الكبيره ٢ بقلم / لولو_محمد

الحلقه ٣٦

((((((( الكبيره ٢ ))))))))
#لولو_محمد
الحلقه ٣٦
مروان / قولى الصدق رامى ضايقك فى حاجه عمل اى حاجه تقل منك او منى
مهره / ابدا ابدا و الله بالعكس انا بس اكيد هرتاح اكتر مع بابا... و لا ايه
مروان / كنت ارتحت يا اختى و اشتغلت معاه ... انتى عارفه الشغل مع بابا عباره عن ايه عن ان اعفن موظف عنده يقدر يحط عليكي و يهينك و يروح يتبلى عليكي انك معطله مصالح الشغل او بتلعبى فى الدفاتر او يلبسك اى مصيبه و مش عارف هتصدقيها ازاى ... ابوكى هيصدقه و يمسح باللى باقي من كرامتك الارض قدامهم و تبقي هفيه و ملطشه الشركه قدام اللى يسوى و اللى ميسواش و احلفى بقي على المايه تجمد ان الحيوان التانى كداب ... يا بنتى احنا لو لقينا على الرصيف فى الشارع هيحن علينا اكتر من كدا انتى عارفه ليه ايلين هى اللى على الحجر
مهره / ليه
مروان / عشان بتقول حاضر و نعم طول الوقت كلى ده كلمى دى صاحبى دى دى اتخطبت و فسخت بامر من بابا و لعلمك هى مش فارق معاها قالها اسهمه عاليه فى البرصه جوزى و حبيبي و ضهرى و سندى الاسهم وقعت غور ياض بلا قرف بنت ابوها اوى
مهره / و مامتك عاجبها الوضع
مروان / لا ما هى مامى نفس المدرسه ما يفرقش معاها غير ان حسابها فى البنك يبقي مليان و صحباتها ينبهروا كل مره يشوفوها فيها بالجيوليرى الجديده و الاوتفيت الجنان البراند اللى هى جيباه مخصوص من باغى ... سورى يعني ... هى لو امى عدله كان بص لامك ... انا ما اقصدش اى تقليل من طنط كارمن انا بقصد
مهره / هو يعنى اختار ماما فى الاخر ما هو رمانى و اختاركوا
.............................
مروان/ اختار البيزنيس صدقيني لو كان يقدر يجمع بين الاتنين كان جمع بس لما اضطر يختار اختار الكفه الاتقل مش حوار اولاد و قرف احنا بالنسباله مشاريع زى الشغل بالظبط فى منها اللى بيجيب ارباح كويسه و فى منها ... الخسرانه
مروان يشاور عليه هو و مهره
مهره / انا لازم امشي ... عن اذنك
مروان/ استنى هوصلك ... ما تضيقيش نفسك من كلامى ... انا بس حاسس بيكي و خايف تحلمى و ترسمى فى خيالك حاجات و ترجعى تتصدمى تانى بالواقع الزفت اللى عايشين فيه ... مش عايزك تعيشي اللى عشته ... مش هتستحملى
عنين مروان تتملى دموع يحاول يداريها مهره تحضن مروان يطبطب عليها
مروان / يلا يلا عشان ما تتاخريش يلا
مهره تهز راسها و تروح تجيب شنطتها
.........................
فى اوضه نسمه
نسمه قاعده مع ست
نسمه / بحاول اعديلها ما انا واخده على تصرفاتها بس ... كل يوم الحال اصعب من اللى قبله و اللى كان بيطيب بخاطرى راح
الست / ابوكى بيقولك لمى حاجتك و حاجه عيالك و تيجي تعيشي معانا بس انا مش موافقه دا بيتك و بيت عيالك لو حد يمشي يبقي هى
نسمه / ما اقدرش اطردها من بيت ابنها
الست / ابنها مات الله يرحمه و بعدين ورث الجزار مش شويه يتقسم و كل واحد ياخد حقه بشرع الله
نسمه / ورث ايه ياما هو لحق ما يصحش الكلام فى الحاجات دى
الست / مش انا يا اختى اللى بتكلم دى البلد كلها ما لهاش سيره غير شوفوا سبحان الله رعد يموت الاول عشان عبده يورث و فى الاخر كل ده يروح لبنت عويس
نسمه / انا ما اخدتش حاجه كل ده لولاد الجزار عيال عبد الهادى انا ما خدتش جنيه فى ايدي
الست / و فى كلام تانى بيتقال و هيتقال ... القديم هيتفتح و مش هنعرف نسده عشان كدا انا جيالك فى حوار بينا و بين بعض
نسمه / مش فاهمه
الست / قعادك من غير جواز هيفتح سكه للى ما يتسمى يتجرا و الحكايه مش خالصه دا هو اللى قتل رعد و بيقولوا هو اللى قتل عبده كمان الناس هتقول رتب معاكى كل ده عشان الحب القديم
نسمه / انتى بتقولى ايه ياما
الست / مش انا اللى بقول ... الناس ... و انتى صغيره و حلوه و زاد على حلاوتك حلاوه الفلوس و الارض
نسمه / صابر مش فقير و لا غلبان دا كبير الجبل و عنده دهب و خير كتير ياما
الست / و انتى عرفتى منين الكلام ده يا ست البنات
نسمه / و مين ما يعرفش خير الجبل و اللى بيطلع منه امال الناس دى بترمى نفسها تحت رجليه ليه من بعد ابوه الله يرحمه صابر مش محتاج ورث الجزار صابر لو كان عاوز يوصلى بالطريقه دى كان قتل عبد الهادى من زمان و ما كانش حد قدر يمنعه
الست / الراجل ما بردش و انتى ما شاء الله بتقولى شعر فى صابر شوفتى بقي ان معايا حق
نسمه/ حرام عليكي دا انا ما صدقت جيتي اشكيلك همى تحطى همين فوق همى ليه كدا ياما دا انا بنتك
الست / و عشان بنتى عاوزه مصلحتك يا بنتى انتى مش سمعتى كلامى و اتجوزتى عبده و شالك فى عنيه هو اه قفش مع ابوكى بس كلو من ورا الحيزابونه اللى بره دى و ابنها ... اصره مش عاوزين نفتح فى اللى فات يلا ربنا يرحم الجميع
نسمه / ربنا يرحمهم
الست / دلوقت انتى و الست دى مش طايقين بعض و دى حاجه احنا واخدين عليها بس الاول عبده كان بيطبطب و يدادى دلوقت انتى قصادها بطولك و مش بس كدا خيرك و خير عيالك تحت ايدها هى و اهل جوزك اللى ما استنوش جته الراجل تبرد و لا حقه يرجع و نزلوا قعدوا فى الارض و اتملكوا و اتحكموا و البجاحه مقويه قلوبهم و معليه صوتهم
نسمه / ايه الكلام ده
الست / ابوكى نزل امبارح يبص على الدنيا و يطمن ... خاف الفلاحين ما يلاقوش لا ظابط و لا رابط يبهدلوا الدنيا الناس ما عادش عندها ضمير قوم ايه عم جوزك يقابله و يطرده و يقوله ارضنا احنا اولى بيها لو فاضي روح شوف ارضك
نسمه تبص فى الارض و تسكت
الست / الناس دى لازم معاهم وقفه و انتى هنا بطولك ما ينفعش يتكاتروا عليكي يا بنتى و يمضوكى على حقك و حق عيالك و لا يخلصوا عليكي و لا حد هيحس بيكي
نسمه / خير ياما ... انتى كنتى جايه ليه
الست / جايه اطمن عليكي يا ضنايا
نسمه/ و انتوا بقى شايفين المفروض اعمل ايه فى اللى انا فيه
الست / تتجوزى
نسمه تبص للارض بخزلان و تعب و حزن
نسمه / اتجوز خبط لزق كدا !! دا انا حتى عدتى ما خلصتش
الست / و حد يقدر يخالف شرع ربنا اول ما العده تخلص تكتبى على ابن عمك فراس راجل طول بعرض و له عزوه يقف ليكي و لولادك و يرجع حقكوا انتى لا هتقدرى تديرى مالك و لا تاخدى بالك من ارض عيالك على ما يكبروا هيكونوا الفلاحين كلوا خير الارض و بوروها اسمعى كلامى تكسبي
نسمه / انا هقوم اعلق على الاكل شويه و العيال هيجوعوا اعملك حاجه ؟
الست / فكرى فى كلامى يا نسمه
نسمه تبتسم بحزن و تقوم الست تتنهد
.......................
فى اوضه نجاه
نجاه قاعده على الشباك بتتكلم فى التليفون
نجاه/ يعني شاهين بخير
عباده / بخير ما تشغليش بالك باللى بيحصل هنا كل حاجه تحت السيطره
نجاه / مش عاوزه اقول كدا بس الغلط لما ما بيتقومش و هو صغير بيكبر مع صاحبه
صمت
نجاه / الله يعينه خالى ... ايه اللى هيحصل دلوقت
عباده / و لا حاجه
نجاه / طب مراته و ابنه
عباده / مالهم عادى عايشين فى بيتهم معززين مكرمين ما لهمش دخل بحاجه
نجاه / ازاى يعنى
عباده / زى الناس الغلطان يتعاقب الباقي ما لوش دعوه
نجاه / و هتعاقبوه ازاى بقي المرادى
عباده / اطرد طرده الكلاب من البلد هتعوزى اكتر من كدا ايه عقاب
نجاه / يعني مش هيرجع تانى ؟
عباده / هيرجع شاهين الملطوط الهيبه راحت العزوه راحت انا لو منه عمرى ما ارجع
نجاه / اقول ايه بس
عباده / ما تقوليش ركزى فى نفسك ... انتى عامله ايه
نجاه/ زهقانه
عباده / اخرجى
نجاه / فكره ممتازه ما جاتش فى بالى ازاى دى
عباده / ههههه بتتمالسي عليا يا بنت الكلب
نجاه / ما عاش و لا كان يا سيدى انا انا بس فعلا مخنوقه اوى و حضرتك كمان واحشنى اوى
تليفون نجاه يرن مهره
نجاه / مهره بتتصل
عباده / طب شوفيها عاوزه ايه ... و لو حبيتى تكلميني تانى انا قاعد هنا
نجاه / تمام فى حفظ الله
نجاه ترد على مهره
نجاه / السلام عليكم
مهره / ازيك بتعملى ايه
نجاه / يا بت ردى السلام ... ما بعملش
مهره / و عليكم السلام ..  عمران كلمك على الباينتبول
نجاه / لا ما كلمنيش فى حاجه باينتبول ايه دى
مهره / دى حرب كدا مسدسات اللوان لما بتضربى حد بتلونيه فبيبان انه انصاب رامى و مروان رايحين فقالوا فى مكان لو احب اجيب حد معايا
نجاه / لا و انتى نشنتنى عليا ضمنتى الفوز يا بنتى انا النشان ده لعبتى
مهره / هههههههههههههههه بس للاسف مفيش مكان غير ليكى بس
نجاه / احسن انا جايه
مهره / هههههههههه بتتكلمى جد
نجاه / قولى بس امتى و انا هظبط ما تقلقيش
مهره / انتى اجمد بنت فى الدنيا اقسم بالله
نجاه تضحك و يكملوا كلام سوا
......................
فى شقه بره البلد
شاهين نايم فى سرير و ابيك بتعالجله وشه
ابيك / تستاهل عشان ما سمعتش كلامى
شاهين / بيدي لا بيد عمرو ... بكره و لا بعده يسامحونى و ارجع ... منصور نفسه ابوه كان نسوانجى و خمورجى و سمعته لسه مسمعه لحد دلوقت و كان بيروح يبات فى فرشته عادى
ابيك / و الرجاله كانوا بيسيبوه يبص لمراتاتهم عادى !!!
شاهين / لا طبعا انتى اتهبلتى و لا ايه كان بيخون مراته مع حريم من بره البلد
ابيك / ااااه ما انا برده بقول  ... انا خلصت ما تقلقش كلها حاجات بسيطه هتفضل وارمه شويه بس مع الوقت مش هتسيب اثر ... حرام الوش الوسيم ده يتشوه عشان لحظه غباوه من صاحبه
شاهين / انا لو اعرف ان المكروباص الغبره ده تبعك ما كنتش ركبته
ابيك / شوفناك طالع تجرى كان لازم ندخل و نلحقك الحق علينا يعنى ..  اكيد ما كنتش اعرف انك غبى و روحت اعترفت لمنصور بالهبل ده و مستنيه يسامحك انت بجد لو مبلبع حاجه مش هتعمل كدا دى مراته يا اهبل شرفه انت رايح تقوله انا عيني فى مراتك و اخر مره سامحنى ما طبيعي يورمهالك كدا
شاهين / الايد اللى توجعنى اقطعها و انتى قليتي معايا قليت معاكى
ابيك / و انا اتاثرت بايه انت اللى خسرت كل حاجه و الطريق الوحيد عشان تصلح اللى عملته هى انك تسمع كلامى يعنى رجعت لنقطه الصفر ... لا انت محتاج مساعدتى عشان ترجع للصفر تانى
شاهين / بيتهيالك زى ما قولتلك هيسامحونى و هرجع و لا كان حاجه حصلت كل الحكايه انى حرقت الكرت اليتيم اللى فى ايدك ضدى
ابيك / و هيبتك وسط اهل البلد مش هتتاثر برده لما يشوفوا عنيك الحلوه دى و هى بتطلع على جسم مرات ابن عمتك بلاش اهل البلد ما حدش فيهم هيتكلم فى وشك حتى لو هيتكلموا من وراك هيخافوا يتكلموا قصادك بس انت كدا تقدر و انت مطمن تنسي خالص حلم انك تبقي كبير العيله مش مهم بناقص مراتك بقي بنت الحاج رضوان كبير السوالمه هتسكت انك واطى اوى كدا هتكمل معاك ابوها هيفضل حاطت ايده فى ايد ابوك و لا هيعاديه عشان خاطر بنته ... يعني حتى الميزه اللى فيك و دعم السوالمه ليك راحت
شاهين / هقول الفيديو متفبرك الوحيد اللى كان يقدر يكشف المستور و ياكد انه اصلى منصور و اخوه و دول فى صفى خلاص ... مساله وقت مش اكتر
ابيك / يا ابنى انت ساذج ازاى كدا فى صفك ازاى عمره ما هيامنلك و لو شافك بتقولها صباح الخير بس هيقتلك هتعيشوا فى بيت واحد ازاى بعد اللى حصل ... انا هسيبك ترتاح و تفكر انا حطالك مسكن فى الدرج لو احتاجته مد ايدك و خد عن اذنك
ابيك تسيبه و تطلع بره يفرد جسمه و بعدين يقعد و يفتح الدرج يلاقى سبايك دهب يمسك واحده و يقلبها فى ايده و يبتسم بسخريه و يرميها مكانها و يقوم و هو ماسك ضهره يروح يبص على وشه فى المرايه الباب يتفتح و يدخل بنتين اجانب حلوين بقمصان نوم شاهين يبلع ريقه
شاهين / من اولها كدا
بنت ١ / we came to help you change
( جينا نساعدك تغير )
بنت ٢ / don’t worry we won’t bite
( ما تخافش مش هنعض )
شاهين يشد ازازه برفان من على التسريحه و يشخط فيهم و هو بيهوش
شاهين / اطلعى بره يا مره منك ليها غوروا جتكوا شوطه ... قبر يلمكوا حريم سعرانه
شاهين يبص حواليه و هو بيدور فى السقف و الحيطان
شاهين / هى الكاميره فين ... فاكرانى اهبل و هقع بالساهل كدا انسي انا صاحيلك يا بنت المركوب انتى
الباب يتفتح و ابيك تدخل
ابيك / كاميره ايه مفيش كاميرات دول بتوع مساج عشان يريحوك
شاهين / راحه ابديه امال
ابيك / يااااه هم زعلوك اوى كدا
شاهين / اسمعى يا وليه انتى انا راجل متجوز واعرف ربنا و لا دهبك و لا نسوانك هيخلونى اخون اهلى
ابيك / حبيبي انت خنتهم خلاص خنت مراتك و خنت اهلك طب هزممك دى برده كانت هتبقي رد فعلك لو اللى دخلت كانت ياسمينا الجمل اللى عنيك كانت هتطلع بره وشك عليها
شاهين / كنت عيل و غلطت و توبت و قصه و انتهت 
ابيك / يعني مش عاوز تتفرج على باقي الفيديوهات ... دا فى فيديو السارى فك منها و اييييييييه ما قولكش
شاهين / انتى كدابه ... انا جبت الفيديو كامل على فلا...
شاهين يسكت فجاه ابيك تبتسم
ابيك / فلاشه!!! سكت ليه ما تكمل ؟
شاهين / انا ماشي
شاهين يوصل للباب و لسه هيفتحه
ابيك / منصور اكيد عارف خطوط سيرك و الاماكن اللى بتروحها او ممكن تروحها من موبايلك عشان كدا اول ما ركبت الميكروباص الرجاله خدوه منك و رموه فى الشارع
شاهين يرفع ايده فيها خاتم و هو بيضحك بسخريه
شاهين / بس ما رميتوش ده و زمانهم دلوقت عرفوا مكانكوا برده
الابتسامه تروح من وش ابيك
..............................
فى الشركه عند اكرم
السكرتيره تفتح الباب مروان يدخل اكرم يقوم يسلم عليه
اكرم / اهلا اهلا ما صدقتش لما قالولى انك بره اصلك ما كلمتنيش و لا طلبت تقابلنى و لا اى حاجه اوعى تكون ضيعت رقمى
مروان/ لا ما ضاعش بس سمعت كلام غريب كدا قولت اجى اتكلم مع حضرتك فيه
اكرم / خير كلام ايه ده قلقتنى اقعد اقعد تشرب ايه
مروان/ و لا حاجه انا مش هطول و بعدين انا مش ضيف انا شريك و لا ايه
اكرم يحمحم
اكرم / طبعا طبعا حتى لو اتنين فى الميه شريك برده طبعا
مروان/ لا ما هم زادوا هو حضرتك ما تعرفش و لا ايه
اكرم / بجد مبروك اشتريت قد ايه بقي ... لعلمك لو كنت شورتنى كنت هقولك ما تشتريش دلوقت الاسهم عاليه جدا مع انى ما اتمناش انها تنزل خالص يعني ههههههههههههه
مروان/ ما انا ما اشتريتش فعلا حضرتك اللى هتزود النسبه اللى كنا اتفقنا عليها هتخليهم خمسه فى الميه
اكرم / بجد!! و ماله اكيد جايبلى خبر حلو زيك كدا ها قول فرحنى عملت ايه
مروان / لا هو الخبر الحلو جاى ما تقلقش و دا له حلاوه تانيه خالص انا بتكلم دلوقت عن الاعتزار بخصوص مرواحك لبابا الشركه و تسخينه عليا ... بس شوفت بقي لما لفيت من ورايا ما وصلتش لحاجه ازاى
اكرم / انا مش عاجبنى شغلها عند اللى اسمه رامى ده ... واد لعبى و مش منضبط
مروان / كنت جتلى مع ان رامى هيعمل حساب انى اخوها و لو فى يوم حليت فى عنيه هيجي يطلبها رسمي ما هى تجوزله
اكرم / رامى دا واد فاشل و صايع و ما لوش مستقبل و مستحيل حد فينا يقبل اصلا باى نوع تعامل بين مهره و بينه ما علينا انا كدا كدا لو هى مصممه تشتغل لقيت لها شغلانه احسن عند واحد حبيبي انا اضمنه برقبتى
مروان / نبقى نشوف موضوع صاحبك ده بعدين خلينا فى الخمسه فى الميه بتاعى
اكرم / ما تطمعش يا مروان
مروان/ انا لو كنت طماع يا عمو كنت قولتلك خليهم عشرين عشان اسكت عن الكلام اللى مهره قالته
اكرم يرتبك و يلم نفسه بسرعه
اكرم/ كلام !! كلام ايه ده !! و انا ايه فى الدنيا مهره ممكن تقوله يخليني اديك النسبه دى من شركتى ... انا ... انا عيشت مهره سنين فى بيتي وسط بناتى ما فرقتش فى يوم بينهم بالعكس كانوا بيغيروا منها ... كنت ... كنت اصلي ... انا اصلى كنت بحاول اعوضها عن دور الاب اللى اتحرمت منه سنين
مروان / الاب بس !!
اكرم / قصدك ايه !! انا مش فاهم انت بتحاول تقول ايه ؟
مروان / اصلها بتقول انك يعني ... انا طبعا ما صدقتهاش ..  بس ... حضرتك عارف العيار اللى ما يصيبش يدوش و خصوصا التوقيت انها تسيب البيت فجاه و حضرتك تطلق مدام كارمن ... انا شخصيا ما صدقتهاش
اكرم / انت بتحاول تقول ايه يا مروان... هات من الاخر
مروان / انت بتحبها صحيح و كنت عاوز تتجوزها ؟
اكرم / انت بتقول ايه انت !! انت اتجننت اكيد انت ازاى
مروان/ وفرهم على غيرى احنا مش هنعملهم على بعض
اكرم / انت بتقول ايه انت ازاى بتكلمنى كدا
مروان / بقول انى لخبطت حياتى و عشت دور الأخ الكبير لبت هبله بس عشان خاطر مكالمه تليفون منك فخلينا نتفق احسن
اكرم / انا مش قادر اصدق بجاحتك
مروان / خلاص تمام مصدقك... اشوف لها عريس غيرك بقي
اكرم / انت اكيد مجنون
مروان / فكر و رد عليا انا مش طالب كتير عشرين فى الميه بس
اكرم / اطلع بره
مروان/ طالع ... سلام
………………………
فى القسم فى البلد
الظابط / و اخرتها يا صابر
صابر / يا باشا قولتلك مليون مره الحوار ده بره عنى انا و رجالتى حضرتك اللى مستسهل انك تشيلهانى بدل ما تدور على الجانى الحقيقي اقولك ايه
الظابط / صابر ... ما حدش ليه مصلحه غيرك فى موت عبد الهادى
صابر / دا باماره ايه بقي ان شاء الله
الظابط / حبك القديم مثلا
صابر / باشا ... احنا صعايده و الكلام فى الحاجات دى تطير فيه رقاب ... انا لو عيني اتحطت على مرات واحد تانى اخزقها اشرفلى انا اه عايش فى الجبل بين المطاريد بس صحيفتى قصادك بيضه انا عايش فى الجبل عشان دا بيتي و مملكتى ورثى ابا عن جد مش عشان انا مغضوب عليا و لا مؤاخذه انا اقدر انزل اعيش وسطيكوا فى قصر بس انا اللى زاهد عيشتكوا و بعدين بالعقل كدا لو انا واطى اوى كدا ايه اللى هيصبرنى لحد ما بقي عندها بدل العيل اتنين يا باشا دى سمعه ناس اتقى الله و ما تكررش كلام ما انتش عارف نهايته هتكون ايه
الظابط / يعني عاوز تقنعنى انك لما هتخرج من هنا مش هتروح تتجوزها
صابر / انما للصبر حدود يا باشا و انا زعلى بيزعل ناس كتير ... باشا ... انا لو عاوز اخرج من هنا بتليفون هيجيلك واحد يشيل الليله و اطلع منها بس انا مش ناوى اريحك النوبادى و هسيبك تشتغل ... بس شكلك خدت على الانتخه
الظابط / صابر !!
صابر / انا عارف ان الدنيا هنا بتمشي بعيد عن عنين الحكومه و كل حاجه بتتحل بالعرف بس النوبادى معلش اتعب نفسك شويه انا عارف انك شاطر و باذن الله هتقدر توصل للى عملها بجد
الظابط / انا هعتبر نفسي ما سمعتش الهرى ده كله
صابر يبصله و يبتسم بسخريه و يبص قدامه و الظابط مضايق 
.........................
فى شقه ابيك
شاهين / سكتى يعني !! ايه القطه كلت لسانك و لا ايه ؟؟ 
ابيك / لا ما كلتوش بس مش مصدقه انك بجد فاكر ان حاجه زى دى فاتت علينا ... انت من ساعه ما ركبت العربيه و فى جهاز تشويش ما فرقاكش يعني السيجنل عمرها ما هتوصلهم بمكانك الا لما انا اقرر ده
شاهين يرتبك و يلم نفسه
ابيك / شوفت بقي انك قصادك كتير اوى تتعلمه ... اسمع يا شاهين ... انا اقدر دلوقت اقتلك عادى و اللبسها لمنصور كمان و ابقي خلصت منكوا انتوا الاتنين فى وقت واحد و دياب من غير اخوه ضهره مكشوف و سهل اخلص منه وقتها الجوارحه هتبقي من غير كبير يعني كدا كدا اكيد هلاقى وسطهم حد مستعد يسمع كلامى لانه مش هيلاقي غيرى اى حد ينصفه فى الحرب الجايه اما بقي الزنايته ... فاحنا مش ساكتين و اكيد عرفت ان جو قدر يسحب نجاه بره البلد اه سحب معاها كام واحد كدا بس ما تقلقش اديله شهرين تلاته هيبقوا كلهم رجالته و اللى مش هيجي بالرضا ربه اولى بيه
شاهين / مستقليه بينا اوى
ابيك / تفتكر المجلس اللى اخد يونس من حضن امه مش عارف مين ابوه تفتكر مش قادر يربط الشبه الفظيع اللى بينهم تفتكر نجاه و هى بقميص نوم احمر وسط اتنين من اخطر رجال المافيا فى العالم هترجع بالبساطه دى من غير خربوش واحد لا و مش بس كدا دى راجعه تحارب اهلها عشانه و تحط جزمته فوق رقبه الطخين
شاهين / ان مالت الحرمه فى الف راجل يعدلها ما تشغليش انتى بالك
ابيك / دا لما تبقي اى حرمه انما دى نجاه عباده الزيني ... اللى الكل بيشترى رضاها و خاطرها من اول كبيركوا لخليفته لمطاريد الجبل ... هو انت صحيح اتحرشت بيها زمان
شاهين / ما حصلش
ابيك / يا راجل الكدب حرام دا انت متصور
شاهين / و اخرتها
ابيك / اللى انت عاوزه ... عاوز تمشي امشي عاوز تقعد خليك القرار قرارك بس الفرصه ما بتجيش غير مره واحده ... و على العموم عشان اثبت حسن نيتي انا هرجعك بيتك بطل و هقفل جهاز التشويش و اخليك تحط على كل اللى هنا و ترجع برجاله كمان فى ايدك لاهلك يستجوبوهم و ما تقلقش مش هيقولوا غير اللى هم متبرمجين عليه
شاهين / متبرمجين !!!
ابيك / انا قدمت السبت زى ما بتقولوا لو لقيت الحد هقولك حوار متبرمجين دى
ابيك تطلع مسدس و تديه لشاهين
شاهين / انتى هتضحى برجالتك بالبساطه دى !!!
ابيك / دول مش رجالتى دول عبيد ... سلام
ابيك تمشي و شاهين مش فاهم بيبص على المسدس ثوانى و يسمع صوت ضرب نار يرتبك و يبقي مش عارف يروح فين و يجي منين
........................
فى منطقه الباينتبول
فريقين لابسين اسود و خوذ و ماسكين مدافع اللوان و مستخبيين فى منطقه كلها حواجز و فى تبادل اطلاق بين الفريقين و ما فيش اى ملامح باينه و فى مبنى فى الجنب واقف جواه فارس و كارم بيشربوا قهوه و متابعين اللى بيحصل على حيطه كلها شاشات بتسجل اللى بيحصل من كل الزوايا
فارس / هو انا ما ينفعش احجز نكست
كارم / و ربنا انت عسل
فارس / يعني هى جت عليا طب و الله هشرفكوا
كارم / اساسي
فارس / يا عم مالك مركز كدا ليه دى لعبه يعني هيحصل ايه
كارم / مش هيحصل حاجه هم اصلا قربوا يخلصوا
فارس / بالسرعه دى دول لسه بادئين
كارم / اختك ما بتعرفش تلعب دا بالنسبالها تمرين و منكده عليهم كلهم
فارس / لا و انت عارف اختك انهى حد فيهم اوى ما كلهم نفس اللبس و مغميين وشوشهم و عاملين زى الجدع الاسمر ده اللى اسمه باين كان سنايك ايز باين فى فيلم جى اى جو فاكره
كارم يشاور على شاشه
كارم/ اختك اهى لو مش دى اختك يبقي تقلق لان مستحيل العيال الفرافير اللى شوفناهم داخلين معاها يكونوا بالمستوى ده دى حتى مش فى احسن حالاتها
فارس يدقق و بعدين يبتسم
فارس / لعيب ياله اقسم بالله بس تعرف لو انا جوه كنت شلوحتهم
كارم / خلصوا
صوت صفاره يضرب و الكل يقلع الخوز نجاه الوحيده اللى لبسها ما فيهوش اى بقع
مروان / موسوعه جينيس لاسرع جيم فى التاريخ
مهره / مش عارفه اخد نفسي من الادرينالين بجد اقسم بالله كانى كنت فى حرب بجد
رامى / لا بس انتى كنتى جامده برده طولتى قولت هتقعى اول واحده
مهره / نجاه كانت فى ضهرى
مهره تحضن نجاه
مروان/ لا بس انتى جامده على واحده اول مره
نجاه / اول مره بمسدس لعبه انا متعوده على السلاح الحقيقي
الكل يبصوا لبعض
نجاه / فرق الوزن بيفرق طبعا دا خفيف جدا التانى حديد بيوزن طبعا
رامى / انتى بتتكلمى جد و لا هتطلع اشتغاله و اطلع العبيط اللى صدق و كدا
مهره / نجاه من قلب الصعيد هم فى العادى بيعلموا الحاجات دى للرجاله بس نجاه عشان بنت الكبير فليها وضعها صح يا نجاه
نجاه / لا مش حوار كبير و كدا عادى دى رياضه للى يحب عادى
رامى / لا ما اعتقدش انه عادى يعني انتى ممكن تشيلى مسدس او مدفع و تضربى نار بجد طب ايه ما بتخافيش تعورى حد
نجاه / زى ما هم ملبسينا هنا الحاجات دى عشان احتياطات الامان و دى مجرد اللوان يعني اكيد فى التمرين بناخد بالنا برده
فارس يدخل
فارس / ايه يا رجاله خلصتوا بدرى فقررتوا تقضوا الباقي منها رغى
رامى / عن اذنكوا هروح اغير يلا يا مروان عاوزك
رامى يشد مروان و يمشوا
فارس / ماله ده
مهره / اكيد مضايق انه خسر بصراحه فرحت فيه هههههه اصله كان راسم جامد اوى بس ما شاء الله نجاه علمتهم الادب ... يلا نغير احنا كمان و لا ايه
نجاه / تمام و اعملى حسابك الغدى النهرده عندى باذن الله هعزمك على اكله سمك عنب 
مهره / على قد ما بحب السمك بس لازم اشوف ظروف ابيه الاول
فارس / بنت اصول
مهره تبتسم
نجاه / هنغير و نجيلك
نجاه و مهره يدخلوا فارس يبص على المكان بنظره طفل فى الملاهى يتنهد و يدخل وراهم
.....................
فى الشركه
دياب / مفبرك فحصناه اكتر من مره مفبرك و ملعوب فيه اهدى بقي
منصور / لا
دياب / ما الفيديو قدامك اهو يا منصور لو فيه حاجه هتفوت عليك يعني
منصور / الفيديو مفبرك بس خالك و عمك ما كانوش مظبوطين خصوصا عمك فتوح كان متوتر و هو بيتكلم
دياب / انت عارف انه بعيد عن كل التدريبات دى و اخره الكومبيوتر بتاعه و دا من زمان و انه يمثل قدام العيله كلها بيتهيالي
منصور يبص لدياب
دياب/ ما انا مش هقدر اقول حاجه اكتر من اللى قدامى
منصور / فى حاجه غلط ... قلبي بيقولى فى حاجه غلط
دياب / انت عارف مين هيحللك الحوار ده و يجيب ناهيته
منصور يبص لدياب
دياب / يونس ... يونس اللى نزل اللينك و هو اللى صور
منصور / شاهين راح ليونس و رجع بحجه موبايله المضروب دى
دياب / انا هكلم نجاه
منصور / اشمعن نجاه
دياب / حاسس انها هى اللى هتعرف تقرره او مش بعيد يكون قايل ليها حاجه
منصور / طب ما تكلمه هو على طول دايركت ... انا هروح للكبير اتكلم معاه ... هى تخصهم برده
دياب / تمام ... خلينا نمشي فى كل الاتجاهات
.......................
فى مخزن فاضي
عباده واقف فى جنب مع مغاورى و شاهين
شاهين / اقسم بالله دا اللى قالته بالحرف و لما طلعت بره لقيتهم قتلوا بعض ما اتبقاش غير الاتنين دول كانوا قاعدينلى فى الارض على ركبهم و ايديهم ورا روسهم
عباده / بس دا مش بى كاى
مغاورى / دول خدوا ضرب ما يستحملوش مخلوق و ما فتحوش بقهم بحرف يعني بى كاى مش حاسين بحاجه
عباده / لا حاسين دا مش البى كاى
مغاورى / طب ايه نخلى الرجاله تديهم طريحه تانيه و لا نخلص عليهم و نخلص كدا كدا مش هنطلع من وراهم بحاجه
عباده / هعمل كام مكالمه و ارجع
مغاورى / كام مكالمه !!
عباده يبص لمغاورى و يروح فى جنب و يطلع الموبايل
.......................
فى الجبل
شاكر قاعد فى جنب لوحده بيرتل قران بصوت عالى
شاكر /  وما تنقم منا إلا أن آمنا بآيات ربنا لما جاءتنا ربنا أفرغ علينا صبرا وتوفنا مسلمين
صابر يدخل شاكر يسكت
شاكر / صدق الله العظيم
صابر / سكت ليه صوتك حلو كمل
شاكر / حمد الله على السلامه خرجت امتى
صابر / دلوقت حالا الظابط اخلا سبيلنا كلنا لعدم كفايه الادله بس القضيه لسه مفتوحه
شاكر / تفتكر مين اللى عملها
صابر يهز راسها لا
شاكر / كان غلبان و ابن حلال ما لوش اعداء نهائى تعرف لو رعد اقولك اه كان شقى و ليه حوارات محمود ابن عمه شرحه انما عبده ابدا كان محترم و لسانه حلو و الناس كلها بتحبه
صابر باصص فى الملكوت و ساكت
شاكر / طب و اخرتها
صابر يبصله
صابر / هى ايه ؟
شاكر / الحوار ده الراجل اللى مات ... انت عارف انه كان طالع الجبل يقتلك صح ؟
صابر / ما كانش طالع لوحده كل اللى كانوا موجودين فى الليله دى كانوا متفقين معاه او متفقين عليه ... الظابط اللى تحت ده طرى مش زى اللى قبله مش عاوز يتعب و لا يدور
شاكر / بس احنا مش ساكتين
صابر / بتعملوا ايه يعني معلش كدا عرفنى
شاكر / اكيد فرغوا الكاميرات و راجعوها و اكيد
صابر / الحوار كله حصل فى الجبل ... مفيش كاميرات فى الجبل يا شاكر
شاكر / بس اكيد
صابر / هيبان ما تقلقش ... لما يطمن ان الدنيا هديت هيبان و هيتعرف
شاكر / الموضوع ده مش سالك وراه حاجه
صابر/ و ايه فى حياتنا سالك ... سيبك ... خير قاعد لوحدك هنا ليه
شاكر / عادى
صابر يطبطب على ضهره و يبتسم و يقوم
.....................