الكبيره ٢ بقلم / لولو_محمد

الحلقة ١٠٠

((((((( الكبيره ٢ )))))))
#لولو_محمد
الحلقه ١٠٠
عباده / توكل على الله و نفذ و بلغنى باى حاجه توصل لها اول بأول
دياب يهز راسه موافق
مختار / انت هتبدا الموضوع ده امتى
دياب / دلوقت لو تحبوا هطلع على الشركه اجهز كل حاجه و اتوكل على الله
مختار / انا هاجى معاك مش هستحمل استنى الخلاصه هتابع معاك لايف
دياب / تمام يا عمى على راسي تنور
عباده / لا للاسف انا لازم امشي لانى مرتبط بوعد مع نجاه
جابر / خير يا عمى فى حاجه و لا ايه؟ 
عباده/ هوديها الملعب و استناها تخلص اروحها
جابر يهز راسه موافق الكل يستغرب و يبصوا لبعض
منصور / هو انت مش هتعرض توصلها انت و لا ايه
جابر / لو كانت عوزانى اوديها كانت قالت لى عادى يعني
عباده / لا انا اللى عاوز اوديها بنفسي دا قرارى انا
منصور / يعني انتوا مش قافشين و لا حاجه
جابر / مش على قد علمى ... هو انت حد قايل لك حاجه
........................
شاهين / ايه يا جابر انت ناسي انت بتكلم مين و لا ايه دا اقوى جهاز مخابرات فى البلد ده
منصور / و الله و لا حد قالى و لا انا عارف حاجه اصلا انا بس عارف جابر و مستغرب يعني مش رد فعله اللى متعودين عليه
جابر / عادى على فكره ما تكبرش الموضوع
مختار / طب بما اننا ما عدناش بنتكلم فى حاجه مهمه يلا يا دياب
دياب / تمام يا عمى يلا
منصور يقوم معاهم
عباده / ابقي تابعنى
مختار يهز راسه و يمشي و معاه دياب و منصور
دياب / على فكره معاك حق واضح ان فى حاجه
مختار / نركز فى اللى يخصنا لو سمحتوا
دياب و منصور يبصوا لبعض
دياب/ تمام يا عمى حاضر
........................
فى الجيم
نجاه بتلعب مع البنات و مفيش اى مقارنه بينهم تروح تقعد تشرب مايه بنت تروح لها
البنت / بس ايه رايك فرقنا كتير اوى صح
نجاه / طبعا ما حدش يقدر ينكر و اللهم بارك المستوى اختلف بسرعه رهيبه
البنت / بس مش باين على وشك على فكره
نجاه / لا و الله خالص انا اللى مش فى المود عموما
البنت / خير لو مش هبقي بتطفل عليكي يعني
نجاه / لا ابدا هبه هرمونات كدا
البنت تضحك
البنت / عرفاها و حفظاها صم
نجاه تضحك و تقوم تلم حاجتها
نجاه / نتقابل المره الجايه بإذن الله على معادنا
البنات يشاوروا لها نجاه تطلع تركب عربيه عباده قاعد مستنيها
نجاه / هو حضرتك قاعد هنا من ساعتها
عباده / كان ورايا كام مكالمه تليفون خلصتهم ... ما طولتوش اصلا
نجاه / دا آخرهم ... اقول لحضرتك حاجه ؟
عباده / ما انبسطتيش
نجاه / لا خالص انبسطت جدا و بعدين اللهم بارك مستواهم اتحسن الله اعلم كنت هقدر انجزهم للمستوى ده و لا نصيبهم خير ان مش انا اللى دربتهم
عباده/ معاكى اى حاجه كانت اكيد هتبقي احسن
نجاه / بس انا يابا حتى لو بمرن اللى تحت منى اكيد فى ليفل اعلى لتدريبي ... انا هفيدهم يمكن لكن مفيش حاجه بستفيدها انا
عباده / و انتى بتستفيدي ايه من اللعب مع الرجاله ... ما احنا مش هنفضل نضحك على نفسنا كتير يا نجاه ... هم كانوا بيسيبولك برده
نجاه ملامحها تقلب جد
عباده/ انتى اتفرضتى عليهم و كنتى كرباجى اللى بأدب بيه النايم بس الصاحى منهم مهما اتمرنتى و مهما قويتي عمرك ما هتقدرى عليه
نجاه / لو عندى تكنيك أعلى هقدر
عباده / فى حاجه اسمها تستوستيرون تسمعى عنها
نجاه / اسمع بس فى حاجه اسمها تدريب و اصرار و تنكيك و كيد نسا
عباده يضحك
نجاه / ايه !!
عباده/ مفيش
نجاه / انا عندى اكتر على فكره انا عارفه قدراتى كويس
عباده / طب اقدر اعمل ايه
نجاه / محتاجه مدرب جديد دماغ جديده او لعبه جديده خالص بتكنيك أعلى
عباده / هشوف لك حد حاضر
نجاه/ بتسكتنى صح
عباده/ و انا هعمل كدا ليه و لا من امتى بعمل كدا اصلا ... يا نجاه انا مفيش حاجه واجعه قلبي قد انى مطاوعك فى كل حاجه
نجاه / لا حول و لا قوه الا بالله انا واجعه قلبك
عباده / سبب راحتى و تعبى و سعادتى و قلقى فى نفس ذات ام اللحظه ازاى ما اعرفش... صحيح ان كيدهن عظيم
نجاه / و ربنا حضرتك ظالمني
عباده / ما جوعتيش ... انا جعان خلينا نروح ناكل لقمه و نشوف هنعمل ايه بعد كدا
نجاه / هنعمل ايه ؟
عباده / ما مدرسه مهره دى ما انفتحتش يوم و هتنقفل لازم حد يدورها
نجاه تبتسم و تهز راسها عباده يسوق و هو مبسوط
........................
فى مكتب محامى
ابو محمود / ازاى الكلام ده
المحامى / حضرتك الورق قدامك محمود بايع كل حاجه بعقود مسجله للشركه الامريكيه دا غير ان ما فيش جنيه واحد فى حسابه فى البنك زى ما قولت لحضرتك و بالمناسبه انا سالت فى كل البنوك على أمل انه يكون حول فلوسه لاى بنك تانى لاى سبب محمود اتوفى و هو لا يملك جنيه واحد سواء الجنيه ده بقي فلوس أو أصول
ابو محمود / و الورق اللى اديتهولك و الفلوس اللى كسبها و البيوت اللى اشتراها
المحامى / باعها كلها قبل ما يموت بيوم واحد
ابو محمود / قصدك قبل ما يتقتل يا متر
المحامى / الموضوع ده لسه فى كلام و انا كدا كدا شغال على
ابو محمود / كتر خيرك يا استاذ ما تشتغلش اكتر من كدا انا كدا كدا هشوف محامى غيرك انت شكلك على الله
المحامى / انا ما قصرتش يا حج بس لو حضرتك عاوز تتأكد من كلامى تقدر تروح تسأل بنفسك
ابو محمود يشد الورق و يمشي
المحامى/ دا انتوا عيله غجر
.............................
فى مضيفه الزنايته
عباده / ازاى الكلام ده
امين / زغللوا عينه بالفلوس و رموله الطعم و اول ما دوره خلص نفضوه و خلصوا منه
عباده / الحوار ده مش هيروح بعيد عن قسيمه عمران و مهره
امين / مزور يعنى
عباده / مزور ايه ... لا دا سليم السليم ... بس على الورق قدام الحكومه انما الحقيقه ... لا محمود باع و لا كان عنده فكره عن اى حاجه خالص
امين / بس نفسهم قصير اوى على فكره ... كان ممكن يستفيدوا منه اكتر بس هم اللى ما عندهمش صبر
عباده / ما عندهمش مخك
امين يضحك
عباده / بس على العموم انا مبسوط من الموضوع ده ... الشهاده لله ارتحت اصل المال الحرام ما يدومش و انا كنت عارف من الاول ان الشجره ما بتطرحش فلوس فأكيد فى حاجه غلط فى الهبل ده كله ... اياكش بس خالك يصدق احساسي
امين / مش فاهم ايه علاقه اى حاجه باى حاجه من الكلام ده
عباده / بكره تفهم
امين / و بكره مش بعيد
نجاه تدخل
نجاه / السلام عليكم انا جاهزه
عباده / و انا جاهز ... عن اذنك يا امين
امين/ ما لو فى اى مشوار يعني انا اقدر اقوم بيه و حضرتك ترتاح يعني
عباده / ارتاح من ايه هو انى اقضي الوقت مع بنتى تعب برده ... يلا عن اذنك
امين يبتسم عباده ياخد نجاه تحت باطه و يروح ناحيه العربيه
نجاه / لو حضرتك تعبان انا ممكن
عباده / انا بنسي اى تعب لما بشوف ضحكتك الحلوه يلا اركبى
عباده يفتح لها الباب و يلف عشان يركب يشوف جابر واقف على باب بيته بيتابع عباده يشاور له جابر يشاور له و نجاه متابعه فى المرايه عباده يركب
نجاه / هو ماله جابر
عباده / ماله ؟
نجاه / ما اعرفش غريب اوى الفتره دى
عباده / حاسه طبيعي جدا
نجاه / حضرتك شايف كدا ؟
عباده / لو انتى شايفه حاجه انا مش شايفها هبقي سعيد اوى لو لفتى نظرى ليها
نجاه/ لا مش حاطه ايدي على حاجه بس قلقانه مش اكتر
عباده / جابر الزيني ما يتقلقش عليه
نجاه / يتقلق عادى يعني ما يتقلقش ليه يعني
عباده / بتقلقى عليه يعني
نجاه تبص لعباده و ترفع حاجبها
نجاه/ ساعات بحس ان حضرتك اللى بتشجعه على الهبل اللى فى دماغه ده
عباده / انا لا بشجعه و لا بمنعه و بعدين ما اشجعوش ليه هو فى احسن من جابر ... اقولك هاتيلى الأحسن من جابر و انا لجوزك ليه وقتى
نجاه / مفيش احسن من جابر
عباده يبص لها و يرفع حاجبه
نجاه/ مش لازم يكون نصيبي مع واحد احسن من جابر ما يمكن واحد زيه
عباده / ما لوش زي و انا مش هقبل بواحد اقل منه
نجاه / التقيمات دى وجهات نظر و بيتهيألي ان كفه قلبي هى اللى هتكسب و لا ايه ؟
عباده / مش شرط
نجاه / يعني ايه ؟
عباده / مش هتفهمى الا لما قلبك يدق لحد بعينه ... الا اذا كان دق بقي و انا مش عارف ساعتها هيبقي فيها كلام تانى
نجاه / مش هيدق لحد بغير علمك و رضاك ما تقلقش
عباده / اوعديني
نجاه/ الحاجات دى مش محتاجه وعود على فكره حضرتك عارف انت مربيني على ايه بس على العموم اوعدك
عباده يهز راسه و يكمل سواقه و هو مبتسم و نجاه عينها عليه
............................
تحت الجبل 
رجاله عاملين دايره و الرجاله بتتمرن مع بعض ماتشات و صابر و شاكر قاعدين بيتابعوا
صابر/ اجهز هتنزل بعدهم
شاكر / ما ليش مزاج
صابر / هو انا بعزمك على عشوه دا تمرين يا اسطى فى ايه مالك
شاكر / يا عم مضايق يا عم
صابر / عشان العشره اللى اتخطفوا ؟!
شاكر / و هو عشره رقم صغير لما يتخطفوا فى يوم واحد ؟ بتفكر ازاى يا صابر
صابر/ طب قوم فش غلك فى حد من الرجاله و طلع الطاقه اللى جواك
شاكر / بلاش احسن بجد
صابر/ براحتك …  اللحق حبيبك جه
شاكر يبص يلاقى جوزيف داخل عليهم
جوزيف / السلام عليكم ... ممكن اقعد معاكوا
صابر / تنور ... يا ريتك كنت بصحتك كنت شاركت
جوزيف / على ما تقوم بالسلامه اكون قمت
صابر / لا ما تقلقش عليا انا تمام
جوزيف / دا شئ يسعدني
صابر / انت تعرف حاجه عن العشره اللى اتخطفوا
جوزيف / لا
صابر / امال مين اللى يعرف
جوزيف يتنهد
صابر/ بما انك داخل الاسلام جديد فخلينى اديك نصيحه لوجه الله لتكون مش واخد بالك يعني
جوزيف / يا ريت اتفضل
صابر يعد على صوابعه
صابر / و من احياها فكأنما أحيا الناس جميعا ... من قتل نفسا بغير نفس او فساد فى الارض فكأنما قتل الناس جميعا ... و أقيموا الصلاة و أتوا الزكاة و ما تقدموا لانفسكم من خير تجدوه عند الله إن الله بما تعملون بصير ... كان الله فى عون العبد
جوزيف / و لا تلقوا بأيديهم الى التهلكة ... انا او انتوا او اى حد هيحاول ينقذهم دا لو كانوا لسه عايشين اصلا هيموت على الاقل
شاكر / على الاقل !! هو فى اكتر من الموت
جوزيف / اه فى كتير ...ربنا ما يكتب عليك تشوف حاجه منهم
صابر / طب تمام ... خليك انت براها و احنا هنحاول برده
جوزيف / براحتكوا بس انا حذرتكوا ... انتوا عارفين انى قولتلهم يقفلوا الإنفاق دى من ساعه ما اكتشفوها و ماطلوا عشان ينزلوا برده ... و لسه بقول لهم اقفلوها و لسه برده بيماطلوا... لا و النكته ان انا الشرير فى الاخر
شاكر / ما حدش قال انك شرير يا يونس
جوزيف / انت طيب اوى يا شاكر ... الجو عندكوا جميل بس بدا يسقع... هاجى مره تانيه و بالمره اكون احسن اللعب معاكوا
صابر / خد عبايتي تقيله و هتدفيك
جوزيف / سلام يا شباب
جوزيف يمشي
شاكر / مش لاقى نفسه
صابر / و ما اعتقدش هيلاقيها هنا
شاكر / ما لوش مكان تانى يا صابر
صابر / و لا احنا لينا و ما اعتقدش ان البلد دى هتستحملنا احنا الاتنين
شاكر / انت كارهه كدا ليه
صابر / مش كارهه ... بس مش بحبه
شاكر / ربنا يهدينا جميعا
صابر / امين ... قوم اللعب وريني نفسك
شاكر / و ماله
شاكر يقوم و ينزل و ينزل قدامه واحد
....................
فى عياده تعديل سلوك
قاسم بيتكلم مع دكتور
الدكتور / انا مش قادر اوصف لك انه حرفيا ما اتكلمش عن حد تانى غيرها
قاسم / ما هو ده اللى قاهرنى احنا قايدين له صوابعنا العشره شمع و مسح لنا كل ده باستيكه عشان واحدتين قطايف
الدكتور / لا لا الموضوع مش قطايف خالص الموضوع زى ما كلمتك اكتر من مره هو الاهتمام مازن مفتقد الاهتمام مفتقد انه يكون اولويه اى حد زى اى طفل ما بيكون اولويه امه
قاسم/ بس احنا حرفيا مش مخلينه عاوز حاجه و بعدين هو كدا مدلع بزياده يا دكتور يعني ايه عاوز كل حاجه وقتى و لو طلب او احتاج اى حاجه لازم نرمى اللى فى ايدنا و نجرى نعملهاله و حتى دى بنت عمى عملتها من باب إكرام الضيف مش الطبيعي
الدكتور / اكيد لازم توازن بس برده الطفل بيسجل كل حاجه و خصوصا مازن ذكى جدا يعني اكيد بتقارن بينه و بين باقي ولاد عمامه فى بيت العيله اللى هو عايش فيه و اكيد فاكر والدته الله يرحمها كانت بتعمل ايه او بتتعامل معاه ازاى هو مش بيدور على بديل لوالدته فى المسؤوليات مسح كنس طبخ بقي و كدا لا خالص هو بيدور على حضن و احتواء بيدور على حد يحبه مش يعامله تقضيه واجب حتى لو حلو انا ممكن اعمل لك كبايه شاى ككرم ضيافه و كل حاجه بس ابقي من جوايا بعملها مجبر عشان انت ضيف و لازم اضايفك او انى اعملها لك بحب و الابتسامه على وشي و أرحب بيك بجد يعني تفتكر انهى كبايه شاى هيبقي طعمها احلى ... المشكله يا استاذ قاسم ان حضرتك مستهون بذكاء مازن جدا و بتعامله على انه طفل مش فاهم حاجه
قاسم / بالعكس احنا كلنا بنحاول معاه و بنعمل كل اللى بنقدر عليه و زياده
الدكتور / طب حضرتك حاولت تتكلم معاه فى اللى حصل من ساعه ما رجعتوا
قاسم / هو احنا بنتكلم فى حاجه تانيه يا دكتور من ساعه ما امه اتوفت و انا نابح حسي فى تربيته و هى اللهم بارك قعدت معاه ساعتين زمن فرمطته
الدكتور / و هى دى حاجه تضايقك
قاسم / مش مضايق بس هى ان شافها مره مش هيشوفها التانيه انا محتاج يبقي ليا نفس التاثير على ابنى
الدكتور / طب معلش هو سؤال بره الموضوع شويه ... هو فى عندكوا فى البيت اى حد له التاثير ده على أولاده عموما
قاسم / عادى يعني ... بصراحه ما اعرفش اوى اصل يعنى يا دكتور احنا كرجاله مش قاعدين فى البيت زى ما حضرتك عارف يا دوب بنروح على النوم و خلاص
الدكتور / يعني انت اصلا ما شوفتش خالص بعينك معامله الجماعه لمازن على الطبيعه
قاسم / و لا هو اشتكى من حاجه
الدكتور/ امممم
قاسم/ هو حضرتك عاوز تقول حاجه
الدكتور/ لا انا كنت فاكر ان حضرتك لما أكدت لى انكوا بتعاملوه احسن معامله و كدا دا كان عن يقين مش تخمين منك صدقنى انا مش قصدى حاجه بس ... اعتقد ان النتيجه هتفرق جدا لو كنا عرفنا الموضوع ده من بدرى
قاسم/ موضوع ايه
الدكتور / حضرتك لازم تتابع اللى بيحصل مع مازن فى البيت بنفسك
قاسم / يا دكتور دول اهله و ناسه عماته و خالاته و أولادهم و بناتهم قده و اكبر و أصغر احنا عيله كبيره اوى
الدكتور / و هو وحيد وسطيهم
قاسم / ايه الكلام ده
الدكتور / اصل حوار انه مش عاوز يندمج او مش قادر يندمج ده مش هينفع نحطه فى حسابنا بعد كدا لانه اندمج كويس جدا مع ناس اول مره يشوفهم ... بص انا مش بقول انهم وحشين انا بس بقول انه محتاج اهتمام خاص و اكيد كل واحد وسط مشغولياته الاساسيه ممكن يقصر فى حاجه و مازن احتياجه مش مجرد اكل و شرب و لبس مازن محتاج حضن و احتواء و حنيه حاجات من دى و اكيد حضرتك فاهمني
قاسم يتنهد و يهز راسه
الدكتور / على العموم باذن الله الجلسه الجايه هخصصها للكلام مع مازن فى الموضوع ده و هخليه يتكلم اكتر عن اهله ... هو طبعا مش بيتكلم و بيقول ما ينفعش نطلع اسرار بيتنا بره و انا كنت محترم ده فيه جدا و هو شئ صح بس انا هستاذنك انى هحاول اخرج منه المعلومه بطريقتي
قاسم يهز راسه و هو باصص فى الارض
الدكتور / انا مش عاوز حضرتك تضايق خالص احنا كنا فين ... و باذن الله عن قريب كل المشاكل دى هتختفى و صدقنى مازن مشكلته سببها ذكائه الشديد و دى ميزه فيه مش عيب احنا بس محتاجين نبذل شويه مجهود مش اكتر
قاسم / على خير يا دكتور على خير بإذن الله
......................
فى شقه محمود
ابو محمود قالب الشقه فوقانى تحتانى و عمال يدور يمين و شمال و مش سايب حاجه فى مكانها يسمع صوت باب الشقه يطلع بره و هو ملهوف يلاقى كيرا
ابو محمود / انتى مين يا حرمه
كيرا / حبيبه ابنك يا عمو هو ما حكالكش عنى و لا ايه ؟
ابو محمود / اااااه انتى بقي البت النصابه اللى جت ضحكت عليه بفلوس مضروبه
كيرا / مضروبه ازاى يعني الفلوس كانت تمام و أملاك ابنك تمام هى بس فى الحفظ و الصون و بعدين يا عموا حضرتك سايب دم ابنك من اللى قتلوه و رايح تدور على شويه فكه
كيرا تقرب من ابو محمود يشم ريحتها و يتعدل فى وقفته و يبلع ريقه و يبص فى عنيها
كيرا / انا اقدر اخليك تعيش و تشوف دنيا ما شوفتش و لا هتشوف زيها
ابو محمود / مين اللى قتله
كيرا / عاشق الجبل ... صابر القط
ابو محمود / بس الحكومه
كيرا تحط صابعها على بق ابو محمود يبلع ريقه
كيرا / انا هحرق قلبه زى ما حرق قلبك على ابنك و هخليك تحط ايدك على مخازن الدهب بتاعته
ابو محمود يبص لها
كيرا / و هرجع لك كل فلوس محمود بزياده
ابو محمود / هاه
كيرا/ هى مراتك هترجع امتى من السفر ... ايه هتفضل بطولك كدا كتير ؟!
ابو محمود/ مراتى !!
كيرا / قولت ايه ؟
ابو محمود / فى ايه ؟
كيرا / هو الحمام منين ؟
ابو محمود يشاور لها
كيرا/ بتعرف تعمل شاى
ابو محمود يهز راسه
كيرا / اعمل لينا كبايتين لحد ما اعمل ريفريش و ارجعلك
ابو محمود/ تعملى ايه ؟!
كيرا تضحك بمياصه و تسيبه و تروح الحمام و هو متابعها زى الاهبل
...................
فى سرايا بحرى
همام / بس دا كلام كبير اوى يا قاسم ايه سرايا طويله عريضه فيها حريم بعدد شعر راسي ما فيهمش واحده توحد الله عاملت الواد عدل و كلهم وحشين ... و الله لو حلفت على المايه تجمد ما اصدق
قاسم / قولت كدا برده قال هيتكلم معاه الجلسه الجايه
همام / و الواد ... اتكلمت معاه فى الموضوع ده و لا ايه ؟
قاسم يهز راسه لا
همام / طب ما تكلمه
قاسم / مخنوق ... شويه كدا افك و اكلمه
همام / مخنوق من ايه كفا الله الشر دا انا كنت عاوز اكلمك فى حاجه
قاسم / خير اتكلم
همام / و انت مخنوق ؟
قاسم / انت هتخنقنى ليه يا عم ما تقول مش فايق لك خير
همام/ من آخر مره اتكلمنا و انا حاسس براحه كبيره اوى للموضوع ده و قولت هصلى استخاره و لو فضلت مرتاح هفاتحك فيه
قاسم / موضوع ايه ده
همام / بص انا عارف جابر كويس و اتعاملت مع زنايته الصعيد كتير و شوفت ادب حريمهم و شخصيتهم و الشهاده لله ما فيش عليهم كلمه
قاسم / اللهم بارك ما اقدرش اعلق بربع حرف على كلامك
همام / حلو ... فايه بقي ؟
قاسم / هو ايه اللى فايه بقى مش فاهم
همام / يا عم ما لك ما تركز الواد ابنك و متعلق بيها و هى عاملته احسن من أمه شخصيا و انت اكيد مش هتعيش على زكراها العمر كله فايه بقي
قاسم / قول انك بتهزر
همام / ليه يا عم انت مش شوفتها بعينك ... اللهم بارك جمال و دين و حسب و نسب و مال و كل حاجه
قاسم / هى ما فيش زيها بس مفيش كدا فى الدنيا اروح لواحده اتجوزها عشان عملت لابنى قطايف انت مجنون
همام / قال على راى المثل اللى يناول ابنى تمره نزلت حلاوته فى بقي و بعدين البت عملت كدا لا مستنيه منك حاجه بقي نقول بترسم قدامك و لا غيره دى عملت لله و الواد اتعلق بيها و ماشي على تعليماتها بالحرف
قاسم / انت صليت استخاره على الهبل ده
همام/ و الله الهبل انك تفضل محتاس كدا و الحل فى ايدك
قاسم / انا طالع انام و انت كمان اطلع نام كتر السهر بياثر على المخ
همام / هنام حاضر
قاسم / اه نام ... و ما تفكرش تانى
همام / و ماله  ... حاضر برده
....................
فى مدخل نفق من الإنفاق
شاهين ينزل كلب صغير مربوط على ضهره كاميره و كشاف منور  و اول ما الكلب يلمس الارض يسيب الحبل على الآخر و يحط ايربود فى ودنه
شاهين / تمام نزل و بدا يتحرك و الحبل بيكر فى ايدي اهو قارى ايه عندك ...  تمام معاك اهو ... الحبل بطل يكر ... ما تهزرش ... ما تهزرش انت بتقول ايه
شاهين يشد الحبل بسرعه يلاقى طرفه مقطوع
شاهين / دى احلوت اوى
شاهين يفتح كرتونه فيها درون
شاهين / انا جاهز شغل ... يعني ايه اقفل و اجيلك الشركه ... لا مش هعيد حساباتى انا شغل البتاع ده و نزله ... تمام تمام جايلك
شاهين يقفل مدخل النفق و يقفل الكرتونه و يروح يركب العربيه و هو متعصب
........................
فى الشركه
عباده و مختار و مغاورى قاعدين و قدامهم شاشه بتعرض امايا و هى بتشيل الكلب من على الارض و تلاعبه و تبص للكاميرا و تبتسم و تقص الحبل و تمشي يبصوا لبعض الباب يخبط و جوزيف يدخل
دياب / اتفضل تعال
جوزيف / السلام عليكم ... خير طلبتونى
دياب يرجع الفيديو على لقطه وش امايا جوزيف يبتسم
جوزيف / بتوحشنى جامد البت دى شوف اقسم بالله حتى لو لسه شايفها امبارح هتوحشنى النهرده برده
عباده/ طب ما تخليك جنبها
جوزيف / ما علينا مناديني ليه ؟
عباده/ يا راجل
مختار / امايا تحت فى الإنفاق
جوزيف / جايز
عباده يقف و يزعق
عباده / هو ايه اللى جايز امال مين دى
جوزيف / هو انت ما شوفتش فيديو جامعه مهره و لا ايه ؟ ... مش بتقولوا يخلق من الشبه أربعين... امايا لقيتهم كلهم و الفروقات البسيطه اللى كانت بينهم بشويه تجميل بسيط خلتهم نسخ كربون ما تفرقهمش عن بعض
مغاورى / ايه الكلام ده
مختار / دياب راجع الفيديو و قال حقيقي ظهرت فى اكتر من مكان فى نفس الوقت
جوزيف / اللى اتعرض فى الفيديو ده فخ عارفه انكوا هتنزلوا جرى وراها
عباده / ما دا اللى هنعمله فعلا
جوزيف / براحتك و مش عاوز يكون عندك اى فكر ... هاخد بالى من جماعتك من بعدك
عباده يقوم يهجم عليه و الرجاله كلهم يحوشوا
عباده / دا بعيد عن شنبك ياله انت فاهم و لا لا فاهم و لا لا
جوزيف / انت اللى مصمم تموت
عباده / مش هتشمها يلا مش هتشمها و لا و انا عايش و لا بعد ما اموت فاهم و لا لا
مختار / اطلع بره يا يونس دلوقت اطلع بره
جوزيف / طالع
عباده / سمعت قال ايه سمعت سفالته ... هقتله الواطى ده هقتله
مغاورى / اهدى يا عباده اهدى الأمور ما بتتعالجش كدا
عباده / ما كنتوش حوشتونى يا جدعان كنت خلصت و ارتحت
مختار / انت فاكره ضعيف مش هيعرف يدافع عن نفسه يعني
عباده يبص لمختار بغضب
عباده/ احذرنى يا مختار ...احذرنى
دياب / انا اسف يا كبير بس هو بغض النظر عن اسلوبه اللى مش جديد علينا بس اعتقد اننا كلنا فاهمين قصده
عباده / انت بتقول ايه انت كمان بتقول ايه
مختار / ايه هو انت مش عاوز تسمع لحد غير نفسك
عباده / انا الكبير هنا
مختار / و ماله ... شيلها
مختار يطلع بره يرزع الباب وراه يلاقى جوزيف واقف فى جنب بيبص من شباك يروح يخبط بالراحه على كتفه و يمشي جوزيف يمشي وراه
........................
فى ارض الجزار
ابو محمود واقف مع مهندس زراعي و بيتكلموا عويس يدخل
عويس / انت بتعمل ايه هنا يا راجل انت
ابو محمود / و انت مال ابوك دا ايه تلاقيح الجتت دى بقولك ايه على الصبح انا مش فايق لك
عويس / عنك ما فوقت و لا وعيت تفوق اسمع الكلمتين دول كويس الارض دى لا تخطيها و لا ليك دخل بيها من اساسه دى ارض بنتى و احفادى و انا اللى هراعيها و كفايا اوى المصايب اللى حصلت لنا من تحت راسكوا و لا نسيت
المهندس / عيب كدا يا رجاله انتوا اهل
ابو محمود / لا ما نسيتش شكلك انت اللى نسيت ما هو مش معنى اننا سترنا على بنتك تسوق فيها
الرجاله يمسكوا فى بعض و الفلاحين و المهندس يحوشوا
عويس / تستر على مين يا عديم النخوه و الشرف
ابو محمود / اسمعوا يا أهل البلد اسمعوا عشان اللى ما عرفش يعرف ... نسمه مرات ابن اخويا كانت ماشيه مع ابن الجبل فى مصر
عويس / اخرس قطع لسانك
ابو محمود / و لسه بيحبوا بعض و قتل ولاد اخويا واحد ورا التانى عشان يخلالهم الجو
عويس / سبونى عليه سبونى دا انا هخلع زماره رقبتك دى يا ابن الحرام
ابو محمود / يشهد عليا الله ما بكدب فى حرف واحد ... و اكبر دليل على كلامى انك عاوز تجوزها لفيراس ابن اخوك بأسرع وقت عشان عارف و متأكد انك مش هتعرف تشكمها
المهندس / لا بقي دى بوخت منك على الآخر الكلام ده ما يصحش ما تصغرناش بقي يا حج اتقى الله
ابو محمود / البت دى مش امينه على ربايه ولاد اخويا و انا هرفع قضيه فى المحكمه و اخدهم و انت مش هترفع عينك فى وشي تانى يا ... يا ابو نسمه
امين يدخل
امين / ايه اللى بيحصل هنا فى ايه ؟ ملمومين كدا ليه يلا كل واحد يروح يشوف اكل عيشه
ابو محمود/ انا فى ارضي و اللى له حاجه عندى يجي يوريني طوله انا يا قاتل يا مقتول هنا النهرده
عويس / تبقي مقتول
عويس يحاول يضرب ابو محمود و الناس تحوش امين يزعق
امين / بااااااس يمين بالله ان ما سكتوا انتوا الاتنين لأقل منكوا قدام الخلق انتوا فاهمين و لا لا
فلاح ١ / الحج ابو محمود الصراحه غلطان يا سي امين
أبو محمود / انت اش حشرك انت انت هتنسي نفسك و لا ايه
فلاح ٢ / كان بيجيب سيره الست ام بدر بكلام مش تمام
امين / ايه !!!
عويس / اياكش ألمرادى يطلع منكوا حاجه و تجيبولى حقى
ابو محمود / حق مين يا ابو حق دا انتوا عيله ما تقولش للقرش لا
امين / لااااااا دا انت تيجي معايا بقي نشوف الموضوع ده على رواقه
امين ياخد ابو محمود تحت باطه و يتك و يسحبه ناحيه العربيه احمد يدخل بالبوكس قبل ما ابو محمود يركب
احمد / ايه اللى بيحصل هنا
ابو محمود / اللحقنى يا باشا متكاتلين عليا و بهدلونى و ضربوني شايف يا باشا شايف
عويس / دا انت كداب ابن كلب
ابو محمود / شايف يا باشا شايف شتمني قدامك ازاى
امين / لمها
ابو محمود / و الجدع ده ياباشا كان عاوز يخطفني دلوقت و كان هيكسر لى رقبتى و عاوز اتعرض على الطب الشرعي يا باشا احمونى منهم يا باشا عاوزين يقتلوني زى ما قتلوا ابنى يا باشا
امين / مين دول اللى قتلوا ابنك
ابو محمود / اللحقنى يا باشا انا فى عرضك انا فى عرض الحكومه
احمد / لا دا كدا تمام اوى احنا نطلع كلنا كدا بقى على القسم نشوف الحكايه دى اصلها ايه
ابو محمود / و اعملى محضر عدم تعرض يا باشا
احمد / فى القسم يا حج نتكلم فى القسم ... ركب لى الناس دى فى البوكس يا ابنى و اصرف لى اللمه دى مش عاوز وش
..........................
على البحر فى اسكندريه
مازن بيلعب و قاسم و همام متابعينه
همام / مازن ... تعال
مازن يروح لهمام ياخده على حجره
همام / انبسطت النهرده
مازن يهز راسه
همام / قولى بقي تحب تروح فين تانى
مازن / عند احلام
قاسم/ ياض اتكلمنا مليون مره
همام / استنى بس يا قاسم خليه يتكلم ... ماشي يا سيدي هاخدك بس بشرط
مازن / موافق
............................