الكبيره ٢ بقلم / لولو_محمد

الحلقه ٥٥

((((((( الكبيره ٢ ))))))))
#لولو_محمد
الحلقه ٥٥
مختار / انت وراك سفر روح و ارتاح عشان تركب طريقك و انت فايق و مرتاح يا همام
همام/ انا عارف انه ما يخصنيش بس الجواز ده
مختار/ يا ابنى عارف هتقول ايه و عمران عارف هو احنا لسه داخلين الاسلام اول امبارح ما اكيد فاهمين انه مش شرعى و انه نصبه ايوه عارف الدنيا بس تهدى و البت تخف و تقف على رجلها و هو هيروح يطلقها على الورق زى ما اتجوزها على الورق
همام / طب يونس موقفه ايه
مختار / انا طلبت منه يستنى عشان عاوز اتكلم معاه تقدر انت تروح
همام / طب ما انا عاوز اعرف برده الدنيا هترسي علي ايه
مختار / استنى يا همام ... هو الجدع ده اتأخر كدا ليه و الله شكلى هتغابى النهرده
عمران يطلع من جوه فى ايده موبايل
عمران / محامين على الكلب عملوا المحضر برده و مطلوب القبض عليا و البوليس سال عنى عند عم فاروق
مختار / و هم عرفوا انك عند فاروق منين
.........................
عمران / يمكن عشان دا كان العنوان اللى كنت مسجله فى ورق الكليه باين
مختار / مش مهم هنرجع دلوقت البلد و ربنا يفرجها هناك كدا كدا القصه ما انتهتش هنا
عمران / مش اولى اروح اسلم نفسي
مختار / لا مش اولى و اهدى كدا و انا باذن الله هحلها
عمران / تمام
نجاه تطلع من الاوضه
نجاه / اتاخروا اوى
همام / راجع اهو
الكل يبص يلاقوا الموظف راجع
الموظف / الدكتور بيقول انها لسه واخده حقنه منومه
مختار / انت مش مستعنيني صح عاوز تجيب آخرى مش كدا ؟  و انا مش هزعلك
الموظف / يا فندم انا بس بشرح لحضرتك الحاله اللى هى هتطلع بيها انما هى بس هتغير لبس المستشفي و تلبس لبسها و استلمها
مختار / يا عم بكام يعني زفت المستشفي ده
جوزيف يتنهد و يروح ياخد الموظف تحت باطه بعيد و يوشوشه فجاه الراجل يطلع يجرى على جوه تانى جوزيف يرجع لمختار و يعديه و هو بيرمى كلام
جوزيف / عندك طاقه تحرق جاز بالهبل
مختار / ماشي يا مخلص
جوزيف يلف و يغمزله مختار يضحك ترولى يدخل و مهره نايمه عليه بيزقه اتنين تمرجيه و الموظف ماشي وراه
الموظف / يا باشا قولتلك دقيقتين بس الموضوع مش مستاهل و لا حاجه
نجاه تمسك ايد مهره و تمشي معاها لحد الاسعاف تركب معاها و الكل يركب عربيته و يتحركوا جوزيف يتمشي بعيد لوحده مختار يكلكس
مختار / ما ركبتش ليه يا مخلص
جوزيف / ايه عاوز خدمه تانيه و لا ايه
مختار / اركب تعال
جوزيف يروح يركب
مختار / ما روحتش مع همام ليه
جوزيف / همام عاوز يروح لابنه بس فضوله انه يفهم اللى بيحصل مانعه
مختار / و هو ايه اللى بيحصل يا يونس
جوزيف / مين البت دى و ليه مهمه بالنسبالكوا اوى كدا
مختار / بنت ناس الدنيا جارت عليها
جوزيف / بس هى كدا رسمي مرات ابنك لو مات
مختار/ يا جدع ما تفولش على الواد دا لسه صغير و بعدين كنوز الدنيا يا يونس ما تساويش حس ضناك فى الدنيا
جوزيف / بخصوص المحضر انا اقدر احلهولك و اجبر على يتنازل
مختار / هيتنازل ما تقلقش
جوزيف / حبالكوا طويله انا اسرع منك
مختار / تفتكر هيعمل ايه لما القسيمه توصله
جوزيف / انا مش فايق لقصص العالم التافهه دى المجلس بعت فريق تانى غيرى
مختار/ امايا وصلنا سلامها
جوزيف / دى مش امايا دى بس ... بتمسي ... امايا اجمد من كدا امايا عايشه فى روسيا من ساعه ما مشيت من عندكوا ما بتعملش غير حاجتين ... بتتمرن و تكون جيش
مختار / كلهم مزز كدا ... استغفر الله العظيم
جوزيف يضحك
جوزيف / لا مش كلهم
مختار / طيب يبقي محلوله ان شاء الله
جوزيف / ماشي
مختار / شكرا على فكره
جوزيف / العفو
مختار / انا بشكرك على انك ما رجعتش للى كنت فيه انما حوار مهره ليه تمن تانى انت تحدده
جوزيف / ما عملتوش عشانك انا بس كنت مستني سبب عشان اتحرك
مختار / انت ليه مصمم تحشرها فى الكلام
جوزيف / لأنها الموضوع يا ميخا
مختار / ياله ما بحبش الاسم ده انا مش فاهم انتوا ايه تناحه جيل ورا جيل ... ميخا قال ..  بقي ده ميخا ده
جوزيف يضحك و يبص من الشباك
جوزيف / هو انت ناوى تسبني على الطريق فى حته مقطوعه و لا ناوى تاخدنى معاك البلد
مختار / ناوى اديك حياه بره المطبخ
جوزيف يضحك بصوت عالى
مختار / مع انى هموت و اجرب اكلك همام بيقول فيه شعر
جوزيف / و تموت ليه يا عم ديتها ايه يعني عنينا ندوقك
مختار / ما اتحرمش
جوزيف / بخصوص الموضوع
مختار/ بقولك ايه الطريق طويل و انا مرهق لو قادر ايه رايك تسوق انت و انا اغفل شويه و فى نص السكه كدا نبدل انا و انت
جوزيف / اركن فى اى جنب خلينا نبدل
مختار يبتسم و يركن ينزل هو و جو و يبدلوا جو يسوق و وراه عربيه جابر و جنبه فارس و ورا عمران و كارم
فارس / هو راجع معانا البلد و لا ايه
كارم / انا هموت و أعرف عمل كل ده ازاى ... وله هو انت كدا البت دى بقت مراتك و لا نظامها ايه
عمران / ابوس رجل برائتك دى مش وقتك
فارس / انا مش فاهم ابوك بصراحه ازاى يورطك التوريطه دى و انت ازاى تطاوعه
عمران / الطريق طويل يا فارس فوفر طاقتك
فارس / يا عم لو على ابوها الاهبل ما تقلقش احنا مسيطرين
عمران / يعني اشوفلى عربيه تانيه اركبها
كارم / خلاص يا جدعان اهدى يا ابنى اسكت يا عم ... بس الموضوع ده هيجننى برده الواد ده يقدر يجوز و يطلق و يموت ناس و يخلق مواليد ... على الورق اقصد ... يعني بشويه تكتكه الاقى نفسي متجوز و عندى ولدين مثلا و انا اساسا ما شمتش للحريم ريحه
فارس / يا عم مش سالك بقولك
عمران / امال انتوا فاكرينه بيدخل و يتحرك من بلد لبلد ازاى
كارم / طب و الحكومه ايه وضعها طيب عارفه بالكلام ده و لا نعمل ايه احنا
فارس / روح بلغ يا اذكى اخواتك أياكش يقبضوا عليك انت و ينقطونا بسكاتك
كارم / و انا مالى يا عم انا ما ليش فى الكومبيوتر اصلا
فارس / و انت ايه رايك يا جابر فى كل اللى بيحصل
جابر / ما ليش راى
عمران / انت فى حاجه مضيقاك
جابر / لا مافيش
كارم / دا باينه هيبقي طريق طوييييييل قوووي
عمران يبص لكارم و يتنهد و يبص من الشباك
.......................
فى الشركه عند على
على بيزعق فى التليفون
على / مرات مين يا حيوان يا متخلف دا انا هخرب بيتكوا دا انا هوريكوا النجوم فى عز الضهر دا انا ... الو الو ... اه يا ولاد ال
الباب يتفتح و اكرم يدخل و السكرتيرة بتحاول تمنعه
السكرتيرة/ يا فندم يا فندم
على / سبيه ... تعال يا اكرم شوفت المصيبه يا بيه ايه الكلام ده .. عمران و مهره متجوزين من سنه ... من سنه يا اكرم بيه من سنه و هى فى بيتك يا اكرم بيه
اكرم/ القسيمه دى مزوره مستحيل تكون حقيقيه دى ما كانتش بتديله وش أصلا
على / بتشتغلك يا باشا الهانم مقرطسانا كلنا بس انا مش هسكت انا هخرب بيتهم انا هوديهم فى ستين داهيه  هم و البهايم اللى شغالين فى المخروبه اللى انت قولتلى عليها 
اكرم / يا على انت لازم تتحرك بقولك القسيمه مزوره و الناس دى خطفت بنتك مهره مش متجوزه الواد ده
على / اتحرك اعمل ايه هو كل مصيبه تحصل تقولوا اللحق يا على اتصرف يا على كنتوا فين وقت الهبل ده ما حصل امها الهانم بتاعه التليفزيون و المرأه كانت فين و بنتها بتتجوز و ياريته عرفى دا شرعى و بماذون و متسجل كمان
اكرم/ بقولك مزوره بقولك ما حصلش مستحيل ما حصلش
على / انا تعبت و قرفت و اقسم بالله لولا اللى الكلب ده عمله انا كانت رفعت ايدى خالص بس لا عند بعند بقي الواد ده لازم يتمسح بيه الارض
اكرم / و انا معاك قولى بتفكر فى ايه و ازاى اقدر اساعدك
...........................
فى استراحه على الطريق
نجاه واقفه جنب عربيه الاسعاف فى ايدها كبايه قهوه و الحزن ماليها مختار يروح لها
مختار / تحبى تركبى مع اخواتك ؟
نجاه / انا قلبي واجعنى عليها اوى
مختار / هتبقي زى الفل باذن الله ما تقلقيش هنشيلها فى عنينا
نجاه / الطريق طويل عليها يا عمى و هتتبهدل
مختار / هو انا كنت مرتب لكل ده يعني ما على يدك دى فرجت من عند ربنا انا فى حياتى ما شوفتش كدا
نجاه تشوف جوزيف خارج من الحمام يبصلها و يدخل الماركت
نجاه / هو ليه رجع
مختار / مضايقه من وجوده و لا خايفه يمسكوا فى بعض
نجاه / انا مش فايقه لحد
مختار / طب للامانه جابر ما شافش رسالتك و لما شافها جالك و انا منعته يطلعلك عشان حوار ال... خلوه و الكلام اللى احنا مش محترمينه دلوقت ده خالص
مختار يضحك
نجاه / و اخرتها
مختار/ نعم !!
نجاه / اخرتها يا عمى ..  فين الصح ... انا حرفيا كل حاجه كل حاجه اتربيت عليها ... ما عدتش عارفه هى صح و لا غلط... تصرفاتنا حياتنا... احنا عايشين فى بيت كبييييييير جدا و بنمشيه على ضوابط شرعيه ... احنا كدا فعلا ؟!
مختار / على قد ما بنقدر
نجاه / ما ينفعش حد يقولى سر و اطلع السر بره صح ؟
مختار يبص على العربيه
مختار / اللى له نصيب فى حاجه هيشوفها
نجاه / و فلوس تجاره السلاح
مختار  / كنت فاكر انك
نجاه / مش يمكن حرام ... و دخلت برده فى الشبهات ... و يمكن دى السبب فى كل اللى بنعيشه
مختار / و ايه السبب فى كل اللى عاشته مهره ؟ ايه السبب ؟ الابتلاء مش لازم يكون عقاب مش شرط ممكن يكون اختبار للصبر
نجاه / انا بفكر بس
مختار / و ماله نفكر سوا امال احنا موجودين ليه ما عشانكوا عشان نوجهكوا و نساعدكوا و توجهونا و تساعدونا احنا برده مش ملايكه و لا بينزل علينا وحي احنا بشر ممكن نغلط عادى جدا
نجاه / طب انا اعمل ايه انا مخنوقه جدا بجد و الله مش قادره
مختار / كل المطلوب منك دلوقت تهدى و تفكرى مش هتخسرى حاجه
نجاه / انا مش عاوزه اعمل حاجه تغضب ربنا
مختار/ يعني امشي ؟
نجاه تبصله و عنيها كلها دموع تتنهد
نجاه / انا مش عارفه حاجه ... حضرتك بالنسبالى زى بابا بالظبط و جابر زى كارم و فارس
مختار / اجلدى بالراحه يا بت
نجاه / ما دى مشكلتك على فكره واخد الدنيا هزار و لا كانها والعه حواليك
مختار / دا انا !! انتى بنت ابوكى على حق تعرفى ابوكى قدك كدا كان غبى زيك بالظبط كان فاكر ان عنده اللى مش عندى و همه مش همى و لما سبتله الشيله انتى ادره بقي ... انتى زيه بالظبط فاكره ان عشان قادر اضحك و اهزر انى ... صحيح و انا هبرر لعيله زيك ليه ... انتى فاكره ان البت دى مش فارقه معايا ... انا مشكلتي  الكبيره ان الكل فارق معايا شوفتى هم اكتر من كدا هم الكل فارق معايا ... تصدقى ان حتى امايا فارقه معايا يونس انتى مهره حتى البت اللى لسه ما اعرفهاش اصلا اللى ابنى عاوز يخطبها نور دى فارقه معايا و شايل همها من دلوقت جابر و انتى و اخواتك و شاكر اللى مقاطعنى و ما بيدخلش البيت غير كل فين و فين بسببي فارق معايا صابر و عيله الجزار نفر نفر دا حتى البت تيا و اولاد منصور و دياب المحرومين من ابوهم اللى معظم الوقت فى الشغل معانا فارقين معايا بس انا لو اتعصرت مش هقدم اكتر من اللى بقدمه ... تسمعى عن قهر الرجال تقدرى انتى عليه ... بصي فى عنين اللى حواليكي كدا و انتى تعرفى معناه الحقيقي بصي في عين ابوكى و شوفى همه و حمله انا لو ما ضحكتش حتى لو على خيبتي هطب ساكت
نجاه / بعد الشر عنك
مختار يتنهد
مختار / اضحكي يا نجاه و فكيها و سبيها على الله ... انتى مش لوحدك احنا جنبك ... و معاكى فى اى قرار هتاخديه ... اهدى كدا و فكرى مع نفسك بالراحه
نجاه / هو شاكر مقاطعك !!!
مختار / انا جيت عليه جامد ... لمصلحته ... و هو فاهم بس ... البنيادم مننا حسيس برده
نجاه / طب ما تراضيه
مختار / كدا اريح
نجاه / دا ابنك اريح ازاى
مختار / روحى شوفى اخوكى فين يدخل معاكى الحمام خلينا نمشي الطريق لسه طويل انجزى و انتى رغايه كدا شوفى هتسترجلى قد ما تسترجلى لت الحريم ده ما فيش منه مهرب
نجاه تبتسم مختار يمسح دمعه فى عينه
نجاه / انا بحبك على فكره
مختار / اسف مرتبط
نجاه / يا سلام !!!
مختار يبصلها و يبتسم
مختار / اخلصى بقي يلا خلينا نمشي
نجاه تمشي تروح ناحيه الماركت و تدخل تشاور لفارس يروح معاها و فى جنب جوزيف و كارم قاعدين على ترابيزه بيتكلموا
كارم / يعني انت تقدر تلعب فى اى ورق حكومى كدا عادى
جوزيف / الحاجات دى للطوارئ بس عشان كتر اللعب بيفضح الثغرات
كارم / بس تقدر
جوزيف / ايوه اقدر
كارم / تقدر تعملى شهاده ميلاد لابنى و تسميه  .. فتحى
جوزيف / اشمعن فتحى
كارم / محمود ماشي ؟
جوزيف يبتسم و يحط ايده على كتف كارم
جوزيف/ انت اكتر واحد وحشني فى العيله دى
كارم / عشت تقدر ؟
جوزيف / اقدر تحب اسم امه ايه و لا انقيلك حاجه عنب على زوقى
كارم / و انتوا بقي بتدخلوا و تخرجوا و تعيشوا فى البلد بورق رسمي بالطريقه دى
جوزيف / فى العالم كله مش مصر بس
كارم / طب و الحكايه دى ما تتفقسش ابدا
جوزيف / انت عارف انا بجيب فلوس منين
كارم / من المجلس
جوزيف يضحك
جوزيف / الكره الارضيه عليها كام مليار نسمه
كارم / مش عارف بس حبه حلوين ما شاء الله
جوزيف / لو انا اخدت من حساب كل واحد فيهم جزء من السنت حد هيحس بحاجه السيستم نفسه هيحس بحاجه
كارم / بس هيجمع معاك مبلغ فى الاخر
جوزيف / ما انت قريتها اهو
كارم / بس خليني اقولك انها سرقه برضه حتى لو مبلغ بسيط سرقه
جوزيف يبتسم
كارم / طب بخصوص الميكروروبت همام كان بيكلمنى و كدا و كنت عاوز اسأل برده
جوزيف / يادى الهباب اللى لحس عقلكوا
كارم / ما الحاجات دى بتبقي حساسه اوى يا يونس دى اعراض ناس
جوزيف / اقولك حاجه
كارم / قول
جوزيف / انت عارف انك ما ينفعش تسلم عدوك ايدك اللى بتوجعك صح... انتوا بقي ايديكوا و رجليكوا و ضهركوا و عضمكوا كلهم واجعينكوا ايه رايك بقي ... يا ابنى خليك عادى كدا
كارم / ايه اللى عادى واحد فى وضع ما يعلم بيه الا ربنا يلاقي كاميرات و حركات لا يا عم دا الواحد مش هيعرف يستحمى بعد كدا
جوزيف يضحك جابر يبص بطرف عينه و يطلع بره
كارم / يا ابنى انا مش زيك انت خواجه
جوزيف / انا بجح عشان كدا ما ليش ايد بتوجعنى انا ممكن امشي ملط فى الشارع و اللى مكسوف يخبى عنيه
كارم / ما تزعلش منى ... بس البهايم بس هى اللى بتمشي ملط و لا مؤاخذه
جوزيف / و مالها البهايم  .. ما حدش مهتم يصورها و لا يبتزها على الاقل عشان هى طول الوقت اصلا عريانه
كارم / لااااا بس نفسها عزيزه ما بتحبش حد يشوفها و هى يعني مش عاوز افسر انت فاهم و بتضايق و بتتاثر انت فاكر ايه دا حتى البهايم يا جدع ليها خصوصيه
جوزيف / يا عم هو انت شايفني ملط انا بقولك ما تسمحش لحد انه يحس بخوفك الاوفر ده
كارم / مش اوفر منطقى انا عندى ولايا
جوزيف / نجاه !! و لا مامتك انت سنجل يا كارم و لا انت فى حوار فى التحتاني يا لقيم انت
كارم / يا عم كل حريم السرايا حريمي و يخصونى يا عم بقولك ايه ما تعملش فى اخوك جميل
جوزيف / اخويا ده انت !!
كارم / ايه !! ما اشبهش و لا ايه !!
جوزيف / لا استغفر الله انا اللى ما شبهش
كارم / بص انا بيقولوا عليا برئ ساذج اهبل طيب بس انا بحس بالناس و ليا باللى بشوفه منك
جوزيف / و لبست كام خازوق لحد دلوقت ؟
كارم / ياوووووه دا انا بطلت اعد بعد الأرنب الاولاني
جوزيف يضحك بصوت عالى
جوزيف / تصدق عشان انت عسل كدا انا هحاول بكل الطرق انى الاقيلك حل للحوار اللى منغص حياتك ده
كارم / تصدق احبك
جوزيف / ماشي يا عم
جوزيف يبص فى الساعه
جوزيف / هنطول لسه و لا ايه
جوزيف يطلع بره يروح ناحيه مختار واقف بيتكلم مع عمران
مختار / انا عارف انى دبستك فى ليله مش ليلتك بس انت اللى كنت قدامى و عارف انك مش هتفكر مرتين
عمران / و الله ما فى دماغى اصلا
مختار / امال ايه اللى مضايقك
جوزيف / ايه مطولين و لا ايه
مختار / لا خلاص قولتلهم يركبوا و خمسه بالكتير و نتحرك
جوزيف / تمام
جوزيف يروح يركب عربيه مختار و هو بيبص على عمران
مختار / ما سلمتوش على بعض ليه هو فى بينكوا زعل و لا حاجه
عمران/ سلمنا عند السجل المدنى
مختار / تمام كويس ... بخصوص مهره ... هى كدا كدا هتتعالج و تبقي زى الفل و اللى كانت بتعمله فى مصر هتعمله فى البلد عندنا و هنبقي ليها اهل و عزوه و ابوها مش هيقدر يفتح بقه و لا ينطق بحرف عشان كدا عاوزك تصبر شويه فى موضوع الطلاق لحد ما البت تشد عودها
عمران / طلاق ايه احنا هنكدب الكدبه و نصدقها
مختار / اه ... بيتهيألي لازم نعمل كدا ... مع العلم اننا هنقول الحقيقه للقريبين بس ما تنساش ان امها شغلتها و هوايتها التنطيط على القنوات يا عمران
عمران / ايوه بس
مختار/ هنرتب الكلام عشان يبقي واحد و ما تقلقش امك هتعرف الحقيقه كامله و انا اللى هشيل الليله قدامها هى هتقدر صدقنى 
عمران / المهم ان اللى جوه دى تفهم و تقدر يابا و لا هى خلاص كدا ما لهاش راى فى اى حاجه
مختار / و احنا هنجبرها على ايه وقت ما تقول خلاص انا تمام تاخد حقوقها كامله و تتفضل
عمران / حقوق!! حقوق ايه
مختار/ انت ما قريتش المؤخر اللى يونس مدبسك فيه و لا ايه
عمران يضحك
مختار/ حقها و هتدفع يعني هتدفع دى بنت ناس يابا و لا انت فاكر انك عشان ابنى تبقي كوسه و كدا لااااا دا كلو الا الولايا ياعم
عمران / حد قالك قبل كدا انك أعظم اب فى الدنيا
مختار/ ابدا كلكوا كلاب و لا بيتمر فيكوا
عمران و مختار يضحكوا مختار يحضن عمران و يطبطب عليه
مختار / روح يلا تمم على الدنيا عشان نمشي يلا ضيعنا وقت كتير
عمران يهز راسه و يمشي مختار يروح يركب جنب جوزيف فارد الكرسي جنب السواق و نايم و مغطى وشه بكوعه
مختار / قالولى انك بتعمل بسبوسه عجب
جوزيف / ما قالولكش على حاجه تانى
مختار / قالولى
كارم يروح يفتح الباب ورا مختار و يركب جوزيف يبص
كارم / السلام عليكم
جوزيف / كدا ما فيهاش نومه نعدل الكرسي بقي
مختار و جوزيف يضحكوا و كارم مش فاهم
...................
فى سرايا الزنايته
هند قاعده فى اوضتها خديجه تفتح الباب و تدخل من غير ما تخبط
خديجه / انا جبت أخرى اقسم بالله الناس دى ايه بجد انا مش فاهمه لااااا و لازم ابقي هاديه واحتوى و ألم و اطبطب طب و انا انا ارقع بالصوت يعني و لا اعمل ايه الله يرحمك يا ام فاتن دى كانت جبروت
هند / خير يا خديجه ايه اللى جد
خديجه تقفل الباب و تروح تقعد جنبها
خديجه / قوليلى اعمل ايه
هند/ و لا حاجه ادينا واخدين الطريق رايح جاى قياسه اياكش يقعدوا فى حته بقي
خديجه / دا راجع معاهم جوزك جابه تانى بعد ما كان سابهم و مشي خالص دا انا ما لحقتش اخد نفسي
هند / سبيها تمشي زى ما تمشي يا خديجه مش ناقصين مناهده مع حد و لا معاكى انا اللى فيا مكفيني مش قادرالك
خديجه / عشان عمران
هند / هو عمران و لا شاكر و لا ناصر و لا حتى محمد دا لولا انه بيروح يبات فى حضن مراته ما كنتش شوفته هى دى عيشه دى هو احنا شوفنا كل ده عشان عيالنا يعيشوا العيشه دى يا خديجه ... هو انا مكتوب عليا ان ولادى كلهم يتجوزوا مجدعه يعني
خديجه تبص على الباب مقفول
خديجه / و هى رحمه طلعت وحشه دى شيلاكى و شيلانا كلنا فى عنيها
هند / و لا مهره وحشه دا انا لسه فاكره مجيتها تطمن عليه لما رجع من تركيا يا كبدى و لا انها نجته من الموت هناك بس انا بتكلم عن الطريقه
خديجه / بصي لو دا هيريحك دا اصلا مش جواز دا حبر على ورق
هند / بكره الايام تلف و مختار مش هيهدا و لا يبطل فرك الا اما تبقي بجد و بحق و حقيقي
خديجه / عيالك مش صغيرين و عمران بالخصوص له دماغ لوحده و ان ما كانتش البت فى دماغه ما كانش وافق و لعلمك بقي عباده ماكدلى آن فى كيميا
هند تبصلها و تتنهد
خديجه / عباده ماكدلى ان البت زى البرلنت و ان فى حد حطلها الهباب ده و انها مستحيل تعمل الغلط و ان عينهم عليها من سنين و اخلاقها ينضرب بيها المثل منهم لله ابوها و امها دا حتى الواطى الدون رماها فى مصحه سمعتها زى الزفت و عليهم كميه بلاغات و محاضر بالهبل بس للاسف اللى له ضهر بيدوس على اللى ما لوش و دى لا حول لها و لا قوه اصبري عليها يا هند بالله عليكي
هند / و انا كنت كلمتها انا بس حاسه ان شاكر ... يا كبدى شايف اخواته الصغيرين
خديجه / انتى هتعيشى الدور جرا ايه يا اختى دا انا بنتى الأكبر منه و بنت لسه ما اتجوزتش و انتى صعبان عليكي ابنك الدكر ... يا اختى يتجدعن هو و انا ازوقهاله بايديا ... طب دا انا عليا سحبه ايلاينر انما ايه شغل معلمين
هند تضحك خديجه تزغدها بدلع
خديجه / قال و انا اللى جيتلك تفكى همى قعدت انا أطيب همك ... يلا هم الاخوات ليهم عند بعض ايه
هند تحضن خديجه
هند / ربنا ما يحرمنى منك ابدا ... انتى بقي كنتى داخله بزعابيك ليه عشان يونس ... قولتلك روحه اتعلقت بيه و جوزك قالك ... الموضوع قديم و ما يحلوش غير دكتور نفسي شاطر
خديجه / بس هو لازم يفهم انه مش رشيد و انه مجرد شبه فى الشكل مش اكتر
هند / ما بيسمعش بيقول كأنه بيتكلم كأنه بيتحرك كأنه بيتنفس و بعدين بصراحه انا ما بعرفش ارد على مختار انتى عرفاه مقنع
خديجه / عباده تعبان يا هند و بيكابر و كل يوم بيتعب اكتر الواد ده هيجيب اجله
هند / اقولك حاجه
خديجه / عرفاها لسه ماما بطه رمياها فى خلقتى
هند / هى ايه دى
خديجه / اللى عنده معزه يلمها
هند تضحك بصوت عالى
خديجه / و هى دى حد عارف يلمها و لا حتى لو حاولت اللمها هو انا كلامى يمشي عليها دى ببصه بصه كدا رجاله السرايا بشنبات .. سرايا ايه !! رجاله البلد و البلاد المجاوره انا عارفه هى بتعرف تعمل كدا ازاى و لا طالعه قادره كدا لمين ... لااااا و لا اللى ينقط بريئه براءه الذئب من دم أبن يعقوب ... ما بتعملش حاجه  .. ملاك برئ يا اخواتى ملاك برئ
هند / انا عارفه طالعه لمين بس ما اقدرش اقول
هند تضحك خديجه تبصلها و تحط ايدها على بقها و تضحك هى كمان
خديجه / طب يا ريتها تبقي ربعها
هند / انا ما قولتش حاجه انا بقولك اهو
خديجه / واطيه
الاتنين يضحكوا
..........................
فى فيلا اكرم
كارمن / ما تولع بجاز بعيد عننا انت شاغل بالك بيها ليه
اكرم / عشان الواد ده مش طبيعي و مش سالك و من ساعه ظهوره فى حياتها و كل حاجه اتلخبطت و انا متاكد ان القسيمه دى مزوره
كارمن / مزوره ازاى بس و على سال بنفسه و قالوله انها متسجله فى السجل المدنى و بعدين انت مضايق نفسك ليه دا هم و انزاح و نشوف حياتنا بقي
اكرم / انتى من امتى بالسذاجه دى يا هانم انتى بقي فاكره ان خبر ادمانها و جوازها مش هيتسرب للصحافه انتى فاكره انها تطلع معاكى فى القنوات تتكلم انها انسه و فجاه تطلع متجوزه من سنه من وراكى ده عادى انهى ام اللى مش قادره تحكم بنتها انهى ام اللى مش عارفه ان كانت بنتها متجوزه و لا لا
كارمن / هجيب اللوم على ابوها و يا ريت تسمعني كويس يا اكرم ابعد عن البنت دى انت مش متخيل هى حرفيا وحشه قد ايه كفايا كل اللى جرالنا من وراها ركز يا حبيبي فى شغلك و بناتك احسن
اكرم / انا مش حبيبك انتى ما تعرفيش تحبى غير نفسك و بس
كارمن / حتى بعد ما اتهمتك انك اتحرشت بيها بتدافع عنها ؟!!
اكرم / ارجوكى يا كارمن اتحركى بإيجابية مره واحده فى حياتك
كارمن / انا ما عنديش غير بنتين بس اسمهم بياتريس و صوفيا حقيقي كان معاك حق ان الانسان ليه نصيب من اسمه طلعوا اميرات زى اساميهم و هى طلعت فرسه متمرده ما لهاش لجام حقيقي احسن قرار اخدته انى خليتك انت تسمى البنات
اكرم / لا دا احسن قرار هاخده انى هطلع على كل الفضائيات و أفضح حقيقتك و زيفك و سطحيتك و قرفك
كارمن / اكرم !!
اكرم / انتى ازاى قذره كدا ازاى رخيصه كدا دا انتى لسه عايشه معايا فى البيت مع انى طلقتك
كارمن / دا بيتي و بيت بناتى
اكرم / لو فاكره انى هردك انسي دا انتى هم و انزاح
كارمن / انت بدأت تغلط و انا مش هسكتلك و مش هرد عليك بنفسي المحامى بتاعى هو اللى هيرد عليك انت فاهم و لا لا خلينا زى ما احنا ناس متحضره لاخر نفس عشان البنات
خدامه تدخل اكرم يسكت و يبصلها
الخدامه / there is a guest in the lobby downstairs
( فى ضيف تحت )
اكرم يسيب المكان و ينزل يلاقي رامى
اكرم / يااااه دا انت مصر بقي
رامى / الحقيقه لو ما كانش الموضوع مهم ما كنتش جيت لحضرتك
اكرم / و انا مش مهتم اسمع ايه هو انا لازم اكون قليل الزوق معاك عشان تفهم الرساله و لا ايه
رامى / لسه بس يا اكرم بيه دا انا حتى جاى عشان مصلحتك
اكرم / بناقصها مصلحه ايه دى يا ولد اللى تكون ليا معاك انت انت هتنسي نفسك و لا ايه
رامى / مصلحه اسمها مهره
اكرم / اطلع بره بكرامتك بدل ما اخليهم يرموك من غيرها اطلع بره
رامى / خليهم يرمونى و ساعتها هقولهم على كل حاجه
اكرم / قول يا حبيبي قول كل اللى عندك معاك مايك تقول فيه و لا اجيب لك اما عيل واطى دون صحيح
رامى / تمام ما دام دا كلامك تمام عن اذنك
رامى يمشي اكرم يطلع الموبايل و يتصل بحد
اكرم / عملت ايه ... تمام كويس  .. انا جايلك
.......................
فى شقه صابر
شاكر قاعد بيقرأ قران صابر يروح يفتح الباب شاكر يصدق و يجرى وراه
شاكر / استنى انا جاى معاك
صابر / خير خلفتك و نسيتك و لا ايه
شاكر / ايه يا عم مالك قافش عليا كدا ليه
صابر / عشان انا مش عيل صغير يا شاكر
شاكر / يا عم انا اللى عيل خدنى فى ايدك و ما تسبنيش هنا لوحدى بخاف يا جدع
صابر / و دا من ايه ان شاء الله
شاكر / بقولك ايه انت شكلك كنت مستعجل فما تعطلش نفسك فى الرغى بقي و خدنى فى ايدك
صابر / دا انت غتت يا جدع ... تعال
شاكر / حبيبي
شاكر ينزل مع صابر يروحوا ناحيه عربيه و يركبوا و صابر يسوق يعدى من قدام قهوه قاعد عليها محمود محمود يبص الناحيه التانيه صابر يركن و ينزل يروحله و يشد كرسي و يقعد قدامه الكل ينتبه شاكر يروح يقعد معاهم
محمود / ايه ناوى تخلص على العيله كلها نفر نفر و الدور جه عليا خلاص و لا ايه
صابر يطلع الموبايل و يورى محمود فيديو ليه بيسحب البلطجى بعيد
محمود/ هى دى الحكايه بقي ... بقي الباشا ملك المطاريد بعد ما خطت و دبر و نفذ قال يعمل ايه عشان يرمى التهمه بعيد عنه بعتلى ابن الحرام ده يرازيني على باب المستشفي عشان اتصور و اهو لبانه الناس تتلخم بيها عن عمايله السوده
صابر / برافو سرعه بديهه ممتازه
راجل كبير / بلاش كلام دلوقت يا صابر يا ابنى البلد قايده نار و مش حمل خناقه و لا موقف جديد
شاكر / بس صابر برئ يا حج انا كنت معاه طول الوقت
محمود / و بالقانون يا شاكر بيه امال ايه مش كدا يا عمهم
صابر / مسيرك هتشرفنى يا محمود
محمود / و انا ما بتهددش و قدام الناس دى كلها مش هتقدر تفلت من كل حاجه يا صابر يا ابن وهدان القط و عيله الجزار مش هتخلص و اللى فى خيالك المريض ده مش هتشمه
صابر يبتسم
.........................