(((((( الكبيره ٢)))))
#لولو_محمد
الحلقه ١٠٧
حاتم / انا كمان كنت بلعب فروسية بره بس مش احتراف ... هوايه
صوفيا / بجد!! طب ما تقوم كدا تورينا شطارتك
حاتم / و ماله ... يلا بينا
صوفيا / لااااا انا ما ليش فى الجو ده خالص خد انت بقي مهره و روحوا انجوى و انا هستناكوا هنا
حاتم / يلا
مهره تتحرج و تبقي مش عارفه تعمل ايه عمران و نجاه يدخلوا مهره تتحمس جدا و تقوم تحضن نجاه
صوفيا / اهلا ايه المفاجاه الحلوه دى عرفتوا مكانا ازاى
عمران / انا كنت جاى اتمرن عادى صدفه سعيده جدا.... عمران الزيني
حاتم / سمعت عنك
عمران / يا رب يكون خير
حاتم / خير اكيد ... اه سورى حاتم شركس رجل أعمال و صديق قديم لعيله الصيردى
عمران / اهلا و سهلا
نجاه / طب هاخد انا مهره و نسبقكوا و تبقوا تحصلونا
حاتم / على فين ... اصل كنت متفق مع مهره نركب خيل سوا
عمران يبص لحاتم و يلم نفسه و يبتسم
...........................
عمران / كويس نركب كلنا سوا بقي ... تحبى تيجي يا انسه صوفيا
صوفيا / لا مش بعرف للاسف بس كنت عاوزه اتكلم معاك فى موضوع بعد اذنك
نجاه / خير
عمران / تمام اسبقونا انتوا و انا هحصلكوا
نجاه / نعم
مهره تمسك ايد نجاه و تتحرك و نجاه تتحرك معاها و عينها لورا على عمران و حاتم وراهم
عمران / خير فى جديد و لا ايه ؟
صوفيا / كنت بطمن عليك طنط و نجاه كانوا معانا و انت كنت لوحدك
عمران / لا كان معايا جابر و الرجاله و بعدين ما انا هنا لوحدى عادى يعني ... المهم انا كلمت عم امين ... المحامى اللى قولت لك عليه و قال هيبعت حد يقعد مع الانسه بياتريس و يفهمها كل حاجه و يساعدها فى كل اللى هتحتاجه
صوفيا / انت فى حاجه مضيقاك منى ؟
عمران / ابدا ليه بتقولى كدا
صوفيا / حاسه انك مش حابب تقف تتكلم معايا
عمران / لا خالص عادى بس انا للاسف ما عنديش وقت كتير فاضي فلو مش هتمرن يبقي اروح اذاكر احسن انتى فاهمه ما عادش فى وقت خالص
صوفيا / ايوه فاهمه
عمران/ ها تحبى تيجي معانا
صوفيا/ انا مش بعرف بس لو هتعلمنى اكيد مش هقول لا
عمران/ انا مش شاطر خالص فى موضوع التعليم ده بس مهره شاطره فيه جدا و نجاه كمان
صوفيا/ انت ليه بتتجنبنى
عمران / انا !!
صوفيا / رفضت انى اركب جنبك و سمحت لمهره و دلوقت... تعرف مفيش مشكله انا كدا كدا مش هفرض نفسي عليك ... كفايا عليك مشاكل مهره ... انا هروح استاذنك تبقي توصلها عن اذنك
صوفيا تمشي و عمران متابعها و ساكت يتنهد و يروح ناحيه المران
...............................
فى شقه نسمه
الباب يخبط نسمه تروح تفتح تلاقي ابوها
نسمه / اهلا و سهلا اتفضل تعال ادخل حماتك الله يرحمها كانت بتحبك لسه طافيه على صينيه مسقعه بالخل و التوم انما ايه تاكل صوابعك وراها ثوانى هغرف لك
عويس / صابر قابل فيراس ابن عمك
نسمه تتخشب
عويس / فى حد سرق مهرك من بيت فيراس
نسمه / ابا احنا اتكلمنا كتير انا مش هتجوز فيراس
عويس / و قولتى كمان انك مش هتتجوزى صابر
نسمه / انا فى العده
عويس / صابر قال لفيراس فى وشه انه هيتجوزك قالهاله قدام الناس كمان يعني فتح علينا القديم و الجديد
نسمه / ما يعلمهاش
عويس / يعني انا كداب
نسمه / لا سمح الله اكيد لا بس صابر ما يعملش كدا
عويس / طبعا ما انتى اكتر واحده عرفاه
نسمه/ يابا صابر سكت السنين دى كلها صابر مش عاوز لى مشاكل
عويس / و ايه كمان ... اشجيني... صابر بيعمل ايه كمان
نسمه تبص لابوها و تسكت
عويس / فوقى لنفسك و لآخر مره بحذرك لو لسانك خاطب لسانه او عينك جت فى عينه
نسمه / يابا انا على يدك لا بخرج من البيت و لا معايا محمول حتى انتوا اللى بتجيبولى كل حاجه يابا انا لا عاوزه جواز و لا ليا كيف فى حاجه غير انى اربى عيالي يابا
عويس / انا لآخر مره بكلمك بالادب المره الجايه هبكيكي يا نسمه هبكيكي جامد
نسمه / هروح اسخن لحضرتك رغيفين و اغرف لك طبق مسقعه
عويس يروح يقعد و نسمه تروح المطبخ بتقدم رجل و تأخر رجل
.........................
فى النادى
حاتم / انا بجد انبسطت جدا معاكوا النهرده على فكره انا كنت محتاج الجو ده جدا
عمران / طب الحمد لله نبقي نرتب نكررها
حاتم / اكيد ... هى صوفيا فين
عمران/ اعتقد مشيت
حاتم / بجد !! طب هبقي اكلمها فون بقي اطمن عليها ... تحبى تيجي اروحك فى طريقي يا مهره
نجاه/ شكرا انا هروحها طريقنا واحد
حاتم / تمام ... هنكررها اكيد
عمران / باذن الله اكيد
حاتم يبتسم و يمشي
نجاه / ما حبتوش
عمران / مش مطلوب منك تحبى كل الناس على فكره
نجاه / انت فاهم قصدى
عمران/ و انا كلامى واضح انتى اساسا غالبا مش هتتعاملى معاه تانى فنزليه من على دماغك
نجاه / ماشي يا عاقل
عمران / تحبوا تاكلوا او تشربوا حاجه قبل ما نروح ؟
نجاه / لا خلينا نروح على طول احسن
عمران / تمام يلا بينا
.......................
فى الجبل
شاكر / طب و انت ايه اللى مضايقك اوى كدا
صابر / انت ما تعرفهمش قدى دلوقت هيسيبوا كل القرف اللى بيعملوه و هيمسكوا فى الكلمه بتاعتى انا و هيعملوا مليون قاعده و كل واحد يفسرها على مزاجه... انا كصابر يمين بالله ما فارق معايا كل ده انا كل اللى فارق معايا البت الغلبانه اللى هتحاسب على مشاريب هى لا طلبتها و لا داقتها حتى
شاكر / لا حول و لا قوه الا بالله
صابر / ساعات شيطانى بيقولى كرسي فى الكلوب و اعمل اللى يريحك انت حتى لو هتاخدها غصب عن عين الطخين بس الناس ما بترحمش مش هيتكلموا فى وشي ... هيخافوا بس هيضايقوها و يضايقوا العيال
شاكر / مفيش حلاوه من غير نار
صابر / بس مين اللى هيتلسع من النار دى يا شاكر
شاكر / وجه نظر
صابر / عارف انت طول ما هى مرتاحه و مبسوطه و بخير ... انا راضي يمين بالله ما عاوز حاجه تانيه ... هم بس يسيبها فى حالها و انا و الله ما هاجى جنبها حتى لو هتقطع مليون مره مش هقرب بس هم مش عاوزين يسكتوا و يبطلوا فرك
شاكر / انت ليه ما واجهتش عويس بالفيديو بتاع الشنطه
صابر/ مش هيفرق معاه و ممكن يكابر و يروح يحط ايده فى ايديهم و ينصص معاهم كمان
شاكر / لا عويس المسأله بالنسباله مش فلوس ...بس هو مادى اه بس لو حسبها يلاقى كفتك طابه عن عيله الجزار
صابر / كفتى مالت لما دخل فيها الحرام مهما كان بسيط و سطحى ربنا ما باركلناش ... بتستر مع ناس تانيه بس .. لعله خير ما حدش عارف حكمه ربنا و ادينا راضين
شاكر / اهم حاجه و لعلمك بقي انا متفائل
صابر / انت خساره فى البلد دى و الله يا شاكر
شاكر يتحرج
صابر / ايه ده انت وشك احمر كدا ليه
شاكر / خلاص يا عم ما تافورهاش بقي
صابر / سكت سكت
شاكر يبص الناحيه التانيه صابر يمسك دقنه و يخليه يلف له
شاكر / ما خلاص بقي يا عم ما تهدى
صابر يضحك بصوت عالى شاكر يبص الناحيه التانيه
.......................
فى شقه عمران
تليفون عمران يرن صوفيا يرد
عمران / السلام عليكم... خير انتوا بخير حد جراله حاجه
صوفيا / اهدى اهدى كلنا بخير انا بس مضايقه اوى من اللى عملته النهرده فمعرفتش انام خالص
عمران يتنهد
عمران / الحمد لله اتفزعت
صوفيا / لا اطمن ... بص انا مش هعطلك اكتر من كاد انا زى ما قولت كنت بتصل عشان اعتزر عن اللى حصل النهرده انا بجد الفتره دى مضغوطه و حساسه جدا لاى حد حتى لو باتى او ماما بجد مش قادره اتحمل كلمه من حد و علاطول حاسه باحاسيس سلبيه و مخنوقه و تعبانه اوى عشان كدا اتعصبت على حاجه هبله زى دى و اتصرفت بالشكل ده
عمران / حصل خير ما فيش حاجه حصلت لكل ده
صوفيا / يعني مش زعلان منى ؟
عمران / لا ابدا
صوفيا/ يعني تقبل عزومتى بكره على الفطار
عمران / للاسف عندى مذاكره كتير جدا و مش هينفع خالص
صوفيا/ خلاص نأجلها يوم تانى
عمران / نبقي نرتبها باذن الله
صوفيا / طب اسيبك بقى ما اعطلكش
عمران / فى حفظ الله ... مع السلامه
......................
فى اوضه مهره
مهره و هند نايمين فى نفس السرير
هند/ انا عوزالك كدا فعلا بس مش هستحمل بعادك خلاص خدنا عليكي
مهره تكتب / انا اكيد هاجى ازوركم
هند / الدنيا مش زى عندنا و لا الناس هنا زى ناسنا و انا بخاف عليكي
مهره تبتسم بسخريه و تبص الناحيه التانيه
هند / طب هنا فى ايه زياده عننا ما آللى هتعمليه هنا اعمليه وسطينا
مهره تكتب/ هنا اخواتى
هند تبتسم بحزن و تهز راسها صح مهره تكتب
مهره / انتوا كمان اهلى بس انا محتاجه اقف على رجلى لوحدى
هند / اعملى اللى يريحك و للمره المليون بقولك... مهما حصل انا هبقي على بعد رنه منك
مهره تحضن هند
هند / ربنا يوقف لك ولاد الحلال و يبعد عنك ولاد الحرام قادر يا كريم
......................
فى جنينه كارمن
كارمن/ اختك دى اتجننت اكيد أيه الجنان ده
بياتريس/ و الله قولت لها كدا و بعدين هى فاكره ان حاتم شركس هيبص لمهره دى
كارمن/ و ما يبصش ليه دى بنت على الدسوقي و يمين شمال اكيد هتورثه
بياتريس / دا لو ايلين سمحت لها
كارمن / لما هتبقي مرات حاتم شركس على بذات نفسه هيبقي تحت رجليها
بياتريس / بتهزرى
كارمن / واطى طول عمره ... بس تعرفى حاجه ... هى فكره مش وحشه
بياتريس / مامى !!
كارمن / حاتم ما بيحبش مصر و هياخدها و يسافر و طول ما هى بعيد هنرتاح من مشاكلها اللى ما بتخلصش دى و الاهم اننا هنخلص من شويه الفلاحين اللى لازقين لينا بسببها دول
بياتريس/ مامى هو حضرتك مستوعبه ان صوفي معجبه بواحد من الفلاحين دول
كارمن / اه مستوعبه ... خلينا واحده واحده مش كل المشاكل مره واحده كدا انا مش ساحره ايه فاكرينى أيه ؟ اخبار عمك ايه ؟
بياتريس / ما فيش جديد
كارمن / طبعا ما هو مستفيد ... قولتيلى بقي ان صوفيا طلبت من عمران حد يدير الشركه
بياتريس / اه و فى واحد كلمنى فعلا و جه و قعد معايا و قعد يقول كلام اهبل كدا ما فهمتش منه و لا كلمه
كارمن / بالسرعه دى !!! انا عوزاكى تتصلى بالراجل ده و تقبلى
بياتريس / اقبل ايه
كارمن / اى حاجه ... اللى هيقولك عليه الفلاح ده اقبليه خلى عمك يحس بالتهديد خليه يتحرك عشان يرجع ابوكى بدل ما هو متمرمغ فى خيره و سايبه مرمى كدا
بياتريس / و عمى يقدر يرجع بابا
كارمن / مش عارفه بس انا فعلا محتاجه اروق و اهدى عشان اعرف اتصرف لان مهما كان عمك معاه حق احنا اتهرينا فضايح و مش حمل اى شوشره او فضيحه جديده لازم افكر صح
بياتريس / تمام
كارمن / اتصلى بمهره و قولى لها انك هديتينى و اقنعتينى اديها فرصه و اسامحها و خليها تيجي تعتذر و تراضيني
بياتريس / ليه
كارمن/ عشان أقنعها بحاتم اكيد
بياتريس / و هو اصلا قبل بيها
كارمن / انا هقنعه بس خليها تيجي تعتذر الاول
بياتريس / تمام هكلمها
كارمن تهز راسها و عماله تفكر
.....................
فى شقه عمران
هند بترص الاكل و نجاه بتساعدها
جابر / ما يمكن خير
نجاه / افتكر كلامى كويس العالم دى عمرهم ما هيجي من وراهم خير
هند / هى اختارتهم
نجاه / ما هى كل مره بتختارهم امتى هم اختاروها
هند / اهلها يا نجاه امها و اخواتها
عمران / و التانى كان اخوها على فكره
هند تتنهد
نجاه / المشكله انها ما بتسمعش لحد و كانها غبيه ما بتتعلمش
جابر / دا قرارها و لازم نحترمه على فكره
نجاه / هحترمه حاضر... كل
جابر / حاضر
نجاه تروح تجيب الباقي من جوه و هند تقعد
هند / انا كلمتها امبارح و حتى لو اختها ما كانتش أدخلت تصلح بينها و بين امها هى ما كانتش هترجع معانا كانت هتفضل هنا لحد ما تقف على رجلها و تصلح حياتها
جابر / موقف محترم منها
نجاه ترجع شايله صينيه
نجاه/ موقف غبى
جابر / بس تقدرى تفهميه
عمران / يفرق ايه هنا عن البلد يعني
جابر / ان هنا بلدها هى هناك بلدنا احنا
نجاه / انت ايه اللى جرالك
جابر / الناس مش هتمشي على هوانا و فى حاجات لو ما كناش نتحرك فيها بسرعه تطير من ايدينا
جابر يغمز لعمران عمران يبرقله
جابر / لعله خير
عمران / هى مش قالت لك كل
جابر / ما انا هاكل اهو
عمران / طب كل و انت ساكت بقي
جابر / حاضر ... انا عاوز صدر لو سمحتى
نجاه تحط لجابر صدر
جابر / تسلمى
الكل يقعد ياكل
......................
فى فيلا كارمن
حاتم قاعد و جنبه شنط هدايا كارمن تدخل تسلم عليه
كارمن / اهلا اهلا ايه الغيبه الطويله دى انا زعلانه منك جدا
حاتم / ما اقدرش على زعل حضرتك ابدا ازيك يا رب تكونى بقيتي احسن
كارمن / اه يا حبيبي الحمد لله ... الواحد ما عادش زى زمان ما عدتش بستحمل اى استريس نهائى
حاتم / و الله ما فى حاجه مستاهله ... اتفضلى دى هديه بسيطه لحضرتك انا عارف قد ايه بتحبى البرفيوم ده
كارمن / ايه ده انت لسه فاكر
حاتم / طبعا دا انا كل ما اشوفه او اشمه بفتكر حضرتك على طول ... امال البنات فين
كارمن / نازلين اهو و مهره فى المطبخ ... مش هتصدق البنت دى بتعمل اكل حلو ازاى ... اكرم كان بيموت فى اكلها
حاتم / لا دا احنا ندوق بقي ... هو مفيش اى اخبار عنه صحيح
كارمن / للاسف مفيش اخر حاجه كان انه اتصل بباتى و قال لها انه بيعيش قصه حب ... بس كلامه ما كانش منطقى... ربنا يهديه
حاتم / امين
صوفيا تنزل من فوق و وراها بياتريس حاتم يقف و يسلم
حاتم / ايه الحلاوه دى الطقم ده جديد صح
صوفيا/ عرفت منين يا مجرم... قال يعني حافظ كل لبسي بس دا فعلا جديد لسه اول لبسه
حاتم / يا بنتى انا حافظك صم و عارف بتمشي ازاى لما بتبقي لابسه حاجه جديده
كارمن تضحك
كارمن / مش هتتغيروا ابدا
حاتم / اهلا باتى ليكي وحشه ... جبت لك شنطه اللوان جديده
بياتريس / ميرسي بس انا بطلت الرسم خلاص
حاتم / سمعت و عشان كدا مخصوص جبتهالك عشان حرام موهبه جامده زيك تبطل
صوفيا/ قولها
حاتم / انتى بقي عارف زوقك جبت لك الساعه دى
صوفيا / انت احسن واحد فى صحابى كلهم
الكل يضحك
كارمن / امال الورد ده لمين
حاتم / الحقيقه انا ما كنتش اعرف مهره بتحب ايه فجبت ورد يا رب تكون بتحبه
صوفيا / بتموت فيه ... هى فين صحيح
كارمن / فى المطبخ
صوفيا/ هتشلنى عن اذنكوا هروح اناديها ... هات الورد اديهولها
صوفيا تاخد الورد و تروح المطبخ تلاقى مهره بتغرف مع اللى شغالين
صوفيا / فى واحده طبيعيه تقابل الضيوف بريحه الاكل دى ... اتفضلى حاتم جايب لك الورد ده عشانك
مهره تبتسم و تاخد الورد تحطه فى جنب
صوفيا / ايه مش عاجبك و لا ايه
مهره تبتسم و تكتب فى ورقه
مهره / جميل بس مشغوله فى ضيف مستني الاكل
صوفيا / ضيف !! لا لا لا كدا يزعل حاتم ده واحد من العيله يا بنتى و لولا سفره و شغله ما كانش بيفارقنا ابدا يا هو هنا يا احنا هناك عندهم
مهره تهز راسها
صوفيا / ارتبط بواحده بقي و مش عاوزه اقولك الحمد لله انهم سابوا بعض ... اقولك حاجه
مهره تبص لها
صوفيا / كل البنات شوفى كل البنات كنا بنغير من المعامله اللى بيعاملها بيها و المفاجات و الهدايا... حرفيا كان شايلها هى و أهلها... دا اهلها قاطعوها اساسا انها سابته
مهره تكمل و هى مش مهتمه
صوفيا / تعرفى انه له نسبه مش وحشه فى شركه بابا و شركات تانيه كتير و حرفيا من اشطر رجال الأعمال جوه و بره مصر ... دا لف الدنيا كلها ... و احلى حاجه فيه انه رومانسي اوى
مهره تضحك باستهزاء
صوفيا / مش عاجبك الكلام و لا ايه
مهره تهز راسها مش مهتمه الضحكه تروح من وش صوفيا
صوفيا / طب على الاقل اطلعى غيرى و اللبسي حاجه حلوه شويه ... انتى عارفه المظاهر مهمه قد ايه بالنسبه لماما
مهره تبص لها
صوفيا / هم هيكملوا... اطلعى اللبسي و لو تحبى اطلع معاكى انقيلك حاجه حلوه يلا بينا بقي
مهره تتنهد و تهز راسها موافقه
........................
فى شقه عمران
نجاه واقفه فى البلكونه سرحانه جابر يدخل يحمحم شايل علبتين رز بلبن بالايسكريم نجاه تبص
جابر / تاكلى ؟
نجاه تبتسم و تاخده منه
نجاه / دا اللى بحبه
جابر / قولت اطريها بدل ما الدنيا قافشه كدا
نجاه/ خايفه عليها اوى
جابر / اتكلمنا فى الموضوع ده قبل كدا
نجاه / مش قادر تفهمنى
جابر / فاهمك و الله و عارفك كويس جدا بس انتى اللى مش قادره تقدرى احتياجها ... نجاه
نجاه تبص له
جابر / ايه هى أهم حاجه عندك
نجاه / اهلى
جابر / هى ما تفرقش عنك كتير هى نفسها فى اهل نفسها تحس انها محبوبه منهم ان فى عوض للى عاشته ... العوض اللى فى خيالها مش اللى المفروض تشوفه فهمانى ؟
نجاه تهز راسها اه
جابر / كلى
نجاه تأكل من غير شغف
نجاه / هو ايه اللى هيحصل دلوقت ؟ هنرجع البلد ؟
جابر / لا هنفضل مع عمران لحد ما يخلص و نرجع كلنا سوا ... و الله جد جديد فى حوار مهره هناخدها معانا ... الدنيا احلوت و ظبطت ... يبقي الف حمد و شكر ليك يا رب ادينا الرساله و نعود لقواعدنا سالمين
نجاه تهز راسها و تاكل و هى مضايقه
جابر / على فكره انتى عادى تكلميها فيديو كول و تروحى تزوريها و تخرجى معاها كل يوم ما هاجرتش يعني مفيش سبب للحزن ده كله
نجاه / خايفه عليها قلبي مقبوض مش مرتاحه
جابر / ان شاء الله خير
نجاه / يارب يا جابر يا رب
.....................
فى جنينه كارمن
حاتم / لا حقيقي فنانه من زمان الواحد ما اكلش اكل حلو كدا
مهره تبتسم
صوفيا / ما حكيتوليش عملتوا ايه فى النادى سوا بقي
حاتم / و ليه الاحراج ده بس ما تديها فرصه تنسي الهبل اللى كنت بعمله
كارمن / ازاى بس يا حاتم انت طول عمرك بتحب الفروسيه و شاطر فيها
حاتم / لا بس المرادى المنافسه كانت صعبه اوى بس انا خلاص حطيتها فى دماغى و هاخد حقى يعني هاخد حقى
صوفيا/ لا دا انا اجى اتفرج بقي
مهره تليفونها يرن تستأذن و تقوم تفتح فيديو كول فى جنب
بياتريس / ما كنتش اعرف عنك انك مجامل اوى كدا
حاتم / ليه و انا من امتى كنت قليل الزوق
بياتريس / فرق كبير بين انك تكون قليل الزوق و حقانى و مجامل يا استاذ حاتم
كارمن / باتى
بياتريس / ايه الاكل ما كانش واو اوى كدا ... على العموم انا هطلع اللبس عشان اروح الشركه
كارمن / ما تنسيش اللى اتفقنا عليه
بياتريس تهز راسها و تمشي
صوفيا / اتفقتوا على ايه
كارمن / اهو بنحاول فى كل الطرق نشوف حل مع عمك
حاتم / خير فى حاجه و لا ايه
كارمن / من ساعه ما اكرم اختفى و هو حاطت ايده على كل حاجه و انت عارف بقي
حاتم / ااااه طب انا اقدر اساعد فى اى حاجه
كارمن / لسه مش متاكده ان كنت هتقدر و لا لا
حاتم يضحك
حاتم / هى مش النوع المتعود عليه بس شكلها مطيعه
صوفيا / فوق ما تتخيل
حاتم / بصراحه انا حوار الصالونات ده عمرى ما فكرت فيه بس الحقيقه زن بابا و الظروف عموما مشجعانى أخوض التجربه و زى ما قولت انا اهم حاجه عندى انها تكون هاديه و مطيعه
كارمن / هتلاقى اهدى من كدا ايه دى ما بتتكلمش بس خد بالك مهره بنت ذكيه جدا و طلعالى فى حاجات كتير لتكون فاكر انى بديك حاجه اى كلام
حاتم / لا دا انا كدا ادوس بقي بقلب جامد
كارمن / بس فى حاجات لازم تعرفها عشان نبقي على نور قبل ما اتكلم مع مهره فى الموضوع
صوفيا/ انا قولت له كل حاجه
كارمن / انتى نفسك ما تعرفيش كل حاجه
الكل ينتبه مهره ترجع الكل يسكت
كارمن / ها ما قولتش ايه رايك تحب تيجي المكتب افرجك على اللبوم الصور و لا بعد الشاى
حاتم / مفيش مشكله نشرب الشاى و احنا بنتفرج على الالبوم
كارمن تضحك و تقوم
كارمن / خليهم يعملوا الشاى يا صوفي
صوفيا / من عنيا
الكل يقوم و تفضل مهره لوحدها تفتح الموبايل و تطلع فيديوهات لغه الإشاره و تتعلم
......................
فى المكتب
كارمن / انا بنتى اتظلمت جامد اوى يا حاتم خسرت كل حاجه لمجرد انها وثقت فى واحد حيوان و المصيبه ان الحيوان ده يبقي اخوها ... بس دة مش غلطتها دى غلطتى انا انى سبتهالهم
حاتم ساكت
كارمن / انا ما كنتش اعرف اى حاجه عن اللى صوفيا عملته و انها كلمتك و عندى عروسه و تعال شوفها و لا كنت اتخيل انها تعمل كدا ... بس ما كانش ينفع اسيبك تعجب بيها و بعدين تتهمنى انى خبيت عليك اصل كدا كدا هتعرف ... دا غير انى واثقه فيك
حاتم / هو طبعا شكرا على ثقه حضرتك دى بس ... انا مصدوم مش عارف ارد
كارمن / مهره مش فقيره و لا مستنيه فلوس من حد انت عارف كويس مين ابوها و مين امها و مع كدا بتعيش عيشه عاديه جدا يعني عمرها ما هتطمع فيك بالعكس هى اللى مطمع جدا لاى حد ... دا غير انها مطيعه و هاديه و مؤدبه و عاوزه تعيش و انا و انت عارفين كويس ان الموضوع ده بقي نادر اوى فى الزمن ده
حاتم / انتى هتقولى لى النسويه و قرفها بقي
كارمن / انا كدا كدا قولت لك كل حاجه فكر براحتك و مش لازم تبلغنى بقرارك انا هفهم لوحدى
حاتم / انا شخصيا ما عنديش مشكله مع كل ده مهره بنت جميله و هاديه و واضح انها مطيعه و دا بالظبط اللى فعلا كنت بدور عليه بس عندى معاها كذا مشكله ... الاولى انها لسه على علاقه بعمران ... الناس اكيد هيعرفوا انه طليقها شكلى هيبقي ايه قدام الناس ساعتها
كارمن/ علاقتهم هتتقطع بأمر منك ... مهره بنت متربيه و مستحيل تقول لراجلها لا و مستحيل اكتر انها تزعله ... دا غير انك اكيد هتاخدها معاك أمريكا و هناك ما حدش يعرفها اصلا
حاتم / بس هنا فى ناس عارفين
كارمن / ما حدش منهم هيفتح بقه انا نفسي عرفت بالصدفه اخواتها ما يعرفوش
حاتم / و ان الموضوع اتعرف شكلى هيبقي ايه
كارمن / انا اقدر اقولك كلام كتير اوى و هقنعك بس الحقيقه انا مش هقدر ارخص بنتى اكتر من كدا لو مش مقتنع بيها يبقي كأننا ما اتكلمناش انا كدا كدا مش مستعجله على جوازها بالعكس دا هى اللى بتخدمنى انا و اخواتها زى ما شوفت ... و اكيد و انا عيانه بحتاج حد يدعك لى ضهرى و رجلى و مش هقدر اوصف لك ايديها حنينه قد ايه
حاتم يبتسم
كارمن / احنا بقالنا كتير اوى بنتكلم لوحدنا مش عاوزينهم يحسوا بحاجه يلا بينا نقعد معاهم شويه
حاتم / يا ريت
كارمن تبتسم و تطلع هى و حاتم بره
..........................
فى شقه نسمه
نسمه بتتفرج على التليفزيون مع العيال جرس الباب يضرب تقوم تفتح تلاقى ابوها شايل شنطه
نسمه / اهلا اتفضل يابا تعال
عويس/ تعالى شوفى تعالى
عويس يحط الشنطه على السفره و يفتحها مليانه فلوس
عويس / عشان ما تفتكريش انى بعمل كل ده عشان الفلوس ... انا الفلوس اخر حاجه افكر فيها انا اللى يفرق معايا بجد انتى و عيالك ... و بيتهيألي مبلغ زى ده يعيشكوا مش محتاجين لحد
نسمه / الفلوس دى كلها جت من الارض
عويس / ارض ايه و زفت ايه هو هباب البرك كان مخلينا عارفين نستفيد منها بحاجه دا شافطها فى كرشه من يوم جوزك ما مات
نسمه / امال ايه الفلوس دى كلها يابا
عويس / دا مهرك ... ابن عمك ما رضيش يشمت الاعادى فينا باع حته ارض و جابلي تمنها كله ابدره تحت رجليكى
نسمه / اديهم له تانى يابا خساره الارض
عويس / يا بنتى انا عارف أنك بنت أصول بس
نسمه / انا مش هتجوز فيراس يابا و اتكلمنا فى الموضوع ده كتير
عويس / انا أديت للراجل كلمه
نسمه / خد اخوك و ادخلوا جوه يا بدر
بدر ياخد اخوه و يدخلوا جوه
نسمه /رجع لفيراس الفلوس دى يابا ... انا مش هتجوزه و مفيش قوه فى الدنيا هتخلينى اتجوزه
عويس / الراجل الناقص كان ماشي يلسن عليكي فى كل مكان و دا لا فى مصلحه سمعتك و لا سمعه عيالك
نسمه / الله يرحمه يقول اللى هو عاوزه و ربنا كفيل يجيب لى حقى
عويس / و اخرتها
نسمه / اعمل لحضرتك شاى ؟
عويس / هاتيلى عريس بداله غير صابر و انا هوافق
نسمه / هو انا تقيله عليكوا اوى كدا امال لو كنت باكل من جيبكوا
عويس يضرب نسمه بالقلم
عويس / اتكلمى مع ابوكى بأدب
نسمه تمنع دموعها
نسمه / حقك عليا بس انا مش عاوزه اتجوز
عويس / مش بكيفك و زمن المداديه خلص من عندى و آخر كلام تجهزي نفسك عشان تتلفى بالأبيض و بكيفك يا فستان يا كفن
نسمه / و لا هتقدروا على ده و لا على ده
عويس يقرب من نسمه ما بتتهزش
عويس/ قلبك قوى قوى المرادى خير
نسمه/ عندى اللى ادافع عنه و اعيش عشانه ... عيالي
عويس / هتخسرى عيالك كدا على فكره
نسمه / مش هيحصل
عويس / مين اللى مقوى قلبك و معصيكي على ابوكى
نسمه ما تديش رد فعل
عويس / تمام ... انا من اللحظه دى رفعت ايدي عنك و وريني بقي هتعملى ايه فى الدنيا دى بطولك ... مش انتى عملالي سبع رجاله فى بعض اشربي يا ... يا ام بدر
نسمه / تسلم يابا
عويس يمشي و يرزع الباب وراه نسمه تتخض و تعيط
.....................
أنت تقرأ
الكبيره ٢ بقلم / لولو_محمد
فكاهةالحرب لسه مستمره و الحقيقه مسيرها فى يوم تظهر النور و كل واحد لازم يختار طريقه
