الكبيره ٢ بقلم / لولو_محمد

الحلقه ٢٣

((((((( الكبيره ٢ ))))))
#لولو_محمد
الحلقه ٢٣
جوزيف / ابنك يعرف حاجه عن الكلام ده
مختار/ ابنى بيحبها
جوزيف / لسه ؟! متاكد انه لسه بيحبها؟
مختار/  انا هحميها
جوزيف / تمام كدا كدا هتنزل ... امتى ما اعرفش ... و للاسف محاولتى للتواصل معاها دلوقت مش فى مصلحتنا ... انتوا مش جاهزين لنزولها
مختار يستغرب
جوزيف / امايا مش عيله هبله زى ما ضحكت عليكوا امايا سلاح زيي بس الفرق ان امايا صغيره و عاطفيه ... و بتكره الرجاله ... دا مش معناه انى بحبهم ما تفهمنيش غلط ههههههه بس ما عنديش مشكله معاهم عادى ما انا منهم
مختار / تشرب حاجه ؟
جوزيف / قهوه لو ينفع
مختار / حاضر ... ثوانى
جوزيف / عندكوا حاجه تتاكل قبل القهوه
مختار يضحك و يهز راسه و يمشي و يقفل الباب وراه جوزيف يقعد يلف بعنيه فى كل مكان يلمح اللبومات صور فى المكتبه ورا مكتب عباده يبص عليهم و يقوم يسحب واحد فيهم و يفتحه فى صور كتير للعيله سوا و هم بيضحكوا يقلب الصفحه يشوف صوره جابر و هو صغير يضحك يقلب فى الصور و يدور لحد ما يلاقى صوره لنجاه على فرس اسود بيجرى و هى سايبه ايديها و بتضحك يبتسم يحط الالبوم و يطلع واحد تانى يقلب فى الصور لحد ما يلاقى صور لنجاه قاعده على كتاف ابوها و هى صغيره و شعرها ضفيرتين و ابوها شايل اخواتها كل واحد على ايد و بيضحك مختار يفتح الباب فجاه
مختار / هيسخنوا الاكل دقيقه و ... انت بتعمل ايه
.............................
جوزيف / بتفرج ... الصور دى حلوه اوى
مختار يروح يبص
مختار / ياااااه كانوا صغيرين... العمر بيجرى ... كأنه كان امبارح
جوزيف / كل دى اللبومات صور
مختار / بنحب نتصور كتير صح
مختار يشد اللبوم و يفتحه مليان صور ليه مع ناصر اخوه
مختار / يمكن يجى علينا يوم و ما يفضلش لحبايبنا غير شويه الصور دول يفتكرونا بيهم و يترحموا علينا ... الله يرحمه كان راجل عظيم ... ما كانش بيحب ابوك
جوزيف يضحك
مختار / بس عمره ما منعنى عنه ... بالظبط زى عباده ... يمكن ما بيحبكش ... بس مش بيكرهك و لا هيحاول ياذيك
جوزيف / و مش هيمنعنى عنها ؟
مختار / نجاه بنت
جوزيف / و دا معناه
مختار / انا و ابوك كنا اتنين رجاله يعني لو طلعنا الصحرا و عسكرنا للصبح ما عليناش لوم انما نجاه ما ينفعش تبقي معاك او مع اى راجل تانى بطولها
جوزيف / بما فيهم جابر؟
مختار/ بما فيهم انا ايه رايك بقي
جوزيف / و دا بيحصل ؟
مختار / على قد ما بنقدر
جوزيف / ما بيحصلش انا مراقبكوا من سنين ما بيحصلش انتوا بس مش واثقين فيا
مختار / الناس ما تعرفكش
جوزيف / نفس الناس اللى كانت هتموت و تتفرج على ياسمينا بترقص صح
مختار يبص الناحيه التانيه و يكتم جواه
جوزيف / اعملوا اللى يريحكوا بس انا مش مجبر اعمل ليكوا اى حاجه و بصراحه الوحيده فيكوا اللى ممكن اعمل عشانها نجاه ... عشان هى الوحيده اللى مش هتغدر بيا
مختار / ما حدش فينا هيغدر بيك
جوزيف / عنيكوا فضحاكوا ما بتحبونيش
مختار / و هى بتحبك ؟
جوزيف / بتحترمنى و دا الاهم عاوزه تتعلم ذكيه و عارفه ان مصلحتها معايا
مختار / متعاطفه معاك
جوزيف ما يعرفش يرد
مختار/ كلنا متعاطفين معاك ... كان ممكن تعيش عيشه تانيه خالص كان ممكن تبقي اسوء برده دا احتمال وارد ... بس نجاه عشان بنت مشاعرها بتحركها انما احنا برده زعلانين من اللى عملته ... انت وجعتنا كلنا يا يونس
جوزيف / تفتكر دا ممكن يتغير
مختار/ اكيد ... قدامك الفرصه
جوزيف / عباده كمان شايف كدا ؟
مختار/ اثبتله ... اسمع انا عشت سنين طويله بكلم طوب الارض يدور معايا عليك ... جه عليا ايام ما كنتش بنام من احساس الذنب انى ما قدرتش اللاقيك و اربيك وسط عيالى زى ابوك ما كان نفسه و انا كان نفسي ... يمكن لقيتك متاخر بس لقيناك ... و هقف جنبك و هثق فيك ... بس بترجاك ... ما تخذلنيش يا يونس
جوزيف / تفتكر نداكوا ليا بيونس طول الوقت هيخلينى فعلا يونس
مختار / امال انت مين
جوزيف / مش عارف ... بس مش فارق معايا الحقيقه ..  اصل عمرى ما عرفت ... بسمع الاوامر و خلاص
مختار / كنت بتحملنا ذنب موت جينا
جوزيف/ كنت بستسهل ... مش احسن ما اشيله انا
مختار / يعني انت اللى قتلتها ؟
جوزيف يهز راسه
جوزيف / البنت كانت بتعاملنى حلو اوى و صعبت عليا تشوف اللى انا شوفته لما عرفت انها هتروح المعسكر علاطول افتكرت امايا و اللى حصلها خفت تبقي زيها قتلتها و ريحتها من العذاب اللى كانت هتعيش فيه و دا ما كانش الاوامر كانت اول و اخر مره اعصي الاوامر ... لا مش اخر مره ... نجاه خلتنى اكررها ... هو الاكل اتاخر ليه
مختار يضحك
مختار/ ثوانى هستعجلهملك
مختار يطلع بره و جوزيف يكمل تقليب فى الالبوم
...........................
فى اوضه عباده
عباده نايم باصص للسقف و بيفكر و خديجه جنبه تقلق تشوفه صاحي تروح تنام فى حضنه
خديجه / مالك يا سيد الناس بتفكر فى ايه
عباده / الشيله طلعت تقيله اوى عليا يا خديجه
خديجه / ربك ما بيديش حمل تقيل غير للكتف اللى يشيل
عباده يبصلها و يبتسم
خديجه / انت قدها اوعى تخلي الاحساس ده يسيطر عليك
عباده / انا هبعت التلاته مصر
خديجه / تلاته مين ؟
عباده / عيالنا
خديجه / ربنا يحفظهم خير
عباده/ مفيش مره سبتها تطلع من البلد الا اما اتاذت و هبعتها تانى و المرادى مش بطولها هبعت اخواتها معاها ... عشان تبقي ضربه ناهيه بقي
خديجه / بعد الشر عنك و عنهم ... و اسمحلى بقي البت يوم ما اتصابت اتصابت هنا فى البلد فى الجبل اللى هناك داهوت اللى رايحين جايين عليه كانه الجنينه الورانيه و بعدين انت اكيد عملت ده لسبب و اكيد انت صح و اكيد ربنا هيبقي معاك باذن الله اعقلها و توكل
عباده / ما فيهاش عقل دى يا خديجه ما فيهاش عقل
عباده يقوم يقعد و يديها ضهره خديجه تروح تقعد جنبه و تمسك ايده
خديجه / هون على نفسك و سبها على الله
عباده / و نعم بالله ... هقوم امر على الدنيا اشوف فيها ايه
خديجه / دلوقت !! زمان الكل نايم
عباده يبتسم و يقوم يحط العبايه على كتفه خديجه تقوم تساعده يلبس يبوس راسها و يمشي خديجه تقفل الباب وراه و تتنهد و تروح الحمام تتوضي
..........................
فى اوضه احلام
احلام نايمه و نجاه قاعده جنبها بتفكر تليفونها يتهز معمول صامت و بيرن نجاه تبص و تبتسم و تقوم تجيبه تلاقي اسم يونس تروح ناحيه الشباك و ترد
نجاه / السلام عليكم
جوزيف/ ما كانتش عشره يوم يعني ايه مش تسالي
نجاه / معلش ما كنتش فاضيه خير ايه اللى مصحيك دلوقت
جوزيف / و انتى بتكلميني من الحلم ما انتى صاحيه
نجاه / يومى اتقلب بسببك ... خير عملت ايه فى مصر
جوزيف / عاوز اشوفك
نجاه / تمام بكره الصبح نتقابل فى المضيفه
جوزيف / دلوقت
نجاه / لا مش هينفع
جوزيف / اشمعن
نجاه/ عشان ده الصح ... انا مش هسمح لفضولى يسحبنى فى سكه انا ما ينفعش امشي فيها
جوزيف / هو انا بقولك
نجاه / قبل ما تغلط و تقبح انا عارفه لسانك ... انا مش هينفع اقابلك لوحدينا فى وقت متاخر و مش هينفع نروح لوحدنا الجبل تانى و مش هينفع نتشاف سوا و مش هينفع احرج اهلى اكتر من كدا ... اى كانت الاسباب و الدوافع الغلط غلط و الحرام حرام و انا مش صغيره على الهبل ده كله
جوزيف / انزلى بدل ما اطلعلك و ساعتها احلام هتزعل
نجاه / لا ساعتها انت اللى هتزعل و انا اللى هزعلك و لو مش مصدقنى جرب
جوزيف / خلاص هخليني انا الكبير المرادى و استنى للصبح
نجاه تستغرب و تبتسم
جوزيف / شوفت صورك و انتى صغيره و انتى بتجرى بالخيل ليكي صور حلوه اوى خلتيني نفسي اجرب بس انا ما بعرفش اركب خيل
نجاه / تتعلم
جوزيف / تضيع وقت ... العربيه موجوده و كمان العربيه واليت بروف انما الحصان ديته طلقه
نجاه / هيجي يوم و كل حاجه ترجع زى ما بدات نحارب بالسيف و نركب الخيل
جوزيف / مفيش الكلام ده علم الطاقه فى تطور مستمر حتى لو حصل و انتهى زمن البترول و المحروقات فى حاجه اسمها طاقه نظيفه الشمس و الرياح و السدود دايما هيبقي فى كهربا يعني دايما فى عربيات و سلاح و طاقه
نجاه / و لو طلعت انا صح هتعمل ايه مش تبقي جاهز
جوزيف / اجرب عشان خاطرك
نجاه / عشان نفسك بس لو عاوز تجرب عشان خاطرى حاجه مع انها عشان نفسك برده جرب تقرا فى الدين شويه اقرا قران بتفسيره حاول تصلى ... مش بتقول ان الصلاه دى حمتنى من الوسواس بتاعك ما هى هتحميك انت كمان
صمت
نجاه / يونس رشيد السبع الجنسيه مصرى الديانه مسلم ... دا انت و دى حقيقتك ... ما حدش هيجبرك تعيشها او تقتنع بيها بس ... انا اصلا مش عارفه ايه ممكن يكون خاطرى عندك اساسا بس صدقنى هكون اسعد انسانه فى الدنيا لو حاولت
جوزيف / روحى نامى هنطلع الجبل الفجر
صمت جوزيف يقفل السكه نجاه تتنهد احلام تتعدل و تقعد
احلام / انتى متخلفه و لا انتى ايه حكايتك بالظبط
نجاه / نامى يا احلام
احلام / الواد ده مش سالك و مش هتطلعى منه بقد اللى هياخده منك ... الواد ده مهما حصل هيفضل بينا و بينه دم ... العقرب ما بيصبحش بقدره قادر حمامه سلام يا نجاه
نجاه / العقرب ما بيصبحش حمامه صح بس ربنا قادر على كل شئ يقدر يهديه و اكيد كل الحاجات دى ما جتش كدا لمجرد الصدفه اكيد لربنا حكمه من كل ده اكيد ربنا باذن الله عاوزله الهدايه... انا بدعيله و باذن الله هتشوفى هيبقي واحد تانى خالص
احلام / كانت اميره اتعدلت اللى زى دول ما لهمش مخ شالوه زمان و حطوا مكانه جله
نجاه / بالعكس هتشوفى
احلام / تصبحى على خير
احلام تعدل الغطا و تنام و نجاه تتنهد و تبص من الشباك بحزن
نجاه / قلبي بيقولى هيتغير
.....................
فى اوضه مهره
مهره نايمه اكرم يفتح الباب بالراحه و يقف يبص عليها رايحه فى النوم و يدخل و يروح ناحيه مكتبها يجيب ورقه و يكتب فيها و يطبقها و ياخد ورده من فازه و يشمها و يبتسم و يروح يحط الورقه و فوقيها الورده جنبها على الكومدينو مهره تحس بيه تفتح و تستغرب
مهره / فى حاجه ؟
اكرم يوطى عليها و يلعب فى شعرها
اكرم / كنت عاوز اعملك مفاجاه حقك عليا لو صحيتك
مهره تقوم تقعد و تبتسم تشوف الورده و النوته تفرح و تمسك الورده تقراها اكرم يقعد جنبها على السرير
مهره / انت امراه لا تتكرر فى تاريخ الورد
اكرم / نزار قبانى
مهره / حلوه اوى ... هبقي اقراله ميرسي فرحتنى
اكرم / مع ان امراه كبيره اوى عليكي انتى لسه نونو صغير
مهره / مش للدرجادى
اكرم / انا هسافر امريكا الشهر الجاى ... ايه رايك تيجي معايا
مهره / تمام مفيش مشكله
اكرم / مش هتساليني هعمل ايه هناك
مهره / خير فرحنى
اكرم / فاكره لما سالتك لو جالك حد زيي تقبلى و لا لا و قولتى اقبل
مهره / جايبلى عريس و لا ايه ؟ ايه ؟ لحقت تزهق منى ؟
اكرم / انا فكرت كتير و لقيت ان مفيش حل تانى انا عارف ان اللى هقوله غريب بس ... انا تعبان و مش قادر
مهره / خير قلقتنى تعبان مالك
اكرم / تعبان بيكي
مهره / ايه !!
اكرم / مهره انا بحبك بحبك بجد
مهره تتفاجئ و تحاول تتكلم بهدوء و تستوعب
مهره/ ما انا كمان بحب حضرتك جدا هو فى ايه انا مش فاهمه و بدات اقلق
اكرم / انا هطلق امك و اخدك و نسافر نعيش فى امريكا سوا انا و انتى و بس انا عندى فلوس لو فضلنا نصرف فيها العمر كله مش هتخلص
مهره / ربنا يزيد حضرتك بس دا مش حل حتى لو طلقت ماما ما ينفعش نسافر بالطريقه دى اخواتى ليهم حق عليك
اكرم / اخواتك مش هيوافقوا على جوازنا
مهره / ايه !! ازاى مش فاهمه ؟؟ انا ما اجوزلكش
اكرم / هنا ... لكن هناك هنتجوز مدنى و
مهره تنط من السرير و تجرى ناحيه الباب اكرم يجرى وراها و يقفل الباب
مهره / انا لو صوت هتبقي فضيحه مش هنعرف نلمها اخرج بره لو سمحت
اكرم / مهره افهميني انا معاكى لقيت نفسى
مهره / انت كدا بتخسر نفسك انت ازاى اصلا تفكر فيا او تبصلى بالطريقه دى انا قد بناتك انا بنتك فعلا ازاى جالك قلب دا انا حبيتك زى ابويا افتكرتك عوضي من ربنا
مهره تعيط اكرم يحاول يحضنها تزقه
مهره / ابعد عنى بدل اقسم بالله اصوت و الم عليك الدنيا انت فاكرنى ايه
اكرم / يا مهره افهميني ابوس ايدك
مهره / ما افهمش انت مش طبيعي ارجوك قولى انك شارب حاجه قولى انك مش فى وعيك هسامحك و الله و هنسي اللى حصل قولى اى حاجه غير اللى بتقوله ده
اكرم / اكدب يعني انتى ليه مش عاوزه تفهمى انه مش بايدي اقسم بالله حاولت حاولت كتير انى ابعد و انى ما افكرش فيكي بالطريقه دى بس مش قادر مش قادر تبقي قدامى و ما اخدكيش فى حضنى مهره ارجوكى طاوعينى و انا هحققلك كل احلامك
مهره/ اخرس بقي اخرس انت مجنون انت اكيد اتجننت انت مش طبيعي اقسم بالله لولا ماما و اخواتى كنت صرخت بعلو صوتى بس مش هقدر مش قادره اصدمهم فيك زى ما اتصدمت دا انا اعتبرتك ابويا اعتبرتك ايه انت جوز امى زى ابويا بالظبط انا ما اجوزلكش ايه ما فكرتش فى ربنا ما جاش على بالك خالص كدا
اكرم / ما انا لما هطلق امك هتجوزيلى
مهره / اللطم و لا اولع فى نفسي انت بتقول ايه انت ما تعرفش حاجه عن دينك كدا ... بقولك ايه اطلع بره انا كاتمه نفسي بالعافيه انا جوايا نار لو طلعت فيك هتحرقك ... انا كدا كدا ما عادليش مكان فى البيت ده
اكرم / مش هسمحلك تمشي
مهره / مش من حقك مش هتقدر تمنعنى انت بعد اللى قولته النهرده سقطت من نظرى ما عدتش بابا اكرم اللى بحبه و بحترمه بقيت راجل مريض و شهوانى و ما تعرفش ربنا ... لا انت حتى مش راجل انت حيوان ... اتفو عليك .... اطلع بره بدل ما افضحك قدام الخدامين و بناتك اطلع بره بدل اقسم بالله احكى لابويا على كل حاجه و افضحك فى كل حته ... خلى عندك ذره كرامه و امشي
اكرم / انا هحققلك كل احلا
مهره تصرخ
مهره / بره  .. بره ... اطلع بره بره اطلع بره ابعد غور غور من وشي ابعد انت مجنون امشي ابعد
اكرم يطلع يجرى و مهره ترمى نفسها على السرير بتعيط اكرم يطلع على اوضته يقابل كارمن نازله من فوق
كارمن / فى ايه يا اكرم مالها مهره بتصرخ كدا ليه
اكرم / هاه ... اااه مهره ... اصل كنت بعملها مفاجاه قولت اسيب لها نوته بوزيتيف انيرجى لما تصحى تقراها و كدا يعنى عشان تنسي اللى شافته الفتره اللى فاتت ... بس اتفزعت و افتكرتنى حرامى و لا حد من الناس اللى طلعوا عليها فى تركيا
كارمن / و دا ينفع برده يا اكرم ... دى تصرفات واحد كبير ما انت غلطان برده
اكرم / ما انا اعتزرت و مشيت اهو اعمل ايه تانى
كارمن / هروح اتكلم معاها
اكرم / تتكلمى معاها فى ايه بس نامت اصلا فى ساعتها لما اتاكدت انه انا ... انتى يعني سمعالها حس ... تعالى يا حبيبتي نطلع اوضتنا تعالى تعالى
بنت تطلع من اوضه
بنت / فى حاجه يا دادى سمعت صريخ
اكرم / مفيش حاجه يا قلبي خشي نامي خشي يا روحى ... يلا بقي يا كارمن البيت هيصحى كدا يلا يا روحى وراكى تصوير الصبح ما يصحش كدا
كارمن تهز راسها و ترجع معاه اوضتهم و البنت واقفه تايهه ترجع اوضتها تنام و مهره فى اوضتها بتلم هدومها و هى منهاره من العياط
.............................
قبل الفجر فى شقه همام
همام خارج من الحمام متوضي و بينزل الكم و رايح ناحيه الباب جوزيف يفتح باب اوضته
جوزيف / همام همام استنى كويس انى لحقتك
همام / خير فى ايه حاجه حصلت و لا ايه
جوزيف / انت رايح تصلى الفجر صح ... شكلك اتوضيت صح
همام / اه خير الرجاله كلها سبقتنى تحت خير
جوزيف / طب تعال اتفرج عليا و انا بتوضي
همام يستغرب
همام / ايه !! اسمع يا خواجه احنا بنعدى اى حاجه الدين عندنا خط احمر لكم دينكم و لى دين ما تخليهاش تهب منك
جوزيف / تمام ... حقك عليا انزل انت
همام / دا ايه المرار الطافح ده ... انا نازل ... سلام
جوزيف يبتسم و يحيه براسه همام يمشي و يقفل الباب جوزيف يفتح اليوتيوب و يدور على فيديوهات همام يفتح الباب تانى و يدخل
همام / انت كنت عاوزنى اتفرج عليك و انت بتتوضي و لا اعلمك تتوضي
جوزيف يبتسم
همام / وله انا مش مرتاحلك  ... انت ناويها و لا بتعطلنى و خلاص ...  انا خلقي ضيق
جوزيف / عاوز اجرب
همام / ماشي ... ما حدش يقول للهدايه لا تعال اعلمك
جوزيف / انا بعرف ... انا بس عاوزك تتفرج عليا و تتاكد انى بعمل صح
همام / و ماله ادخل اتوضي ... بس تعمل حسابك لازم تكون طاهر يعني مفيش نجاسه يعنى مستحمى مفيش بت كدا فيديو كدا بوسه كدا
جوزيف / انت هتمسكهالى دا كان شو يا عم بنسخن الجمهور انت ايه عقلك وقف هناك على فكره انا بعمل حاجات تانيه اجمد من كدا بكتير
همام / تبطلها كلها ... بص يا ابن الناس لو ناوى ... هبقي اخوك و اعلمك و اقف فى ضهرك ... لو واخدها لعبه و لا كبرى ... من دلوقت بقولك بلاش هتزعل
جوزيف / ما يمكن اجرب و احب الموضوع
همام / و لا ما تحبوش انا هعمل اللى عليا معاك عشان قدام ربنا ما ابقاش قصرت
جوزيف / و دا اللى رجعك ؟
همام / ايوه و انجز بقي زمان المسجد اتملا و مش هنلاقي مكان
جوزيف / تمام تعال
جوزيف يدخل الحمام و يشمر كمامه و همام يقف يتابعه من على الباب و يوجهه
.........................
فى اوضه نجاه
خديجه و نجاه قاعدين يتكلموا
نجاه / و حضرتك رايك ايه
خديجه / ما فيش كلام بعد كلام ابوكى
نجاه/ مش عادتك يكون ده ردك فى حاجه زى دى
خديجه / و انا من امتى كسرت كلام ابوكى
نجاه / ما اقصدش بس فى العادى ما بيعجبكيش سفرى و لا بتبقي راضيه عنه
خديجه / و لا النوبادى عاجبنى بس ابوكى تعبان و مش هقدر اتعبه فى اى كلام او جدال هو اكيد فكر فى القرار ده  و عنده اسبابه و بعدين انتى مش هتبقي لوحدك اخواتك معاكى و لسه ام شاكر قيلالى ان عمران كمان مسافر معاكوا عشان دراسته يعنى خير باذن الله
نجاه / خير
خديجه/ انا عاوزاكى تاخدى بالك من نفسك اوى و ما تتعبيش اخواتك انا عارفه ان انتى الكبيره بس هم رجالتك برده و بعدين الفرق بينكوا مش كبير يعني فاسمعى الكلام و خليكي حلوه
نجاه / ههههههه حاضر
خديجه / ما تثقيش فى الخواجه
الابتسامه تروح من وش نجاه
نجاه / يونس !!
خديجه / انا عمرى ما شوفت ابوكى تعبان قد الفتره دى
نجاه / مش بسببه يا ماما لو كان هو السبب ما كانش بابا امنه عليا
خديجه / مامنوش و عمره ما هيامنله و اوعى تفتكرى ان العقرب اللى قرصك امبارح هيصحى الصبح يبقي حمامه ... ديل الكلب يا بنتى
نجاه / سيدنا خالد ابن الوليد كان قائد جيش قريش فى معركه احد و ربنا هداه و بقي سيف الله المسلول
خديجه/ و انتى فاكره ان الخواجه هيبقي زيه
نجاه / ما فيش حاجه كبيره على ربنا هو وحده اللى عالم بالخواتيم ... ربنا يرزقنا حسن الخاتمه يا امى ما احناش ملايكه و لا مبشرين بالجنه ربنا يحفظنا شر الفتن ما ظهر منها و ما بطن
خديجه / امين ... حلو اوى الدعاء ده حلو ... ربنا يحفظنا شر الفتن
نجاه / تقصدى حاجه ؟
خديجه / لا
خديجه تتنهد
خديجه/ هروح اجهز حاجه اخواتك ... جهزى شنطتك و لو احتاجتى حاجه ناديني اجى اساعدك
نجاه / حاضر
خديجه تحضن نجاه و تمشي و نجاه متبعاها و بتفكر
………………….
فى جنينه الزنايته
مختار / انا فرحت جدا انك صليت الفجر معانا على فكره
جوزيف يبص الناحيه التانيه
مختار / اركان الاسلام قبل الصلاه الشهاده …  اتشاهدت ... اشهد ان
جوزيف / لا اله الا الله و ان محمدا رسول الله عارف
مختار / لا ما انا ما تهمنيش انك تبقي عارف او لا المهم انك تؤمن بيها تبقي مقتنع
جوزيف / بصراحه لا
مختار يحبط و يحاول يداريها بابتسامه
جوزيف / انا قولت اجرب اشوف بتحسوا بايه ... فوق تحت فوق تحت السلام عليكم السلام عليكم ... مفيش حاجه ... مفيش اى حاجه ... اتوضيت صح و صليت صح على فكره و كنت بقرا الفاتحه و الاخلاص قل هو الله احد يعني ... غلطت فى ايه طيب
مختار / ما ينفعش اتنين تيجي قبل واحد
جوزيف / يعني انا لو قولت الشهاده و عدت الصلاه هحس
مختار/ قبل ما تقولها اقتنع بيها
جوزيف / ازاى ؟؟ اعرف منين طيب ... يعني ايه اللى يثبت انه حقيقي ... لا اله الا الله و ان محمدا رسول الله ايه اللى يثبت
مختار / عندك عنين و مخ تامل و فكر هتوصل
جوزيف/ و انت وصلت ... قولى ... بجد ... عمرك شكيت ... عمرك سالت نفسك هو ايه اللى هيحصل لو كل ده فى الاخر طلع غلط ... مش يمكن ... مش يمكن فى ديانه تانيه هى الصح او يمكن ... مفيش اصلا
مختار / فكرت اكيد … اكيد سالت نفسي السؤال ده بيني و بين نفسي و فكرت
جوزيف / و لقيت الاجابه ؟
مختار يبتسم و يهز راسه
مختار / فتحت المصحف و قرات قصه سيدنا ابراهيم و تفسيرها
جوزيف / ايوه راح الجبل و تامل شاف القمر منور و بعدين شاف الشمس اكبر و بعدين ضلمت قال لا اكيد فى حد خلقهم دا هو ربنا تمام ما هو ما كانش يعرف ان فى مجرات و نجوم اكبر بكتير من الشمس و عوالم تانيه و حاجات كتير فى الفضا برده
مختار/ مين اللى خلق كل ده … تفتكر كل ده حصل صدفه
جوزيف / ما اعرفش ... يمكن
مختار/ طب ايه هى الصدفه
جوزيف / يعني ايه ... عادى ... حاجه بتحصل مش مترتبه
مختار / تمام و الكون اللى حواليك انت شايف انه مش مترتب و لا منتظم ... بمنتهى الدقه ما فيهوش غلطه سرعه دوران الارض حوالين نفسها و حوالين الشمس ترتيب الفصول النهار ورا الليل ورا النهار انت شايف ان كل ده صدفه ... المسافه بين الارض و الشمس لو قلت هنموت و لو زادت هنموت برده ..  سرعه دوران الارض لو قلت او زادت هنخرج من المدار و نموت برده انت شايف ان كل دى حاجات مش مترتبه و لا مظبوطه على الشعره
جوزيف ساكت
مختار / جسمك اعضائك اللى شغاله مكن كل عضو شغال بكل طاقته من مخ و اعصاب و عضلات و قلب و كلى و مثانه و كل ذره فيك لوحدها اعجاز علمى ... تفتكر انت ... انت اتخلقت كدا صدفه ... دا انت وجودك واقف قدامى دلوقت اكبر دليل على القدر ... انت كنت ضايع ... انا كنت فقدت الامل انى الاقيك ...  انت عارف انا دعيت ربنا قد ايه انه يعترنى فيك ؟؟ كتير جدا
جوزيف / و ليه ما استجابش
مختار/ ما انت قدامى اهو
جوزيف / ليه مش بدرى
مختار/ ما حدش يعرف حكمه ربنا بالظبط غيره اخرنا نخمن و صدقنى مهما عصرنا مخنا عمرنا شوف عمرنا ما هنوصل لعظمه حكمه ربنا و تقديره للامور ... تخيل لو كنت لقيتك بدرى كان ايه اللى هيحصل
جوزيف / كان ابو همام هيبقي عايش
مختار يبتسم و يبص لجوزيف
مختار  / لا كان هيموت برده بس يمكن ساعتها ما كانش هيبقالك دخل فيها ... بس الاكيد انه كان هيموت فى نفس اللحظه و نفس المكان ... و يمكن بنفس الطريقه برده ما حدش عارف ... احنا حياتنا بتتكتب قبل ما نتولد
جوزيف / بتوجعنى الكلمه دى ... ربنا رحيم اوى بيا انه يكتبلى اعيش كل العذاب ده .. ليه ؟ ايه الحكمه
مختار / العوض جميل
جوزيف / فين ؟
مختار / هتلاقيه لما تستحقه لما تصبر و تحتسب … نجاه اتعرضت لابتلاء شديد فى كتير ما بينجوش منه ... مش شرط جسديا نفسيا و دينيا فى ناس بتنهار و تقول اشمعن انا ليه ربنا يعمل فيا كدا انا عملت ايه عشان يحصلى كدا فى ناس بتفقد صبرها و ايمانها فى لحظه البلاء... نجاه صبرت و احتسبت عشان كدا ربنا عوضها و شفاها و نجاها من حاجات تانيه كتير
جوزيف يبتسم بخبث مختار يفهمه و يضحك
مختار/ عارف هتقول ايه انت اللى بعت هيلين و انت و انت و انت ... و انت مين اللى خلاك تعمل كدا
جوزيف / المجلس
مختار/ تؤ ..  المجلس قالك جند نجاه ... الباقي كان وحي من ربنا ليك ... تيسير منه ... ربنا عاوز نجاه تخف فبعتك ليها سبب ... ربنا عاوزك تعرف حقيقتك فبعتلك نجاه ... هى الدنيا كدا كله بيسلم لبعضه
جوزيف / نفس كلام نجاه
مختار/ ما هو الحقيقه ما فيهاش اراء الكل بيجمع عليها
جوزيف يبتسم و يبص الناحيه التانيه
مختار/ بص ... انت قررت تاخد الخطوه خدها صح و فكر و اقرا و ابحث و تامل على فكره التامل عباده بتاخد عليها ثواب و باذن الله ربنا هيفتح قلبك و ينور بصيرتك
جوزيف يهز راسه جابر يطلع شايل شنطتين
جابر / احنا جاهزين
مختار / صلوا الضهر و توكلوا على الله
جابر / تمام
جابر يحط الشنط فى العربيه و يبص لجوزيف و يدخل جوزيف يبتسم بهدوء و مختار متابع فى صمت
……………….
فى شقه مهره
جرس الباب يضرب مهره تروح تبص من العين تلاقى امها تفتح الباب
كارمن / ايه الهبل و العبط اللى انتى بتعمليه ده انتى فكرانا عيال بنلعب معاكى و لا فاضيين لدلعك ده
مهره / اعتقد انى هرتاح هنا اكتر
كارمن/ بعد كل اللى عملناه عشانك قصرنا معاكى فى ايه
مهره / و لا حاجه كتر خيركوا
كارمن / فى ايه يا مهره حد من البنات ضايقك بحاجه اصل مستحيل دول بيحبوكى جدا و هم اصلا علاطول فى حالهم دا غير ان علاقتك بيهم كانت كويسه جدا ... طب انا يا بنتى زعلتك ؟ حد من الخدامين قوليلى ايه اللى حصل
مهره / مفيش حاجه حصلت
كارمن/ الله امال سبتى الفيلا ليه و جيتي هنا نروح النهرده نلاقيكي لميتي حاجتك ايه لعب العيال ده
مهره / انا مش مرتاحه هناك
كارمن/ بجد !! فجاه كدا ... من غير سبب
مهره / مش مرتاحه و خلاص
كارمن / لا ما انا لازم افهم و بعدين انتى هترتاحى لوحدك يعني هترتاحى هنا لوحدك ازاى يا قلبي
مهره / انا مش صغيره
كارمن / طب انا امك مهما كانت علاقتنا انا هفضل امك فى ايه يا قلبي ايه اللى حصل
مهره / عشان خاطرى ما تضغطيش عليا
كارمن / يعني فى حاجه حصلت فعلا
مهره / لو حضرتك فضيتي فى اى وقت و حبيتي تيجي تزوريني انا بابى مفتوح لحضرتك على طول
كارمن / بس انا عوزاكى فى حضنى وسط اخواتك ... دا اكرم منهار فى العربيه بره مش قادر يصدق انك مشيتي حبيبتي بلاش عشان خاطرى هو بابا اكرم ما لوش خاطر عندك خالص كدا دا كان بيسيب شغله و يتنطت وراكى من بلد لبلد
مهره / ربنا يصلحله حاله و يباركله فى بناته
كارمن / طب بصي تعالى معايا فى البيت دلوقت
مهره / لا ... اسفه مش هينفع انا هنا بيتي و انا هرتاح هنا اكتر
كارمن / طب على الاقل اديني سبب مقنع
مهره / انا هرتاح هنا اكتر
كارمن / براحتك ... ناقصك حاجه ؟
مهره / شكرا
كارمن / اشوفلك داده تانيه تقعد معاكى تخدمك
مهره / لا ما لوش لزوم انا كبيره و بعرف اخدم نفسي
كارمن/ مهره انتى فى حد فى حياتك
مهره تتصدم و تدارى وجعها من السؤال
مهره / حضرتك تقصدى ايه
كارمن / عاوزه تعيشي لوحدك ليه
مهره / ما انا طول عمرى لوحدى ... لو كنت عاوزه اغلط مين كان هيمنعنى و لا انا لازم اغلط هنا فى الشقه يعني
كارمن / انا ما اقصدش كدا بس يعني
اكرم يدخل مهره تضايق
..................