الكبيره ٢ بقلم / لولو_محمد

الحلقه ١١١

(((((( الكبيره ٢ ))))))
#لولو_محمد
الحلقه ١١١
الراجل / بس عيله الزيني عيله كبيره و ليها اسمها مش من طبعهم ابدا حاجه زى دى اكيد فى حاجه غلط
حاتم / انت تعرفهم يا بابا
الراجل / و هو فى حد فى مصر ما يعرفش عيله الزيني صحيح ما انت سايب البلد بقالك حبه و ناسيها خالص
اخو اكرم / عارفين اصلا ايه المشكله اللى بجد ؟! المشكله ان عمران ده بعد ما طلق مهره بيرسم على صوفيا اختها و كارمن مش قادره توقفه عند حده لوحدها و انتوا عارفين صوفيا بقي عيله مراهقه و مندفعه و ما حدش كان بيقدر عليها غير ابوها ربنا يرجعه بالسلامه
الراجل / البركه فيك بقي حضرتك فى مقام ابوهم دلوقت
اخو اكرم / اقول ايه بس دا مسيطر عليها جدا لدرجه انه بدأ فعلا يفرض سيطرته على الشركه و بعت ناس من معاه زى مستشارين كدا يديروا الشركه و اللى بيقولوه صوفيا و بياتريس بينفذوه حتى لو غلط او ضد رغبتى
حاتم / ازاى كلامهم يمشي على كلام حضرتك و مجلس الإدارة رأيه ايه فى الموضوع
اخو اكرم / ما دى المصيبه بقي الناس دول قدروا يوصلوا لاكرم و يخلوه يعمل ليهم توكيل عام بالاداره فى الاول قولت اكيد مزور و طلبت من المحاميين يتصرفوا لقيت اكرم امبارح بيكلمنى و بيقولى انه بيثق فيهم
الراجل / هم سمعتهم كويسه
اخو اكرم / بس ليهم وش تانى كلنا عارفينه
حاتم / وش ايه ده ؟
..........................
الراجل / عيله الزيني مشهوره بالزراعة بس الحقيقه انهم ليهم دور كبير فى تجاره السلاح فى مصر و ليهم محلات كتير فى كل مكان
اخو اكرم / و الفتره اللى فاتت كان فى حوارات كتير فى بلدهم
الراجل / الصعيد ياما بيحصل فيه يا أمير مش حوار يعني
أمير/ ايوه دا لأنك ما احتكتش بيهم من قريب
الراجل / و بصراحه مش عاوز احتك ... و لو عاوز رايي لمها معاهم انت كمان
أمير / يعني اسيبهم يبلعوا بنات اخويا واحده ورا التانيه
حاتم / هو مش عمو اكرم كلم حضرتك و قالك انه عاوزهم يديروا الدنيا
امير / دا مش اكرم
الراجل يضحك
الراجل / امال ذكاء اصطناعي يعني يا أمير
أمير/ انا شاكك انهم خاطفينه
حاتم / طب ما تبلغ البوليس
أمير/ اخاف يعملوا فيه حاجه
حاتم / انا عندى فضول اكمل الموضوع ده بس للاسف عندى معاد و مضطر استأذن
الراجل / على فين كدا
حاتم / عندى تمرين فروسية … عن اذنكوا
حاتم يمشي
أمير / فروسيه ؟!
الراجل / خلينا فى موضوعنا
أمير / و ماله ها مش هتقف جنبى برده
الراجل / عاوزنى اعمل ايه يا أمير بس و انا اعمله
أمير/ هقول لك
…………………..
فى شقه عمران
هند بتحط اكل على السفره عمران يدخل و شايل شنطه كبيره من محل فيها علب يحطها على ترابيزه الانتريه
هند / حماتك بتحبك جاى فى وقتك
عمران / امال مهره فين جبت تشكيله رز بلبن على ايسكريم على وافل قولت ندلع شويه
هند/ و انت جايبهم لمهره بس ما عملتش حساب امك
عمران / لا ما قصدتش اكيد طبعا عملت حساب حضرتك دا انتى الخير و البركه بس ما شوفتهاش فسألت
مهره تطلع من المطبخ  شايله طبق فيه ملوخية تشوفه تبتسم و تتكلم بالاشاره يرد عليها بالاشاره
مهره / صوفيا جايه
عمران / تنور
مهره / كانت عاوزه تخرج نروح النادى شويه
عمران / مفيش مشكله انا فاضي بس مش هنتاخر
هند تشيل الأكياس و تدخل
عمران / اجى اساعدك يا ماما
مهره تكلمه بالاشاره
مهره / انا رايحه اساعدها انا على ما تغير هدومك و تتشطف
عمران يبتسم و مهره تروح ورا هند الباب يخبط يروح يفتح يلاقي صوفيا
صوفيا / ازيك
عمران / الحمد لله ازيك اتفضلى
صوفيا تدخل
صوفيا / انا كنت ناويه ائجل الخروجه دى لما تخلص الامتحانات بس ماما هند عزمتني على الغدى فجيت
عمران / تنورى فى اى وقت هم فى المطبخ هستاذنك ثوانى اغير و ارجع لكم
صوفيا / خد راحتك
عمران يبتسم و يدخل اوضته و صوفيا متابعاه مهره تطلع من المطبخ شايله سيرفيس عليه فراخ صوفيا تروح تقف جنبها
صوفيا / شكله رايق كنت مرعوبه الامتحان يقلب مزاجه
مهره ترد بالاشاره / عمران شاطر
صوفيا / و انا فاهمه العبط ده اوى
مهره تبتسم بحرج و تشاور على المطبخ و تدخل و صوفيا عينها على اوضه عمران
……………………………
فى بيت جابر
جرس الباب يضرب ينزل من فوق يروح يفتح يلاقى احلام شايله صينيه عليها اكل
احلام / صح النوم
جابر / تعالى ادخلى
احلام / جبت لك الاكل لحد عندك اهو بس مش عارفه هتفضل صاحى طول الليل نايم طول النهار لحد امتى
جابر / لماضه اختصرى ادخلى
احلام تدخل جابر يقفل الباب
احلام / بيتكلموا عنك فى السرايا
جابر / و ايه الجديد
احلام / مفيش ... انا ماشيه
جابر / ماشيه فين انا عاوز اتكلم معاكى اصلا امال قولت لك تجيبي الاكل هنا ليه 
احلام / خير
جابر / اقعدى
احلام و جابر يقعدوا
جابر / ايه الدنيا ناويه على ايه ؟
احلام / فى ايه
جابر / ما تصيعيش بقي هو فى موضوع غيره ... قاسم ... حاسه بايه ؟
احلام / و لا حاجه بصراحه
جابر / معقول
احلام / بصراحه خايفه
جابر يتعدل فى قاعدته
احلام / خايفه اكون بخون
جابر/ شششش ما تكمليش ما تكمليش ايه هتعيشي عمرك كله يعني من غير جواز مثلا و لا ايه ؟ ... تفتكرى لو هو مكانك كان اترهبن عليكي كدا يعني ... يا بنتى الحى ابقي من الميت
احلام / ما فاتش كتير برده يا جابر لا خدنا بتاره و لا بردنا نار اهله و لا ...  ما فاتش كتير
جابر / انتى غاليه عندى و بعدك عنى أصعب حاجه فى الدنيا و الاصعب انك تفكرى انى ممكن اقول كدا عشان اخلص منك أو أنك تقيله عليا او اى حاجه من العبط اللى بيدور فى دماغك بس ... ساعات بحس انك لو بعدتى عن كل ده حياتك هتكون افضل
احلام / بيتهيالك
جابر / جربى
احلام / كنت فكراك امبارح رافض
جابر / شاريكي و مضمون اخلاق و تربيه و دين
احلام / عارفه و ده اللى شجعنى ... و الواد بصراحه خطف قلبي
جابر / هو يتحب بصراحه ..  المهم لو سألوني اقول ايه ؟ الناس مش هتطول هنا
احلام / ما تقول اللى تقوله يا جابر ايه الغتاته دى
جابر / ادى اخره اللى ياخدكوا عليه ... قومى شوفى اللى وراكى
احلام / يا سلام ... و ماله
احلام تروح ناحيه الباب
جابر / استنى
احلام تبص له و تحط ايديها فى وسطها جابر يقوم يفتح درج فى التافيل و يطلع شيكولاته كبيره و يروح يديهالها
جابر / الغالى للغالى
احلام / تسلم
احلام تفتح الباب و تمشي و جابر يقفله وراها
.....................
فى النادى
هند و صوفيا يقعدوا على ترابيزه
عمران / هروح اخد راوندايه فى السريع
صوفيا / اجى معاك؟
هند / هتروحى فين دول ناس رايحين يتمرنوا هتسبيني لوحدى يعني
صوفيا / اكيد لا طبعا طب و الله كان نفسي نقعد نتعرف على بعض اكتر
هند / و مش هتلاقي فرصه احسن من دى ... روحوا انتوا يا ولاد خلصوا التمرينه عشان ما تتأخرش على مذاكرتك هانت
صوفيا / ايه ده هى مهره هتتمرن
هند / هم بيعملوا ايه حلو هنا انا اول مره اجى هنا انتى بتيجي هنا كتير يا صوفيا
حاتم يدخل و يسلم
حاتم / ايه الصدفه السعيده دى
صوفيا / حاتم!! هاى ... انت بتعمل ايه هنا
حاتم / جيت الصبح مع بابا و بعدين روحت اتمرن شويه و كنت مروح اهو بس ليا نصيب اشوفكوا ... كنت هجيلك على فكره
عمران / هتجيلى انا !! خير
حاتم/ بعدين بقي مش هشغلك عن الجماعه
عمران / تمام نبقي نتكلم
حاتم / تمام سلام ... سلام يا طنط
هند تبتسم له حاتم يمشي عمران يكلم مهره بالاشاره
عمران / يلا و لا ايه ؟
مهره تبتسم و تمشي عمران يمشي وراها
صوفيا / غريبه حكايه الإشارات دى مش فهماها انا
هند / امال هى تتكلم ازاى
صوفيا / زى ما كانت بتتكلم تكتب لنا على الاقل نفهم
هند / ربنا يشفيها و ترجع تكلم معانا تانى و الله العظيم وحشنى صوتها اوى
صوفيا / هو انتوا هترجعوا البلد على طول اول ما عمران يخلص امتحانات ؟
هند / هنقعد نعمل ايه
صوفيا / عمران ممكن يلاقى شغل كويس اوى هنا انا اعرف ناس عندهم
هند / شغل عمران مستنيه و بلده اولى بيه
صوفيا / حضرتك بتتكلمى كأنها بلد تانيه ما احنا برده فى مصر
هند / ام الدنيا ... بس انتى اصلك ما تفهميش الحاجات دى ... مش قصدى حاجه وحشه ... بس اللى ما جربش ... اصل بلدنا دى حاجه تانيه تعرفى انى اصلا قهراويه ... اه من مصر هنا اتولدت و اتربيت و درست هنا بس يمين بالله من يوم ما نزلت البلد زياره بس و انا روحى اتعلقت بيها بقت زى المايه بالنسبالى
صوفيا / ما هو اكيد هينزل البلد زيارات برده بس هنا فرص اكتر
هند / زى ايه
صوفيا / كارير و خبره و فلوس
هند / لو على العلم و الخبره و ماله و يسافر بره مصر خالص كمان بس هيلف يلف و هيرجع يطبق اللى درسه و اتعلمه فى بلده لو على الكارير فالحمد لله عندنا المصانع و الشركات و اللى مش موجود يكمله و لو على الفلوس فخير ربنا كتير
صوفيا / و دا راى عمران برده ؟
هند / احنا ما اتكلمناش فى الموضوع ده خالص قبل كدا اصلها بديهيات بس لو له كيف فى حاجه ما حدش هيقدر يقول له لا هو مش عيل دا راجل و سيد الرجاله و رأيه من دماغه مش من حد ... هو احنا المفروض نقوم نجيب طلباتنا و لا فى حد هيعبرنا فى المكان ده الواحد ريقه ناشف
صوفيا تبتسم
صوفيا / ثوانى هناديه لحضرتك و اجيب لك مايه
هند / تسلمى يا قلبي ما اتحرمش منك
صوفيا تبتسم و تقوم
................
فى الاسطبل عمران و مهره واقفين بيتكلموا بالاشاره
عمران / بس انتى بتتحسنى
مهره / فى كلمات كتير لسه مش عرفاها
عمران / مع الوقت و الممارسه
مهره / طول اليوم ماسكه الموبايل و بتعلم
عمران / كويس بس ما ينفعش نهمل العلاج
مهره تبتسم بسخريه عمران يتكلم
عمران / هتخفى على فكره
مهره تبص له يكمل كلام
عمران / انا واثق انك قويه و هتعدى من كل ده ... هتتكلمى تانى ... مهما اخدتى وقت هتخفى
مهره تشاور عمران يشاور
مهره / هتسافر بعد الامتحانات
عمران / لا
مهره / ليه
عمران / فى حاجات مهمه جدا هنا محتاج اطمن عليها الاول
مهره تهز راسها و تشد الفرسه و تروح ناحيه المران و عمران متابعها
..........................
فى شقه نسمه
جرس الباب يضرب نسمه تبص من العين تلاقي فيراس ترد من ورا الباب
نسمه / خير يا فيراس ابويا مش هنا
فيراس / انا كنت جايب لك خزين الاسبوع
نسمه / و انت اللى تجيبه ليه امال ابويا فين
فيراس / على فكره انا ما كنتش هدخل انا كدا كدا كنت مستنيكي تعرفى انى سايبه على الباب و ماشي انا بفهم فى الأصول برده
نسمه / كتر خيرك
فيراس / على فكره انا محتاج اتكلم معاكى
نسمه / ما اعتقدش فى اى كلام بينا و المفروض تمشي على فكره
فيراس/ بس احنا لازم نتكلم ... هكلمك فى التليفون
نسمه / مش هرد و امشي بقي بلاش مشاكل ابوس رجلك
فيراس/ تمام ماشي بس ردى ... لازم تردى
نسمه / قولت مش هرد و لو ما مشيتش مش هيحصل كويس و انا ليا كلام تانى مع ابويا انه بعتك بالحاجة
فيراس / على فكره انا مش ميت عليكي انا زيي زيك بالظبط
نسمه / ليه نغه بقول لك ايه انت لو فضلت مكمل فى سكه ابويا دى هتخسرنى للأبد و الله اعلم ايه اللى ممكن تخسره كمان
فيراس / ايه هتشتكينى لصابر زى ما الناس بتتكلم 
نسمه / و انت وقفتك على باب بيتي الوقت دا كله مش هتخلى الناس تتكلم امشي بقي
راجل يطلع
الراجل / خير يا فيراس في حاجه و لا ايه
فيراس / و انت مالك انت
الراجل / عملوها قبلك ... الله يرحمهم بقي
فيراس / ما تفتحيش دلوقت يا ام بدر ... أما اشوف الحوار ده
نسمه تفتح الباب
نسمه / مش هنخلص بقي ها مش هتمشي بهدوء انت ؟! جاى و ناويها يعني و لا ايه ؟!
الراجل/ ادخلى يا ست نسمه و انا هاخده و ننزل
نسمه / كتر خيرك بس انا لا عوزاك تاخده و لا عوزاه ياخدك ... حلو عنى كلكوا
الراجل يهز راسه و ينزل الجيران يتجمعوا على السلم
نسمه / يمين بالله ان كررتها تانى يا فيراس لانسي الدم اللى بينا و تشوف منى وش يفاجئ الكل منى فاهمين و لا لا
فيراس / اهدى يا نسمه و وطى صوتك
نسمه / انت لسه واقف ؟! .. امشي بقولك... امشي !!!
فيراس / بقولك وطى صوتك
ام ايمان / ما خلاص بقي يا فيراس امشي جبت حاجات سيبها على الباب و امشي ما لهاش لازمه الوقفه دى
فيراس / عاجبك كدا يعني
نسمه / عاجبنى و لو ما غورتش من وشي اقسم بالله
فيراس/ ما تحلفيش عليا انا كدا كدا ماشي ... ليكي اب يترد عليه
نسمه / غور !!!
فيراس يمشي نسمه تدخل و ترزع الباب
ام ايمان / مش هتاخدى الحاجه طيب ... ليكون فيها حاجه تبوظ ... نسمه ... يا ام بدر الحاجه ... ايه الورطه دى بقي ... يا نسمه افتحى خدى الأكياس طيب
........................
فى كافيه
حاتم / ما كنتش متخيل انك هتكلمنى بالسرعه دى
عمران / للاسف وقتى محدود و خفت انساك
حاتم / لا ما تقلقش ما كنتش هتنسانى و لا حاجه
عمران يبتسم
عمران / خير
حاتم / انت تعرف ايه عن عموا اكرم
عمران / كل خير ... ليه ؟
حاتم / اصل فى كلام كدا انك عارف مكانه
عمران / كلام
حاتم/ يعني ما تعرفش
عمران / هو الاستاذ اكرم عيل صغير مثلا ما هو راجل كبير هيكون مكان ما يكون و هيرجع وقت ما يحب
حاتم / اصل عمو أمير ليه تحفظات كدا عن تدخل عيلتكوا فى الشركه
عمران / دا كان بناء على طلب من صوفيا و بياتريس غير كدا ما كناش ادخلنا و حتى موضوع تدخلنا ده بحدود احنا ما لناش مصلحه فى الموضوع
حاتم / و لا احنا و بصراحه كدا ... انا ممكن اثق فيكوا انتوا اكتر ... اصل عموا أمير ليه تكات كدا برده ... بس انت عارف اننا اهل يعني لو قصدنا ندخل فى اى حاجه اعتقد هيبقي الموقف مش احسن حاجه
عمران / ربنا يصلح الحال
حاتم / بصراحه كدا ما كانش ده الموضوع الأساسي اللى كنت عاوزك فيه
عمران / مفيش مشكله ... ايه الموضوع الاصلى
حاتم / مهره
الابتسامه تروح من وش عمران
حاتم / هى مش قاعده عندك فى البيت دلوقت
عمران / قاعده مع والدتى
حاتم / و كانت طليقتك ... قبل ما تشرح طنط كارمن شرحت لى كل حاجه ... و بصراحه انبهرت بحركه الجدعنه بتاعتك دى ... مستغربها ... بس مستجدعها
عمران/ هو السكه دى اخرتها ايه عشان مش فاهم
حاتم / من غير ما أجمل الكلام ... انا كنت عاوز اطمن ان موضوع طلبى ليها مش هياثر على اللى بينا
عمران / ما فيش حاجه بينا اصلا عشان حاجه تأثر عليها
حاتم / بينك و بينها و لا بينك و بيني
عمران يقف
عمران / انا و انت هى بره القصه .. انا كنت فاكرك عاوزنى فى حاجه مهمه بس طلع انك فاضي و عاوز تتسلى و انا للاسف مش فاضي فهستاذن و نبقي نكررها وقت تانى اكون فايق و ساعتها هنتسلي و نعمل كل اللى أنت عاوزه
حاتم / افهم من رد فعلك دى ان فى حاجه بينكوا
عمران/ بلاش انا يا حاتم ... بجد بلاش انا
عمران يمشي و حاتم متابعه يبتسم بسخريه و يطلع الموبايل و يتصل بحد
......................
فى شقه مهره
هند / ما تمشيش يا مهره ما ترجعيلهمش
مهره تكتب / انا بحبك بس دى مامتى و دول اخواتى
هند / عارفه بس ... قلقانه عليكي
مهره تكتب / اقولها لا ازاى طلبت منى ارجع بيتي اقول لا ازاى دى مامتى
هند تتنهد و تهز راسها اه
هند / مهما حصل بيتنا مفتوح لك طول الوقت و رنه واحده منك ... رنه واحده بس يا مهره ... هنجيلك هوا
مهره تبتسم و تحضنها تليفون مهره يرن تكنسل و تكتب
مهره / صوفيا وصلت ... انا متشكره على كل اللى بتعملوه معايا
هند / هتوحشيني اوى
مهره تحضنها تانى و تفتح الباب و تمشي و هند متابعاها
..................
فى عربيه عمران
عمران بيتكلم فى التليفون
عمران / ايه السرعه دى ازاى يعني ... هعمل ايه يعني هروح ... لا مش هحتك بيه بس بجد لازم تخلص لى الموضوع ده فى اسرع وقت الواد حرفيا حرفيا ... دا انا جبل انى مخليتش وش امه شوارع ... انت بتضحك على ايه ... ما تعصبنيش انا مش فايق لك ... خلص و كلمنى ... سلام
عمران يقفل و يتصل بمهره فيديو كول ما تردش يتنهد و يكمل سواقه يلاقي تليفونه بيرن مهره يرد يلاقي صوفيا
صوفيا / ازيك
عمران / تمام الحمد لله امال مهره فين
صوفيا / نسيت تليفونها فى الهول هى مع مامى فى اوضتها بيحلوا المس اندرستاندينج اللى بينهم يا رب يتصالحوا بقي يا رب
عمران / امين
صوفيا / انت مش متخيل انا متوتره ازاى و كمان انا بذلت مجهود قد ايه مع مامى عشان تقبل تتكلم معاها ... هموت و اعرف ايه اللى حصل من الاول ابدا ما حدش فيهم بيحكي.. بس هو غالبا حاجه ليها علاقه بمروان او الفتره دى عموما
عمران / ربنا يصلح الحال
صوفيا/ هى طنط هند حكت لك على اللى اتكلمت فيه معاها
عمران / انا سايق دلوقت مش مركز لما اروح نبقي نشوف
صوفيا/ تمام كلمنى فى اى وقت انا بسهر
عمران / سلام
عمران يقفل و يتنهد و يكمل سواقه
................
فى اوضه كارمن
كارمن / كل حاجه راحت ... خسرنا كل حاجه انا و اخواتك هنبقي فى الشارع
مهره تكتب / شقتى موجوده
كارمن / شقه ايه !! انتى عوزانى انا و اخواتك نعيش فى جحر الفيران ده ... يا ستى تمام اتلمينا فيه هناكل منين هنلبس منين انتى واخده على العيشه دى اخواتك مش هيستحملوا كل ده ليه اصلا... أمير لازم يلاقي اللى يوقفه عند حده
مهره تكتب / الزن..
كارمن ما تسيبهاش تكمل و تحط ايدها على الشاشه مهره تبص لها
كارمن / انا مش هكدب عليكي انا طول الوقت كنت بحاول اوفق بين حاتم و اى واحده من بناتى بس هو لسبب ما اختارك انتى و لقيته بيكلمنى عليكي و الوضع كان صعب جدا انتى متخيله واحده بظروفك دى ... ما كانش قدامى غير انى اقوله الحقيقه يمكن يغير رأيه... بس فوجئت انه متمسك بيكي اكتر
مهره تكتب/ هو حضرتك طلبتى ارجع عشان كدا ؟
كارمن / لما ما كانش ليكي حد اكرم فتح لك بيته و لما اتخانقتى مع اكرم صوفيا ما سابتكيش انتى دلوقت قدامك حل من اتنين يا ترجعى للزنايته اللى حطونا فى الموقف ده من البدايه لما خطفوا اكرم ياما تختارينا احنا و تقبلى تتجوزى حاتم
مهره تبص فى الارض
كارمن/ ادى لنفسك فرصه قربوا من بعض اتعرفوا على بعض اكتر ... حاتم شاب كويس جدا و من عيله كبيره جدا ... ابوكى ذات نفسه كان يتمناه لايلين
مهره تكتب / هكلمهم عن عموا اكرم
كارمن / و هتروحى فين لما اكرم يرجع ... هترجعى بيتك و لا هترجعى شقه عمران انتى متخيله احساسي و انا عارفه انك بايته عندهم
مهره تكتب / لا و الله انا
كارمن تحط ايدها على الشاشه
كارمن / ما تقوليش حاجه لاخواتك عن الكلام ده و فكرى بهدوء انا مش بضغط عليكي بس حاتم مش هيقعد فى مصر كتير و لو سافر احنا مش هنلاقى اللى يقف لأمير السنه راحت على اخواتك و السنه الجايه لازم ندفع مبلغ كبير مصاريف الجامعه انتى متخيله احنا بنتكلم فى ايه ... انا كارمن اشيل هم الفلوس ... دا انا عمرى ما بصيت على الأسعار فى المنيو عمرى ... انا اتبهدل كدا فى اخر ايامى ... اتقهر على بناتى كدا ... الموضوع ده لو اتسرب للأخبار انا فضيحتي هتبقي بجلاجل ... اخواتك مستقبلهم هيدمر ... كل ده بسببك
مهره بصه لها و ساكته كارمن تحضنها مهره عنيها توسع
كارمن / لا مش بسببك بسبب اكرم و احنا اللى لازم ندفع التمن لازم ندفع تمن اننا ما صدقناكيش سامحيني يا بنتى سامحيني انى ما صدقتكيش
مهره تعيط
كارمن / بصي ... انسي كل اللى قولته ... احنا هنلاقى حل ... اكيد هنلاقى حل تانى للموضوع ده ... روحى نامى و ارتاحى و بكره باذن الله نفكر بهدوء
كارمن تمسح دموع مهره
كارمن / ما تفكريش فى حاجه ... هتتحل باذن الله... ما دام احنا مع بعض كل حاجه هتتحل
مهره تهز راسها كارمن تبتسم مهره تبتسم
كارمن / روحى ارتاحى يا حبيبتى ... نورتى بيتك
مهره تحضن كارمن كارمن تطبطب عليها
....................
فى شقه عمران
هند/ و انت ناوى تعمل ايه ؟
عمران / مش عارف
هند / انا بقي عارفه ... انت مش هتعمل اى حاجه لحد ما تخلص امتحاناتك
عمران / ماشي و بعدين
هند / و لا قبلين
عمران/ بعد كل اللى قولتهولك ده
هند / انت عاوز ايه يا عمران عاوز تخطبها ؟ تحب اخدك من ايدك دلوقت و نروح نكلم امها ؟! لو عاوز قولى اقوم اغير و اجى معاك ... بس انت ايه اللى مخليك حاسس اصلا انها ممكن توافق عليه
عمران / ما هى مش هتوافق هى ما تعرفوش و لا بتحبه و هو اساسا ما يتحبش بس انا مش واثق فيهم هم ... هى مش مستقره نفسيا و عوزاهم يقبلوها باى شكل
هند / بس مش بأنها تتجوز يعني
عمران / طب اربطى حضرتك الأحداث كدا و قوليلى ... هل فى معنى تانى انه يكلمنى فى نفس الوقت اللى امها بتقول لها فيه فجاه انها رضيت عنها و سامحتها غير كدا
هند / بس مهره مش غبيه و لا مغيبه ليها راى و شخصيه و
عمران / كان ليها ... دلوقت هى مش مستقره نفسيا يا امى
هند / طب انا هخليني معاك على الخط ... قولى نقدر نعمل ايه و انا اعمل
عمران / و لا حاجه ... انا داخل اوضتى
هند / عمران ما تعملش اى حاجه من غير ما ترجع لابوك
عمران يبتسم و يهز راسه حاضر و يدخل الاوضه
هند / دا ايه العند ده ما تقولى اللبسي و تعالى معايا نخطبها دا انت عيل تنح
........................
فى اوضه نجاه
نجاه قاعده على السرير و بتكلم مهره واتس نجاه تسجل فويس
نجاه / فرحت لك طبعا انك اتصالحتى مع مامتك بس مستغربه مش اكتر
مهره تكتب / و عرفت اللى اكرم عمله و صدقتنى
نجاه تبعت فويس
نجاه / ما عمتى ورتها فيديو اعترافه و برده ما صدقتهاش
مهره تكتب / اكيد فكرت مع نفسها و جمعت الأحداث و صدقت
نجاه تتنهد و تبعت فويس
نجاه / انتى مرتاحه طيب ؟
مهره تبعت استيكر طفله بترقص نجاه تضحك و تبعت فويس
نجاه / ربنا يسعدك انتى تستاهلي كل خير و خليكي فاكره انك واحده مننا و مهما حصل احنا هنكون جنبك اتفقنا
مهره تبعت ايموجى بوسه باب الاوضه يخبط
نجاه / مين
احلام / انا
نجاه / تعالى
احلام تدخل
احلام/ فاضيه اتكلم معاكى شويه
نجاه / طبعا و ان ما كنتش فاضيه افضالك هو انا عندى اغلى منك تعالى
احلام تدخل و تقفل الباب و تروح تقعد جنبها
احلام/ شكلك مش فى المود
نجاه / مهره ... ما تشغليش بالك خير يا قلبي مالك انتى بقي
احلام/ انا عارفه ان الفتره اللى فاتت علاقتنا ما كانتش احسن حاجه
نجاه / ما كنتيش لوحدك ... بصي انسى انسى ياما بيحصل بين الأخوات و انا و انتى مفيش اى حاجه ممكن تأثر على اللى بينا
احلام / انا عارفه و صدقيني اى كلام قولته او تصرف عملته كان عشان بحبك و بحب جابر... انتى اللى غبيه
نجاه / حصل ما تبقيش زيي بقي
احلام / ما انا شكلى هوافق فعلا ... بس مش هكدب عليكي مش مرتاحه ... موافقه بعقلى بس
نجاه / طب ما تدوا لنفسكم وقت يعني خطوبه تعارف و تشوفى الدنيا ما تستعجليش و صلى استخاره
احلام / صليت و حاسه انى متعلقه بمازن اوى بس انا هتجوز ابوه مش هو
نجاه / ما انتى ما ينفعش تقضي الوقت كله مع مازن و تتوقعي انك هتقربى من قاسم و بعدين خلينا نقول كلمه حق الراجل حاول يبهرك و ابهرنا كلنا مش هنكدب
احلام / ما انا سمعت ان فى واحد حاول يبهرك و اخد على قفاه فى الاخر
نجاه / ما عاش و لا كان اللى يقرب من قفا جابر
احلام تضحك
نجاه/ و بعدين انتوا ليه مش قادرين تفهموا انا مش بتاعه جواز و استقرار و اسره و الكلام ده خالص
احلام / امال انتى بتاعه ايه
نجاه / لسه مش عارفه ... عشت عمرى كله بجرى ورا حاجه عمرها ما هتكون من نصيبي ... بدور لنفسي على هدف جديد اعيش عشانه ... اعتقد هى دى مشكلتى دلوقت ... هو ده سبب توهتى
احلام / ما فكرتيش ان الجواز و الخلفه و بيتك يكونوا سبب ممتاز تعيشي عشانه ؟
نجاه / مش عارفه ... انا لسه تايهه
احلام / انتى رافضه جابر عشان هيبقي الكبير صح ؟
نجاه / جابر اكتر واحد يستحقها... بعدى
احلام تخبط نجاه بالمخده نجاه تضحك
نجاه / وحشتنى قاعدتك يا بت الايه
احلام تنط فى السرير جنب نجاه و تحضنها
........................
فى اوضه عمران
عمران قاعد بيزاكر يقفل الكتاب و يقوم يروح الحمام و يغسل وشه و يبص فى المرايه و ينفخ و يروح اوضته و يطلع التليفون و يطلع نمره و بعدين يفكر و يروح يلبس و يفتح باب الشقه
صوت هند / عمران !!!
عمران يقف
هند / انت نازل ؟ انت مش قولت ما وراكش حاجه النهرده !! رايح فين ؟!
عمران / اه نازل اجيب حاجه كدا و راجع
هند / تمام ... خد بالك من نفسك
عمران / حاضر
هند/ هات ايسكريم معاك و انت راجع
عمران/ حاضر
عمران ينزل يركب الموتوسيكل و يروح لاقرب محل موبايلات و يشترى تليفون و شريحه و يركبهم و يطلع بره المحل و هو بيتصل بحد
عمران / انا عمران و دا رقمى الجديد و محتاج منك خدمه بعيد عن ابويا
............................