الكبيره ٢ بقلم / لولو_محمد

الحلقه ١٠١

((((((( الكبيره ٢)))))))
#لولو_محمد
الحلقه ١٠١
ابو محمود / و الجدع ده ياباشا كان عاوز يخطفني دلوقت و كان هيكسر لى رقبتى و عاوز اتعرض على الطب الشرعي يا باشا احمونى منهم يا باشا عاوزين يقتلوني زى ما قتلوا ابنى يا باشا
امين / مين دول اللى قتلوا ابنك
ابو محمود / اللحقنى يا باشا انا فى عرضك انا فى عرض الحكومه
احمد / لا دا كدا تمام اوى احنا نطلع كلنا كدا بقى على القسم نشوف الحكايه دى اصلها ايه
ابو محمود / و اعملى محضر عدم تعرض يا باشا
احمد / فى القسم يا حج نتكلم فى القسم ... ركب لى الناس دى فى البوكس يا ابنى و اصرف لى اللمه دى مش عاوز وش
..........................
على البحر فى اسكندريه
مازن بيلعب و قاسم و همام متابعينه
همام / مازن ... تعال
مازن يروح لهمام ياخده على حجره
همام / انبسطت النهرده
مازن يهز راسه
همام / قولى بقي تحب تروح فين تانى
مازن / عند احلام
قاسم/ ياض اتكلمنا مليون مره
همام / استنى بس يا قاسم خليه يتكلم ... ماشي يا سيدي هاخدك بس بشرط
مازن / موافق
............................
همام / لا لا لا اوعى تدى كلمه الا اما تعرف الاول انت بتربط نفسك بايه... الزيني لما بيوعد لازم يوفى
مازن يهز راسه
مازن / الزيني اسم ما يشيلوش الا الرجاله
همام / عليك نور ما انت جدع و عارف كل حاجه اهو
مازن / احلام بتقول
قاسم/ يمين بالله ان قولت احلام حاف كدا
مازن / هى قالت لى عادى
قاسم / عيب ... احلام مش عيله بتلعب معاك
مازن / لا بتلعب
قاسم / شايف الرد
همام/ تربيه ايجابيه ... اهدى ... لعبت معاك ايه بقي يا عم مازن خلاك عاوز تسيبنا و تروح لها كدا يمكن نلعبها معاك و تفضل وسطينا
مازن / حجره ورقه مقص
قاسم / طب ما كلنا بنلعبها معاك ايه المميز يعني
مازن / لا انت بس و مش طول الوقت
همام / و انا ؟!!
قاسم  / حتى لو انت قعدت معاها كام ساعه بس تفتكر لو انت وشك فى وشها العمر كله هتسيب كل اللى فى ايدها و تقعد تلعب معاك و بعدين مش كل حاجه لعب يا مازن
همام / استنى يا عم ... ايه يا عم مازن و انا فين ايه ابوك بس دى
مازن يبص لهمام و يسكت
همام / طب انت زعلان منى فى حاجه ... فى حد ... اى حد زعلك فى حاجه
مازن يهز راسه لا
همام / طب انت طلبت اى حاجه من اى حد و ما عملهالكش ؟
مازن يهز راسه لا
قاسم/ اهو يعني مفيش اى فرق بين هنا و هناك
مازن / هناك فى احلام
همام يضحك و قاسم يضرب كف على كف
همام / يا سيدي على راسنا بس فهمنا ايه الحاجه اللى احلام عملتها علقتك بيها اوى كدا
مازن / ما علقتنيش
قاسم / يقصد بتحبها اوى كدا ليه
مازن / احلام حلوه 
قاسم / كتير و الله كدا كتير
همام يضحك
همام / طب و احنا وحشين و لا ايه ... ايه ياله مالك اول مره تشوف واحده حلوه و لا ايه
مازن يضحك
قاسم / روح اللعب يا مازن روح اللعب يا حبيبي
مازن ينزل يجرى
قاسم / و لا هتاخد منه حق و لا باطل دا انا فى الهم ده من ساعتها
همام / و لا هم و لا حاجه سبحانه مقلب القلوب
قاسم / بس الدكتور قلقنى ليكون فى حاجه بتحصل فعلا و انا مش شايف و الواد خايف يحكيلي ... عمال اراجع كل المواقف فى دماغى مش قادر الاقى موقف وحش او حتى يحمل معنيين حصل مفيش ... بقول يمكن لما كنت بسيبه معاهم و انزل الشغل زمان يكون فى حاجه حصلت و ما حدش قال و هى السبب فى كل ده ... التروما اللى الدكتور كان بيتكلم عليها و العنف و الحوارات اللى كانت بتحصل الفتره اللى فاتت
همام / و الله انا سالت من تحت لتحت ما وصلتش لحاجه و بعدين انت عارف السرايا ياما بيحصل فيها بس مهما حصل ما حدش هيجي على عيل صغير و ان حصل اى موقف اى كان ايد بتشد و عشره بيطبطبوا يعني مش حوار من اللى فى بالك يعنى
قاسم / مش مرتاح
همام / ما تخليش الشيطان ينفخ فى صدرك بس و فكر فى الحوار اياه
قاسم / يا عم انا فى ايه و انت فى ايه
همام / يمين بالله هترتاح ... دى احلام حلوه
همام يضحك قاسم يسيب المكان و يروح يلعب مع مازن همام ينادي عليه
همام / على فكره انت ممكن تترفض عادى لتكون فاكر انك ما حصلتش يعني
قاسم/ مش هكون اول واحد
همام يضحك و يقوم يلعب معاهم
.....................
قدام باب الحجز
ابو محمود بيتكلم فى التليفون فى جنب
أبو محمود/ مش انتى قولتيلى اطلع عليها كلام
كيرا / و انت كدا طلعت عليها حاجه دا انت غبى زى ابنك بالظبط
ابو محمود / ايه الكلام ده
كيرا / اقفل اقفل انا هتصرف
كيرا تقفل السكه فى وشه و هو مش فاهم اى حاجه العسكرى يناديه
العسكرى / ها خلصت و لا لسه
ابو محمود / خلصت
العسكرى / طب ما ترجع العده ايه هتضرب عليها و لا ايه و اسمع اى حد هيعرف اى حاجه عن المكالمه دى انا مش مسؤل
ابو محمود/ بقولك ايه انت مش قبضت تمنها ما تهدى عليا بقي انا مش فاهم اى حاجه
العسكرى/ يتوب علينا ربنا من الوحله اللى وحلنا روحنا فيها ادخل ما تجيبليش الكلام ادخل
العسكرى يدخل ابو محمود الحجز يلاقي عويس قاعد و متابعه يروح يقعد الناحيه التانيه و هم بيبصوا لبعض بقرف
....................
فى مكتب احمد
احمد قاعد مع عباده
احمد / لا دا انا سايبهم جوه ساعتين كدا يتربوا و هخرجهم
عباده / طب و اخرتها هنفضل فى الحكايه دى كل يوم يعني و لا ايه ؟
احمد / اعمل ليهم ايه يعني قدرنا بقى لازم كدا فى مكان تلاقى قله كدا مش قادرين يعيشوا من غير حوارات و مشاكل
عباده / معاك حق و الله يا باشا بس نعمل ايه فى الاول و الاخر اهل
احمد/ ما دى المصيبه دا لو كانوا اغراب كانت بقت اهون
عباده يهز راسه فجاه العسكرى يدخل مرعوب
العسكرى / اللحقنا يا احمد باشا اللحقنا
احمد و عباده يقوموا يتنفضوا
..................
فى شقه جوزيف
مختار بيتكلم فى التليفون و هو عصبى
مختار/ يعني ايه مات بسكته قلبيه الجثه دى لازم تتشرح
جوزيف / مش هتلاقوا حاجه
مختار يبص لجوزيف
مختار/ هكلمك بعدين ... سلام دلوقت ... انت عارف حاجه ؟
جوزيف/ دوره خلص ... لا و يا ريته عمله صح
جوزيف يضحك
مختار / مش وقتك على فكره
جوزيف / تمام سكت
مختار / ما انا مش عاوزك تسكت انا عاوزك تتكلم
جوزيف / اتكلم اقول ايه انت نفسك مش مصدق انه مات عادى ... ايوه اتقتل بس اللى قتله مستحيل هيسيب دليل وراه هيبان طبيعي جدا و مش هتكسب اى حاجه
مختار / و المطلوب ؟ ايه هندبح كدا واحد ورا التانى لحد ما نخلص
جوزيف/ لو كان ده الهدف كان اتعمل من زمان ... و الحقيقه انا عمرى ما فهمت ليه لا ... بس هاكان كان بيقول عنكوا تل نمل ما حدش عارف عمقه واصل لحد فين ... بس ... اعتقد فى سبب أعمق من ده
مختار/ اشجينى
جوزيف / اعتقد ان المجلس ليه مصلحه فى وجودكم ... مش قادر احدد هى ايه بس اعتقد ان الفوضي مش فى مصلحته عشان كدا سايبكوا عايشين لحد ما يلاقى البديل المناسب
مختار / و تلاقيه و لا عارف يعمل حاجه اصلا ... ما بيتشطروش الا على الغلابه ... اللى ما لهمش فيها
جوزيف / لو مقتنع بكدا يبقي ما تزعلش منى بس انت اللى ما لكش فيها... ان كان محمود و لا ابوه الاتنين انيل من بعض
مختار / ايوه ما قولتش انهم ملايكه بس
جوزيف / لو كانوا عدلين كانوا عاشوا ... المسأله بتمشي كدا انا بغريك او ببتزك و فى الحالتين لو قبلت اتوحلت يا تنجح يا تموت... فهمت ؟
مختار / و ايه بقي اللى الجدع ده فشل فيه بقي ؟
جوزيف يعوج بقه مش عارف
مختار / احلف
جوزيف / اقسم بالله ما اعرف ... اساسا واحد زى ده اى حد بيفكر هيعرف انه مهما كانت المهمه سهله هيفشل فيها فمش فاهم ... يمكن كان أضعف حلقه فى السلسله ... كل حاجه ممكن
مختار/ مش فاهم
جوزيف / و لا انا بس كل حاجه هتبان مع الوقت بس بالمعدل ده ما اعتقدش هنطول خالص بيتحركوا بسرعه اوى
مختار / هم مين بقي
جوزيف / المجلس و اللى تبعه يا مختار مالك فى ايه ... امايا مثلا ممكن بابلو ممكن ناس تانيه ما اعرفهمش كلهم مجسات لنفس الأخطبوط... المجلس
مختار يهز راسه
مختار / ربك كبير ... ربك كبير
.......................
فى الجيم فى سرايا الزنايته
جابر بيتمرن نجاه تدخل فى ايدها ازازه مايه و فوطه يشوفها يبطل تمرين
جابر / اخر سيت و ماشي
نجاه / براحتك ممكن اجى وقت تانى خالص
جابر / ممكن اخد ازازتك مايتي خلصت
نجاه تديله الازازه و تمشي تقابل هند
هند / الله ايه اللى رجعك مش قولتى هتتمرنى و لا هى حجه و خلاص عشان ما تخشيش المطبخ
نجاه / دا على اساس ان المطبخ فيه مكان لرجل و بعدين انا اساسا ما بهربش من المطبخ عادى على فكره بس مش زحمه و خلاص
هند/ و انتى جايه يا حبه نن عين عمك انا كنت راجعه ... نفس الحجج و نفس البقين دول قولتهم زماااااان ففكك يا اختى فكك
نجاه تضحك
نجاه / اقسم بالله ما بهرب و لا حاجه بس انا فعلا زهقانه اوى
هند / طب سيبي الكلمه دى لواحده قاعده طول الوقت بين أربع حيطان مش انتى اللى من هنا لهناك
نجاه تهز راسها بملل و تبص على الجيم
هند / ايه غيرتي رايك و قررتي ترجعى الجيم و لا ايه ؟
نجاه / جابر بيتمرن تحت و قال آخر سيت مستنياه يخلص عشان ابدء
هند / ايه ده هو بيتمرن من الفجر لدلوقت ايه داخل بطوله بعد اسبوعين دا يجيله فاتيج
نجاه / هو بيتمرن من الفجر ؟!
هند / اوعى اما اشوفه وسعى
هند تروح تنزل الجيم تلاقي جابر فى الحمام
هند/ جابر... جابر
جابر يطلع من الحمام بينشف شعره يشوفهم يستغرب
جابر / قولت لك آخر سيت مش هحتله يعني
نجاه / انا مالى انا
هند / كلمنى هنا ... انت كل ده بتتمرن فى ايه يا ابنى ما ينفعش كدا انت اساسا لا فطرت و لا حطيت فى بقك لقمه من امبارح حد عاقل يعمل كدا و لما تقع مننا يعني 
جابر / ما تقلقيش يا ست الكل انا زى الفل اهو هروح اتشطف و اغير يكون الاكل خلص اجى اكل معاكم
هند / ماشي يا حبيبي يلا توكل على الله
جابر / عن اذنكوا
جابر يمشي نجاه تروح تروق مكانه و ترجع الأوزان مكانها
نجاه / و لما اشتمه بترجعوا تزعلوا دا منظر ده
هند / كلو بعض انا مالى ... أما اروح اشوف عمك ده ناوى يبات بره و لا اكل و لا ليلته ايه بالظبط
هند تمشي و نجاه تقفل الشبابيك و الباب و تبدا تتمرن
.........................
فى المضيفه
عباده / يعني انت عاوز ايه دلوقت
مختار / يا عم انا مش عاوز حاجه انا بتكلم معاك هو احنا لينا غير بعض فى ايه مالك
عباده / و الله يا مختار انا لا قولت لك ليك و لا ما ليكش انا كدا كدا عارف اللى يخصني و واقف معاه
مختار / ما ترميش الكلام و اتكلم دوغرى
عباده / انا كدا دوغرى
مختار / انت كدا دوغرى !!
عباده / انت شايف اننا فى وضع يسمح لينا نتفرق او نتخانق او نسمح لاى شيطان يدخل بينا
مختار / اكيد لا
عباده / مظبوط ... تفتكر انت بقي مهما كان حجم الخلاف بينا او الزعل انى همسح كل اللى بينا سنين بقي و عشره و مواقف عشان اى حاجه حصلت تحت اى مسمي
مختار / ربنا لا يجيب زعل و لا خلاف و انا اكيد عمرى ما هخسرك و لا عمرى ما هسمح لاى حاجه تفرق بينا ... و قبل ما تقول اى حاجه و لا هسمح لاى حاجه وحشه تحصل لنجاه و لا هجازف بيها تحت اى مسمي و سعادتها عندى اهم من الدنيا و اخوتى ليك و علاقتنا اهم من اى حاجه تانيه
عباده/ نبقي متفقين
مختار/ متفقين ... هنعمل ايه دلوقت؟
عباده / رايي قدام رايك الكوره فى ملعب مغاورى القرار بقي بايده و هو قال هيصلى استخاره و يفكر
مختار / اول مره ما يديش قرار فى ساعتها
عباده / عشان اول مره نختلف و نرمى الحمل كله عليه
مختار / انا بخاف عليك على فكره
عباده / ما المصيبه ان انا كمان خايف عليك بس لا انت عيل صغير و لا ليا كلمه عليك فشايفك و حاطت فى قلبي و ساكت
مختار / لا ما تقلقش عليا اخوك مش لقمه طريه
عباده/ ملبن يا كبد اخوك ملبن
مختار / هى بقت كدا
مختار يضحك
عباده / كسرنا لوحه الإعلانات تانى النهرده
مختار / هيصلحوها بكره
عباده / هنكسرها بعده ورانا ايه عيال مش متربيه بعيد عنك
مختار / مش ده الحل يا عباده صدقنى مش ده الحل  .. الناس ما عادتش بتغض بصراها من الأساس... الربايه فى النازل و البعد عن ربنا فى الطالع ... و احنا مش هنقدر نغمض ليهم عنيهم ... اصل اللى هنخفى اللوحه من قدام عنيه مش هنقدر نقفل عليه النت ... اللى عاوز حاجه هيعملها
عباده / بس ما تحطليش لوحه زى دى قدام مدرسه عيال فى اعداديه و تقول اللى عاوز حاجه هيعملها دول عيال ... هى يافطه واحده دول بدروا البلد يفط ... هو افتتاح السيرك امتى
مختار / اول الشهر
عباده / تقدر تجيب كام تذكره
مختار / هنروح و لا ايه
عباده / انا عاوز اشترى كل التذاكر مش عاوزهم يلاقوا تذكره واحده لاى عرض و هشتريهم باى ثمن عاوزها يوم الافتتاح تسمع صوت صرصار الغيط زئ زئ زئ زئ زئ زئ
مختار / دا صوت صرصار الغيط ده
عباده/ مش وقت استظراف
مختار / هى فكره مش بطاله بس ... تفتكر هتقدر ؟
عباده / نجرب ... هنخسر ايه … كدا كدا عرفنا خلاص ان السيرك ده تبعها ... سواء بقي من قريب أو من بعيد بس ما دام أذى و هبط علينا بالشكل ده يبقي تبعهم
مختار يهز راسه
عباده / و عاوزين ناكد على شيوخ البلد ياكدوا على غض البصر فى الدروس و الخطب
مختار / اعتبره حصل
عباده / انا عاوز اقولك حاجه ملاحظها
مختار / قول
عباده / انا رجعت افكر تانى فى موضوع انى اخلى جابر الكبير انا حاسس انى مضغوط اوى زياده عن اللزوم و قلبي ما عادش مظبوط
مختار / انت بتقول ايه يا عباده فى ايه ... تحب نروح نكشف و نطمن
عباده/ لا يا عم مفيش حاجه بس حاسس ان ساعات يعني برجفه فى قلبي كدا بيدق بسرعه ... مش عارف اوصف لك ... مش مركز معظم الوقت ... بسرح كتير ... بتعصب برده كتير ... مش انا ... مش عباده
مختار / بحاول اجمع
عباده / المهم ايه رايك
نجاه تدخل
نجاه / السلام عليكم ... هو جابر هنا ؟
عباده / لا خير ؟
نجاه / مش لقياه و موبايله مقفول
مختار / يمكن نايم و موبايله فصل
نجاه/ كان بيتمرن من الفجر لحد من ساعتين و نص كدا و عمتى هند قالت انه ما اكلش حاجه من امبارح قال هيروح يتشطف و يغير و ما جاش قولت يمكن حد بعت له اكل بس احلام قالت إنها ما ودتلوش حاجه و اصلا معهاش المفتاح
مختار يبص لعباده و يقوموا يجروا على البيت يخبطوا نجاه تطلع المفتاح و تديه لعباده يفتح و يدخلوا كل واحد يجرى يدور فى حته و هم بينادوا عليه نجاه تطلع فوق و تفتح فى الاوض لحد ما تلاقيه نايم على وشه بهدومه على سرير اطفال تصرخ
نجاه / جابر !!!
جابر يتفزع و يتقلب من على السرير فى الارض
جابر / فى ايه فى ايه
نجاه / يا برودك يا اخى انت ايه ما عندكش دم مفيش احساس
مختار و عباده يدخلوا يلاقوه قاعد فى الارض
مختار / الحمد لله ... خضتينا عليك يا اخى
جابر / هو ايه اللى حصل
نجاه / ما حصلش زفت انا ماشيه
نجاه تمشي و هى متعصبه
عباده/ الحمد لله اطمنا عليك و ما تاخذناش لو كنا فزعناك او اننا دخلنا البيت كدا من غير اذنك
جابر / لا دا بيتكوا تنوروا بس بجد فى ايه ؟ هى مالها فى ايه ؟ ايه اللى حصل ؟
مختار/ انت ما اكلتش حاجه من امبارح صحيح و اتمرنت كتير
جابر / ما كانش جايلى نوم قولت افرغ طاقه يعني و طلعت استحميت و لبست و قولت افرد ضهرى لحد ما يرنولى ان الاكل جاهز نمت
جابر يمد ايده يجيب الموبايل من على الكومدينو و يوريهولهم
جابر / فصل ... حقكوا عليا ان كنت فزعتكوا ... انا تمام
مختار / طب قوم كلك لقمه لتهبط و لا يجرالك حاجه قوم قوم
مختار يمد ايده لجابر يقومه
مختار / ايه يا عم نزلت فى الارض و ارتحت و لا ايه ما تقوم تقف كدا على حيلك مالك مش واخد عليك كدا
عباده / سيبه ربنا يصبره على ما بلاه دى هتاخد مجهود عشان تفك البوز بتاعها ده
جابر / راحت عليا نومه و الله اعمل ايه يعني اكيد مش قاصد اخضكوا كدا
عباده / كل ضاره نافعه ... و لا ايه يا مختار
جابر يبتسم اوى و الاتنين باصين لمختار
مختار / ربنا يقدم اللى فيه الخير ... يلا يلا اتحرك يلا دا مراة خالك هتنفخك اتحرك
جابر / مسكين و الله
عباده/ ما تخافش ياض انا فى ضهرك
جابر / حبيبي
.....................
فى اوضه نجاه
نجاه قاعده مضايقه عباده يخبط و يدخل تتعدل فى قعدتها
عباده / تحبى تخرجى نتمشى فى البلد شويه؟
نجاه / ممكن نخليها وقت تانى لسه متمرنه و جسمي واجعنى شويه
عباده / و الله و انا
عباده يدخل يمدد على السرير جنبها نجاه تبتسم يبتسم
عباده / انتى عارفه غلاوتك عندى صح ؟
نجاه / اكيد
عباده/ طب انا ممكن أظلمك؟
نجاه / اكيد لا
عباده / طب انا ممكن ابقي اى مخلوق فى الدنيا عليكي
نجاه / احنا رايحين فى سكه مقلقه على فكره
عباده يضحك
نجاه / على العموم الاجابه لا و انا كمان ما بحبش اى مخلوق فى الدنيا قد حضرتك
عباده / بفكر جديا اخلى جابر الكبير و اتقاعد او بمعنى أدق... اخفف شويه من احمالى اللى بجد بقيت حاسس انى مش قدها
نجاه / دا مش حقيقي دا شيطان عشان يضعف عزيمه حضرتك ... حضرتك قدها و قدود و لو الموضوع صعب على حضرتك فصدقنى هيكون مستحيل بالنسبه لغيرك حتى لو كان مين
عباده يطبطب على ضهرها
نجاه / و بخصوص جابر فحضرتك اللى شايفه صح اعمله انا كدا كدا سلامتك عندى بالدنيا و انا فهمت خلاص انا مستحيل هشمها
عباده يقوم يقعد و باين عليه القلق و الغضب
نجاه / فى حاجه و لا ايه
عباده / هو انتى ممكن تعملى حاجه من ورايا يا نجاه ؟
نجاه / ايه اللى قولته يخلى حضرتك تحس بكدا بس !!
عباده / ردى عليا
نجاه / اكيد لا هو فى ايه
عباده / لو فى يوم من الايام عرفت انك بتكدبى عليا او مخبيه عنى اي حاجه هزعل منك زعل عمرك ما شوفتيه في حياتك
نجاه / طب فهمنى طيب ليه التغير المفاجئ اللى حصل ده
عباده / مفيش انا قولتلك و خلاص
عباده يمشي و يرزع الباب و نجاه مش فاهمه اى حاجه
.......................
فى اوضه مهره
صوفيا تدخل على مهره بتذاكر 
صوفيا / بقولك ايه انا خارجه مع ماما هتيجي ؟
مهره تهز راسها لا
صوفيا / ايه الفصلان ده قاعده بتعملى ايه يعني
مهره توريها الكتاب
صوفيا / ما تهزريش انتى لا حضرتى لا شفوى و لا عملى هتروحى التحريري تعملى ايه
مهره تبتسم
صوفيا / نكديه زى باتى خلاص خليكى انا خارجه ... سلام
مهره تشاور ليها باى
صوفيا تقفل الباب و مهره تكمل مذاكره الباب يتفتح تانى و صوفيا تدخل
صوفيا / هو انتى فى مشكله بينك و بين ماما ؟ حساكوا بتتجنبوا بعض هو فى حاجه
مهره تهز راسها لا
صوفيا / غريبه ... تمام ... سلام
صوفيا تقفل الباب
...................
فى الجنينه الورانيه
نجاه قاعده سرحانه مختار يدخل
مختار / الجو برد النهرده على القاعده دى على فكره
نجاه تبص له و تقوم تروح ناحيه السرايا
مختار / انتى كويسه ؟
نجاه تقف و تتنهد و تبص له
نجاه / لا
مختار / دى بدايه كويسه ... تحبى تتكلمى
نجاه / فى ايه؟ انا مش عارفه فى ايه اصلا... انا مش عارفه انا بغلط فى ايه او اقدر ابطل الغلط ده ازاى ... انا تايهه فى بيتي ... طب اروح فين
مختار / هو الموضوع كبير اوى كدا ... انا كنت فاكرك مضايقه من حوار جابر اللى حصل
نجاه تتنهد
نجاه / ايوه مضايقه بس على الاقل انا عارفه جابر أوله من اخره انما ابويا مش قادره أفهمه
مختار / هو نفسه كان لسه بيقول انه عصبى جدا الفتره دى و لعلمك مش لوحده انا ملاحظ ان الكل عصبى و كل واحد بيطلع عصبيته بطريقته اللى بيدخل الجيم بالساعات يفرغ طاقته و اللى بيدفن نفسه فى اوضته و يقفل على روحه و اللى بيفضل على سجاده الصلاه ما بيقومش من عليها و فى اللى بيطلع همه فى باقي خلقه الكل مضغوط و اللى بنشوفه و نعيشه كل يوم مش شويه
نجاه / لا يا عمى الموضوع مختلف ... المرادى الموضوع مختلف احنا من يوم ما وعينا و احنا تحت ضغط عدينا من أصعب اختبارات ضبط النفس يعني عارفين بنعمل ايه كويس
مختار / ما حدش مجبر يضبط نفسه وسط اهله يا نجاه دول السايف زون بتاعته
نجاه / طب انا فين السيف زون بتاعتى
مختار/ كلنا ... انا موجود فى اى وقت لو حابه تتكلمى
نجاه / انا مش عاوزه كلام يا عمى انا عاوزه حل انا ... انا و بابا كنا بنتكلم عادى جدا فجاه هاج عليا و اتعصب و سابنى و مشي مع انى اقسم بالله ما جادلته حتى قالى هيخلى جابر الكبير قولتله تمام ما اعترضتش حتى ... طب زعل ليه
مختار يستغرب
نجاه / جابر بيتجنبنى ماشي هو قالى ليه مع انه هبل بس ماشي على قد دماغه
مختار / على قد دماغه!! دا جابر !!
نجاه / بيقول لما يقلل اهتمامه بيا هحس بقيمته و هعترف بحبه حاجه زى كدا
مختار/ و اعترفتى ؟
نجاه / هو انتوا ليه بتنسوا جابر ايه بالنسبالى... انا وعيت على الدنيا لقيته جنبى ... ما ليش ذكرى واحده من غيره ... اكيد بعده هيفرق طبعا و اكيد طريقته فى التفكير دى مضيقانى ... بس هو على الاقل فهماه عكس ابويا... المصيبه انى ممكن استحمل زعل اى حد منى او انى ازعل من اى حد الا ابويا يا عمى دا انا اموت
مختار / بعد الشر بعد الشر اهدى  بس
نجاه تعيط
مختار / دا انا هنفخه ابوكى ده ... بقى فى حد يستجرى يزعل القمر بتاعنا كدا ... يمين بالله لاطلع له دلوقت اشوف حكايته ايه الراجل ده مش ممكن
مختار يمشي يلاقي جابر خارج من بيته
مختار / جابر
جابر يروح له
مختار / على فين كدا
جابر / الرجاله قاعدين فى الجبل قولت اطلع اقعد معاهم شويه
مختار/ رجاله مين
جابر / شاكر و صابر و شويه من الشباب ... عادى يعني البيت خنقه و الواحد زهقان خلقه فبغير جو شويه ... هو فى حاجه و لا ايه ؟
مختار / لا يا حبيبي مفيش حاجه اطلع انبسط ... هو انت مش هتحاول تراضي نجاه بعد اللى حصل
جابر / هو ايه اللى حصل موقف عادى و عدى ... هى كلمت حضرتك فى حاجه ؟
مختار / لا بس مضايقه ... انا طالع لعمك عباده شويه ... هى فى الجنينه ورا ... شوف ايه اللى يريحك و اعمله
مختار يدخل السرايا و جابر يقف يبص على الجنينه و على العربيه و يفضل يفكر و يتردد و فى الاخر يركب العربيه و يمشي و مختار متابعه من ورا باب السرايا و مستغرب يهز راسه و يطلع فوق
.............................
فى جنينه مهره
مهره بتتمشي صوفيا تدخل بعربيتها مهره تتحرج و تتلفت حواليها و بعدين تلم نفسها و تقف و تبتسم يكونوا نزلوا من العربيه كارمن تتجاهلها و تروح للفيلا صوفيا تستغرب
صوفيا / هو انتوا بجد مش متخانقين على فكره دى مامتك ما ينفعش تبقوا زعلانين من بعض ... و بعدين اى كان سؤء التفاهم اللى حصل قبل كدا المفروض تصلحوه بقي
مهره تبص فى الارض
صوفيا / ماما بتمر بظروف صعبه اوى هى مش مصدقه ان بابا سابنا و مقتنعه انه اتخطف و مش قادره تتقبل الواقع اللى احنا فيه و انا مش قادره اساعدها و لا اعمل ليها حاجه
مهره بتفرك فى ايديها صوفيا تمسك ايديها مهره تبص لصوفيا
صوفيا / اتكلمى معاها عشان خاطرى انا عارفه انها مش صوره الام التقليديه اللى بتحضن و تطبطب و تبوس بس هى الام الوحيده اللى عندها و محتاجين لها ... انا محتاجه لها ... و انتى و بياتريس ... اهى بياتريس دى فى حد ذاتها مصيبه دى هتضيع عليها السنه و كل يوم خناق مع عمى انا بجد تعبت
مهره تتنهد
صوفيا / عشان خاطرى اتكلمى معاها ... عشان خاطرى ... حاولى بس ... بليز
مهره تهز راسها صوفيا تخبطها على كتفها مهره تشاور على الساعه فى ايدها
صوفيا / هتستنى ايه يعني يلا ما تضيعيش وقت انا خدتها و غيرت مودها خشي انتى بقي راضيها و كلميها و شوفى هتعمل معاكى ايه
مهره تبص فى الارض بتوتر و بعدين تبص لصوفيا و تهز راسها موافقه صوفيا تبتسم مهره تدخل الفيلا صوفيا تطلع الموبايل و تتصل بعمران يرد
صوفيا / ازيك عامل ايه
عمران / السلام عليكم الحمد لله عامله ايه و مهره عامله ايه
صوفيا / بصراحه انا كنت عاوزه اتكلم معاك فى موضوع كدا و مش عارفه هتقدر تساعدني فيه و لا لا ... هو مش شرط انت بشكل مباشر و الحقيقه انا مش عارفه بكلمك انت ليه بس الصراحه مفيش حد خالص فى دماغى... يعني ... اصل الناس كلها اختفت من حوالينا فجاه و ... انا اسفه اوى انى
عمران / مفيش مشكله خير ايه المشكله
صوفيا / لا هو اكيد مش هينفع فى التليفون لو فاضي ممكن نتقابل و نتكلم
عمران / تمام يناسبك امتى
صوفيا / دلوقت لو تحب
عمران / اكيد لا طبعا ما ينفعش الوقت اتأخر انك تخرجى لوحدك و اكيد لما هنقعد و نتكلم هناخد وقت هتروحى الساعه كام ما يصحش ... هو الموضوع خطير ما يتأجلش لبكره الصبح ؟
صوفيا / لا يستنى عادى مفيش مشكله بص شوف يناسبك امتى و فين و ابعتلى الدايت و اللوكيشن و انا هتلاقيني هناك
عمران / خلاص بإذن الله بكره الساعه تسعه فى النادى لو يناسبك
صوفيا / يناسبني جدا طبعا تمام اتفقنا قبل معادى هتلاقيني قدامك
عمران / باذن الله ... هستاذنك اقفل
صوفيا / اكيد تمام نتقابل بكره بقي
عمران / باذن الله ... سلام
عمران يقفل صوفيا تبوس الموبايل
صوفيا / يا قلبي علي الراجل الحمش يا قلبي
....................
فى اوضه عباده
خديجه / انا طول الوقت بقولك شد عليها بس المرادى مختار معاه حق
عباده يبص لخديجة
خديجه / انا فهماك و حاسه بيك بس هى مش فاهمه اللى جواك و انت حاطتها تحت عينك و بتعرف كل صغيره و كبيره و نجاه مهما كان فيها عبر مش هتعمل فيك كدا صدقنى
عباده يهز راسه
خديجه / بص هى نجاه كدا كدا عمرها ما هتزعل منك بس الكلام اللى قالته لمختار يزعل .. يعنى ايه تايهه فى بيتها امال ترتاح فين و تطمن فين و المشكله انها فعلا المرادى ما عملتش حاجه
عباده / طول ما هو قدامى عمرى ما هطمن و لا هرتاح
خديجه / لو مش هو هيبقي غيره يا عباده
عباده / اى حد الا هو
خديجه/ و اش عرفك مش يمكن هو يكون احسن من الكل
عباده يبص لها
خديجه/ الله اعلم هو احنا عرفنا الغيب و لا حتى دخلنا فى النفوس و بعدين الجدع ما اتكلمش فى اى حاجه و كل اللى فى دماغك تلميحات او احساس ممكن جدا يكون غلط...وارد على فكره
عباده / مش قادر يا خديجه
خديجه / حقك و فهماك و الله بس انت طول عمرك راسي و عاقل و بتوزنها بميزان الدهب ... انا عارفه ان الضغط عليك شديد بس ... انت قدها يا عباده سنين و انت شايلها على كتافك و ياما دقت على الراس طبول
عباده / هو عيب انى اقول تعبت يعني
خديجه / لا مش عيب يا سيد الناس و حقك اطخن منك و بينخوا من اول قلم بس انت مش لوحدك كلنا جنبك و حواليك
باب الاوضه يخبط
………………………..