الكبيره ٢ بقلم / لولو_محمد

الحلقة ٤٣

((((((( الكبيره ٢))))))))
#لولو_محمد
الحلقه ٤٣
نجاه بتلم السجاده و جوزيف قاعد فى الارض و ساند ضهره على الكنبه
نجاه / هو بغض النظر انك طلعت فستك بس تمام اوى حلو انا مبسوطه منك
جوزيف / فستك !! دا انتى تحمدى ربنا انى لسه قادر اقف على رجلى اصلا بعد كل اللى حصل انا ضهرى قاتلني على فكره و للاسف معيش حتى حبايه مسكن واحده
نجاه / سلامتك ... و بعدين كلو بثوابه يعني ... انا عاوزه انام هم طولوا كدا ليه انا بجد بدات ازهق ... و الله لما اطلع لوريك يا جابر على حبستى دى
نجاه تبص حواليها بزهق
جوزيف / احسن اديله ما تسكوتيلوش و انا فى ضهرك ما تقلقيش ... بس على العموم الكنبه اهى افردى ضهرك و نامى عادى يعني
نجاه / لا طبعا ما ينفعش انت موجود
جوزيف / لا يا شيخه انتى لسه واخده بالك انى موجود دلوقت !! طب اعمل ايه يعني ما اكيد مش هحبس نفسي فى الحمام يعني
نجاه / انا ما قولتش كدا و بعدين يا سيدى انت على راسي بس انا بجد بدات اتخنق من الوضع ده هم اتاخروا كدا ليه
جوزيف يقوم يقف و يبص على المكان و يروح يقلب الكنبه يوقفها على ايدها و يلفها و يرجع ينزلها بالراحه تبقي ضهرها ناحيته يزقها فى الحيطه تبقي كانها صندوق مفتوح من فوق و مقفول من الاربع جوانب
جوزيف / اتفضلى اوضه منفصله اهى
..............................
جوزيف يقعد فى الارض و يسند ضهره على الحيطه نجاه تبصله و تلم الشلت اللى وقعت فى الارض و تحطها و تمدد فى الكنبه و تقوم تقعد و تبصله من فوقيها
نجاه / يونس .. اوعى لما اروح فى النوم تقوم تبص عليا
جوزيف / اتوكسي
نجاه / حاضر
جوزيف يضحك و نجاه تمدد و هى لسه مفتحه جوزيف يقوم يجيب المصحف و يقعد مكانه تانى و يقعد يقلب فيه و نجاه باصه للسقف تتنهد و تقوم تبص عليه تلاقيه ماسك المصحف تبتسم و ترجع تنام تانى و تروح فى النوم جوزيف يقوم يروح يجيب ازازه الميه يلاقيها فاضيه ياخدها و يروح ناحيه الفلتر فى الحمام و يفتح الحنفيه ما بتنزلش مايه يخبط عليها بالراحه مفيش يحط الازازه على الحوض و يسند عليه و يبص فى المرايه و بعدين يطلع بره يبص على نجاه رايحه فى النوم يبص على الباب فى السقف و يروح يفتح التلاجه فيها تفاح و فاكهه يقفلها و يروح يقعد فى مكانه يبص المصحف فى الارض مكان ما كان سايبه و يمسكه يبصله و هو بيفكر
//////////////////
جوزيف / انا مش قادر افهم حاجه ... ليه واحده زى دى ما بتعملش حاجه غير انها تنفذ كل كلامك بالحرف تتعرض لكل ده و فى ناس تانيه بتعمل كل حاجه حرام و غلط عايشين متهنيين و لا على بالهم اى حاجه ... نجاه بتقول انى ممكن اكلمك و انك سامعنى و انك بتكلمنا من الكتاب ده او بتدينا اشارات يعنى انا لو قريت من المصحف ده هترد عليا و تريح بالى و تجاوبني ... و لا فى حاجه هتحصل ترد بيها على سؤالى و لا المفروض استنى ايه بالظبط
//////////////
جوزيف / بسم الله
جوزيف يفتح المصحف على صفحه عشوائيه
جوزيف / وما هذه الحياة الدنيا إلا لهو ولعب وإن الدار الآخرة لهي الحيوان لو كانوا يعلمون ... ما فهمتش حاجه ... مش فاهم
جوزيف يقفل المصحف و يفتحه على صفحه تانيه عشوائيه
جوزيف / إن الذين كذبوا بآياتنا واستكبروا عنها لا تفتح لهم أبواب السماء ولا يدخلون الجنة حتى يلج الجمل في سم الخياط وكذلك نجزي المجرمين لهم من جهنم مهاد ومن فوقهم غواش وكذلك نجزي الظالمين ..  طب هو انا بقرا صح اصلا انا مش فاهم حاجه ... اخر مره
جوزيف يقفل المصحف و يفتحه على صفحه عشوائيه تالته
جوزيف / من عمل صالحا فلنفسه ومن أساء فعليها ثم إلى ربكم ترجعون ... طب هم التلاته نفس المعنى و لا انا بطبق الموضوع غلط اصلا و لا ايه
جوزيف يتنهد و يقفل المصحف و يفرد نفسه و ينام فى الارض اول ما يقفل عينه يروح فى النوم
.......................
فى جنينه الفيلا
جابر واقف بيزعق مع واحد
جابر / نص ساعه بالكتير و الوصله دى تكون شغاله انتوا ايه اللى جابكوا جنبها اصلا يعني كل الهدم ده رايح تحفر هناك ليه انا مش قادر افهم
الراجل / اقل من نص ساعه ان شاء الله و كل حاجه هترجع زى ما كانت باذن الله
جابر / افلح ان صدق ... صبرنى يا رب
جابر يروح ناحيه دياب بيتكلم فى التليفون و هو بينفخ و بيضرب كف على كف
دياب / تمام سلام انت دلوقت
جابر / ابوس ايدك قولى انه طلع خلينا نشتغل عدل بقي هتبقي انت و هم عليا
دياب / بقولك ايه انا ما ليش دعوه روح كلم خالك
جابر / و هو خالى بقى بيسمعلى الخواجه سحرله
دياب/ لا يا راجل
جابر / فاكره رشيد صاحب عمره و بيتعامل معاه على الأساس ده و واخده تحت باطه فى الرايح و الجاى و لا كانهم من دور بعض
دياب / يمكن تكتيك بس على العموم الله يرحمه دخل و ما خرجش و هروح دلوقت أبلغ خالك بالخبر
جابر / حاول تقنعه ان الحى ابقى من الميت و ان نجاه
مختار يدخل
مختار / نجاه انت اللى حاطتها جوه و ماكدلى انها هتكون بأمان صحيح اللى سمعته ده نجاه المايه قطعت عندها
جابر / الراجل كسر الماسوره و كان لازم اقفل المحبس العمومى و الا الدنيا هتغرق كلها
مختار / ما تغرق انت متخيل هى حاسه بايه دلوقت من غير مايه انت متخيل خضتها و خوفها اسمع انت المسؤل قدامى انت فاهم و لا لا
دياب / بعد اذنك بس يا عمى كنت عاوز أبلغ حضرتك بحاجه
مختار / على الله تكون خير
دياب / يونس ما خرجش و مفيش اى أجسام حراريه من ساعه ما المبنى وقع و دا معناه انه اتوفى
جابر / اعتقد بقى ان الحى ابقي من الميت و تخلينا نشتغل على الأساس ده عشان ننجز و نطلع نجاه
مختار / إكرام الميت دفنه يا جابر
جابر / ميت واحد احسن من اتنين و دى نجاه يا خالى ... نجاه
مختار / شكلى ما كانش المفروض اثق فيك من الاول
جابر يبان على وشه القهر
مختار/ اعمل اللى انت شايفه المهم تخرجها
مختار يمشي دياب يطبطب على جابر
دياب/ ما تضايقش نفسك بيشدوا علينا كلنا كدا و اكتر ما تخليش كلامه يأثر عليك ركز فى المهم ..  خرج نجاه من البتاع ده
جابر يبص لدياب و يروح ناحيه الرجاله
.........................
فى اوضه نجاه
نجاه تصحى تلاقى الدنيا ضلمه كحل تتخض
نجاه / يونس !! يونس !!
جوزيف / جنبك
نجاه / هو ايه اللى حصل
جوزيف / المولد فصل
نجاه / يعني ايه !!
صمت نجاه تحس بحركه بطيئه
نجاه / انت رايح فين
جوزيف / بجيب موبايلي اعتقد ان ممكن يكون لسه فيه شويه شحن ينور لينا شويه
نجاه / تمام
نور كشاف الموبايل ينور
جوزيف / للاسف خمسين فى الميه بس ... مش هيقعد كتير
نجاه / هو احنا امتى دلوقت
جوزيف / الساعه عشره و نص الصبح
نجاه / ازاى المولد يفصل بالسرعه دى
جوزيف / عشان اكيد ما كانوش عاملين حسابهم ان المكان يقع علينا و يتأخروا كل ده على ما يطلعونا
نجاه تقوم تروح ناحيه الحمام فى صمت 
جوزيف / فى خبر كمان
نجاه تبصله
جوزيف / المايه قطعت امبارح
نجاه تبص فى الارض يناولها الموبايل و يروح يقعد مكانه
جوزيف / الخبر الكويس ان فى مناديل و ويبس فى الحمام انا هقعد هناك و مش هتحرك ... اصلا مش قادر اتحرك
نجاه تدخل الحمام و تقفل الباب صوت دربكه و تخبيط نجاه تطلع من الحمام
نجاه / الشفاط قفل
جوزيف / طبيعي مش المحول فصل طبيعي الشفاط كمان يفصل
نجاه / يعني مساله وقت مش اكتر مش كدا !!
جوزيف/ خفتى ؟!
نجاه / انا عارفه انهم مش ساكتين و انهم عاملين اللى عليهم و اكتر بس ... الدقيقه هتفرق
جوزيف / انا شخصيا مطمن قولتلك ال bad boys  ما بيموتوش موته عبيطه زى دى
نجاه / انت رايق لدرجه تشل
نجاه تدخل الحمام و تقفل الباب جوزيف يبرطم
جوزيف / انا مش خايف غير عليكي انتى
...........................
فى الجنينه
عربيه تدخل و عباده ينزل منها يروح يساعد و يكسر معاهم مختار يشوفه يروح يشده بعيد
مختار / انت جيت امتى
عباده / بعدين نتكلم خليني اساعد خليها تطلع
مختار / يا عباده انت تعبان انت من يوم ما وقعت ما ارتحتش عاوز تقع مننا تانى يعني
عباده / و انا هرتاح و بنتى تحت لوحديها لا مايه و لا نور يا مختار
مختار/ انت عرفت !!
عباده / هنام انا و مش هتابع لحظه بلحظه يعني ... اقسم بالله انت ما عارف الكام ساعه دول عدوا عليا ازاى ... بس كان لازم اتسحب عشان ما حدش فى البيت يحس بحاجه دى خديجه لو عرفت تروح فيها
مختار/ هتطلع و تبقي زى الفل خلى املك فى ربنا كبير و بعدين نجاه معاها اكل ياما يعني مش هتموت من الجوع و لا حاجه
عباده/ مش بتقولوا زمان المحول فصل يعني زمان الاكل باظ يا مختار هتاكل اكل بايظ يا مختار
مختار / الاكل مش كله فاكهه فى بسكوت و شيكولاته و حاجات ما بتبوظش ما تقلقش
عباده / و قاعدتها فى الضلمه لوحديها كانها فى قبر يا مختار هتعدى بالساهل الثانيه هتعدى كانها سنه
مختار/ هى عارفه اننا هنطلعها بنت عاقله و هاديه هتقعد تسبح و تصلى لحد ما نطلعها ما تقلقش
عباده / انت جايب البرود دا منين
مختار / مش برود انا على نار زيي زيك انا ما غفلتش ثانيه العمال بيبدلوا ورديات و انا و عيالك مطبقين ما حدش من الزنايته غفله جفن شغالين بايدينا و رجلينا عشان نطلعها هنعمل ايه تانى ما باليد حيله يا راجل
عباده يبص على الرجاله خليه نحل شغاله
عباده / لقيوا جثته ؟
مختار / لسه
عباده / دياب فين
مختار / لقينا الباك اب ديسك اللى متخزن عليه تسجيلات الكاميرات الاحتياطي لو النور او النت فصلوا بس مكسور فراح عند فاروق يحاول مع المهندسين اللى معاه يشتغلوا فيه اياكش يطلعوا منه باى حاجه
عباده / و دا ممكن يطلع منه ايه يعنى
مختار / ما اعرفش لما يفتحوه هنشوف لعله خير
عباده يمسك ايد مختار
عباده/ تفتكر تكون خرجت من الاوضه لاى سبب
مختار / و هى ايه اللى هيخرجها من الاوضه بس
عباده / شافتهم بيهاجموا الفيلا خدتها الجلاله و طلعت لهم يا مختار انت هتوه عن جنانها
مختار / هتطلع لكل دول و من غير سلاح يا ابنى ما هى قدامها الكاميرات و عارفه انهم جيش بحاله هتطلع تعمل ايه بس ... نجاه مجنونه اه لكن مش غبيه
عباده/ طب لو كانت
مختار / ما طلعتش يا عباده اهدى بقي و ارتاح اجيبلك حاجه تشربها
عباده / و لا زاد و لا مايه لحد ما بنتى تبقي فى حضنى ... أنا هروح ابص على دياب لو فى جديد بلغنى
مختار / اول واحد هتعرف
عباده يبص تانى على الارض و يغمض و يتنهد و يمشي
مختار/ لا حول و لا قوه الا بالله ربنا يعديها على خير
.........................
فى الاوضه
نجاه ممدده فى الكنبه مكانها و يونس على الارض فى ظلام تام نجاه تفتح الموبايل تشوف الساعه
نجاه / يونس
يونس / نعم
نجاه / العصر قرب ياذن قوم نصلى الضهر بدل ما هيروح علينا
يونس / ينفع من غير وضوء
نجاه / ينفع هنتيمم
بونس / ازاى ده
نجاه / هعلمك
نجاه تشغل الكشاف و تروح ناحيه يونس و تقعد جنبه فى الارض و تعلمه يتيمم
يونس / طب الوضوء بالمايه طهاره و نضافه و فهمتها انما ده ايه بقي
نجاه / المصحف ده قانون ربنا فى الارض فيه كل حاجه ممكن تتخيلها و فيه لو ما فيش مايه تعمل كدا ليه بقي دى حاجه ربنا ادرى بيها يمكن بعد سنين العلماء يكتشفوها و يمكن اكتشفوها و انا ما اعرفش هنبقي نحاول نبحث انا و انت على الاجابه لما نطلع من هنا باذن الله بس دلوقت بنقول سمعنا و اطعنا تمام
يونس / تمام اى حاجه تقوليها تمام 
يونس يقلدها
نجاه / يلا عشان تام بيا
يونس / اما نشوف اخرتها
نجاه / خير بإذن الله بقي يلا سمى و ابدا
يونس / تمام
يونس يقف فى اتجاه القبله و نجاه وراه يكبر و يصلى
.........................
فى شقه فاروق
وفاء / مفيش فيه امل يا دياب و بعدين هتطلع منه بايه يعني
دياب / تفتكرى بالعقل كدا عاش عمره كله فرقع لوز و فجاه يموت كدا بالبساطه دى
وفاء / مالك يا دياب و ابسط من كدا كمان فى ايه و بعدين سبحان الله يا اخى عاش عمره فرقع لوز و مات لما اسلم ربنا بيحبه
دياب / و انتى بقي صدقتى انه تاب و حسن الخاتمه و كدا
وفاء / دى حاجه بينه و بين ربنا ما تخصكش و بعدين ليه لا ما يمكن فعلا مش كنت بتقول بيصلى معاكوا و بعدين ما ابوه على ما اسمع كان زيه كدا و سبحان الله ربنا تاب عليه فى اخر أيامه برضه ... دياب انت زعلان انه مات و مش مصدق و لا انت مستكتر عليه يموت و هو تايب
دياب يبصلها
وفاء / تمام كمل حاول فيه لاخر مره يمكن يفلح معاك انا هروح اساعد الحريم فى الاكل
دياب يهز راسه وفاء تطلع يفضل يبص للجهاز و يتنهد
..............................
فى الاوضه
نجاه تشغل الكشاف بتاع الموبايل و تقوم تروح تقعد جنب يونس يتعدل و يقعد
نجاه / طب ما تعرفش هم كانوا كويسين و لا لا
جوزيف / ما حدش اتعرض لهم اصلا يعني خلصوا اللى عملوه و مشيو
نجاه / ليه ما حدش أتعرض لهم ليه سابو لهم الدنيا بسهوله كدا ليه
جوزيف / عشان هم كانوا راسمين خطه تانيه و احنا فيها اهو
نجاه / ايوه ... فهمت
جوزيف / خايفه ؟
نجاه / مش عيب على فكره ... الموبايل هيفصل فى اى وقت و ساعتها... حتى الوقت مش هنقدر نعرفه
جوزيف / دا اسوء مخاوفك
نجاه / لا مش الأسوء يعني ... اصل هم كدا كدا هيطلعونا انا متاكده بس
جوزيف / الهوا يخلص مثلا
نجاه/ ازاى يعني احنا
جوزيف / احنا تحت الارض و نظام التهويه بين قوسين الشفاط ده وقف بقاله كتير يعني
نجاه / ايوه بس مش معنى أن الشفاط وقف ان
جوزيف / تمام
نجاه / معناه كدا فعلا ؟؟
جوزيف/ انا متاكد انهم شغالين زى النحل فوق
نجاه تروح تسند ضهرها للحيطه و تاخد رجليها فى حضنها و تسند راسها على ركبها هى حاضنه رجليها و بتبص لجوزيف باصص ليها
نجاه / انت بتقول الباد بويز بيعيشوا اطول بس انت ما عدتش باد بوى دلوقت انت توبت
جوزيف / يعني هموت هههههههههه تسلمى بجد مش عارف من غير كلامك ده كنت هكمل ازاى
جوزيف يضحك تسحب الموبايل و تفتح نوته و نكتب جوزيف يشوفها يروح يبص
جوزيف / انا بحبك يا ماما سامحيني لو كنت تعبتك و ما تزعليش هنتقابل
نجاه / بس بقي عيب
جوزيف / طب اكتبى كلمتين لابوكى طيب دا حتى الغالى يعني 
نجاه / اسكت لو سمحت
جوزيف / انتى خلاص ناويتي تموتى هنا يعني ؟
نجاه / يعني بعمل حسابى
جوزيف / طب قوليلهم انى مش مسامحهم
نجاه تبصله
جوزيف / اكتبى قوليلهم يونس مش مسامحكوا على التغفيله دى ... قال و انا اللى جيت جرى عشان بنتهم
نجاه / كنت بتفكر فى ايه صحيح تدخل لوحدك قصاد كل دول
جوزيف / بس شوفتيني !! سففتهم التراب
نجاه تضحك
جوزيف / تفتكرى انا لو كنت فكرت ثانيه كنت عبرتك انتى بهرجى صح ؟! دى لحظه جدعنه غير مبرره و مش هتتكرر دا مرار طافح زى ما بتقولوا
نجاه/ ندمان يعني
جوزيف / بصراحه لا
نجاه / الله !!  بس انت ممكن تموت هنا معايا على فكره
جوزيف / لا مش هنموت هنا اطمنى ... و بعدين ما كدا كدا كلنا هنموت فى يوم من الايام يعنى فرقت ايه على الاقل قضيت الوقت ده معاكى ... على فكره انا مش مضايق خالص
نجاه / عشان هتتخانق مع جابر و تكيده لما تطلع انا عرفاك
جوزيف / امممم يعني ..  بس هو مش هيكون لوحده دلوقت زمان البلد كلها فوق ... خليها وقت تانى ... استفرد بيه لوحدنا
نجاه / انت رخم جدا على فكره
جوزيف / و انتى برائتك تفقع
نجاه / شكرا
جوزيف / اكتبيلهم انى سليتك و انى كنت شاب مؤدب
نجاه تبتسم جوزيف يقوم يروح يجيب شيكولاته من التلاجه و يناولها لنجاه
نجاه / هتعطشنى
جوزيف / انتى عارفه انى جنتل مان جدا يعني انا حرفيا ما اكلتش اى حاجه زيك بالظبط فمن فضلك كلى حاجه
نجاه / كل انت ... حتى لما تطلع لجابر يكون عندك طاقه بدل ما ينفخ فيك تقع
جوزيف / دى وجهه نظر مقنعه جدا هاتى الشيكولاته دى
جوزيف يفتح الشيكولاته و لسه هيحطها على بقه يرجع يمد ايده بيها ناحيه نجاه تكسر قطعه و تاكلها
نجاه / بسم الله ... كل بقي و ما تنساش تسمى
جوزيف / بسم الله
جوزيف ياخد مكعب واحد زيها الموبايل يفصل
نجاه / لا اله الا الله عاجبك كدا
جوزيف / و انا عملت ايه اهدى و خليكي مكانك و حاولى تنامى او غمضي عينك
نجاه / لا انا هروح الخن بتاعى مش هينفع هنا
جوزيف / اللى يريحك بس ما تدوسيش عليا و انتى معديه بس مش ناقصه ابوس ايدك
نجاه / هو ضهرك لسه واجعك
جوزيف / واحد نجا من انفجارين و اتشقلب من على سلم و وقعت على ضهره ... خساره فيكي حسناتى اللى لسه ما جمعتهاش يا عالم هلحق اخرج من هنا اعمل غيرهم و لا لا ... بس انا كنت بشتمك ... بس ما شتمتش ... بس عاوز ... بس مش هعمل
نجاه/ طب لو خرجنا من هنا هتعمل
جوزيف / هعمل ايه
نجاه / شكشوكة هتعمل شكشوكة دا مرار طافح
جوزيف يضحك
جوزيف / تيجي نتسلى
نجاه / خير
جوزيف / لو حبيتي تختاري حد غيرى يتحبس معاكى هنا تختاري مين
نجاه / ما حدش و لا حتى انت
جوزيف / ايه طحن الخواطر ده و انا قصرت معاكى فى ايه
نجاه / يا ابنى افهم انا مش بحب اشوف حد بيتوجع او يتأذى خصوصا لو بسببي
جوزيف / يعني كنتى هتبقي لوحدك هنا احسن
نجاه / اكيد لا ... بص الموضوع معقد مش هتفهمه
جوزيف / طب انا و لا جابر
نجاه / على فكره جابر شخصيه لذيذه جدا و راجل و سند و دا من صغره زمان ... لما كانوا الرجاله يتخانقوا و لا حتى يموتوا بعض الحريم ما لهاش دعوه ما حدش يجرؤ يتعرض لحرمه عدوه حتى و تعرف لو عدوى مراته فى ضيقه اموت عشانها و ارجعها له بأمان و بعدين نبقي نشوف اللى بيني و بين عدوى ده بعدين
جوزيف / زمان ده قبل الهكسوس و لا بعده
نجاه / قبل ما جماعتك يدخلوا حياتنا على طول بالسم الهارى بتاعهم ... فجاه لقينا عربيات محمله زومبى هاجمه على السرايا و بتحاول تخطف الحريم ... عارف مين اللى وقف ليهم
جوزيف / جابر ؟!
نجاه / و اخد طلقه يوميها لا قال انا عيل و لا خاف من الموت و لا فكر و لا عيط و لا جرى وقف ليهم بطوله سبع
جوزيف / و قدر عليهم
نجاه/ بقولك بطوله و صغير و اتصاب ... خالى الله يقويه و يعزه دخل كالعاده و انقذ الموقف ... هم كانوا دايما يقولوا على خالى كدا وقت ما تسود مغاورى يدخل و يسد ههههههههههههههه
جوزيف / اسمع عنه .. نرجع لجابر
نجاه / ماله جابر
جوزيف / بالنسبالك ايه
نجاه / ابن عمى و ضهرى و سندى
جوزيف / طب مفيش كميا خالص ... و لا أحياء
نجاه / قصدك حب ؟! عشان هو بيحبنى و لا عشان انا رفضت اتجوزه
جوزيف / انا لما بجيب سيرته بتبقي هتكليني ما بفهمكيش
نجاه / سلونا كدا انا و اخويا على ابن عمى و انا و ابن عمى على الغريب
جوزيف / يعني ما بتحبيهوش ؟ ابن عمك و بس
نجاه / ما ينفعش ديكين فى عشه واحده انا و جابر لو اتقفل علينا باب هنخسر بعض
جوزيف / اوعا يعنى انتى عاوزه عيل طرى تتجوزيه
نجاه / عاوزه راجل يجبرنى اكون فرخه ... و بمزاجى عشان ما تفتكرش انى اقصد يلويلى دراعى او كدا عشان انا دراعى ما بيتلويش دا انا اهلى ياكلوه اكل
جوزيف / و جابر مش قادر يخليكي تحسي انك عاوزه تبقي فرخه .. فرخه ايه يخربيت مصطلحاتك بوظتى لسانى
نجاه تضحك
جوزيف / ما بتحسيش انه ارجل منك فترضي انتى بدور الأنثى اقصد
نجاه / راجل و سيد الرجاله ... بس العيب فيا انا ... ما اعرفش الموضوع ما بيتشرحش ... مش حاسه انى قد الجواز عموما
جوزيف / كنت عاوز اقولك بس انك ضمناه عشان كدا مش شيفاه بس انتى ما حبيتيهوش اللى بيحب حد ما بيفكرش بعقله ... ما بيرتاحش غير فى حضنه
نجاه / كل شئ ممكن
جوزيف / طب مش صعبان عليكي سنين عمره اللى بتفوت تحت رجليكى دى
نجاه / قولتله يتجوز على فكره هو اللى رافض
جوزيف / و مش هتضايقي لما يختار غيرك و البنت دى تغير منك و تمنعه يتعامل معاكى او بيته يخرب بسببك
نجاه / مفيش الكلام ده
جوزيف / هو اعقل منك لانه عارف ان الكلام ده هيحصل
نجاه / احنا اتربينا فى بيت عيله يعني بنتعامل مع بعض طول الوقت
جوزيف/ بس ما بتحبوش بعض الحب ده عشان يظهر النوع ده من الغيره
نجاه / ما فكرتش فيها
جوزيف / هو جابر مش وحش على فكره بس انا احلى هههههه
نجاه / مش بالشكل 
جوزيف / هههههههه يعني انتى شيفاني احلى فى الشكل 
نجاه / ما تحورش كلامى
جوزيف / ما حورتش انتى اللى لسه قايله
نجاه / فى حاجات كتير تانيه اهم
جوزيف / و جابر بقي عنده ايه مش عندى او اكتر منى
نجاه / ما هى ما بتتقاسش كدا برده
جوزيف / امال بايه
نجاه / مش عارفه ... بس من غير زعل لو المقارنه بينك و بين جابر ... جابر يكسب
جوزيف / تؤ مش هيكسب و هو عارف ده كويس على فكره
نجاه / غير الموضوع 
جوزيف / ليه دا موضوع حلو جدا ... ماشي انا جنتل مان تحبى تتكلمى فى ايه
نجاه / سبح احسن خد ثواب خد ثواب
جوزيف / بس انا عاوز اتكلم
نجاه / فى ايه طيب
جوزيف / و لا حاجه سبحى سبحى
نجاه / ممكن اسالك سؤال وحش 
جوزيف / خير
نجاه / انت عشت بره مع الخوجات و مش هتكلم عن انك كنت ايه يعني ما كانش فى حاجه بالنسبالك حرام اقصد ... اقصد يعني انك مع الاجانب يعني ... البنات
جوزيف / حصل
نجاه / و ما خفتش
جوزيف / من ايه انتى بتتكلمى عن ايه لتكون دماغى راحت فى حته تانيه
نجاه / انها تحمل ... انك تكون اب ... انك مثلا يكون ليك ابن او بنت فى اى مكان فى الدنيا ما تعرفش عنه حاجه
جوزيف / لا ما ليش
نجاه / واثق اوى مش يمكن التاريخ يعيد نفسه
جوزيف / الدنيا دلوقت بقت غير زمان و انا غيره
نجاه / واثق اوى برده
جوزيف / ايوه واثق و واثق جدا بصي الموضوع بالنسبالى كان شغل مش اكتر يعني انا عارف هم كانوا كام واحده و عارف دلوقت كل واحده فيهم فين بالظبط
صمت
جوزيف / سكتى ليه
نجاه / انت لسه على علاقه بيهم
جوزيف / لا 
نجاه / امال عارف مكانهم فين بالظبط منين
جوزيف / عشان معظمهم ماتوا الا اتنين او تلاته انا عارف انهم ما حملوش
نجاه / تمام
جوزيف / نبره صوتك اتغيرت
نجاه / هو الموضوع كله ما يخصنيش بس كان فضول مش اكتر
جوزيف / بس اضايقتي
نجاه / عادى الاسلام يجب ما قبله
جوزيف / اهى لغتكوا دى اللى معقدانى فى عيشتي دى انهى لغه دى
نجاه / ههههههه عربى يعني بيمسحه و يهدمه كانه ما كانش يعني
جوزيف / يعني انا مش فاهم انا واحد ماسك مصحف بقرا فيه مش فاهم اى حاجه هؤمن بيه ازاى
نجاه / ما هو مترجم لكل اللغات
جوزيف / و انا بتكلم قدامك مريخي ما انا بتكلم عربى اهو
نجاه / معلش بس عشان العربى بتاعنا دلوقت مش عربى عربى دا عاميه هجين لغات و لهجات كتير لكن العربى الاصلي هو الفصحى لغه العرب زمان ايام الرسول صلى الله عليه و سلم ... قول عليه الصلاه والسلام
جوزيف / عليه الصلاه و السلام
نجاه / قولى بقي يا سيدي ...دا موضوع حلو اوى نتكلم فيه ... انت قريت ايه و ما فهمتوش
جوزيف / مش فاكر بالظبط الكلام كان صعب ما فهمتش عاوز يقول ايه
نجاه / طب حاول كدا تفتكر اى كلمه معلقه معاك افكر معاك يمكن نوصل للايه  .. انت ذكى ما شاء الله عليك و لماح و انا متاكده انها ثبتت لى دماغك
جوزيف / مش فاكر بجد
نجاه / تمام و لا يهمك انا اصلا كنت عامله حسابى على حاجه زى دى عشان كدا كنت جيبالك فوق المصحف المفسر و شويه كتب حلوه باذن الله لما نطلع من هنا قريب هجيبلك واحد تانى تقرأ الايه و تقرا التفسير بتاعها و لو فى اى حاجه وقفت قدامك بعدها تقدر تسأل على فكره كلنا جنبك و هنساعدك
جوزيف / بيتهيالك ما حدش اصلا طايقني فيهم غيرك ... كانى اذيتهم هم و ما اذيتكيش انتى
نجاه / يونس عمره ما اذانى انما جو بقي انا لو شوفته هطلع تلاته عين اهله
جوزيف يضحك
نجاه / عندى امل كبير اوى فيك و عندى امل اكبر انك مش هتخيب املى ده
جوزيف / املين بحالهم كتير عليا بجد مش عارف اقولك ايه
نجاه / ما تقولش و يا ريت تستغل الظلام الدامس ده انك تنام شويه و تريح انا رايحه الخن بتاعى لم رجليك لحد ما اعدى
جوزيف / آآآآآآه ايدي دى انتى جايه على كساحى يعني
نجاه / ايه اللى جاب ايدك هنا اصلا مش بقولك لم رجلك
جوزيف / روحى خنك ده و انتى ساكته
نجاه / اسفه ما شوفتش كان غصب عنى يعني سورى ... وصلت اهو .. خد راحتك انت فى امان
الاتنين يضحكوا
.....................
فى شقه مهره
مروان قاعد فى جنب سرحان و مهره بتحط اكل على السفره
مهره / الغدى يا مروان
مروان لسه سرحان مهره تستغرب و تروح له ينتبه
مهره / اللى واكل عقلك الاكل اتحط
مروان / تسلم ايدك
مروان يقوم يروح يقعد مع مهره على السفره و يحط موبايله جنبه و يقعد يلعب فى الاكل مش بياكل
مهره / مالك فى حاجه و لا ايه
مروان / لا ما تاخديش فى بالك حوارات الشغل اللى ما بتخلصش
مروان ياكل
مهره / الكافيه و لا الالبوم
مروان / سيبك ... اخبار رامى ايه
مهره / بتسألني انا عن صاحبك
.............................