الكبيره ٢ بقلم / لولو_محمد

الحلقه ٧٣

((((((( الكبيره ٢ ))))))
#لولو_محمد
الحلقه ٧٣
عباده / بس ما حدش قال لينا ان نجاه هتعمل اشعه و لا اى حاجه
الممرضه تطلع تابلت و تورى لعباده
نجاه / انا اقدر امشي على فكره مش محتاجه لكرسي
مغاورى / ارتاحى احسن بدل ما تدوخى و لا تقعى فى الاسانسير اقعدى لحد ما تعملى الاشعه و نطمن عليكي
عباده / انا هكلم الدكتوره اتأكد ما قالتش ان ليها اى علاج أو حتى اشعه
مغاورى / ما تنزل معاها و ما تعطلش البنيه هى جيالك من المريخ ما انت عارفها و ورتك البتاع انزل معاها و ما تعطلش الناس اكيد فى ناس غير نجاه مستنيه دورها
عباده يبص للممرضه
الممرضه / و الله يا كبير ما اعرف اى حاجه انا شغلى كله معتمد على التاب ده بيجيب لى اشعار لو اى مريض ليه علاج بروح اديله له اشعه بروح اوصله له متابعه من اى نوع بروح اعملها اكتر من كدا ما اعرفش بس اللى بيقدر يدخل الحاجات دى الدكتور بتاع الحاله بس يعني دكتور أنور مثلا ما يقدرش يعدل فى ملف او مواعيد علاج حاله لدكتور ممتاز و كدا يعني
عباده/ عارف يا بنتى ... قومى يا نجاه تعالى
نجاه تقوم تروح تقعد على الكرسي و هى متاففه
نجاه / رجعت للكرسي بعجل تانى
الممرضه / ربنا ما يكتبه عليكي تانى دا بس إجراء احترازى
نجاه تهز راسها الممرضه تزق الكرسي و عباده يروح معاهم
.........................
فى شقه عبد العزيز
ناصر / المهم ان كلكوا بخير و ما حدش اتعور و لا جراله حاجه
عبد العزيز / الحمد لله يا ابنى قدر و لطف
ناصر/ حقكوا عليا تانى فى اى حاجه حصلت
ام نور / و انت ذنبك ايه يا ابنى بس
ناصر / بصراحه ذنبى و انا مش هقدر استحمل ان اى حاجه وحشه تحصل ليكوا بسببي
نور / ناصر
ناصر / انا كنت اتكلمت مع نور قبل كدا و ما اعرفش كلمتكوا و لا لا بس ... انا كنت خاطب قبل كدا
ام نور / ايوه لاميره الله يرحمها
ناصر يهز راسه لا و يتنهد و الكل متابعه
ناصر / احنا كنا فاكرينها اميره ... جايه هربانه من بلدها و أسلمت و طالبه الحمايه اويناها هى و اختها و اتقينا ربنا فيها بس طلعت شيطان زورت موتها و هربت و راجعه تنتقم مننا
عبد العزيز / تنتقم ازاى و انتوا اتقيتوا ربنا فيها و بعدين زورت موتها ازاى يعني مش فاهم
ناصر / هو الموضوع كبير و معقد شويه بس هو الموضوع ان فى حوار بلدنا و عيلتنا متورطه فيه من سنين هو متورطه بشكل حلو مش وحش ... لو حضرتك تسمع عن البى كاى و كدا فاهلنا هم اللى وقفوا للموضوع و لقوله العلاج ... ابويا بالتحديد يعني
ام نور / معلش يا ناصر وضح شويه انا مش فاهمه ايه اللى دخل المواضيع دى كلها فى بعض
ناصر / اهلى لما اتصدوا للبى كاى و المخطط الاجنبى ده باظ من سنين هم اكيد مش هيسكتوا و هيحاولوا مره و اتنين و تلاته ينتقموا مننا بشكل او التانى منها انهم يبعتوا ناس تدخل وسطينا و نتجوز منهم و يتجوزوا مننا و كدا و امايا ... او اميره يعني دى كانت واحده منهم و هى دلوقت بتحاول تبوظ الجوازه دى
عبد العزيز / ايوه برده ... لا انا الصراحه مش فاهم اى حاجه ... يعني اللى حصل امبارح ده كان محاوله قتل مش لعب عيال
ناصر يهز راسه
ام نور / يعني احنا فى خطر
ناصر / اقسم بالله يا امى انا عمرى ما هسمح ان اى حاجه وحشه تحصل ليكوا و لا لنور
ام نور / ما كانت هتحصل اهى
نور / ما هم منعوها و عدت على خير يا ماما
ام نور / انتى موافقه على الحوار و مخبيه علينا !!!
نور / انا عارفه الحوار من أوله و ناصر كان صريح معايا من اول يوم انا اللى خفت اقول ليكوا
عبد العزيز / عزر أقبح من ذنب ازاى تعملى كدا
ناصر / انا الغلطان مش هى انا اللى المفروض كنت كلمتكوا بنفسي و شرحت الموضوع بنفسي ليكوا زى ما شرحته ليها انا اللى غلطت مش هى هى خافت ما تقدرش توصله صح او ترفضوا انا اللى المفروض ما كنتش حملتها المسؤليه دى دى غلطتى انا
عبد العزيز / و ايه اللى غير رايك ان شاء الله
ناصر / انا قولت لحضرتك انى غلطت و جاى دلوقت أصلح غلطت
ام نور/ بعد ايه بعد ما عملنا فرح و جينا احنا و اهلنا لحد عندكوا هنقول للناس ايه
نور / و ليه نقول لاى حد اى حاجه
عبد العزيز / انتى تسكتي خالص كلامنا معاكى بعدين
نور / بعد اذنك يا بابا انا مش صغيره انا كبيره و دى حياتى و انا اخترت ناصر و هكمل معاه على اى وضع
عبد العزيز / ازاى يعني الكلام ده
ناصر / ثوانى بس يا نور ... يا عمى نور امانه فى رقبتى و انا مش هسمح لاى حد يلمس منها شعره و حضرتك اتعرفت عليا و على عيلتى
ام نور / اللى كلهم كدابين زيك كدا
ناصر يبص لام نور و صمت تام فى المكان
عبد العزيز / اسمع يا ابنى ... انتوا ناس محترمين و جيتوا لحد عندنا ما شوفناش منكوا غير كل خير بس الكلام ده كان المفروض يتقال فى الاول مش دلوقت
نور / هو قالهولى
عبد العزيز / و انتى ايه ما لكيش اهل احنا ايه هوا
ناصر / معاك حق و انا غلطت و قولت ... لو سمحتى يا نور خشي جوه
نور / لا دى حياتى و لازم يكون ليا رأي فيها
عبد العزيز / و انا مش موافق على الجوازه دى ايه هتتجوزى من ورانا و لا غصب عننا يعني
ناصر / يا عمى لو سمحت ما تاخدش قرار انفعالي اهدى بس و فكر
عبد العزيز / انا ما عنديش اهم من بنتى
ناصر / بنتك فى عنيا و انا مسؤل عنها قدام ربنا
عبد العزيز / هو ابوك فين ... الراجل المحترم اللى جالى اتفق معايا فين ما جاش معاك ليه
ناصر / ابويا مسافر اضطر يسافر امبارح عشان كان فى حادثه فى بلد جنبنا و باذن الله يرجع على طول
ام نور / حادثه ايه خير
ناصر/ عيل اتخطف و الحمد لله لقوه
عبد العزيز / الحمد لله ... استاذنك تبلغ السيد الوالد انى مستنيه و يا ريت ما يتأخرش
ام نور / عبد العزيز
عبد العزيز/ لو سمحتوا مش عاوز كلام فى الموضوع ده دلوقت لحد ما اتكلم مع الراجل
ناصر يهز راسه و يقوم يقف
ناصر / انا بعتذر تانى و باكد انى شارى نور لأبعد حد و انى مستعد أضحى عشانها بحياتي لو حكمت
عبد العزيز / كلامى مع الباشمهندس مختار يا ناصر استاذنك دلوقت من فضلك
ناصر يهز راسه و يمشي و نور تقفل وراه الباب
ام نور / ايه يا عديمه الربايه اللى عملتيه ده
نور/ يا ماما دى حياتى
عبد العزيز / ادخلى اوضتك و ما تطلعيش منها لحد ما نيجي ماشيين
نور / انا بحبه يا بابا
عبد العزيز / انتى بنتى و انا ادرى بمصلحتك
نور / و انا عرفاه من سنين و عارفه اخلاقه كويس و عارفه انه هيصونى و مطمنه و انا معاه ناصر انسان ما يتعوضش صدقنى
ام نور / انتى بس السكينه سرقاكى
نور / انا مش صغيره
عبد العزيز / يا بنتى
نور / يا بابا انا عارفه ان حضرتك خايف عليا بس انا فكرت فى الموضوع ده كتير و واخده قرار فيه من زمان انا مش هسيب ناصر
ام نور / حتى لو احنا رافضينه ؟!
نور / صدقيني يا ماما صدقيني ناصر دا انسان ما يتعوضش
ام نور / و حياتك برده سلامتك يا بنتى لا بتتعوض و لا ليها تمن يا ضنايا
نور / طب ما تاخدوش اى قرار لحد ما بابا مختار يجي و تتكلموا معاه ارجوكوا لو بتحبونى و تهمكوا سعادتى ارجوكوا
عبد العزيز يبص لام نور و يدخل الاوضه و هى تدخل وراه و نور تقعد فى الصاله زعلانه اخواتها يطلعوا
نور / لو سمحتوا مش عاوزه اتكلم مع اى حد فى اى حاجه
نور تقوم تدخل الاوضه و تقفل عليها الباب
........................
امام غرفه الاشعه
الممرضه / ما تاخذنيش يا كبير بس مش هينفع تدخل اكتر من كدا حضرتك عارف
عباده / تمام هستناها هنا
الممرضه / تقدرى تمشي الخطوتين دول صح ؟
نجاه / و الله كنت اقدر امشي المشوار كله بس اللى يلاقي دلع و ما يدلعش
نجاه تقوم و تدخل و الممرضه تدخل وراها اول ما تعدى من الباب تيجي تقفله تلاقى جوزيف مستخبى وراه يرشها باسبراى بينج و يقفل الباب بالمفتاح نجاه تسند الممرضه قبل ما تقع و تبص على الباب برعب و تتكلم بصوت واطى
نجاه / انت مجنون انت بتعمل ايه
نجاه تحاول تفتح الباب يونس يسد السكه
جوزيف / ابوكى اللى اجبرني اعمل كدا انا جبت أخرى
نجاه / يا يونس ابوس ايدك هيقتلوك
جوزيف/ و لا يقدروا يعملوا حاجه ... بقولك ايه انا ما عنديش وقت لازم تسمعيني
نجاه / هسمعك بس مش هنا الباب ده كدا كدا هيتفتح بس كل ثانيه بنقضيها هنا بتحطنى فى ورطه اكبر انا مش قدها يا سيدي انت مش خايف على نفسك انا خايفه على نفسي مش هستحمل كلام الناس عليا البنت دى لما هتفوق هتحكى اللى حصل و كل واحد بره هيحط كلمه و الموقف يبقي حكايه و انا اللى هروح فى الرجلين
جوزيف / زى ابوكى بالظبط لا هو راضي يسمع و لا انتى راضيه تسمعى
نجاه / طب ممكن تفتح الباب و تدخل ابويا و اوعدك أن احنا الاتنين هنسمعك انت اثبت اللى انت عاوزه انك تقدر توصلى و أنك تقدر تجبره يسمع مش محتاج تطول اللعبه دى اكتر من كدا
جوزيف يبص الناحيه التانيه
نجاه / انا لحد دلوقت بكلمك بالعقل و بصوت واطى ما تخلينيش اصوت و ألم عليك امه لا اله الا الله
جوزيف يبص لها
نجاه / يونس
جوزيف / انا لا طايقك و لا طايق ابوكى دلوقت
نجاه / هبقي اصالحك بعدين بس لو سمحت افتح الباب دلوقت و دخل ابويا
جوزيف يفتح المفتاح نجاه تفتح الباب عباده يقوم يقف
عباده / لحقتى تخلصي ؟!!
نجاه / تعال يابا بعد اذنك
عباده يستغرب و يدخل يشوف جوزيف ملامحه تتغير من ابتسامه لغضب مكتوم نجاه تقفل الباب
نجاه / يونس جالك يتكلم معاك ما سمعتوش ... لو سمحت دلوقت اسمعه
عباده / قولتلك اى حركه منك هديك بالجزمه حصل و لا لا
جوزيف يبتسم
جوزيف / جرب
نجاه / يونس !!
جوزيف / انا من يوم ما رجعتك و انا بقدم تنازلات واحد ورا التانى
عباده / دا انا مش انت و دى كانت الناهيه بالنسبالك تلم حاجتك و تغور فى داهيه و ان شوفت خلقتك تانى هدفنك بايدي فاهم و لا لا
نجاه / طب على الاقل اسمعه
عباده / خلصنا ... اى كان اللى هيجي من وراك انا مستغنى عنه و لحد دلوقت انا بكلمك بهدوء انا نفسي مستغربه 
جوزيف يبص لنجاه عباده يمسك وش جوزيف بايده و يجبره يبص له هو
عباده / ما لكش دعوه ببنتى
جوزيف يسحب راسه و يبتسم باستفزاز و يهز راسه و يمشي عباده يبص لنجاه
نجاه / ليه كدا ... كان بيحاول يقول حاجه مهمه على فكره
عباده / و رسالته وصلت ... المستشفي دى مش امان بالنسبالك ... حالا هروحك البيت
نجاه / انت بتغلط يابا
عباده / انا ابوكى تقولى حاضر حتى لو على غلط فاهمه و لا لا
نجاه تهز راسها بحزن
عباده / قدامى على العربيه
نجاه / حالا
عباده / ايوه مش هتقعدى فى المستشفي دى ثانيه واحده
نجاه تبص لعباده و تمشي بلبس المستشفي دكتور يقابل عباده
الدكتور / على فين يا كبير خير
عباده / نجاه بقت كويسه هروحها البيت لو فى اى ورق او حاجه مغاورى هيكمل معاك
الدكتور يبص لعباده باستغراب و يهز راسه
الدكتور / تمام يا كبير ما تشغلش حضرتك بالك انا هظبط كل حاجه فى حفظ الله
عباده يروح يفتح باب العربيه لنجاه تركب و يلف يركب الناحيه التانيه و هو بيبص فى كل الاتجاهات
.......................
فى الشركه
وفاء / اقسم بالله اختفى الفيديو قدامك اختفى و هو باصص للكاميرا
دياب يتنهد و يمسك الموبايل و يحاول يتصل غير متاح يتصل بحد تانى
وفاء / هو كدا اخترق السيستم عندنا صح ؟
دياب / اكتفى السيستم القديم و خليهم يدوروا عليه مانيوال
وفاء / انت عارف ده معناه ايه
دياب / ايوه يا كبير ... فى حاجه ... ما انا متصل بحضرتك عشانه برده ... ايه !!!
دياب يبص لوفاء
دياب / تمام بس انا لازم اقولك ...
دياب/ قفل السكه ... قفل من غير ما يسمع و بيطق شرار
وفاء / ازاى من غير ما يسمع
دياب / الكبير طرد يونس من البلد و لو شافه هيقتله
وفاء / ليه عمل ايه
دياب/ ما اعرفش بقولك بيطق شرار مش سامع حد
وفاء / نجاه فين
دياب/ اعملى اللى طلبته منك و بلغيني لو لقيتي حاجه
دياب يقوم ياخد مسدسه يتأكد انه مليان
وفاء / انت رايح فين
دياب / مستنى تليفونك ... وسعى
وفاء/ دياب استنى
دياب يمشي و وفاء ما تلحقش تحصله
.....................
فى عربيه منصور على الطريق
منصور سايق و جابر جنبه و ورا نسمه و ابنها
منصور / اه اتحركنا... ايه !!! انت بتتكلم جد ... ليه عمل ايه ... كمان !! اشتغلوا مانيوال بقي ... كويس بس انت عارف ده معناه ايه صح ... انسب وقت اقسم بالله انسب وقت ... لا لا انا هكلمه خليك انت فى اللى انت فيه سلام
منصور يقفل و يحاول يتصل بحد مشغول
جابر / فى ايه ؟ حاجه حصلت و لا ايه ؟
منصور / الكبير طرد يونس و قاله لو شوفتك هقتلك و يونس تقريبا كدا اتحدى الكل
جابر / مش مستغرب ... نجاه !!
منصور / بخير بخير ... الكبير بيوصلها السرايا المشكله ان يونس اختفى تماما من السيستم الكاميرات مش لقطاه فى اى مكان كان باصص للكاميرا و اختفى حرفيا و هو باصص للكاميرا
جابر / السيستم وقع يعني
منصور / لا السيستم شغال بس ... دا جليتش هنعرف سببه و هنعالجه باذن الله بس الاول نقدر نقعد
جابر / السيستم وقع يعني
منصور/ انت سامعني اصلا
جابر / السيستم وقع يا منصور تقبلها ما تقبلهاش عرف يوقعه السيستم مش شغال مع يونس و زى ما قدر يختفي من السيستم كل رجالته و اتباعه يقدروا يختفوا هم كمان السيستم بقي علينا مش لينا
منصور / لو قدر يخفى شخص واحد مش هيقدر يخفى عدد خاصيه التتبع الحرارى للكاميرات هتعرف ان فى ايرور و تبعت ريبورت ان القرايات بتاعتها مش ماشيه مع بعض فهى بكدا محتاجه صيانه او معايرة لكن شخص واحد ممكن ... الكاميره هتتجاهل الجليتش البسيط ده باعتبار ان ممكن يكون واحده حامل مثلا او اب شايل ابنه او اتنين حاضنين بعض او الحاجات دى يعني ساعتها بيبقي فى جليتش بسيط بفرق رقم واحد بالزيادة او النقص البرنامج هيعتبره جليتش و هيتجاهله لكن اكتر من كدا هيبعت ريبورت ان الكاميره محتاجه صيانه فما تقلقش
جابر / هو لوحده كفايا
منصور / ما تقلقش السيستم القديم شغال و هيلاقوه
جابر / دا جو يا حبيبي انت بتتكلم عن جوزيف
منصور / يونس !!
جابر يهز راسه باستهزاء و يبص الناحيه التانيه
منصور / احنا اصلا مش عارفين ايه سبب كل ده
جابر / نجاه
منصور / ما قولتلك الكب ... انت تقصد ايه
جابر / انا زيي زيك بس ... مفيش حاجه ممكن تعصب الكبير كدا و تخليه ياخد قرار زى ده من غير ما يرجع لخالى غير انه حاول يقرب من نجاه
منصور / خالك ... صح
منصور يحاول يتصل مشغول
منصور/ طبعا كل الناس بتحاول توصله دلوقت عشان تبلغه باللى حصل
.......................
فى سرايا الزنايته
عباده يركن العربيه و نجاه تنزل بلبس المستشفي هند تشوفها
هند / نجاه !!
نجاه / انا بخير يا عمتى ما تقلقيش عليا هطلع اغير هدومى و انزل احكيلكوا كل حاجه
عباده / على المكتب
نجاه / طب
عباده/ على المكتب قولت ... لقمه يا ام شاكر ربنا يسترك هموت من الجوع
هند / حالا بس طمنى
عباده/ ما تقلقيش كل حاجه تمام
هند تهز راسها و عباده ياخد نجاه للمكتب خديجه تشوفهم
خديجه/ نجاه!!!
عباده / زى القرد اهدوا..  ادخلى
عباده يدخل نجاه و يقفل الباب بالمفتاح
نجاه / اؤمر يابا
عباده/ شوفتى عمل ايه مش كدا
نجاه / و شوفت كمان اللى حضرتك عملته
عباده / احنا و لا هو ؟!!
نجاه/ انتوا بس
عباده/ ما بسش
نجاه / حضرتك حتى رافض تسمعني انا كمان
عباده / سمعت كتير و اكتفيت
نجاه / يونس كان بيحاول يحذرك من حاجه كبيره و كان بيحاول يحذرنى و انا قولتله يتكلم قدامك انا وعدته اننا هنسمع
عباده / انتهينا يا نجاه الفصل دا من حياتنا انتهى
نجاه / انهى فصل ؟!! و هو بكيفنا نبدا فصل و لا ننهيه ؟! ماشي هو غلط و استفزك بس له مبرر بيحاول يثبت حاجه
عباده / ان السيستم وقع فى ايده فهمنا و هنشتغل على الموضوع ده
نجاه / لو حصلى حاجه بسبب انك ما سمعتش تحذيره هتقدر تسامح نفسك يابا
عباده/ انا كدا كدا مش قادر اسامح نفسي على حاجات كتير اوى سكوتى عنها وصلنا للقرف اللى احنا فيه ده و كلها تخصك
نجاه/ تمام ما تسكوتش بس اسمع الاول
عباده / لو لسانك خاطب الجدع ده يا نجاه و لا عينك جت فى عينه حتى ... لا انتى بنتى و لا اعرفك
نجاه تبص لعباده يحط مسدس فى ايدها
عباده / لو جالك اقتليه ... هيجيلك
نجاه تبتسم بسخريه و ترجع المسدس لايد ابوها
نجاه / لا طاعه لمخلوق فى معصيه الخالق يابا سامحنى الحاله الوحيده اللى هقتله فيها لو كان بيحاول ياذى حد فينا بس طول ما هو بيحاول يساعد انا هقف فى ضهره
عباده / قصادى !!!
نجاه تهز راسها لا بصمت و عباده مصدوم
عباده / اطلعى على اوضتك... مش عاوز اشوفك انتى كمان
نجاه تبص له بحزن و تروح تفتح الباب و تمشي عباده يرمى نفسه على أقرب كنبه خديجه تدخل
عباده/ عاوز اقعد لوحدى و مفيش اى حاجه حصلت و كلنا بخير
خديجه / ما عدا انت صح ؟
عباده / عاوز ابقي لوحدى يا خديجه اللهى لا يسيئك
خديجه تقفل الباب و تروح تحضنه ينام على صدرها تليفونه يرن مختار يقلب الموبايل خديجه تستغرب و تسكت
عباده / كبرت فجاه يا خديجه كبرت و صحتى ما عادتش مساعدانى اشيل
خديجه / الحمل هو اللى تقيل عليك
عباده / كان معاكى حق ... كان معاكى حق فى كل حاجه تخص ربايتى لنجاه
خديجه / انا عارفه انها زى الفرسه الجامحه اللى ما لهاش لجام ... بس اصيله و عارفه حدودها ما تخافش عليها
عباده / الفرسه بتبقي جامحه عشان لسه ما لقيتش الفارس اللى يعرف يروضها
خديجه / تقصد ايه ؟!!
عباده/ ما اقصدش ... انا بس خايف
خديجه / ما تخافش استودعها عند اللى خلقها هو الحافظ
عباده/ و نعم بالله  ... ربنا ما يحرمنى منك يا بنت الأصول
خديجه / و لا يحرمنى منك يا سيد الناس كلها
خديجه تبوس راسه عباده و تطبطب عليه
.......................
فى شقه عبد العزيز
عبد العزيز / تقولى الوضع واحد اتنين تلاته مش اتفاجئ بيه دلوقت و بالطريقه دى
مختار / عندك حق
مختار يبص لناصر
عبد العزيز / ما تبصلوش يا باشمهندس كلمنى انا ... انا ما عنديش اى استعداد انى أعرض حياه بنتى و اهلى للخطر و ان اللى حصل امبارح ده يتكرر تانى
مختار/ ايه الضمانات اللى حضرتك محتاجها عشان اثبت لك قد ايه احنا شاريين نسبك و شاريين بنتك و هنحطها و نحطكوا فى عنينا
عبد العزيز يبص الناحيه التانيه
مختار / انا اللى اعرفه ان ناصر صارحكوا بالوضع
عبد العزيز / الكلام بينا انا و حضرتك نور فى الاول و الاخر عيله
مختار/ ما هياش عيله اسمحلى ... دى عروسه و هتفتح بيت و تشيل مسؤليه عيال
عبد العزيز / بس مش ناصر اللى جه كلمنى ... انت
مختار / ما انا جايلك اهو ... بص حضرتك واضح جدا انك مضايق من اللى حصل و دا حقك ما حدش يقدر يعترض و انا يا سيدي جايلك اهو لحد عندك و قاعد قدامك و بقولك اؤمر طلباتك نتفق من اول و جديد و لا كان اى حاجه تمت
عبد العزيز / ازاى يعني و اهلى و زمايلى اللى عزمتهم فى خطوبه بنتى اعمل فيهم ايه
مختار / هى بنتك مخطوبه لسوابق دا دكتور محترم و ابن ناس و بعدين هى فى الاول و الاخر خطوبه و احنا سلونا الشبكه و الهدايا ما بترجعش يعني كملت ما كملتش الشبكه بتاعتكوا و الصيدليه بتاعه العروسه حبت تبيعها تفتحها هى خرجت من زمتنا خلاص و ما لناش اى حكم عليها
عبد العزيز / انت فاكر المسأله مساله فلوس
مختار / لا طبعا ... بس انا بحاول اطمنك
عبد العزيز / لو كان الأمان فى الفلوس يا باشمهندس ما كنتش اتكلمت دلوقت كنت قولت يلا اهو عريس غنى و معاه فلوس و اراضي
مختار / عارف و بسألك تانى ايه الضمانات اللى تثبتلك انى شارى بنتك و ان امانها بالنسبالى كأنها بنتى بالظبط
عبد العزيز / ما اعرفش هو انت فاكرها سهله انت لو بنتك كنت ترضي تحطها فى وضع زى ده
مختار / هى بنتى و يمين بالله اتحاسب عليه قدام ربنا فى بيتي هتبقي اغلى عندى من ناصر نفسه يعنى لو يوم جتلى و قالتلى ناصر زعلني ناصر اللى هيبات فى الشارع لحد ما هى ترضي عنه و تسامحه و ترجعه لفرشته تانى
عبد العزيز / يا باشمهندس انا اب و مش سهل عليا اكسر قلب بنتى و افشكلها و لا قادر اعرضها للخطر انا قاعد قدامك و مش عارف اعمل ايه و الكام ساعه اللى فاتوا انا قافل عليا الاوضه و بفكر و مش عارف اعمل ايه برده
مختار / حاسس بيك و الله و مقدر ... البيت ده ملكى ... الشقه دى هتبقي بتاعتك تقعد فيها انت و الجماعه وقت ما تحب عشان تبقي جنب بنتك فى اى وقت ... حضرتك بتشتغل بمرتب سين ... لو حبيت تسيبه و تيجي تشتغل هنا فى نفس الشغلانه و بنفس المرتب و يمكن اكتر كمان انا معاك ... عيالك فى مدارس او كليه انا اقدر انقلهم لنفس المستوى هنا و بمكالمة تليفون بنتك هتعيش فى بيتنا ملكه و بعرض عليك دلوقت انك تبقي جنبها و تتابعها اربعه و عشرين ساعه قولى اقدر اقدملك ايه يريحك اكتر من كدا
عبد العزيز / مش عارف ... و الله ما عارف و لا الفلوس فارقه معايا و لا كل ده
ناصر / حضرتك خايف و دا حقك بس الخوف حاجه من اتنين يا يهزمنا و يسيطر علينا يا نسيطر احنا عليه و نهزمه
عبد العزيز يبص لناصر
مختار / اهدى خالص و فكر براحتك و صلى استخاره و خليك هنا معزز مكرم لحد ما تقرر هتعمل ايه و فى جميع الأحوال بنتك بقت بنتى و حضرتك بقيت اخويا حتى لو لا قدر الله ما حصلش نصيب
عبد العزيز يهز راسه
مختار / هنستاذن عشان أنا زى ما حضرتك شايف جايلك بتراب السفر و مطبق بس ما هانش عليا اروح ارتاح و اسيبك مضايق و زعلان
عبد العزيز / عشت
مختار يقوم هو و ناصر و عبد العزيز يوصلهم و يقفل الباب عياله و مراته يطلعوا من جوه
البنت / انا مش هسيب صحابى و اجى اعيش فى الفلاحين دى
الولد / اسكتى يا بت انتى مش فاهمه حاجه احنا هنا وضعنا هيبقي حاجه تانيه
نور / دا اللى فارق معاك ؟!
ام نور / كويس انك اخدتى بالك ... انت لو وافقت يا عبد العزيز وقت ما هيقلبوا عليك و على بنتك هنبقي فى الشارع و زى ما هينقلك و ينقل عيالك هنا بمكالمة تليفون هيحدفنا ورا الشمس بنفس التليفون
الولد / و ليه نفترض الوحش و بعدين دا تمليك مش إيجار يعني ورق رسمي وقتها نبيع كل حاجه و نرجع بيتنا
نور/ انتوا ازاى بتفكروا كدا
عبد العزيز / انا داخل الاوضه اريح شويه
نور / انا شرياه يا بابا و هو اثبت لحضرتك دلوقت انه شارينى
ام نور / بالفلوس ؟!! دى بالنسبالهم فكه
الولد / خلاص نطلب المجمد
عبد العزيز / انت جنس ملتك ايه ياض انت انت بجد بتقول ايه
الولد / ما هى اللى متمسكه بيه انا مالى
عبد العزيز يتنهد و يدخل الاوضه و يرزع الباب
نور/ و يطلع كام المجمد اللى سعادتك هتطلبه فيا ده بقي
الولد / بقولك ايه انا مش هطلع بحاجه من كل ده فمتبصليش كدا لو فى جنيه من ورا الجوازه دى هيبقي فى جيبك انتى و ليكي انتى فاهدى على نفسك كدا
الولد يدخل اوضته
البنت / انا مش هعيش هنا
البنت تمشي
نور / و حضرتك رايك ايه ؟!!
ام نور / انا مش عاوزه غير سلامتك و بس
نور / و انا عوزاه
ام نور/ تمام ... سيبي بقي ابوكى يعززك شويه و ما تضغطيش عليه
نور تهز راسها و تحضن امها
...................
فى اوضه نجاه
مهره / و الله كنت حاسه أن فى مصيبه كبيره كل الناس ما كانتش طبيعيه و انتوا كلكوا مختفيين
نجاه / انتى عارفه ان عمران انصاب
مهره / انتى بتتكلمى جد !!
نجاه / اوعى تقولى قدام عمتى هند احنا مخبيين عليها لحد ما ربنا يكرم و الدنيا تهدى شويه
مهره / تهدى ازاى يعني دا ابنها
نجاه / ما هو كويس الحمد لله دى مجرد طلقه فى كتفه
مهره / مجرد طلقه !!! مجرد !!! طلقه !!! طب بسيطه الحمد لله ... ايه الناس دى ؟!!
نجاه / يعني كويس مفيهوش حاجه ... اللى حالته وحشه بقي صابر
مهره / صابر بتاعنا ؟!! اللى كان معانا فى المسابقه ... صابر اللى بيته فى الجبل ده ؟!!
نجاه / اه هو ادعيله لحسن قلقانه عليه اوى
مهره / هى دى حياتكوا يا نجاه ؟!! على طول كدا ؟!!
نجاه / يعني تقدرى تقولى كدا ايه خوفتى و قررتى تخلعى و لا ايه ؟!
مهره / كدا كدا مقرره امشي بعد الفرح و انتى عارفه
نجاه / يعني مش هتستني تطمني على عمران حتى ؟!!
مهره / ما هو اكيد الفرح مش هيتعمل الا لما عمران يبقي كويس يعني
نجاه / طب بيني و بينك كدا لما قولتلك ان عمران انصاب ما فيش حاجه كدا ؟!
مهره / انتى بتهزرى صح ؟! استنى فى حاجه من ورا السؤال ده ... بجد يا نجاه !!! انتى كمان !!! مش ممكن اقسم بالله بجد انتوا فظاع مش ممكن
احلام تفتح الباب فجاه الاتنين يتخضوا
احلام / صحيح اللى سمعته ده قطفوا ورقه الزفت جو و اللى يشوفه يقتله ؟!!
صمت و تبادل نظرات بين التلاته و احلام تحس انها عكت و تبص لمهره اللى مصدومه من اللى سمعته
...........................
فى المستشفي عند صابر
الدكتور / عشان خاطر دكتور عبد الله بس هسمحلك تدخلى بس حضرتك عارف دى عنايه مش هينفع تطول
عبد الله / لا ما تقلقش يا دكتور دقيقتين بس و زى ما فهمت حضرتك انا متاكد انها هتفرق جدا فى حالته 
الدكتور / اتمنى
جابر / انا هاخد العيال الكافتيريا فوق اجيب لهم حاجه ياكلوها على ما تخلصوا
منصور / هاتلى معاك قهوه
جابر / تمام اجيب ليكي حاجه يا ام بدر
نسمه تهز راسها لا
جابر / تمام ... يلا يا ولاد
عبد الله / كلميه هيسمعك
منصور / انا واقف على الباب هنا لو احتاجتى اى حاجه
نسمه تبص له و تدخل تلاقي صابر نايم على السرير و متوصل بأجهزة تقف مكانها عند طرف السرير و تبص له
نسمه / ازيك يا صابر .. الدكتور بره بيقول انك بنسبه كبيره هتسمعنى ... بس مش عارفه ان كنت لسه ... فاكر صوتى اصلا و لا لا ... انا مش عارفه ان كان مجيي هنا اصلا صح و لا لا ... هيكدبوا على الناس و يقولوا جايه استلم جثه حماتى و ابنى بس هنكدب على ربنا ازاى و هو عارف انى جايه عشانك ... انا مش عارفه ايه اللى المفروض اقوله و مش عارفه ان كان ليا خاطرعندك و لا لا بعد كل اللى حصل ... ما اعرفش ايه اللى يخلى منصور يتخيل ان صوتى انا هو اللى ممكن يخليك تتمسك بالدنيا دى و انا اكتر واحده ظلماك ... بس و الله كان غصب عني لو كنت فتحت بوئي كانت هتبقي بحور دم بينك و بين اهلى و لا هقدر اشوفهم بيتاذوا و لا هقدر استحمل انك تتاذى ... بس مش هكدب على نفسي ..  انا عمرى ما خفت قد دلوقت لما شوفتك راقد كدا ... فوق ..  لو لسه ليا خاطر عندك اتمسك بالدنيا
ممرضه تسحب ستاره فجاه نسمه تتفزع
الممرضه / انتى عارفه ان وجودك هنا غلط؟
نسمه تمسح دموعها و الممرضه تطلع من جيبها حقنه و تملاها
نسمه / انا اسفه انا عارفه انى طولت انا فعلا اسفه انا
الممرضه تقرب من نسمه و تعدى ايدها الفاضيه على كتفها و تهديها
الممرضه / جوزك؟!
نسمه تتحرج و تحاول تلم الموقف
نسمه / امممم ... لا ... مش جوزى ... يعني هو
الممرضه / انتى متوتره كدا ليه اهدى
نسمه/ انا مش متوتره و لا حاجه ... هو له علاج أو حاجه
الممرضه / الحقيقه لا ما لوش ... بس انتى ليكي
نسمه/ ايه !!!
الممرضه تحاول تحقن نسمه نسمه تمنع ايدها و تقاومها و تزقها الممرضه تضرب نسمه بالرجل فى بطنها تقلب نسمه على ضهرها نسمه تصرخ
نسمه / منصور !!!!
الممرضه تهجم على نسمه و تكتم نفسها بايدها و لسه هتديها الحقنه تتخبط بشاشه على راسها تفقد الوعى نسمه تسحب نفسها لورا و تقوم تقعد و هى بتصرخ
نسمه / منصور منص...
..............................