الكبيره ٢ بقلم / لولو_محمد

الحلقة ٧٤

((((((( الكبيره ٢ )))))))
#لولو_محمد
الحلقه ٧٤
نسمه / انا اسفه انا عارفه انى طولت انا فعلا اسفه انا
الممرضه تقرب من نسمه و تعدى ايدها الفاضيه على كتفها و تهديها
الممرضه / جوزك؟!
نسمه تتحرج و تحاول تلم الموقف
نسمه / امممم ... لا ... مش جوزى ... يعني هو
الممرضه / انتى متوتره كدا ليه اهدى
نسمه/ انا مش متوتره و لا حاجه ... هو له علاج أو حاجه
الممرضه / الحقيقه لا ما لوش ... بس انتى ليكي
نسمه/ ايه !!!
الممرضه تحاول تحقن نسمه نسمه تمنع ايدها و تقاومها و تزقها الممرضه تضرب نسمه بالرجل فى بطنها تقلب نسمه على ضهرها نسمه تصرخ
نسمه / منصور !!!!
الممرضه تهجم على نسمه و تكتم نفسها بايدها و لسه هتديها الحقنه تتخبط بشاشه على راسها تفقد الوعى نسمه تسحب نفسها لورا و تقوم تقعد و هى بتصرخ
نسمه / منصور منص...
..............................
نسمه تبص تلاقي صابر واقف و فجاه يقع فى الارض نسمه تجرى عليه و هى بتصرخ
نسمه / صابر!!!  صابر !!! منصور !!! منصور !!!
نسمه تعدل صابر فى حضنها و تحاول تفوقه
نسمه / صابر صابر عشان خاطرى فوق فوق صابر صابر
دكتور و اتنين ممرضات يدخلوا و منصور وراهم
الدكتور / ايه اللى حصل هنا ايه التهريج ده
ممرضه تمسك حقنه من الارض
نسمه / كانت بتحاول تحقنى بيها ... صابر فاق صابر فاق و ضربها صابر كان على رجله من دقيقه صابر فاق يا منصور صابر فاق
نسمه تعيط و منصور و الدكتور و الممرضات بيحاولوا يعدلوا صابر فى السرير
الدكتور / طلعيهم بره و اطلبى الأمن
ممرضه تطلع منصور و نسمه بره و نسمه منهاره من العياط
منصور/ مفيش اى حد دخل انا واقف على الباب مفيش حد دخل
منصور يطلع الموبايل و يتصل بحد
منصور / انتى كويسه طيب فى حاجه حصلت ليكي
نسمه / صابر فاق و انقذنى و وقع تانى
منصور / دى بشره خير ما تقلقيش ... ايوه يا عمى السلام عليكم
........................
فى مكتب الزنايته
مختار / تمام يا منصور خير كلو خير ... اكيد ... لا ما تقلقش الجماعه هيشوفوا شغلهم اهم حاجه ما تفارقش نسمه و حاول تعرف كانوا هيحقنوها بايه ... اشمعن همام؟!! ... هى فكره مش وحشه ... كلمه مش هيقول حاجه ... تمام سلام ... فى حفظ الله سلام
مختار يقفل السكه
مختار / صابر فاق
مغاورى / منصور كان ليه وجهه نظر يعني
مختار/ سبحان الله قوه العقل الباطن ما حدش ينفع يستهون بيها
مغاورى / نرجع لموضوعنا ... هنعمل ايه
عباده/ ايه رايكوا فى انتقال سلمى للسلطة
مختار / ايه ؟!!
عباده / الحرب دى مش حربنا احنا مش هنقدر عليها
مختار / نستسلم يعني و لا اي مش فاهم
عباده / بتكلم عن جابر ... انا مش شايف انى هقدر أضيف جديد
مختار / انت بتهرب
عباده / اعتبرها كدا انا محتاج اتفرغ لبيتي شويه ... و دا ما يمنعش انى هكون فى ضهره لحد ما يشد عوده و اتأكد خالص انه قدها و مش محتاجنى
مختار / انا بحاول استوعب بس انت نفسك مستوعب انت بتقول ايه
مغاورى / انتوا مستوعبين انتوا الاتنين بتقولوا ايه ؟! و امتى ؟! دا احنا ما كناش قادرين على ابو الغضب و المزدوج قمنا قالبين علينا مازنجر الوحيد اللى عندنا و بعتناه يساعدهم
مختار / اولا ما تستهونش برجالتنا و تقول مازنجر الوحيد الحمد لله عندنا بدل الراجل الف
مغاورى / مش بربع إمكانياته يا مختار ... يا خويا دا كفايا البدله اللى لبسها لنجاه ... البت كانت بتجرى ولا فلاش بتاع الافنجرز
عباده / و ايه المقابل يا مغاورى
مختار / يونس مش ضدنا
عباده / ليه بقي ؟!! جبت الثقه دى كلها منين هاه ؟!! و ازاى اصلا واثق اوى انه كان معانا من الاول
مختار / قلب المؤمن دليله
عباده / و انا قلبي بيقولى انه ابن كلب دون قولى بقي ان انا مش مؤمن يا مختار
مختار يروح يقعد فى جنب
مغاورى / طب احنا برده هنعمل ايه دلوقت
مختار / هنرتب صفوفنا و نستني
مغاورى / هنستنى ايه ؟
عباده و مختار يبصوا لبعض
مغاورى /  هنستنى ايه و الله ما فاهمك
.....................
فى شقه بره البلد
الباب يخبط جوزيف يروح يفتح يلاقي امايا يبتسم
امايا / وحشتنى مع انى زعلانه اوى منك
جوزيف/ شوفتى اللاعب الجديد اللى نزل الملعب
امايا / ما اعرفش مين بس ... هو مش معانا
جوزيف/ سعيد انك واخده بالك
امايا / هو المفروض اقولك ان عدو عدوى صديقي بس انا مش عارفه انت صديقي اصلا يا ..  انت جوزيف و لا يونس صحيح ؟
جوزيف يضحك
امايا / طب يا ترى انت عدو عدوى و لا ؟!!
جوزيف / ما هياش عدوتك و انا اكيد اكتر من صديق
امايا / للاسف حقيقه
جوزيف / الاعب التالت ده عاوز البدله او عاوزنى انا
امايا / بالرغم من ان حركه البدله دى عجبتنى بس لا هو مش عاوزك انت ... الامكانيات دى مش صعب عليه يحدد مكانك و يخلص منك ... هو ورا البدله
جوزيف / البدله فى شنطه عربيه مغاورى فى فيلا الزنايته
امايا / و نجاه كمان هناك
جوزيف / امال هو مستني ايه
امايا / تفتكر فى حد هينزل بالسايبورج دول فى عز النهار برده يا جوزيف
جوزيف / تؤ ... و لا جوه البلد ... الهجمه الجايه مش هجمه سايبورج
امايا / مظبوط هو عارف ان الزنايته هيحتفظوا ببواقى السايبورج عشان يستفيدوا منها و دا معناه انها مش هتقع فى ايد الحكومه و هيفضلوا فى السر
جوزيف / بس السايبورج مش سر 
امايا / بس مش سلاح ممكن تلاقيه فى السوق السوده حتى وجوده معناه حرب دوليه
جوزيف / ايه اللى فى دماغك
امايا / صحيح يا جو هو مش المفروض انى غاليه عندك ؟
جوزيف / انتى شايفه ايه ؟
امايا / شايفه انك عمرك ما جبتلى زيها
جوزيف/ دى غيره بقي !!!
امايا / دا حب ؟!
جوزيف / حياتها مهمه لينا كلنا من غيرها
امايا تحط صابعها على بقه و هى مبتسمه
امايا / اذا كنت انا حبيتها
جوزيف / بقولك ايه ... خلينا نركز فى اللى جاى
امايا / رجاله شحته هيوصلوا امتى ؟
جوزيف يبتسم
امايا / انا شخصيا بناتى جوه البلد و فى كل مكان ..  انت عارف ان دخول البنات البلد اسهل مليون مره من دخول الرجاله صح
جوزيف / الدخول سهل المشكله فى الخروج للاسف
امايا تبتسم و تعمل بايديها نص نص جوزيف يضحك
......................
فى اوضه نجاه
مهره نايمه على السرير نجاه تقعد جنبها
نجاه / هتفضلى متنحه فى السقف كتير
مهره / و هو الكلام ده بالنسبالك عادى
نجاه / احنا مش مجرمين يا مهره و انتى عارفه
مهره / انا ما عدتش عارفه حاجه
نجاه تبص لمهره بحزن و تبص فى الارض
نجاه / حقك تقولى اكتر من كدا
مهره / انا ما ليش اى حقوق يا نجاه انا مين عشان اتكلم اصلا
نجاه / احنا مش حابين الوضع ده على فكره دا قدر و اتكتب علينا مش بكيفنا يعني
مهره / فاهمه بس ... هو انا اقدر اعيشه يا نجاه ؟!
نجاه / و هو انتى يعنى عايشه اقل منه كل واحد بيشيل اللى مكتوب له لا أقل و لا ازيد انا بعيش كل ده عشان دول اهلى و انتى بنفسك قولتى انى قويه كدا عشان دول اهلى لو ما كانوش اهلى كان زمانى ايه دلوقت
مهره / معاكى حق
نجاه / و يونس ده مش وحش زى ما احلام قالتلك انتى بنفسك شوفتيه
مهره / ما شوفتش حاجه بس اللى هى قالته
نجاه / هى ما قالتش حاجه الراجل ده اه عمل حاجات وحشه اوى زمان بس دلوقت تاب و اسلم و بقي واحد تانى هى بتتكلم عن جوزيف انما ده يونس عارفه ان مش سهل تسامح و لا تنسي بس ... احنا مش جلادين و لا ... مهره احنا بشر و بنغلط و الراجل ده مش وحش انا متاكده
مهره/ ازاى اتاكدتى
نجاه / قلبي بيقولى ... بشوفه بيحاول بيبذل مجهود و بيعرض نفسه للخطر ... بشوفها فى عنيه... بيبان حاجه لكن من جواه حاجه تانيه
مهره / و انتى بتشوفى اللى جواه ازاى
نجاه/ بحسه
مهره / ما يمكن ده اللى جواكى انتى ما يمكن ده اللى نفسك فيه انه يكون كويس فبتبرريله تصرفاته و تديله اعزار و كدا يمكن انتى مش شيفاه هو شايفه نفسك
نجاه تبص لمهره و ما تعرفش ترد
.........................
فى المستشفي عند صابر
عبد الله واقف بيتكلم مع دكتور و جابر واقف قدام العنايه
عبد الله / تمام يا دكتور شكرا
عبد الله يروح لجابر
جابر / شكل الاخبار حلوه طمنى
عبد الله / الحمد لله حالته مستقره بس برده مش هيقدر يسافر دلوقت
جابر / و لا حتى فى طياره خاصه ؟!! المكان هنا مش امان ليه خالص و الناس بدات تاخد بالها و مدير المستشفى مش هيقدر يسكتهم اكتر من كدا
عبد الله / قال ممكن بس الافضل نستني شويه تحت الملاحظه ... بس هو انت ضامن الطريق اوى بعد اللى حصل امبارح ؟!!
جابر / معاك حق بس .. طب انا هعمل كام تليفون كدا الاول و بعدين نشوف ..  حضرتك هتخليك جنبه صح ؟!
عبد الله / ما تقلقش
عبد الله يدخل العنايه و يروح يقعد جنب صابر مفتح عنيه بضعف
عبد الله / حمد الله على السلامه عامل ايه؟!
صابر يرد بعنيه عبد الله يقعد جنبه
عبد الله / كانوا يومين صعبيين اوى الحمد لله انها جت على قد كدا ... شد حيلك عشان نروح ... جابر عاوز ياخدك بطياره خاصه تكمل علاجك عند همام فى اسكندريه و ترجع البلد على رجلك ايه رايك تكمل العلاج فى البلد و لا فى اسكندريه
صابر يشد الأوكسجين و يتكلم بالعافيه
صابر / فايز ؟!!!
عبد الله / زى الفل و بدر و أمه كمان بخير ... الست ام عبد الهادى هى اللى ... على الورق ماتت طبيعي ... بس احنا عارفين انهم خلصوا منها
صابر / ام محمود
عبد الله / كويسه ما فيهاش خربوش هنا و معاها جوزها و ابنها
صابر / نسمه
عبد الله / قولتلك كويسه يا صابر
صابر مش قادر يتكلم يمسك ايد عبد الله يقوم يقف
عبد الله / انت بتحاول تقول حاجه ؟
صابر يهز راسه
عبد الله / طب اهدى ... هى كويسه ما تقلقش
صابر / محمود .. خطر
عبد الله / محمود !! ... تمام اهدى انا هتصرف
..................
فى الكافتيريا
منصور / و ايه اللى سكتك
نسمه / ابنى معاهم عاوزنى اتكلم ازاى
منصور/ تمام اهدى
نسمه / انا من يوم ما عبده مات و انا فى جحيم بين ابويا و حماتى و الحاجه الوحيده اللى متفقين عليها انى ما اكونش لصابر من ناحيه محمود و من التانيه فيراس ... كلو عشان الارض
منصور / بس ... محمود جاى
نسمه تبص تشوفه داخل عليهم
محمود / السلام عليكم ... جيتي امتى ؟!
نسمه ما تردش و تبص لمنصور
منصور / جبتها عشان تقرر هتعمل ايه فى حماتها و كمان تستلم ابنها
محمود / ما احنا موجودين يا باشمهندس و بعدين ما تاخذنيش يعني انت مش ابن عمها و لا اخوها عشان تسافر معاك ... و لا ايه يا بنت الأصول... و بعدين مش اولى برده لما توصلي تسالى عننا و تيجي تطمني
نسمه / دا انت بجح اوى
محمود / نسمه
منصور / محمود  ... كلمنى انا ... انا اللى جبتها و اه ..  نسمه حكت لينا كل حاجه و لما ربنا يعدى اللى احنا فيه ده على خير و نرجع البلد هنقعد و نتكلم فيه
محمود / و يا ترى ايه بقي كل حاجه اللى ست الكل حكتها من باب اخد فكره يعني
منصور / هتعرف باذن الله لما تقعد مكان ابن عمك الله يرحمه على جهاز كشف الكذب
محمود / و مين بقي ان شاء الله اللى هيقعدنى ؟!! انت ؟!!
منصور / هفا اوى مش كدا ؟!!
محمود / استغفر الله ما اتعودتش اغلط فى حد ... صحيح لما عرفت انك هنا اتصلت بابوكى اطمنه عليكي و زمانه جاى
منصور / وفرت علينا المكالمه.. تشكر
محمود / ما فرقش معاكى ... مش خايفه يجي يشوفك قاعده كدا مع راجل غريب حتى
نسمه تبص له
نسمه / انت مش بلغته انى هنا ؟! الباقي بقي ما لكش فيه
محمود / مؤقتا... لحد ما قضيه الوصايه تخلص ... عن اذنكوا
محمود يمشي و نسمه يبان عليها التوتر و تبص لمنصور
نسمه / شوفت بجاحته؟!!
منصور / شوفت الأسوء منها ما تقلقيش خلى المحكمه تحكم و ورينا هينفذ ازاى ؟!
نسمه / يعني ايه ؟!
منصور/ يعني ما تشغليش بالك عيالك هيفضلوا فى حضنك مهما كان التمن
نسمه تهز راسها و تبص حواليها
......................
فى سرايا الزنايته
عويس بيزعق قصاد عباده و الرجاله كلها قايمه على بعض
عويس / قولت لى بنتى امانه عندك و انا استامنتك عليها تقوم مسفرها من غير اذنى
عباده / بنتك سافرت لابنها
عويس / ابنها اه !!! و انا مصدقك
امين / يمين بالله ان ما عدلت لسانك
عويس / دى بنتى شرفى عاوزيني اتكلم ازاى عاوزينى اسكت و انتوا بتكسرونى و تكسروا عيني قصادها و قصاد اهل البلد
عباده / و انت حد داس لك على طرف
عويس / لا دوس عليا بجرار احسن يمكن تحس
مختار ياخد عويس من رقبته تحت باطه و يسحبه على المضيفه و يزقه و يقفل الباب
عويس / انت اتجننت انت فاكرنى هسكت على كدا
مختار / يمين بالله لو حسك على لدفنك مطرحك و اللى يحصل يحصل و لو مش مصدقنى جرب
عويس يبلع ريقه
مختار / الفيلم اللى انت عامله ده مش وقته انا جايب جاز و ما نمتش من ساعه ما ام محمود و ام عبد الهادى خطفوا حفيدك
عويس / صابر اللى ...
مختار يطلع المسدس و يشد الاجزاء
عويس / خلاص خلاص سكت سكت
مختار/ انت جيت زمان و قولت غيتونى صابر رامى بلاه على بنتى و جبنا بنتك و سالناها و اللى قالت عليه حكمنا بيه و مش بس كدا ... اجبرنا الشهود اللى جابهم صابر مننا ... و لما قالوا ان بنتك بتكدب خلينا عيالنا تكدب عشان بنتك ما تطلعش كدابه جينا على صابر عشان بنتك ما بتكدبش ... يعني اى كان اللى بنتك هتقوله هنقول امين و نصدقها زى ما عملنا زمان وصلت الرساله و لا لا
عويس / بنتى مش قد عيله الجزار بطولها
مختار / احنا قدهم ما تقلقش
عويس/ انتوا و لا صابر القط
مختار / بنتك مش صغيره و تقدر تختار و زى ما قولت قبل كدا ... اللى بنتك هتقول عليه كلنا ... كلنا بلا استثناء هنقول امين
عويس / حتى لو انا قولت لا
مختار / يبقي ما تقولش لا و تحرج نفسك
عويس / دا فى شرع مين ده
مختار / فى شرع ربنا يا عويس فى شرع ربنا و لا كان ربنا قالك اخطبها و هى فى عدتها لواحد من غير رضاها و اجبرها تتجوزه و عاوزنا نقف جنبك عليها كمان
عويس / لا تقفوا جنبى و لا عاوز منكوا حاجه اخرجوا من حياتنا انا ابوها انا
مختار / اللى عندى قولته و اللى عندك اعمله ... انت عارف طريق بنتك روح لها بس يمين بالله ان حاولت تجبرها على حاجه ...اى حاجه لتشوف منى وش ما يخطرش فى اسوء كوابيسك
عويس يبص لمختار و يطلع بره يمشي يركب عربيه و يمشي و هو بيبص على عباده و الرجاله مختار يطلع من المضيفه
مختار/ انا طالع انام لو ايه بالذى حصل ما حدش يصحيني
امين / تمام يا خالى ... هو ماله فيه ايه ؟!!
عباده / كلنا مرهقين يا امين... كلنا طالع عينا ... هستاذن انا كمان افرد ضهرى شويه
عباده يسيب امين مع الناس و يمشي
راجل ١ / بص يا سي امين انا هقول كلمه لوجه الله و ما ليش من وراها مصلحه
امين / قول يا حج
راجل ١ / عويس معاه حق فى عصبيته انا عارف ان الكبير ليه احترامه برده بس الكبير ما ينفعش يحكم على راجل فى اهل بيته و لا ايه و بعدين ام بدر لما كان جوزها عايش و اتخانق معاه الراجل اتجنبه و ما حاولش يخرب على بنته انما البت دلوقت من غير راجل و صغيره و مطمع و اديك شايف من ساعه ما الراجل مات و هى بتخرج من نقره تقع فى ضحضيره
امين / يعني يرضيك نشوف حاجه تغضب ربنا و نسكت يا حج
راجل ١ / حاش لله مين يقدر يقول كدا بس
امين / ام بدر يا حج بتقول انهم عاوزين يجوزوها غصب لابن عمها فيراس ... هى العده خلصت عشان يتكلموا فى حاجه زى دى يا سيد الناس... البت جت طالبه الحمايه ... هى ام بدر الكمل اللى بيتحلف باخلاقها هتعمل كدا الا لو كان فعلا الموضوع كبير ... طب ايه رايك بقي ان خالى شد قبل كدا مع الحج عويس بسبب الموضوع ده و الست ام محمود مسكت فيهم فى بيتها عشان مش صابرين على جته عبد الهادى تبرد و بيدوروا لام بدر على عريس يرضي مين الكلام ده يا حج
الرجاله تبص لبعض
امين / احنا عمرنا ما قفلنا بابنا فى وش حد فيكوا خصوصا لو حرمه  ... لو حرمه جت و قالت انا محتاجه حمايه حتى لو من مين باللذى هنقف فى ضهرها و لو الكلام ده بقي جديد عليكوا قولوا لنا
راجل ٢ / عداك العيب يا سي امين بس الراجل بيتكلم من خوفه على بنته و اديك شايف الدنيا بقت عامله ازاى
امين / و احنا يعنى مش خايفين عليها و هى نفسها مش خايفه على روحها و عيالها و بعدين معلش يعني الكل بيجي لنا بعد المصيبه ما تقع الا ما حد جه غيرها قبل المصيبه يعني لا و الادعى كمان الكل جاى يمنعنا ندخل عاوزينا نشوف الحرام بعنينا و نسكت مش كدا
راجل ٣ / ما حدش قال كدا يا سي امين
امين / ام بدر ليها بيتها و بيت عيالها تقعد فيه و ليها أرضها و ارض عيالها تراعيهم بنفسها او توكل اللى يراعيهم ليها بكيفها و اللى عاجبه عاجبه و اللى مش عاجبه هو حر و اللى هى هتحتاجه احنا هنتكفل بيه و اللى هيدخل احنا اللى هنقف له و زى ما وقفنا مع كل راجل فيكوا فى يوم هنقف معاها و دا آخر كلام عندنا و فضوها السيره دى الناس كلها تعبانه انتوا جايبين الطاقه دى منين دا الراجل نفسه مشي
الرجاله تبص لبعض
راجل ١ / معاك حق يا سي امين ... نستأذن احنا ... يلا يا رجاله نسيبهم يرتاحوا
الرجاله تبص لبعض و يمشوا
امين / اقفل البوابه دى يا ابنى
امين يدخل السرايا يقابل نجاه
نجاه / انت تقريبا طردتهم
امين/ انتى مش لسه خارجه من المستشفي باين واقفه هنا ليه ما ترتاحى
نجاه / ما جاليش نوم هطلع اقف فى الجنينه شويه
امين / حاولى تانى ... خدى دوش مايه دافيه و اتكفلتى فى الغطا هتنامى ما تطلعيش الجنينه النهرده
نجاه / ايه الكلام ده يا عم امين
امين / نجاه ... ابوس رجلك عاوزين نريح و ننام كفايا مصايب لحد كدا فى يوم واحد اطلعى ارتاحى
نجاه / هى بقت كدا !!! ماشي ... هخليها عليا المرادى
امين / اكون شاكر جدا افضالك
مغاورى يطلع من المكتب بيتسند على عكاز و خديجه بتساعده امين يجرى يساعده مكانها
امين / على فين كدا
خديجه / هيريح شويه فى الاوضه اللى جوه ... لحد ما يقعدوا تانى و يشوفوا هيحصل ايه
مغاورى / انتى بتعملى ايه عندك
نجاه / ما بعملش طالعه اوضتى اهو
خديجه / ربنا يهديها
مغاورى / خليكي جنبها ... جوزك متاكد انه هيحاول يكلمها
امين / ما تقلقش يا مغاورى نجاه عارفه حدودها كويس
مغاورى / انا و الله ما فاهم ايه اللى حصل لكل ده بس الواحد لازم يقلق
امين / خير بإذن الله خير
..............
فى سرايا الجوارحه
سماح / يعني ايه نام هناك يعني ايه ما لوش بيت ما لوش اهل
شاهين / و الله دى حاجه تكلميه فيها انما انا بقول حاضر و تمام يابا و بس هستاذنك اطلع ارتاح شويه
سماح / اكلت و لا اجيب لك
شاهين / شبعان تسلمى
شاهين يطلع فوق ماجده تدخل
ماجده / فى ايه يا سماح بتزعقى ليه كدا
سماح / هو ايه اللى بيجرا فى الدنيا الراجل لما يتصاب فى رجله يروح يريح فى حضن اخته و لا فى بيته فى حضن مراته مش فاهمه انا
ماجده / مين اللى انصاب فى رجله ... مغاورى !!!
سماح / نط من الطياره الهليكوبتر بتاعته وقع على رجله
ماجده / فى حاجه يا سماح ... مغاورى ما يباتش بره فرشته الا اذا كانت حاجه كبيره
سماح / ما قولتش حاجه انا !! لا و سبع البرومبه ابنى جاى ينام و سايب ابوه فى الظروف دى عادى ما انا مخلفه سوسن
ماجده / طب اهدى بس انا هكلم خديجه افهم منها اللى حصل
سماح / و هى هتقولك ايه ... كلمى ابنك هو اللى عنده الفوله
ماجده / و دول كمان ما حدش منهم روح ... هكلم وفاء اهدى
ماجده تطلع الموبايل و تتصل و سماح بتابعها و هى بتكتك على الارض برجلها من العصبيه
.......................
على سطح فيلا الزنايته
مهره تدخل و هى زهقانه ما تاخدش بالها ان عمران قاعد على السور و لابس حامل ذراع الناحيه التانيه سرحان مهره تروح تقف تبص على الجنينه تليفون عمران يرن مهره تتخض عمران ياخد باله منها ينزل من على السور
مهره / انت هنا من امتى ؟ ما شوفتكش و انا داخله
عمران يكنسل
عمران / حصل خير ... خدى راحتك انا كدا كدا نازل
عمران يجي يعديها
مهره / انت كويس ؟
عمران / الحمد لله ..  عن اذنك
عمران يعدى مهره و ينزل ثانيه و تنزل وراه
مهره/ عمران عمران
عمران يبص لها مهره ما تعرفش تتكلم
مهره / ما فيش انا اسفه خلاص مفيش حاجه
عمران/ خير بجد ؟! كان فى ايه ؟!
مهره / مفيش و الله كنت بس عاوزه اطمن عليك ... نجاه قالتلى انك اخدت طلقه فى كتفك
عمران يبص على دراعه
عمران / بسيطه الحمد لله خرجوها و بغير على الجرح و باخد مسكن فتمام عادى
مهره / هو انت ليه محسسنى ان رجلك اتجزعت مثلا دى طلقه دة بتموت على فكره
عمران يبتسم
عمران / و فى ناس بتموت من السكينه و فى ناس بتقع من على الحصان تتقطم رقبتها او تتشل او على اقل تقدير تتكسر عادى كلو نصيب يعني
مهره / هو انت زعلان منى فى حاجه ؟!
عمران / ابدا ليه بتقولى كدا ؟
مهره / ما اعرفش طريقتك مختلفه... شوفتنى اتفزعت كدا و سبت المكان و جريت و مش عاوز تتكلم معايا
عمران / على فكره انتى اللى اتخضيتى و انا كل اللى عملته انى سبتك على راحتك اللى بيطلع السطح بيطلع عشان يبقي لوحده فسبتك
مهره / اه بيبقي عاوز يبقي لوحده فانا جيت رخمت عليك صح ؟!
عمران يبتسم
مهره/ ايه ؟!!
عمران / و لا حاجه ... طمنيني انتى عليكي انتى عامله ايه ؟
مهره/ مش عارفه ... نجاه حكت لى كل حاجه على فكره
عمران/ كل حاجه ايه ؟
مهره / من اول البى كاى لجوزيف ليونس لرشيد كلو نجاه قالتلى الحقيقه كامله
عمران يبص الناحيه التانيه و يهز راسه
مهره / هو انتوا كنتوا فاكرين انكوا هتخبوا عليا حاجه زى دى لحد امتى
عمران / حاجه ايه ؟!
مهره / دى ... حياتكوا ... كل حاجه
عمران / احنا ما اخترناش الحاجات دى و اكيد مش هنمشي بيافطه على دماغنا مكتوب عليها ظروفنا يعني اللى بيعيش وسطينا بيعرف انما لو حد على الطاير يومين و يروح لحاله يعرف ليه
مهره / بجد !! يعني انا كنت على الطاير ؟!!
عمران/ ما انتى عرفتى اهو يا بنتى
مهره / امتى و ازاى  بالصدفه لما احلام وقعت فى الكلام قدامى غير كدا ما كنتش هعرف حاجه
عمران / لانك لحد دلوقت بتقولى انك هتمشي
مهره/ ما انا همشي فعلا انت فاكر ايه
عمران / تمام اعملى اللى يريحك
مهره / ما انا اكيد هعمل اللى يريحني و عشان كدا همشي
عمران / تمام
مهره / تمام ... وسع
مهره تعدى عمران و تنزل
عمران / دى مين دى ... يا حول الله يا رب مش ممكن
.........................
فى اوضه مختار
مختار ممدد و باصص للسقف و هند فى حضنه
هند / واحد غيرك كان زمانه بيشخر من التعب
مختار/ واحد غيرى بقي
هند/ و هتفضل كدا لامتى؟!! لما تقع مننا يعني
مختار / لا ما تقلقيش لسه شويه
هند / هتقع يعني ؟!! الفكره فى التوقيت صح ؟!!
مختار يبتسم هند تقوم تقعد
هند /انت عارف انت لو صريح معايا و الله أدلك و اريحك انما ابدا تموت فى الف و الدوران
مختار يقعد
مختار / دا انا ؟!!
هند/ ايوه ... بس اقولك حاجه انا مش عاوزه اعرف مش انت بخير و عيالى بخير خلاص مش فارقه هوجع قلبي ليه
مختار / دا قرار منطقى جدا
هند / عيالى فين يا مختار ؟
مختار / شاكر مع صابر و جابر و عمران و ناصر هنا فى السرايا فى مكان ما يمكن نايمين و لا حاجه و محمد فى شغله او يمكن يكون هنا برده
هند / يمكن ... ماشي
مختار/ المهم ان كلهم بخير ... هم مش صغيرين عشان اجرى وراهم فى كل حته ... و لا انا كمان صغير
هند / صح مش صغير انك تجرى ورا عيالك تلمهم و تحاجى عليهم لكن صغير لابن رشيد
مختار يتعدل فى قعدته
مختار / اولا انا عمرى ما قصرت مع عيالى ثانيا انا قاعد جنبك مش جنب ابن رشيد ثالثا
هند / انت فاهم قصدى قاعد جنبى بس قلبك و عقلك معاه
مختار يضرب كف على كف و هو بيضحك
مختار / يا وليه اللى يسمعك يفهمني غلط ما تعقلى الكلام ايه بخونك مع راجل يعني ... و الله دا اللى ناقص
هند / انا ما بهزرش
مختار/ يا ستى و لا تهزرى هو احنا لو ضحكنا هيقولوا اللى ضحكوا اهم مش احسن ما نعيط
هند / صحيح و انا هقدر عليك ... انا هقوم اشوف الدنيا فى السرايا
هند تيجي تقوم مختار يشدها جنبه و يحضنها
مختار / يا وليه انا سايب البلد باللى فيها و جاى جنبك خلى عندك دم
هند / ما انا مرزوعه جنبك بقالى ساعه و اكتر و انت مبحلق فى السقف كنت كلمتك
مختار/ انا قايم
مختار يقوم ياخد غيار
هند / و ربنا ان ما رجعت جنبى ما انا قعدالك فيها
مختار يبص لها قامت وقفت و حطت ايدها فى وسطها
هند / هو فى ايه مالك
مختار / مش عارف انام و لا عارف ابطل تفكير و لا عارف ارتاح و لا عارف اهدى و الدنيا كلها فوق دماغى و عباده اتعصب بدون سبب و ضيع الورقه الوحيده اللى كانت فى ايدينا
هند/ يونس برده !!!
مختار / سيبك من اننا محتاجينه هو محتاج لينا هو محتاج لى
هند تضحك باستهزاء و تضرب كف على كف
مختار / انا حاسس بيه
هند/ انت حاسس بالدنيا كلها الا انا يا مختار
مختار/ دا انا ؟!! ليه قصرت معاكى فى ايه ؟!!
هند / و لا حاجه روح له
....................