الكبيره ٢ بقلم / لولو_محمد

الحلقه ٩٥

((((((( الكبيره ٢))))))
#لولو_محمد
الحلقه ٩٥
عباده يدخل
عباده/ خير يا احمد بيه ايه اللى حصل
ابو محمود / و ربنا ما هسيبك انت فاهم و لا لا
احمد / لو سمحت يا حج تهدى الأمور ما بتمشيش كدا ... اتفضل يا عباده بيه
ابو محمود / تمشي ايه و يقعد ايه انا ابنى اتقتل فى بيته جرا ايه يا حكومه جرا ايه يا بلد جرا ايه يا عالم
عباده/ انت ما كلمتوش خالص من ساعه ما نزل البلد
ابو محمود / لو فاكر اننا بنسيب تارنا يبقي لسه ما عرفتش عيله الجزار
عباده / انا مقدر موقفك بس لو ما حاسبتش على كلامك هيبقي ليا انا كلام تانى
ابو محمود يقف و يزعق
ابو محمود / هتعمل ايه هتقتلنى انا كمان اقتلني اقتل لو راجل تقتل
عباده / هو حضرتك باعتلى ليه يا باشا خير انا متهم بحاجه ؟
……………………..
احمد / الحج بيتهمك انك قتلت ابنه ؟
عباده / فى دليل ؟ تقرير الطب الشرعي حدد معاد الوفاه عشان اقدر اجيب حجه غيابى
ابو محمود / و انت يعنى هتقتله بايدك ما اكتر رجالتك يا خويا
عباده/ انا ما قتلتش ابنك ابنك من يوم ما دخل شقته ما خرجش منها و ما حدش قرب منه ... ما شاء الله حبايبه كتير لدرجه ان ما حدش يسأل عليه و لا ياخد باله انه مات لحد ما جتته تريح لا و مع كدا افترضت ان انا اللى قتلته
ابو محمود / ما هو لو مش انت يبقي صابر
عسكري يخبط و يدخل
العسكرى / صابر وهدان القط بره يا باشا
احمد / خليه يستنى ثوانى
ابو محمود / ما حدش له مصلحه فى موت ابنى غيرهم يا باشا و انا مش هسكت يمين بالله ما هسكت
………………………..
بره المكتب
شاكر / يا اخى الواحد ما كانش طايقه بس برده الانسان ما يتهانش اوى كدا ما يفضلش مرمى ما حدش يسأل عليه للدرجادى
صابر / من اعماله الناس كلها ارتاحت من اذاه و سمه
شاكر / بس هم ليه شاكين انه قتل مش يمكن مات موته ربنا
صابر / ابوه اللى قوم الدنيا كان زمانهم دافنينه لو ما كانش عمل الميغه دى
شاكر / بس ما حدش دخل الشقه و لا خرج منها دا احنا مراقبين المنطقه كويس و مستنينه
صابر / كل حاجه هتبان … او نقول يا رب
شاكر / يا رب بس مش فاهم ... انت تقصد ايه ؟
صابر / الواد ده كان وراه حكايه ... لما خلصت خلصوا منه قبل ما نقدر نقرره
شاكر / اه فهمت ... هو احنا يعنى مش عارفين مين اللى وراه ما هى مفقوسه اوى
صابر / و جابت ايه
شاكر/ هى مين
صابر / المفقوسه جابت ايه
شاكر / انا بحبك فما تقولهاش لحد تانى و دا لمصلحتك و الله
صابر يضحك نسمه تدخل مع ابوها الضحكه تروح من وش صابر عويس اول ما يشوفه يبص على نسمه باصه فى الارض ياخدها و يروح للعسكري و كل شويه يبص لصابر صابر يبص الناحيه التانيه و شاكر متابع اللى بيحصل و حزين
………………………….
فى شقه عمران
ناصر / مش كنا استنينا فى المستشفي شويه لحد ما يشد حيله
عمران / يا ابنى اقسم بالله بقيت زى الفل و بعدين انا مش فاضي لكل الهبل ده انا ورايا امتحانات
مختار يدخل
مختار / العيال اللى مسكناهم قروا باللى كاريهم و مش هتصدق مين
ناصر / دكتور النيله و السواد زى العيال ما قالوا فى المستشفي ؟
مختار/ بنته
عمران / كبر دماغك منها يابا ربنا يصبرها على دماغها
ناصر / طبعا شهم العيله لما عرف ان حقه عند حرمه استعوض فيه ربنا بس تفتكر يا حبيبي انها مش هتحاول تكررها تانى
عمران / هتعمل لها ايه يا ناصر و بعدين البت محروقه جامد و اتاخدت فى الرجلين و ما كان لهاش ذنب فى كل ده اصلا
ناصر / حاسس انك عارف حاجه و لا انت خايف الليله توسع و توصل لمهره
مختار/ و ايه علاقه مهره بالموضوع
جرس الباب يضرب
ناصر / هروح افتح
ناصر يروح يفتح يلاقى صوفيا و معاها راجل
الراجل / الانسه بتسأل عن سي عمران بتقول انها اخت مراته
ناصر / هو انتى
…………………………
فى الاسطبل
نجاه واقفه بتفرك و مهره ماسكه ولد صغير قاعد على الفرس تنزله و تروح ناحيه نجاه و تشاور لها
نجاه / تمام كدا يا حبايبي النهرده معادنا باذن الله بعد بكره فى نفس المعاد ما حدش يتأخر … وصل العيال دى يا عم أنيس
أنيس/ تمام يا ست نجاه
نجاه تقف مع مهره
نجاه / ايه رايك
مهره تشاور لها بصابعها لتحت وحش
نجاه / ليه بس كدا
مهره تطلع الموبايل و تكتب
مهره/ مش عارفه اتواصل معاهم
نجاه / واحده واحده كل حاجه هتظبط اصبري على نفسك
مهره تبتسم بسخريه
نجاه / يا بنتى هتخفى و الله و هترجعى تتكلمى تانى بس انتى لازم تساعدى نفسك
مهره تكتب
مهره / انا محتاجه شغلانه تانيه ما يكونش فيها كلام حاجه مكتبيه مثلا
نجاه / ايه الملل ده مش هتلاقى نفسك فى الهبل ده
مهره تعوج راسها و تبص لها بزهق
نجاه / ادى لنفسك فرصه  ... بقولك ايه ما تيجي نفكنا من كل الدنيا دى و ناخد لينا فرستين جامدين كدا و نهرب
مهره تهز راسها لا
نجاه / ما تبقيش نكديه بقي
مهره تشاور على القمر
نجاه / و فيها ايه يعني
مهره تتنهد و تروح تجيب شنطتها و ترجع لنجاه واقفه سانده على السور و زهقانه تشاور لها مالك
نجاه / مش عاوزه اروح ... تعالى نتمشى فى البلد شويه طيب زهقانه بجد ... تعالى ناخد مركب ... تعالى نقعد على البحر عموما مش لازم ننزل يعنى
مهره تكتب / مالك فى ايه
نجاه / زهقانه مش عاوزه اروح
مهره تبص لها باستغراب تليفون نجاه يرن تبص بابا
نجاه / خلصت طبعا لازم انط ابقي فى البيت طبعا ... السلام عليكم ... اه خلصنا ... قاعدين شويه يعني ما فيش حاجه ... تمام مش هتاخر حاضر … فى حفظ الله
نجاه تقفل
نجاه / دا انا لو مسجونه مش هيعملوا معايا كدا
……………………
فى شقه عمران
ناصر / انا حقيقي اسف جدا على الطريقه السخيفه اللى قابلت حضرتك بيها بس اكيد قدرتى موقفى
مختار / موقف ايه و زفت ايه حتى لو التانيه ... كلامنا بعدين
صوفيا / هو ما حصلش حاجه لكل ده اصلا انا اساسا مش فاهمه ليه كل ده و ازاى ايلين تعمل كدا اصلا
عمران / انا اسف للمقاطعه بس انا مش قادر اقاوم فضولى ... هو انتى عرفتى مكانى منين
صوفيا / مش سر حربى اللى يسأل ما يتوهش و بعدين انت الف ما شاء الله يعني الف من يدل عليك حبايبك كتير ... سألت فى النادى
عمران يهز راسه
صوفيا / كان أولى تسأل انا جايه ليه
مختار / انتى تنورى فى اى وقت
صوفيا / ميرسي ... بس الحقيقه انا كنت جايه اصلا عشان مهره ... بس واضح انها مش عاوزه تقابلنى
عمران / مهره مش هنا
صوفيا / طب هى كويسه صح انا محتاجه اتكلم معاها ضرورى
مختار / هى فى البلد
صوفيا / طب ممكن العنوان انا مستعده اروح لها اى مكان فى الدنيا
عمران / خير... ايه اللى فكرك بيها اصلا دلوقت خصوصا بعد كل اللى حصل
صوفيا / انا مش شريره على فكره بس لما طلع عنها الكلام الوحش ده اكيد خفت على نفسي بس لما مروان اتقبض عليه حسيت انها مظلومه و بعدين ما تبصليش كدا مفيش واحده تتجوز واحد من ورا اهلها سنه كامله من غير ما تقولهم و تطلب مننا نتعامل معاها عادى
عمران / ما اتجوزتش
صوفيا / امال كتبتوا الكتاب ليه ؟ ليه ما جيتش تطلب ايدها من بابا دايركت او من باباها ليه خبيتوا
مختار / الموضوع كله على بعضه مش زى ما انتى فاكره بس اقسم لك بالله مهره ما فى احسن منها
صوفيا / طب ممكن حضرتك تشرحلى ايه اللى حصل ده بالراحه
ناصر / هو انتى فاكره ان مهره تعرف مكان ابوكى ؟
صوفيا تبص لناصر باستغراب مختار يبرق لناصر
مختار / ممكن بعد اذنك تعمل لينا اتنين شاى لحد ما اشرح لانسه صوفيا الحكايه كلها
ناصر / حاضر
صوفيا/ انا عارفه ان بابا كان قريب جدا من مهره بس اللى اعرفه انها فجاه قطعت كل علاقتها بينا من ساعه طلاقه من ماما
عمران / حصل
صوفيا / بس انا متاكده انها عارفه مين الحيوانه اللى اخدت بابا مننا هى كانت أقرب واحده ليه و انا حاسه انها عرفت عن علاقتهم دى و دا كان سبب انها بعدت عنه
مختار / لا الحقيقه مش كدا
عمران يبص لمختار
مختار / هى علاقتها بوالدك ما كانتش قويه اوى كدا
صوفيا/ ازاى بس دول كانوا
مختار / هى فعلا انسحبت لما عرفت بقرار طلاق بابكى من مامتك و حاولت تصلح بينهم و لما الموضوع خرج عن السيطره انسحبت خالص و دى كانت غلطتها الوحيده لان بعدها عن مامتك اللى للاسف اكيد ليها دور كبير فى كل اللى حصل خلاها لوحدها و ساعتها مروان استغل الموضوع و قرب منها و رسم دور الأخ الحنين و فجاه بدون مقدمات اكتشفت انه كان بيحط لها مخدرات و برده لا ابوها و لا امها صدقوها و فى الاخر رموها فى مركز علاج سئ السمعه و حاولنا نقول لهم عن فضايح المركز ده بس ما حدش صدقنا فاضطرينا نزور قسيمه عشان نقدر نخرجها
صوفيا / لا لحظه القسيمه كانت حقيقيه انا سامعه بابا بيتكلم مع المحامى دى كانت متسجله
مختار / الفلوس تقدر تعمل حاجات كتير جدا فى البلد دى
صوفيا تبص لهم باستغراب
مختار/ المشكله اننا حاولنا برده نقول لمامتك و باباها الحقيقه و انها مش متجوزه برده ما حدش صدقها و دا عمل لها انهيار عصبي و اثر على حالتها النفسيه و فقدت النطق و المفروض انها بتتعالج فى البلد عندنا
صوفيا / حاسه بايرور و مش قادره استوعب حاجه من الكلام ده بصراحه
مختار / كل اللى اقدر اقوله ان اختك مش وحشه و انها انضف انسانه ممكن تتعاملى معاها فى حياتك
صوفيا / طب ما علينا من مهره ... ايه اللى وصل العلاقه بينك و بين ايلين انها تحاول تاذيك
عمران / لان خبر جوازى من مهره انتشر فى الكليه بس طبعا على بيه مش قايل للناس انه عنده بنت تانيه غير ايلين فالطبيعى الناس افتكروا انى متجوز ايلين و انا روحت لخطيبها و شرحت له كل حاجه بما فيها كل اللى بابا قاله ده
صوفيا / ماشي ما انت صلحت الموقف اهو تأذيك ليه
عمران / اساليها
صوفيا / طب انا محتاجه اتكلم مع مهره ضرورى
مختار / انا راجع البلد بكره الصبح ممكن تيجي معايا لو تحبى ... هى بعيده شويه و اكيد هتضطرى تباتى فالأفضل تبلغى والدتك ... بس ما تقلقيش هتفضلى امانه فى رقبتى لحد ما ترجعى باب بيتك يعني ما تشيليش هم مواصلات رايح جاى و لا أقامه
صوفيا / تمام ... اقابل حضرتك فين
مختار / هعدى اخدك الصبح من قدام باب الفيلا عندكم
صوفيا تهز راسها و تقوم تقف ناصر يطلع شايل الشاى
ناصر / على فين و الشاى
صوفيا / نشربه فى البلد عندكوا باذن الله
مختار / انستى و نورتى
صوفيا تبتسم و تمشي مختار يوصلها و ينزل معاها و يقفل الباب وراه
ناصر / هى البلاعه دى مش ناويه تتقفل بقي هتفضل تطفح علينا كدا كتير
عمران / انت شاغل نفسك ليه ما تكبر مخك
ناصر / يا عم الحق عليا بفكر فيك
عمران يخبط على كتف ناصر و ياخد كبايه الشاى و يدخل اوضته و يقفل الباب برجله
ناصر / دا انتوا عيله ما يعلم بيها الا ربنا
……………………
فى اسكندريه على البحر
جابر واقف همام يروح يقف معاه
همام / ما يتشبعش منه عارف
جابر / فعلا
همام / بس انت لازم ترتاح ورانا بكره ليله كبيره اوى و لازم تبقي فايق
جابر / مستنى مكالمه تليفون
همام/ تمام هستاذنك اروح انا انام لان يومى النهرده كان طويل اوى بس لو احتاجتنى فى حاجه اديني بس رنه ما بقفلش موبايلي
جابر / ما اتحرمش
همام يبتسم و يمشي جابر يطلع الموبايل و يبص فيه و يحطه فى جيبه تانى
.....................
فى اوضه نجاه
نجاه واقفه فى البلكونه بتقرقض ضوافرها و مضايقه و كل شويه تبص فى الموبايل تليفونها يرن عمران تستغرب و ترد
نجاه / السلام عليكم .. خير فى حاجه و لا ايه ؟
عمران / فى حاجه كدا مش عارف حد قال ليكوا عليها و لا لا ... صوفيا اخت مهره من امها جت النهرده بتدور عليها
نجاه / جت لك البيت
عمران / المفروض انهم عارفين انى جوزها
نجاه / ااااه ... بس عرفت عنوانك منين
عمران / سألت فى النادى ... ما علينا ... المهم انها هتيجي بكره البلد مع بابا
نجاه / نعم !! هو عمى مختار عندك !! سافر امتى
عمران / ما تركزي يا نجاه بقولك هتيجي البلد
نجاه / ما تيجي يعنى
عمران / هتيجي لمهره
نجاه / مش فاهمه
عمران / احنا ما قولناش كل التفاصيل طبعا الحمل و الاغتصاب و كل الكلام ده قصيناه من الحكايه و طبعا ما قولناش اننا نعرف مكان ابوها
نجاه / ااااه تصدق صعبت عليا ... أكيد بتدور على ابوها ما طبيعي ما هى مش عارفه حقيقته
عمران / المهم يعني حاولى تكلمى مهره و تاهليها نفسيا لمقابلة اختها و لعله خير يمكن لما تحس ان اختها واقفه جنبها الوضع يختلف ... صوفيا صدقت ان مهره مظلومه لما اتقبض على مروان
نجاه / تمام ... فهمت فهمت
..................
جابر واقف على البحر
جابر فاتح التروكولر على رقم نجاه و ظاهر انها مشغوله يفكر ثوانى و يتصل بجوزيف يرد
جوزيف / السلام عليكم ايه اللى مصحيك لحد دلوقت مش وراك مشوار مهم الصبح
جابر يرتبك و يلم نفسه
جابر / بطمن عليك
جوزيف / بتكلم عمران مش بتكلمنى
جابر / بتتكلم عن مين ؟
جوزيف/ متصل ليه يا جابر اؤمر
جابر / بطمن عليك
جوزيف/ احسن بكتير الحمد لله قاعد فى الشقه و اكيد انتوا عارفين ده
جابر / و مستغربه
جوزيف/ و مش مستغرب اى حاجه تانيه غير ان واحد عيان بيرتاح يومين ... تمام
جابر / المشكله ان كل ما الواحد بيحاول يمد لك ايده و يعاملك حلو تندمه باسلوبك ده
جوزيف / ما تصيعش و خليك دغرى معايا و انا على قد ما هتديني هتاخد اضعاف و انت مجربنى قبل كدا
جابر / امتى ده امتى اخدت منك اى حاجه اصلا
جوزيف / لما انقذت حياتى قولتلكوا ما تنزلوش الإنفاق و قدام حياتى اللى هو شخص واحد انقذتكوا كلكوا ... و ازيدك من الشعر بيت لما قولتلك ازاى تحتوي نجاه فى عصبيتها ... ايه لحقت تنسي
صمت
جوزيف / ايه اللى مصحيك لدلوقت يا جابر
جابر / رايح انام ... تصبح على خير
جوزيف / و انت من اهله
جابر يقفل و يتصل بعمران مشغول يتنهد و يحط الموبايل فى جيبه و يدخل السرايا
........................
فى اوضه نجاه
نجاه / طب اقفل و شوف كان عاوزك فى ايه ... نايمه يا عمران نايمه لما تصحى هبقي اكلمها... سلام
نجاه تقفل و تقف تبص على السما توصلها رساله
جوزيف / ايه اللى مصحيكي لدلوقت
نجاه تبص حواليها توصلها رساله تانيه
جوزيف / بصي على الحيطه
نجاه تبص تلاقى ميكروروبوت تتصل بيه
نجاه / انت بتستهبل
جوزيف / و الله ما انا اللى باعته انا بس داخل على اشارته
نجاه / اه تبقي ست زفته
نجاه تقلع الشبشب الميكروروبوت يطير بعيد تحدف الشبشب عليه ما تجيبوش تتكلم فى التليفون
نجاه / و يا ترى الهباب ده بقي صور ايه
جوزيف / يا بنتى امان دى بتحبك اكتر منى
نجاه / يا سلام ما انت داخل على كاميرته يعني اى كان اللى شافته انت شوفته
جوزيف / لا ما شوفتش حاجه احنا قاعدين هنا فى البلكونه و القمر بيطلع لنا هى عمرها ما هتحطك فى موقف وحش او تعرضك للخطر
نجاه / طبعا عشان خطتها ما تبوظش
جوزيف / و كانت ايه خطتها بقي
نجاه / تخطفني و لا نسيت
جوزيف/ و بعد ما تخطفك ايه اللى هيحصل
نجاه / ما تسوحنيش فى حوارات القرف ده آخرته ايه
جوزيف / قرف ايه
نجاه / انت مالك النهرده مش مركز ليه؟
جوزيف / انتى اللى مش فى المود بقالك حبه مين الحيوان اللى مزعلك و انا اجيبهولك فى شوال ها احكيلى سامعك ايه اللى مزعلك
نجاه / مفيش حاجه مضيقانى غير الزفت ده
جوزيف / ما تحوريش بقي انتى بقالك ساعتين بتفركى فى البلكونه قبل ما تعرفى ان فى زفت اصلا ... متخانقه مع جابر و لا ايه ؟
نجاه / لا ... ليه بتقول كدا ... هو قالك حاجه ؟
جوزيف يضحك
جوزيف / اصل انا و هو صحاب جدا و ما بيخبيش عنى حاجه فتلاقيه لما بيضايق بيجرى يتصل بيا يفضفض معايا على طول
نجاه / خفه
جوزيف / طب و الله لسه متصل بيا من شويه
صمت
نجاه / كويس
جوزيف / ايه اللى حصل ... اتكلمتوا فى حاجه و اتخانقتوا ؟
نجاه / هو مش حكالك؟
جوزيف / ما تبقيش غبيه بقي اكيد لا دا كان بيتصل لحوار اهبل زيه
نجاه / على فكره بابا مش هيبعته اسكندريه الا لو فى حاجه كبيره بتحصل
جوزيف / نقله سلاح على درونز كان ممكن اى حد تانى يقوم بيها عادى يعني
نجاه/ يعني قالك و ما قاليش
جوزيف يضحك على اخره
نجاه / دا انتوا مستفزين زى بعض
جوزيف / اكيد مش مستنيه يقولى يعنى عشان اعرف بيعمل ايه ... نجاه انتوا ازاى لحد دلوقت لسه بالسزاجه دى انتوا كل نفس بتاخده متراقب
نجاه / الله !! طب ما دام انتوا جامدين اوى كدا ما تعرف لوحدك ايه اللى حصل بيني و بين جابر
جوزيف يضحك
نجاه / بطل استفزاز بقي
جوزيف / انا عملت ايه ؟!!
نجاه / ما عملتش اقفل بقي
جوزيف / ما تتصلى تتطمنى عليه
نجاه / عمرى
جوزيف / مش يمكن حاجه حصلت له
نجاه / ما كانش البيت هيبقي هادى كدا كان زمان الدنيا قامت ما قعدتش
جوزيف / طب ما هم اتهجموا على عمران و ضربوه و الدنيا نايمه و لا حد فيكوا حس بحاجه
نجاه/ انت بتقول ايه انا لسه قافله مع عمران دلوقت و كان زى الفل
جوزيف يضحك
نجاه / بطل بقي ... انت بتتكلم جد و لا بتشتغلنى ... عشان كدا عمى مختار سافر من غير ما يقول لحد
جوزيف / ايوه
نجاه/ طب هم بخير صح
جوزيف / كلهم زى الفل
نجاه / انا مخنوقه اوى
جوزيف / امممم موقف لا احسد عليه بصراحه ... اصل فى العادى كان ممكن اجى اخطفك و اخليكى تغيرى جو و تنسي كل العبط ده بس انا ما عدش ينفع اعمل كدا
صمت
جوزيف / عشانك مش عشانى ... عشان هم اغبيه و جوبنا مش هيقدروا عليا بس هيستفردوا بيكى و يستقوا عليكى
نجاه / عمرهم
جوزيف / تمام
نجاه / بيخافوا عليا من الهوا و بيحمونى مش اكتر
جوزيف/ طب ما انا كمان بخاف عليكي و بحميكي... بس على الاقل سايبك تتنفسي و فاهم شخصيتك
صمت
جوزيف / انا ما كانش عندى اهل ما افهمش فى اللى انتى بتعيشيه ببص على الدنيا من بره مش عايشها بس كل اللى فاهمه هو احساسي ان مش من حق حد اى كان يتحكم فيا و فى حياتى انا من حقى اعمل و اعيش اللى انا عاوزه اللى انا بحبه
نجاه / و انت بتعمل و بتعيش اللى انت عاوزه ؟
جوزيف / للاسف لا ... ما عنديش الرفاهية دى ... اكيد ما اخترتش العيشه دى ... اكيد سألت نفسي كتير ليه ما اتولدتش بهيمه فى وسط القطيع بتصحى تشتغل و تاكل و تنام و مش حاسين باى حاجه من كل اللى بيحصل حواليهم ... ليه عندى القدرات دى و ايه فايدتها اذا كنت برده مش قادر اغير حاجه او اخرج من الحرب دى ... ليه ما موتش مع اللى ماتوا ازاى قدرت اعدى من كل اللى فات و ايه اللى مستنينى و اخرتها ايه
نجاه / خير كبير باذن الله
جوزيف/ ازاى و انتى و هى طول الوقت فى خطر
نجاه / انت بتقارن بيني و بينها
جوزيف / ما ليش غيركوا
نجاه / هيجي وقت و هتختار على فكره لان انا و هى ما ينفعش نبقي فى كفه واحده
جوزيف / لو تعرفى بتحبك قد ايه و مستعده ازاى تضحى بحياتها عشانك
نجاه / شوفت شوفت
جوزيف / غبيه زى ابوكى بالظبط
نجاه / ما تقولش على ابويا غبى
جوزيف / الله !! طب ما اتحمقتيش على جابر من شويه ليه
نجاه / بتحمق له طبعا دا ابن عمى
جوزيف / ماشي
نجاه/ عاوزه اقولك حاجه
جوزيف / سامعك
نجاه / اوقات كتير مش بنبقي فاهمين حكمه ربنا بس لازم نرضي و مع الوقت بنفهم... الشيطان مش هيجي يقولك دايركت اعمل معاصي ... هو بس هيصعب الحلال فى عنيك و هيسحبك واحده واحده و بشويش ... مش هيقولك ما تصليش بس هيقنعك ان صلاتك وحشه و يفضل يقولك اقف عدل اخشع اكتر ازاى بتفكر و انت بتصلى هى دى صلاه دى انت بتصلى عدل قدام الناس عشان رياء انت صلاتك مش مقبوله لو كانت انقبلت ما كنتش عصيت ربنا بعدها لان الصلاه تنهى عن الفحشاء و المنكر و ما دام لسه بتغلط يبقي ما صليتش هى دى صلاه ؟! هى دى صلاه ؟! لحد ما تفتر و تبطل تصلى ... الشيطان مش هيجيلك صريح لانه ضعيف لو وقف قدامك راجل لراجل هيتهزم لازم ترضي و تصبر
جوزيف / اديني راضي و صابر اما نشوف
نجاه / لازم يقين يا يونس لازم تبقي متاكد ان ربنا هيعوضك
جوزيف / طب لو كنت عاوز عوض معين لو كنت عاوز حاجه معينه هيديهانى ؟
نجاه / لو فيها خير ليك هيديهالك ما يمكن انت مش عارف مصلحتك او يمكن عاين ليك حاجه احسن
صمت
نجاه / اقولك حاجه
جوزيف / سامعك
نجاه / انا بحب اتكلم معاك فى الحاجات دى ... بفكر نفسي و بهدى ... بقولك الكلام اللى ببقي محتاجه اسمعه
جوزيف / و انتى بقي عاوزه ايه
نجاه / فى ايه ؟
جوزيف / كعوض يعني ... عاوزه ايه و نفسك فيه و مستنيه ربنا يكافئك بيه او يعوضك بالاحسن منه
نجاه / مفيش .. عاوزه بس اهلى يبقوا بخير غير كدا مفيش حاجه ... الحمد لله عندى كل حاجه
جوزيف / ما عدتيش عاوزه تبقي الكبيره
نجاه / عاوزه ابويا يبقي بصحه و بخير مش عاوزه حاجه تانى
جوزيف / يعني جابر ياخدها عادى
نجاه / كدا كدا مش هيدوهانى ... و الحوار الاهبل بتاع المجلس هيساعدنى
جوزيف / لا لا لا دا كان زمان و جبر ما عادش فى الكلام ده
نجاه / لحظه ... اشمعن
جوزيف/ عشان ... عشان حاجات كتير
نجاه / بس انت قولت
جوزيف/ هو انتى يعني هتقبلى شروطهم اكيد لا ... لا عمرك هتحطى ايدك فى ايدهم و لا هتقدرى تقدمى فروض ولاء و طاعه و لا هتستحملى اللى هيعملوه فيكي
نجاه / ماشي ما كل ده معروف من زمان و مع كدا كنت بتحاول تقنعنى بالعكس ايه اللى غير رايك
جوزيف / انا اتغيرت
نجاه / للأحسن على فكره
جوزيف / الحمد لله الفضل يرجع لك نرجع لموضوعنا... هتقبلى جابر يبقي الكبير
نجاه / ما اعتقدش ان وقتها فى اى حاجه فى الدنيا ممكن تفرق معايا بعد ابويا مفيش اى حاجه تهمنى
جوزيف / ايه اللى غير رايك
نجاه / ما اتغيرش ... انا بس ما كنتش واخده بآلى من حاجات كتير الطموح كان عاميني... فوقت لما قولتولى انى عمرى ما هبقي الكبيره الا لما ابويا يموت و فوقت اكتر لما ... انا كل اللى عايشه عشانه انه يبقي فخور بيا ... كنت بقلده فى كل حاجه بحب الحاجات اللى بيحبها و باكل نفس الاكل و بنفس الطريقه طموحه زيه و ما بقبلش الهزيمه زيه ... و ما بستسلمش زيه ... حتى حوار الكبيره ده كنت عاوزه ابقي الكبيره عشان ابقي زيه امشي بنفس دماغه و اكمل مسيرته
جوزيف / بس انتى مش زيه يا نجاه
صمت
جوزيف / بتحاولى بس انتى مش زيه انتى مش هو انتى نجاه انتى شخصيه تانيه خالص
نجاه / شوفت منى ايه خلاك تقول كدا
جوزيف / شوفت نظرتك ليا
نجاه / انت برده اللى عملته فيه مش شويه
جوزيف / و اللى عملته فيكي ما كانش شويه يا نجاه نسيتي يعني ؟! تحبى افكرك انا عملت فيكي أيه ؟
نجاه / دا كان جوزيف مش انت
جوزيف / انتى قدرتى تفصلى هو ما قدرش انتى أقرب لمختار من عباده
نجاه/ انت اذيتنى انا ما اذيتش ابويا... هو مش قادر يسامحك لأنك وجعت قلبه بيا لكن انا قلبي فيهم هم لو كنت اذيتهم هم ما كنتش هقدر اسامحك انا كمان
جوزيف / نفسي ابقي اب ... ما كانش نفسي بس دلوقت بقي نفسي اوى ... بس بشرط... تبقي زيك ... او يبقي... المهم يبقي زيك انتى
نجاه / ربنا يرزقك بالذريه الصالحه
جوزيف / انا و انتى يا رب
نجاه / انا و انت و كل المسلمين و المسلمات باذن الله ... انا هدخل انام تصبح على خير
جوزيف / يا ريت و الله
نجاه/ يا ريت!! على فكره انا
جوزيف / لا لا لا دا انا ما صدقت ان مودك اتعدل المكالمه لو طولت عن كدا هصحى الاقى ابوكى واقف فوق دماغى انا و انا مش فايق له
نجاه / يا ابنى ارحمنى بقي ما لكش دعوه بابويا سيبه فى حاله
جوزيف / تصبحى على خير يا نجاه
نجاه / و انت من اهله سلام
نجاه تقفل و تدخل السرير جنب مهره نايمه تنام جنبها
..........................
فى اوضه عباده
عباده نايم جنب خديجه منبه تليفونه يرن يطفيه بسرعه خديجه تصحى
خديجه / صباح الخير ... هدخل الحمام الاول
عباده / صباح النور ... اتفضلى
عباده يقوم يقعد على السرير و يمسك الموبايل يبص فيه و خديجه تروح الحمام عباده يلاقي رسالتين من دياب على الواتس يفتح
دياب / نجاه اتكلمت اكتر من مكالمه فى التليفون امبارح بالليل منهم مكالمه طويله مع يونس ... ما سمعتهاش بس بعتها لحضرتك لو تحب تسمعها ... انا بس لفت انتباهى طول المكالمه و التوقيت
عباده ملامحه تتغير و يفتح الدرج و يطلع الايربود و يبدأ يسمع الفويس و هو عمال يفرك
خديجه تطلع من الحمام تشوف ملامحه تتخض
خديجه / فى ايه يا عباده مالك
عباده يشاور لها بصابعه تسكت تقف تتابعه
خديجه / استر يا رب
عباده يقوم يدخل الحمام و يقفل عليه الباب و خديجه متابعاه و مرعوبه
....................