الكبيره ٢ بقلم / لولو_محمد

الحلقه ١١٨

((((((( الكبيره ٢ )))))))
#لولو_محمد
الحلقه ١١٨
مهره تكتب / انت ازاى بالحقاره دى
حاتم / و انا مالى دى كانت فكره مامتك و هى اللى دفعت كمان على فكره مامتك متحمسه للجوازه دى اكتر منى و بصراحه انا عمرى ما هنسي فضلها عليا
مهره تكتب / انت بتعمل معايا كدا ليه اشمعن انا ما تفكك منى
حاتم/ ما قولتلك انتى كل حاجه و عكسها حاجه كدا طريه بس حرشه بنت ناس ملفوفه فى ملايه لف رافعه مناخيرك لفوق اوى و فى نفس الوقت مكسوره حاجه تكسر الملل و الروتين
مهره تكتب / و ان رميت كرسي فى الكلوب و بوظت ام الجوازه الزباله دى هتعمل ايه
حاتم / ابوس ايدك اعملى كدا ... ارفضي و خلينا نشوف سوا انا ممكن اعمل فيكي ايه
مهره تكتب / مش هيسيبوك على فكره
حاتم / هم مين؟ الزنايته ؟ امال انا اخترتك ليه من الاول ما عشان قريت نظراته ليكي هو انتى لسه ما فهمتينيش انا مش قادر اعيش فى العالم المتحضر الممل ده بحتاج اكشن فى حياتى مدمن ادرينالين عملت كل حاجه ممكن تتخيليها و مفيش حاجه كفايا انا حتى
حاتم يوطى على مهره يوشوشها
حاتم / قتلت قبل كدا
مهره ترد بلغه الاشاره حاتم يمسك ايدها و يكسر صابعها تنزل على ركبها و هى بتصرخ الكل ينتبه و يقفوا
.......................
حاتم / زى ما احنا ما فيش حاجه هتتغير انجوى يا جماعه ما فيش حاجه
فجاه حاتم يتكهرب و ينزل فى الارض و يفضل يتنفض و الكل مصدوم و مش عارفين يعملوا ايه الباب يتكسر و يدخل عمران و وراه جوزيف وراهم رجاله كتير عمران يجرى على مهره يشوف ايدها
جوزيف/ اسف جدا على التأخير اوعوا تكونوا بدأتوا من غيرى معلش يا مولانا عطلناك تقدر تتفضل انت
الماذون يلم دفتره و يجرى بره الشهود لسه هيجروا الرجاله تقفل الباب عمران يرد لمهره صابعها مكانه تتالم حاتم يحاول يقوم عمران يروح يضربه فى جنبه ينطره فى الارض حاتم يضحك جوزيف يبتسم و يدوس على زرار حاتم يتكهرب صوفيا و بياتريس يصرخوا
جوزيف / ايه ايه ايه بتصرخوا ليه حد لمسكوا ... لسه
كارمن / انا بحذركوا اللى هيقرب منى او من بناتى
عمران / هو انتى كل ده ما فهمتيش ... كل الهبل ده متسجل تحبى نزيع قولى زيع فضيحتك انتى و بناتك هتبقي على كل لسان انتى و الحيوان ده
جوزيف / فضيحه ايه و نزيع ايه و حكومه ايه انت مال قلبك قاسي كدا ليه الراجل كل اللى عمله ان كان نفسه يتسلى شويه زهقان يا جدع
عمران / انت شايف كدا ؟!
جوزيف / اه
عمران / يبقى نسليه
عمران يطلع من جيبه سويس نايف و لسه هيتحرك مهره تمسك ايده و هى بتعيط يبص لها تهز راسها لا
جوزيف / على فكره ما معهمش ليكي حاجه دا كانت نجاه نفختنى كلها ممسوحه و متبدله بكليبات توم اند جيرى
صوفيا / احنا مستنين ايه ما حد يطلب البوليس
جوزيف / اه صحيح هو ما حدش طلب البوليس ليه لحد دلوقت ايه الناس السلبيه دى
جوزيف يضرب حاتم بالرجل فى جنبه حاتم يتألم هند تدخل و وراها ناصر هند تشوف كارمن تجرى تجيبها من شعرها و كارمن بتصرخ و البنات بيحاولوا يحوشوا تضربهم هم كمان و تكومهم فى الارض فوق بعض
هند/ تعالى بقي انا ماسكه نفسي عنك من زمان
كارمن / اوعى سيبي شعرى يا فلاحه انتى
صوفيا / اوعى سيبي مامى اوعى
هند / طب تعالى انتى كمان ... انا هوريكوا الفلاحه دى هتعمل فيكوا ايه
بياتريس ترجع خطوه لورا و تخاف هند تروح تجيبها من شعرها
هند / و انتى و الله ما خساره فيكى
بياتريس / انا ما فتحتش بقي اااااه مامى اللحقيني
........................
ورا شجره فى الجنينه 
احلام تدخل تلاقى نجاه قاعده مداريه فى الشجره و حزينه تقعد جنبها نجاه تتفاجئ و تتعدل فى قعدتها
احلام / السرايا كلها مقلوبه عليكي
نجاه تهز راسها اه
احلام / هو فى حاجه حصلت و لا ايه
نجاه / حاجه متوقعه بس ما حدش حاول يعمل اى حاجه عشان يمنعها كالعاده بنستنى المصيبه تحصل و بعدين نشوف بقي هنصلحها ازاى
احلام مش فاهمه بس تطبطب على نجاه
نجاه / يونس معاه حق فى كل اللى بيقوله عننا احنا مش اقويا زى ما احنا فاكرين و لا صاحين و لا مركزين و لا لينا اى تلاته لازمه
احلام / مش صحيح
نجاه تبص لأحلام و تبتسم بسخريه
احلام / انا مش عارفه انتى بتتكلمى عن ايه بالظبط بس احنا بنعمل كل اللى نقدر عليه عمرنا و صحتنا و فلوسنا ما بنستخسرش حاجه منهم فى اى حاجه ... بس الحذر لا يمنع القدر
نجاه / ماشي
احلام / طب هتفضلى قاعده هنا لحد امتى ... تحبى اطمنهم عليكى و اسيبك لوحدك شويه ؟
نجاه / ما تتعبيش نفسك انا داخله
احلام / طب قبل ما ندخل جوه انا عاوزه أسألك حاجه واحده
نجاه تبص لأحلام
احلام / هو انا ما ليش نفس افرح ما ليش نفس ان احس ان اهلى و اللى بحبهم فرحانين عشانى
نجاه تتنهد و تحضن احلام
احلام / انا عارفه ان اكيد فى حاجه حصلت الكبير و عمتى و خالى حتى جابر كله زعلان و دا باين عليهم اوى بس هم بيحاولوا يداروا قدامى ينفع بس تمثلى انك فرحانه اليومين دول و انا هعمل نفسي مش واخده بالى
نجاه تضحك
احلام / يا بنتى هنستهبل كلنا عادى دا انا فرحى معمول فى نفس اليوم اللى هتحصل فيه المصيبه الكبيره يعني عارفه و متاكده ان اكيد هتحصل حاجه تبوظ الفرح فعلى الاقل ناجل النكد لحد ما نوصل له
نجاه / يا قلبي انا فعلا فرحانه اوى ليكي ... دا انا هلبس فستان
احلام تضحك
نجاه / مفيش تضحيه اكتر من كدا على فكره
......................
فى المستشفي
مهره قاعده و لفه ايدها الدكتوره تطلع بره هند تمسح بايديها الاتنين وش مهره اللى باصه فى الارض و بتعيط
هند / انا عوزاكى
مهره تبص لها
هند / لو الدنيا كلها مش عارفه قيمتك انا عرفاها و محتاجاكى بنت ليا انتى واحده كنتى مستعده تضحى بعمرك عشان ابنى تفتكرى ما اضحيش بعمرى كله عشانك ... احنا مش اتكلمنا فى الموضوع ده قبل كدا مش دايما الاهل بيكونوا احسن حاجه بس ربنا بيعوض اقسم بالله بيبعت لك اهل احسن من اهلك ... و زوج حنين و جدع و حليوه
مهره تبتسم بسخريه و عنيها ما بتبطلش دموع
هند / طب و الله واد راجل كدا و ما في منه ابنى ربايه ايدي ... بقولك ايه ما تتقليش بقي الواد هيتجنن عليكى هتخلعى قلبه لو شافك منهاره كدا ... انتى عارفه انا بفكر فى ايه ؟! ... قبل ما اقول اى حاجه انا بفكر بس انما مش هيحصل غير اللى انتى عوزاه لتفتكرى انى بضغط عليكي و لا حاجه ... بصي اولا كدا احنا عندنا فرح كبير اوى فى البلد لكذا عروسه منهم البت احلام ما انتى عرفاها... لو الواد عمران عاجبك زى ما انتى عجباه ايه رايك ننزل نجيب ليكى احلى فستان فرح و تدخلى معاهم
مهره تعيط اكتر
هند / انا قولت بفكر بس ... طب انتى مش بتحبى عمران  ..  امال ليه كنتى موافقه تتجوزى حاتم عشان يخرجه من الحجز ... مهره ما تعيطيش كدا فى ايه
مهره تمسح دموعها
هند / طب حقك عليا خلاص انسي الموضوع انسيه بلاها عمران عادى يعني هو اللى خلقه ما خلقش غيره و بعدين احنا مش مستعجلين على جوازك يعني فى قدامنا وقت طويل عادى ... عمر بحاله و بكره يجيلك سيد سيده و نقعد كدا و ننقى و نتشرط اه احنا بنتنا مش قليله دى ملكه جمال ادب ايه و أخلاق ايه و حلاوه ايه
مهره تترمى فى حضن هند هند تطبطب عليها
هند / حقك عليا يا ضنايا بس احنا مهما قلنا ما كنتيش هتصدقينا كان لازم تتوجعى بنفسك بس اقسم لك بالله الوجع ده هيروح هتبقي اقوى هتبقي احسن
هند تمسح دموع مهره
هند/ ما توجعيش قلبي عليكي بقي
تليفون هند يرن
هند / دا عمك مختار استنى افتح الكاميره ... امسحى دموعك دى الراجل يبان من بره ناشف بس من جوه حساس ما يستحملش المناظر الوحشه دى ضغطه يعلا يروح مننا
مهره تبتسم بسخريه و تمسح دموعها هند تفتح فيديو كول
هند / ازيك يا مختار احنا خلصنا و راجعين اهو باذن الله
مختار / طب اديهانى
هند تلف الموبايل و تديه لمهره
مختار / عامله ايه يا ست البنات كلها
مهره تهز راسها بتقل
مختار / الحكايه ما خلصتش هنا على فكره ... كل اللى وجعوكى هيتوجعوا اضعافه .. حقك انا هجيبه بنفسي على فكره
مهره تهز راسها لا
مختار / احنا صعايده و ما بنسيبش تارنا ابدا
مهره تشاور بايدها يقف و تتنهد و تبص لهند
هند / بقولك ايه لما نيجي نبقي نتكلم لسه قدامنا طريق طويل ما تعطلناش
مختار / فى حفظ الله
هند تقفل
هند / قادره نروح دلوقت و لا تحبى نستنى شويه ؟!
........................
فى عربيه عمران
عمران سايق و جوزيف جنبه
جوزيف / كان لازم تسمع الكلام ده على فكره دى كانت الطريقه الوحيده اللى هتخليها تفوق من العبط اللى كانت عايشه فيه
عمران / و انت بقي فاكر انها هتقدر تتخطى الموقف ده عادى كدا
جوزيف / ما حدش بيتخطى حاجه احنا المواقف دى هى اللى  بتخطى فوقينا و تدوس و تعدى اللى قد الشيله هيكمل و التعبان هيقعد يعيط فى جنب و برده المواقف مش هتسيبه فى حاله هتجيله تكمل عليه
عمران / انا بتكلم فى ايه و انت بتتكلم فى ايه
جوزيف / نفسه ... مهره لو ما مرتش بالمواقف دى هتبقي ضعيفه و انت اصلا مش هتقدر تحميها من ان اى حاجه وحشه تحصلها لازم تكون هى قويه و تتحمل الصدمات دى لوحدها لازم تكون قويه عشان تقدر تسندك مش هتقدر تشيلها طول العمر هيجي وقت و هتنخ دى سنه الحياه
عمران / حكيم زمانك اوى
جوزيف / و لا حكيم عيون حتى بس دى حاجات مش محتاجه حد يقولهالك دى جمل من اللى بتتكتب على ضهر التكاتك دى عارفها 
عمران / انا هاين عليا اولع فى نفسي و انت برود الدنيا و الاخره انا بقول تنزلنى و اركب فى اى عربيه تانيه
جوزيف / و ماله و اهو بالمره تتكلم معاها و تطيب خاطرها بكلمتين
عمران / جربت غباوتى قبل كدا
جوزيف / سكت
عمران يبص قدامه و جوزيف كل شويه يبص له عمران يبص له جوزيف يبص قدامه بسرعه
............................
فى البلد
اول عربيه تدخل هى عربيه هند و مهره اول ما مهره تنزل من العربيه نجاه تجرى تحضنها مهره بتعيط نجاه تاخدها فى حضنها و يدخلوا تكون نور نزلت من عربيه تانيه سايقها ناصر تشوف مهره و نجاه داخلين هند تحضن ام نور و يسلموا على بعض
هند / الف حمد الله على السلامه نورتوا
ام نور / دا نورك يا ست الستات مع انى زعلانه منك
هند / انا !! و لا أقدر ابدا خير بس
ام نور / بقي تبقي فى مصر خطوتين و ما تفوتيش تسلمى حتى
هند / كنت ناويه و الله بس غصب عنى اعمل ايه بس انتى عارفه الوقت ما عادش فيه بركه خالص تصحى من النوم يا دوب تشوفى اللى وراكى تلاقى الوقت ازف بس احنا فيها اهو يومين كاملين تمنيه و اربعين ساعه مع بعض هزهقك منى
ام نور / و لا تمنيه و اربعين سنه
هند تضحك و تبص لنور مبوزه
هند/ مالك يا نور يا حبيبتي فى حاجه و لا ايه
نور / مفيش
هند تبص لناصر يهز كتفه ما اعرفش مختار يطلع من السرايا
مختار / يا اهلا يا اهلا الله امال باقي الجماعه فين
ام نور / مره تانيه ان شاء الله حضرتك عارف المشاغل و الله لولا غلاوه احلام عندى و عند نور ما كنا قدرنا نيجي ابدا
مختار/ لا دا احنا كنا نزعل اوى على العموم الله يكون فى العون و متعوضه باذن الله ... الجماعه جوه جهزولكوا اوضه و غيروا الفرش و خلوها فله تقدروا تطلعوا ترتاحوا شويه لحد معاد الاكل
هند / اه و الله يا مختار جعانه موت ... هستاذنكوا اروح بسرعه ابص على المطبخ و استعجلهم ... طلع لهم الشنط يا ناصر
ناصر / حاضر
مختار / هو فى حاجه مضيقاكى يا نور
نور / مفيش
مختار يبتسم و يرفع حاجبه و يبص الناحيه التانيه و يطبطب على كتف ناصر
.....................
فى مخزن
جوزيف / ما كنت بلغت البوليس بدل ما تشحطت نفسك لحد هنا
ابو حاتم / انا هرجعه المصحه فى امريكا تانى انا هخرب بيتهم انهم خرجوه قبل ما يكمل علاج بس ابوس ايديكوا سيبوه
جوزيف / ابنك ما لوش علاج ابنك وصل لمرحله من الرفاهية بوظته الفلوس الكتير اللى عندك ادته قوه خلته افتكر انه فوق الكل دفاعك عنه خلته افتكر ان ما فيش حساب
ابو حاتم / هشده هعيد ربايته من اول و جديد بس ابوس ايدك خليه يروح معايا دا ابنى الوحيد و امه هتموت عليه
جوزيف / موافق بس بشرط
ابو حاتم / اى كان انا موافق
جوزيف / يعتزر لمهره
ابو حاتم / و يبوس رجلها كمان لو تحب بس نمشي انا اقسم بالله قولتله بلاش السكه دى
جوزيف / على العموم هو فى الاوضه جوه تقدر تدخل تطمن عليه
ابو حاتم يجرى يفتح الباب يلاقى ابنه نايم فى الارض فاقد الوعى يجرى يحاول يفوقه
الراجل / حاتم حاتم فوق يا ابنى فوق يا ضنايا فوق
جوزيف يقفل عليهم الباب بالمفتاح الراجل يفضل يخبط يطلع الموبايل و يحاول يتصل بحد مفيش شبكه خالص الراجل يمسك دماغه و يفضل يلف حوالين نفسه
...........................
فى اوضه نور
الست / ما تولع مهره على نجاه مال هند و مختار بالموضوع زمانهم بيقولوا عنك انك قليله الزوق
نور / ما دى المشكله ... هما اصلا مش بيحبونى و مهره دى ما اعرفش طالعين بيها السما على ايه بصراحه
الست / يطلعوا ينزلوا انتى ليكي بجوزك و بس ناصر ... بصي احنا لسه فى اولها عاوزه ننهيها بادبنا قولى انما هتيجي فى الاخر و نخيب انا مش هستحمل الهبل ده
نور / دا بدل ما تساعديني و تقوليلى اعمل ايه
الست / قولتلك ... خليكي فى ناصر و بس احنا هنا فى الصعيد هيقولوا بتوقع الرجاله فى بعض و يحدفوكى على اخر دراعهم
نور / يعني عمران يدافع عن مهره و ناصر ما يدافعش عنى
الست / هو احنا شوفنا عمران اصلا انتى مش اللى  ضايقك نجاه
نور / ايوه يا ماما انتى ما تعرفيش نجاه دى مهمه فى العيله قد ايه
الست / خلاص يا خايبه اكسبيها فى صفك شوفى مهره بتعمل ايه و اعملى زيها
نور / دول بيناموا فى اوضه واحده
الست / روحى نامى معاهم
نور / ايه !!
الست / يا ستى اسهرى معاهم و قربى منهم انتى تنحبى هم بس لسه ما يعرفوكيش خليهم يعرفوكى بجد
نور / و انا اعمل كدا ازاى
الست / قولى لناصر و هو هيقصر عليكي المسافات
نور / مش مرتاحه
الست / اعملى اللى يريحك
..........................
فى الجبل
شاكر / لا طبعا ليك حق تضايق دا انا لو مكانك كنت طرمت له طقم سنانه
عمران / شكرا ... شكرا ... اخيرا حد بيحس لحسن انا كان فاضلى تكه و اخبط راسي فى الحيط
شاكر / المشكله ان هو ده اللى هو عاوزه عاوزك تحط عليه
عمران / طب مش حرام ما اريحوش
شاكر/ اللى زي ده مشكلته مش هتتحل بعلقه اللى زى ده عاوز يتكسر
عمران / دا انا هدغدغ عضمه
شاكر / لا اقصد هيبته شخصيته كرامته
عمران/ فى ايه فى دماغك
شاكر / الصراحه مفيش بس باذن الله نفكر له ورانا ايه
عمران / انا مروح
شاكر / مروح فين انت لحقت تقعد
عمران / بجد مش طايق نفسي
شاكر / هتعدى صدقنى
عمران يهز راسه و يمشي
..........................
فى المطبخ
رحمه واقفه بتعمل حواوشي محمد يدخل
محمد / كل ده !!! انا هموت من الجوع
رحمه / خلصت و الله اخر رغيفين بس
محمد / ايه ده ؟! ايه ده ؟! لمين كل ده ؟!
رحمه / لنجاه و مهره ما نزلوش ياكلوا و الرجاله قاموا بالواجب قضوا على الأخضر و اليابس
محمد / عيب يا بت
محمد يمد ايده ياخد رغيف ياكل
رحمه / ما قولتش حاجه و الله ما اقصد انا اقصد اكيد مش هسيبهم من غير اكل يعني فقولت ازود للى ياكل و كدا
محمد / اصيله يا بنت الأصول يا ست البنات كلهم ... بقولك ايه
رحمه / قول
محمد / ما تطلعى لهم الاكل بنفسك
رحمه / حاضر عنيا بس اشمعن
محمد / هو انا اكيد اكيد يعنى ما اعرفش بس قلبي بيقول لى فى حوار كبير
رحمه تشهق شهقه كبيره
رحمه / انت عاوزنى اطقسلك
محمد / اتلهى انا لو عاوز اطقس هبعتك انتى برده دا انتى مفيش اخيب منك
رحمه / تشكر يا سيد الرجاله
محمد / اقصد مش سكتك يعني ما انتش سوسه كدا و تعرفى تسحبى الكلام من اللى قدامك انا اقصد تقعدى معاهم تطيبي خاطرهم تشوفيهم محتاجين حاجه و انا هروح اشوف عمران برده و احاول اهدى الدنيا
رحمه / انت قصدك انهم متخانقين ... هو ايه اللى متخانقين هم مش مطلقين باين و لا ما كانوش متجوزين باين و لا انا ما فاهمه اللخبطه دى
محمد / ششششش ... انتى هتفضحينا احنا ما نعرفش اى حاجه فى اى حاجه و لا لينا دعوه باى حاجه احنا أخرنا مطيباتيه هتعرفى تطبطبى و لا هتخربيها
رحمه / تصدق انك وحش و انا زعلانه منك
محمد / هصالحك لما اروح
محمد يغمز لها و ياخد رغيف تانى و يمشي
رحمه / ربنا يهديك
رحمه تطفى البوتجاز و تغطى صينيه الاكل و تطلع بيها على اوضه نجاه
..........................
فى مكتب الزنايته
جوزيف / لا ما احنا مش هنلم الزباله اللى فى المجتمع و نقفل عليهم فى المخزن العمر كله
مختار / الواد مريض يا يونس
جوزيف / يا تعالجه يا تبلغ عنه حبسته مش هتغير حاجه و ابوه اللى عرف السكه و جه طاير ده كمان اكيد قايل لحد انه هنا مش وقت فواتيح
عباده/ يونس بيتكلم صح
جوزيف/ احلف!!!
عباده يتنهد
عباده / اكرم قولناله يمشي و ضغطنا عليه و برده مش عاوز يخرج من الاوضه احنا نعرفه اللى حاتم عمله و نرميهم فى عربيه واحده و ياكلوا بعض
جابر/ الكلام ده مش هيعجب نجاه
جوزيف / حاتم لسه لابس الاسوره نبقي نخليها تكهربه مرتين تلاته
عباده / نجاه ما بتاكلش من الكلام ده
جوزيف / ما هو ما اغتصبهاش عشان نقتله قدامها زى التانى دا حياله كسر لها صابعها
عباده / دا على اساس التانى ده كان فرق فى حالتها يعني و بعدين يا سيدي حاتم كهربناه امها هنعمل فيها ايه
جوزيف/ لا امها دى تدعيلها هند عملت معاها الجلاشه
مختار / هند دى بتلعب معاك فى الحاره يلا ما تحترم نفسك
جوزيف / تلعب معايا ايه لا يا عم ربنا يعينك و يقويك دى مسكت التلاته و فين يوجعك اقسم بالله احلى خناقه شوفتها فى حياتى
الكل مش قادر يكتم الضحك
جوزيف / ما علينا ما اتفقناش برده هنعمل ايه
مختار / هطلع اتكلم مع مهره و نجاه و هم اللى يقرروا
جابر / مهره مش هتختار حاجه هتسكت
جوزيف / منعت عمران يعلم على حاتم
عباده / و اكيد برده مش هتقول ائذوا اهلى
مختار / ما تخلونا نشوف احسن
عباده / شوف ربنا ينفخ فى صورتك
مختار يبص لعباده و يتنهد و يمشي و عباده و جابر باصين لجوزيف
جوزيف/ هو انا معزوم على الفرح صح ؟
.............................
فى اوضه نجاه
نجاه و رحمه و مهره قاعدين على السرير و حاطين الصينيه فى النص و بياكلو و مهره ماسكه الساندوتش و مش بتاكل
رحمه / على فكره لما بيبرد بيجلد دا انا باشره عليه حته ليه ضانى قااااااد كداهو
نجاه / باين من طعامته تسلم ايدك
رحمه / لو بتقرفى انا ممكن اعمل ليكي اكل تانى
مهره تهز راسها لا و تعتزر
نجاه / هى ما لهاش نفس خالص للأكل
رحمه / شكلها باين انها زعلانه بس الاكل ماله و مال الزعل على راى محمد الاكل ما شوفناش منه غير كل خير
مهره تبتسم
رحمه / انا عارفه انكوا متعودين على بعض و انا يعني ... بس و الله انا قولت اكيد جعانين
نجاه / خير ما عملتى و الله و بعدين انتى عارفه الحواوشي بتاعك ما يتقاومش يعني
رحمه / مش قصدى ... الف هنا ... انا اقصد انى ممكن امشي عادى ... انا اصلا ورايا حاجات كتير انتى عارفه
مهره تقوم على ركبها و تمسك ايد رحمه رحمه تبتسم
مهره تبص يمين و شمال مفيش ورق تاخد موبايل و تفتحه و تكتب بايدها السليمه بالعافيه
مهره / انا بطنى بتوجعنى لما باكل سامحيني غير كدا انا نفسي اخلصه كله
رحمه / قولون صح ... ستى بطه عندها دوا كدا بتاخده بيريحها على الآخر هروح اجيب لك حبايه
نجاه / ابويا لو سمعك هينفخك
رحمه تعوج بقها
نجاه / احنا بنشير الدوا يا رحمه و بنبلع اى حاجه كدا من غير راى دكتور
رحمه / ما انا لو سألت الدكتور على كل صغيره و كبيره هعيش فى مستشفي
نجاه / امال لو ما كانش فى بيتنا بدل الدكتور اتنين و تلاته
رحمه / اهو بقي
نجاه / زى جوزها بالحته بهتوا على بعض
رحمه / و انا أطول ابقي زيه اش فهمك انتى
نجاه/ الحب الحب
مهره تكتب / بس انتى شكلك صغير اوى
رحمه / و لا صغيره و لا حاجه
نجاه/ احنا هنصيع انتى صغيره جدا و محمد جوزك صغير دا أصغر واحد فى عيال عمى مختار بس هو الحب ولع فى الدره بقي و كدا فجوزوهم انتى عارفه
رحمه تبص لمهره يبتسموا الباب يخبط رحمه تشاور و تروح تقف جنب الباب التلاته يعدلوا حجابهم يفتحوا يلاقوا نور واقفه مع مختار 
مختار / كنت جاى اتكلم مع مهره فى موضوع كدا لقيت القمر دى رايحه جايه عاوزه تقعد معاكوا و خايفه تكسفوها
نجاه / اخس عليكي دى اوضتك تدخلى على طول تعالى
مختار / شامم ريحه حاجه حلوه جوه و لا ايه يا رحمه
رحمه / حالا اعملك سخن و طازه
مختار / لا ما باكلش السعادى تسلم ايدك خليها الصبح
رحمه / عيني حاضر
مختار / تعالى يا مهره ثوانى
مهره تقوم تروح مع مختار و نور تدخل تقعد مع نجاه و رحمه و يقفلوا الباب و مختار و مهره ينزلوا السلم
مختار / عامله ايه
مهره تهز راسها مختار يبتسم
مختار / كان فى موضوع ما ينفعش حد ياخد قرار فيه غيرك انا عارف انه مش وقته و عارف انك مرهقه و ان كل اللى حصل ما كانش شويه بس
مهره تطلع الموبايل و تكتب
مهره / لو هتكلمنى عن عمران فبلاش افضل
مختار يضحك
مختار/ هو فى الظروف العاديه كنت قولتلك بلاش تلاكيك ما حدش جاب سيره عمران ... و لا هو حد جاب و انا ما اعرفش
مهره تبتسم بحرج و تسبق مختار بخطوه مختار يحصلها و يطلعوا من السرايا
مختار / تعالى نقعد فى الجنينه اللى ورا الجو جميل هناك تعالى
مهره تهز راسها و تروح مع مختار
مختار / بس ليه ما نتكلمش عن عمران يعني مش فاهم ... انسي انسي هو اساسا عيل فقرى مش وش نعمه خلينا فى المفيد احسن
مهره تهز راسها مختار يشاور لها تقعد على المرجيحة تقعد يقعد جنبها و يهزها بالراحه برجله
مختار / انا مش جايبك اتكلم عنك و لا عن عمران مع ان دى حاجه افرح بيها اوى بس مش مستعجل عليها خليها لما تهدى و تبقي احسن عشان تاخدى قرار سليم ... خلينا فى اهلك
مهره تبص الناحيه التانيه
مختار / انتى ايه اللى يرضيكي
مهره تكتب / مش عاوزه حاجه
مختار/ و حقك
مهره تكتب / عاوزه ابعد عنهم و خلاص مش عوزاهم تانى
مختار / هم الخسرانين على فكره ... بس عادى مش كل الناس مرزقه و مش كل الناس بتقدر النعمه و مش كل الناس سويه نفسيا فى ناس كتير متخلفه عادى ... زى المريض اللى اسمه حاتم
مهره تبص للسما و تتنهد
مختار/ تحبى اكتفى بكسر ايده و لا اكمل على باقي عضمه
مهره تبص لمختار بحزن و تبص الناحيه التانيه
مختار / انا كدا كدا هخرب بيت ابوه بس انا عاوزك انتى تاخدى حقك
مهره تكتب / انا مش عاوزه حاجه ... ما كنتش عاوزه و مش هعوز ... عاوزه اعيش فى حالى ... انا ما اعرفش هم ليه عملوا كدا ... انا كنت بحبهم اوى ... كان نفسي يبقي ليا اهل
مختار / طب و احنا
مهره تكتب / بحبكوا و الله بس دول اهلى انا ابويا و أمى و اخواتى... كان نفسي ابقي زى كل البنات
مختار / مش كل البنات زى بعض ... ممكن اقول ليكي سر
مهره تهز راسها
مختار / انتى ما تفرقيش كتير عن رحمه بالعكس انتى محظوظه عنها فى حاجات كتير
مهره تستغرب
مختار / من غير تفاصيل ما حدش فينا ما مرش بظروف صعبه بس كل واحد فينا غير التانى واحد ابتلاءه فى ابوه و التانى فى امه و التالت فى اعمامه بعد موت الاهل و الرابع ابوه ما اعترفش بيه اصلا و الخامس و السادس و السابع الناس مش كلها عايشه عيشه سويه و هاديه يا ستى احنا انا مثلا ابويا و أمى ما شوفتهمش و اخويا الكبير الله يرحمه اللى رباني و عوضني كان بيجي عليا وقت بتمنى حضن امى الحقيقه مع ان مرات اخويا الله يرحمها ما قصرتش بس انا كبرت فى سن معين و خلاص ما عدتيش امى ما عادش ينفع فاهمه
مهره تهز راسها
مختار / و على قد ما حاولت اعوض ولادى و يعيشوا عيشه كويسه بس برده مش قادر اوفر ليهم عيشه سويه لان الدنيا اساسا مش سويه الدنيا مقلوب كيانها كل حاجه فيها ملخبطه ... انا بصحى كل يوم اقول يا رب النهرده يخلص من غير ما اخسر حد من عيالي و انام كل يوم و انا بدعى ان بكره يكون احسن ... انا عيالي رجاله و قد الشيله بس انا و انتى عارفين ان الشيله تقيله اوى اوى عليهم
مهره تهز راسها اه
مختار / اللى حصل لك ما قتلكيش يعني خلاكى اقوى و انتى اصلا ما كنتيش ضعيفه انا عارفك كويس الابتلاء اللى مريتي بيه نشفك بس زياده عشان تقدرى تعيشي وسطينا و تشيلى معانا شيلتنا ... طبعا دا اختيارى لو تحبى يعني تكملى معانا دا يسعدنا جدا ... خصوصا انا
مهره تبتسم
مختار/ و دا مش معناه اى حاجه تخصك انتى و عمران لا سمح الله انتى تستاهلي حاجه احسن من كدا بكتير
مهره تبتسم بسخريه
مختار / ما علينا خلى الموضوع ده بينكوا حلوه مع بعض انا مليش دعوه ... خلينا فى الجماعه الوحشين عشان عاوزين نقفل الصفحه دى للأبد
مهره تكتب مختار يسكت
مهره / يا ريت تتقفل مش عاوزه اشوفهم او اسمع عنهم اى حاجه
مختار / اتقفلت ... بس مش عاوزه تشوفى عقابهم
مهره تكتب/ عقابهم عند ربنا مفيش اى حاجه ممكن تغير اى حاجه خلصت بقي
مختار / عين العقل
مهره تكتب / ان بس نفسي اعرف هى ليه قالت كدا انا ما عملتش ليها اى حاجه انا كنت مستعده اضحى بنفسي عشانها و الله ليه بتكهرنى كدا انا ما اخترتش اجى الدنيا اصلا ما اخترتش ابويا ما ليش ذنب فى كل ده
مختار / ما هى مش سويه اصلا من زمان و ربنا عشان بيحبك بعدها عنك شوفى عيال على و شوفى عيال مامتك شوفى تربيه ده و تربيه دى و شوفى نفسك و تربيتك انتى هتعرفى ان اللى حصل لك ده خير ... انا ما اقبلش باى واحده من اخواتك التلاته زوجه لابنى ... انما انتى كتير اصلا عليهم
مهره تضحك بسخريه
مختار/ و الله ما بجاملك... انتى بنتى يا مهره... و لعلمك انا اب كويس جدا
مهره تكتب/ اكيد
مختار / و هند كمان ام كويسه و عيالي اخوات كويسين
مهره تهز راسها ايوه
مختار/ تمام ... هقوم اقول لهم انك مش فارق معاكى حاجه و يبعدوهم عن طريقك و خلاص
مختار يجي يقوم مهره تكتب
مهره / انا محتاجه شغل
مختار / مدرستك بتاعه الفروسيه مفتوحه انزلى من بكره و لا بعده و استلمى و مرنى العيال و انتى و شطارتك بقي عيل اتنين عشره انا متاكد انك هتعملى اسم بسرعه و تسمعى
مهره تكتب / انا محتاجه وظيفه مكتبيه تعليم الأطفال محتاج تواصل و انا ما بتكلمش
مختار / يبقي تلحقى تكملى علاجك اللى وقف ده بس سهله عاوزه شغلانه مكتبيه سهله عندنا بدل الشركه عشره اكيد هلاقى ليكي شغلانه فيهم ... محتاجه ايه تانى
مهره تكتب / محتاجه ابيع شقتى و عربيتي اللى فى مصر انا مش عارفه مكان العربيه اصلا و لا لاقيه المفتاح مش فاكره سبته فين
مختار / سهله سهله هنلاقيه و نظبط الدنيا بس عاوزه تبيعيهم ليه
مهره تكتب / عشان اشوف شقه تانيه هنا اعيش فيها مش هقدر اعيش فى اوضه نجاه على طول
مختار / سهله نرتب لك اوضه لوحدك ... و لا انتى مش عاوزه تعيشي وسطينا اصلا
مهره تتنهد و تكتب
مهره / انا بحبكوا جدا بس انا محتاجه اقف على رجلى لوحدى مش هقدر اربط وجودى بحد تانى ... انا عارفه انكوا ساعدوتى كتير و لسه بتساعدونى اهو بس يمكن ساعتها لما يبقالي بيت لوحدى حتى لو وسطكوا احس انى احسن من دلوقت
مختار / ما يخسرش احلى شقه و احلى عربيه عشان خاطرك انا هقوم دلوقت و انتى اطلعى انبسطى شويه مع البنات و باذن الله تفرج
مهره تبتسم مختار يسيبها و يمشي تقوم تدخل السرايا
.........................
فى شوارع البلد
عمران سايق العربيه و ماشي امايا تطلع قدامه فجاه يتفزع و يفرمل امايا تبتسم و تدخل بيت من البيوت ينزل بسرعه و يجرى وراها و يدخل البيت مفيش حد يبص على السلم مفيش حد يطلع السلم يجرى لحد السطح مفيش اى حركه يبص على الشارع مفيش اى حركه ينزل السلم تانى و هو بيتكلم فى الموبايل لحد ما يركب
عمران / حدد مكانى و فرغ كل الكاميرات حالا انا شوفت امايا
امايا تحط ايدها على كتفه من الكنبه اللى ورا
امايا / انا هنا
عمران يتخض و ينزل بسرعه من العربيه و يلم نفسه و يروح يفتح الباب الورانى يلاقي الباب التانى مفتوح و امايا مش موجوده عمران يزعق
عمران / دا شغل أشباح يعني و لا جنان يعني
عمران يلف حوالين العربيه يقفل فى الأبواب و يركب و يسوق تليفونه يرن يحط الايربود
عمران / الو
عمران يفرمل بسرعه و يبص فى المرايه يلاقيها قاعده على الكنبه ورا
امايا / انا عايشه فى سيرك
عمران/ تمام ... اؤمرى عاوزه ايه
امايا / عاوزه اشوف نجاه
عمران / طب ما تطلعي لها هى
امايا / قولها بس انى عاوزه اشوفها
امايا تيجي تفتح الباب عمران قافل اللوك امايا تضحك و تنام على الكنبه و تضرب الازاز الباب اللى ورا ناحيه بعيد عن عمران بكعب جزمتها يتكسر عمران يبص وراه و يحاول يمسكها يلاقيها خرجت من الازاز و بتجرى ناحيه بيت يفتح الباب و ينزل يجرى وراها يلاقي كلاب ضخمه خارجه من البيت ناحيته يرجع بسرعه يركب العربيه و يقفل الباب قبل ما يعضوه يفضلوا ينطوا حوالين العربيه لمده ثوانى توصل عربيات و يضربوا نار فى الجو الكلاب تجرى بعيد
……………………….