الكبيره ٢ بقلم / لولو_محمد

الحلقه ٥٠

((((((( الكبيره ٢))))))))
#لولو_محمد
الحلقه ٥٠
مغاورى / ايه يا ابنى روحت فين مش كنت استنيت تشوف الدنيا هترسي على ايه
شاهين / معلش يابا دماغى مش رايقه و ما كنتش فايق للت و العجن بتاع الناس ده
مغاورى / يا ابنى احنا دورنا اننا نسمع الناس
شاهين / لما يكون فى كلام يستاهل يابا لكن تطبيل و نخع و صعبانيات مش فايق انا للكلام ده المهم ما علينا خير طمنى ايه اللى حصل
مغاورى / جابوا صابر و بيحققوا معاه بس هو اكيد خارج
شاهين/ مش هو اللى عملها يابا
مغاورى / عارف بس لقوا الواد فى مخزنه
شاهين / مخزن مهجور كسروا القفل و ركبوا قفل جديد يابا
مغاورى / ما اهو منصور شغال على الكاميرات فى المنطقه دى بس بيقول انها مش هيطلع منها حاجه
شاهين / يعني ايه مش هيطلعوا بحاجه من الكاميرات امال اخترعها ليه و بدروا بيها البلد ليه
مغاورى / المنطقه دى يا ابنى ما فيش عليها رجل و لا حد بيهتم بيها مجرد مخازن و حتى معظمها مهجور و منسي و اللى بيستخدم حاجه بيركب قصادها كاميره و لا اتنين
شاهين / الكلام ده لما نبقي فى اى بلد تانى غير بلدنا انما هنا احنا لازم علاطول عينا تبقي مفتحه و ما نسيبش حاجه للظروف افرض الجماعه اللى ما يتسموا جم و عسكروا فى هنجر من دول يبقوا نايمين فى عبنا و احنا نايمين فى العسل
........................
مغاورى / و الله معاك حق... سيبك انت الوليه ام عبده بتدعيلك دا ام الواد كانت هتموت عليه ايوه كدا عاوزك مصحصح كدا و فايق و رافع راسي
شاهين يبتسم بحرج منصور يدخل يركن العربيه و ينزل و يتحرك ناحيه السرايا شاهين يتنفخ و ينادي
شاهين / منصور ... منصور
منصور يبص عليهم و يروح و هو بيدعك فى عنيه و وشه
شاهين / ايه الاخبار وصلتوا لحاجه
منصور / دياب راح و هيكمل انا مطبق و مش قادر هطلع اريح شويه و اكل لقمه و بعدين اروح له
شاهين / حقك طبعا الله يعينك بس صحيح الكلام اللى سمعته ده المنطقه هناك ما كانتش متغطيه كويس بالكاميرات ؟
منصور / ايوه صحيح بس مدخلها و مخارجها متغطين كويس ما تقلقش
شاهين / يعني هتعرفوا تثبتوا براءه صابر
منصور / مثبوته من غير حاجه ما تقلقش هو كدا كدا خارج حاجه تانى
شاهين / لا مفيش كتر خيرك روح ارتاح بس ابقوا حاولوا تركزوا على المناطق اللى زي دى ولاد الحرام ما بيرتاحوش و بيعرفوا نقط ضعفنا و بيضربونا منها يا ابن عمتى
منصور / عندك حق هاخد بالى بعد كدا
مغاورى / روح ارتاح يا منصور انت تعبت جامد اوى الفتره اللى فاتت
منصور / كتر خيرك يا خالى بس معلش كان عندى سؤال صغير كدا لشاهين يعني من باب الفضول مش اكتر لو مش عاوز تجاوب ما تجاوبش
شاهين / و ما جاوبش ليه اسأل عادى خير
منصور / انت كنت هناك بتعمل ايه ؟
شاهين / هكون بعمل ايه يعني كنت بدور على مخزن كبير احط فيه شويه حاجات كدا
منصور / حاجات ايه دى
شاهين / بتسال ليه
منصور / لو مش عاوز تجاوب بلاش بس يمكن كنت اقدر افيدك انا اعرف كذا مخزن كويس كنت عاوزه ليه بقي
شاهين / لا كتر خيرك انا لقيت خلاص و بكره و لا بعده باذن الله همضى العقد مع الراجل و هبدا على بركه الله
منصور / ربنا يوفقك و يفتحها عليك هتحتاج سيستم او نظام امان كاميرات انزار الحاجات دى يعني ؟
شاهين / اكيد امال انا بس اظبط الدنيا و اكلمك على طول
منصور / تمام ... عن اذنك يا خالى
منصور يمشي
شاهين / اما حشرى بشكل ما هو لو صبر القاتل على المقتول كان مات لوحده مش ممكن التدخل بتاعه ده
مغاورى / برده ما قولتش انت كنت عاوز المخزن ليه
شاهين / هاه !!
مغاورى / و ليه مطرف اوى كدا ما احنا عندنا بدل المخزن ميه و بدل الهنجر الف ليه طرفت اوى كدا
شاهين / اصلي ... انا اصلي ... اصل انا ... انا كنت عاوز اعيد الامجاد
مغاورى/ و مالها الامجاد مش راضيه تحمل معاك مره واحده و بتقطع ليه كدا ايه الباقه خلصت و لا ايه
شاهين يضحك
شاهين / مسخره يا حج ... لا بس انا اصلى كان نفسي اعملها مفاجاه بس انت ما يخفاش عليك حاجه يعني دا انت ابويا و مثلى الأعلى
مغاورى / عشت أمجاد ايه بقي اللى انت عاوز تعيدها دى بقي
شاهين / هاه !!
مغاورى / أمجاد ايه يا شاهين اللى ناوى تعملهالى مفاجاه
شاهين / ما انا هحكيلك ... هحكيلك كل حاجه بس لما ارتب الدنيا و اظبط امورى ما تبوظش المفاجاه بقي يا عم الناس
مغاورى / لا بوظها و فرحنى و انا هظبطها معاك و هعمل اتفاجات
شاهين / عيني يابا حاضر هو انا اقدر اخبي عليك حاجه دا انت الخير و البركه دا انت كبير الجوارحه دا انت
مغاورى / ما تنطق يا عم طلعت روحى ناوى على ايه
شاهين/ ما انا بقول اهو ... هقول حاضر بقول اهو
......................
فى جنينه الزنايته
كارم يركن العربيه نجاه تنزل جابر يروح يكلم عباده
جابر / انا هروح اطمن على صابر
عباده / تعال سوق العربيه و خدنى معاك
نجاه / انا عاوزه أجى
عباده/ اطلعى ارتاحى يا نجاه مفيش مكان فى العربيه و مش كل الرجاله قادره تكمل زى ما انتى شايفه الطريق كان طويل
نجاه / تمام
عباده / ايه ده هتريحينى و تقولى حاضر من غير جدال و لا اعتراض و لا هرى كتير
نجاه / عن اذنكوا
نجاه تجرى ناحيه اوضتها مختار يدخل
مختار/ لحقتوا تزعلوا ست الكل يا غجر ايه عاوزين النعمه تزول
عباده / بقولك ايه مش وقت خفه دمك انجز خلينا نشوف البلد اللى هتولع دى
مختار / و ماله يلا
مختار يروح يركب عربيته و جابر يركب مكان كارم و يسوق نجاه تطلع بلكونتها تبص عليهم و هى بتمسح دموعها خديجه تدخل
خديجه / حمد الله على سلامتك مالك طلعتى على اوضتك جرى ما جيتيش حتى تسلمى عليا فى ايه مالك
نجاه / ما فيش انا بس تعبانه و عاوزه انام
خديجه/ واللى عاوز ينام وشه بيبقى غرقان دموع كدا
نجاه تمسح وشها
نجاه / انا كويسه يا امى تسلمى هستاذنك ارتاح شويه
خديجه / تمام براحتك لما تصحى رنيلى اجيبلك الاكل و نقعد نتكلم شويه وحشانى يا بت
خديجه تحضن نجاه ما تقدرش تمسك نفسها و تعيط فى حضنها
خديجه / مالك يا بت فى ايه ... لا دا الوضع ده ما يتسكتش عليه انا هتصل بابوكى
هند تدخل
هند / هى فين البت البراويه دى ... لا اله الا الله فى ايه
نجاه تمسح دموعها
نجاه / مفيش مفيش صاحبتى بس بتمر بظروف كدا و انا مضايقه عشانها ... هروح اكلمها اطمن عليها
نجاه تدخل تطلع الموبايل و تتصل و هند و خديجه بيبصوا لبعض و مستغربين
..................
فى الجنينه عند شاهين
مغاورى / و انت عاوز تقنعنى انك هتعرف تسلك فى الحاجات دى بطولك يا شاهين
شاهين / طب الواحد ممكن يفوت فى الحديد عشان عارف ان اهله واثقين فيه و بيشجعوه انا بقي مطلوب منى ايه و انتوا ما حدش مديني ذره تقدير كدا
مغاورى / يا ابنى مش بقل منك بس الحكايه دى خطره جدا عليك خصوصا بعد اللى حصل ... الا صحيح هم حاولوا يتواصلوا معاك تانى او يكلموك او يبعتولك مرسال او اى حاجه ؟
شاهين / اكيد حضرتك عارف الاجابه مش محتاج تسأل يعني
مغاورى / انا عارف انك مش هتخبى عليا بس ... اديني بطمن
شاهين / بص يابا عشان اكون صريح انا حاسس ان حوار صابر ده حوار مترتب
مغاورى/ اكيد بس مين ؟
شاهين / هو اللى ليهم مصالح ضدنا كتير اوى كدا
مغاورى/ لا مش كتير دا حد عارف اكتر من اللازم و هو ده اللى هيوقعه على العموم دياب و منصور مش ساكتين و باذن الله
شاهين / مع احترامي يابا بس دياب و منصور راحت عليهم خلاص ... الصراحه اللى هيحلها الخواجه
مغاورى / اشمعن
شاهين / كلنا عارفين انه فى النت نمره واحد دا غير انه بصراحه انا شايف اننا اولى بيه من الزنايته احنا ده تخصصنا طول عمرنا يعني فلما نحتوى احنا الجدع و نستفيد منه و نتعلم دا مصلحه لعيلتنا و لا ايه
مغاورى / المصلحه واحده
شاهين / لا مش واحده يابا اه وقت الجد كلنا فى ضهر بعض بس غير كدا كل واحد على مصلحته هم مش صغيرين
مغاورى / الخواجه سافر خلاص انساه
شاهين / انسي مين ؟ امتى حصل الكلام ده !!!
.....................
فى شقه مهره
مهره عماله ترجع و مروان ساندها
مروان/ لا دا احنا نروح المستشفي كدا كتير اوى
مروان يسند مهره الصاله يقعدها على السفره
مهره / انا مش عارفه مالى و طول النهار صداع و تنميل فى جسمي حاسه انى تعبانه اوى يا مروان
مروان / طب اهدى و اشربي اليانسون ده يهدى بطنك و انا هتصل بدكتور وليد دكتور العيله يجي يبص عليكي انا مش فاهم ده برد و لا كلتى حاجه كدا و لا كدا
مروان يناولها كبايه ينسون و يروح يتكلم فى التليفون و مهره بتشرب اليانسون
مروان / ايوه يا دكتور ازى حضرتك 
مروان يدخل الاوضه و يقفل الباب مهره تشرب اليانسون جرس الباب يضرب مهره تبص و تحط راسها على الترابيزه و تفضل باصه صاحيه للباب الجرس يضرب تانى مروان يطلع من جوه
مروان/ ثوانى ثوانى جاى
مروان يروح يفتح يلاقي رامى
مروان/ انت ايه اللى جابك هنا
رامى / جيت اطمن على مهره بقالها يومين ما بتجيش الشغل
مروان/ وحياه امك
مروان يزق رامى بره الشقه و يقفل الباب
مروان / بقولك ايه يا رامى حافظ على اللى باقي بينا و بلاش تخسرنى
رامى / و انا عملت ايه غير اتفاقنا
مروان / امشي دلوقت نتكلم بعدين
رامى / ماشي ماشي بس سمعت حاجه كدا قولت اجى اتاكد منها
مروان/ خير
رامى / انت رجعت تضرب تانى ؟
مروان / امشي يا رامى انا ... مش فايقلك
رامى يبتسم و يهز راسه و يمشي مروان يفتح الباب يدخل يلاقي مهره نايمه على السفره يقفل الباب و يروح يشيلها يحطها فى سريرها تليفونها يرن نجاه مروان يقفل الموبايل و يرميه على الكومدينو و يغطى مهره و يروح يقعد فى الاوضه التانيه و هو مضايق ثوانى و يطلع علبه من جيبه و يسطر و يضرب
مروان / و هو الواحد يقدر يستحمل القرف ده كله من غير ما يضرب ... اشتغل اشتغل بقي اشتغل ابوس رجلك .... ااااااااه اه
...........................
فى اوضه نجاه
نجاه تتنهد و تسيب الموبايل
هند / دى مهره صح
نجاه تبصلها و تهز راسها
نجاه / حاسه انى قلقانه عليها اخر مره اتكلمنا قالت كلام مش مريحنى و من بعدها اختفت او انا اتلخمت و كل ما اكلمها ما تردش و الصبح اتصلت بيا قالت تعبانه و كدا و دلوقت بتصل تانى ما بتردش برده و تليفونها اتقفل
خديجه / الوقت اتأخر يا نجاه برده
نجاه / ممكن
هند / ابقي كلميها الصبح و لو لقيتيها لسه تعبانه نبقي نبعتلها حد من حبايبنا بدكتوره تبص عليها
نجاه تهز راسها
خديجه / اسيبك ترتاحى برده و لا ايه
هند / نجاه انتى كويسه ؟
نجاه / الحمد لله
هند / مختار كان كلمنى على حوار كدا مضايقه بس انا بصراحه مش مضايقه بالعكس انتى صح ... بس مش هتقدرى تطبقيه يا نجاه صعب اوى يا حبيبتي
خديجه / هو ايه ده يا هند اللى صعب
هند / قررت تتعامل مع ولاد عمها و اهلها معامله شرعيه يعني مش هتقف لوحدها حتى لو جوه البيت لوحدهم فى اى مكان
خديجه/ دا يوم المنا يعني لا فى تمرين و لا مران و لا سفارى و لا كل الهبل اللى كان مطلع عيني سنين طب و الله لاخليهم يدبحوا عجلين و افرقهم على الغلابه
هند و نجاه يضحكوا
نجاه / ادبحى بس مش هيحصل انا هعمل كل ده عادى جدا لكن لوحدى او مع اخواتى و غالبا كارم عشان فارس بيكرهنى
هند / لا دا احنا ندبح عجلين بنيه شفاها لحسن دى عقلها لسع خالص
نجاه / معلش
هند / لا بجد فى ايه فى الدنيا يخليكي تقولى كدا
نجاه تعيط خديجه تحضنها
خديجه / دى مين دى دى نجاه بنتى اللى بتعيط بالشكل ده
نجاه / مش بشر يعنى ما بحسش كلهم زعلانين منى ما حدش بيتكلم معايا و كلهم بيعاملونى وحش و كل ده عشان حاجات انا اصلا ما عملتهاش او عملتها باذنهم
خديجه / حوارات الخواجه صح ؟
نجاه / كلها باذنهم و بعدين زى ما عارفه حدودى مع الكل عارفه حدودى معاه و على فكره هو كمان عارف حدوده و بيحترمنى و بيعاملنى كويس
خديجه / بس عمره ما هيتساوى بيهم
نجاه / يمكن عند ربنا يبقي احسن لو وقفنا معاه و وجهناه صح
هند / مش يمكن ده اللى مضايقهم ... انك بتدافعى عنه اوى كدا و تقارنيهم بيه و كدا ... غاروا عليكي
نجاه / المفروض يثقوا فيا و فى اخلاقى
هند / بس دا ما يمنعش انهم يغيروا و يخافوا عليكي و انهم لو حسوا انك مسحوبه فى سكه كدا و لا كدا يلفتوا نظرك
خديجه/ على العموم انا هتكلم معاه و أشده و اخليه يجي يراضيكي فارس بيحبك و بيموت فيكي
هند/ و الله كلهم بيحبوها و الدنيا عندهم كلها فى كفه و نوجه قلبنا فى كفه لوحدها طب دا مختار طول الوقت يعاير فيا و يقولى ما عرفتيش تجبيلى بت زى نوجه ما تيجي نجرب تانى يمكن تيجي بت تطلع زى نوجه ما سكتوش عنى غير انى قولتله حتى لو جبت بت هى نوجه واحده بس
نجاه تبتسم بخجل
خديجه/ هاه اجيبلك تاكلى و لا تنزلى تقعدى وسطينا شويه
نجاه / هتصل بمهره مره كمان و انزل معاكوا
هند / ماشي هسبقك اسخن الاكل على ما تحصليني
هند تمشي و نجاه تتصل تانى غير متاح
نجاه / غير متاح
خديجه / يمكن نايمه و فصل لما تصحي و تشحنه هتتصل بيكي
نجاه تبتسم بحزن و تهز راسها و تقوم مع خديجه و ينزلوا
........................
فى القسم
محمود / كان بيرمى بلاه و بيهلفط فى الكلام و اننا راحت علينا و كلام من ده
عباده / و انت سكتله
محمود / و انا فى ايه و لا فى ايه يا كبير اديتله كلمتين و غار من وشي يا كبير انا ابن اخويا كان مخطوف و نفسيتي فى الارض نرجع الواد و بعدين نبقي نشوف حكايه الجدع ده بعدين
عباده / بس العيلين دخلوا المول يا باشا و خطفوا الواد و الاتنين اتوفوا الموضوع ده فيه ان يا باشا و هتقول عباده قال
الظابط / انا معاك يا كبير ان الموضوع غريب جدا خصوصا ان ما فيش اى علاقه بين صابر و بينهم و لا حتى بينهم و بين اى واحد من رجالته و لا حتى مكالمه تليفون واحده ليهم بس الواد كان فى مخزن صابر يا باشا دا غير انه كان متهم فى قتل ابوه
عباده / و طلع برئ يا باشا
محمود / لنقص كفايه الادله يا كبير مش عشان عرفوا مين القاتل
عباده / بكره يتعرف يا محمود ما تقلقش التحقيقات شغاله مفيش حاجه بتستخبى طول العمر
محمود / معاك حق يا كبير
عباده/ انا عاوز اقابل صابر بعد اذنك يا باشا
الظابط / اكيد يا عباده بيه اتفضل من هنا
الظابط ياخد عباده و يقوموا محمود يقوم معاهم
عباده / استنانا هنا يا محمود او لو وراك حاجه روح اعملها هو جنابك عاوز منه حاجه يستنى
الظابط / اه استنى يا محمود عاوزك
محمود / تحت امرك يا باشا اتفضل
الظابط و عباده يقوموا و محمود قاعد
..................
قدام القسم
فارس بيتكلم فى التليفون قدام العربيه و جابر واقف جنبه ساند على جنب العربيه
فارس / ياما انا اللى زعلان انتى ما تعرفيش عملت ايه ... ياما ما تشتغلينيش مين دى اللى بتعيط نجاه !! نجاه اختى انا !!! قولى كلام غير ده يمكن اصدق
جابر يبص بطرف عينه على فارس و يحاول يعمل مش مهتم بس واضح عليه الاهتمام
فارس / و دى اجيب لها هديه ايه حته ام ستاشر ؟!! ... ورد لمين ؟ لنجاه !! ... حاضر ياما و شيكولاته كمان و هقولها اسف و ابوس راسها ... ياما كدا كتير ياما ... حاضر يا اما حاضر ... قولت حاضر و الله ابويا بس يخلص ... يووووه حاضر جاى جاى ... مع السلامه يا امى فى حفظ الله فى حفظ الله
فارس يقفل
فارس / دا ايه فيلم الكارتون اللى وقعت فيه ده بس يا ربى
فارس يروح ناحيه جابر
فارس/ انا ماشي لو ابويا سأل عليا قوله امى طلبتى فروحتلها تمام؟
جابر يهز راسه فارس يمشي كارم يدخل شايل هولدر عليه فناجين قهوه ورق
كارم / القهوه هو راح فين
جابر / روح
كارم / خلع !! ماشي
جابر / لو عاوز تروح روح انا هخليني هنا شويه
كارم / لا انا عاوز اتكلم معاك و فرصه اننا لوحدنا
جابر / خير سامعك
كارم / انت زعلان من نجاه ؟
جابر / ما حدش يقدر يزعل من نجاه يا كارم هى اللى زعلانه مننا اننا مشينا الخواجه
كارم / هى اللى مشته يا جابر هى اللى طلبت منه يمشي
جابر / الا قولى يا كارم ... انت ايه رايك فيه
كارم / يونس ؟ رأيى فيه كأيه يعني ؟ فى شخصيته فى مستواه فى ذكائه فى ايه بالظبط
جابر / كإنسان باكيدج كدا ككل
كارم / ما اعرفش ما فكرتش فى الموضوع قبل كدا عادى يعني بس الفتره اللى قضيتها معاه كان كويس ما شوفتش منه حاجه وحشه بالعكس كان متعاون و بيدى كل اللى عنده و محترم
جابر / نسيت اللى عمله زمان نسيت انه خطف اختك
كارم / ما نسيتش حاجه و لا نسيت ان هو اللى رجعها احنا مش ملايكه و مش ربنا عشان نحاسب بص انا ما بحبوش هو ما يفرقليش حاجه انا بحب اختى و بحبك و بحبنا كلنا و اى حد يقرب مننا اكله و اى حد يمدلنا ايد و يساعدنا اشيله على راسي
جابر يهز راسه
كارم / يونس مكسب اى كان الصف اللى هيقف فيه هيكسب و احنا محتاجينه
جابر / اذا كان هو نفسه قال انه حتى لو معانا مش هنكسب
كارم / مش عارف
جابر / امال انت عارف ايه
كارم/ يا عم مش لازم اعرف كل حاجه انا مش جوجل انا مكان ما تحطني بأدى و بدى حلو كمان يبقي خلاص... بص فى ناس ربنا خلقها تقود زى ابويا و خالك كدا و فى ناس تانيه ربنا خلقها تفوت فى الحيط بقوتها بس ما بتعرفش تفرمل زى خالى كدا و ناس تانيه تعرف تسايس و تاخد اللى هى عوزاه بحرفنه زى نجاه كدا و الاحرف منها ستى مش كلنا زى بعض و دا مش عيب ما لازم نكمل بعض انا بقي مش قائد و عشان كدا عمرى ما نافست على الكبير
جابر / نفس كلام امين اخويا
كارم / بس صاحب مخلص و جدع و تقدر تعتمد عليا احمى ضهرك
جابر / و اخ حنين كمان ... يعني انت شايف ان يونس انسان كويس
كارم / هو بيحاول يبقي كويس
جابر يبتسم و يبص الناحيه التانيه
كارم / و مش هو اللى ورا حركه البنزينه
جابر / عارف .. اشرب اشرب انا مش طايق نفسي اصلا
كارم يهز راسه و يشرب
.................
فى الحجز
عباده واقف قدام صابر
عباده / فى حد حاطك فى دماغه
صابر / ما اللومش عليه ... حبايبي كتير ... بس هى و عيالها بره السكه
عباده / دى زى بنتى اكيد مش هقصر معاها
صابر / تمام
عباده / انا برده مش عاوزك تقلق انت كدا كدا خارج
صابر / لعدم كفايه الادله مش عشان انا برئ يعني هفضل فى عينها متهم زى ما انا متهم انى قتلت جوزها
عباده / بس ما حدش ساكت
صابر / الحكايه دى عاوزه تتجاب من الاول يا كبير ... من اول رعد كدا و يمكن قبل كدا كمان
عباده / انت شايف كدا
صابر / اصل الشريط اللى بيكر بسرعه ده اكيد كان فى حد مرتبله
عباده / تمام هشوف هقدر اعمل ايه ... ناقصك حاجه هنا
صابر يضحك عباده يبتسم
عباده / عن اذنك
عباده يطلع بره يتنهد و يطلع التليفون و يتصل بحد
عباده / السلام عليكم ايوه يا دياب ازيك عامل ايه
.......................
فى شقه مهره
مهره تصحى تقوم تتمطع و تطلع الموبايل تلاقيه مقفول تفتحه تتخض لما تشوف الساعه
مهره / هو فى ايه بالظبط اللى بيحصل ايه النوم دا كله
مهره تقوم تاخد غيار من الدولاب و تروح الحمام و تقفل عليها الباب تليفونها يرن تفتح الباب و تروح تشوف مين تلاقى رامى
مهره / ازاى يعني ... الو السلام عليكم
رامى/ ايه يا بنتى مالك قلقتيني عليكى مروان قال انك تعبانه
مهره / هو حضرتك مركز بس الساعه كام دلوقت
رامى / ايه المشكله يعني ما انا حاولت اكلمك كتير تليفونك غير متاح
مهره / هو كتر خيرك و كل حاجه بس اعتقد ان فى مواعيد للاتصال يعني
رامى / و كان فى مواعيد للشغل و انا عديتها عشان خاطر يعني انتى فاهمه
مهره / حضرتك بمنتهى البساطه تقدر تخصملى او حتى ترفدنى ايوه انا مقدره ان حضرتك سمحت لى اشتغل عشان اخويا و كدا بس حتى لو عشان اخويا ما ينفعش ابدا حضرتك تتصل بيا فى الوقت ده
رامى / تمام خلاص ما تقفشيش اوى كدا
مهره / و حتى اسلوب الكلام حضرتك مديرى عندك فى الشركه مش صاحبى
رامى / شكلك مش فى المود خالص
مهره / مضطره اقفل سلام
مهره تقفل و مروان يدخل و هو بيتمطع و يدعك فى عنيه
مروان/ مالك حد بيعاكس و لا ايه
مهره/ دا مستر رامى بيطمن عليا على فكره انا مش رايحه الشركه تانى اعتزرله بطريقه ظريفه
مروان / بناقص انا اصلا ما كنتش موافق على حكايه الشغل دى انتى اللى صممتى
مهره / انا داخله اخد دوش
مروان/ تمام قشطه و انا هعمل لقمه أكلها تاكلى
مهره/ اكل جدا يا ريت انا مش عارفه ايه الجوع ده و ايه النوم ده انا بجد مش طبيعيه ابدا
مروان / على فكره ممكن يكون بوادر اكتئاب انا اعرف دكتور ممتاز
مهره / لا خالص انا ابعد ما اكون عن الاكتئاب
مروان/ ما هى اولى اعراض الاكتئاب كدا الإنكار
مهره / ما تهزرش انا واحده قريبه جدا من ربنا و بصلى و بقرا قرآن و لما بيبقي عندى هم بشتكى لربنا يعني عمرى ما يجيلى حاجه زى دى ابدا
مروان / قلب اخوكى الاكتئاب ده مرض سببه الحزن او انك تمرى بموقف سئ او تجربه وحشه من غير ما تتعافى منها كويس فبتحتاجى مساعده
مهره / من بنادم زيي ؟!
مروان / من متخصص
مهره / لا شكرا انا كويسه
مروان/ يمكن محتاجه تغيرى جو ايه رايك بما اننا كدا كدا ساعتنا البيولوجية خربت اخدك بالعربيه و نطير على السخنه نقضي يومين جامدين ننسي فيها الدنيا باللى فيها و نشحن و نرجع ايه رايك
مهره تاخد نفس و تبتسم بحماس و تهز راسها
مروان / تمام انا هدخل احضر لينا لقمه حلوه و انتى اجهزى براحتك تمام ؟
مهره / تمام
مروان يمسك وش مهره بين كفوفه و يبوس راسها و هى مبتسمه يروح المطبخ و هى تروح الحمام
........................
فى الجيم فى سرايا الزنايته
نجاه بتتمرن لوحدها كيك بوكسينج على ساند باج تليفونها يرن تروح ترد و هى بتنهج
عباده/ انتى فين يا بت انتى قلبنا عليكي السرايا
نجاه / فى الجيم تحت
عباده / ايوه تمام صح فى الجيم ما بصيناش هناك
نجاه / بقولك ايه يابا
عباده / قلب ابوكى
نجاه/ لو حاسس نفسك كويس كدا مش تعبان ما تيجى الاعبك
عباده / هبعتلك اخوكى اطحنيه بعيد عنى
نجاه تضحك
عباده/ عدى عليكي فى الاوضه امبارح لقاكى نايمه
نجاه / خير كان فى حاجه و لا ايه
عباده / ابقي اعرفى منه سلام انا دلوقت عشان ورايا مشوار كدا
فارس يدخل شايل ورد و شيكولاته و دبدوب احمر نجاه تستغرب و تضحك
فارس / اضحكي حقك انا قولت لامك اجيب لك حته ام ستاشر احسن قالت لا ورد وشيكولاته و هديه اهو اصطفى مع امك بقي
نجاه / ااااه يعني امى اللى قالتلك تجيب لى هديه طب تمام على العموم تسلم هديه مقبوله
نجاه تروح تجيب الازازه و تشرب فارس يحط الحاجه فى جنب و يروح يبوس راسها
نجاه / امك برده اللى قالتلك تبوس راسي
فارس / اه
نجاه / تمام
نجاه تروح تكمل تمرين و بعدين تبص لفارس
نجاه / ما قالتلكش خليها تتمرن عليك
فارس/ لا ... بس ابويا قالى بالراحه عليها
نجاه تضحك باستهزاء و تكمل تمرين و هى بتتكلم
فارس / اوعى يا بت تكونى استهفاتيني لما المزز اتكاتروا عليا
نجاه / لا بس فالح تدخل تقولها انا ما بضربش حريم دا انا كنت بتشل ... تعرف يونس كان معاه حق احنا أخلاقنا بتكتفنا
فارس / أخلاقنا بتكتفنا و ربنا بينجينا
نجاه / صح ... بس الحرب اللى جايه ما فيهاش شرف ما فيش قوانين مفيش اخلاق
فارس / عاوزه تقولى ايه
نجاه / مش عاوزه اقول حاجه سخن اللاعبك
فارس / انا سخن خلقه تعالى وريني نفسك
نجاه تبصله بطرف عينها يشاورلها تعالى تبتسم و تروح تطبق عليه حركات جوزيف تقلبه فى الارض
نجاه / دا عشان ابويا قالك بالراحه عليا و لا دا عشان ما سخنتش ... استنى استنى عرفت دا عشان انت ما بتضربش بنات
نجاه تضحك فارس يقوم يقف و ينفض ايديه و هو مبتسم
فارس / و لما اتغابى عليكي بتعيطى
نجاه تتنط فى مكانها باستعراض و استفزاز و تشاورله تعال يروحوا يلعبوا و هم بيضحكوا
...........................
قدام البحر
مهره واقفه و مبتسمه مروان يدخل شايل اتنين كوكتيل يناولها واحد
مهره / سبحان الله المكان ده جنه
مروان / فى الفندق هنا بالليل حفله انما ايه عنب انا حجزت تيكتس خلاص
مهره / مش جوى خالص و انت عارف
مروان/ جربى مش هتخسرى حاجه خدى طرى على قلبك
مهره / ميرسي اوى يا مروان على كل اللى بتعمله معايا و عشانى بجد انا مهما عملت مش هعرف ارد جمايلك دى ... انت الوحيد اللى فضلت جنبك وقت ما الدنيا كلها اتخلت عنى
مروان / انتى اختى عارفه يعنى ايه اختى
مهره تحضنه
مهره / عرفت لما قربت منك انت بس
مروان مضايق و يحاول يدارى ضيقته بشرب العصير مهره تسيبه و تقف مكانها تانى
مهره / قولى بقي الحفله دى بقي بيتلبس لها ايه
مروان/ انتى برنسيس لو ملفوفه فى شوال رز
مهره تضحك و تبص الناحيه التانيه مروان يرفعلها الكاسه ناحيه بقها تشرب و هى مبتسمه و هو متابعها بابتسامه
.......................
فى شارع فى البلد
شاهين سايق عربيته بنت ترمى نفسها قدامه ما يلحقش يفرمل يخبطها ينزل يجرى يطمن عليها و الناس تتلم و هى بتتالم و تصرخ
شاهين / انتى طلعتى منين انا ما شوفتكيش و الله ما شوفتك حقك عليا حقك عليا
البنت / آآآآآآه مش قادره رجلى هاتولى اسعاف اللحقونى بالاسعاف
شاهين يشيلها يحطها على الكنبه ورا و يسوق و الناس بتضرب كف على كف
شاهين / خير بإذن الله خير ما تقلقيش هنروح المستشفي على طول و علاجك كله انا متكفل بيه حتى لو هسفرك بره هسفرك
البنت / هتيجي معايا و لا هتسبني اسافر لوحدى
شاهين يستغرب و يبص فى المرايه البنت تغمزله يتنهد
البنت / نعملك ايه ما احنا مش لاقين طريقه حلوه نتواصل معاك بيها ايه مش قدمنا السبت دورك بقي
شاهين / ما طلبتش منكوا حاجه
البنت / لا اللى فات كان بس اماره انما الخير اللى جاى تقيل اوى و اديك جربت وضعك فى العيله اتغير ازاى لما احنا كنا فى ضهرك
شاهين / انتى عارفه هيعملوا فيكي ايه لو سلمتك ليهم
البنت / جرب و احنا نعرف ... بس انت مش هتعمل كدا عشان انت من جواك جربت كل حاجه و ما وصلتش لربع اللى وصلتله يومين معانا
شاهين / الله الغنى
البنت / براحتك ... تقدر تنزلنى فى اى حته او سلمنى ... كلو براحتك
شاهين / بخصوص الحشرات اياها عاوز منها
......................