الكبيره ٢ بقلم / لولو_محمد

الحلقه ٥

((((((( الكبيره ٢)))))))
#لولو_محمد
الحلقه ٥
اكرم / فى ثانوى بطوله الجمهوريه فى الكراتيه ... و هنا مرحله الجامعه كنت ما حصلتش
مهره / و لسه ما حصلتش
اكرم يبتسم
اكرم / كنت بحب الموتوسيكلات اوى ... ساعات كتير كان بيبقي نقسي اقول لعمران اديني لفه بس بتحرج و للاسف مره كنت بتكلم مع امك و اقولها ايه يعني لو ركبت واحد زى زمان مره قالتلى و لما الناس تشوفك تقول شوفوا الراجل المتصابى بيعمل ايه هنعمل ايه ساعتها
مهره / ما حدش له حاجه عندك اعمل اللى يسعدك
اكرم / لو الدنيا كلها انتى ... مين هيبقي تعيس بس
مهره تقلب الصور
اكرم / و انا بلف العالم
مهره / الصوره دى جامده
اكرم / كانت فى برلين ايامها كنت بدوس على الارض تتزلزل تحتيا مفيش حاجه ممكن توقفنى احلامى ما لهاش نهايه و طموحى ما لوش حدود كنت فى منتهى السعاده حوليا ناس كتير زيي
مهره / راحوا فين الناس دول
اكرم / انشغلت عنهم بالشغل و انشغلوا عنى و كل واحد راح فى طريق ... سنه الحياه بقي 
مهره / طب ما تحاول تتواصل معاهم تانى
اكرم / فكرت فى الموضوع مره من فتره و فتحت فعلا و عملت سيرش عنهم على السوشيال ميديا منهم اللى بقي زيي و منهم الاسوء و منهم اللى مات بس منهم واحد ما اتغيرش لما شوفت صوره حزنت على نفسي اوى حسيته ما كبرش يمكن بالعكس شكله بقي احلى
مهره / تصدقنى لو قولتلك ان شكلك دلوقت احلى بكتير من الصور دى
اكرم / انا ما بكونش حلو الا فى عنيكى الحلوه دى بس
..........................
مهره / طب و الله ما بجاملك انت فعلا دلوقت احلى كتير راجل اكتر و ناضج و مثقف مش زى العيال التانين خالص انا بحس لما بتكلم مع اى حد فى سنى انهم عيال تافهه و فاضيه اهاليهم مدلعينهم ما يقدروش ياخدوا قرار و لا يقدروا يفتحوا بيت و لا حتى يمسكوا شغل بقول هم دول عايشين ازاى اصلا و ليه انما حضرتك ما شاء الله شخصيه و كاريزما و بتفرض احترامك فى اى مكان
اكرم / الا فى بيتي
مهره / ابدا و الله هم بس بيدلعوا عليك شويه
اكرم / و انتى ما بتدلعيش زيهم ليه
مهره / ما انا بدلع اهو دا انا ابويا نفسه ما بيعملش معايا ربع اللى حضرتك بتعمله دا انا بحمد ربنا كل يوم انه عوضنى بيك عن طفولتى كلها خصوصا لما بدات افهم يعني ايه اب و بعدها لما عرفت ان عندى اب فعلا بس هو مش عاوزنى
اكرم / طب و مامتك
مهره / عمرى ما احتاجتلها ماما امنيه كانت بتغنيني عن الدنيا كلها انما الاب دى الحاجه اللى اتحرمت منها و ما كانش عندى اللى يعوضنى عمرى ما هنسي وجعى و انا شيفاه بيحضن اختى و انا بيسلم عليا بكل برود كانى ضيفه و لا لما بحتاجله و اكلمه و يطنشني بسال نفسي انا عملتله ايه زعلته فى ايه
اكرم / اهدى يا حبيبتي هو اللى ما يستاهلكيش
مهره تحضن اكرم
مهره / انت احلى حاجه حصلتلى فى حياتى ارجوك ما تمشيش انا و الله مش انانيه بس انا محتاجه لك اوى
اكرم / يا حبيبتي انا عمرى ما هسيبك حتى لو عاوز انا بحبك و مش هقدر ابعد عنك مهره انا بحبك بجد انتى ليه مش قادره تفهمى ده بحبك اكتر من الدنيا كلها مهره ما تعيطيش يا حبيبتي انا مش هسيبك ابدا مهما حصل مفيش حاجه فى الدنيا ممكن تبعدنا عن بعض ما فيش و دا وعد منى يا قلبي بطلى عياط
الباب يتفتح و كارمن تفتح الباب
كارمن / حمد الله على السلامه ... ايه ده !! مالك يا مهره
مهره تتعدل و تمسح دموعها
اكرم / كانت بتتكلم عن باباها... انتى كنتى فين مش عارفه اننا جايين
كارمن / الطريق كان زحمه و الله غير كدا كان زمانى هنا قبلكوا انا مشيت من ساعه ما طمنتنى انكوا وصلتوا المطار
اكرم / حصل خير
كارمن / حمد الله على سلامتكوا انا اعصابى تعبت جدا امبارح الحمد لله انكوا روحتوا على طول ... بقولك يا مهره ليا صديقه معده فى برنامج يحدث على الساحه عاوزه تستضيفك تحكى اللى حصل ليكي و لنجاه و تتكلمى عن التجربه ايه رايك
اكرم / احنا فى ايه و لا فى ايه
كارمن / الدنيا كلها ما لهاش سيره غير البنت اللى اتخطفت دى و ازاى اتخطفت و ليه و الهجوم اللى حصل على أهلها فى بلدهم انت عارف عدد الضحايا كام غير المصابين
اكرم / هو الاكل اتاخر ليه انا جعت
اكرم يسيب المكان و يمشي
كارمن / البرنامج لسه الساعه تسعه بالليل يعني تاكلى و ترتاحى شويه و الساعه سبعه نتحرك من هنا نروح تعملى اللقاء و ترجعى تكملى نوم ايه رايك
مهره / هقول ايه بس
كارمن / قولى الحقيقه يا حبيبتي قولى اللى حسيتي بيه و اوصفى مشاعرك و انا هبقي جنبك ما تقلقيش
مهره / هو حضرتك هتيجي معايا
كارمن/ طبعا و هبقي جنبك طول الوقت امال هسيبك لوحدك يعني
مهره / مش عارفه
كارمن / ما تفكريش فى حاجه دلوقت كلى و ارتاحى ساعتين و انا كدا كدا اشتريت ليكي طقم جديد انما ايه خرافه مش عوزاكى تفكرى فى اى حاجه ماما يا قلبي هتهتم بكل حاجه
مهره / تمام
.......................
فى اوضه نجاه
نجاه قاعده و ضامه ركبها على صدرها فى ركن و رايحه فى النوم و سانده راسها على الحيطه
صوت جوزيف / الضهر هيفوتك كدا
نجاه تفوق
جوزيف / فاضل نص ساعه على اذان العصر انتى ما صليتيش الضهر انا بخلى مسؤليتي لو عليا اسيبك نايمه انا كدا كدا مش شايف اى لازمه للى بتعمليه بس راحتك تهمنى
نجاه تقوم و تروح الحمام و تقفل بالمرتبه
جوزيف/ هو انا مش عاوز اتكلم فى الموضوع ده دلوقت بس يا ريت و انتى بتصلى تدعى ربنا انك تخرجى من عندك و انى اسيبك تمشي من غير ما اخد اللى انا عاوزه ... بس انا مش عارف ينفع تحددى المده و لا لا خلينا نشوف كدا هيعمل ايه
نجاه تطلع من الحمام تفرش السجاده و تعلى صوتها
نجاه / و لا يحسبن الذين كفروا انما نملى لهم خير لأنفسهم انما نملى لهم ليزدادوا إثما و لهم عذاب مهين
جوزيف / دى زى و يمدهم فى طغيانهم يعمهون
نجاه / و ما دام انت عارف كل حاجه كدا ما تقول لنفسك و لا انت كالحمار يحمل اسفارا
جوزيف / صلى صلى قبل ما الاذان ياذن
نجاه / هو انا مش هشوفك هتفضل مستخبى كدا كتير
جوزيف / كنتى فلحتى مع بابلو اوى عشان اجيلك يا اختى اتوكسي
نجاه / طب ما تديني بنطلون و نجرب تانى
جوزيف/ صلى عشان عاوزين نتكلم
نجاه تعدل السجاده و تصلى
.......................
فى عربيه سايقها صابر
تليفونه يرن يحط الايربودز و يرد
صابر / السلام عليكم
جابر / دى اصول تنيمنى و تنزل انت فين اجيلك
صابر/ انا راجعلك انا لفيت البلد كلها و مفيش كلب واحد بيشمشم ورايا حتى
جابر / و همام
صابر / شرحه مفيش حد معبرنا يا جدع تقولش رموا طوبتنا على العموم انا راجع اصلا اهو مسافه السكه و اجيلك
جابر / تمام تعال انا مستنيك
صابر يشيل الايربودز و يسوق و هو مخنوق
.........................
تحت الشجره فى البلد
فارس يروح يقعد جنب عباده و يناوله ساندوتش عباده يزق ايده
فارس / ما حضرتك لازم تاكل حاجه و لازم ترتاح هى محتاجالك واقف و بصحتك
عباده باصص فى الارض و ساكت
فارس / يابا انا مقدر حزنك و زعلك و انا كمان و الله مقهور و بتقطع من جوايا بس دا مش حل
عباده / اخوك فين
فارس / بينضف البلد مع الناس
عباده / روح ساعده و اقف جنبه انا مش قادر اقف و لا اعمل حاجه املوا مكانى و مكان اختكوا
فارس / طب قوم ارتاح فى المستشفي جوه حضرتك قاعد كدا من امبارح
عباده / منظر الناس فى المستشفي بيوجع قلبي خليني منسي هنا
فارس / لا يابا مش منسي احنا اللى مانعين الناس تقرب منك قوم بالله عليك انا محتاجك ... البلد كلها محتاجة لك قوم بالله عليك
عباده / ابوك اتكسر خلاص يا فارس ... مش هتقومله قومه تانى
فارس / بعد الشر عنك يابا طب بص اتسند عليا و ما حدش هياخد باله كانك حاضنى عادى و انا هسندك لحد العربيه ... هروحك البيت و ارتاح فى المضيفه و مش هنخلى اى حد يزعجك ... طب هقرب العربيه هخليها جنبك هنا خالص ماشي
عباده يبص لابنه
فارس / اجمد ابوس ايدك ... عشان خاطر نوجه
عباده يكتم وجعه جواه و يبص للسما يمنع دموعه
فارس / هجيب العربيه جنبك هنا حالا هجيك
فارس يروح بعيد
عباده / القوه من عندك يا رب القوه و الصبر
..........................
فى اوضه نجاه
نجاه بتصلى
صوت جوزيف / انتى بتصلى تراويح ... دا انهى صلاه دى اللى من الضهر للمغرب يعني و العشا فاضلها ربع ساعه و تاذن انتى بتخترعى دين جديد
نجاه تكمل صلاه
جوزيف / عاوز اتكلم معاكى ما تخلينيش اقلب عليكي قلبتى وحشه و مش هتعجبك
نجاه تكمل صلاه
جوزيف / مش عاوزه تكلمى ابوكى
نجاه تخرج عن خشوعها و ترتبك و تحاول تكمل الركعه و تختم صلاتها و تسلم
جوزيف / شوفتى بقي انا حافظك ازاى و عارف مفاتيحك كلها
نجاه / عاوزه اكلم ابويا
جوزيف / هتقوليله ايه
نجاه/ هقوله انى بخير هقوله ان الصور متفبركه
جوزيف/ لا الصور حقيقيه مش مفبركه انا ما عملتش حاجه اكتر من الصور دى حاجه تانيه انما الصور اكيد مهندسين الشركه راجعوها مليون مره و اتاكدوا انها حقيقيه مليون فى الميه
نجاه / هقوله كدا
جوزيف / طب ما انا لو عاوزه يعرف عملت كدا ليه من الاول
نجاه / طب انت حابسني هنا ليه اخرتها ايه
جوزيف/ اقعدى نتكلم
نجاه تقعد و تنفخ
جوزيف / الكوكب ده بقي ... مراحيض عموميه ... كل الناس وحشه حرفيا
نجاه / شوفوا مين بيتكلم
جوزيف / هو اللى بينفذ حكم الاعدام ... راجل شرير
صمت
جوزيف / مش شرير هو بينفذ الحكم اللى صدر بناء على ... تعليمات رؤساءه بناء على ... الجرايم اللى ارتكبها فى حق نفسه و حق البشريه
نجاه / طب ما تقول لنفسك قبل ما يجي دورك
جوزيف / بالظبط انا لازم انفذ التعليمات عشان لما يجي دورى ما اكونش مقصر و اتعدم انا كمان
نجاه / و انت ما لكش مخ يقولك الصح من الغلط
جوزيف / العواطف ما لهاش مكان فى حياتنا
نجاه/ و ايه هى تعليماتك بقي
جوزيف / انتى
نجاه / ما تنفذ و تقتلنى و تخلص
جوزيف / تبقي الكبيره تحكمى البلد
نجاه / و اسيادك دول فاكرين انى لما هبقي الكبيره هبقي كلبه عندهم مثلا همشي على كيفهم دا انا بنت ابويا بالظبط و اقولك حاجه انا اللعن منه مليون مره انا هخليكوا تتمنوا يوم من ايام عباده الزيني مش هسيب فيكوا شنب يجرؤ يتنفس حتى
جوزيف / و هو المطلوب اثباته و عشان تقدرى تعملى الكلام ده انا اللى همرنك انا اللى هخليكي اقوى من ابوكى مليون مره و هديكي السلاح و الرجاله و الفلوس و كل اللى هتحتاجيه
نجاه / عشان احارب بيها اللى مشغلينك ؟!
جوزيف / عشان تعدلى المايل ... عشان تضمنى مستقبل احسن للاجيال الجايه
نجاه / ما هو ده مش هيحصل طول ما انت و اللى زيك على وش الدنيا دى
جوزيف / كنتى بتتفرجى على كارتون و انتى صغيره
نجاه / لا بس اسمع حاجات عادى ليه
جوزيف / فى الكارتون بيجيبوا الشرير شكله وحش و صوته طخين و جسمه ضخم و شكله مرعب بيقولك منظمات الشر و الظلام بيقولك ان الشرير هيجي يقولك انا الشرير و تعال انصر معايا الشر بس الحقيقه ان الشرير هيجيلك شكله حلو جدا و صوته ناعم جدا و يقولك
نجاه / اعدلى المايله يا نجاه ... انت بتوصف نفسك بالظبط
جوزيف يضحك
جوزيف / ما انا مش الوحش الوحيد حواليكي ... الفتره اللى فاتت فى رجاله كتير اختفوا من البلد
نجاه تسكت و تنتبه
جوزيف / انا و امايا قتلناهم ... عارفه ليه
نجاه / ليه
جوزيف / عشان فتحوا لينك الفايروس بتاع ياسمينا عشان عاملين صعايده و مسلمين و اهل بلد و نخوه و هم فى الضلمه كل اللى بيعملوه انهم يحاولوا يعروكى و ينتهكوا حرمتك و يكشفوا عورتك ... انا اللى صممت الفايروس و انا اللى قتلت تيم و هيا و انا اللى قتلت حماده اللى اغتصب سحر و انا اللى قتلت متين الف حيوان حاول يعرى ياسمينا و يتفرج على جسمها ... مين الشرير انا و لا تيم و لا حماده و لا المتين الف راجل دول
نجاه تسكت
جوزيف / انا عالجتك و وفرتلك كل حاجه عشان تخفى بما فيهم هيلجا انا اللى دليت ابوكى على اشطر اطباء العالم و انا اللى وفرتله احدث الاجهزه باقل سعر و انا اللى سهلتله كل الاجراءات بره مصر عشان يعالجك ... انا كان ممكن اطلعلك من كل خرابه عفريت كان ممكن اعجزك للابد او اقتلك حتى او حتى افجر اهلك كلهم و ما اسيبش فيهم حد بيتنفس بس انا مش عدوك انا صديقك و عاوز مصلحتك
نجاه / و انا مصدقاك
جوزيف / ابوكى و اهلك بيمشوا بدماغهم اللى اتربوا عليها و للاسف زمنها انتهى ... و عندهم مخليهم بالرغم من كل الاشارات اللى قدمتها لسه ماشيين على الطريق القديم امتى هيفهموا انهم بالطريقه دى عمرهم ما هيكسبوا هيموتوا كلهم واحد ورا التانى ... احنا محتاجين دماغ جديده و شابه ... همام مثلا بقي كبير اسكندريه ... قوى بس غبى ... جابر هيبقي كبير الصعيد ... برده غبى
نجاه / انت ما تقدرش تقف قصاد جابر خمس ثوانى
جوزيف يضحك
نجاه / بس انت مش راجل انت بتضرب فى الضهر و تجرى
جوزيف / و دا سبب مهم يخليني سابق جابر دايما باميال مش بخطوه واحده حتى
نجاه / و انت عاوز كل الناس تبقي زيك
جوزيف / انا ما حدش زيي و لا حد يقدر يبقي زيي انا ما وصلتش للى انا فيه بالساهل ... زى ما بتقولوا انا جايبها من تحت اوى
نجاه / ماشي... و اخرتها ايه برده  .. ايه المطلوب منى
جوزيف / نتجوز
نجاه / يا ابنى فوق لنفسك انا و انت عمرنا ما هينفع نتجوز دا بغض النظر انى لا بحبك و لا بطيق اسمك حتى انت ملحد عارف يعني ايه ملحد
جوزيف / ما انا اسلمت عشانك المره اللى فاتت مش قولتلك اشهد ان لا اله الا الله
نجاه / بس كدا
جوزيف / يا بنتى فوقى انتى بلدك اصلا مليانه ناس كتير زيي حتى اشهد ان لا اله الا الله ما جاش عليهم يوم و قالوها حتى فى وسط الكلام كل علاقتهم بالاسلام انهم اتولدوا لاهل مسلمين و اهاليهم المسلمين كانوا كدا برده ما بيصلوش غير الجمعه دا لو راحوا بس عشان الناس تشوفهم بيصلوا و بيكدبوا و يسرقوا و ينصبوا و ما يعرفوش عن الاسلام غير اسمه ... دى تصرفات مسلمين دا لبس مسلمات لو جالك حد منهم يتقدملك مش هتطيرى من الفرح لانه جاهز كام بنت بتسال اللى هتتجوزه ان كان بيصلى و لا لا بكره يتغير بكره ربنا يهديه طب ما انا كمان ممكن اتغير و يمكن ربنا يهديني مش يمكن
نجاه / اللى انت مش مؤمن بيه اصلا اللى بتتحداه بكل بجاحه و فجور و تقول وريني هيخرجك من هنا ازاى
جوزيف / الصلاه كبيرها اربع ركعات انتى بقي بتصلى ايه
نجاه / دى حاجه بيني و بين ربنا انت مالك
جوزيف / طب علميني مش يمكن ربنا يهديني
نجاه / انت مش صغير انت واحد ما لوش زي مستنيني انا اعلمه ايه ما تقدرش تفتح النت و لا تقرا كتاب و لا حتى تفكر بعقلك
جوزيف / مش يمكن المسلمين اللى قابلتهم ادونى انطباع غلط
نجاه / انت عاوز منى ايه بجد
جوزيف / انتى ما اتجوزتيش جابر ليه كل السنين دى مع انه مسلم و بيصلى و عامل نفسه جزمه تحت رجليكى
نجاه / اسمها شاريني و شارى خاطرى جابر ما بيطاطيش لحد
جوزيف / و بتتحمقى عشانه كل ما اقل منه
نجاه / عندنا مثل بيقول انا و اخويا على ابن عمى و انا و ابن عمى على الغريب تخيل انت بقي انا و اخويا هنبقي ازاى على الغريب
جوزيف / تفتكرى لو سبتك تمشي بعد ما شاف صورك بقميص النوم فى حضنى هيعمل فيكي ايه هيبصلك نفس البصه
نجاه / ما تيجي نجرب
جوزيف يضحك
نجاه / خايف ؟ عارف انه هيغطيني و يسترنى عارف ان عمره ما هيديني ضهره بالعكس  ... العشا اذنت صح
جوزيف / ايوه
نجاه / هقوم اصلى بدل الكلام الاهبل ده ... بقولك ... انا مش متعوده اعرق فى لبسي فلو هفضل هنا هات لبس عدل عشان ما اتخلقش عليك
جوزيف / تعرفى انك اكتر شخصيه عسل انا قابلتها فى حياتى
نجاه / نبقي نشوف الموضوع ده بعدين ... عاوزه غيارات و عاوزه بنطلون عشان بخاف اتعرى و انا نايمه فمش باخد راحتى فى النوم و عاوزه اسدال كمان غير ده و عاوزه صابون غسيل انا هبقي اشطفهم على ايدي و عاوزه ... انت بتكتب و لا بتاخدنى على قد عقلى و مش هتجيب حاجه
جوزيف يضحك
نجاه / و عاوزه ستاره انا مش كل شويه هشيل المرتبه و اه المرتبه دى عاوزه فرش انا ما ينفعش انام عليها كدا بقرف لازم اغير الملايه كل يوم
جوزيف / حاجه تانى
نجاه / اه و عاوزه فيامين د ما دام مش هشوف الشمس
جوزيف / عنيا حاضر ... اى حاجه تانى
نجاه/ انا طلبت اكلم ابويا و انت رفضت خلاص مش عاوزه منك حاجه
جوزيف / امال لسته الطلبات دى تسميها ايه
نجاه / حقوق الاسرى
جوزيف يضحك نجاه تقوم تشيل المرتبه و تدخل الحمام
.........................
فى اوضه اكرم
كارمن / انا مش فاهمه انت ايه اللى مضايقك البنت مرت بتجربه و واجهتها بشجاعه و القضيه دى قضيه راى عام و طبيعي الناس هتسال و بعدين ما تشوف التفاعل على الحلقه عامل ازاى
اكرم / و التفاعل ده فى مصلحتها و لا مصلحتك
كارمن / بنتى بطله و من حقى افكر فى مستقبلها مهره شخصيه متحدثه و لبقه و ممكن جدا يكون ليها مستقبل فى الكوادر الشابه فى الحكومه انا بمهدلها الطريق
اكرم / هى مش زيك
كارمن / و اكيد مش زى ابوها
اكرم / ما ليش دعوه بيه هى عايشه معانا احنا مهره ما ينفعش تشتغل فى السياسه عشان هى حقانيه و ما لهاش فى الحلول الوسط و لا بتعرف تمشي أمورها لو اخدتيها فى السكه دى هتضرك اكتر ما هتفيدك
كارمن / هتتعلم كلنا و احنا صغيرين كنا كدا و مع الوقت بقينا مرنين اكتر و اتعلمنا ادعمنى انت بس هى بتسمعلك و ليك تاثير كبير عليها اتكلم معاها
اكرم / اتكلم فى ايه اقولها ايه
كارمن / خلاص خلاص بص سيب الدنيا تمشي لوحدها و اللى ليها نصيب فيه هيحصل
اكرم يبص الناحيه التانيه و يقوم
اكرم/ انا هنزل اتكلم معاها
كارمن / قولها انها كانت رائعه فى الحلقه النهرده و ردود الافعال مبهره
اكرم يتنهد و يخرج و يقفل الباب وراه يلاقي مهره واقفه بعيد
مهره / انا كنت جايه ارجع لماما الجولرى بتاعتها 
اكرم يبتسم مهره تخبط على مامتها و تدخل تلاقيها بتمسح مكياجها تشوفها فى المرايه تلفلها
كارمن / حبيبه قلبي ... كنتى هايله النهرده
مهره / شكرا ...اتفضلى الكوليه بتاع حضرتك
كارمن / حبيبتي مستعجله على ايه خليهملك
مهره / لا شكرا
كارمن / من شويه فى قناه تانيه كلمتنى عاوزه تعمل معاكى انترفيو تانى بكره
مهره / ليه ما انا قولت كل حاجه
كارمن / و ماله يا قلبي ما اللى ما شافش ده هيشوف ده و بعدين عاوزه اقولك ان معالى وزير الشباب و الرياضه اتصل بيا شخصيا عاوزنا نروحله مكتبه
مهره تبص لاكرم باصص الناحيه التانيه
كارمن / طبعا انتى عارفه ان مقابله زى دى هتفرق معاكى فى حياتك ازاى
مهره / ازاى
كارمن تضحك
كارمن / انتى هتفضلى نونو كدا لحد امتى روحى بس انتى ارتاحى دلوقت و بكره باذن الله نرتب مع بعض كل حاجه ... تمام يا قلبي
مهره تهز راسها و تطلع بره اكرم يقفل الباب
مهره / انا مش فاهمه حاجه
اكرم يقرب و يبوس راسها و يتنهد و هو ماسك وشها بين ايديه و هى بصاله
اكرم / انا عاوزك تعرفى انى فى صفك مهما كان و قصاد مين
مهره تبتسم
اكرم / مامتك عوزاكى تمشي معاها فى سكتها السياسيه انا مش هقولك توافقى او لا عشان انا واثق انك اى كان قرارك هو ده الصح و اى كان قرارك انا معاكى
مهره / طب بغض النظر عن ان انا كل قرارتى صح حضرتك رايك ايه
اكرم / رايي انك لو بتلفى طعميه فى ورق جرايد هتبدعى
مهره تبتسم
اكرم / روحى يا قلبي نامى و ارتاحى و ما تفكريش فى اى حاجه
مهره / ماشي ... تصبح على خير
اكرم / و انتى الخير كله يا قلبى
مهره تمشي و اكرم متابعها كارمن تطلع من الاوضه
كارمن / حبيبي انت واقف هنا !! مش هتيجي تنام
اكرم يبصلها
كارمن / ايه يا حبيبي مالك
اكرم / هو انتى سعيده معايا يا كارمن
كارمن / طبعا يا قلبي ايه السؤال ده
اكرم / اصل انا مش سعيد
كارمن / ليه بتقول كدا
اكرم / انتى شايفه ده بيت اصلا احنا حتى لقمه فين و فين لما صدفه بنتجمع ناكلها سوا
كارمن / يا حبيبي البنات كبروا و بقي ليهم حياتهم و انا و انت اشغالنا وخدانا و دا طبيعى و بيحصل فى كل حته فى الدنيا طب دا حتى بره اللى فى سن بناتنا بياخدوا بيوت بره لوحدهم و ينفصلوا عن اهلهم خالص
اكرم / معاكى حق
كارمن / انت مريت بيوم صعب اوى امبارح و ما ارتاحتش و اكيد ده ماثر عليك ... حاول تهدى و ما تخليش الشيطان ينكد عليك حياتك ... حبيبي انت عندك كل حاجه ممكن تخليك سعيد
اكرم / الحمد لله
كارمن / ارتاح و انا متاكده انك الصبح هتصحى ناسي كل الكلام ده
اكرم / الا احنا اخر مره نمنا مع بعض امتى
كارمن تضحك
كارمن / هو ده بقي اللى مضايقك ... طب يا سيدي و لا تزعل نفسك ادينى ربع ساعه هدخل اخد دوش سريع و اللبسلك حاجه حلوه و اجيلك
اكرم / سبحان الله غريبه يعني ايه ما فيش جلسات الصبح و لا مؤتمرات و لا مواعيد مهمه
كارمن / و الله فى بس انا مش عوزاك مضايق كدا ... اكرم انا بحبك
اكرم يبتسم
كارمن / مش هطول اوعى تنام
كارمن تروح الحمام و اكرم ينفخ
…………………..
فى اوضه نجاه
نجاه رايحه فى النوم فى جنب الباب يتفتح و بابلو يدخل شايل كيس يطلع منه بنطلون يحدفه على نجاه تتفزع و تقوم تقف بسرعه بابلو يرمى باقي الكيس جنب الحيطه
بابلو / جوزيف باعتلك بنطلون اما نشوف هتطلعى تستاهلى كل التعب ده و لا فستك
نجاه تروح ناحيه الحمام تلاقى بابلو رايح وراها
نجاه / انت جاى معايا و لا ايه
بابلو / و انتى فاكره انى هديكي فرصه حتى تلبسي البنطلون دا انتى ساذجه اوى
بابلو يجى يضرب نجاه بالرجل تسحب بعيد ينزل برجله على الارض
نجاه / ما انا برده قولت الواطين اللى زيك مستحيل يلعبوها فاير
بابلو / دورك و لا انتى كلام و بس
نجاه تقرب و ترجع بخفه و استفزاز و هى بتنط على صوابعا و واخده وضع الاستعداد
نجاه / لا و انت الصادق انا واحده بتشوف اخرك انت كدا كدا عمرك ما هتاذيني لان سيدك عاوزنى عايشه انما انت ما لكش ديه فار تجارب .. زى الكتكوته اللى ماتت هنا دى ... فاكرها
بابلو / طب ما تورينى حلاوتك و لا مستنيه ابص الناحيه التانيه زى المره اللى فاتت
نجاه / شكلك انت اللى بتاع كلام و بس ما تنجز نفسك عاوزه افطر
بابلو / انتى لسه لابسه الانجيرى الاحمر تحت ده
نجاه / مؤقتا لحد ما لبسهولك ان شاء الله
بابلو / للاسف مش مقاسي
نجاه / طب جرب ده كدا
نجاه تحدف البنطلون و تضربه دبل كيك تحدفه فى وش بابلو بابلو يصده تكون هى اتزحلقت و ضربت رجله من تحت قلبته على ضهره و قامت تجرى تروح تجيب البنطلون و هى بتضحك بابلو ينط يقف
صوت جوزيف / نوجه واحد صفر
نجاه / اهلا ... على الريق كدا مفيش فطار حتى
جوزيف / مزاجك رايق حلمتى حلم حلو و لا ايه
نجاه / اه حلمت انك متعلق بحبل من رقبتك و بترفص فى الهوا مش لاقى اللى ينزلك
جوزيف / من صغرى بحب المراجيح
نجاه / طب ما تيجي و انا امرجحك
بابلو يحاول يكعبل نجاه بنفس طريقتها تنط و تتشقلب لورا على ايديها و تنزل واقفه بعيد 
جوزيف / اتنين لنوجه
بابلو / انت بتحابيلها دى ما لمستنيش حتى
جوزيف / ام عيالى بقي اعمل ايه
بابلو / لا لو كدا نعديها
بابلو يقلع قميصه و يفضل بالبنطلون
نجاه / كدا بقيت اقوى و اسرع يعني و لا ايه مش فاهمه
بابلو / جربيها هتحسي بالفرق
نجاه / مش كل اللحم رخيص يا ... و انت هتعرف منين صحيح
بابلو يقرب بالراحه و نجاه بتحافظ على المسافه بينهم
جوزيف / انا بزهق بسرعه
بابلو / صاحبتك جبانه اعملها ايه
جوزيف / خليني اساعدك عشان تعرف انك برده حبيبي
جوزيف يشغل رشاشات الحريق نجاه تتشتت و تغرق و تحتاس فى هدومها بابلو يهجم فجاه و يجيبها فى الارض و ينزل فيها بوكسات و هى قافله وشها بايديها المايه تقف بابلو يقوم و نجاه ماسكه ايديها بيوجعوها و بتتالم تقوم تقعد بابلو يروح يشد قميصه و يمشي و الباب يتقفل و نجاه تتعصب
جوزيف / انا ضعت فى العد بس الاكيد ان بابلو كسب تانى و لنفس السبب لبسك
نجاه / و دى حاجه عمرى ما هغيرها لو هموت مستوره اكرملى مليون مره من انى اعيش زيكوا
جوزيف / الكيس فيه غيار ناشف غيرى قبل ما تعيي و خليكي فى الحمام عشان هنشف الاوضه
نجاه / و اخرتها يعني فاكر انك هتوصل لايه بكل اللى بتعمله ده يعني قولى
جوزيف / المفروض تكونى فهمتى و مع الوقت هتتاكدى انى مش جايبك ائذيكي انا جايبك امرنك و اعمل منك حاجه ما حصلتش
نجاه / فكك منى انا مش هتغير انا لو على موتى مش هتعرى لحد فوق بقي
جوزيف / روحى غيرى لتعيي
نجاه / ما لكش فيه خليك فى حالك
جوزيف / انتى حالى
نجاه / ابو شكلك فاكرنى ايه ايه القرف ده
نجاه تروح تمسك المصحف غرقان
نجاه / عاجبك كدا حسبي الله و نعم الوكيل فيك غبى
نجاه تبوسه و تحطه مكانه و تاخد المرتبه تقفل بيها باب الحمام جوزيف يرفع درجه حراره الاوضه و يقلل الدرجه فى الحمام
جوزيف / عندى سؤال ... الباب كان طول الوقت مفتوح ليه ما حاولتيش تخرجى و لا ما اخدتيش بالك اصلا
صوت نجاه / ما بجريش ورا سراب انا عارفه انكوا مش هبل و هتسيبوا الباب مفتوح كدا ببساطه
جوزيف / مش يمكن ضيعتي على نفسك فرصه ممتازه للهرب
نجاه / لو كان فيها الخير كانت حصلت انا ما ببصش ورايا
جوزيف / اللبس جه مقاسك
نجاه / خليك فى حالك
جوزيف / يا بت ما قولتلك انتى حالى يعني بعد كل الصبر و الصرف و المجهود ده لسه مش مصدقانى
نجاه / اشمعن انا صحيح
جوزيف / شبهى
نجاه/ موهوم انا مفييش ذره منك
جوزيف / لا فيكي كتير و لما تعاشريني هتتاكدى ... ها ايه رايك فى الهدوم
نجاه / ما تخرس بقي ايه الصداع ده على الصبح
جوزيف / اخرس !!! لا دا احنا نشوف الصداع الحقيقي بقي و وريني هتركزى فى قران او صلاه ازاى
جوزيف يشغل اغانى و يرفع الصوت
........................