الكبيره ٢ بقلم / لولو_محمد

الحلقه ١٢٦

(((((( الكبيره ٢))))))
#لولو_محمد
الحلقه ١٢٦
جابر / مش هقول غيران يا عم مش هقول اى حاجه ... بس على الاقل عمى ما يزعلش منها تانى
عمران / مش يمكن عشان هى مصدقاه... زى ابويا كدا ما مصدقه برده
جابر / يا عم بقي
تليفون عمران يرن رساله
عمران / بيقولك الأجانب جايين يشتروا خيل و عاوزين يتفاوضوا معايا على السعر
جابر / روح لهم
عمران/ اروح لمين يا عم هو انا ببيع
جابر / يا عم فرصه خد نجاه و مهره و شويه رجاله و اخلع
عمران / ازاى يعني و مازن و الباقيين
جابر / انا موجود و هو مش يونس جه هنا عشان يلعب و ينبسط و يعيش طفولته... اكيد مش هيجي وراكوا الاسطبل و هيحرس معانا هنا يعني هيعوض كل الرجاله اللى هتاخدوهم
عمران / بس احنا ما سالناش على الجماعه دول برده يعني بدا ما اروح اقابلهم لوحدى هاخد نجاه و مهره الاتنين معايا
جابر / مش هو قال مش تبعها ... خلاص و بعدين ما انت هتبقي معاهم انت و الرجاله ما تقلقش خدهم و روح و ما لكش دعوه
عمران / بصراحه مش قادر اقول لا دا انا اتخنقت هنا ..  هروح لهم اقول لهم
جابر يبتسم و يهز راسه عمران يروح يقف مع نجاه و يقول لها تستغرب كلامه
.......................
فى الاسطبل
عمران يدخل يسلم على الرجاله
عمران / I Am sorry for being late I Came as fast as I could
( اسف على التأخير انا جيت باقصي سرعه )
الاجنبى / never mind we own a horse show company that is interested in beautiful and rare horses like yours
( و لا يهمك احنا شركه عروض للخيل بنهتم بالخيول الجميله و النادره زى بتوعك )
عمران / I have been told that and unfortunately I have no intention to sell any of my horses they are all priceless to me physically and emotionally but there is a lot other horses here I am sure you would like I can give you a tour until you find something you like
( قالولى بس للاسف انا مش ناوى ابيع اى واحد من خيولى لأنهم بالنسبالى غاليين جدا عليا ماديا و معنويا بس فى خيول تانيه هنا هتعجبكوا و انا مستعد افرجكوا عليهم لحد ما تلاقوا حاجه تعجبكوا )
الاجنبى / we were talking and actually I have seen a few good horses one of them I have been told it’s your wife’s
( احنا كنا بنتكلم و شوفت شويه احصنه كويسه واحد منهم اتقالى انه بتاع مراتك )
عمران يبتسم
عمران / I don’t think she would say anything different
( ما اعتقدش انها هتقول اى حاجه مختلفه )
الاجنبى / come one man I Came all that way at lest give me one good horse to go back home with I will make it worth it believe me
( يا راجل بقي انا جيت المسافه دى كلها على الاقل اديني حصان واحد كويس اروح بيه صدقني هدفع كويس )
الاجنبى 2/ listen listen why don’t we all just take a break and set somewhere and eat something and talk … man I am really tired it is a very long way here
( اسمعوا اسمعوا احنا ليه ما نرتاحش شويه فى اى مكان و ناكل لقمه و نتكلم ... انا بجد تعبان من الطريق
عمران / of course of course please forgive me I will give you a full board hospitality here I promise you will never regret or forget it
( طبعا طبعا ارجوكوا تسامحوني انا هستضيفكم استضافه كامله هنا و اوعدكوا انكوا لا هتندموا و لا تنسوها )
الرجاله تبص لبعض و تهز راسها موافقين
عمران يشاور ليهم على الطريق يمشوا يروحوا ناحيه البوابه واقفه يشوفوا مهره و نجاه واقفين جنب واحد من الخيول فى جنب  يبصوا لبعض واحد فيهم يهز راسه
الاجنبى ١ / aren’t they mohra and nagat the famous horse riders
( مش دول مهره و نجاه الفارستين المشهورين )
عمران / yes they are
( اه هم )
الاجنبى ١ / can we talk with them for a second
( ممكن نتكلم معاهم ثانيه )
عمران يتحرج و يبتسم و يهز راسه تمام
الاجنبى ٣ / I will wait in the car
( هستنى فى العربيه)
الاجنبى ٣ يروح بره الاسطبل و هو بيبص يمين و شمال على الرجاله الموجوده
........................
فى الملاهي
جوزيف يبص يمين و شمال و جابر متابعه جوزيف يطلع موبايله و يبص فيه و يجي يمشي
جابر/ على فين لحقت تزهق من الألعاب
جوزيف / نجاه فين ؟
جابر / و انت مالك بيها انت جاى تنبسط معانا و لا جاى لنجاه
جوزيف / مش وقت هبل نجاه فين و ازاى تشيل عينك من عليها 
جابر الابتسامه تروح من وشه
جابر / نجاه مع عمران فى الاسطبل و معاهم رجاله كفايا ما تقلقش ... قولت انك معانا هنا فهتعوضهم
جوزيف يجي يمشي جابر يمسك ايده
جابر / على فين
جوزيف/ اوعى
جوزيف يسحب ايده و يجرى يركب تاكس معدى و جابر متابعه و مخنوق يطلع الموبايل و يتصل بحد
........................
فى الاسطبل
مهره تتكلم بالاشاره و عمران يرد عليها و الكل واقف مستني و الأجانب بيتلفتوا بهدوء
مهره / انا ما اعرفش ان ليا خيل هنا اصلا
عمران / ليكي بس انصحك ما تفرطيش فيهم بسهوله بس لو مش فارق معاكى فهم هيجيبوا سعر حلو كدا كدا و اى كان اللى هيدفعوه انا هدفعه الخيل دى مش سهل تلاقيها او تعوضيها
مهره / انا مش عاوزه فلوس خليهم خلاص
عمران يرد على الراجل
عمران / I told you she won’t say any different
( قولت لك مش هتقول حاجه جديده )
فجاه عربيه الأجانب تكسر البوابه و ينزل منها الراجل يضرب النار فى رجاله الحراسه و كل واحد من التلاته اللى جوه يشتبك واحد مع عمران و التانى ابو شعر طويل و ناعم مع نجاه و التالت مع مهره اللى مش عارفه تقاوم اصلا و تفقد الوعى من اول ضربه الراجل يشيلها و يروح يرميها فى العربيه عمران و نجاه يحاولوا يجروا عليها اللى قدامهم جامدين و اى حد بيقرب الراجل بيضربه بالنار الراجل اللى كان مع مهره يروح يسحب سلاح و يضرب عمران طلقه فى رجله يقع فى الارض الراجل اللى قدامه يضربه فى وشه و ينزل فيه ضرب برجله عمران يفقد اتزانه و الرؤيه تلغوش فى عنيه بس شايف خيال نجاه مش قادره على الحيطه اللى نازل فيها ضرب
......................
فى الملاهي
رسايل كتير توصل لكل الرجاله جابر عنيه توسع و لسه هيجرى ناحيه العربيه يبص وراه يرجع
جابر / الكل على العربيات الكل على السرايا حالا
الرجاله يبدأو يلموا العيال بسرعه و الحريم تجرى على العربيات و الألعاب تقف و ينزلوا كل اللى فيها و جابر بيجرى بينهم عشان يتحركوا اسرع
جابر / اتاكدوا ان الكل معانا اوعوا تنسوا عيل و لا واحده ... ما حدش يطلع بالعربيه الا اما يطمن ان الكل ركبوا
جابر يجرى على اتنين رجاله
جابر / اقلبوا المكان عليه فوقيه ما يفضلش مننا حد فى حمام او لعبه مش هنسيب حد ورانا فى الزحمه اتحركوا ... يارب يارب يارب يارب
.......................
فى الاسطبل
عمران بيحاول يقوم الرجاله نازلين فيه ضرب و مش مدينه فرصه فجاه كلاب كتير تدخل و تنط على الرجاله و تنهشهم و امايا تجرى على عمران اللى بيحاول يقوم تحط ايدها على ضهره و الرجاله الاربعه فى الارض بيصرخوا
امايا / خليك تحت ما ترفعش راسك خليك تحت
عمران يحاول يقوم وشه كله دم و دايخ امايا تمنعه
امايا / خليك تحت اصبر اصبر
رجاله تدخل امايا تقف و تشاور عليهم فجاه درون كبير يدخل يرمى عليهم شبكه يعانوا عشان يخرجوا منها امايا تروح ناحيتهم واحد يطلع المسدس ناحيتها
امايا / اضرب و كل اللى هنا هيموتوا او سبنى اساعد و همشي و هسيبك تنقلهم المستشفي
الراجل يبص لها و مش مصدق عنيه و المسدس فى ايده بيرتعش امايا تفك من عليهم الشبكه عمران بيحاول يقف يا دوب ساند على ايده و رجله ترجع تحط ايدها على ضهره
امايا / خليك مش هيعرفوا يفرقوا  ... خليكوا فى الارض قولت اللى هيقف هيموت
امايا تقف و تصفر الكلاب تروح تحت رجليها تمشي بيهم و الكل مصدوم و متابع و قاعد فى الارض لحد ما تعدى و تروح تدخل مبنى و الكلاب وراها الرجاله يبصوا لبعض و يقوموا بسرعه يشيلوا نجاه و عمران من الارض 
............................
فى سرايا زنايته اسكندريه
بنت ١ / و الله تبقي غلطان لو ما عملتش كدا هو انتوا جايين تتحبسوا فى السرايا هنا دا انتوا فى شهر العسل
احلام / شهر ايه بس شهر كتير جدا دا حتى قاسم هينزل بعد بكره المطعم باذن الله
بنت ٢ / و انتى قبلتى عادى
احلام / ما انا هبقي معاه
البنات يبصوا لبعض
احلام/ ناس كتير شكروا فى المكان فطلبت منه اروح اشوفه و اجرب قالى انه لو دخل المكان ما يضمنش يسيبوه يفضل قاعد معايا و لو حصل اى حوار و هو هناك هيضطر يشتغل و انا اكيد مش هكون ضد حاجه زى دى
ست ١ / و حتى لو ما حصلش حاجه هو قاسم كدا بيحب يشتغل ما بيطيقش قاعده البيت بس انا فاكره فرحه من ام مازن الله يرحمها قفلوا عليهم الباب اسبوع ما خرجوش منها ... حتى ما فتحولناش نصبح عليهم قالوا تعالوا بعد اسبوع
الكل يضحك
احلام / الله يرحمها
ست ٢ / حتى لو اليومين بتوع البلد عندكوا شبعوه منك ما تبقيش انتى بقي هبله و تبعديه الست الشاطره تعرف ازاى تشد جوزها و تخليه هيتجنن عليها ... حطى له احمر و اخضر و غيرى لبسك كل شويه
احلام / اعتقد دى حاجات بيني و بين قاسم
ست ٢ / الله ما انتى زى بنتى و حقك عليا اوعيكي
احلام / شكرا بس برده اعتقد ان دى حاجات خاصه شويه اننا نتكلم فيها .. عن اذنكوا
احلام تقوم
بنت ٢ / هى عامله نفسها علينا كدا ليه
ست ١ / ما لناش دعوه احنا اللى غلطانين اصلا اننا بنحاول نقرب منها
.......................
فى مكتب سرايا بحرى
همام / ممكن ما تكبرش المواضيع
قاسم / لا ما احنا مش هنبتديها كدا ايه اول مره اعملها يعني ليه المرادى فيها حوار و قالوا وقولنا
الحجه / يا حبيبي ما حدش قال حاجه و اهدى شويه
ام قاسم / و يهدي ليه ما احنا وحشين و بنعامل ابنه وحش و دلوقت مضطهدين مراته
قاسم / اما ابوس ايدك اهدى عليا
همام / بقولك ايه يا عم الحج انت شكلك مرهق اليوم كان طويل انا شايف انك تطلع ترتاح و لا خد عروستك و ارجعوا الفندق تانى انتوا فرحكوا بكره ما تنكدوش على نفسكوا
الحجه / ايوه هو ده عين العقل و بعدين هتحضروا الفرح مطبقين يعني و لا ايه دا حتى العروسه وشها يبقي منفخ و شكلها مرهق و مش مرتاحه فى الصور
ام قاسم / ما هم اتصوروا هناك هيفرق معاهم فى ايه
قاسم/ برده ... هو انا مش من حقى افرح وسط اهلى
ام قاسم / لو كنا فارقين معاك ما كنتش رمتنا الرميه دى كلنا
قاسم / شايفين
ام قاسم / بتشهدهم على امك يا قاسم ؟!!
همام / قاسم ما كانش فى دماغه الموضوع اصلا انا اللى سعيت له و اقنعته بيه
ام قاسم/ دا على اساس انه نغه و مستنيك تخطط له حياته ... و بعدين تفرق ايه ست احلام دى عن كل بنات العيله و لا حتى اسكندريه لازم يعني نروح نجيب من آخر بلاد المسلمين يعني
الحجه / فات المعاد على الكلام ده خلاص ما ينفعش
ام قاسم / طبعا بس اعمل ايه ما هم كلفتوا الواد فى يومين
قاسم / دلوقت بقيت واد ؟!
ام قاسم / مهما كبرت هتفضل ابنى الصغير فاهم و لا لا
قاسم / مش هكبر عليكي بس باذن الله اعيش لليوم اللى هكبر فيه فى عنيكي... عن اذنكوا
قاسم يسيب المكان و يمشي
ام قاسم / شايفين شايفين قلبته علينا ازاى اقسم لكوا بالله سحراله الواد ما عادش طبيعي
همام / ايه الكلام ده بس يا عمتى
ام قاسم تعيط
ام قاسم / انا لا هتكلم و لا عاوزه من حد حاجه انا ربنا ياخدني و اريحكوا كلكوا منى ربنا ياخدني خدنى عندك بقي يا رب خدنى و ريحنى
الحجه / ايه الكلام ده بقي يا شيخه استغفرى ربنا فى حد عاقل يقول و لا يعمل كدا
ام قاسم / صعبان عليا نفسي اوى صعبان عليا نفسي
الحجه / طب استهدى بالله فى قلبك كدا الموضوع مش مستاهل
ام قاسم / انا تعبانه اوى تعبانه
الحجه / طب اهدى اهدى و الله الدنيا ابسط من كدا
ام قاسم / خدنى المستشفي يا همام بالله عليك انا تعبانه اوى
همام / مالك يا عمتى فى ايه
ام قاسم / تعبانه اوى يا جماعه تعبانه
همام / طب قومى معايا قومى معايا اخدك على المستشفى قومى معايا
...................
فى القسم
عباده / انا بنتى مرميه فى المستشفي و انت بتسألني عن ايه انا مالى انا بكل ده دا شغلك انت
احمد / لولا انى مقدر موقفك كنت حاسبتك على اسلوبك ده
عباده / اعمل اللى تعمله
تليفون احمد يرن
احمد / الو ... اهلا و سهلا يا فندم اهلا و سهلا ... واخد بالى طبعا يا فندم ... لا اكيد كلو الا السياحه طبعا ... لا اطمن خالص حضرتك كله تحت السيطره ... ما تقلقش معاليك
عباده ينتبه و يستغرب
احمد / فى حفظ الله سعادتك ... فى حفظ الله ... دا وزير السياحه شخصيا
عباده / شخصيا !!
احمد/ حضرتك عارف ان فى ايفنت مهم جدا هيحصل فى البلد بعد بكره و اكيد خبر زى ده ممكن يأثر على شكل مصر قدام العالم
عباده / يا الله يا ولى الصابرين ... حضرتك بتقول ايه
احمد / الناس لو عرفت ان فى كلاب متوحشه فى البلد بتاكل البنادمين دا ممكن يضرب السياحه فى مقتل اقتصاد دوله كامله ممكن ينهار بسبب تسجيل الكاميرات ده
عباده/ و المطلوب
احمد / يختفي يا عباده بيه
عباده يضحك
احمد / كدا كدا لو حصل اى تسريب الحكومه هتعلق انه ذكاء اصطناعي و هيشككوا فى صحته و هيتهموا اللى شيره بتهمه نشر الشائعات و اثاره البلبله
عباده/ و الكلاب دى لو هاجمت حد من السياح هتقدروا تنكروا ده ازاى
احمد / احنا مسيطرين على الوضع و كدا كدا هينزل من دلوقت قوات فى كل البلد عشان تأمينها و تأمين السياح اللى جايين
عباده / ريحتونا و الله ... بس ما تاخذنيش يعني ... حضرتك فى وسط اشغالك دى كلها مش ناوى تدور على الحقيقه و تمشي ورا الكلاب دى ... حتى لو الحكومه قالت الفيديو ذكاء اصطناعي... انا و انت عارفين انه حقيقي ... جثث ... الأشلاء اللى باقيه من الرجاله اللى اتاكلت... هتقول عنها ايه يا احمد باشا
احمد / انا ما قولتش ان القضيه اتقفلت انا قولت هنتعامل و نتصرف بسريه تامه
عباده يهز راسه و يبص الناحيه التانيه
احمد / ثوانى و جايلك
عباده/ انا عاوز امشي
احمد / قولت ثوانى و جايلك استناني
عباده يتنهد احمد يطلع بره
.......................
فى المستشفي فى اوضه نجاه
الممرضه / هستاذنكوا تفضوا الاوضه من الرجاله عشان اغير لها على الجروح
فارس و كارم يطلعوا من الاوضه يستنوا على الباب
الممرضه تطلع حقنه و خديجه واقفه متبعاها
الممرضه/ حضرتك هتساعديني نعدلها بعد اذنك ... لو مش هتقدرى هنادى حد من التمريض
خديجه / لا انا هنا معاكى اهو
خديجه تعدل نجاه و تدى للممرضه ضهرها الممرضه تشكها فى رقبتها بالسرنجه
خديجه / ااااى
خديجه تدوخ فجاه الممرضه تسندها و تسحبها على الكنبه و تروح الحمام تشد الشباك جوزيف يدخل
الممرضه/ ما تطولش ممكن يجوا فى اى وقت
جوزيف/ ما حدش هيجي غير لما انا اقول استنى هنا
الممرضه تهز راسها جوزيف يدخل يشوف نجاه نايمه يطلع اسبراى من جيبه و يبخ على منديل و يشمم نجاه تبدا تفوق بالتدريج بس لسه مدروخه و كا شويه تنام و تصحى
نجاه / انت!!
جوزيف / انا ... عامله ايه
نجاه / انا فين ... مهره ... مهره
جوزيف / بخير ما تقلقيش و عمران كمان كويس
نجاه / ايه اللى حصل ... انت هنا ... ابويا هيقتلك... انت لازم تمشي
جوزيف / ما لكيش دعوه بيه انا ما قدرتش ما اشوفكيش ما قدرتش اقف على الباب و يمنعوني اطمن عليكي... انا كنت هموت عليكي ... انا اسف انى اتاخرت انا بجد مش عارف اقول ايه
نجاه / اتاخرت على ايه ؟
جوزيف يبتسم
نجاه / تعرف ايه اكتر حاجه وجعانى
جوزيف / ضهرك ؟!
نجاه/ ان الحيوان ده شعره كان أجمل من حياتى كلها
جوزيف يضحك
جوزيف / انتى شعرك حلو و لايق على شخصيتك السيلك مش انتى خالص انتى زى البحر فى موجه اللى بيغرقك ما بتقدريش تقاومى
نجاه / انت بتقول ايه ؟
جوزيف / ما بقولش
نجاه / انت بتعمل ايه هنا ؟!
جوزيف / جاى اطمن عليكي... محتاج ابقي جنبك
نجاه / ابويا هيجي
جوزيف يتنهد
نجاه / امشي يا يونس ... عشان خاطرى امشي ... و ما تعملش كدا تاني ارجوك
جوزيف يهز راسه و يطلع علبه دوا تانيه و يبل منديل تانى و يقربه من مناخيرها تمسك ايده و تفضل ماسكه لحد ما تنام يفضل باصص على ايده و على نجاه اللى نايمه يقرب من ايدها و قبل ما يبوسها يقف
جوزيف / هتزعل
جوزيف يقوم و يفتح الحمام يلاقى الممرضه مرعوبه
جوزيف / تمام اقفلى ورايا و كملى زى ما اتفقنا
الممرضه / حاضر
جوزيف يطلع من الشباك و الممرضه تركب الشباك فى الحيطه وراه و تزقه جامد و بعدين تروح تطلع منديل و تحط عليه اسبراى و تروح تنام على الكنبه و تجيب خديجه فوقيها و تشممها خديجه تبدا تفوق
الممرضه / يا ست خديجه يا جماعه ... يا ام فارس ... يا دكتور
فارس و كارم يدخلوا يجروا يسندوا امهم
الممرضه/ ما اعرفش هبطت و لا ايه اللى جرا وقعت عليا و ما قدرتش اشيلها
فارس / نادى الدكتور بسرعه
الممرضه تروح تضرب الجرس و هى بتبص على نجاه و مكانها مفيش اى دليل منسي و كارم و فارس ملهيين فى امهم
كارم/ اما اما انتى كويسه اما ... بتفوق اهى بتفوق... انتى كويسه يا امى مالك
.......................
رجاله قدام المستشفي
الراجل اللى كان تحت الشبكه لامم حواليه رجاله و بيتكلموا
الراجل / اقسم بالله هى هو انا هتوه عنها دا انا اعرفها من سنين و ياما وديتها و جبتها
راجل ٢ / انا سمعت انها عايشه و طلع كل ده مقلب و طلعت واحده من اللى ما يتسموش
الراجل / ما يتسموش ايه دا الكلاب الكلب منهم طولها كدا هو كان بيروح تحت رجليها و يتمسح و مشيت وسطيهم تقولش ... تقولش ايه هى عفريته وسط شياطينها
راجل ٣ / ايه يا عم الجنان اللى بتقوله ده
الراجل/ دى بصت للمسدس كدا و بصت فى عيني لقيت جتتى بتتلبش كدا و لقيت مفاصلى سابت و نسيت كل حاجه نسيت انا مين و بعمل ايه هنا ما فوقتش لروحى غير لما اختفت خالص اختفت هى و الشياطين اللى معاها
راجل ٣ / برده بيقول اختفت و شياطين... يا عم فى أنفاق تحت البيوت دى
الراجل / ما احنا قلبنا البيت و المنطقه بحالها لا لقينا نفق و لا حتى حفره انتوا عاوزين تجننونى
راجل ٢ / انت اى حد هيسمع اللى بتقول عليه ده هيقول انك مجنون اساسا
الراجل / اقسم بالله بقول الحقيقه انتوا ما كنتوش هناك ما شوفتوش حاجه اسالوا اى حد اقسم بالله عفريته و شياطينها
الرجاله تبص لبعض واحد منهم يطبطب عليه
راجل ٢ / اهدى اهدى احنا مصدقينك طبعا اهدى
............................
فى اوضه عمران
مهره تدخل و هند مسنداها تلاقي عمران راقد فى السرير و مختار قاعد على كرسي بيقرأ قرآن اول ما يشوفها يصدق و يقوم
مختار/ عامله ايه دلوقت احسن ؟
مهره تهز راسها و تبص على عمران راقد نايم
مختار / ما تقلقيش عليه دا دلوقت يقوم زى القرد
هند / اول ما فاقت سألت عليه
مختار / يا بختك يا عم ... تعالى اقعدى ارتاحى
هند / مفيش جديد؟
مختار/ لا انا الدكتور مطمنى جدا هو بس نايم عشان يرتاح مش اكتر دلوقت يصحى هند صحيح كنت عاوزك فى حاجه كدا ... ثوانى يا مهره
مختار ياخد هند بره مهره تروح تقف جنب عمران و تبص له و تعيط و هى بتفتكر صوت عمران
////////////////
عمران / اللى فيه طبع ما بيغيروش و على فكره المشكله مش فيكي المشكله مش فيكي هم كدا مع بعض هم كدا مع بعض هم كلهم كدا على بعضهم مش طبيعين دا انتى جبل دا انتى جبل ما حدش بيختار عيلته ما حدش بيختار عيلته ما حدش بيختار عيلته  تمام و مفيش عيله كامله و على قد ما هتاخدى حاجات اكيد هتدفعى قدامها حاجات تانيه انا مثلا المفروض لو شاب زيي فى اى عيله تانيه هيبقي بياكل و يشرب و يذاكر و ينام و يوم ما يحب يغير جو ينزل مع صحابه يقعد فى حته يروح الجيم النادى اى مكان ... انا بقي حياتى عامله ازاى تلات ... لا اربع حاجات تمرين عباده مذاكره حوادث حوادث حوادث و يا ريتني مثلا بدخل خناقه و لا برد على حد و لا حتى من العيال الشبيحه اللى مقطعين بطايقهم دول دا انا مكان ما تحطيني ترجعى تلاقيني هتلاقوا اهدى من كدا ايه  عادى اه عندى اهل كويسين مع بعض بس الاهل دول ليهم شيله و شيله تقيله مش اى شيله ... و انا شيلتها ... اقسم بالله ابويا و أمى بيحبوكى اكتر منى دا انا دماغى اتفتحت امى كلمتنى فى التليفون تطمن عليا انا امى سمعت بس انك بتعيطى و زعلانه حطت العبايه عليها و جيالك هوا قوليلى بقي يا ستى حد يلاقى ناس بتحبه كدا و يسيبهم و يروح يكتئب لوحده
//////////////////////
مهره تمسح دموعها تبص تلاقي عمران مفتح
عمران/ هو اصابتى خطيره و لا ايه ؟!
مهره تبتسم و تشاور له
مهره / سلامتك
عمران/ عامله ايه
مهره تشاور / انا كويسه ... انا خفت عليك اوى
عمران / نجاه فين نجاه كويسه صح ؟
مهره تهز راسها اه
عمران / انا بجد اسف اوى كل ده حصل بسببي انا عمرى ما كنت هسامح نفسي لو كان حصل لاى  واحده فيكوا اى حاجه انا
مهره تشاور / انت عملت اللى عليك و زياده
عمران يهز راسه لا
مهره تشاور / هم كانوا كتير و غدروا بينا انا شوفت كل حاجه و بعدين احنا كويسين الحمد لله اهو زعلان ليه
عمران يبتسم بسخريه مهره تشاور
مهره / انا و انت لايقين اوى على بعض ... احنا الاتنين حوادث
مهره تضحك و عمران ما يضحكش مهره الضحكه تروح من وشها تشاور
مهره / انا هروح اشوف عموا مختار فين كان هنا من شويه
عمران / يا ريت
مهره تطلع بره ثوانى و مختار و هند يدخلوا و هى ما تدخلش
مختار / حمد الله على سلامتك ايه الاخبار بقي انا يا حيوان اقعد جنبك ساعه و هى تدخل دقيقه تفوق طبعا ليك حق هتلاقي وش احلى من كدا ايه تصطبح بيه يا نمس
عمران / عاوز اروح لو سمحت
هند / اكيد يا قلبي هنروح بس خلينا نطمن عليك الاول
عمران/ انا كويس محتاج بس اروح انا ما بحبش المستشفيات و مش عاجبنى الجو هنا خانقني
مختار / انا شوفت الفيديو
عمران/ انا عاوز اروح لو سمحت
مختار / تمام هسال الدكتور ان كان ينفع هروحك
عمران / شكرا
هند / هو انت اتخانقت مع مهره ؟!
عمران / انا كل اللى عاوزه انى اروح ... بس
مختار / خلاص يا هند خلاص
مختار يسحب هند بره و عمران يغطى وشه بايديه مهره واقفه بره باصه فى الارض
هند / هو ايه اللى حصل
مختار / هو مش مظبوط نستنى يهدى و نشوف ليه كل ده … تحبى تطمني على نجاه ؟ خديها يا هند و روحوا لنجاه يلا و انا هروح للدكتور اشوف الدنيا
………………………
فى مستشفي فى اسكندريه
احلام / فرح ايه بس اللى هفكر فيه دلوقت يا قاسم و بعدين ما احنا فعلا عملنا فرح و خلاص بقي المهم سلامه طنط
قاسم يمسك ايدها و يبوسها
الدكتور يطلع من الاوضه الكل يجرى عليه
الدكتور / اطمنوا يا جماعه الحجه زى الفل و ما فيهاش اى حاجه خالص ... هو بس ضغطها كان عالى شويه و اتظبط الحمد لله واضح انها ما كانتش مهتمه بالعلاج الفتره اللى فاتت شويه
قاسم / يعني هى كويسه يا دكتور ؟
الدكتور / الحمد لله مش عاوزك تقلق خالص انتوا حتى تقدروا تروحوا
قاسم / تسلم يا دكتور ما ننحرمش منك ابدا
الدكتور يمشي و قاسم يبص لأحلام
احلام / حمد الله على سلامتها
قاسم يدخل يلاقي مامته راقده و مستموته و جنبها الحجه
الحجه / ما خلاص بقي يا ام قاسم هو مش الدكتور بنفسه قال انك زى الفل
ام قاسم / و هو الدكتور هيعرف اللى انا حاسه بيه اكتر منى انا بموت يا ام همام بموت
الحجه / يا اختى بعد الشر عنك
ام قاسم / تعال يا قاسم يا حبيبي تعال جنبى
قاسم يروح يقعد جنبها و يمسك ايدها و يبوسها
ام قاسم / هات لى مازن يا قاسم عاوزه اشوفه قبل ما اموت
قاسم/ بعد الشر عنك يا امى طوله العمر ليكي و بعدين انا ما اقدرش أخلى مازن يشوفك و انتى راقده كدا
ام قاسم/ لما اشوفه هخف و ابقي زى الفل
قاسم / باذن الله تعملى العمليه و تخفى و تبقي زى الفل
ام قاسم / عمليه ؟!!! عمليه ايه
ام قاسم تقوم تقعد
قاسم / استنى يا امى رايحه فين لتقعى مننا دى عمليه بسيطه و باذن الله خير
ام قاسم / مين اللى قالك انى عاوزه عمليه ؟ انا مش عاوزه عمليات  انا ما فييش حاجه عمليه !!! عمليه ايه دى كمان انا كويسه و زى الفل
قاسم / يا امى احنا جايين المستشفي شايلينك عماله تقولى بموت بموت اللحقونى بموت و الدكتور قال انك تعبانه و لازمك عمليه
ام قاسم / الدكتور ده حمار ما بيفهمش حاجه هاتلى دكتور تانى يا قاسم دكتور بيفهم دكتور بنيامين مش بهايم
قاسم / عيني ليكي يا امى دكتور و اتنين و تلاته كمان اهم حاجه عندنا سلامتك
قاسم يبص لأمه بطرف عينه و هو مبتسم
ام قاسم / انت بتبص لى كدا ليه انت مش مصدق انى كنت عيانه و لا ايه
قاسم / و هو فى حد بيمثل التعب يا امى على العموم شوفى حضرتك عاوزه ايه و انا معاكى عاوزه نشوف مستشفي تانيه او دكتور تانى انا معاكى عاوزه نروح انا معاكى عاوزه نفضل هنا انا معاكى بس هنا هيعملوا العمليه و المستشفي التاني او الدكتور التانى لو قالوا عمليه يبقي لازم عمليه
ام قاسم / انا مش هعمل عمليه انا مش هعمل انا كويسه و زى الفل و هروح البيت دلوقت حالا عشان اللحق ارتاح شويه قبل الفرح
قاسم / فرح ايه يا امى سلامتك بالدنيا
همام / خلاص يا قاسم ... سيبها على راحتها هى ادرى بنفسها و لو تعبت فى اى وقت ادينا عرفنا السكه
ام قاسم / انا كويسه و هروح
قاسم / تمام يا امى اتفضلى
الست تنزل من على السرير و تمشي و الكل وراها و تفضل احلام و قاسم فى الاخر
احلام / حد يرعب امه بالشكل ده
قاسم / مش هتروح باى طريقه تانيه
احلام / قاسم انت لازم تفهم انها اكيد بتعمل ده عشان هى عندها مشكله و لازم تحلها انت كدا بتعمل مشكله جديده هى اكيد ما عملتش كدا من فراغ
قاسم/ مش عاوزه فرح
احلام / بناقصه انا ما طلبتوش و لا هيفرق معاك ليه تضايقها
قاسم / عشان للاسف دى طريقتها فى كل حاجه اعمل كذا و لا هموت
احلام / شوفت ... يبقي لازم تحل المشكله الاول مش تهرب منها بأنك تخلق عندها فوبيا من المستشفيات و التعب دى بعد كدا لو تعبت بجد مش هتقول يا قاسم لأنها هتخاف من العمليه
قاسم / انتى شايفه كدا
احلام / اكيد مش هكون احن على امك منك يعني روح اتكلم معاها و قولها الحقيقه زمانها مرعوبه يا قلبي
قاسم / انتى ما فيش منك بجد
.................
فى المستشفي
جابر قاعد فى جنب جوزيف يشوفه يروح يقعد جنبه
جابر / اى كان الكلام اللى جاى تقوله وفره
جوزيف / ما كانتش غلطتك
جابر يبتسم بسخريه
جوزيف / لا حقيقي فى دى بالخصوص بقولك انها ما كانتش غلطتك ... كانت غلطتى انا
جابر / ما كانش المفروض اقسم المجموعه ما كانش المفروض ابعدها عن عيني انت قلتها قبل كدا
جوزيف / اه وقت خوف و نرفزه بس لما هديت ... لقيت ان اللى حصل ده اكيد خير
جابر يبص له باستغراب
جابر / لمين بقي ان شاء الله
جوزيف / نجاه بتقول ان ربنا ما بيعملش حاجه وحشه و ان اى حاجه بتحصل اكيد وراها خير ... مثلا انا لو ما كنتش خطفت نجاه بين قوسين شر فى وجه نظرك ما كنتش عرفت انا مين بين قوسين خير ليا و ليها
جابر / و نجاه ايه دخلها بيك ايه اللى يدخلها معاك فى نفس القوس اصلا
جوزيف / هى شايفاه خير لو عندك اى استفسار ابقي اسألها...لما تقوم بالسلامه ... و هى كويسه جدا على فكره ما تقلقش يعني
جابر / قدر و لطف
جوزيف / اتمنى ان الحل ان ده ما يتكررش ما يكونش انها بتقفل عليها تانى بالعكس تخرج و تتمرن اكتر زى زمان ثقتها ترجع فى نفسها الضغط اللى انتوا عاملينه عليها يتشال عشان تقدر ترجع لمستواها تانى لو شوفت الفيديو دى مستحيل تكون نجاه مستحيل تكون نجاه اللى لاعبت بابلو قدامى هناك فى تركيا و لا اللى واجهت مواقف كتير جدا نجاه دى كانت خايفه نجاه اللى اعرفها ما بتخافش ... نجاه ما بتخافش يا جابر
جابر / ما جاش فى خيالك تكون حبيبتك راشه حاجه فى الجو وقتها يعني الكميا ما خلتش اشى فرمونات و اشي ايه تانى يولد الخوف مثلا و اهو بالمره تدخل فى الوقت المناسب و تنقذ الموقف و تطلع بطله قدام الكل
جوزيف / انا اللى اتصلت بامايا و طلبت منها تتابع نجاه و تدخل لو حصل اى حاجه لحد ما اوصل
جابر / ليه ليه ما طلبت من عمران يفتح عنيه ليه ما اتصلتش بدياب ليه امايا ... عشان تخدم مصلحتك صح ؟
جوزيف / عشان بثق فيها اكتر منكوا
جابر / ممتاز ... حلو اوى ... بحب الصراحه و بحترمها ... بتعمل ايه وسطينا بقي ليه مش معاها
جوزيف / عشان نجاه معاكوا
جابر يمسك دماغه
جابر / احنا فى مستشفي احنا هنا فى مستشفي
جوزيف / امايا و نجاه بينهم عهد
جابر / و امايا دى ملاك مثلا نبى ايه امايا دى ايه امايا دى عيله سايكو ما تعرفش ربنا
جوزيف / بينكوا ناس نفس ربايتك و بيصلوا و عارفين ربنا بس خاينين امايا مش خاينه لو كانت سايكو كانت سابت عمران و كل اللى هناك يموتوا هى بتنقى اللى يلزمها و بس
جابر / ايه الجو ده و هى بقي نصبت نفسها ربنا تحاسب الناس و تقول مين الحلو و الوحش
جوزيف / و انت لما تقول عليها وحشه بقيت ربنا و لا كل واحد بيحكم بمقايسه
جابر / انا كل ده مش داخل دماغى و مش هسكت و لا هعديها هفنطها ثانيه ثانيه و لحظه لحظه و هجيب قرار الموضوع ده و انا متاكد ان رجلك هتيجي فيه
جوزيف / اعمل اللى تقدر عليه و ما تخليش فى جهدك جهدك بس خليك فاكر طول ما أنت بالعقليه دى هتفضل متأخر و هتفضل نجاه فى خطر المرادى الغلط كان مشترك بينا و انا اعترفت و اتعلمت المره الجايه هيبقي الغلط كله عليك و الغلطه الجايه مش هتلحق تتعلم منها لان نجاه مش هتكون موجوده بعدها
جابر يبص لجوزيف من فوق لتحت و يمشي جوزيف ياخد نفس و يهدى
………………………….