(((((( الكبيره ٢ ))))))
#لولو_محمد
الحلقه ١١٢
عمران قاعد بيزاكر يقفل الكتاب و يقوم يروح الحمام و يغسل وشه و يبص فى المرايه و ينفخ و يروح اوضته و يطلع التليفون و يطلع نمره و بعدين يفكر و يروح يلبس و يفتح باب الشقه
صوت هند / عمران !!!
عمران يقف
هند / انت نازل ؟ انت مش قولت ما وراكش حاجه النهرده !! رايح فين ؟!
عمران / اه نازل اجيب حاجه كدا و راجع
هند / تمام ... خد بالك من نفسك
عمران / حاضر
هند/ هات ايسكريم معاك و انت راجع
عمران/ حاضر
عمران ينزل يركب الموتوسيكل و يروح لاقرب محل موبايلات و يشترى تليفون و شريحه و يركبهم و يطلع بره المحل و هو بيتصل بحد
عمران / انا عمران و دا رقمى الجديد و محتاج منك خدمه بعيد عن ابويا
............................
جوزيف / هنموت مين
عمران / مش للدرجادى يعني
جوزيف / بص انا مش هكدب عليك انا اساسا زهقان و راشق فى اى حاجه حتى لو مصيبه قولى انت بس مين مزعلك و انا هعلمهولك الأدب
عمران / هو مش مزعلني ... انا بس مش مرتاحله و بابا قالى انه هيحطهم تحت عينه و ماما شايفه ان مفيش حاجه بس انا مش مرتاح و مش عاوز اعتمد على السيستم عندنا عشان خايف أكرر نفس الغلط مرتين
جوزيف / بص انت تحكيلي كل حاجه من الاول كدا و انا بنفسي هستلم
عمران / تمام ... اسمع
..................
فى عماره نسمه
ام ايمان تنزل السلم تشوف الأكياس على حطتها تستغرب
ام ايمان / بقى مش خساره الحاجات دى ... دا تلاقيها بشئ و شويات
ام ايمان تخبط على نسمه نسمه تفتح
نسمه / ازيك يا ام ايمان اؤمريني
ام ايمان / هى الحاجات دى مش حرام رميتها كدا على السلم يا ام بدر
نسمه / ملهاش مكان فى بيتي لا طلبتها و لا قبلاها اعمل ايه
ام ايمان / الحاجات دى ما بتجيش كدا يا بنت الأصول دا انتوا مهما كنتوا اهل
نسمه / حاجات ايه يا ام ايمان ... بقول لك ايه الطبيخ على النار يا تتفضلى يا استاذنك اللحقه
ام ايمان / هى كدا !! على العموم انا كدا كدا كنت نازله مش واقفه
نسمه / فى حفظ الله يا ست الكل
ام ايمان تبص لها و تمشي نسمه تقفل الباب
.................
فى جنينه الموالح
عباده / و ليه لا ما خير البر عاجله
مختار / بس مش اوى كدا الناس تقول ايه
عباده / يعني هيقولوا ايه يعني احنا مش لسه كنا بنقول للناس نسرع فى موضوع الجواز و نعف الشباب و الكلام الجميل جدا ده
مختار / و بعدين
عباده / نعمل فرح جماعى و نلم فيه شويه شباب زى الورد و نعمل ليله يتحكى و يتحاكى عليها ايه رايك فى الكلام ده
مختار / و انت فاكر ان احلام هتوافق على الكلام ده يعني عريس متجوز و مخلف و كمان ملهاش فرح عدل
عباده / و مين قال إنه مش هيبقي فرح عدل دا هيبقي فرح الكل يحسدها عليه و انا هشرف عليه بنفسي
مختار / طب ما تتكلمش فى الموضوع ده مع حد لحد ما اكلمها بينى و بينها و نشوف رايها
عباده/ طب ما اخدش راى قاسم حتى
مختار / احلام الاول لو وافقت ابقي شوف اللى تشوفه
عباده/ و ماله
…………………………
فى اوضه مهره
كارمن تدخل مهره تقوم تقف كارمن تقفل الباب
كارمن / فكرتى فى الكلام اللى قولتهولك
مهره تبص لها بصمت
كارمن / بصي ما ترديش عليا دلوقت خالص انا عزمته عندنا على الغدى النهرده اقعدى و اتكلمى معاه و قربى منه و شوفى الدنيا
مهره تجيب الموبايل و تكتب
مهره / الموضوع مش بالبساطه دى
كارمن / ابسط مما تتخيلي و بعدين انا صارحته بظروفك كامله و هو متمسك بيكي ايه اللى مقلقك بقي ... و لا انتى فى حد تانى فى حياتك ؟
مهره ترتبك و تهز راسها لا
كارمن / صارحيني دلوقت مش هستحمل يتقال لى تانى بنتك هربت و اتجوزت من وراكى
مهره تيجي تكتب كارمن تحط ايدها على الشاشه
كارمن / اللبسي حاجه حلوه و اجهزى و نتكلم بعدين كدا كدا مفيش حاجه هتم من غير رضاكى تمام ؟
مهره تبص فى الارض
كارمن / هتخسرى ايه يعني ضيف زى اى ضيف مفيش حاجه
مهره تبص الناحيه التانيه و واضح عليها الحيره و الخنقه كارمن تحضنها مهره تغمض عنيها
كارمن / ربنا يهديكي يا بنتى
......................
فى جنينه الزنايته
جوزيف بيتمشي فى الجنينه عباده يطلع من السرايا
عباده/ خير
جوزيف / كنت جاى اتكلم بخصوص الإنفاق نسيتوها و لا ايه ؟
عباده/ ما كلمتناش نجيلك ليه ؟
جوزيف / زهقت عادى نزلت اتمشى عديت على نفق لقيته لسه مفتوح ركبت و جيت لك ... اقول لك انا غلطان انا ماشي
عباده / استنى
جوزيف / اؤمر
عباده / تعال ندخل نتكلم فى المضيفه
جوزيف يهز راسه و يروح ناحيه المضيفه و عباده وراه عباده يبص على بلكونه نجاه مفيش حد يدخل وراه المضيفه
............................
فى جنينه كارمن
مهره و حاتم قاعدين لوحدهم و مهره كل شويه تبص يمين و شمال و مش مرتاحه
حاتم / هو انا لو اتكلمت شويه عن نفسي تضايقي ؟
مهره تبص له
حاتم/ انا فعلا محتاج اتعرف عليكي اكتر بس قبل ما اعرفك يهمنى انك تعرفيني ... انا ارتبطت قبلك اكتر من مره بس ما حصلش نصيب ... المشكله دايما واحده ... الايجو... النسويه بوظت عقول البنات... نسيو ان فى حاجه اسمها راجل و ست صوتهم على و ما بقالهمش كبير ... صدقت انها بتفهم فى كل حاجه و تقدر تعمل كل حاجه ... بس دا مش حقيقي ... الست ما تقدرش تعمل كل حاجه ...ساعتها مش هتكون ست هتبقي مسخه ... حاجه كدا لا ليها لون و لا طعم و لا حتى ريحه
مهره تفتح الموبايل و تكتب حاتم يسكت توري له اللى كتبته
حاتم / يعني انت ضد عمل المرأه؟! ... هسالك سؤال ... لو احنا متجوزين و صحينا الصبح بدرى نزلنا مع بعض انا روحت شغلى و انتى روحتى شغلك و رجعنا سوا ... هتبقي قادره تاخدى بالك منى ؟ مش هقول تعمليلى اكل و لا تهتمي ببيتي و لا الكلام ده لان انا الحمد لله اقدر اوفر لك كل ده بدل الواحده عشره تحت رجليكى يخدموكى ... انا بتكلم عن حاجه محدده ... أنا كزوجك و راجلك لما هرجع من شغلى تعبان هيبقي فيكي حيل و طاقه تدلعيني و تاخدى بالك منى و لا هتبقي تعبانه و مرهقه و مقريفه و ضغط و مشاكل الشغل مقصرين عليكي ... هتقدرى توازني من غير ما تيجي على نفسك
مهره ساكته
حاتم / بلاش انا ... مش هتحملى مش هتولدى هتوفقى ازاى من غير ما تيجي على نفسك و لا عليا و لا على العيال ... مش هتضايقي منهم انهم عطلوكى عن مستقبلك و كاريرك و لا هو حلال ليهم و حرام عليا... اقصد تتنازلى عن كاريرك عشان الاولاد لكن انا !! ذكوري متعفن
مهره تبتسم و تهز راسها
حاتم / الستات زمان كانوا بيعملوا ايه طول اليوم ؟! اكل شرب لبس شوبينج دلع فى دلع جوزها يروح تساعده يغير و تأكله و تغسله رجله بميه و ملح و تفضل تدلع و تطبطب لحد ما ينام و يصحى يروح الشغل و هو سايب لها عن طيب طيب طيب خاطر كل اللى فى جيبه عشان تدلع و تصرف بيه ... و دا ليه لأنها ست و عاشت دور الست... مش بتفتكر انه راجل و قوامه و الكلام ده بس وقت ما تطلب فلوس انما فى حقوقه لااااااا الروس اتساوت
مهره تكتب حاتم يسكت توري له
حاتم/ فى ستات كتير بتقدر توفق ... و فى ستات الظروف بتجبرها و فى رجاله بتتنازل عن حقوقها او جزء من حقوقها مقابل انها تنزل من على دماغه شويه مثلا او ترجع مفرهده فتنام و ما تدورش وراه بيكلم مين و لا بيعمل ايه ... و لعلمك نسبه كبيره من الخيانه الزوجيه دا سببها هى ملخومه و تعبانه و هو لقى اللى تدلع و تطبطب
مهره تكتب / مفيش مبرر للخيانه
حاتم / ما كانش الشرع حلل اربعه
مهره تكتب حاتم يحط ايده على الشاشه
حاتم / احنا مش ملايكه ... و لا انتوا و اللى انتوا بتسموه خيانه ليه فى الحقيقه اسامى تانيه كتير ... انا كدا كدا ما بحبش التعدد صاحب بالين كداب بس برده لو الواحد مش مرتاح فى بيته يعمل ايه يخربه و يرمى العيال فى الشارع ؟! مين اللى هيدفع تمن التقصير ده ؟! الاتنين غلطانين هى قصرت و هو ضعف غلطوا الحياه انتهت ... طب ما من الاول هى تهتم و هو يخلص و خلصنا ... لو بتكلم غلط صلحي لى
مهره تبص له و تسكت
حاتم/ و بعدين لو انتى عندك فلوس و عندك رفاهيات الدنيا كلها ممكن تديني مبرر انك تشتغلى اصلا
مهره تكتب/ أحقق ذاتى او اشغل وقتى فى حاجه مفيده
حاتم/ و هو فى حاجه افيد لك منى
مهره تبص له باستغراب
حاتم / بمعنى انك لو عندك ساعتين فاضيين فى يومك مثلا انهى افيد لك انك تنزلي شغل او حتى تشتغلي من البيت و لا انك تعملى شعرك تعملى تاتو تدلعى نفسك اهو حاجات البنات اللى ما بفهمش فيها دى ... و بعدين انا اصلا نمط حياتى مش ثابت يعني ما ليش مواعيد شغل محدده و لا ليا مكان شغل ثابت يعني كل يوم من بلد لبلد و اوقات اشتغل بالنهار اوقات اشتغل بالليل هتوفقى ازاى ؟! ايه هتسبيني اسافر لوحدى و لا هتسبيني اسهر و تنامى بدرى بحجه ان ليكي شغل الصبح ... أما صحيح حاجه تضحك ... الموظفه ... لما المدير بتاعها بيامرها بتقول حاضر و أمرك يا فندم انما لما جوزها بيامرها بتقول ايه بقي ؟ و لا هو لازم يدفع ... ما هى لو بالدفع سهله و لا انتى ايه رايك
مهره تكتب / انت بتقول كلام فى وسط الكلام
حاتم يحط ايده على الشاشه مهره تبص له
حاتم / ما هى الدنيا كلها كدا نفس الكلمه تحمل معنيين و انتى بتاخدى المعنى اللى يجي على هواكى ... لو بتحبى اللى قدامك و واثقه فيه هتفهمى الكلام بشكل كويس انما لو ...
حاتم يتنهد
حاتم/ الستات كانت السبب فى اكبر حروب قامت فى العالم ... دا هى السبب اننا على الارض اصلا مش فى الجنه
مهره تحاول تكتب حاتم مش بيشيل ايده من الشاشه
حاتم / عملت ده من غير ما تبذل اى مجهود غير انها تدلع و تطلب من الراجل ... الستات ما غيرتش العالم بشغلها ... غيرته بأنها تمشي راجلها على كيفها بدلالها ... وصلت؟
مهره تشد الموبايل حاتم يسحب ايده الاتنين باصين لبعض
حاتم / هتلعبى على الوتر الحساس للراجل هتاخدى عنيه هتمشيها راس براس هيكسرك و على فكره دا مش كلامى ... دا كلام ربنا و اوامره
مهره تبص لحاتم
حاتم / هو مش فى حديث مش فاكره بيقول حاجه كدا زى الست تسجد لزوجها بعد ربنا او مش فاكر نص الحديث بالظبط هبقي اجوجل ايت و ابعتهولك
مهره تكتب حاتم يتنهد
حاتم / انا ما بقولكيش تسجدى لى حرفيا ... انا بتكلم عموما المعنى المجازى اقصد ... و على فكره فى احاديث كتير نفس المعنى على ما اذكر زى ان الست اللى جوزها زعلان منها الملائكه بتلعنها او ما بتتقبلش صلاتها فى أحاديث كتير فى الدين على فكره بتقول كدا و فى فى القرآن كمان ... مش فى حاجه اسمها قوامه
مهره تبص لحاتم
حاتم / انا عارف ان اليومين دول الكلام ده بقي كخه و رجعيه و شغل النساويه الفارغه ده بس انا كان لازم ابدء بيه لانى مش ناوى ادخل فى علاقه توكسيك تانى مش ناوى افضل اقدم اقدم اقدم و فى الاخر انا ما ليش اى حقوق لا انا كزوج ليا حقوق ما دام موفى كل واجباتى يبقي من حقى اخد حقوقى كامله
مهره تكتب حاتم يعدل ضهره مهره تناوله الموبايل يقرأ
حاتم / واجباتى .. اه ... كل طلباتك اكل شرب لبس دلع هتعوزى اكتر من كدا ايه ؟
مهره تكتب / و حقوقك ؟
حاتم / مش عاوز منك اكتر من انك تبسطيني و تريحيني مش اكتر .. سهله اهى .. شغل البيت فى بدل الخدامه اتنين و تلاته و عشره لو حكمت و العيال فى نانى و اتنين و عشره برده لو حكمت يعني مش بس هقوم بكل واجباتى دا انا هسهل ليكي حقوقى على الآخر هتعيشي فى مستوى رفاهيه كل الناس تحسدك عليه مطلوب منك حاجه واحده بس ... واحده
مهره تكتب / و ان قصرت ؟ تعبت او اى حاجه ... حمل اى حاجه فرضا اى حاجه ؟
حاتم / هتتعبى من اول يوم ؟! اكيد لا ... فى حاجه اسمها موده و رحمه و عشره و رصيد كبير بينا يشفع لك لما تقصرى و يشفع لى انا كمان لما اغلط ... مش هى الدنيا بينا لازم تمشي كدا و لا بتمشي ازاى ؟ ... انا عارف انى دخلت سخن اوى و عارف ان الكلام ده لسه بدرى عليه بس دى اهم نقطه لو تمام و متفقين عليها الباقي كله شكليات ... انا مش طالب منك غير حاجه واحده ... تهتمي بيا .. اكتر من كدا انا هتجوز ليه ما انا عندى ناس بتعملى كل حاجه تانيه ... انا اقدر اجيب ناس تعمل لى كل حاجه بالفلوس الا دى ... عشان هتبقي حرام
حاتم يضحك و مهره بصاله و مش مرتاحه
حاتم / اعتقد ما عادش فى كلام تانى يتقال فى النقطه دى ممكن نتكلم فى اى حاجه تانيه احكيلى بقي عن نفسك بتحبى تعملى ايه تانى غير الخيل
مهره بصاله و ساكته
.............................
فى الشركه عند جابر
جابر عارض على بروجكتور خريطه للبلد و عمال يكبر و يصغر
جابر / دى خطوط الصرف الرئيسيه لو رسمنا رسم افتراضي للانفاق فاحنا ممكن نتقاطع فى النقط دى ... على خطه يونس فاحنا لو حفرنا هنا على اساس بنصلح الصرف او بنجدده هنوصل للانفاق و نسدها
عباده / نسبه نجاحها كام الحكايه دى
جابر / عالى
عباده باصص للخريطه
مختار / انا شايف ان الراجل وفر علينا مجهود كبير اوى
عباده / اشمعن دلوقت؟
مختار / هو لمح كذا مره و سابنا نحاول
مغاورى / سابنا نضيع وقت كتير
جابر / كان بيشوف أخرنا
مختار / او لقى ان الوقت اذف و احنا محتاسين فقرر يدخل
عباده / لا و لا ده و لا ده
مختار / امال يعني
عباده / ابقي اسأله... هو مش حبيبك ... ما كلمكش فى التليفون ليه ما قالكش الكلام ده فى رساله حتى ليه ؟! ليه يجي السرايا يقولى الكلام ده ... طب ما كان كلمنى اروح له هو مش تعبان و المفروض يرتاح
مغاورى / تعبان اه يرتاح دى فيها كلام ... دا ما قعدش من الجبل للملعب لهنا لهنا ما بيهمدش
عباده / يعني برده كان ممكن يقابلنا فى مكان تانى و يقول نفس الكلمتين دول
مختار / هو اكل و لا بحلقه المهم النتيجه
عباده يبص لمختار و يبتسم و يهز راسه
عباده / تمام يا جابر ... الباقي عندك... انا مروح حد هيعوز منى حاجه
مختار / انا هروح ليونس
عباده / خير ... لتكون ناوى تسأله ليه جه يقولى فى السرايا
عباده الوحيد اللى بيضحك
مختار / عن اذنكوا
مختار يسيب المكان و يمشي
مغاورى / هو انا ليه حاسس ان فى حوار داير من تحت مناخيرى و انا مش دارى
عباده يبص لمغاورى و يضحك
عباده / هو انت هتوه عنى انا و مختار
مغاورى / على قولك القط ما يحبش الا خناقه
الاتنين يضحكوا و جابر متابع و ما بيضحكش
..........................
فى اوضه مهره
صوفيا و كارمن و مهره قاعدين فى السرير و مهره فى النص
صوفيا / على فكره الراجل ما غلطش فى حاجه بالعكس انا مقتنعه جدا بكلامه
مهره تكتب صوفيا عينها فى الموبايل
مهره / فى اسلوب للكلام و فى كلام جوه الكلام فى حاجه غلط
كارمن / يووووه انا ريقي نشف ... روحى يا صوفى هاتى لينا اى حاجه نشربها
صوفيا / اتوزعت
كارمن / لا بجد هاتى عصير فريش من بتاعى
صوفيا / حاضر
صوفيا تطلع بره كارمن تتنهد
كارمن / تسمعى منى ؟
مهره تهز راسها
كارمن / كلامه وجعني اوى
مهره تمسك أيد امها كارمن تتنهد
كارمن / افتكرت كل المرات اللى اكرم لمح لى فيها انه محتاجنى او حاول يقرب منى و اتحججت باى حاجه ... افتكرت كل المرات اللى اتلخمت فيها عنه بشغلى و أسمى و العبط اللى كنت ساحله نفسي فيه كانى هغير العالم ... العالم اللى اول ما وقعت إدانى ضهره... وقعت بس لما خسرت اكرم
مهره تبص فى الارض و تتنهد
كارمن / لو كنت اهتميت بيه ما كانش كل ده حصل ... لا ليا و لا ليكي و لا ليه و لا حتى لاخواتك ... كل ده عشان ما لقيتش اللى ينبهني و هو برده كان ليه تجارب مش عاوز يكررها عشان كدا اتغاشم فى الكلام معاكى و هو برده مش هنكدب مش بتاع بنات و لا بيعرف ياكل عقلهم بالكلام ... هو عملى و ناجح جدا فى الموضوع ده بصراحه التراب فى ايده دهب
مهره تبص الناحيه التانيه
كارمن / بصي احنا مش مستعجلين فكرى فى الكلام من كل النواحي و اقعدى معاه تانى و لو عاوزه رقمه عندك ابعتيله واتس و اكتبى كل اللى نفسك فيه و اتكلموا.. بس خدى بالك الواتس مش بيوصل المشاعر و سبب فى مليون سوء تفاهم حصل قدامى بس براحتك انتى كبيره و عارفه هتتصرفى ازاى و انا جنبك اهو شوفى اللى انتى عوزاه و انا معاكى انا ما عنديش اهم منك
صوفيا تفتح الباب هى و بياتريس و فى ايدهم شنطه هدايا فخمه اوى
صوفيا / مش هتصدقوا لقيت ايه تحت
بياتريس / كادو مخصوص جاى لست الكل واضح ان الموضوع ايه داخل فى الجد
كارمن/ ورونى ورونى
كارمن تفتح الشنطه فيها طقم الماظ جميل جدا
كارمن / وااااااااو تحفه
صوفيا / هقيسه
صوفيا تخطفه و تجرى قدام المرايا
بياتريس / مش بتاعك على فكره
صوفيا / انا و ميمو مفيش بينا فرق مش كدا يا ميمو
بياتريس / دلوقت بقت ميمو
صوفيا / رهييييب رهيب مش ممكن
بياتريس / استنى دا فى كارت
صوفيا تجرى تنتشه من ايد بياتريس
صوفيا /ايه ده !! دا فاضي
بياتريس/ تلاقيه ما عرفش يكتب ايه
البنات يضحكوا
كارمن / بس بقي بلا قله ادب يلا بره منك ليها و انتى هاتى الكوليه ده
صوفيا / طب أتصور بيه طيب
بياتريس / و لما يشوف الصوره هيقول ايه
صوفيا / طب انا عندى فكره ... ايه رايك مهره تلبسه و نبعت له الصوره
مهره تشاور لا بصابعها بعصبيه
كارمن/ معاكى حق ... هيقول انها ما صدقت كأنها اول مره تشوف حاجه زى دى
بياتريس / طب على الاقل تشكره كفايا انه اهتم
صوفيا / ابعتيله رساله
بياتريس و صوفيا ينطوا فى السرير جنبها كارمن توسع ليهم
صوفيا / اكتبيله زوقك حلو اوى
بياتريس / لا طبعا ايه العبط ده هى ممكن تكتب تعبت نفسك ما كانش ليها لزوم
كارمن / ايه قله الزوق دى
صوفيا / قولى لها
كارمن / البساطه مفيش احسن منها تقوله ميرسي على المفاجاه الرقيقه دى
صوفيا / مش حساها بس حلوه
بياتريس / تمام اكتبى
مهره تبص لهم
صوفيا / اكيد بلغوه ان الهديه وصلت و اكيد زمانه على نار دلوقت
كارمن/ ابعتيله الرساله يا مهره ... يلا
مهره تفتح الموبايل بتردد و الكل عينه عليها اول ما تفتحه صوفيا تخطفه و تكتب و بياتريس عينها فى الموبايل
صوفيا / بعتها ... عشان خاطرى اخد بيه صوره واحده بس
.....................
فى شقه يونس
مختار قاعد و جوزيف بيتكلم فى جنب
جوزيف / هو لا كويس و لا وحش حاجه كدا ضايعه فى النص ... على العموم انا كدا كدا بنخور اكيد هلاقى له حاجه ما هو مش ملاك يعني اكيد له غلطه هنا و لا هنا ... انت بتسأل على المستوى الشخصي يعني ... ارتبط اكتر من مره و كل مره بتقعد بالسنتين و التلاته و تبوظ و فى ناس بتشكر و ناس بتشتم ... برده الطبيعي من اى حد ... بص انا كدا كدا راكب تليفونه
جوزيف يبص على مختار
جوزيف / ما تقلقش من الموضوع ده ... اه بالمناسبه كان هناك النهرده ... اه و بعت لهم كادو غالى من شويه عقد اللماظ تمنه ... انت بتزعق فيا ليه طيب ... دا انت لو ما كنتش حبيبي
جوزيف يضحك
جوزيف/ طب ليه الفرك ده كله ما تسترجل و تروح تصارحها ... اه قولها انا بحبك و عاوز اتجوزك ... و حياه امك امال كل ده ليه
مختار يبص فى الساعه
جوزيف / بقولك ايه اعمل اللى تعمله انا مش فاضي عندى ناس ... مختار الزيني تسمع عنه
جوزيف يضحك و يقفل المكالمه و يقعد جنب مختار
مختار / خير
جوزيف/ باذن الله خير ... طمنى ايه اتفقتوا على ايه ؟
مختار/ انت كنت جاى السرايا تشوفها ؟
جوزيف يبتسم
مختار / و انت بقي فاكر اننا بارايل و كدا و لا انت حكايتك دى هتخلص على ايه
جوزيف/ انا لو عاوز اشوفها مش هستاذنك هشوفها
مختار / ما تسوقش فيها عشان ما تطربقش على نفوخك احنا مش خوجات
جوزيف / بس دى الحقيقه اعمل ايه ... اكدب و اجاملك يعني
مختار / انا شكلى غلطت لما جيت لك
مختار يجي يقوم جوزيف يمنعه
جوزيف/ استنى... مفيش أسهل من الكدب و التحوير بس انا بحب اكون صريح معاك ... انت الوحيد اللى بتسمعنى و تفهمني انا لولا انك مانعنى كنت روحت كلمت عباده
مختار / ما هو هيرفضك على فكره
جوزيف / و هى ؟
مختار / هى ما بتقولش لابوها لا و لا بتستحمل زعله
جوزيف / و لا هو بيرفض ليها طلب
مختار يبص الناحيه التانيه و يرجع يبص له
مختار/ انت جايب الثقه دى انها هتوافق عليك اساسا منين
جوزيف / من لمعه عنيها لما بتشوفنى
مختار / الغاز مأثر عليك
جوزيف/ يمكن
مختار يبص الناحيه التانيه و يتنهد و يرجع يبص له
مختار / هيعملوا بنصيحتك و جابر استلم الموضوع
جوزيف / كويس
مختار / انا حزين
جوزيف يستغرب
مختار / عليكوا كلكوا و الله ... انت و جابر و نجاه و عيالى و اهل البلد كلهم ... حاسس بالعجز
جوزيف / مش هتقدر تغير الكون لوحدك ... كل واحد مسؤل عن نفسه ... كدا هتموت بدرى
مختار / الموت لا بيجي بدرى و لا بيتاخر هموت فى معادى المهم بقي انى لما اموت اكون عامل كل اللى اقدر عليه عشان لما اقف قدام ربنا ما اكونش مقصر
جوزيف يبص قدامه و يفكر
جوزيف / جمله صعبه اوى
مختار / انك تقف قدام ربنا مقصر؟
جوزيف / اضمن منين
مختار / مفيش ضمانات انت بتعمل كل اللى تقدر عليه و تحتسب النيه و تثق فى رحمه ربنا
جوزيف يبتسم
مختار/ انت حاسس بايه
جوزيف / ناحيه ايه ؟
مختار / كل اللى بيحصل
جوزيف / تايه ... فى العادى ببقي مخطط لسنين قدام و دارس كل الاحتمالات و عامل خطه بديله فى حاله اى تغير يحصل فى اى الخطه الاصليه و مرتب كل حاجه و عارف انا عاوز ايه بالظبط و هوصل ليه ازاى ... دلوقت !!! ... تايه
مختار/ انت مش هتقدر تمشي الكون على مزاجك سيبها للى خلقها يمشيها زى ما مقدر لها و ارضي بنصيبك اى كان اكيد خير
جوزيف / نصيبي معاها
مختار يبص الناحيه التانيه ويضحك
جوزيف / انا بطل القصه دى و البطل دايما بيتجوز البطله فى الاخر اسمع منى
مختار يضحك و ما يقدرش يمسك نفسه جوزيف يبتسم
مختار / انا مش عارف انت بتجيب الكلام ده منين ... ربنا يهديك
جوزيف / بكره تشوف
مختار يزغده برجله
مختار / يا راجل قول امين ما تضيقش خلقى عليك
جوزيف / هعديها عشان حبيبي
مختار يضحك
..............................
فى اوضه نجاه
نجاه بتتكلم فى التليفون فيديو كول مع مهره مهره توريها الكوليه
نجاه / حلو ... مبروك عليكي
مهره تبتسم بسخريه و نجاه باين عليها الضيق
نجاه / انتى مبسوطه يا مهره
مهره تهز راسها لا
نجاه/ امال مكمله ليه و لامتى
مهره تكتب / عشان ماما
نجاه / بتجبرك يعني رجعتك عشان تجوزك و تخلص منك ؟
مهره تكتب / بتقول انه كويس و كلهم مبسوطين
نجاه / المهم انتى انتى مبسوطه ؟!
مهره تتنهد و تكتب
مهره / ماما عرفت عن اكرم و صدقتنى
نجاه / طب ما دا اللى كان المفروض يحصل من زمان
مهره تكتب / كل حاجه باظت هنا و هى ندمانه و زعلانه
نجاه / دا ايه علاقته باللى اسمه حاتم برده
مهره تكتب / بتقول انه عارف ظروفى كلها و مع كدا راضي و شاريني
نجاه / نعم !!!
مهره تبص لنجاه بحزن
نجاه / حبيبتي ما حدش بيتجوز كدا انتى صغيره و حلوه اقفى على رجلك الاول و بعدين فكرى فى الموضوع ده
مهره تكتب / ماما
نجاه / دا جواز يا قلبي... تمام هم مبسوطين و هو كويس و كل حاجه مع انى مش فاهمه حاجه... انتى بقي فين ... انتى بتحبيه ؟ مرتاحه له ... دا هيبقي جوزك ... جواز بجد ... هو ده الشخص اللى مستعده تكملى معاه باقي عمرك
مهره تهز راسها لا بتردد
نجاه / امال مكمله ليه ؟ ما تقولى لا ... مهره هم جابرينك ؟
مهره تهز راسها لا بثقه
نجاه / يعنى انتى هترتبطى بواحد لا حباه و لا مرتاحاله و لا مبسوطه عشان ايه ؟
مهره تهرب بعنيها من عنين نجاه
نجاه / انتى غلطتى زمان أخطاء كان ممكن نفهمها و كان ليكي عذر انما الغلطه دى هتبقي بعمرك كله يا مهره
مهره تبص لنجاه بعنين كلها دموع
نجاه / لا حول و لا قوه الا بالله ... انتى اتكلمتى معاه طيب ؟
مهره تهز راسها اه
نجاه / و برده مش مرتاحه ... لا حول و لا قوه الا بالله لا حول و لا قوه الا بالله
مهره تكتب / هو قال كلام ما فهمتوش بس ماما بتقول ان هو صح و انه صريح و اننا نحط النقط على الحروف من اولها بيوفر مشاكل
نجاه / يعني ايه اصلا ما فهمتيهوش ؟
مهره تكتب / هو الكلام صح و انا فاهمه ان ده شرع ربنا و ان ده دينا بس حسيت من الطريقه او من معنى الكلام أو مش عارفه يمكن عشان انا لسه مش واخده عليه فمفيش عشم بينا زى ما صوفيا بتقول انا حسيت ان الكلام مش مريح
نجاه / ايه عاوز يتجوز عليكي مثلا
مهره تكتب / لا خالص هو بس بيقول ان كل المطلوب منى انى اهتم بيه و ادلعه مقابل انه يوفر لى كل حاجه محتاجاها
نجاه / مفيش فى الكلام حاجه غلط
مهره تهز راسها اه
نجاه / بس مش هو ده اللى قاله بالحرف
مهره تعمل بايديها يعني
نجاه / صدقى قلبك ... صدقى احساسك ... لو مش مرتاحه ما تكمليش
مهره تبص الناحيه التانيه و تتنهد
نجاه / هكلمك كمان شويه
مهره تهز راسها تمام نجاه تقفل المكالمه و تتصل بعمران
نجاه / السلام عليكم عامل ايه
عمران / تمام الحمد لله
نجاه / حاتم اتقدم لمهره و واضح ان اهلها بيقنعوها بيه و هى ما صدقت ادوها ريق حلو فشكلها هتوافق
صمت
نجاه / مهره هتتخطب لحاتم
عمران/ مش هيحصل
نجاه / ازاى بقي
عمران / هو مش هيحصل و خلاص
نجاه / أنت ناوى على ايه
عمران / مش ناوى
نجاه / انت بتهزر صح
عمران / سلام يا نجاه عشان عندى امتحان الصبح
نجاه / انت بتهزر صح
عمران / فى حفظ الله
نجاه / عمران ... الو الو ... دا ايه الهبل ده...اولع دا انت عيل متخلف.. اووووف
نجاه تتصل بدياب
نجاه / محتاجه منك خدمه مستعجله اوى ... و عليكم السلام يا سيدى ها هتساعدنى و لا لا
..............................
فى الشركه عند بياتريس
أمير/ اوعى تفتكرى ان الناس دول هيسموا عليكوا آنسى
بياتريس / و انا مالى بكل ده طيب
أمير/ مش انتوا اللى طالقينهم فى الشركه
بياتريس / لا الحقيقه مش انا انا بس ما اعترضتش خصوصا ان حضرتك متجاهلنى و مش بتعلمنى الشغل
أمير/ انا قولت لك اهم حاجه شهادتك ... خلصى اللى فاضل لك و تعالى اتعلمى انما عاوزه تبقي رئيسه مجلس اداره و آنتى معاكى ثانويه عامه و يا ريتك جايبه مجموع
بياتريس / ايه الكلام القديم اوى ده يا عمو و بعدين انا ما قولتش هبقي رئيس مجلس الإدارة و لا حاجه انا قولت ابقي جنب حضرتك و اساعدك
أمير/ و الجماعه اياهم وخدينك جنبهم و بيعلموكى
بياتريس / حاليا اه ... بس دا بشكل مؤقت ما تقلقش ... لحد ما حاتم شركس يتجوز مهره و ساعتها
أمير/ حاتم مين اللى هيتجوز مهره... مهره مين ؟ مهره مهره
بياتريس / هو فى كام مهره بس يا عمو مالك
أمير/ و دا هيتجوزها ازاى ده
بياتريس / دا جايب ليها حته كوليه الماظ انما ايه حكايه
أمير/ و الله !!
بياتريس / باذن الله لما ربنا يتم لهم على خير حاتم اكيد مش هيسيب اهل طليق مراته يدخلوا فى الشركه اكيد هيمشيهم و هيمسك مكانهم بس بصراحه مش متأكده اصل حاتم و عمران صحاب جدا
أمير/ ايه العك ده
بياتريس / انا عارفه ان الموضوع يبان ويرد من بره بس صدقنى لو شفتهم بيتمرنوا سوا فى النادى هتفهم كلامى كويس
أمير يتنهد
أمير/ عن اذنك عشان ورايا معاد مهم
أمير يمشي و بياتريس بتضحك
.......................
أنت تقرأ
الكبيره ٢ بقلم / لولو_محمد
Humorالحرب لسه مستمره و الحقيقه مسيرها فى يوم تظهر النور و كل واحد لازم يختار طريقه
