(((((((( الكبيره ٢ ))))))))
#لولو_محمد
الحلقه ٦٢
ناصر يضحك و يكتمها و يبص فى الارض
نور / ما تستهبلش انت فاهم كل حاجه ... ايه السخافه دى
ناصر / متبادل على فكره
نور/ كتر خيرك و الله ... انت قصدك ايه بمتبادل اوعى تكون بتتكلم عن السخافه
ناصر يضحك بصوت
ناصر / لا قصدى على التانيه
نور / دا اخرك يعني ؟! التانيه !! بس كدا ؟!
ناصر يتنهد
نور / مش هتقولها لى ؟!!
ناصر / اكيد هقولها و قريب جدا كمان ... لما نكتب الكتاب
نور / اشمعن ؟
ناصر / مش عارف ... بحبك يا نور حلو كدا ؟!
نور تبص له بخيبه امل و تلم نفسها و تبتسم
نور / حلو ... حلو
........................
فى جنينه الزنايته
نجاه خارجه تشوف جابر واقف مع اتنين رجاله
نجاه / جابر بعد اذنك
جابر يروح لها
نجاه / هو كارم فين مش لقياه و مش بيرد على الموبايل
جابر / راح الملعب مع يونس خير كنتى عاوزه حاجه
نجاه / لا تسلم فكست خلاص ... ما تعرفش ابويا فين ؟
جابر / طلع الجبل
نجاه / من غيرى !! دى مؤامره على فكره
نجاه تروح ناحيه البوابه جابر يروح وراها
جابر / على فين
نجاه / طفشانه
جابر/ الله !!! نفسي فيها من زمان يلا
نجاه تقف و تبص لجابر مبتسم
نجاه / انا ما بهزرش انا مخنوقه و طالع عيني
جابر / ياما استحملتك ما جاتش على المرادى يعني
نجاه تبص له مبتسم تديله ضهرها بعدم اهتمام و تروح تشاور لتاكس جابر يمشيه
جابر/ تشكر يا اسطى اتكل على الله
نجاه / انت بتهرج صح
جابر / رايحه فين هوصلك
نجاه / ما ينفعش
جابر / ليه افرق عن سواق التاكسي فى ايه ما انتى مش واخده محرم معاكى فى التاكسي يعني
نجاه تتنهد و تفكر
جابر / و اخرتها
نجاه / مش عاوزه اعمل حاجه حرام… الموضوع صعب اوى و محتاج تركيز فى كل تصرفاتى الطبيعيه اللى بعملها كل يوم و اللى كل الناس بتعملها بشكل تلقائي
جابر / ما لا يدرك كله لا يترك كله
نجاه تبص لجابر يهز راسه ايوه
نجاه / طب ما انا ممكن ابقي بفتح باب للشيطان
جابر / انتى بتحاولى ... و دا فى حد ذاته جهاد للنفس
نجاه / ما تلعبش فى دماغى
جابر / انا !! اقسم بالله ابدا انا معاكى على اى وضع حتى لو مش هتكلميني انا راضي المهم انك تكونى صح و مرتاحه
نجاه / بس انا برده مش مرتاحه
جابر / دا ممكن يكون شيطان ممكن يكون عشان انتى متعوده على حاجه معينه دا ممكن يكون حاجات كتير جدا
نجاه / يعني اعمل ايه
جابر / اعملى اللى يريحك
نجاه تسيبه و تدخل و هى بتفرك و تبرطم
نجاه / يووووه بقي ما حدش بيريحنى فى البيت ده دى بقت عيشه تقصر العمر
جابر يتنهد و يروح ناحيه بيته
…………………….
فى الملعب
يونس بيعلم عيال صغيره حركات و هو مبسوط و بيضحك دياب يدخل كارم يروح يسلم عليه
دياب / هو فى ايه
كارم / شكل الحكايه عجبته استولى على المكان و العيال مستجيبه معاه ما شاء الله
دياب / دا واضح جدا ... امال كابتن عمر فين مش المفروض ان دول تبعه بيمرنهم
كارم / اتقمص و مشي
دياب يستغرب
كارم / ما تبصليش اتقمص فعلا ايه يعني لما يونس كعبله و العيال ضحكوا ما يلم الموقف و يظبط الدنيا ما ياما الكباتن هزروا مع بعض دا انا لسه فاكر الماتش اللى حصل بين ابويا و خالك يوم فته الكوارع فاكره
دياب يضحك
دياب / الكبار صحاب من زمان و الهزار بينهم حاجه واخدين عليها انما يونس غريب و القانون بيقول ايه ؟
كارم / انا و ابن عمى على الغريب
دياب يبتسم
دياب / يونس
يونس / ثوانى و هفضالك … عيدها لحد ما تجيبها هتعرف … و انت تعال وريني
دياب و كارم يروحوا يقعدوا فى جنب يتابعوا
دياب/ مش بطال اللى بيحصل ده على فكره
كارم / دمه خفيف و فى نفس الوقت مسيطر بصراحه تمرينته عجبانى
دياب / انا شايف كدا برده ... هقوم اغير فى الحمام و اسخن
كارم / ما بلاش
دياب / بس ياله
كارم / بشوقك ما تقولش ما قولتش
……………………
فى الجبل
عباده / يا ابنى دا انا جايلك لحد عندك
صابر / على راسي و بعدين جايلى فين بس يا كبير دا جبلك بيتك و مطرحك و دول كلهم رجالتك و انا اولهم
عباده / يا سيدي تشكر كتر الف خيرك و ما دام دول كلهم رجالتى حاطت منهم قدام بيت نسمه ليه من غير اذنى و لما بعتلهم يمشوا هجت عليهم و رجعتهم تانى و كسرت كلامى
صابر ساكت و مش باصص لعباده
عباده / انا مش ساكت يا صابر
صابر يبص لعباده
عباده / البنت سمعه ما تاذيهاش بحسن نيه انت صبرت السنين دى كلها ليه طيب
صابر/ سمعت عن الجايزه اللى محمود الجزار كسبها
عباده / ايوه سمعت ... احنا مالنا
صابر / ايه رايك فيها
عباده / احنا ... مالنا
صابر / مالكوش ... انا بقي حالى و مالى كله فى البيت ده يا كبير ... و بصراحه من اللى شوفته الفتره اللى فاتت انتوا مش قد كلمتكوا معايا ... ما تزعلش منى انا عارف انكوا مش مقصرين ... بس هى الشيله تقلت عليكوا اوى ... قولت اساعد مش اكتر ... و ان كان على سمعتها ... فانا على يدك اهو بعيد
عباده / انا مش هرد على اللى فات احتراما لعضم التربه
صابر / اهو نفس عضم التربه ده اللى سكتنى السنين اللى فاتت دى كلها ... بس
عباده / اى عيل صغير هيعرف يفرق بين رجالتك و رجالتى الناس هتتكلم
صابر / اتكلمت مع يونس يا كبير ؟ رجع البلد
عباده/ ما تغيرش الموضوع
صابر / دا هو ده الموضوع ... يونس ... الموضوع كله فى يونس ده ... يونس قالى نقطه ضعفك اتكشفت مش هسيبها هى و عيالها تقع فى ايديهم و انا واقف اتفرج خايف الناس تعرف انى بحبها ... انا بحبها
عباده يبص حواليه
صابر / الناس كلها عرفت يا كبير ... الخواجات عرفوا انى بحبها ... انا بحبها
عباده / لا حول و لا قوه الا بالله
صابر / عدتها تخلص و هيحاولوا يجوزوها تانى ... لاى حد و باقصي سرعه حتى لو بالغصب ... تانى ... المهم ما تكونش ليا
عباده / هى عاوزه تعيش و تربى عيالها فى هدوء يا صابر
صابر / و انا مش هجبرها على حاجه ... انا بس مش هسمح لمخلوق يجبرها على حاجه
عباده / بيضغطوا عليها بيك
صابر / و انا بعون الله افعصهم كلهم
عباده / و هى وسطهم عادى كدا ؟
صابر يبص بعيد
عباده / تمام يا صابر ... تمام
عباده يمشي صابر يناديله
صابر / انا عمرى ما قليت معاكوا ... حتى بعد اللى عملتوه فيا ... ما تقلوش معايا
عباده يبص لصابر
عباده/ عمرى ما فرقت بينك و بين عيالى حتى
عباده يمشي و صابر متابعه
.......................
فى الملعب
جوزيف / هو احنا مش عدينا مرحله لعب العيال دى من فتره طويله اوى يا دياب
دياب / يا عم ادينا بنلعب ... بنتمرن
جوزيف / مفيش قوانين ؟
دياب / على كيفك
كارم / انا الحكم ؟
جوزيف / بكيفك
دياب و جوزيف ينزلوا يلعبوا قدام بعض جوزيف حافظ اسلوب دياب و بيرد عليه دياب يقف جوزيف يبتسم
دياب / ازاى
جوزيف / تخيل انك تقضي سنين من عمرك بتدرس حاجه مش هتتفوق فيها ... أنا دارسكوا واحد واحد كل واحد فيكوا له حركات معينه بيتقنها ما بيجودش
دياب / تمام نجرب تانى
جوزيف يبتسم و يلعبوا قصاد بعض بعنف
كارم / رجاله احنا بنلعب ... رجاله هتاذوا بعض كدا .. دياب مش حرب هى
دياب يقلب جوزيف فى الارض جوزيف ينطر نفسه ينط يقوم يقف كارم يروح يقف فى النص
كارم / ما احنا بدل ما نفرهد بعض نتعلم من بعض احسن ما حدش هيثبت اى حاجه بأنه يتفوق على التانى انت متميز فى حتتك و انت متميز فى حتتك اهدوا على بعض
دياب / ما احنا هاديين
جوزيف / حلوه منك
دياب/ مش لوحدك اللى بتذاكر اللى قدامك
جوزيف / خت بالى
جوزيف يغمز لدياب دياب يضحك و كارم واقف فى النص مش فاهم حاجه
.............................
فى المخزن عند شاهين
شاهين قاعد و قصاده الكنزايه و سرحان فيها الباب يخبط شاهين يتخض و يعين الكنزايه فى بوكس من الصناديق و يروح يفتح يلاقي مغاورى
مغاورى/ فينك يا شاهين و ما بتردش على موبايلك ليه
شاهين / الموبايل فى العربيه و كنت برتب المخزن زى ما حضرتك شايف ... ايه رايك بقي تعال افرجكك عندى حاجات حلوه اوى
مغاورى / واضح .. فرجنى
شاهين يتحمس و يفتح صناديق و يفرج مغاورى
مغاورى / جبت الحاجات دى منين و امتى
شاهين / بقلب رزقى من السوق و بقالى ياما بجمع بس اول ما استلمت المخزن ده لميت فيه حاجتى كلها
مغاورى / ما تثقش فى اى حد الحاجات دى خطر و لو اتمسكت بيها هتبقي مشكله
شاهين / ما تقلقش واخد بالى
مغاورى / و المكان هنا متامن بقي و لا ايه الدنيا
شاهين / يعني شغال على الموضوع
مغاورى / نقلت كل الحاجات دى فى مكان واحد قبل ما تامنه كويس
شاهين / ما انا لو بالغت فى التأمين هلفت نظر الناس ان فى هنا حاجه تستاهل انما انى اقولهم انه مخزن كراكيب ما حدش هيفكر يسرقه
مغاورى / تفكير جديد ... بس منطقى
شاهين / يابا احنا عارفين لو الجماعه اياهم حبوا يفجروا المكان مش هيغلبوا حتى لو متامن بأحدث الاجهزه و حطين عليه جيش حراسه ما حضرتك قديم و مجرب
مغاورى يهز راسه
شاهين / الفتره اللى فاتت كنت بفكر فى حوار الحشرات اياها دى
مغاورى / الميكرو روبتس
شاهين / عليك نور يابا هى دى
مغاورى/ مالها
شاهين / لازم نتعامل معاها
مغاورى/ يونس نفسه قال ما لهاش حل
شاهين / قال ما لهاش حل عارفه او ما لهاش حل ينفع يقولهولنا دلوقت لكن مفيش داء الا و له دواء يابا
مغاورى / و انت شايف ايه فى الحكايه دى
شاهين / انا ما اعرفش فى التكنولوجيا ما حضرتك عارف دى شغله الباشمهندسين بس كنت بفكر يعني ان الحاجات دى اكيد بتشتغل زى الدرونز كدا وايرليس بس على صغير ... فاحنا لو استخدمنا اجهزه تشويش اشاره مش هتقدر تشتغل
مغاورى / ما احنا كدا برده مش هنعرف نشتغل
شاهين / يبقي من فات قديمه تاه و لا ايه
مغاورى يبتسم
شاهين / احنا مش هنرجع كل حاجه للقديم بس هيبقي عندنا نظام احتياطي كله بالسلك بحيث اللى يقع مننا نكمله من القديم واخد بالك من الفكره
مغاورى/ حلوه هقعد مع الجماعه بعد الفرح و باذن الله نطورها و نطبقها
شاهين / و ليه بعد الفرح يا كبير الجوارحه ما خير البر عاجله نروح دلوقت نتكلم معاهم و نشوف نقدر نعمل ايه
مغاورى / و ماله على البركه
شاهين يبتسم و يمشي مع مغاورى و قبل ما يقفل الباب يبص على الصندوق اللى فيه الكنزايه
شاهين / ثوانى يابا هتمم على الشبابيك اللى هناك و احصلك على العربيه
مغاورى / تمام هسبق انا
شاهين يجرى يجيب الكنزايه من الصندوق يحطها فى جيبه و يجرى يقفل الأبواب
مغاورى / لحقت
شاهين / مقفوله الحمد لله
مغاورى / تمام يا ابنى تعال نروح فى عربيتك و هبقي ابعت اى حد يجيب عربيتي
شاهين / تمام يابا اللى تؤمر بيه
………...................
فى بيت جابر
جرس الباب يضرب يروح يفتح يلاقي نجاه واقفه بعيد و بتفرك
نجاه / ممكن توديني
جابر / بجد !!
نجاه / انا غلطانه انى جيت لك اصلا
نجاه تمشي مقموصه يجرى وراها و هو بيضحك
جابر / طب استنى بس ... يا بت بطلى جنان هتفرجى علينا الغفر قولت حاضر
نجاه تلف و تبص له
نجاه / انا مضايقه جدا بجد
جابر / فاهمك
نجاه / لا مش فاهمنى ما حدش فاهمنى و لا حاسس بالصراع اللى جوايا
جابر/ لا فاهمك و حاسس بيكي ... و معاكى على اى وضع و اى قرار
نجاه تبصله بحزن
جابر / تحبى تروحى فين
نجاه / غيرت رأيي مش عاوزه اروح فى حته
جابر / نجاه !!
نجاه / بجد مضايقه اوى انا ما بحبش اخد قرار و ارجع فيه
جابر يتنهد
نجاه / و مش عاوزه اتفهم غلط كمان
جابر/ اااااه !! لا تمام ما حدش هيفهمك غلط و لا اى حاجه
نجاه / لا خلاص مش رايحه فى حته هطلع اقعد مع احلام و مهره بيتفرجوا على فيلم ... هطلع اتفرج معاهم و خلاص
جابر / اللى يريحك
نجاه / انا بقيت بكره الكلمه دى انا ما فيش حاجه بتريحنى
جابر / مش يمكن انتى اللى تاعبه نفسك
نجاه تبص لجابر بيرد بمنتهى الهدوء تتنهد
جابر / تحبى اوديكي ؟
نجاه تهز راسها لا
جابر / تحبى تخرجى تروحى اى مكان ؟
نجاه / مش عارفه
جابر / تروحى مع ملك الجبل ؟
نجاه / هشوف مهره لو تحب تيجي معايا
جابر / تمام انا هنا اجهزوا و بلغونى
نجاه / اوك
عباده يدخل بعربيته يشوفهم ينزل ينادى على نجاه
عباده / نوجه ... تعالى
نجاه / عن اذنك
نجاه تجرى على ابوها يسند على العربيه
عباده / خير ؟!
نجاه / كنت عاوزه اخرج و ما لقيتش حد فيكوا و بعدين قولت اخد تاكس جابر قالى مش هفرق عن التاكسي و عرض يوصلني
عباده / تمام .. و ناويه تروحى فين
نجاه / كنت هطلع اشوف مهره لو تحب تيجي معايا نركب خيل فى الجبل و كدا
عباده / اركبوا فى الاسطبل بلاش الجبل النهرده
نجاه / خير فى حاجه و لا ايه ؟!
عباده / لا مفيش بس مهره تعبانه ما ترهقيهاش معاكى
نجاه / طب لو مش هتيجي ؟
عباده / هتطلعى الجبل لوحدك ؟
نجاه/ ما جابر
عباده/ جابر !!
نجاه تبص فى الارض
عباده / امك عملت الاكل
نجاه تهز راسها
عباده/ هاكل لقمه و اجى معاكى مكان ما تحبى
نجاه / بجد !!
عباده / بجد
نجاه تبتسم اوى و تحضنه و تجرى على السرايا عباده يروح ناحيه جابر
عباده / خير يعني ؟!! فى ايه ؟ خير ؟!!
جابر / زهقانه و عماله تفرك
عباده/ يونس مع دياب فى سرايا الجوارحه
جابر / مش كانوا فى الملعب
عباده / كانوا
جابر / تمام مفيش مشكله
عباده / اكلت ؟؟ تعال معايا جابر الزاد و افتح نفسي
جابر يهز راسه و يدخل مع عباده السرايا
...........................
فى مضيفه الجوارحه
جوزيف قاعد بياكل مع دياب و مغاورى و شاهين و كارم و منصور كل شويه يبص عليه و جوزيف واخد باله
جوزيف/ ما تقولها بدل ما هى ساده نفسك عن الاكل كدا
الكل ينتبه
جوزيف / ما شوفتوش دياب انتوا النهرده ... كان مقطعنى
دياب و كارم يضحكوا
جوزيف / لا حقيقي دياب دا اصله ما شاء الله عليه عصب ... طالع لخاله
جوزيف يبص لشاهين شاهين يعمل بياكل
مغاورى / يا ريت خاله كان عنده ربع إمكانياته... انما انا زمان كنت خايب ما اعرفش قيمه العلام قولت هتفيدنى بايه الشهاده ما انزل اراعى ارضي و مالى
دياب / ما يعيبكش يا خال ابدعت فيها برده
كارم/ فخر الجوارحه ده يا عم
مغاورى / طب كل يا خوياو بطل نخع كل
جوزيف / دى حقيقه مش نخع ... مغاورى الجارحى اسم بيتعمل له الف حساب
مغاورى / عشت
مختار يدخل الكل يقوم يسلم يقعدهم تانى
مختار / متجمعين عند النبى ... لا سلام على طعام لا سلام على طعام اقعدوا اقعدوا ... انا زعلان منك
جوزيف / ليه يا عم انا قصرت معاك فى حاجه
مختار/ نتكلم بعدين
جوزيف / تحت امرك فى اى وقت
مغاورى / امال عباده فين ما جاش يعني
مختار / اخد نجاه و مهره الاسطبل و بعدين انا مش مالى عينك و لا ايه يا جدع انت
مغاورى / على راسي يا عم ... اخبار العريس ايه
مختار / بيبوس ايدك خلينا فى موضوعنا ... ايه الحوار المهم اللى عاوزين نتكلم فيه
شاهين / بعدين يا عمى احنا بناكل
جوزيف / لما اقوم يقصد
شاهين / انا ما قولتش كدا
جوزيف / انا اللى قولت ... حقيقي يا مغاورى الاكل تحفه تسلم ايديكوا بجد ... ما تمد ايدك يا ميخا
مختار / هقل منك ياض ما بحبش الاسم ده
جوزيف / ما تقدرش ... بس انت حبيبي ... انا خلصت الحمد لله ... اغسل ايدي فين بقي
منصور / انا هاخدك تعال ... انا كمان شبعت كملوا انتوا اكل
جوزيف / انا هطول فى الحمام خدوا راحتكوا
جوزيف و منصور يمشوا
كارم / مش قليل الجدع ده
شاهين / ما تنبهرش اوى كدا فى الاول و الاخر منهم
مختار/ خير يا شاهين كنت عاوزنا فى ايه
شاهين / مش حوار يعني انا بس كنت بفكر مع ابويا بصوت عالى و اننا نحاول على قد ما نقدر نرجع لقديموا و نقلل الاعتماد على التكنولوجيا شويه
دياب / ازاى يعني
شاهين/ يعني نستخدم كاميرات مراقبه من بتاعه زمان بحيث لو حصل و شغلنا المحول مثلا فى اى وقت التكنولوجيا ما تقعش كلها نبقي برده
دياب / ما احنا عاملين كدا فعلا مع كل الكاميرات اللى لسه شغاله ... اكيد انتوا عارفين ان الكاميرات دى ما عادتش بتنزل السوق
شاهين / و اللى بيعطل منها بيترمى فى الزباله يعني
دياب / لا فى مخزن فى بدروم الشركه و فى فنين بيحاولوا يصلحوا على قد ما يقدروا او ياخدوا منها قطع الغيار اللى تقدر تخدم باقي الكاميرات بس كلنا عارفين ان ده حل مؤقت هيجي وقت و كلهم هيقعوا احنا بنرقعهم ببعض
مختار / كلام منطقى ... من الطرفين
شاهين / انتوا عارفين ان بالرغم من ان يونس قام ممكن يكون لسه سامعنا بجهاز هنا و لا هنا و لا شوف كدا يا كارم يكون سايب موبايله و لا زارع اى حاجه مكانه
كارم / يا عم يونس اخر همك احنا كنا بنرغى على السطح ناموسه قرصتني و عينك ما تشوف الا النور فتحت عليهم النار لولا ستر ربنا
مختار / مفيش اى حل للهباب ده يا دياب
دياب / و الله ما قادر اوصل لحاجه مع انى مش ساكت
شاهين / اجهزه تشويش اشاره ما تحلش الموضوع
دياب / زى ما قولت انت من شويه هتوقع تكنولوجيا هتوقعها كلها ... لا موبايل هيشتغل و لا اى جهاز بيشتغل بالنت هيشتغل
مغاورى / يعني ما لهاش حل خالص كدا
دياب / هتامن مكان يعني ... تمام سهله ... طب و فى الشارع هتعمل ايه ما دى حاجات صغيره جدا انها تتشاف اصلا
الكل يتنهد و يبصوا لبعض
كارم / و الله انا شايف ان الدنيا ابسط من كدا بكتير لا حد هيهرب من قدره و بعدين احنا معانا ربنا اقوى من الكل
شاهين / المسلم القوى خير من المسلم الضعيف و الحرب خدعه
كارم / و احنا مش مقصرين ... انا هقوم اغسل ايدي و اشوف يونس اتأخر ليه
كارم يقوم
شاهين/ خلصت كدا يعني ما لهاش حل فعلا ... طب لو وقع فى ايدك واحد من بتوعهم ما تقدرش تتبع الاشاره دى جايه منين و تخترق الشبكه بتاعتهم و كدا و لا انا فاهم غلط
دياب / لو سليم احاول بس برده الموضوع مش سهل
شاهين / تمام اوى
.........................
فى الاسطبل
نجاه / دا بقي حورس دلوعه ابويا ... خدى بالك منه لانه شقي اوى
مهره / شكله جميل اوى اللهم بارك
نجاه / ما تتغريش فى الشكل دا عندى و مش سهل حد يسيطر عليه
عمران يدخل
عمران / بس جدع و أصيل... ازيك يا مهره
مهره / حمد الله على السلامه ... سالت عليك كتير اوى
عمران / ما انا جيت لك اهو
نجاه / طب اسيبكوا لوحدكوا شويه و لا اخليني و لا ايه الوضع دلوقت
مهره / اولا انا اسفه انى حطيتك فى موقف زى ده و انك ادبست فى الحوار ده و انت ما لكش ذنب و انا و الله مش عارفه كل ده حصل ازاى انا و الله مش كدا
عمران / عارف .. مروان
مهره تهز راسها لا و الدموع تنزل من عينها
عمران / ابوكى مخبيه فى البيت و ما بيخرجش منه نهائى و وصلت للديلر اللى بيجيب منه و رامى صاحبه قال انه كان متفق معاه يوقعك عشان يطلعوا بقرشين من وراكى بس انتى ما اديتيش لرامي وش و فجاه مروان جاتله فلوس كتير ما حدش يعرف مصدرها و جاب كميه مخدرات كبيره تكفيه فتره ما نعرفش مخبيها فين
نجاه / ما دام ما بيخرجش تبقي اكيد فى البيت معاه
عمران / فكرنا نبلغ البوليس خصوصا ان رامى أكد ان مروان مدمن و انه بيرشي فنى تحاليل يضربله تحليل انه سليم بس فى احتمال كبير تفكس فقررنا نستنى و نراقب من بعيد عشان لما يقع ما يعرفش يقوم منها
نجاه / مش مقتنعه بس تمام اعملوا اللى تقدروا عليه
مهره / ما يمكن رامى انا كنت بشرب حاجات فى الشركه عنده عادى و فعلا ساعات كانت تصرفاته غريبه بس انا كنت بقول انه شايل التكليف و كدا و مروان كمان على فكره كان مهتم جدا يعني علاطول كان بيسأل عامله ايه فى الشغل و حد بيضايقك و لا لا و فى مره قولتله ان رامى كدا يعني قالى هيكلمه و انا اللى منعته ... مروان مش كدا ... انا اخته ... ما حدش بيعمل كدا فى اخته
عمران / هيبان
مهره تمسح دموعها و تبص فى الارض و مش قادره تبطل عياط
نجاه / رب ضاره نافعه ما حدش عارف الخير فين
مهره / فين بس انتى بتقولى ايه
عمران / بتقول الحقيقه انتى هنا وسطينا فى امان عن اى مكان تانى و عندك كل حاجه بتحبيها الخيل و نجاه و لو ناقصك اى حاجه احنا جنبك انتى بقيتي مننا خلاص
مهره / بالكدب ... بالتزوير ... بالتدبيس... انت بتقول ايه بس ... عمران كدا كدا لو سمحت انا لازم اطلق اللى بيحصل ده غلط و ما ينفعش انت ما لكش ذنب فى كل ده اصلا
نجاه/ يا بنتى انتوا مش متجوزين اصلا
مهره / على الورق اه
عمران / مفيش مشكله حاضر
نجاه / بس مش هتمشي برده
مهره / لازم امشي ... اخف بس و لازم امشي
عمران / ليه يا مهره احنا قصرنا فى ايه
مهره / انتوا مفيش منكوا بس ... انا ليا اهل ... لازم ارجع و ابرئ نفسي قدامهم لازم بابا و ماما يعرفوا انى مظلومه انى مش كدا ... انا مش كدا يا عمران و انت عارف
عمران / انا عارف و لو شوفتك فى اى وضع هقول اكيد فى حاجه غلط و انك مش كدا بس دول مش اهلك ... انا اسف بس احنا حاولنا بكل الطرق ما بيسمعوش .. انتى بالنسبالهم وحشه حتى لو كحيتي بس ... هم ما يستاهلوكيش
مهره / منى انا الكلام هيختلف منى انا كل حاجه هتختلف هيصدقونى انا
عمران / ما تعشميش نفسك بهبل انتى عرفاهم اكتر منى
نجاه / خلاص يا عمران نتكلم بعدين
عمران / لا يا نجاه معلش عشان ما ترجعش تتصدم فيهم ابويا طلع عينه مع ابوها و
نجاه/ هى دلوقت مصدومه بما فيه الكفايه اسكت مش وقته
عمران / تمام ... عن اذنكوا
مهره / من فضلك طلقنى
عمران / حاضر
عمران يمشي و نجاه تاخد مهره فى حضنها منهاره
.....................
فى جنينه الجوارحه
جوزيف / ما كنت مش عايز تعرف
منصور / هتقول و لا لا
جوزيف / هتعمل ايه لما تعرف ... هتقتله ؟!! هتصدقني ؟!! مش يمكن بكدب و بوقع بينكوا ؟!! هتصدقنى ؟!! هتقتل اخوك عشان
منصور يشد جوزيف من هدومه عليه بعنف و جوزيف ما بيقاومش
منصور / اخويا ما يعملهاش
جوزيف / اسف اسف هههههههههه ... انا كنت فاكركوا كلكوا هنا اخوات فى بعض اصل نجاه مفهمانى ان شعاركوا انا و اخويا على ابن عمى و انا و ابن عمى على الغريب ... و انا هنا الغريب ... فالطبيعي تكدبنى و تصدقه هو
منصور يزق جوزيف و جوزيف هادى جدا
جوزيف / عاوز تعرف هو مين بجد ؟ جاهز يعني للحقيقة ؟
منصور يبصله بحزن
جوزيف / مش سهل انك تنسي اللى حصل بس سهل انك تتجاهله و تكمل حياتك لا انت غلطت و لا مراتك غلطتت تضايق نفسك ليه
منصور / و انت هتفهم منين صحيح
جوزيف / انا ما افهمش ... بس انا لو مكانك ما اوقفش الدنيا على موقف اهبل زى ده ... دا فى ناس بيحصل معاها اسوء من كدا بكتير ولا كان حاجه حصلت ... تعرف ... دول اللى بيوصلوا و الناس ما بتجرؤش تبص عليهم حتى ... تلاقي البت من دول واقفه بالبكيني على البحر و لو فكرت تبص بعينك تبقي انت اللى منحرف و متحرش و التانيه متغطيه من فوق لتحت و لو الهوا بس طير ديل العبايه يتقال و يتحط عليها و ليه مش لابسه بنطلون تحت و ايه اللى خرجها من البيت اصلا فى الجو ده و ليه معهاش حد يسترها و ليه عايشه و بتتنفس اساسا مش عشان دى صح و دى غلط ... عشان صاحبه البكيني مقتنعه انها ما غلطتش و ان هو الغلطان انه بص و اللى الهوا طير عبايتها ارتبكت و اللى بيتهز فى دنيتنا يا منصور الناس بتركبه
منصور/ انت بتتكلم فى حاجه تانيه خالص ... انا عارف ان ياسمينا ست الكل و هى عارفه بس فى حد
جوزيف / مكانش حد واحد كانوا ربع مليون
منصور يضرب كف على كف و يلف حوالين نفسه يحاول يهدى
جوزيف / على كوكب عدد سكانه مليارات ما يعتبروش عدد اصلا و ماتوا كلهم اللى طياره وقعت بيه و اللى سفينه غرقت بيه و اللى اتقطع و اتباع خرده و اللى و اللى ... انت ليك ايه من كل ده موقف من سنين ليه لسه موقف حياتك عنده
منصور / شاهين صح ؟؟ هو شاهين صح ؟؟
.....................
أنت تقرأ
الكبيره ٢ بقلم / لولو_محمد
Humorالحرب لسه مستمره و الحقيقه مسيرها فى يوم تظهر النور و كل واحد لازم يختار طريقه
