الكبيره ٢ بقلم / لولو_محمد

الحلقه ٨١

(((((( الكبيره ٢ ))))))))
#لولو_محمد
الحلقه ٨١
جابر/ و هو خروجنا من ارضنا و اننا نسيبهالهم مفتوحه يدخلوا و يبرطعوا هم فيها دا مش فى حد ذاته تحدى رسمي ليهم ... ما هم اكيد هيردوا
مختار / انت بتتكلم صح
جابر / شكرا ... بس ؟
مختار / بس ؟
جابر / لا انا مستنيها من حضرتك ... بس ... فى بس
مختار يهز راسه لا
جابر / هى عارفه المكان و حبيبك عارف المكان ... و الاتنين ما شاء الله عليهم اللهم بارك يعني يتفات ليهم بلاد ... لو هم فيهم ذره ضمير واحده ... لو يونس ده انسان و تاب و قرر يبقي اى حاجه غير القرف اللى كان عليه ... تفتكر مكان زى المعسكر  ده هياخد فى ايده وقت قد ايه ... يونس قدر يجند شحته غباوه ... مفيش مشكله ... شحته بقي ... عنده رجاله قد ايه ... يونس نفسه ... عنده رجاله قد ايه ... لو كان عايز ... كان نفذ
مختار/ انا دايما بفكر فى الجمله دى
جابر / و النتيجه ؟
مختار/ مش عارف يا جابر ... حقيقي فى اكبر براين ستورم شغاله فى دماغى من فتره ... ما بنامش
جابر / انت حبيبي... مش خالى لا ... اكتر بكتير ... بس حضرتك اللى تاعب نفسك ... مصمم تعيش فى عالم خيالي ما لوش وجود نهائى ... و اكبر دليل انك سبتها تمشي
مختار / هقدر اعمل ليها ايه يا جابر ... تفتكر هتاخد منها حاجه ؟! هتعمل ايه ... تفتكر هتوصل معاها لانهى مستوى من التعذيب و برده مش هتوصل لحاجه
جابر / وارد ... بس فى احتمال ان حضرتك لسه شايفها بنتك ... هى مش كدا زى ما التانى مش ابن صاحبك ... شبهه فى الشكل و ابنه فى الدم بس دمه فسد ... ما لوش علاج
مختار / الحمد لله ان مفاتيح الجنه بأيد ربنا مش فى ايدك كان زمانك رميت نص البشر فى النار
جابر يبتسم و يقوم يمشي مختار يضرب كف على كف
..........................
فى شقه نجاه
نجاه / الاكل جاهز هغرف و انتى روحى نادى الناس
جابر يطلع من الاوضه و يمشي يرزع الباب وراه
نجاه / جابر جابر
نجاه تتنهد تبص لمهره عينها على الحمام
نجاه / هو انا هعمل كل حاجه لوحدى يعني ما تروحى يا بنتى تنادي الناس تاكل و لا تعالى اغرفى معايا
مهره / عمران بقاله كتير اوى فى الحمام
نجاه/ لا ما يتهياليش انه طول اوى كدا ... انا رايحه اغرف انا جعانه
نجاه تدخل المطبخ و مهره تروح تخبط على الحمام
مهره / عمران... عمران
عمران / ثوانى
مهره / انت كويس؟! طولت اوى ... محتاج حاجه
عمران يفتح الباب و هو بيعدل تيشيرت مهره تبص تلاقي الحوض مليان مناديل و قطن غرقانين دم و بيتادين تبص لعمران بخوف
عمران / كنت بحاول اغير الجرح و مش مالك ... ثوانى بس هنضف و اعقم مكانى و هرجع كل حاجه زى ما كانت ثوانى
عمران يجرى ينضف و يلم الحاجه مهره تشوف التيشيرت متعاص بيتادين و مبهدل
مهره / تحب اساعدك
عمران / لا لا لا انا هنضف عادى ... الموضوع سهل يعني مش محتاج و بعدين انا
مهره / اساعدك تغير على الجرح و اعملهولك عدل
عمران / بابا لما يرجع هيبقي ...
مهره / عموا مختار هنا جه من شويه و دخل اوضه جابر
صوت قفل باب الشقه نجاه تطلع من المطبخ و عمران و مهره يطلعوا من الحمام
نجاه/ هو فى ايه
مهره تروح تبص على اوضه مختار بابها مفتوح و الاوضه فاضيه
مهره / نزل تانى
عمران / هو فى حاجه حصلت و لا ايه
نجاه / شكله كدا رجع دخل اوضه جابر و قفلوا الباب جابر نزل من ثوانى و عمى نزل اهو مش فاهمه فى ايه بقي
عمران / لسه كتير على الاكل ؟
نجاه / بغرف بغرف اغسل ايدك و اقعد هدخل اجيب لك
عمران / تسلم ايدك
عمران يرجع الحمام مهره تروح وراه بيشتغل بأيد واحده
مهره / سيبه انا هكمل و انت روح ارتاح ... عمران ... التيشيرت عليه دم انت متأكد انك غيرت على الجرح كويس
عمران يشد التيشيرت و يبص و يتنهد و يسيب الحمام و يروح الاوضه مهره تروح وراه
مهره / انادى حد طيب و لا اعمل ايه
عمران / ما تافوريش يبقي كتر خيرك اوى
مهره / ما افورش !!! يعني دى اخرتها يعني دا ردك انا مخضوضه عليك و بحاول اساعدك و انت ده ردك
عمران / انا اسف بس اقسم بالله انا تعبان دلوقت و المسكن مش عاوز يشتغل و انتى واقفه فوق راسي
مهره / العيب على اللى تجرى وراك بعد كدا
نجاه تدخل تجرى
نجاه / فى ايه فى ايه
مهره تسيب الاوضه و هى بتعيط
عمران / و طبعا انا الوحش ابو نياب كالعاده
نجاه / فى ايه يا عمران مالك
عمران يلف نجاه تشوف ضهر التيشيرت الدم غرق ضهر عمران
نجاه / هتصل بحد ما تعملش انت حاجه انا هناديهم
نجاه تجرى على السلم و تسيب الباب مفتوح عمران يقلع التيشيرت مهره تدخل بتتخانق
مهره / لعلمك بقي
مهره تشوف الجرح تدوخ و يغم عليها عمران يجرى عليها
عمران / نهار ابيض مهره مهره انتى يا بنتى مهره
عمران يحاول يفوق مهره ابوه يدخل يشوفه
مختار / نهار ابوك اغبر انت بتنيل ايه ... روح استر نفسك
عمران / انا ما عملتش حاجه هى وقعت لوحدها
مختار / بقولك استر نفسك انت ما بتفهمش
مختار يشيل مهره و يوديها اوضتها و نجاه تجرى وراه
جابر / تعال يا عمران تعال وريني الجرح انت اتخبطت فى حاجه و لا ايه
عمران / هو بيعاملنى كدا ليه انا ما عملتش حاجه
جابر / يا عم عارفين بس الدخله كانت وحشه استنى عليه يهدى هتلاقيه جاى يراضيك
عمران / انا زهقت على فكره انا ما خلفتهاش و نسيتها انا عمال اتغرز كل شويه فى موقف اسوء من اللى قبله و حاطت الجزمه فى بقي و ساكت عشان خاطر ظروفها بس انا تعبان يا جابر ... حد عبرنى
جابر / ما تسترجل ياله مالك عاوزنا نقعد نطبطب عليك و لا ايه ما فيش الكلام ده الدلع ده للحريم بس
عمران / بجد !! هو انى احس ان فى حد حاسس بيا دا دلع
جابر / كل اللى حواليك طالع عين اللى جابوهم و مع كدا الكل واقف و ما حدش عنده فرصه ينخ حتى عشان كلو مسند على كله ... روح اقعد اما اطهرلك الجرح و اشوف لو محتاج اعيد لك على الخياطه
عمران / تعال ... على الله ما تلتهبش فى الاخر
جابر / تحب تروح المستشفي
عمران / خلصنى يا عم
مختار يدخل
مختار / فاقت الحمد لله ما استحملتش منظر الدم ... ما طهرتلوش الجرح ليه يا جابر ... و انت يا ابنى واقف كدا ليه ما تنجز نفسك فرحان بنفسك كدا يعني و لا ايه حكايتك
جابر / شكله خد حبيبك قدوه
مختار / لا ما انا مش فايق تستلمنى كل خمس ثوانى ارحمنى
جابر / حقك عليا
مختار يقعد عمران و يقعد يمسح الدم من حوالين الجرح
جابر / عمران مضايق من المعامله اللى بيتعاملها
عمران / اسكت يا جابر
مختار/ تمام هيسكت اتكلم انت
عمران / مفيش
مختار / لا فى انت مش مظبوط و عصبى فى ايه
عمران / مفيش حاجه خلاص يابا
مختار/ لا شغل الحريم و لو مهتم كنت عرفت لوحدك ده انا شبعان منه دا الميزه الوحيده فى خلفه الدكوره انها ريحتنى من الهم ده انجز اتكلم ايه اللى مضايقك
عمران ساكت
مختار / مهره مضيقاك
عمران / طول الوقت بتتخانق معايا على كل حاجه و ترجع تروق ثوانى و ترجع تشوطنى تانى و انا مش عارف و مش قادر اتعامل معاها
مختار / تمام هتكلم معاها
عمران/ و ابقي انا كمان مش قادر استحملها يعني
مختار/ ما تتفلق فارق معاك فى ايه هتعدى حدودها معاك هنحطها فى مكانها تستحملها ليه جابت العشم ده منين يعني
عمران / يعني مش كفايا كل اللى شافته و صدمتها فى اهلها نقولها احنا كمان مش هنستحملك يعني ... لا طبعا ما ينفعش
جابر / امال انت عاوز ايه
عمران / مش عاوز حاجه و انا غلطان انى فكيت معاك بكلمتين اصلا
جابر / افندم!! بقيت انا الغلطان دلوقت
جابر يضرب كف على كف و مختار متابع بابتسامه و هو بيطهر الجرح و بيعقم ابره
مختار / احط لك بينج و لا هتستحمل
عمران / هستحمل
مختار / تمام
.......................
فى اوضه مهره
نجاه / انتى اللى ما بتكليش كويس و طول الوقت عياط فى عياط طبيعي ما تستحمليش اى حاجه لازم تاخدى بالك من نفسك شويه
مهره / انتى ما شوفتيش كلمنى ازاى
نجاه/ دا ايه علاقته دلوقت باى حاجه يا مهره الراجل واقف قدامك بينزف و انتى دودودودودودو اديله فرصه
مهره / هو انا يعني كنت بتغزل فى جمال عنيه دا انا كنت بحاول اساعده
نجاه/ ايوه بس هو اكيد محرج منك برده لازم تراعى ده
مهره / هو اللى محرج !!
نجاه / يا قلبي اهدى انتى بجد اجريسف جدا
مهره / دى انا !! معلش اصلي ماشيه احارب خلق الله و اطخطخهم
نجاه تبص لمهره
مهره / انا مالى بجد ... انا عمرى ما كنت كدا انا جوايا كميه غضب رهيبه و عياط مكتوم طابق على نفسي مش فاهمه ايه ده
نجاه / كويس انك اخدتى بالك
مهره / انا ما كنتش كدا ... حتى لما بحاول اعتزر ثوانى و برجع اتعصب تانى مش طايقه حد يكلمنى و لا يبص لى و لا عارفه اتكلم مع حد مخنوقه و مش طايقه حتى نفسي انا امتى بقيت كدا
نجاه / كتر الضغط يولد الانفجار و انتى الفتره اللى فاتت كانت صعبه عليكي و يمكن تكون هرمونات و لا حاجه وارد برده انتى فاهمه قصدى
مهره / مش عارفه يمكن انا فعلا الدنيا مش متظبطه عندى الفتره دى مش عارفه يمكن توتر يمكن الدوا اللى كنت باخده مش عارفه ربنا يصلح الحال
نجاه / تحبى نروح نكشف نطمن
مهره / ما تافوريش يعنى يومين و لا حاجه و تظبط ... قومى اطمنى على عمران شوفى كدا محتاجين حاجه
نجاه / الرجاله بره هيقوموا بالواجب مش واقفه عليا يعني لو عاوزين حاجه كانوا قالوا
الباب يخبط
صوت جابر / الاكل يا نجاه اجيب منابكوا و لا هتقدر تاكل معانا
نجاه / جايين ... قومى بقي و اهدى خالص ما تعمليش فيلم
مهره تهز راسها و تقوم مع نجاه
.........................
فى فيلا على
مروان بيتكلم فى التليفون رايح جاى فى الجنينه و هو متوتر
مروان/ و الواد ده كويس ... حاجته نضيفه و لا ايه انا ماعنديش فرصه اجرب ... طب و غلاوه امك تشوف لى حد نضيف ... لا ما تقلقش كاش و فلوسى حاضره ... مش هنساك يا عم بس انجزنى ... تمام ... لما ترتب و تظبطنى هظبطك ما تقلقش ... تمام ... سلام
ايلين تدخل الفيلا بالعربيه و هى متعصبه ترزع الباب و تعدى من جنب مروان ما تعبروش
مروان / اللهم اضرب الظالمين بالظالمين
تليفون مروان يرن يرد
مروان / ايه يا عمهم روحت و قولت عدولى
صاحبه / الراجل اتصل و عاوز يمضي معانا العقود على فيديو كليب النهرده و المفاجاه مش هتصدقها
مروان / ايوه بقي يا وش السعد قول
صاحبه / الفرقه كلها هتسافر بالى تصور الكليب هناك
مروان / و اشمعن بالى يعنى
صاحبه/ و احنا من امتى بنجادل المخرجين فى رؤيتهم الأخراجيه و بعدين ما تهزرش يا زميلى دا التوتال بادجيت عليهم دا غير ان هيبقي فى لايف كونسيرت هناك للجاليه العربيه
مروان / ما تهزرش
صاحبه / اقسم بالله انا راخر ما مصدق بس بيقولوا المنتج طار بينا و متفائل جدا
مروان / هنقابله امتى المنتج ده
صاحبه/ لا ما سالتش ممكن لما نروح نمضي العقود نلاقيه هناك المهم اجهز انت و عدى عليا نروح سوا
مروان / طب ما نتقابل هناك دا مشوارك لوحده علقه
صاحبه / يعني التوصيله دى خساره فى حبيبك بعد كل اللى عمله معاك ده
مروان/ مفيش حاجه خساره فيك النهرده تمام هغير و اعدى عليك
صاحبه / قشطه
مروان يقفل و يطلع يلاقي باب اوضه مامته مفتوح و ايلين بتعيط فى حضنها يتسنط
ايلين / انا يقولى الكلام ده ؟! انا سمعتى زى الزفت و الكل بيتكلم عنى ؟!
مروان يفتح الباب ايلين تصرخ فيه و تقوم تقفل الباب فى وشه
ايلين / انت مين سمحلك تدخل ما تطلع من حياتى بقي هى ناقصاك
ايلين تقفل الباب
مروان / اولعى
مروان يروح اوضته
.........................
فى الشركه
عباده واقف جنب دياب قدامهم خرايط و صور من القمر الصناعي 
دياب / كل الفيديوهات بتبدأ و تنتهى بالدخول و الخروج من واحد من البيوت اللى ملك الشركه الامريكيه البيوت دى فى ناس من اهل البلد او من براها ماجرينها و ساكنين فيها و كلهم ملفاتهم نضيفه ممكن خلافات بسيطه مع الجيران حوارات هبله ما تقدرش تقول كلمه مريبه على اى حد منهم
عباده / و دا احيانا فى حد ذاته مريب
دياب / لا مش شايف كدا هم مش مثالين و لا مفتعلين و علاقتهم بالناس طبيعيه جدا دا غير ان فى بيت من البيوت دى معمول بيت طلبه للشباب مفيهوش بنات نهائى و لا حتى عامله نظافه كلهم رجاله ما اعرفش ازاى دخلت البيت و اختفت جواه برده
عباده / ما يمكن العيال دول يعني... انت عارف الشيطان شاطر و دول برده عيال
دياب/ اتصلت بالمدير و اتكلمت معاه و قدرت أقنعه اننا نجدد شبكه كاميرات المراقبة اللى فى الدار و هو ما اعترضش نهائى و فعلا بعت فنيين من عندنا صينوا الكاميرات كلها و جابولى فى السر نسخه من كل التسجيلات القديمه و قاعدين بيفرزوها دلوقت
عباده / مجهود جبار بصراحه
دياب/ الناس هنا ما بتنامش حتى الشباب الجداد اللى تحت التدريب طالع عين ابوهم بس مفيش فى ايدينا اى حاجه ... ابيض
عباده/ قلبي حاسس اننا ماشيين صح
دياب / طب هم عاوزين ايه بالظبط بيحوموا حوالين مخازن السلاح بيدوروا علي ايه البدله ما هى فى عربيه عمى مغاورى من ساعتها ما حدش قرب منها و اعتقد ان جوزيف يقدر يحدد مكانها بدقه من موبايله و اللى متاكد منه ان اللى هجم على الجبل برده قدر يحدد مكان البدله بمنتهى الدقه برده يعني هم مش عاوزين البدله... و السايبورج نفس الكلام و محطوط فى مخزن الكراكيب يعني لو عاوز تمد ايدك و تاخده هتاخده
عباده/ يمكن الخطه لسه بتترسم و بيجمعوا داتا
دياب / ابلعها لو الكلام ده مرسوم من عيال فى ثانوى انما احنا بنتعامل مع ناس مدربه على أعلى مستوى و عندهم تكنولوجيا مش عندنا و عارفين و دارسين اماكن الكاميرات كويس و عشان كدا بيعرفوا يفلتوا منها وقت ما بيحبوا ايه المبرر فى الدنيا انهم يخلونا نشوفهم و هم بيحوموا و باكد عليها  .. هم بيظهروا فى الكاميرات لسبب
عباده / بيقولوا لنا انهم جوه 
دياب / تؤ فى سبب تانى
عباده/ يمكن بيشتتونا عن حاجه تانيه بتحصل فى حته تانيه لعبه بص العصفوره
دياب / ممكن بس الموضوع ما لوش اى دخل بالمخازن و لا اللى فيها
عباده/ عملت لى ايه فى سيستم المستشفي
دياب/ مفيهوش غلطه كشفت عليه اكتر من مره
عباده/ طب و اللى حصل مع نجاه بقولك خلانى اوصلهاله بنفسي اوضه الاشعه
دياب / اقسم بالله ما فى ثغره واحده من السيستم و لو عاوز تجيب حد تانى يتأكد لك هات بس فعلا الموضوع مش موضوع هاكينج
عباده / حلو اوى اهى دى نقطه حلوه ايه هو بقي الموضوع ؟ عملها ازاى؟
دياب / ممكن يكون معاه اكسيس من حد من التمريض او الدكاتره
عباده / و دى فى حد ذاتها مصيبه اكبر من الهاكينج... ما شاء الله ... حقيقي انا مش عارف اقول ايه و لا اعمل ايه ... متحاط من كل حته مزنوق فى حيطه و نازلين فيا سلخ
عباده يبص لدياب متابعه و ساكت
عباده / بعد كل اللى انت شايفه ده لسه عاوزه تبقي الكبير برده
دياب / ربنا يديكوا الصحه و طوله العمر بس احنا اتربينا على حاجه واحده ... ما ننخش  ... مفيش مشكله نريح شويه لما الشيله تتقل مش عيب نطلب المساعده... بس عمرنا ما ننخ ابدا
عباده يتنهد و هو بيهز راسه و يطبطب على كتف دياب و يمشي و دياب متابعه بحزن
....................
قدام شركه الإنتاج
مروان و صاحبه خارجين من الشركه و مروان مضايق و صاحبه بيجرى وراه
صاحبه / ايه يا عم مالك غلط فى ايه الراجل
مروان / هو ايه اللى تحليل قبل السفر هو فاكر نفسه أيه
صاحبه / و فيها ايه اصلا انت مش كدا كدا مبطل
مروان / متزفت بس برده يا اخى دى اهانه
صاحبه/ و لا اهانه و لا زفت دا مجرد إجراء روتيني مش اكتر حته ورقه لا راحت و لا جت
مروان/ و بعدين اشمعن بالى يعني اللى مصمم اوى اننا نصور فيها فيها ايه زياده عن المالديفز و لا هاواي و لا سهل حشيش و العلمين حتى اشمعن دى
صاحبه / يا عم هو اكل و لا بحلقه ما تكبر مخك و تخليك ذكى اربط الحمار مطرح ما يعوذ صاحبه 
مروان يفكر
صاحبه / انا هروح اعمل التحليل و انت براحتك كدا كدا قدامك اسبوع تجهز ورقك فبراحتك بقي انا كدا كدا مسافر
مروان يهز راسه صاحبه يمشي مروان يروح يركب العربيه و يتصل بحد و هو بيسوق
…………………….
فى اوضه نجاه
الباب يخبط نجاه تلبس الاسدال و تروح تفتح تلاقي جابر
جابر / فاضيه نتكلم شويه
نجاه تطلع و تقفل الباب وراها
نجاه / اكيد خير
جابر يطلع صور من موبايله لمروان و هو بيستلم مخدرات و بيدفع فلوس للديلر
نجاه/ دا... طب و مستنى ايه حطها فى عين ابوه بسرعه
جابر يهز راسه لا الابتسامه تروح من وش نجاه
جابر / دا عقاب خفيف اوى عليه اديني كام يوم بس و انا هخليه يدفع تمن اللى عمله اوى
نجاه / هتعمل ايه
جابر يبتسم
.........................
فى شقه جوزيف
جوزيف بيتابع كاميرات لاكرم و بناته و على و ايلين و مروان امايا تدخل
امايا / انت بقيت غريب جدا مين دول اصلا عشان تقعد بالساعات قدامهم كدا
جوزيف / الواد جابر ده ما طلعش خفيف زى ما كنت فاكر
امايا / دا خليفه عباده انت بتقول ايه ؟!!
جوزيف / جابر بيلعب لعبه من وراهم ما حدش فيهم عنده علم بيها
امايا / بيخطط للعبه دى من موبايله و لا من موبايل تانى ؟ اصل على قد علمى الكل متوصل بسيرفر واحد و اى حركه واحد بيعملها بيوصل بيها تقرير للكبير بيه افندى
جوزيف يضحك
امايا / طب انا مش فاهمه فهمنى
جوزيف / فى شركه إنتاج فاشله اتعاقدت مع الواد الاهبل اخو مهره الشركه دى كانت حرفيا على حافه الافلاس و الفتره اللى فاتت كانوا شغالين على ولاد الاغنيه و المشاهير اللى عاوزين ينتجوا بفلوسهم ياخدوا منهم الفلوس و يعملوا شغل فاشل زيهم و يضربوا على الفلوس و الكليب يفشل و خناقات و اواضي و كدا
امايا / و مروان هو انسب واحد ينصبوا عليه
جوزيف / و دا اللى خلانى اشك و افضل طول الليل بدور وراهم ... منين وضعكوا المالى زى الزفت و منين انتوا اللى بتنتجوا و بتتحملوا كامل النفقات مع مروان ... المهم لقيت ان واصل ليهم تحويل بنكي من شركه مقاولات كبيره بره مصر الشركه التانيه دى لما دورت وراها لقيت واحد من التحويلات الاخيره اللى وصلالها جاى من حساب مين ؟
امايا / جابر ؟!
جوزيف/ اذكى اخواتك احبك و انتى مصحصحه معايا
امايا / برده نفس الكلام مين قال ان جابر عامل ده من وراهم ما اكيد عارفين انه عمل التحويل و اكيد عارفين عمله له
جوزيف / الكبير عنده حسابات سريه بره مصر تبع شركات يملكها من الباطن بيستخدمها لما بيكون عاوز يحول فلوس أو يشترى حاجه ما بيحولش اى فلوس من حسابه دايركت يعني ... جابر حول الفلوس من حسابه دايركت
امايا / لان الحوار ما فيهوش اى خطوره او اى حاجه غير قانونيه هيخبى اسمه ليه
جوزيف / و يحول من حسابه ليه
امايا / انت بتحاول تقول ايه
جوزيف / بقول انه بيراضي القمر
امايا / مهره !! و ماله هو بمهره
جوزيف / لا توهتى منى ليه ... نجاه يا بيبي نجاه 
امايا / مش عارفه اركب العلاقه بس ما علينا ... انت ليه مصر برده انه بيعمل ده من وراهم ... ماشي خليني امشي معاك على السيناريو اللى فى خيالك هو بيعمل ده عشان يتفرد قدام نجاه قولى انت بقي فين المشكله  ..  ما ده اللى هم عاوزينه و هيساعدوه فيه عادى
جوزيف / كلام منطقى
امايا / شكرا ... المهم دلوقت هتبوظ له خطته و لا هتسيبه يكمل
جوزيف / هى ايه خطته اصلا
امايا / هى ايه خطتك انت اصلا ... انت من امتى بتقعد لا شغله و لا مشغله كدا
جوزيف / مين قال انى ما بعملش حاجه
امايا / لا انا مش زيك مش هقعد اضيع من عمرى خمس سنين فى خمس سنين برتب فى فرصه و اول ما تيجي هرميها فى الزباله ... لتكون عجبتك شخصيه يونس و نسيت انك جوزيف
جوزيف يبتسم
امايا / انا خايفه عليك من السكه دى ... نجاه مش شيفاك ليه مكمل
جوزيف / فى ايه ؟
امايا / انت عارف انت بتعمل ايه انت فاكرنى هبله ... انت عارف انك مكمل
جوزيف / فين المشكله
امايا / ما اعرفش قولى انت هصحى الصبح الاقيك لابس الجلابية و الطاقيه و ماسك ليا السبحه كمان
جوزيف / تفتكرى شكلى هيبقي ايه فى اللبس ده ؟!
امايا / دا انت مستفز
جوزيف / بس اتحب
امايا / يعني... مش اوى
جوزيف يضحك امايا تضحك
........................
فى البلد
محمود يفتح باب شقته و يدخل و قبل ما يقفل الباب واحد من الغفر يمسك الباب محمود يبص
الغفير / حمد الله على السلامه نورت دارك الكبير مستنيك
محمود / على راسي بس انا راجع بتراب السفر هتشطف و اغير و اجى وراك على طول
الغفير / مستنيك فى العربيه بره
محمود يهز راسه و هو مبتسم الغفير يمشي محمود يقفل الباب و يطلع الموبايل و يتصل
محمود / زى ما قولتلك ما استناش حتى ادخل البيت و بعت لى .... يعني ايه التزم بالتعليمات و مش هيحصل حاجه افرضي حصل... ايوه يعني لو حصل حاجه هتلحقيني انتى ساعتها ؟!! ... ما طبعا لازم ابقي واثق فيكي ما انا موحول فى ليله انا مش قدها و بطولى اهو و انتى و لا على بالك ... يا ستى عرفت انى اللى بدئتها بس انتى دوستى جامد و خدتى الكل فى وشك ... خلاص خلاص خلاص هلتزم بس تعملى حسابك انى لو جرالى حاجه ... الو الو ... يا بنت الكلب يا واطيه ... ادى اخره اللى يمشي ورا الحريم
الباب يخبط
محمود / هو انا لحقت
محمود يفتح يلاقي عويس
محمود / اهلا خير اؤمر
عويس / انت جايب الجبروت دا منين يا جدع انت
محمود / من البقال اللى على الناصيه روح اللحق هاتلك حبه
عويس / امك حراميه العيال فين يا محمود
محمود / اتكلم عن امى عدل يا جدع انت انا راجع تعبان و طالع عين اهلى ما تخلينيش اقل منك
عويس / تقل من مين يا ابن الكلب انت
محمود يشد طقطوقه و يخبط عويس على دماغه تجيب دم و يمسكوا فى بعض و الجيران و الناس يدخلوا يفكوا بينهم فى شقه محمود
……………………..
فى القسم
احمد يخبط على المكتب
احمد / باااااااس مش تكيه هنا مش عاوز صوت واحد واحد يتكلم
عويس / فتح دماغى يا بيه انا عاوز حقى يا حكومه
محمود / جاى يتهجم عليا فى بيتى و عاوزنى اسكت له دا ايه الجبروت دا يا جدع
عويس / كنت بسألك عن امك
محمود / و انت مالك و مال امى يا عديم النخوه يا
احمد يخبط على المكتب
احمد/ باااس انتوا هتضربوا بعض قدامى و لا ايه ... يا صول جمال اسحبلى الاتنين دول على الحجز لحد ما اروق لهم
عباده يدخل احمد يتفاجئ
عباده/ مفيش داعى يا باشا هيتراضوا
احمد / ايه الدخله دى يا عباده بيه ما يصحش كدا مش تكيه هى
عباده/ ما عاذ الله بس دول اهل و نسايب و ما يصحش المواضيع توسع بينهم
عويس / فتح لى دماغى يا كبير عاوز حقى يا كبيرنا
عباده يبص لعويس و يبرق له عويس يبص فى الارض 
عباده / حقك عليا انا ما تكبرش المواضيع بوس على رأس اخوك و نتعاتب فى البيت
عويس / يا كبير
عباده يبص لعويس عويس يبص فى الارض بغيظ و يروح يبوس راس محمود محمود يزقه
عباده / الله
محمود/ دا جاب فى سيره امى يا كبير اعديهاله ازاى
عباده / هى وصلت للأم لا كدا اسحبهم على الحجز يا صول جمال
جمال يبص لأحمد احمد يهز راسه جمال يسحبهم على الحبس عباده يطلع موبايله و يرن على حد و هو بيتكلم
عباده / خليك شاهد يا باشا انا جيت لحد عندهم عشان اوفق الدنيا على بعضها و هم اللى رفضوا الصلح
احمد / مش كل الناس بتيجي بالعقل يا عباده بيه
عباده / تسمح لى اقعد
احمد / طبعا طبعا اتفضل
عباده يقعد و يحط الموبايل فى جيبه
عباده / الواحد شكله كبر و هيبته راحت
احمد / لا سمح الله دا كلام برده
عباده / انت اصلك جديد ما تعرفش الدنيا هنا بتمشي ازاى
فجاه صوت خناقه كبيره و رجاله يدخلوا ماسكين فى بعض عباده هادى و مبتسم ما بيتحركش و احمد يقوم يحوش مع العساكر دقيقه و يرجع و هو بيعدل هدومه و متعصب
احمد / الناس دى بتضرب ايه مش ممكن
عباده / ارميهم فى الحجز يا باشا خمس دقايق بالكتير و هتلاقيهم خارجين واخدين بعض بالبوس و الاحضان
احمد / يا سلام امال كان ايه لزمته من الاول
عباده / طيش شباب بعيد عنك ما علينا خلينا فى موضوعنا عشان ما اطولش عليك و انت الله يعينك على اشغالك
احمد/ تحت امرك اؤمرنى
عباده/ بصراحه فى ناس كتير اشتكوا ان فى اغراب كتير رايحين جايين فى البلد .. مش قصدى سياح و لا اجانب انا اقصد خلق غريبه تصرفات غريبه ناس بتتسحب فى عز الليل بيطلعوا البيوت و حضرتك عارف الناس بتخاف على عيالها و حاجتها فاللى بيشوف حاجه بيبلغ الغفر و الغفر بيبلغونى و انا بدورى ببلغ جنابك
احمد/ فاهم طبعا بس الناس دى لازم تيجي تبلغنى بنفسها عشان اقدر اخد اقوالهم و اعرف مواصفات الناس الغريبه دى و افرغ الكاميرات اللى حوالين المنطقه و ابدا شغل بس على العموم ما يكونش عندك فكر ابدا انا هشتغل على الموضوع و اعمل تحرياتى و اى جديد هطمن حضرتك
عباده / انا مستبشر فيك خير
احمد / ربنا يبارك فى حضرتك دا واجبى
عباده / بالمناسبه ايه رايك لو فاضي النهرده تنورنا فى السرايا تاكل معانا لقمه هنيه انا عارف انك عازب و عايش بطولك و اكيد نفسك بتهفك على لقمه حلوه تكون نضيفه و بيتي
احمد / دا يسعدني طبعا و يشرفني
عباده / تمام هستناك باذن الله و مش هعطلك اكتر من كدا
عباده يقوم يسلم على احمد و يمشي جمال يدخل
جمال / اللحق يا احمد باشا الرجاله مقطعين بعض فى الزنزانة
احمد / هى حصلت !!
..................
فى شقه مهره
مهره تروح تخبط على اوضه عمران و هى شايله صينيه عليها شاى و ساندوتشات
عمران / ادخل
مهره تفتح الباب و تدخل عمران يتنفض يقوم يقف و يساعدها تحط الصينيه على ترابيزه
مهره / لقيت نور الاوضه قايد قولت اكيد بتذاكر عملت لك حاجه خفيفه كدا تبقي جنبك عشان تعرف تركز
عمران / تسلمى تعبتى نفسك
مهره / انت كويس ؟! احسن دلوقت ؟!
عمران / اه احسن كتير الحمد لله تسلمى
مهره / تمام اسيبك بقي تكمل اللى كنت بتعمله و لو احتجت حاجه نادى عليا انا صاحيه عن اذنك
عمران يبتسم مهره تلف عشان تمشي تدوخ و تسند على الباب عمران يسندها و يقعدها على أقرب كرسي
مهره/ هو فى ايه
عمران / انتى كويسه ؟! مالك ؟! انتى ما اكلتيش برده
مهره / لا اكلت و اكلت كويس و الله بس مش فاهمه فجاه كدا الدنيا بتروح منى
عمران / طب ادخلى ارتاحى و بأذن الله بكره نروح نعمل شيك اب و نطمن عليكي عشان كدا كتير
مهره تهز راسها موافقه
مهره / انا اصلا اول مره يحصلى كدا انا عمرى ما دوخت
عمران / هتطلع حاجه بسيطه باذن الله ما تقلقيش
مهره تبص لعمران و تهز راسها
عمران / تمام انا واقف هنا جنبك لحد ما تقومى تدخلى اوضتك و لو مش جايلك نوم اقعدى فى السرير ذاكرى لحد ما تروحى فى النوم
مهره / هحاول... كل ما باجى اعملك حاجه بلخمك بيا و حاجه فى منتهى الله يعينك بصراحه
عمران / لا ما تقلقيش انتى بس المهم انك تبقي بخير و بعدين كتر خيرك برده افتكرتينى
مهره و عمران يبصوا لعمران و يبتسموا مختار يفتح باب اوضته
مختار/ هو فى حاجه و لا ايه ؟!  ايه اللى مصحيكوا دلوقت ؟!
.........................