هيحصل ... لا تدرى لعل الله يحدث بعد ذلك أمرا
جوزيف / انا عندى استعداد اتكلم معاكى للصبح ... للعمر كله ... بس انتى معاكى حق احنا اللى بنعمله ده غلط .. انا اللى غلطت و غلطتى دى هتسبب لك انتى مشاكل ... سيبي الموبايل فى البلكونه و انا زى ما حطيته هاخده و اوعدك انى مش هكررها تانى
نجاه / انا عوزاك توعدني بحاجه تانيه اهم مليون مره
جوزيف / سامعك
نجاه / اوعدني انك تتغير عشانك مش عشانى تبقي كويس عشانك مش عشانى
جوزيف / و ان كنت مش فارق معايا
نجاه / ما ينفعش تبقي مش فارق معاك ما ينفعش امال بتهتم بصحتك ليه و بتعبد ربنا ليه عشان تعيش كويس و تروح الجنه لما تموت انت مهم جدا بالنسبه لنفسك انت اهم واحد لازم تبقي فارق مع نفسك لو مش عشان نفسك عشان الناس اللى بيحبوك هيزعلوا عليك
جوزيف / طب هو انا عندى ناس بيحبونى
نجاه / اكيد طبعا ... انا هقفل فكر فى كلامى ... هسيب الموبايل فى البلكونه و مش هقول لحد و انت مش هتكررها تانى
جوزيف / بس انا كنت عاوز اعرف انا عملت ايه فى الحلم
نجاه تقفل السكه فى وشه
نجاه / دا انت مستفز
نجاه تسيب الموبايل فى البلكونه و تدخل تقفل الباب و تشد الستاره و تروح الحمام تبص على نفسها فى المرايه
نجاه / ايه اللى جرالك يا نجاه انتى هتخيبى و لا ايه
نجاه تشمر كمها و تتوضى
.........................
فى محطه القطر
عويس / مش عاوزك تقلقي على العيال انا هحطهم فى عنيا و هخليكي تكلميهم فيديو كول كل يوم
نسمه / تسلم يابا
عويس / خدى بالك من امك و ما تفرقيهاش انتى مسافره مع امك مش رايحه تتفسحى
نسمه / تمام حاضر
عويس / اول ما توصلوا كلمونى
نسمه / حاضر
القطر يوصل عويس يشيل الشنطه و يدخل القطر و نسمه تمسك ايد امها و تركب و يقعدهم و يحط الشنطه
عويس / اول ما توصلوا كلمونى
ام نسمه / حاضر يا خويا ما تقلقش روحك انت
عويس / تمام هسيبكوا انا بقي
ام نسمه / فى حفظ الله
عويس ينزل من القطر و نسمه باين عليها الزعل و القلق
ام نسمه/ مالك
نسمه / اول مره ابعد عن العيال قلبي واكلنى
ام نسمه / القطر لسه ما اتحركش لو عاوزه انزلى لهم
نسمه / ازاى بس يا اما اسيبك لوحدك يعني ... استودعتهم الله الذى لا تضيع ودائعه
ام نسمه / امين
....................
فى الجبل
صابر بيتكلم فى التليفون
صابر / عينك ما تتشالش من عليها لو الدنيا اتشالت و اتهبدت ما لكش عندى عزر ... و انا كدا كدا جايلك فى الطريق
شاكر / خير
صابر / نسمه سافرت مع امها ركبت قطر مصر
شاكر / خير فى حاجه و لا ايه
صابر / ما اعرفش ... بص يا شاكر انا مش هستحمل كل يوم حد منهم يضيع هامنك على العيال و انا هروح وراها مش هقدر ارتاح و لا اطمن عليها غير و هى قصاد عيني
شاكر / كان نفسي اقولك روح بس صدقنى مرواحك وراها هيعمل لها مشاكل اكتر من اى حد ... تثق فيا ؟
صابر يبص له و يهز راسه اه
شاكر / انا اللى هروح وراها بنفسي خليك انت هنا النهرده لو فى اى حاجه هقول لك
صابر / تمام ... طمنى
شاكر / تمام
شاكر يمشي صابر يطلع الموبايل و يتصل بحد
...................
فى اوضه نجاه
الباب يخبط و نجاه بتصلي
نجاه / الله اكبر
نجاه تركع عباده يفتح الباب و يدخل يقعد على السرير لحد ما تخلص صلاه تبص له بتوتر عباده يبتسم
عباده / ما كبرتيش ... لسه زى ما انتى... و دى احلى حاجه فيكي اوعى تغيريها اول ما تعملى حاجه غلط او تبقي خايفه من حاجه تفرشي السجاده و تفضلى تصلى تصلى لحد ما ربنا يفرجها ... يا ترى المرادى عملتى حاجه غلط و لا فى حاجه مخوفاكى
نجاه تقوم و تكمل صلاه
نجاه / الله اكبر
عباده يضحك و يقوم يقف
عباده / تمام نتكلم بعدين لما تبقي جاهزه بس انا دايما موجود عشانك برده اه مش زى ربنا بس على قدى
عباده يسيب الاوضه و يمشي و نجاه بتعيط و هى بتصلي
..................
فى شقه جوزيف
مختار / احنا و لا كأننا بنتكلم اصلا
جوزيف / انت غلطت الغلطه دى مع ابنك زمان و اتسببت فى انه غلط و فى الاخر عملت نفسك بريئ و جلدته و شيلته العقوبه لوحده
مختار / انت تقصد ايه بالكلام ده
جوزيف/ اه نجاه مش امايا و انا مش ناصر بس المشكله واحده انتوا واقفين فى طريقنا مهما حطينا حدود انتوا سايبين للشيطان سكه ... انا واقف قدامك راجل لراجل بقولك عاوز اتجوزها فى الحلال انت ليه مكتفنى لشيطانى كدا
مختار / انا !!
جوزيف / بحبها و بتحبنى... اديني مانع واحد ... هشتغل و اصرف عليها ... هشتغل اى حاجه حتى لو عند دياب فى الشركه حتى لو هدرب فى الملعب او المران عندى مهارات كتير بعرف لغات كتير هشتغل مدرس اى لغه هشتغل ميكانيكي هشتغل اى حاجه انا راضي يا سيدي و هكفيها من الحلال حتى لو هشتغل عشرين ساعه فى اليوم و اروح اقعد معاها ساعه و انام تلاته انا راضي ... انا اكتر واحد ممكن يحميها مفيش اى حاجه ممكن تاذيها و هى جنبى عاوزين ايه اكتر من كدا قولى
مختار / انا شخصيا مش عاوز انا لو بنتى ما كنتش هعزها عليك بس
جوزيف / يبقي مش انت الشخص اللى المفروض اتكلم معاه
مختار / مش هيوافق يا يونس مش هيوافق
جوزيف/ يسالها من حقها يخيرها لو وافقت يبقي مش من حقه يرفض القرار قرارها هى مش قراره هو ربنا يحاسبه
مختار / ممكن تهدى
جوزيف / مش عارف اهدى مش قادر ... انا مش عاوز اغلط مش عاوز اعمل لها مشاكل مش عاوز اضعف
مختار / انت فى حاجه عاوز تقولها لى
جوزيف / قولت لك كل حاجه انت اللى رافض تفهم
مختار / انت اللى مش مستوعب انت مين و عملت ايه انت مش قادر تفهم انك قعدت سنين تقول انك
جوزيف / انتوا اللى قولتوا ان الاسلام يجب ما قبله انتوا اللى اديتونى امل انتوا ... ما ينفعش تيجوا دلوقت تقولوا اصلك كنت زمان مفيش زمان ... عشان انا لو بصيت انا كنت ايه زمان و ازاى و بقيت ايه دلوقت ... هتزعلوا اوى منى
مختار / انت اللى هتزعل مش احنا ... احنا أخرنا نوجهك و نساعدك لكن قرارك انت اللى بتاخده عشان انت اللى هتتحمل نتيجته ... فكر فى نفسك انت عاوز من نفسك ايه مقتنع بايه مؤمن بايه عاوز نهايتك تكون ازاى و على الأساس ده قرر
جوزيف/ عاوز ابقي معاها
مختار / انا ما بتكلمش فى كدا ... ابعد من كدا ... لو نجاه اختفت مش موجوده انت ناوى على ايه
جوزيف / مش عاوز تعرف
مختار / راجع نفسك عشان ربنا يكرمك راجع نفسك و حدد أولوياتك و لو عندك ذره شك واحده انى عاوز مصلحتك و واقف فى صفك اعمل اللى انت شايفه من غير ما ترجع لى
جوزيف / ما علينا ... كنت جاى ليه ؟
مختار / مش فاكر ... اه ... كنت بفكر زى ما دخلت السيستم و عملت قسيمه بين عمران و مهره تمسحها و تصفر البيانات
جوزيف / سهله بس اى حد عنده نسخه من الورق ممكن تعمل مشاكل فلو عاوز رايي انك تكبر مخك و خلاص و تتعامل على انهم مطلقين و جوزهم من اول و جديد ... بس براحتك شوف عاوز ايه و انا اعمله
مختار / مش عارف عاوز اجوزها و اخلص
جوزيف / اعمل كدا ... الجواز ستره ... الجواز ايه ... ستره
مختار يضحك و يمشي
جوزيف / ستره سامعني ستره
..............................
فى اسكندريه
ام قاسم / يعني شهر العسل بتاعكوا ده مش ناوى يخلص
قاسم / هو فى ايه ياما من الاخر يعني عشان انا مش لاقط
ام قاسم / يعني اصلى شايفه المحروسه خارجه داخله معاك بتروحوا على النوم لا بتقعد معانا و لا بتساعد فى البيت فى حاجه
قاسم/ انا مش شايفها مقصره لا فى اوضتى و لا فى اوضه مازن و بالعكس الواد فله و بطل يعمل على روحه و فرشتنا بتتغير كل يوم و الاوضه بتتهوى و لبسي مغسول و مكوى و مش ناقصني اى حاجه
ام قاسم/ بس كدا ؟!
قاسم/ ايوه و اللى بيعمل ليا او ليها حاجه او حتى لمازن من فضلكوا يبطلها عشان اقدر اشوف تقصيرها و ابوس ايدك اديها فرصه عشان خاطرى البنت كويسه جدا معايا و مع مازن و الواد روحه فيها و بيحبها عشان خاطرى بطلى تحطيها فى دماغك و اديها فرصه
ام قاسم / و انا اكره لك الخير يعني يا ابنى دا انا مش عاوزه حاجه من الدنيا غير انك تبقي بخير و مبسوط انت و ابنك
قاسم / طب احلف لك بايه انها مش مخليه فى جهدها جهد انها تسعدنا
ام قاسم / يا حبيبي دى حلاوه البدايات
قاسم / خليني انبسط بيها بقي حلاوه ام البدايات دى
ام قاسم / يعني هتروحوا المطعم و تقضوا اليوم هناك برده و ترجعوا على النوم برده انتوا التلاته
قاسم / لا هنيجي بدرى النهرده باذن الله نسهر معاكوا
ام قاسم/ افلح ان صدق
قاسم / عن اذنك بقي سايبهم فى العربيه بره لما خللوا
ام قاسم / روح ربنا معاك
قاسم يبوس ايد امه و يمشي
........................
فى مصر
نسمه تنزل من القطر و هى شايله الشنطه بأيد و مسنده امها بأيد تلاقي فيراس جاى يجرى عليها يشيل منها الشنطه
نسمه / فيراس !!
فيراس / سلامتك يا عمتى اول ما عمى قالى سبت اللى فى ايدي و جيت جرى ايه اللى حصل
نسمه/ جيت منين ؟ و امتى ؟
فيراس / من شغلى الجديد انتى ما تعرفيش و لا ايه
نسمه / لا ما اعرفش
فيراس / طب نروح البيت نرتاح و ناكل لقمه و انا هحكيلك كل حاجه
نسمه / بيت ايه ... هو احنا
ام نسمه / انا تعبت من الوقفه يا نسمه خلينا نروح و نتكلم فى البيت
نسمه/ اما احنا هنا ليه ؟
ام نسمه / عشان العمليه يا نسمه و لو مش مصدقانى ادينا رايحين للدكتور بالليل هتشوفى بنفسك كل حاجه
نسمه / و هنقعد فين ياما فى دار الاستضافه زى ما قولتى و لا فى بيت فيراس
فيراس / وهو يصح برده انكوا تقعدوا فى بيت ضيافه و بيتي موجود
نسمه/ هو اللى ما يصحش بجد انكوا تحطونى قدام امر واقع بالشكل ده ... أما أنا خلقي بيضيق قوليلى الحقيقه احنا هنا ليه
فيراس / ممكن تهدى الناس بتتفرج علينا
نسمه / انتى ما بترديش ليه ياما انا مش فاهمه حاجه
فيراس / على فكره انا ابن عمك مش حد غريب فلو سمحتى ما تكبريش المواضيع اوى كدا و تفرجى علينا الناس
نسمه / انا مش هاجى معاك البيت
ام نسمه / انا جايه معاك يا فيراس ... اقطعى اول تذكره و ارجعى و ما توجعيش دماغى انا مش مستنيه منك حاجه و لا واقفه عليكي يلا يا فيراس
نسمه / ياما ارحميني ما تقوميش الدنيا نار ما نعرفش نطفيها ابوس رجلك خلينا نروح دار الضيافه اللى قولتى عليها
ام نسمه / انا عندى دكتور بالليل و يا دوب ارتاح و اكل لقمه و بعدين انا ركبتى وجعانى من قاعده القطر طول الوقت ده فأكيد يعني مش قادره اقف احكى و اتخانق دلوقت لما نروح نشوف اللى انتى عوزاه مش عاوزه تيجي روحى
نسمه / انتى بتهزرى صح ؟
ام نسمه تمشي مع فيراس و فيراس يبص وراه على نسمه واقفه مش عارفه تعمل ايه موبايلها يرن فى ايدها ابوها
نسمه / السلام عليكم
عويس / يمين بالله ان ما عقلتى لاجي لك احطك تحت رجلى انتى فاهمه و لا لا
نسمه / انا هحجز تذكره و ارجع
عويس / حلو تعالى يا نسمه و انا مستنيكي تبقي وفرتى عليا الطريق مستنيكي يا بنت الكلب
عويس يقفل الموبايل نسمه تروح ناحيه شباك التذاكر و تقف فى الطابور تليفونها يرن فيراس ترد
نسمه / افندم
فيراس / امك داخت و طالع بيها على المستشفي بعت لك اسم المستشفي لو تحب تيجي
نسمه / ما تهرجش يا فيراس
فيراس/ بكيفك بقي دا انتى جاحده
فيراس يقفل السكه نسمه تنفخ و تخرج من الطابور و تطلع بره المحطه بتجرى توقف تاكس و تركب
...........................
فى اوضه عباده
نجاه واقفه على الباب بتخبط بالراحه خالص خديجه تفتح نجاه واقفه بعيد
خديجه / اهلا اهلا
نجاه / بابا صاحى
خديجه/ نايم بس قالى لو جيتي اصحيه
نجاه / لا خلاص اجي له الصبح بقي خليه يرتاح
خديجه / هو انا ما انفعش خالص يعني
نجاه/ لا طبعا تنفعى هو ما فيش حاجه اصلا بس هو كان جالى الصبح بس
خديجه / ايوه عارفه... على العموم منابك تحت فى التلاجه سخنى و كلى لو جعانه
نجاه/ لا مش جعانه
خديجه / عندى فضول أعرف ايه اللى حصل لكل ده بس عارفه انك مش هتقوليلى حاجه
نجاه / مفيش حاجه حصلت انا بس كنت مخنوقه شويه
خديجه / بيحصل ربنا يقوى إيمانك يا ستى
عباده يصحى
عباده / دى نجاه يا خوخه ؟!
خديجه / الله !! اهو صحى اهو ... خشي بقي اتكلمى مع ابوكى حبيبك فى اللى كان خانقك على ما مرات ابوكى تنزل تحط الهدوم دى فى الغساله و تشغلها
خديجه تاخد كيس محطوط جنب الباب
نجاه / ايه الكلام ده سبيهم انا هنزلهم دلوقت
عباده يروح يفتح الباب
عباده/ اديهم لها يا خوخه انا نازل الجنينه اصلا تعالى يا نجاه
نجاه / ملوش لازمه تتعب نفسك كمل نوم احسن
عباده / صحيت صحيت تعالى
عباده ياخد الكيس و ينزل مع نجاه
عباده / خلصتي صلاه ؟
نجاه / اه الحمد لله
عباده / دعيتيلى بقي و لا ما جيتش على بالك ؟!
نجاه/ لا طبعا دعيت لحضرتك
عباده/ عمرى ما هنسي اول مره عملتى فيها الحركه دى مت من الضحك فاكره ؟
نجاه / لما لبست عبايتك البيضه لعبت بيها فى الجنينه و وسختها و كان فى فرح يوميها باين و كنت ناوى تلبسها و ماما شافتني و جريت ورايا
عباده / قلعتيها و رميتيها على السلم عشان تعرفى تجرى على اوضتك و فردتى السجاده و وقفتى و اول ما امك دخلت الاوضه رفعتى ايدك بصوت عالى ... االله اكبر
نجاه / قالتلى بتصلي؟! و ماله يا اختى صلى اديني قاعده لحد ما تخلصى صلاه وريني هتخلصى امتى
عباده / فضلتى تصلى لحد ما اتصلوا بيا فى الشغل و حكوا لى اللى حصل و روحت اشتريت عبايه جديده و روحت لك
نجاه / انا بس كنت عاوزه ابقي زيك ... بس ما اخدتش بالى قد ايه عبايتك كانت واسعه اوى عليا ... فبهدلتها و انا مش قصدى
عباده / فداكى الف عبايه المهم انك بخير ... كان ممكن تتكعبلى فيها و تتكفى على وشك من على السلم و لا فى الجنينه كان ممكن تتعورى او يحصل لك حاجه كفاكى الله الشر ... اكيد يعني الموضوع ما كانش عشان وسختى و لا بهدلتى العبايه فداكي الف عبايه المهم سلامتك انتى
نجاه و عباده يقعدوا على المرجيحه
نجاه / بس يوميها حضرتك شجعتني و قولتلى انى عملت الصح و وقت ما اضايق او اخاف او اغلط اصلى و ابقي فى حمايه ربنا ... فاكره كارم مره جه يقلدني فارس ضربه و هو بيصلى حضرتك عاقبته جامد اوى مع ان كارم كان هو الغلطان اصلا فى الاول
عباده / ما مفيش حاجه اسوء من انك تخرج واحد من صلاته فارس ضيع حقه و لبس نفسه الغلط بس دا مش موضوعنا خلينا فيكي انتى ... انا مش هسالك عن تفاصيل بس انتى كان بقالك فتره طويله اوى ما عملتيش الموضوع ده انا سعيد انك رجعتى تعمليه تانى
نجاه / عملته فى تركيا لما كنت مخطوفه
عباده يبتسم بحزن و يبص فى الارض
نجاه / و عملته النهرده لما حسيت انى بتخطف
عباده يبص لها
نجاه / بتخطف من نفسي بنساها و بتوه عنها ما عدتش عارفه انا عاوزه ايه او ايه اللى يسعدني ما عدتش لاقيه نفسي بتشد لحاجات انا مش قادره اقتنع بيها و بتوه و بغلط و بستمتع بالغلط و بعانى عشان ابطله
عباده / دا اسمه جهاد النفس كلنا بنمر بنفس اللى بتحكيه ده بغض النظر عن التفاصيل كل واحد فينا له مدخل او نقطه ضعف الشيطان بيدخل له منها بس الانسان اللى فطرته سليمه زيك بيوقف نفسه فى الوقت المناسب و بيظبط اعداداته و يفوق
نجاه تهز راسها
عباده / تحبى تتكلمى فى تفاصيل ؟
نجاه / عاوزه بس مش عاوزه
عباده / دى زى انا عايش و مش عايش على ايامى زمان ؟!
نجاه تبتسم و تسكت
عباده / مش فارق معايا اعرف حاجه انا كدا كدا واثق فيكي و كدا كدا موجود وقت ما تحسي انك عاوزانى برنه هتلاقيني جنبك و اى كان ... شوفى اى كان اللى تاعبك ...
نجاه / انا بحب حضرتك اوى
عباده / الله !! و انا كمان يا نجاه بحبك اوى اوى بحبك اكتر من اى حاجه تانيه فى الدنيا دى
نجاه / عارفه
عباده يبوس راسها
عباده / انا هطلع اكمل نوم حطى الهدوم فى الغساله و شغليها و نامى و ما تفكريش فى اى حاجه حصلت و ادى لنفسك بدايه جديده من بكره ... تفائلوا بالخير تجدوه
نجاه تبتسم عباده يقوم تبص للسما و تتنهد
.........................
فى المستشفي
نسمه قاعده مع دكتور
نسمه / بس هى كانت كويسه جدا امتى كل ده حصل
الدكتور / يمكن كانت مخبيه و لما الموضوع زاد ما قدرتش تسكت أمهات كتير اوى للاسف بيلغوا نفسهم و بيفتكروا ده شطاره و تضحيه منهم بس دا فى الحقيقه انتحار
نسمه / طب و العمليه دى ممكن تتعمل امتى
الدكتور / اول ما نلاقى متبرع
نسمه / طب انا اقدر ؟! أنفع يعني؟
الدكتور / طبعا بما انك بنتها فانتى احسن احتمال مطروح بس ما اقدرش اديكي رد نهائى غير بعد الفحوصات النهائيه
نسمه تهز راسها
نسمه / انا جاهزه لاى حاجه
الدكتور / تمام ... على بركه الله
.........................
فى الجبل
صابر بتكلم فى التليفون
صابر / يعني انت لاقطها
دياب / انا بعت اتنين درون استطلاع مش عارف اشمعن المنطقه دى بالذات بس هو شكله سفارى عادى حتى سفارى من بتاع الجماعه بتوع ايجيبت دول لو فاهم قصدى
صابر / تمام فتح عينك برده و انا كدا كدا هبعت رجاله من عندى تشوف الدنيا على أرض الواقع
دياب / تمام
صابر / سلام
صابر يقفل و يتصل بشاكر
صابر / السلام عليكم ايه الاخبار
شاكر / مامتها عندها مشاكل جامده فى الكبد و غالبا هتحتاج زراعه كبد فى اسرع وقت
صابر / دا على اساس ايه يعني
شاكر / اللى عرفته ان نسمه ناويه تتبرع لأمها بفص من عندها و راحت عملت تحاليل عشان تشوف مناسبه و لا لا
صابر / بس امها كويسه يا شاكر مريض الكبد ده ما بيزرعش بين يوم و ليله ما بيكتشفش انه عيان و محتاج زراعه فى ساعه زمن على الاقل بياخد اى نوع علاج و دى برشامه صداع ما بتاخدش
شاكر / اللى قدامى فى المستشفي غير كدا خالص الست محجوزه فى العنايه المركزه و نسمه رايحه جايه على الورق و فيراس بيساعدها
صابر / و جوزها قاعد هنا باشا البشوات و اولادها الدكوره مفيش فيهم شعره اتهزت مش كدا
شاكر / انا ما اعرفش الكلام ده بقي اللى قدامى شوفته
صابر / فى حاجه مش مريحه فى اللى بيحصل ده
شاكر / هم عيله ما يعلم بيها الا ربنا يعني مش ملايكه فعادى
صابر / مش للدرجادى يا شاكر اكيد مش للدرجادى ... تمام يا شاكر تمام كتر خيرك انا هحاول اشوف الدنيا دى و ارجع اكلمك بالله عليك تخليك قريب منها على قد ما تقدر
شاكر / ما تقلقش
صابر / تسلم يا صاحبى ما اتحرمش فى حفظ الله
صابر يقفل و يتصل بحد
صابر / السلام عليكم ازيك يا دكتور عبد الله بعد اذنك كنت محتاج اتكلم معاك فى موضوع ضرورى ... مفيش مشكله ابعتلى العنوان و مسافه السكه اكون عندك ... تمام
........................
فى السيرك
سماح تدخل بتقدم رجل و تأخر رجل الراجل يوقفها
الراجل/ شطبنا يا ست الكل بكره باذن الله
سماح / انا عاوزه اقابل امايا
الراجل / امايا !! نقول لها مين و لا مؤاخذه
امايا تطلع
امايا / قولها الكبيره مرات الكبير
الراجل / لا مؤاخذه
امايا / عصير فريش ساقع من بتوعى حالا
سماح / انا مش جايه اضايف
امايا / ازاى بس دى اول مره تنوريني فى بيتي
سماح / و اللى اقدر اهده فوق دماغك لو مريحتنيش
امايا / و انتى فاكره انك لما تهديه انا اللى هتاذى ... انتى اذكى من كدا
سماح / عاوزه اشوف شاهين
امايا / و انا كمان ... بس نعمل ايه منهم لله اللى كانوا السبب بقي
سماح / ما تخافيش انا مش هاذيكي انا بس عاوزه اطمن على ابنى
امايا / انا مقدره اللى انتى فيه بس ابنك مش هنا و لو مش مصدقانى انا ممكن افرجك المكان كله اصلا ابنك ما ينفعش يكون هنا هنا اول مكان دوروا فيه ابنك لو كان هنا كانوا لقوه و قتلوه
سماح / طب وديني ليه
امايا / لوحدك ؟! و لا تحبى ناخد معانا سلسلتك و خاتمك و حلقك و موبايلك و الشركه كلها بدرونها برجالتها و على رأسهم دياب و منصور ... دا الكاميرات البسيطه اللى فى الشوارع كلها لقطاكى من البيت عندك لحد هنا
سماح / لو عاوزه مش هتغلبى و اللى هتطلبيه هعمله
امايا / انا مش عاوزه حاجه انا عندى هنا كل حاجه ... انتى اللى عاوزه
سماح / عاوزه ابنى
امايا / و ابنك عمره ما هيرجع الا لو اتأكد انه هيقدر يعيش فى امان و ده مستحيل يحصل و انتى عارفه ليه كويس
سماح / طب ابنى بريئ صح ابنى ما اتهجمش على السلعوه دى صح ؟
امايا / انا ما كنتش معاهم ... لما يرجع ابقي اسأليه ... لما بقي
سماح / طب ساعديني
امايا / ما اقدرش انا وعدت بابا مختار انى هعيش بادبى يعني مستحيل احاول ائذى اى حد من عيله الجوارحه خصوصا اتنين مهمين جدا زى دياب و منصور
سماح / تمام
سماح تيجي تمشي
امايا/ و العصير ؟!
سماح ما تردش و تمشي
امايا / مسكينه حقيقي صعبانه عليا
امايا تدخل تقابل الراجل شايل العصير تاخد الكبايه و تدخل جوه و هى بتشرب فيها
..............................
فى المستشفي
فيراس / انا عديت على الحسابات و دفعت الحساب كله و سبت مبلغ تحت الحساب كمان
نسمه / كتر خيرك اول ما نرجع البلد هرجع لك كل اللى صرفته على داير مليم
فيراس / عيب الكلام ده دى فى مقام امى
نسمه / ربنا يبارك لك
فيراس / على فكره انا عاوز اتكلم معاكى فى موضوع مهم
نسمه / خير ؟
فيراس / انا خلتهم يعملوا لى نفس التحاليل و الفحوصات و لو طلعت سليم انا اللى هتبرع لها
نسمه / كتر خيرك بس اشمعن يعني ؟
فيراس / عيالك صغيرين يا نسمه و محتاجين لك ... بعد الاب و الام لا خال بينفع و لا عم ... اسأليني انا
نسمه تبص فى الارض
فيراس / ما تفكريش فى حاجه دلوقت و خدى مفتاح البيت و روحى ارتاحى
نسمه / لا انا هخليني هنا
فيراس / هنا فين ؟! احنا فى المستشفي مش فى فندق هتنامى فى الكوريدور يعنى طب انا راجل و ممكن اتصرف انتى بقي هتعملى ايه مش كفايا عليكي تعب الطريق
نسمه / دى امى يا فيراس و مش هقدر اسيبها
فيراس / و انتى يعني قاعده جنبها ما هى جوه فى العنايه و ممنوع عنها الزياره
نسمه / هبقي ادخل المسجد افرد ضهرى شويه
فيراس / بقي ده اسمه كلام برده عيب الكلام ده
نسمه / انا اتلخمت و نسيت اكلم ابويا اطمن على العيال
فيراس/ نايمين لسه قافل معاه و خليته يصورهم لى
فيراس يوريها صوره عيالها نايمين نسمه تتنهد
فيراس/ انا معيش نسخه تانيه من المفتاح و كدا كدا كل الاوض فيها مفتاح من جوه و الشقه فيها ترباس يعنى مستحيل ادخل عليكي الشقه
نسمه / انا مش هسيب امى يا فيراس
فيراس/ ما انتى مش هينفع تباتى هنا يا نسمه
نسمه / هينفع هينفع ما تشغلش انت بالك
شاكر يدخل فيراس عينيه توسع
شاكر / السلام عليكم ... ازيك يا فيراس ازيك يا ام بدر
نسمه / دكتور شاكر !!! خير بتعمل ايه هنا ؟
شاكر / عرفت ان الحجه بعافيه قولت اجى اطمن ... مالك يا فيراس شوفت عفريت و لا ايه
……………………………….
أنت تقرأ
الكبيره ٢ بقلم / لولو_محمد
Humorالحرب لسه مستمره و الحقيقه مسيرها فى يوم تظهر النور و كل واحد لازم يختار طريقه
