(((((( الكبيره ٢))))))
#لولو_محمد
الحلقه ١٧
جوزيف / ما فكرتيش عمرك ليه الناس بقت عنيفه اوى كدا و خلقها ضيق ليه الاباحيه بقت اسلوب حياه
نجاه / التلوث و الاكل المهرمن
جوزيف / فى دراسه اتعملت فى سنه من السنين فى فيلم سينما عن طريق انهم عرضوا فى الفيلم جمل متكرره و بسرعه عينك ما تشوفهاش بس عقلك الباطن مدرك لكل حاجه الجمل دى اشترى كولا و فشار و لاحظوا ان بعد الفيلم مابيعات الكولا و الفشار زادت بمعدل ملحوظ جدا دى كانت تجربه علميه مثبته بس الحقيقه ان التجربه دى اطبقت على كل الناس بشكل يومي انا نفسي طبقتها على اهلك كلهم لما فضلت اعرض اعلانات مركز هيلجا طول الوقت لحد ما جريتوا انتوا وراها و جبتوها تعالجك و الاكتر من كدا انى سحبت كل الضحايا اللى فتحوا لينك تسريبات ياسمينا عشان نخلص منهم انا طبقت النظريه دى كتير جدا
نجاه / بس انا اهلى كلهم بيصلوا و مع كدا على كلامك قدرت تاثر عليهم
جوزيف / مش كلهم ... مش كلهم بيصلوا فعلا و مش كلهم قدرت اسيطر عليهم ... بالاضافه الى الزن على الودان امر من السحر
نجاه تبصله باستغراب
جوزيف / و انتى فى الاوضه عندى فى تركيا كان فى صوت زنه بسيطه جدا الودن الطبيعيه ما تاخدش بالها منه غالبا فكرتيه بسبب الفراغ او اللمبه اخدتى بالك من حاجه زى دى
نجاه تهز راسها لا
جوزيف / الزنه دى كانت رسائل صوتيه خفيه زى وسوسه الشيطان فى دينكوا كدا
نجاه / و كان بيوسوسلى بايه
..............................
جوزيف / تقلعى ... الرساله بالحرف مش مشكله تكونى عريانه المهم تعيشي... و دا ما حصلش ... يعني ممكن نقول انك فى الاول ما كانش فارق معاكى انتى للابسه ايه و كنتى بتحاربى فعلا و بمجرد ما بداتى تصلى و تقرى قران بطريقه ما انتى كان كل همك تغطى نفسك عكس الاشاره اللى بتتبرمجى عليها تماما
نجاه / انت بتشتغلنى صح
جوزيف / نهائى ... انا و اللى زيي موجودين بس عشان نبرمج العالم و نسهل للمجلس الوصول لاهدافه ياما بتسخير التكنولوجيا او بتصفيه المنافسين او المعارضين ... حروب تقوم و بلاد تتفكك اغتيال علماء و قاده ثورات و احيانا كوارث بيولوجيه او طبيعيه
نجاه / ازاى يعني
جوزيف / ازاى دى يعني مش فاهمه اللى فات و لا اكمل و ادى امثله و معلومات اكتر
نجاه / لا لا استنى ... انت دلوقت جربت و ايقنت ان صلاتى و ايمانى بيحمونى ... يعني انت مؤمن و متيقن انى صح مش كدا
جوزيف / مش شرط لانى جربت نفس الطريقه دى مع ناس كتير من البلد و كانوا كلاب تحت رجلى
نجاه / زى مين
جوزيف يبتسم
نجاه / طب انا افرق ايه عنهم انت شوفت منى ايه بعمله هم لا
جوزيف / مفيش اعتقد دى قوه فى قلبك او عقلك الباطن او روحك مش عارف المهم انك محصنه ... و دى حاجه كويسه جدا هتنفعك و تنفعنى
نجاه / طب ما برده التحصين اللى عندى ده ممكن نقول انه ... انه ايمانى اقوى منهم و هم برده اكيد مش زى اللى ما بيصلوش خالص و لا ايه
جوزيف يتنهد
نجاه / قولى فهمنى ارجوك
جابر يفتح الباب
جابر/ حضرتك هنا و انا قالب الدنيا عليكي
نجاه / ثوانى يا جابر ...لو سمحت جاوب ايه الفرق
جابر / نجاه ابوكى عاوزك
نجاه / ثوانى يا جابر قولت
جابر يبصلها بصدمه
جوزيف / روحى لباباكى دلوقت هنكمل كلامنا بعدين
نجاه تتنهد و تمشي و ترزع الباب وراها جابر يبص لجوزيف
جابر / احنا هنا صعايده ... و مهما كنت اضمن بنت عمى برقبتى اى حد هيشوفكوا هنا مش هتبقي خير ليها و لا لاهلها ... طبعا واحد زيك ما يهموش الكلام ده و لا يفرق معاه ... بس
جوزيف / بس انت غيران و خايف اخطفها منك ... فعمال تتعنف عليها و تتنطت عليا و اسمحلى اقولك انه لا وقتك و لا مكانك... اوعى
جوزيف يزق جابر و يعديه و جابر بيعاني يمنع نفسه انه يتغابى عليه
.............................
فى الاستقبال
نسمه حبيبه صابر تدخل بتجرى تسال حد فى الاستقبال و تجرى تركب الاسانسير يتفتح تروح ناحيه العنايه المركزه قاعد قصادها ناس كتير منهم ست بتعيط نسمه تجرى عليها
نسمه / خير ياما عبد الهادى ماله
الست / على ما افتكرتى يا اختى تيجي تطلى على جوزك
نسمه / ما انتى عارفه يا اما ان الشوارع كانت مقفوله اول ما سمحوا انى اخرج من البيت سبت العيال عند ايمان جارتى و جيت على طول طمنيني بالله عليكي انا من ساعه ما قالولى انه انصاب و انا مش عارفه اتلم على روحى و بصلى و ادعى ربنا ابوس ايدك طمنيني
راجل / الحمد لله قدر و لطف الدكتور بيقول لو عدى النهرده على خير نبقي عدينا مرحله الخطر
نسمه / يارب ما لناش غيرك استرها معانا يا رب
شاب / بقولكوا ايه يا جماعه الزحمه دى ما لهاش اى فايده انا بقول تروحوا انتوا تشوفوا دنيتكوا و انا هخليني هنا جنبه و اى جديد هبلغكوا بيه
الست / تخليك فين انا مش همشي و اسيب ضنايا ... هى بقي عاوزه تمشي تتفضل
نسمه / يمين بالله ما فتحت ببقي
الشاب / و ان مشت ياما ما انتى عارفه ان عيالها صغيرين و محتاجين رعايه و الناس فيها اللى مكفيها مش هينفع نتقل عليهم بعيالنا
نسمه / لا يا رعد ما تشغلش انت بالك لو على عيالى فانا سيبالهم اكلهم و غيارهم قبل ما امشي و الجيران لبعضيها انا كدا كدا مش هتحرك من هنا
الست / لا يا شيخه
نسمه تبص الناحيه التانيه
الست / الا امك ما جاتش ليه يعني يا ست الستات و لا هى و لا حد من أهلك ليكونوا مش مستعنين يجوا يطمنوا على الراجل ... اااه طبعا فاكرين انه لما يموت
نسمه / بعد الشر عنه ربنا يقومه بالسلامه لعياله ياما ابوس ايدك مش وقت خناق و لا كلام احنا فى المستشفي ادعيله اولى
الست / و طبعا لما يفوق هتلاقيهم جايين يجروا يتمحلسوله و يتمسحوا فى جلابيته بحجه سلامتك يا خويا سلامتك يا حبيبي ما كناش نعرف ما انت عارف نسمه ما بتقولناش على اى حاجه
رعد / اهدى ياما انتى عارفه نسمه اكتر من اى حد ما بتقولش لاهلها غير اللى احنا عايزينها تقوله
الست / خليك انت و اخوك دافعوا عنها كدا و لا اكنها سحرالكوا
رعد / الناس ياما
الست تبص لنسمه واقفه ساكته و باصه بعيد
الست / ايه مش مستحمله تشوفيني
نسمه / فى ايه بس ياما انا عملت ايه بس من ساعه ما وصلت و انتى مستلمانى و ساكته اعمل ايه بس عشان ارضيكي
الست / يا اختى يا ريتك ما وصلتى ... يا اختى يا ريتك ... و لا يا ريتك انتى اللى راقده بداله جوه يمين بالله ما كان حد من اهلك اللى فرحنالى بيهم دول عبرك وقتها
نسمه / يا ريتنى ... عن اذنكوا
نسمه تمشي و هى بتعيط
رعد / اتقى الله ياما دا ابنك فى العنايه بين ايدين ربنا
رعد يجرى ورا نسمه
الست / شوفت شوفت الواد اتحمقلها ازاى شوفت البت و جبايرها شوفت سحرالهم ازاى.. و الله شوف و الله اول ما اطمن على عبد الهادى لاروح للشيخ اللى قالتلى عليه ام مسعود و اخليه يعملها عمل يقلبها فى عنيهم قرد بنت المبقعه
الراجل / يمين بالله ان ما اتعدلتى فى ليلتك لكون مبلغ الكبير عنك
الست / هتبلغ عن اختك يا سعد ... خلاص كلكوا بقيتوا فى صفها خلاص
سعد / اهدى يا ام عبد الهادى و خلى اليوم يعدى اقولك تعالى اروحك ترتاحى
الست / ابدا يمين بالله ما افارق ابنى ابدا انت فاكرنى زيها و لا ايه ... طبعا تلاقيها طلعت الكافتريا اللى فوق تشرب حاجه ساقعه تطرى على قلبها ما هى باكسه
سعد / لا حول و لا قوه الا بالله
الست / ربنا ينتقملى منها ربنا يوريني فيها ساعه تبرد قلبي
سعد / انا سايبهالك خالص
سعد يمشي الست تعيط
الست / يا حبيبي يا ابنى يا ضنايا يالي لا ليك لا حبيب و لا قريب غيرى يا ابنى سابوك و مشيوا كلهم و ما اتبقالاكش غيرى يا ضنايا ما تخافش يا كبد امك انا جنبك يا حبيبي جنبك يا ضنايا مش هسيبك يا ابنى مش هسيبك يا حبيبي استرها معايا يارب دا انا غلبانه و منكسره و ماليش غيرك يا رب حسبي الله و نعم الوكيل فيكي يا نسمه ربنا ينتقملى منك
الست تعيط و الناس بتتفرج عليها و ساكتين
......................
فى اوضه نجاه
نجاه بتصلى تسلم و تقوم تروح تفتح البلكونه و تقف فيها الجنينه مليانه رجاله صاحيين تتفرج عليهم و تبص للسما
نجاه / ما لناش غيرك
نجاه تدخل و تجيب التليفون و تتصل بجوزيف يرد و هو نايم
جوزيف / خير يا نوجه
نجاه / ما تقوليش يا نوجه انا اسمى نجاه
جوزيف / ماشي عاوزه ايه يا نجاه
نجاه / مش عارفه انام مش قادره
جوزيف يضحك
جوزيف / يعني ان لم تستطع اسعاد نفسك فنكد على الجميع يعني و لا ايه
نجاه / ما بهزرش انا جوايا مليون سؤال مش قادره الاقيلهم اجابه و لما حكيت لبابا قالى ما تفكريش و سبيها على الله و مش قادره ابطل تفكير جوايا مليون سؤال مش لقياله اجابه
جوزيف / و للاسف معظم الاجابات دى مش هتلاقيها عندى برده انا مهما كان عندى معلومات انا سلاح مش اكتر اللى صمم السلاح ده و اللى بيوجهه انا ما اعرفوش بس انا متاكد ان عنده معلومات اكتر من اللى عندى
نجاه / و انا اجيبه منين اذا كنت انت ما تعرفوش
جوزيف / هو هيجيلك ما تقلقيش
نجاه / انا دماغى هتنفجر مش قادره
جوزيف / اهدى و نامى و ارتاحى و بكره نقعد و نتكلم
نجاه / ما انا لو عارفه ما كنتش كلمتك السعادى
جوزيف / تجيلى و لا اجيلك ؟
نجاه / السعادى؟!
جوزيف / و هو انتى جايه دلوقت تاخدى بالك من الساعه دلوقت ما انا كنت متنيل نايم
نجاه / معاك حق
جوزيف / خليكي مكانك انا هجيلك
نجاه / تمام ... هستناك
نجاه تقفل و تطلع البلكونه تانى و تبص على الرجاله
نجاه / هيجي فين وسط كل دول .. انتى مش هتجيبيها لبر ابدا
نجاه تدخل و تروح تفتح باب اوضتها تلاقى جابر واقف كان هيخبط الاتنين يتخضوا
نجاه / خضيتني يا جابر ... خير
جابر / خير ... باذن الله خير ... كنت قاعد عندى فى البيت شوفتك فى البلكونه عرفت انك صاحيه جيت اتصل بيكي لقيت تليفونك مشغول ... خير بقي
نجاه / هو فى رجاله على السطح
جابر / اه فى
نجاه تتنهد و تبص الناحيه التانيه بزهق
جابر / هسبقك و اوزعهم
نجاه تهز راسها جابر يمشي نجاه تدخل تجيب شال و تحصله و تنسي بلكونتها مفتوحه
..........................
قدام العنايه المركزه
نسمه نايمه على كرسي رعد يدخل يبص عليها و يروح يصحيها بالراحه
رعد / يا ام بدر ام بدر نسمه نسمه
نسمه تفتح و تتخض
رعد / فوقى يا بنت الناس و تعالى اروحك لعيالك قعادك جنبه مش هيفرق معاه فى حاجه
نسمه / انتوا مش اخدتوا العيال عندكوا
رعد / ايوه عندنا و امى اكلتهم و حمتهم و نيمتهم فى فرشتها كمان و بعتتنى اشوف لو ناقص حاجه
نسمه / كتر خيركوا تعباكوا معايا
رعد / تعبك راحه يا بنت الاصول دول قبل ما يبقوا ولادك هم ولاد اخويا
نسمه / ربنا يباركلكوا فى بعض
رعد يبص ليها و هى بتعدل طرحتها و تتاكد ان شعرها جوه و تمسح وشها بايديها
رعد / قومى اروحك بيتك تغيرى و لا تفردى ضهرك و لا اى حاجه
نسمه تهز راسها لا
رعد / ما هو ما يصحش تنامى فى الكرودور كدا و اللى رايح و اللى جاى يبص عليكي
نسمه / ما تاخذنيش النوم غلبنى
رعد / النوم سلطان و انا عارف خليني اروحك ساعتين و اعدى اخدك اجيبك تانى و ان حصل حاجه يا ستى هكلمك فى المحمول على طول و بعدين ما اللى راقد جوه ده اخويا الكبير يعني لو احتاج اى حاجه مش هتاخر عليه اكيد يعني
نسمه / انا عارفه و الله بس
رعد / امى مش هتعرف اى حاجه انا عارف انك خايفه من لسانها انا عارف انها بتيجي عليكي كتير بس اقسم بالله طيبه و بتحبك
نسمه / تسلم و تعيش
رعد / تمام تعالى بقي ارتاحى على الاقل بكره تروحى تقعدى انتى بالعيال و امى تيجي مش هينفع نتقل على الجيران كل يوم
نسمه / بكره باذن الله يفوق و يبقي زى الفل
رعد / من بقك لباب السما يا ست الكل ... قومى بقي يا ام بدر ما توجعيش قلبي معاكى
نسمه تهز راسها و تقوم تبص على الباب
رعد / لا اله الا الله ايه تانى
نسمه / مفيش مفيش يلا
نسمه تمشي و رعد وراها و بيبص عليها من فوق لتحت و هى ماشيه
......................
على سطح السرايا
جوزيف و جابر و نجاه قاعدين
جوزيف / انتى ليه مش قادره تفهمى انا ما عنديش كل الاجابات انا ما اخترعتش اللعبه انا بس احترفتها و كمان مش هقدر اغير قوانينها
جابر / طب و انا تقدر تتحكم فيا
جوزيف / مفيش تحكم بنسبه ميه فى الميه طبعا و الكلام ده للجميع بس النسبه بتزيد كل ما كان الانسان من جواه فاضي و طبعا قبل ما تفهم اللعبه بتمشي ازاى النتيجه بتتغير عن بعد ما تعرف اكيد لما بتبقي فاهم اللى انت داخل عليه النسبه بتقل كتير و بتقدر تربط الاحداث و الصور فى دماغك
نجاه / الموضوع ده مرعب اوى
جوزيف / الموضوع ده اقل حاجه ممكن تخوفك دلوقت ... انتى بتتعاملى مع ناس ملهاش حدود فى اللى تقدر تعمله التكنولوجيا اللى عندها لا عندك نصها و لا تقدرى تواجهيها و القدرات البشريه صفوه صفوه من كل انحاء العالم و فى كل المجالات انتى كل اللى معاكى مع احترامى للجميع ... شويه هواه
جابر / و ايه يا خويا اللى مانعهم يتشقلبوا بتكنولوجيتهم و رجالتهم و صفوتهم و يقضوا على شويه الهواه اللى هو احنا يعني
جوزيف/ بابسط طريقه اقولك الميديا ... السريه هى نقطه تفوقهم انهم عاشوا السنين دى كلها ما حدش يعرف عنهم اى حاجه غير صفوه الصفوه
نجاه / و هو اللى حصل لينا و للبلد الفتره اللى فاتت ما فتحش عيون الميديا عليهم
عباده يدخل
عباده / و انتى الصادقه علينا احنا ... المحافظ كلمنى بنفسه مش عاجبه الوضع و طالب منى اصارحه لو عندى اى معلومات عن اللى بيحصل
جابر / و بعدين
عباده / لمينا كام واحد من المطاريد و حولناها قضيه تهريب سلاح و الباشا المامور كتر خيره شال كتير عننا ... تمام يا يونس كمل ايه اللى جاى
جوزيف / احنا لازم نفهم ان اللى حصل النهرده مجرد جس نبض و واضح جدا ان كل اللى اتبعتوا هواه بدليل ان مفيش و لا واحد طلع عايش منهم و الاصابات منكوا قليله جدا
عباده / الراجل مننا بالف يا ابنى
نجاه / ما فكرتش يا يونس ان مش بس السريه هى السبب فى انهم ما قدروش علينا لحد دلوقت
جوزيف / من غير ما تكملى قريتك و كفايا بقي ابوس ايدك
نجاه تبتسم و جابر متابع
جوزيف / طبعا انتى عارفه ردى صح
عباده / احب اسمعه
جوزيف / نفس ربنا اللى قادر يحميكوا قادر يقضى عليهم بس السؤال هو ليه ما بيعملش كدا و يخلى الخير ينتصر و تبقي نهايه سعيده للجميع خصوصا انه قادر على كل شئ
عباده/ و نعم بالله بس مش دى الفكره من الخليقه اصلا
جوزيف / امال الفكره انك تخلق بشر بتقول انك بتحبهم و رحيم بيهم و تحطهم فى عذاب و خوف طول الوقت دا مش حب دى ساديه
جابر / استغفر الله العظيم دا انت نهايتك
عباده / ولنبلونكم بشئ من الخوف وَالْجُوعِ ونقص من الأموال والانفس وَالثَّمَرَاتِ وبشر الصابرين
جوزيف / برده ليه مش هو اللى خلقنا كلنا مش هو اللى خلق جابر مثلا عايش فى بيت مستقر اب و ام و سقف و غطا و اكل و خلقنى فى المعسكر ما عنديش كل ده ازاى نتساوى
جابر / عمرنا ما هنتساوى
جوزيف يضحك باستهزاء
عباده / جابر عنده حق ... جابر اتولد فى بيت بيساعده يكون كويس مجهوده بس انه يحافظ على اللى ربنا ادهوله عندك واحد تانى فى نفس البيئه و اختار يكون فاسد ضيع النعمه و كفر بيها زالت من وشه البدايه واحده و النهايه مختلفه انت و جابر مثلا البدايات ما كانتش واحده بس انت تقدر تكون احسن منه كمان عارف ليه ... عشان انت حاربت و كافحت عشان توصل للى جابر اتولد لقاه عنده و عشان كدا ربنا بيحاسب على الخواتيم ممكن تضيع كل اللى عملته من خير فى لحظه و ممكن تصلح كل الشر اللى عملته برده فى لحظه
جوزيف / ايوه ايوه نجاه قالتلى الكلام ده قبل كدا بس ... الكلام ده كلام و بس انت نفسك بتقوله حافظه مش فاهمه و لا حاسه و لو جيتلك فى يوم و قولتلك انا اتغيرت لا عمرك هتصدقنى و لا عمرك هتثق فيا
عباده / بدليل انى قاعد معاك و فاتحلك بيتي مش كدا
جوزيف يبص الناحيه التانيه
عباده / انا مش ربنا انا بشر مخلوق زيي زيك بغلط عادى بس بحاول اتوب و استغفر و اقوم نفسي
نجاه / لو جبت اتنين واحد مننا و واحد تانى غريب من بره ... اجنبى يعني ... و قولتلهم فاضل لكل واحد فيكوا ساعه واحده بس يعيشها و سالته هتعمل فيها ايه هتلاقي اللى مننا بيقولك هقضيها ساجد و الاجنبى بيقولك هشرب و اسكر و اشوف حريم دا الفرق يا يونس هو ده الفرق
جوزيف / انا لو فاضلى ساعه واحده هفجر اكبر عدد ممكن و اقلل تعدد السكان على الكوكب النص
نجاه تضحك
نجاه / مفيش فايده
جابر / عشان تصدقنى لما كنت بقول عليك خواجه و أجنبى
عباده / انت ليه جريت ورا دياب لما سمعته بيكلم مراته ليه انقذت حياته اصلا
جوزيف / دا الصح
نجاه / مش يمكن ربنا خلاك سبب لان ليه عمر
جوزيف يبصلها تضحك يضحك و جابر هيطق
نجاه / صدقنى هى كدا
جوزيف / يعني احنا مسيرين و لا مخيرين
نجاه / الاتنين
جوزيف / و دى تنفع
نجاه / ربنا عارف كل حاجه انت هتعملها و عارف بدايتك و نهايتك بس الاختيارات كلها قدامك انت اللى بتختارها انت اه هتمشي فى الطريق اللى ربنا راسمهولك من البدايه بس بكامل ارادتك
عباده / و تقدر تغير من الطريق ده كمان
جوزيف / اقدر اغير فى اراده ربنا
عباده / ما اسمهاش كدا يا ابنى ... لا حول و لا قوه الا بالله .. فى حاجات بتغير القدر زى الدعاء و الاستغفار النبي صلى الله عليه وسلم قال: لا يزيد في العمر إلا البر، ولا يرد القدر إلا الدعاء، وإن الرجل ليحرم الرزق بخطيئة يعملها
جوزيف / يعني انا لو عملت خير عمرى هيزيد
نجاه / هيبقي فيه بركه ما انت ممكن تعيش ميه سنه بس ما تنجزش فيهم حاجه و اعمالك كلها هتبقي سيئات و ممكن تعيش عشرين سنه بس تقضيهم فى طاعه و تسيب بيهم اثر يكمل من بعدك
عباده/ و طبعا زى ما قولت الحديث اخره ان الذنوب بتمنع الرزق فبالعقل كدا الاستغفار بيمسح الذنوب فبيزيد الرزق اتمنى تكون فهمت اى حاجه
جابر / و لا حياه لمن تنادى
جوزيف يقوم يروح لعباده
جوزيف / انا بنتك صحتنى من احلى نومه فانا عشان مؤدب هستاذنك اخدها نطلع نتمرن فى الجبل ... لوحدنا
جوزيف يبص لجابر يعوج بقه جوزيف يبص لعباده
جوزيف / هاخد عربيتك عشان عربيه مختار محتاجه تمون
عباده يضحك
عباده / خد العربيه بس خلى نجاه وقت تانى ... الدنيا مش امان
جوزيف / دا اكتر وقت امان و بعدين جرا ايه يا عبد دى معايا عيب يا راجل
جابر / و هو المفروض يطمن عليها و هى معاك لوحدك فى الجبل
جوزيف / يا ابنى اهدى عنى انا و هى كنا لوحدينا فى سرير واحد لو تفتكر
عباده يقف
عباده / مش كل شويه تفكرنى انى ما قتلتكش و اديتك فرصه تعيش
جوزيف / عشان مصلحتك مش حبا فيا
نجاه تقوم تحوش
نجاه / افتكر انك و انت بتستفز جابر بتجرحنى و تجرح والدى انا فاهمه قصدك بس الكلمه بتوجع
جوزيف يروح يقف بعيد
جابر / انا جبت أخرى و اللى بيحصل ده كتير من امتى كنا كدا
نجاه / كل حاجه اتغيرت
جابر / الاخلاق ما بتتغيرش يا بنت عمى
نجاه / صابر فى الجبل
جابر / صابر اه و انا لا
نجاه / ارجوك اهدى شويه ... بابا ... انا محتاجه تمرين ... هو بيديني اكتر ما بيديكوا
عباده / و ده قالقنى
نجاه / هو بشر و من حقه يخاف
جابر / تصدقى هعيط استنى كدا ... الدمعه مش عايزه تنزل
نجاه / عشان اسلوبك ده انت و غيرك هو بيعمل معاكوا كدا ... يونس ساب كل حاجه و حكم على نفسه بالإعدام عشان عرف حقيقته بس هو لسه تايه و كل اللى احنا بنعمله يا ابويا اننا بنفره اكتر
عباده / انتى شايفه كدا
نجاه / كفايا اللى حصل من دياب امبارح يونس عمل المستحيل حرفيا و فى الاخر ما اتقدرش بالعكس اتهان قدام الكل و مع كدا ما اخدش اى رد فعل
جابر / عشان كدا روحتى وقفتى معاه لوحدكوا على سلم الطوارئ
نجاه / انا و ابويا اتكلمنا امبارح و نهينا القصه
عباده / واضح انها ما انتهتش بدليل انكوا بتطلبوا منى انى اكررها اهو للاسف يا نجاه انا مش هقدر ارفع الاريال للى بيحصل
نجاه / انا كنت بطلع لوحدى وسط الرجاله عشان كان بيبقي فيهم اخواتى و اولاد عمى صح ... تمام هاخد واحد من اخواتى
جابر / بجد و الله
نجاه/ بجد يا جابر و اهدى شويه انا مش صغيره
جابر / انتى مش ملاحظه ان جمله انا و ابن عمى على الغريب ما عادتش فى قاموسك
نجاه / اسفه انى مش قادره ارضي غرورك
جابر / غرورى !!
نجاه / انت عصبيتك عمياك
جابر / اشبعى بيه
جابر يسيب المكان و يمشي عباده يبص على جوزيف واقف بعيد جدا متابع ردود الفعل عباده يبص لنجاه
عباده / انا بثق فيكي
نجاه تهز راسها و تعلى صوتها
نجاه / يلا يا يونس
جوزيف يهز راسه و يروحلهم يحيي عباده براسه و يمشى ورا نجاه عباده يمسك التليفون
عباده / هيطلعوا الجبل ... عينكوا ما تنزلش من عليهم
عباده يتنهد و يروح يبص من فوق على البلد
................................
فى المستشفي
دكتور يطلع من العنايه المركزه رعد يقف و يجرى عليه
رعد / طمنى يا دكتور عبد الهادى اخباره ايه
الدكتور / الحمد لله بقي كويس و هننقله اوضه تانيه حالا
رعد / الف حمد و شكر ليك يا رب ... هقدر اخشله امتى
الدكتور / عشر دقايق بالكتير و تقدر تطمن عليه
رعد / كتر خيرك يا دكتور كتر الف خيرك
الدكتور يمشي رعد يطلع التليفون و يتصل بنسمه
رعد / صباح الخير نمتى كويس
نسمه / الحمد لله انا لابسه هاخد اى حاجه و اجيلك مفيش اخبار عن عبد الهادى
رعد / لا مفيش لسه على حطه ايدك بقولك ايه ما تجيش دلوقت
نسمه / ليه بس
رعد / صابر هنا
صمت
رعد / انا عارف ان كل اللى بيتقال كدب و عارف انه عيل ابن حرام بس ... انتى عارفه ولاد الحرام و احنا مش عاوزين حد يتكلم ... خليكي فى البيت و انا لو فى جديد هبلغك و لو عبد الهادى فاق هخليكي تكلميه
نسمه / حاضر
رعد / سلام يا ست البنات
رعد يحط التليفون فى جيبه و يجرى على ممرضه خارجه من العنايه
رعد / طمنيني يا اختى عبد الهادى اخويا بقي عامل ايه دلوقت
الممرضه / كويس الحمد لله هينقلوه فوق اهو
رعد / الف حمد و شكر ليك يا رب الف مليون حمد و شكر ليك يا رب
........................
فى اوضه شاهين
شاهين يدخل و مش قادر يفتح عينه ينام بهدومه فى السرير من غير ما يقيد النور
وفاء / حمد الله
شاهين يتفزع / الله يحرق ابو اللى ... فزعتينى
وفاء تايد الاباجوره جنبها
وفاء / حقك عليا اصل هيكون مين فى سريرك يعني غيرى
شاهين / مش القصد ... انا بس مش شايف قدامى مطبق على يدك
وفاء / اكلت
شاهين / الحمد لله
وفاء / طب مش ملاحظ
شاهين / يعني اروح اتخمد فى الشارع يعني بقولك مش قادر افتح عيني تعبان ايه ما بتفهميش تعبان قولت
وفاء / حقك عليا ... تصبح على خير
شاهين يديها ضهره و ينام
شاهين / اقفلى المخروب اللى جنبك
وفاء تطفى النور و تقوم تروح الحمام و تبص على نفسها فى المرايه و تعيط و تقعد تغسل وشها تتوضي
.....................
فى الجبل
فارس و كارم قاعدين فى جنب و جوزيف بيمرن نجاه
فارس / اتاكدلى كدا يا ابنى القرنين قد بعض و لا فى واحد اطول من التانى عشان حاسس ان راسي مايله على جنب سيكا
كارم / اهمد اختك ارجل منه
فارس / الواد ده مش سالك
كارم / بس جامد
فارس يبص لاخوه و يعوج بقه
كارم/ انا عاوز اقوم اجرب الحركه دى
كارم يقوم و يروح ليهم
كارم / عايز اجرب ينفع
جوزيف يعلم كارم و يمرنه و نجاه تروح تقعد جنب اخوها و هى بتنهج فارس يناولها ميه
نحاه / نفسي اتقطع
فارس/ و ايه اللى جابرك
نجاه/ انا اصلا ما نمتش طول الليل فمش قادره
فارس / ايه اللى جابرك برده
نجاه/ مالك
فارس/ مش عاجبنى حالك
نجاه تبصله باستغراب
فارس / من ساعه ما رجعتى و انتى واحده تانيه
نجاه / ليه بتقول كدا
فارس/ عشان احنا لينا قانون واحد طول عمرنا و انتى لاول مره تخبطى بيه عرض الحيطه
نجاه / جابر !!
فارس / الواد ده عموما
نجاه / ربنا بيقبل التوبه ما تكونش عون للشيطان عليه
فارس / هو ما تابش اصلا دا حتى مش مسلم و لا موحد
نجاه / طب وطى صوتك
فارس / خايفه على احساسه اوى
نجاه / لا مش خايفه لانه مش فارق معاه رايك فيه بس مش عوزاه يفقد الامل من اولها ادعمه
فارس / و الله على قد علمى كل اللى دعمناهم طلعوا خوازيق و دا هيطلع اكبر خازوق فيهم
نجاه / نبقي عملنا اللى علينا قدام ربنا
كارم يقلب جوزيف فى الارض و الاتنين بيضحكوا كارم يمدله ايده يقومه
كارم / عملتها صح من اول مره
جوزيف / جامد ننقل على ليفل اعلى لو جاهز
كارم / هات اخرك
نجاه بتابع و هى مبتسمه
فارس / ما بحبوش يا نجاه
نجاه / و انت من امتى انطلب منك تحب المدرس و لا الاستاذ بتاعك
فارس / و انا من امتى اتجابلى مدرب و لا مدرس ابن حرام
نجاه / وطى صوتك لو سمحت
فارس ينفخ و يشوح بايده
جوزيف / ما تيجي يا فارس تجرب
فارس يقوم و ينفض هدومه نجاه تقوم تقف
جوزيف / بالدور يا ماما بالدور مش حفله هى اقعدى ... اقعد يا كارم انت ممتاز على فكره بتتعلم بسرعه و ذكى
كارم يروح يقعد و نجاه لسه واقفه جوزيف يبص لفارس و يبتسم و فارس مش مبتسم
جوزيف / البدايه عندك
.............................
أنت تقرأ
الكبيره ٢ بقلم / لولو_محمد
Humorالحرب لسه مستمره و الحقيقه مسيرها فى يوم تظهر النور و كل واحد لازم يختار طريقه
